قصص ولادة بعد التثقيف

5328288

تجربتي بالولاده في استراليا كانت تجربه حلوه اتمنى كل البنات يعيشوا نفسها فعلا تعاملهم مختلف جداً من لما دخلت كانوا لطيفين صح كنت متضايقه من كثرت المراجعات بسبب وزن الجنين كان صغير وكان يبغوا يسوا لي طلق صناعي بس رفضت وقلت لهم ابغى اصبر لين تاريخ ولادتي كان تاريخ ولادتي ١٨/١ يوم السبت ويوم الاثنين حسيت طلق خفيف ورحت المستشفى سوا لي الكشف قالت لي الرحم فاتح ٣ سانتي رجعت البيت ماحبيت ابقى قالوا لي اذا استمر ارجعي العصر او بكره عاد خف الطلق كثير وكان متباعد مره انتظرت الاثنين والثلاثاء مارحت للمستشفى ويوم الاربعاء كان عندي موعد رحت وقلت لهم انو الطلق وقف تقريباً قالت الطبيبه خلاص انا بجهز الغرفه وراح نفتح لك موية الراس علشان يحمى الطلق وتولدي جاء يوم الخميس كان المستشفى زحمه ومااستقبلوا حالتي والحمد لله لان اصلاً ماكنت احس بأي بوادر ولاده بعدها يوم الجمعه يوم١٧/١ رحت موعد كمان تخطيط وبنفس الوقت قالوا لي ولاده مابننتظر ليوم ١٨ لان الجنين ممكن مايتحمل واذا تأخرنا ممكن اختاج قيصري ( طبعاً كله كلام لان الحمد لله ماكان فيه اي داعي بس هم عندهم انظمه معينه للأجنه اللي وزنهم صغير ) استخرت وتوكت على الله وسوا الكشف باقي الرحم مفتوح ٣ فكوا المويه وحطوا لي محلول في الوريد علشان يزيد التقلصات والحمد لله بدا معي الطلق ينتظم الساعه ١٠:٣٠ الصباح وكان معي الممرضه طول الوقت تسوي لي مساج وتهديني وتطبطب عليه كانت جداً حنونه وخلوقه الله يوفقها واستخدمة الكره كانت جداً مفيده وبعدها زاد الطلق وكنت طول الوقت احاول اطبق طريقة التنفس اللي تدربت عليها من الدوره واكون هاديه علشان اكون مركزه وكان زوجي يذكري كل ماانسى ولما جاء وقت الدفع كنت ادفع بالبدايه صح بعدين صرت انسى وألخبط اخذت نفس عميق وهديت نفسي والممرضه كانت تطبق طريقة التنفس قدامي علشان ماانسى والحمد لله كنت مره متمكنه حتى الممرضات قالوا اني كنت هاديه ولا رفعت صوتي والتنفس طبقته صح وماتأخرت بالدفع و على الساعه ١:٣٥ ولدت( سحاب) الحمد لله طبعاً بدون قص عجان صار فيه تشققات في المنطقه بس كلها سطحيه والحمد لله مره مااحس فيها امشي واروح واجي من اول ما ولدت ومرتاحه بالقومه والسدحه ... الحمد لله من قبل ومن بعد اتمنى لكم جميعاً ولادات ميسره يارب ♥♥

والفضل لله وحده
ثم لدولا سكينه ودورتها
الله يسعدك ويوفقك ويرزقك ♥♥😭

3.11K views16:59