ገና የፍቅር ጓደኛሽ በሆነ፣ ቀለበት ባላደረገልሽ እና ቃል-ኪዳን ባልገባልሽ ወንድ ቤት ገብተሽ ልብሱን እያጠብሽ፣ ምግቡን እያበሰልሽና ቤቱን እያስተካከልሽ የሚስትነትን ሚና ለመጫወት አትሽቀዳደሚ። ወንዶች እነዚህን ጥቅማጥቅሞች በነጻ ባገኙበት ግንኙነት ውስጥ አንቺን ለማግባት ምንም ዓይነት አጣዳፊ ፍላጎት አይሰማቸውም። ምክንያቱም የሚስትነትን አገልግሎት ለፍቅረኛሽ በነጻ እየሰጠሽው ስለሆነ፣ ራሱ አንቺን በክብር ሚስቱ ሊያደርግሽ የሚያስፈልግበትን ብቸኛ ምክንያት እየነጠቅሽው ነው። ወንዶች ደግሞ ዋጋ የሚሰጡት በቃል-ኪዳን ላገቧት ሴት ብቻ ነው።

📕 ርዕስ፦ እንደ ሴት ሁኚ፤ እንደ ወንድ አስቢ
✍️ ደራሲ፦ ስቲቭ ሃርቪ

📚 @Bemnet_Library

በሕይወት ውስጥ ከባዱ ነገር ብቸኝነት ይመስለኝ ነበር...አሁን ግን እንደተረዳሁት በሕይወት ውስጥ ከባዱ ነገር ብቸኝነት ሳይሆን አብረውህ ያሉ የቅርብ ሰዎች ብቻህን እንደሆንክ እንዲሰማህ ሲያደርጉ ነው

📕 ርዕስ:- ለእርቃን ሩብ ጉዳይ....
✍️ ደራሲ:- ሕይወት እምሻው

📚 @Bemnet_Library

የባቢሎን ወጣቶች ወደ ታላቁ ባለፀጋ ወደ አርካድ መጥተው በቁጭት ጠየቁት፦

«አርካድ፣ አብረን ነው ያደግነው፤ በአንድ መምህር ስር ተምረናል፤ በአንድ ሜዳ ተጫውተናል። በምንም ነገር ከእኛ የተሻልክ አልነበርክም። ታዲያ እንዴት አንተ የባቢሎን ታላቁ ባለፀጋ ልትሆን ቻልክ? እኛ ግን ቀን ከሌት እየደከምን ከዕለት ጉርስ ባለፈ ምንም ሳናስቀር በድህነት እንኖራለን?»

አርካድ ፈገግ አለና እንዲህ አላቸው፦ «ምክንያቱም እናንተ ለህይወታችሁ ወሳኙን የሀብት ህግ አልተማራችሁም። እስካሁን ያገኛችሁትን ገንዘብ ለምግብ፣ ለልብስ፣ ለቤት ኪራይና ለሌሎች ሰዎች ስትሰጡ ኖራችኋል። እስኪ ንገሩኝ፣ ከደከማችሁበት ገንዘብ ለራሳችሁ ያስቀራችሁት ስንት ነው?»

ግራ ተጋብተው «የምናገኘው እኮ ለህይወት ወጪያችን ነው፤ ለራሳችን የምናስቀረው ከየት ይመጣል?» አሉት።

አርካድም «ሞኞች ናችሁ!» አላቸው። «ለልብስ ሰፊው ትከፍላላችሁ፣ ለዳቦ ሻጩ ትከፍላላችሁ፣ ለመንግስት ግብር ትከፍላላችሁ... ለሁሉም ከከፈላችሁ በኋላ ለራሳችሁ ግን ባዶ እጃችሁን ትቀራላችሁ። ሀብታም መሆን ከፈለጋችሁ ከመጀመሪያው ጀምሮ ከምታገኙት ገቢ ሁሉ ቢያንስ አንድ አስረኛውን (10%) ለራሳችሁ ማስቀረት አለባችሁ።

ያ ለራሳችሁ የምታስቀሩት ገንዘብ ለእናንተ አገልጋይ ሆኖ ተጨማሪ ገንዘብ ያፈራላችኋል፤ ከዚያም ያ ያፈራው ገንዘብ ሌላ ገንዘብ ይወልዳል... የሀብት ሚስጥር ይኸው ነው!

📕ርዕስ፦ የባቢሎኑ ባለፀጋ
✍️ደራሲ፦ ጆርጅ ሳሙኤል ክላሰን

📚 @Bemnet_Library

አንድ ቀን እሁድ ጠዋት በኒውዮርክ ባቡር ውስጥ ተቀምጬ ነበር። በባቡሩ ውስጥ ያሉት ሰዎች በፀጥታ ጋዜጣ ያነባሉ፣ አንዳንዶቹ አረፍ ብለዋል፤ ድባቡ እጅግ የተረጋጋና ሰላማዊ ነበር።

ድንገት አንድ አባት ከልጆቹ ጋር ወደ ባቡሩ ገባ። ልጆቹ ልክ እንደገቡ ጩኸትና ረብሻ ጀመሩ። እርስ በእርስ ይሯሯጣሉ፣ ዕቃ ይወረውራሉ፣ የሰዎችን ጋዜጣ ይቀዳሉ... አባታቸው ግን ከጎኔ ተቀምጦ ዓይኖቹን ጨፍኗል፤ ልጆቹን ለመቆጣትም ሆነ ለማስቆም አንዲትም ቃል አልተናገረም።

በባቡር ውስጥ የነበሩት ሰዎች ሁሉ መበሳጨት ጀመሩ። እኔም መታገስ አቃተኝ።ከዛ በሰውየው ተናድጄ ዞር አልኩና በቁጣ ስሜት፦«ጌታዬ! ልጆችህ ሰዎችን ሁሉ እየረበሹ እኮ ነው፤ ትንሽ እንኳን ልትቆጣጠራቸው አትችልም እንዴ?» አልኩት።

ሰውየው ዓይኑን ቀስ ብሎ ከፈተ። ከዛ ልክ ከእንቅልፉ የነቃ ይመስል ዙሪያውን ተመልክቶ በደከመና በተሰበረ ድምፅ እንዲህ አለኝ፦

«ትክክል ነህ፤ የሆነ ነገር ማድረግ ነበረብኝ። አሁን ከሆስፒታል መምጣታችን ነው። ከሁለት ሰዓት በፊት እናታቸው ሞተችብን።እና በዚህ ሰዓት ምን ማድረግ እንዳለብኝ አላውቅም፤ ጭንቅላቴ ደንዝዟል፤ እነሱም ህመማቸውን እንዴት እንደሚወጡት የተረዱ አይመስለኝም...» አለኝ

በዚያች ቅጽበት በውስጤ የተሰማኝን ድንጋጤ መገመት አትችሉም።በአንድ ሰከንድ ውስጥ ልቤ ተሰበረ፤ በውስጤ የነበረው ብስጭትና ቁጣ በአንዴ  ወደ ጥልቅ ኀዘንና ርህራሄ ተቀየረ። «በጣም አዝናለሁ... ልረዳህ የምችለው ነገር አለ?» አልኩት። ሁኔታው አልተለወጠም፤ ነገር ግን የእኔ አመለካከት በቅጽበት ተቀይሮ ነበር።

አብዛኛዎቻችን እንዲህ ነን።ሰዎችን ወይም ዓለምን የምንመለከተው «እነሱ ባሉበት ሁኔታ» ሳይሆን፤ እኛ ውስጣችን ባለው «የአስተሳሰብ መነጽር» ነው።ነገር ግን በህይወታችሁ ላይ የምር እውነተኛ ለውጥ ማምጣት ከፈለጋችሁ ባህሪያችሁን ብቻ ከመቀየር ይልቅ፣ መጀመሪያ ነገሮችን የምታዩበትን መነጽር ቀይሩ!የራሳችሁን ብቻ ሳይሆን የሌሎችን ውስጥ ተመልከቱ!

📕ርዕስ፦7ቱ የስኬታማ ሰዎች ልማዶች
✍️ደራሲ፦ስቴቨን ኮቪይ

📚 @Bemnet_Library