منصة بناء التربوية السودانية

14 طريقة تخلي ولدك يحب القراية
مهما شرحنا ما حاتتخيل قدر شنو تدريب ولدك على مهارة القراءة وتحمل مسكة الكتاب حاتكون نقطة تحول في حياته كلها بإذن الله، حاتخليهو أوعى وأكبر من عمره ، حايفوت أقرانه، حاتكون أديتو مفتاح النجاح لحياته كلها بإذن الله
طيب عشان تصل للمرحلة دي وتخلي ولدك يحب القراءة دي خطوات عملية حاتساعدك جداً:

1- كن أنت قدوته في القراءة:
خليك إنت قدوة ليهو ، خليهو يشوفك وقت طويل وإنت ماسك كتاب وبتقرأ، الأطفال بيقلدوا ، ودي أول وأقوى وسيلة عشان ولدك يشعر بأهمية القراءة ويحبها.

2- ابدأ بالقراءة معه وهو صغير:
من وهو صغير، حتى قبل ما يعرف الحروف والقراية، أقرأ ليه إنت بصوت عالي، القراية معاك حاتبقى ذكريات حلوة بتربطها بالمحبة.

3- اجعل عينه تقع على الكتب دائماً:
خلي الكتب قدّامو في البيت، في الصالون، في سريرو، في الشنطة.. كل ما يشوف كتاب، عقله حايتعود عليه.

4- اختر الكتاب المناسب له:
جيب ليهو كتب تناسب سنو واهتماماتو ، لو بحب العربات، جيب ليهو كتب عن العربات، لو بحب الحيوانات جيب ليهو قصص حيوانات، ما تفرض عليه الكتب اللي إنت بتحبها.

5- أنشئ له ركن قراءة أو مكتبة صغيرة في البيت:
جهّز ليهو كرسي صغير، رف كتب، شوية إضاءة مريحة.. حسسو أنو دا مكانو المفضل، يجي يقرا فيه متى ما عاوز.

6- لا تربط القراءة بالعقاب أو الدراسة:
خلي القراية متعة، ما تكرهو فيها، ما تقول ليهو: لو ما قريت ما بخليك تلعب، خليه يحبها عشان هي فعلاً ممتعة بالنسبه ليهو.

7- امدحه إذا قرأ شيئاً ولو يسيراً :
لو قرا صفحة، قول ليهو: يا سلام عليك، أنا فرحان أنك قريت وفخور بيك جدا، التشجيع ده بحفزو يستمر ويقرا أكتر.

8- جرب القراءة المشتركة معه كأنها لعبة:
مثلاً إنت تقرا سطر، وهو يقرا سطر ، ولو معاهو أمه أو أخوه التاني يكون أفضل

9- أدخل القراءة في برنامجه اليومي
قبل النوم، بعد الفطور، في المواصلات... أي وقت فاضي ممكن يتحوّل لفرصة تخليهو يقرأ فيها.

10- اجعل القراءة مربوطة بالفرح والمكافآت
مثلاً: لو خلصنا القصة دي، حانعمل فشار، أو حانطلع نتمشى...إلخ المهم أربط القراية بحاجة تفرحو.

11- اجعله يستمع إلى الكتب المسموعة
شغل ليهو مقاطع صوتية فيها كتب مسموعة، مثلاً قصص صوتية ، خليه يسمع القصة وهو بيلعب، الطريقة دي حاتحفزو يقرأ المرة الجاية بنفسه

12- اصطحبه في زيارة المكتبات ومعارض الكتب
خلي مشيته للمكتبة متعة، يخش يتفرج على الكتب والأقسام ويختار الكتاب الدايرو بنفسو

13- علمه كتابة ملخص بسيط للقصة
بعد ما يقرا، خليه يرسم أو يكتب جملة عن شخصيات القصة، كدة حاتتربط القصة اللي قراها بمتعة الرسم أو الكتابة

14- أنشئ منافسة ممتعة بينه وبين إخوته في القراءة
أعمل ليهم مسابقة أو تحدي ، اللي بيخلص قراية الكتيب الفلاني عنده جائزة، وفي النهاية أدي كل واحد منهم هدية تشجيعية على جهده في القراية حتى لو ما كان هو الفائز بجائزة التحدي
وخلي في بالك دايما أنو ما في طفل ما بحب القراية، لكن في أطفال ما لقوا الزول الصبُور اللي يوريّهم جمالها ويدربهم عليها.

#روضة_ارتقاء_القرآنية_المطورة
#تاج_الحافظين
موقعنا : أم درمان - شارع الوادي الواحة شرق - مربع 5 - شرق مول اليقين
#نؤسس_ونربي
للتواصل واتساب 0119111973

❤7

654 views14:35