خلي لعبتك لأخوك.. إنت الكبير!
في كتير من البيوت لمن الأطفال يختلفوا على لعبة، بتسمع الأم تقول للكبير:
"خليهو لأخوك.. إنت الكبير"
وكأنو كونه "كبير" معناها لازم يتنازل في كل مرة عن ممتلكاته!
السبب في الحكاية دي غالبا أنه الأم دايرة ترتاح من الصوت المزعج بتاع بكاء الطفل الصغير والفوضى اللي عاملها عشان يدوهو لعبة أخوه،
فبتقول للكبير : خلي اللعبة لأخوك ، إنت الكبير كبر عقلك!
وفعلا ممكن تحت الضغط والإجبار يتنازل ويديها لأخوه بحقد وغضب وتوعد

الحاجة الما منتبهة ليها الأم أنو لمن نكرر التصرف دا، بنرسل رسائل غلط للطفلين من غير ما ننتبه:
1- الكبير حايحس إنو ما عندو قيمة، وأمو دايمًا ضدو، وأخوه ده مدلع!
2- الصغير حايتعلم إنو البكاء سلاح، وحايتبرمج أنه كل ما يبكي ويجوط حاياخد الدايرو.
3- الغيرة بتكبر، والحب بين الإخوان بقى مهدد والحقد بدأ يتسلل
4- الكبير بيبدأ يقلد الصغير، يتصرف زيو عشان يلقى الاهتمام وطلباته تتنفذ.

طيب نحلها كيف؟
1- الحق ما بيتقاس بالعمر، لو اللعبة بتاعت الكبير، ما لازم يتنازل عنها عشان أخوه زعلان، دا حقو، وترسيخ قناعة أنك تتمسك بحقك في عقله في الحقيقة أهم من سكوت أخوه الصغير.
2- لازم الاثنين يفهمو أنو البكاء ما وسيلة لتلبية الطلبات، يفهمو أنو ممكن ياخدوا حقهم بهدوء، لكن في المقابل مهما بكيت أو عملت جوطة ما حانديك حاجة ما حقتك.
3- الخلافات ما دايمًا حلها التنازل، لو الحاجة مشتركة، نعلمهم يتفقوا: دور ليك، ودور لأخوك. ولو ما عرفوا يتشاركوا اللعبة تترفع منهم كلهم.
4- الكبير ما دايما عنده قوة تحمُّل، هو زاتو طفل، وبيحتاج للتملك وللاهتمام، ما نكسرو عشان نرضي التاني، كل واحد فيهم لازم يحس بالأمان والمحبة.
5- ممكن يكون في ألعاب بديلة احتياطية من الألعاب الصغيرة تخليها في البيت ما يشوفوها، بتحل ليك مشاكل زي دي
6- ضروري الأم يكون عندها عزلة مكانية ، يعني تصل مرحلة قدر ما الشافع يكورك ويجوط تكون محافظة على هدوءها وصوتها ما يعلى كأنها معزولة عن الغرفة دي وقاعدة في مكان تاني

بعد ده كله دي مرحلة وبتعدي خلي ذكرياتك معاهم حلوة قدر الإمكان..
#روضة_ارتقاء_القرآنية_المطورة
#نؤسس_ونربي
أم درمان شارع الوادي الواحة شرق (مربع5) شرق مول اليقين
للتواصل 0119111973

حاجات بتحطم شخصية طفلك [1]

إعداد: الفريق التربوي بروضة ارتقاء القرآنية المطورة - الواحة شرق

1. المقارنة
أي مقارنة بتقولها للطفل بتضرب شخصيتو ، بالذات مقارنتو مع أخوانه في البيت

مثلا: شوف أخوك ما شاء الله عليهو عمل الحاجة دي وإنت قاعد إلا يكلموك كم مرة

أو في السلبيات : هسي لو كان ده أخوك فلان ما كان حايعمل كدة

2. التدخل في كل شؤون الطفل
هنا الأم أو الأب بيتدخلو في كل صغيرة وكبيرة من قرارات طفلهم، حتى مثلا نوع اللعبة اللي دايرها أو ياكل من ياتو صحن أو يلبس ياتو هدوم أو يشتري شنو بقروشو... وما بدي الطفل أي اختيار

3. العقاب غير المتزن
وإنت بتعاقب طفلك

(1) لازم يعرف هو بتعاقب عشان شنو بالزبط

(2) يكون العقاب قدر الخطأ ويكون منوع ما نفس العقاب كل مرة

(3) ما تجرح الذات
ما تقول مثلا : يا غبي
أو : في حياتي ما شفت أغبى منك
أو: أصلو ما منك فايدة
أو : أصلك ما نافع

(4) ما تجيب ليهو سيرة خالص لأخطاء عملها زمان لأنه كدة بتعمل كثافة حسية وبترسخ ليهو أنه زول كعب وسيء لأنه الطفل بيكون صورة عن نفسو من خلال كلام وتعابير الآخرين وبالذات الوالدين

موقعنا : أم درمان الواحة شرق مربع 5 ، شرق مول اليقين
للتواصل 0119111973

حاجات بتحطم شخصية طفلك - الجزء الثاني

حاجات بتحطم شخصية طفلك [الجزء الثاني]
إعداد : الفريق التربوي بروضة ارتقاء القرآنية المطورة - أم درمان الواحة شرق

4. السخرية
أي سخرية من الطفل سواء في شكله أو لونه أو صوته أو أخلاقه أو تصرفاته دي بتقتل شخصية الطفل بالذات لو جات السخرية من الوالدين،
لازم الطفل يحس بالأمان مع الوالدين وأنهم بحبوهو حب غير مشروط وأنه مهما كان شكلو أو لونو أو حتى أخطاؤه هم بحبوهو بشكلو ده وبي كل تفاصيلو

5.الصراخ
مشكلة الصراخ في وجه الطفل أنو بيحسسو بعدم قيمتو وبأنه أخطاؤه بقت كتيرة وأنو بقى مزعج والناس بتتضايق منو ..
غير كدة بعد فترة حايبقى الصراخ ما بيأثر في استجابة الطفل والمصيبة الكبيرة أنو في الغالب حاتنتقل ليهو عدوى الصراخ هو نفسو ويبقى بمارسو مع أخوانو الأصغر منو
حاول دايما تحافظ على هدوءك مع طفلك حتى وإنت بتعاتبه أو بتعاقبه

6. الدلال الزائد
لو فعلا بتحب طفلك لازم تعودو أنو ما كل حاجة هو نفسو فيها حاياخدها، لازم يتعود أنو في حاجات ممنوعة لأنها ضارة أو وقتها ما جا لسة أو لأنها دايرة مجهود وما بتجي بسهولة وأنك ما حاتديها ليهو أبدا حتى لو بكى
غالبا الدلال سببو الأساسي شدة المحبة للطفل سواء لأنو الطفل الأول أو الأخير أو لأنو عيان مثلا، لكن اتذكر أنك كدة بتحطم في شخصيته لأنه لمن يكبر ويطلع للدنيا حايتصدم بأنه ما كل حاجة نفسو فيها بتتحقق، وحايلقى نفسوا بواجه مواقف صعبة شديد براهو بدون تعاطف من أي زول، فده حايخليهو يبقى حساس شديد وما عندو عزيمة
عود طفلك يسمع كلمة لا أحيانا عشان مصلحتو

7. الاعتماد الكلي على الآخرين
الطفل اللي متعود أي حاجة بتجيهو جاهزة، لأنه أمه أو أبوهو أو حتى الشغالة حايعملوها ليهو ده حايعاني شديد لمن يكبر
لازم تخليهو يتحمل مسؤوليتو بنفسو على قدر عمره، مثلا النظافة الشخصية، نظافة المكان، المحافظة على الممتلكات، ترتيب السرير، تلبية الاحتياجات... دي كلها مفروض يتعود يعملها بنفسو ويساعد الأم والأب ويتحمل المسؤولية من هو صغير .. حاول دايما تديهو مهام بسيطة يساعد فيها قدر عمره

8.مشاهدة شجار بين الزوجين
اللحظات الصعبة اللي بيعيشها الطفل وهو بيشوف المشاكل والصراخ أو حتى الضرب بين الأم والأب بتحطم شخصيته بطريقة رهيبة وبيكون معرض لانعدام الثقة بالنفس ، والسلوك العدواني، واضرابات الأكل سواء بفقدان الشهية أو الأكل بشراهة مبالغ فيها ، والإدمان بأنواعه ،والقلق والصداع ، وضعف التواصل الاجتماعي مع الناس ، والضعف الأكاديمي ...إلخ
عشان كدة دايما ما تفتح النقاش في موضوع بيجيب خلاف قدام الأطفال
برضو لازم الطفل يسمع كلام سمح من كل طرف عن التاني حتى لو كان الأب والأم منفصلين لأنه ده بيساعد على شعوره بالأمان واستقراره النفسي

#روضة_ارتقاء_القرآنية_المطورة
#نؤسس_ونربي
موقعنا: أم درمان الواحة شرق (مربع 5) شرق مول اليقين
للتواصل : 0119111973

التربية باللمس
إعداد: الفريق التربوي بروضة ارتقاء القرآنية المطورة_ أم درمان الواحة شرق

من التقنيات التربوية المهمة شديد في بناء الشخصية المتوازنة وعلاج الاضطرابات النفسية : تقنية التربية باللمس
كتير من الآباء والأمهات بيهملو جانب التربية باللمس، سواء بالاحتضان أو التقبيل أو مسح الرأس أو مسك اليد، بالذات لأبناءهم الذكور، بفهم أنه ما دايرو يبقى مدلع - خليهو يبقى راجل - دايرو يتعلم الخشونة – ما دايرو يتعلق بي شديد
مع أنه التربية باللمس من أهم الاحتياجات النفسية للطفل ومن صميم منهج النبي ﷺ في التربية

[أهمية اللمس]
اللمس والحضن في عالم الأطفال مصدر للسعادة والشعور بالأمان
اللمس بيولد الاطمئنان وبيهدئ مشاعر الخوف
اللمس دليل على القبول ، وبيعزز الانتماء للأسرة ، وبيخلي الطفل يفهم أنو عنده قيمة وأنو أبوه وأمه راضين عنه
اللمس تعبير صادق عن الحب غير المشروط
في عام 2020م في تسعة باحثين عملوا دراسة عن اللمس، وصلت الدراسة لنتيجة أنو الاحتضان ليهو تأثير على نمو الإنسان، وأنو في كل مرة يتعرض فيها الإنسان إلى اللمس بيشعل مناطق في الدماغ مسؤولة عن السلوك، والاستجابة، وتوليد الأفكار

[أنواع اللمس]
في أنواع كتيرة من اللمس إيجابية ومؤثرة منها:
- احتضان الطفل
- تقبيل الطفل
- وضع اليد على كتف الطفل
- ضم الطفل إلى جانبك الأيمن
- وضع يدك في يد الطفل أثناء المشي أو الحديث
- حمل الطفل والمشي به بدون مبالغة
- تنويم الطفل على صدر والده في بعض الأوقات
- الطبطبة
- وضع اليد على رأس الطفل
- مسح رأس الطفل
- لمس نهاية الرأس
- وضع اليدين على الخدين
- مسح صدر الطفل
- أي ألعاب فيها ملامسة لطفلك

[احتياج الطفل من اللمس]
حسب الدراسات النفسية بيحتاج الطفل العادي 4 – 12 حضن في اليوم الواحد
وتكون مدة الحضن الواحد حوالي 20 ثانية

[أثار عدم اللمس]
وجود الطفل في بيئة ما بتستخدم اللمس والاحتضان ممكن ينتج عنها ما يسمى touch starvation (مجاعة اللمس)
ومجاعة اللمس بينتج عنها الشعور بالضغوط بسرعة ، وسرعة الإصابة بالاكتئاب، والقلق، بل الأغرب من كدة : سرعة الإصابة بالالتهابات!
بعض الأطفال اللي بيعانو من مجاعة اللمس، بيلجأ أنو يحضن حاجات بديلة، زي المخدة، البطانية، الحيوانات الأليفة، الألعاب والدمى ، أو حتى يلمس نفسه بيده كنوع من التعويض!

[الرسول ﷺ والتربية باللمس]
ثبت عن النبي ﷺ أنه كان بيستخدم التربية باللمس في أحاديث كتيرة ، شوف كم حديث فيهو : فمسح النبي ﷺ على صدره، أو: فأخذ بيدي، أو : أخذ رسول الله ﷺ بمنكبي، أو: فوضع يده على صدري، أو: فوضع يده على رأسي، أو : فمسح رأسه ودعا له...إلخ
بعض الباحثين جمع أسماء حوالي 80 صحابي استخدم معهم النبي ﷺ التربية باللمس (كتاب : من لمسه النبي صلى الله عليه وسلم ومسح عليه ، د. إبراهيم الودعان)

[عود أسرتك على اللمس]
خلي اللمس عادة في أسرتك ، سواء كان أولادك أطفال أو كبار ما مهم، المهم تعود نفسك تحضنهم وتقبلهم ، سواء لمن تلاقيهم أو تمر عليهم، عودهم يحضنوك كل يوم أول ما يصحو الصباح وقبل النوم ، بسبب أو بدون سبب، وبإذن الله حايكون البيت مليان بالمحبة والألفة والتواصل

[النصيحة أثناء اللمس]
جرب أنك تدي ولدك نصيحة وإنت ماسك يدو أو وإنت بتمسح على راسو وشوف الفرق في الاستجابة

روضة ارتقاء القرآنية المطورة - أم درمان الواحة شرق
#نؤسس_ونربي
موقعنا : أم درمان الواحة شرق (مربع 5) شرق مول اليقين
للتواصل 0119111973

بدأ التسجيل بفضل الله.. حبابكم عشرة

بتربي أطفالك ولا بترعاهم؟!
إعداد: الفريق التربوي بروضة ارتقاء القرآنية المطورة _ أم درمان الواحة شرق

حصل لاقاك زول قال ليك أنا ربيت أولادي أحسن تربية ووفرت ليهم أحسن حياة لكن ما نفع فيهم؟
في خلط كبير بحصل عند كتير من الآباء والأمهات تلقاهو بيهتم برعاية أطفاله وقايل نفسه بيربي فيهم
الفرق كبير بين (رعاية) الطفل و(تربية) الطفل
الرعاية أنك تهتم بأسباب العيش الكريم، زي المأكل والمشرب، والمسكن، والملابس وبعد كدة الترفيه
أما التربية فهي بتركز على شخصية الطفل

التربية مبنية على خمس قواعد:
أولاً: بناء القناعات
ودي بتشمل : العقيدة ، المبادئ والقيم، الأخلاق، الطموحات في الحياة...

ثانياً: توجيه الاهتمامات
ودي معناها أنك تعرف اهتمامات طفلك والحاجات اللي بتشغل وقته وتعيد تقييمها وتصحيحها وتوجيهها الوجهة السليمة

ثالثاً: تنمية المهارات
ودي معناها تطوير الطفل وتدريبو على أنواع المهارات المختلفة بكل أنواعها ، مهارات عقلية ، اجتماعية ، بدنية ، مالية ، إدارية

رابعاً : فهم قواعد العلاقات
توريهو يصاحب منو ويخلي منو ، متين العلاقة بزول بتكون مفيدة ومتين بتكون مضرة، متين يقرر يتخلى عن علاقة ، كيف يحمي نفسو من وسط مسموم أو مجتمع فيهو خطورة عليهو

خامساً : اختيار القدوات
تفهم ولدك منو هم قدواته في الحياة؟ سواء قدوات تاريخية أو معاصرة، وليه يعتبرهم قدوات ويحاول يقتدي بيهم أساساً؟ والمعايير شنو اللي خلتهم قدوات؟ ومنو القدوات اللي بقتدي بيهم في كل صغيرة وكبيرة والقدوات اللي بقتدي بيهم في مجال معين بس
دي قواعد التربية الخمسة

وبعد تبذل كل جهدك وطاقتك في تربية طفلك ورعايتو ما تنسى تدعي ليهو دايما بالهداية والرشاد ..
إنت أبذل الأسباب والتوفيق من الله

#روضة_ارتقاء_القرآنية_المطورة
#أم_درمان_الواحة_شرق_مربع5
#نؤسس_ونربي
للتواصل : 0119111973

وصايا شتوية لحماية الأطفال من نزلات البرد بإذن الله - روضة ارتقاء القرآنية المطورة

سلسلة القصص التربوية المصورة من روضة ارتقاء القرآنية المطورة بأم درمان
القصة ٢ : ليس عيدنا

[1] في إحدى الليالي الهادئة كان عمر في غرفته يتأمل جمال القمر من خلال النافذة

[2] فجأة سمع عمر أصوات الاحتفالات ، التفت فوجد الألعاب النارية تنطلق من بعيد

[3] ذهل عمر وهو يتأمل هذا المنظر الجميل ، قائلاً : راااائع ! إنها جميلة! لكن هل جاء العيد؟

[4] فرح عمر وصار يقفز ويقول : مرحى مرحى ! جاء العيد ، أنا أحب العيد .. أنا أحب العيد .. يا سلاااام!

[5] فكر عمر وتساءل : هل هو عيد الفطر الذي نأكل فيه الحلوى؟

[6] لا لا ، أظن أنه عيد الأضحى الذي نأكل فيه الخروف

[7] ذهب عمر مسرعا ونادى أمه قائلاً : تعالي يا أمي لقد جاء العيد، انظري إلى النافذة! هل سنأكل الخروف غدا؟

[8] قالت الأم : لا يا صغيري، هذا ليس العيد، هذه احتفالات برأس السنة الميلادية، وهي ليست من أعيادنا نحن المسلمين ، بل هي من أعياد الكافرين

[9] نحن كمسلمين ميزنا الله بعيدين جميلين فقط ننتظرهما بكل شوق ، عيد الفطر الذي نأكل فيه الحلويات وعيد الأضحى الذي نأكل فيه الخروف ونستمع فيه بالشواء اللذيذ