🇦🇿Prezident: "Böhranlı vəziyyəti xalqımız üçün sosial layihələr və sosial proqramlarla yüngülləşdirməyə çalışırıq. Dünya postpandemiya dövrünə hələ təzə-təzə uyğunlaşır. Bir çox ölkələrdə, o cümlədən Azərbaycanda kəskin qiymət artımı müşahidə olunur. Bizim də iqtisadiyyatımız dünya iqtisadiyyatının bir parçası olduğu üçün əfsuslar olsun ki, biz də bu mənfi təsirə məruz qalmışıq.

Bu yaxınlarda imzaladığım çox geniş sosial paket bir daha bunu göstərir. Yəni, müharibədən təzə çıxmış ölkə, özü də ərazisinin 20 faizi tamamilə dağılmış vəziyyətdə olan ölkə əgər sosial sahəyə bu qədər vəsait ayırırsa, deməli, bizim sosial siyasətimiz dəyişməz olaraq qalır və əlbəttə ki, bizim iqtisadi gücümüzü göstərir”.

🇦🇿Dövlət başçısı: “Mən bunun canlı şahidiyəm ki, müharibədən sonra onsuz da Azərbaycan siyasətinə olan müsbət münasibət daha da artdı, yəni, bizə olan rəğbət daha da artdı. Çünki dünyanın siyasi elitası yaxşı başa düşür ki, biz bu Qələbəni nəyin bahasına əldə etdik, hansı risklərə getdik, hansı qüvvələrlə mübarizə aparırdıq və bu gün də aparırıq. Yəni, müharibə bitsə də, mübarizə hələ davam edir və əminəm ki, biz qalib gələcəyik. Çünki biz haqq yolundayıq və bizim həm hərbi, həm siyasi gücümüz, o cümlədən iqtisadi müstəqilliyimiz gücümüzü əlbəttə ki, artırır”.

🇦🇿”Ermənistan istəyindən asılı olmayaraq, Zəngəzur dəhlizinin işə salınması qaçılmazdır. Ermənistan bu gün faktiki olaraq bu dəhliz üzrə öhdəliklərini yerinə yetirməkdən yayınır", - dövlət başçısı bildirib.

İlham Əliyev əmin edib ki, dəhlizin açılması Azərbaycan üçün strateji əhəmiyyət kəsb edən layihədir.

🇦🇿İlham Əliyev: “Bu günədək 13 min şəhid ailəsi və müharibə əlili dövlət dəstəyindən faydalanıb”.

🇦🇿Prezident: “Biz nəqliyyat sahəsində layihələri uzun illərdir ki, icra edirik. Rusiya-Ukrayna müharibəsi bizim gördüyümüz işlərin əhəmiyyətini daha da artırır.

Biz hesab edirik ki, təkcə Şimal-Cənub nəqliyyat dəhlizi ilə Azərbaycan ərazisindən mərhələli qaydada 15 milyon tondan 30 milyon tona qədər yük daşına bilər. Yəni bu, çox böyük rəqəmdir. Hazırda Azərbaycanın bütün tranzit imkanları bunun kiçik bir faizini təşkil edir. Ona görə Şimal-Cənub nəqliyyat dəhlizi Orta Dəhlizlə rəqabət apara biləcək layihədir”.

🇦🇿Prezident: “Hazırda biz Bakı-Tbilisi-Qars dəmir yolu layihəsinin genişləndirilməsi ilə ciddi məşğuluq. Keçən il göstəriş verilib və büdcədən 100 milyon dollardan çox vəsait ayrılacaq, onun bir hissəsi artıq ayrılıb. Biz bu dəmir yolunun ötürmə qabiliyyətini indiki 1 milyon tondan 5 milyon tona qədər çatdıracağıq. Amma bu da kifayət etməyəcək.

Orta Asiyadan gedən yüklər üçün də yeni yollar olmalıdır. Xəzər üzərindən keçən yol vaxt baxımından çox cəlbedicidir. Eyni zamanda, biz müştərək tarif siyasətini həyata keçirməklə bu yolu iqtisadi cəhətdən daha cəlbedici etməliyik. Hesab edirəm ki, burada da danışıqlar müsbət istiqamətdə gedir. Yəni təkcə Orta Asiya ölkələrinin yükgöndərmə potensialını və oraya Avropa istiqamətindən gedən yükləri nəzərə alsaq, görərik ki, hətta biz bütün bu layihələri icra etsək və genişləndirsək, yenə də çatmayacaq. Ona görə Zəngəzur dəhlizinin iqtisadi səmərəsi heç kimdə şübhə doğurmamalıdır”.

🇦🇿İlham Əliyev: “Rusiya-Ukrayna müharibəsi başlayandan sonra Azərbaycana qazla bağlı 10-dan çox ölkə müraciət edib”.

Prezident o anı xatırlayıb gülümsədi “Özümü güclə saxlayıram”.

🇦🇿Prezident İlham Əliyev: "Xüsusi Təyinatlı Qüvvələrin sayını iki dəfə artırmışıq və bu say artırılacaq.

Bizim üçüncü müharibəni başlamaq fikrimiz yoxdur. Əgər görsək ki, bizim üçün ciddi təhlükə var, dərhal dəf edəcəyik, bu təhlükənin harada yaranmasından asılı olmayaraq".

🇦🇿Prezident İlham Əliyevin açıqlamaları:
🔸Zəngəzur dəhlizi gec-tez olacaq.
🔸Hindistanın Ermənistana silah satması Azərbaycan tərəfindən qeyri-dost addım kimi qiymətləndirilir.
🔸Fransa indiki hökumətə qədər həmişə balansı qorumağa çalışıb.
🔸Müharibə vaxtı Fransa bizə şər atırdı, Fransadan üzrxahlıq gözləyirəm.
🔸Biz Fransasız yaşaya bilərik, onlar da bizsiz yaşaya bilərlər. Onlar vəziyyəti normallaşdırmaq istəsələr, təşəbbüskar biz olmayacağıq.
🔸Şaxtalı, qarlı havada Xankəndi yolunda etiraz edən gənclərimiz fəxrimizdir.
🔸Bizim Qarabağdakı ermənilərlə bağlı məqsədimiz blokada deyil. Bizim haqlı tələblərimiz var. Buna nail olacağıq.
🔸Qarabağda Azərbaycan bayrağı altında yaşamaq istəyən ermənilər üçün şərait yaradılacaq və Azərbaycan vətəndaşlarının sahib olduqları hüquqlara sahib olacaqlar.
🔸Qarabağdakı ermənilərə: "Kim vətəndaşımız olmaq istəmirsə, yol açıqdır. Gedə bilərlər".
🔸Bu gün 60 minə yaxın ailə dövlətdən ünvanlı sosial yardım alır və ildən-ilə bu yardımın məbləği artır.

🇦🇿Prezident: "Laçın yolunda baş verənlərə "blokada" demək insafsızlıqdır. İndiyə qədər sülhməramlıların 400-ə yaxın avtomobili Laçın yolundan keçib. Kim bizim vətəndaşımız olmaq istəmirsə, yol bağlı deyil, açıqdır".

🇦🇿Prezident İlham Əliyev: "Delimitasiya istəmirlərsə, onda sərhəd bizim lazım bildiyimiz yerdən keçəcək.

Bir an mən düşündüm ki, Ermənistan-Fransa bir komandadır, biz ayrı komanda, Şarl Mişel isə hakimdir".

🇦🇿Laçın-Xankəndi yolunda aksiya sivil qaydalar çərçivəsində davam edir.

🇦🇿Prezident: “Kim bizim vətəndaş olmaq istəmirsə yol bağlı deyil açıqdır. Gedə bilərlər.”

🇦🇿Prezident Laçın yolunda etiraz aksiyası keçirənlərə təşəkkür etdi.

🇹🇷Hulusi Akar: “Bütün dünya Türkiyə ilə Azərbaycanın bir ananın iki oğlu olduğunu gördü. Bundan sonra Türkiyəyə, Azərbaycana hər hansı bir şəkildə planl olan varsa, bu addımı atmadan əvvək iki dəfə düşünəcək”.

🇦🇿Prezident İlham Əliyev Azərbaycanın Transxəzər layihəsi ilə bağlı mövqeyini şərh edib

“Transxəzər layihəsi ilə bağlı hələ ki, aydınlıq yoxdur. Yəni, kim bu layihəni irəliyə aparacaq, bunun maliyyə tutumu nədən ibarət olacaq. Bunu hesablamaq üçün texniki-iqtisadi əsaslandırma hazırlanmalıdır. Bunu hazırlamaq üçün gərək şirkətlər cəlb edilsin. Yəni, bu, bir gündə, bir il ərzində həll olunan məsələlər deyil. Əgər bu gün bu layihəyə start verilsə, bir neçə il ərzində, sadəcə olaraq, araşdırmalar aparılmalıdır - geoloji araşdırmalar, ekoloji araşdırmalar, texniki imkanlar, maliyyə tutumu - bütün bunlar açıq suallardır. Mən hesab edirəm ki, bu suallara cavab vermədən Transxəzər layihəsi haqqında danışmaq yersizdir”, - deyə dövlət başçısı qeyd edib.