3 ثانوي هنقفل شرعي ا.مروة سعد

إخوتنا الثانوية العامة والأزهريه، ممكن تكون سمعت كلام كتير، ومن الممكن إنك تكون عارفه أصلًا، لكن ركز معايا كويس جدًا بس دقيقة، ومش هطول علشان وقتك، اسمحلي ببعض القسوة شوية في الكلام ومتزعلش.

متبقاش ضعيف الإيمان للدرجة دي، أنت أقوى من كده، قولي إيه اللي يخليك لما تخرج من الامتحان متصليش ركعتين شكر لله! هو أنت مبتشكرش ربنا غير في النعماء بس! إيه حصل في كون إن الامتحان صعب أو معرفتش تحل؟ إيه المشكلة؟ وإيه ممكن يحصل؟ وهل تظن أن تعبك هيضيع مثلًا؟ حاشاه سبحانه أنه يضيع تعبك.

إيه تاني شاغل بالك؟ المجموع! المستقبل! أهلك! هو كل ده بإيد مين علشان تضجر للدرجة دي وتظن إنك ضعت خلاص؟ يعم فوووق، إحنا بنعامل رب كريم. أنت لا تعلم ولا تفقه أي حاجة والله، أنا وأنت بنظرتنا المحدودة منعرفش الخير فين، ولا نحيط بحاجة من تدبير ربنا سبحانه وتعالي منعرفش حاجة نهائي، أنت بتضع معايير محدودة علشان أنت تفكيرك محدود، أنت ولا حاجة! ربنا سبحانه وتعالى هو اللي أوجدك وخلقك في هذا الكون أصلًا،

أنت ليه متسلمش للأمر ده وتهدى كده، وتخلي عندك إيمان بالله أكتر من كده شوية؟ هو سبحانه مالكٌ يتصرفُ في أملاكهِ، اهدى بقى شوية وفوق لنفسك، حصاد التعب والنتيجة اللي هما بيكلموك عنها دي أنت ملكش دخل بيها نهائي، أنت كل اللي عليك إنك تسعى فقط وتسكت شوية وتبطل صياح، وتركز مع نفسك، وتبطل تنتقص من مدرس أو زميل ليك، أنت أعقل من كده، اتقِ الله في نفسك،

عيش مع ربنا سبحانه وتعالى في كل الأوقات طبعًا، بس دلوقت بالأخص قرب منه واحسن الظن به واستشعر وجوده ونعمه وفضله وكرمه عليك، علشان في غيرك قاعد عاجز أو مريض ومش عارف يروح الامتحان اللي أنت بتصيح منه، وغيرك ربنا سبحانه وتعالى مرزقهوش النعم اللي أنت غرقان فيها دي، وصدقني الفترة دي بالأخص لو مستأنستش بيه سبحانه وتعالى هتؤذي جامد قوي وآخر شيء، تذكر دايمًا أنه لا يردّ القدر إلا الدعاء..، أعرب "القدر" (بهزر).

ربنا يوفقكم ويعينكم ويكتب لكم الخير.

نُــقِــل.

❤41🥰3🍓1

1.14K views04:30