اليوم الأول ⛅️

#تحدي_تنظيم_اليوم_على_مواعيد_الصلاة 🗓

ملخص يومي الأول..
صحيت متأخر. ومعرفتش اقسم المهام على الفترات بشكل واعي بالكامل، الخطوط الزمنية الفاصلة بين الفترات مكانتش حاضرة في ذهني معظم اليوم.
نقطة جيدة إني أنجزت حوالي 70% من مهامي النهاردة، وممتن لـ ده🧡
لكن للأسف مستفدتش بالوقت استفادة كاملة: (قعدت ساعة بعدما صحيت بفكر ارجع انام تاني). اكتشفت قد ايه أنا واقع في حب النوم، المشكلة إنه لم يكن عندي أي جزء من الشعور ده بليل قبل ما انام🎃!

وعشان احل المشكلة دي بليل سمعت guided meditation، بس لم يؤدي الغرض..

📍قولولي إيه ملخص يومكم النهاردة؟ وممكن نعمل ايه عشان ننام بسرعة دون التفكير الزائد لمدة ساعتين على السرير مع البحلقة في السقف؟

❕لو ملحقتش تبدأ التحدي معانا امبارح، تقدر تبدأ من دلوقتي، منتظرينك.. 🤎

عارفين آخر مرة نشرت فيها قصة كانت امتى؟

من 9 شهور!! بقالي 9 شهور مكتبتش قصة وركنتها حتى!
المشكلة إني كل ما اجرب، احس إن الكلمات سطحية والجُمل بتتداعى إلى أنقاض الفكرة، ومش عارف أوصّل اللي أنا حاسس بيه.

اليومين دول بما إننا بنعمل تحدي تنظيم اليوم، فحاسس ببركة في الوقت... عشان كده وبعد 9 شهور من الانقطاع،

قررت أكتب قصة في 5 أيام بس‼️ (في العادي بكتب القصة في حوالي ١٤ يوم)، المرة دي هاخدكم معايا واوريكم كواليس كتابتي للقصة (اللي لسه منعرفش عنها شيء) وهتشوفوا:

إيه الفكرة اللي هقدر اكتب عنها في 5 أيام؟
وهل هقدر أخلص القصة في 5 أيام؟
ولو خلصتها، هتطلع حلوة ولا تتركن على الرف؟

لو حابين الفكرة ومستنين القصة اعملوا 🔥، عشان تشجعوني أخلصها بنهاية الخمسة أيام.

📎 ممكن أحتاج مساعدتكم، ف شيلو الكتم/ mute عشان تشوفو هل هقدر أكتب قصة في المدة دي ولا لا 🤎

اليوم الثاني ☁️

#تحدي_تنظيم_اليوم_على_مواعيد_الصلاة 🗓

⚠️ للأسف ارتكبت عدة أخطاء النهاردة، أولهم كانت قبل ما انام رغم إني كنت مُجهد، لكني استسلمت لتصفح السوشيال ميديا📱 وده خلاني انام متأخر.. والخطوة اللي هاخدها:

     🚫 مش هعرض عيني لأي ضوء صادر من شاشة (الفون، الايباد، اللابتوب، إلخ..) وهستبدلهم بقراءة كتابة أو رواية قبل النوم📖. غير إن ده هيساعد في تجنب استخدام وسائل التواصل، فكمان هيحسن من جودة النوم وهيخفف من مشكلة الأرق.

لما صحيت الصبح، متأخر عن الفجر كما متوقع، مكانش عندي دافع لأني اقوم من السرير؛ وده بسبب الخطأ الثاني:
وهو إني مدونتش مهامي بليل قبل النوم✍. ونتيجة لذلك مكنتش شايف هدف أو دافع يقومني. الخطوة اللي هاخدها:

     ✍تدوين مهام اليوم قبل النوم. (دي حاجة هتجنبني الوقوع في خطأي الأول وهو استخدام الفون قبل النوم).

📍شاركوني الثغرات اللي واجهتكم في تنظيمكم لليوم. وهتعملو ايه عشان تحلوها؟


❕افتكر إن كل يوم، هو فرصة لبداية جديدة. فـ لو لسه مبدأتش التحدي تقدر تبدأ من دلوقتي معايا، مستنيك... 🤎

☁️حد هنا مهووس بالغيوم؟☁️ لأنك ممكن تفهمني أكتر من أي حد تاني. بقالي فترة كبيرة مهووس بالغيوم، أشكالها، أحجامها، وألوانها.. كل حاجة.🌥️
بقضي أكتر من نص وقتي في المواصلات في النظر للسما بالغيوم اللي مستضيفاها في اليوم ده، ووسط تأملاتي في الغيوم كنت بجمعلهم صور..

لما قررت إني عاوز اكتب قصة، فكرت ليه مكتبش قصة بتدور عن غيمة☁️!
الفكرة في دماغي نورت زي الشمس☀️ وعلى مدار الخمس أيام الجايين هشوف الرياح هتاخد الغيمة دي فين وهروح وراها أكتب قصتها.. ✍️


شاركوني خواطركم.. 💭

ده كان اليوم الأول من #كتابة_قصة_في_5_أيام..
اتأكدوا إنكم شايلين الميوت/ الكتم عشان تفضلوا معايا وأنا بكتب القصة دي سطر بـسطر ..🤎

هل حد منكم مرّ بفترة صعبة، ولم يجد شخص يقدر يحكيله؟
في وقت سابق من اليوم كنت بفكر في فترة قريبة مريت فيها بالشعور ده، كان حواليا أشخاص مستعدين يسمعوني، لكني مكنتش مستعد للإفصاح ليهم، لأن (من وجهة نظري) مش هيفهموني.
المهم وأنا مستغرق في التفكير...

☁️الغيوم كانت تغطي السماء بالفعل، وتخللتها خيوط ضوء انحلّت من كرة الشمس الحمراء وهي تغرب⛅️، وحينها بدأ المطر بالهطول.🌧

عارفين نسيم الهواء اللي بيرافق المطر؟ بيبعث في النفس براحة كأنه بيغسلها،
عشان كده القصة دي هتبقى عن
غيمتي اللي بتمر بفترة صعبة حيث انها شايلة جواها مطر ومش لاقيه مكان تهطل فيه مطرها عشان أشعر بالراحة.

شاركوني رأيكم وأفكاركم.. 💭

ده كان اليوم الثاني من #كتابة_قصة_في_5_أيام..
اتأكدوا إنكم شايلين الميوت/ الكتم عشان تفضلوا معايا وأنا بكتب القصة دي سطر بـسطر ..🤎

اليوم الرابع 🌦

#تحدي_تنظيم_اليوم_على_مواعيد_الصلاة 🗓

⚠️ للأسف معرفتش أبعتلكم ملخص اليوم التالت (امبارح). الحقيقة إن اليومين اللي فاتو، نظام يومي كان فوضوي لدرجة هائلة.
لكن رغم ذلك، أنا متفائل ب ال3 أيام المتبقيين من التحدي. وهحاول، على قد ما أقدر، أحقق أقصى إنجاز قدرتي هتوصله.✨

📍شاركوني عملتو ايه في اليومين اللي فاتو من التحدي..


❕متنساش إن كل يوم، هو فرصة لبداية جديدة. فـ لو لسه مبدأتش التحدي تقدر تبدأ من دلوقتي معانا، مستنينك... 🤎

اليوم الخامس 🌦

#تحدي_تنظيم_اليوم_على_مواعيد_الصلاة 🗓

أنا أعلم أنني لم أصل بعد إلى ما خططت له، لكنني لم أتوقف عن المحاولة، ذلك بأني موقن بأن تلك المحاولات التي مازلت أستمر في بذلها، لن تُفضي إلى اللاشيء، حتى وإن بدت كذلك الآن. مازلت أسعى للوصول إلى النقطة الحرجة. التي تنير فيها محاولاتي بالأيام السابقة إلى النتائج التي أرجوها.
مازلت أذهب إلى السرير كل ليلة، مؤمنًا أن الغد بداية جديدة.

📍ماذا عنكم؟


❕متنسوش تشيلو الميوت/الكتم عشان قصتي الجديدة عن 'الغيوم' باقي على نشرها أقل من 3 أيام 🤎

اليوم السادس 🌃

#تحدي_تنظيم_اليوم_على_مواعيد_الصلاة 🗓

ممتن للنهاردة إني قطعت شوط كبير في كتابتي للقصة الجديدة، وبجد مش قادر استنى لحد ما اخلصها عشان تقرأوها وتقولولي رأيكم☁️🧡


📍ايه أجمل حاجة حصلت في يومكم؟


❕ومتنسوش تشيلو الميوت/الكتم عشان كلها يومين وهتقرأو قصتي الجديدة عن الغيوم🤎

اليوم السابع والأخير 🌑

#تحدي_تنظيم_اليوم_على_مواعيد_الصلاة 🗓

✨ أنا ممتن لنفسي وليكم إننا عملنا التحدي ده مع بعض، لأني لما بصيت على الأسبوع اللي فات كله لقيت: إنه رغم إني كل يوم مكانتش ببقى راضي عشان محققتش كل اللي أنا خططتله، إلا إني في النهاية إجمالًا حققت أكتر من اللي كنت هعمله لوحدي. 🎃
وبسبب ده اتعلمت إني موقفش محاولة، واستمر لأيًّا كان هدفي، مهما بدى الأمر بلا فائدة في البداية. 🍂


📍في ختام اليوم نكون وصلنا لنهاية التحدي، تحدي تنظيم اليوم على مواعيد الصلاة. ممتن ليكم لمشاركتكم معايا هنا. وأعتقد إني هكمل في التحدي ده كل يوم من بعد الاسبوع ده..

وأنتم؟ 🧡


❕"انتظروا مفاجأة الساعة 12 منتصف الليل بخصوص القصة الجديدة" 🌥

قصة "ما لا تخبرنا به الغيوم" نزلت ☁️!

اقرأوها على الواتباد من هنا. متنسوش تتابعوني هناك وتعرفوني رأيكم في التعليقات 🤎

📌 نزلتلكوا القصة على بيدچ الفيسبوك ⛅️
اقرأوها دلوقتي واكتبولي رأيكم في التعليقات هناك 🤎!

☁️ قصة "ما لا تخبرنا به الغيوم":
http://bit.ly/3CfbAQZ