راشد خان په فیسبوک پاڼه 🎮

پر کابل د پاکستان وروستیو هوایي بریدونو کې د سلګونو ملکي وګړو په وژنه او ژوبلېدو سخت دردېدلی یم، او دا وحشیانه برید په کلکو ټکو غندم.

د ملکي کورونو، تعلیمي موسسو او روغتیایي بنسټونو په نخښه کول، که قصدي وي او که په تېروتنه، ستر جنګي جنایت دی. د بې ګناه انسانانو قیمتي ژوند ته نه درناوی، په ځانګړې توګه د روژې مبارکه میاشت کې، زړه بوږنووکی عمل دی. دا ډول جنایت نفاق او کرکې ته لمن وهي.

زه په ملګرو ملتونو او نورو بشري حقونو ادارو غږ کوم چې د دې وروستۍ فاجعې بشپړه څېړنه وکړي او عاملینو سره یې حساب وکړي. زه په دې سخت وخت کې د خپل دردېدلي ملت تر څنګ یم او ځان په دې لوی غم کې د خپل ولس سره شریک بولم.
د الله ج له درباره شهیدانو ته د جنت الفردوس دعاء کوم او ټپیانو ته د الله ج له درباره روغ صحت غواړم.
دا زخمونه به ټکور شي، او زه باوري یم چې موږ به بیا د یو ملت په توګه راپورته شو. زموږ تاریخ د دې شاهد دی. ان شاءالله! 🇦🇫