🔴ضعف التروية مثلا مرضى السكري دائما يقل تدفق الدم الى الاطراف فهذا رح يقلل من وصول العلاج لهاي المناطق الي بيها اصابة وما رح تتعالج الحالة

🔴العمر ضروري ب المضادات الحيوية
هواي نشوف انه كذا مضاد حيوي لازم من كذا سنة فما فوق او كذا علاج ما يصير انطيه لكبار السن او الاطفال الرضع
ف ايضا العمر ضروري في تحديد العلاج او جرعته ايضا

🔴اذا شخص انصاب ببكتيريا مقاومة لهواي مضادات يسموها multi drug resistance bacteria
فهنا نتيجة استخدام اكثر من نوع من المضادات من دون فائدة رح يتسبب ب عوامل خطر كبيرة ع المريض

عوامل اخرى تشمل:
5. امان المضاد الحيوي هل هو امن وغير سام للانسان لو بيه مضار🫵

6. عامل آخر يتعلق بالسعر💵
اكو مضادات حيوية فعالة سعرها مناسب واكو مضادات تكون غالية جدا بسبب صعوبة تصنيعها مثلا وامور تجارية تتعلق بالشركات فهنا ايضا احنه نراعي اختيار مضاد حيوي مناسب من الناحية الاقتصادية للمريض

كل هذا العوامل الي ذكرتها تفيدني ب اختيار العلاج المناسب من المضادات الحيوية🙋

طرق اعطاء المضادات الحيوية
ف اكدر اكول اغلب الطرق الي خذيناها باول فصل مستخدمينها هنا
اكو مضادات حيوية عن طريق الفم ابسطهن amoxacillin
اكو مضادات حيوية عن طريق الحقن سواء وريدي او عضلي و ابسطهن ceftriaxone
اكو مضادات حيوية مثل المراهم والكريمات موضعية يعني للجلد ومنها ال nystatin مضاد فطريات وهم يجي قطرات فموية للاطفال

اكو قطرات للعين او الانف او الاذن مثل ciprofloxacin وغيرها
فهواي طرق اعطاء ننطي بيها المضادات الحيوية

اكو مصطلحات مهمة رح نشوفها من نبلش ب المجاميع
انه كذا علاج يعتمد ع التركيز او يعتمد ع الوقت
ف بشكل عام

Concentration-dependent killing
بعض المضادات الحيوية تعتمد ع التركيز يعني اذا انطيها بتراكيز عالية رح تزداد نسبة القتل مثلا aminoglycosides وال daptomycin
هنا هاي الادوية اذا انطيها بتراكيز عالية رح تزداد قابلية القتل من 4 ال 64 ضعف عن مستوى الجرعة الطبيعية

Time-dependent killing
واكو لا مضادات حيوية مثل ال β lactam و macrolide و clindamycin وغيرها
هاي ما تعتمد ع التركيز شكد ما انطي رح تبقى نفس النسبة
بس النسبة تزداد وي الوقت يعني كلما كان العلاج فترة بقاءه بالجسم اكبر كلما تزداد نسبة قتل البكتيريا

ورح نمر بهذه المصطلحات ونفهمها اكثر من ناخذ العلاجات بشكل مفصل

طيف المضادات الحيوية (اقصد antimicrobials بشكل عام )
المهم
الطيف شنو
يعني مثلا هذا المضاد البكتيري شكد رح يقتل من انواع البكتريا فقط نوع معين لو هواي انواع
واكيد بشكل مختصر الافضل هو المضاد الحيوي الي عنده طيف واسع بحيث اقتل شكو بكتيريا ضارة مهما كان نوعها

فعدنه ٣ تقسيمات للطيف:

🔴الاول Narrow طيف ضيق
هذا رح يقتل نوع واحد او فقط كم نوع محدد من البكتريا فما رح يضرب انواع كثيرة
مثلا isoniazid هذا فقط يشتغل ع بكتريا السل الرئوي

🔴اما القسم الثاني Extended spectrum طيف ممتد
يعني هو اول ما اكتشفوه يقتل فقط بكتيريا موجبة وبعدين طوروه وعدلوها ف امتد مفعولها ع البكتريا السالبة مثلا ال ampicillin هو للبكتيريا الموجبة وايضا ممكن يضرب بعض الانواع من البكتريا السالبة

🔴اما القسم الثالث فهو Broad-spectrum
طيف واسع وهذا الافضل اكيد
مثل tetracycline و fluoroquinolones وغيرها
هاي تشتغل ع مجموعة واسعة من البكتريا سواء سالبة او موجبة
احيانا ممكن يأثر ع طبيعة البكتيريا النافعة ال normal flora ورح يفاقم حالات التهابية يسموها superinfection مثل حالة Clostridium difficile

هذا كلشي اليوم
وباجر ان شاء الله نكمل بعض المعلومات المهمة ونخلص من الأساسيات هم
الي يحب يشوف معلومات اساسية يتابع هذا الفيديو ل د عبد المتعال
مقدمة واساسيات عن ال antimicrobials بشکل عام

https://youtu.be/TeZny8Zkyvk

ان شاء الله تكون المعلومات مفيدة الكم❤️

اي سؤال انا موجود وبالخدمة ♥️

بسم الله ..

COMBINATIONS OF ANTIMICROBIAL DRUGS

اليوم شباب نحجي عن دمج علاجين او اكثر لعلاج اصابة معينة

احنه كلنا نعرف انه العلاج المفرد او ال mono therapy هو افضل اكيد
اقل خطورة اقل تأثيرات جانبية وبنفس الوقت اقل مقاومة من قبل البكتيريا☝️

بس بعض الاحيان نحتاج ننطي علاجات ضمن combination حتى نحصل فائدة اكبر

فمثلا ال β lactam و ال aminoglycoside اذا انطيهم سويه احصل تأثير تآزري واحد يقوي الثاني بشغله يسمونه
synergism effect

بس مع ذلك مثل هذا ال combination مو دوم نسويه

لا فقط ببعض الحالات ع سبيل المثال يكون جدا فعال ومفيد من انطي aminoglycoside و β lactam في حالة التهاب شغاف القلب
enterococcal endocarditis 🙋

ايضا ممكن الجأ الها اذا جانت الاصابة البكتيرية مجهولة المصدر يعني ما اعرف نوع البكتريا الي مسببه التهاب ف انطي Combination حتى اضمن القضاء على البكتيريا
بالمجمل الدمج بيه فوائد بس نستخدمه بحالات خاصة مو لكل حالة

اما سلبياته اكيد هو يصير تداخل علاجي بحيث ممكن بعض المضادات تعطل عمل المضادات الأخرى
ع سبيل المثال
ما انطي tetracycline وي Penicillin
لان ال tetracycline مثبط نمو البكتيريا
وال penicillin مبيد او قاتل بكيتريا فممكن يصير تداخل بعملهم ويفشل

واكثر سلبية منتشرة بالعالم حاليا😱😓
نتيجة الصرف الفضيع لادوية المضادات الحيوية ومن دون وصفات هو زيادة مقاومة البكتيريا
يعني شخص من كد ما ياخذ مضادات البكتيريا طورت روحها بحيث تقاوم هاي الادوية
تخيلوا يعني شخص انطيه penicillin وماكو فايدة باقية البكتريا ما ماتت والسبب هو كثرة الاستخدام والاستخدام غير الصحيح للمضادات الحيوية
للعلم المضادات المفروض واللازم الا وصفة طبية
بس عدنه بالعراق لا صرف المضادات حالة حال ال Rennie والحامض حلو 🤦

مقاومة البكتريا للمضادات
DRUG RESISTANCE
اكثر شي خطير ومنتشر للاسف

يعني بين قوسين البكتريا تكول النه( ما تكدرولي)😂

والاسباب ذكرتها الكم قبل شوي يعني الاستخدام الخاطئ وكثرة الاستخدام تسبب هذا الشي وعوامل هواي

اما شلون البكتريا تسوي مقاومة احنه رح ناخذ بالتفصيل وي كل جابتر الطريقة الي تسويها البكتيريا وتقاوم
بس رح اذكرها هنا بشكل عام:

مثلا وحدة من الطرق تسوي تغيير جيني
يعني البكتريا تغير الجينات مالتها ال DNA 🧬فتصير مثل الطفرات الوراثية

ابسط شي خل اذكركم ب كورونا من يجي متحور جديد من كورونا جانو يكولون هذا اكثر فتكا واخطر
بنفس الوقت انه العلاجات المتوفرة للمتحور القديم ما تفيد وي الجديد ولازم نطور علاجاتنه حتى نقضي عليه
فهنا الي صار هو تغييرات جينية وطفرات وراثية انطتني نفس البكتيريا او الفيروس لكن اكثر تطورا ومقاومة للادوية المعتادة

طريقة أخرى
مثل تغير التعبير عن البروتينات الي موجودة بيها
يعني مثلا اكو ادوية تروح تشتغل وتثبط بروتينات معينة داخل البكتيريا من خلال الارتباط بموقع خاص موجود عالبروتين
ف هنا البكتريا من تعرف بهذا الشي
رح تغير بشكل البروتين الهيكلي وتغير موقع الارتباط بحيث من يجي المضاد الحيوي يريد يرتبط بيه ما رح يتعرف عليه وما يرتبط بيه فيفشل في القضاء على هاي البكتريا
وهنا البكتريا صارت مقاومة

او تطور اجهزة طرد يعني البكتريا تصير عدها efflux pump بحيث تطرد شكو شي غريب يدخل داخلها او يقترب منها
او بعض البكتريا عدها طرق متطورة خنكول😂
بحيث تطلق انزيمات تروح للمضاد الحيوي تكسره وتعطله
فهنا منو يحجي وي هاي البكتريا بعد 🤦

فهي مقاومة البكتريا للمضادات الحيوية اخطر شي يصير
تخيلوا سابقا
بدون مضادات حيوية جانت العالم من جرح صغير تموت نتيجة التهابه واصابته ببكتيريا
فشحال هسه اذا البكتريا صارت مقاومة لكل المضادات الحيوية

هواي يعرفونه اعتقد من صوته
هاي العام من امتحنه فارما وزاري
نزل هذا المقطع 😂😂

اما المضاعفات والمشاكل الي تصير وتسببها المضادات الحيوية

اهمها هو الحساسية
واكيد سامعين ب حساسية البنسلين
ف اكو اشخاص يعني عدهم خلل جيني او وراثي بحيث من ينولدون تكون عدهم حساسية من كذا مادة
مثلا من القمح او حساسية من الحليب او البيض
كذلك اكو اشخاص ينولدون عدهم حساسية من المركبات الكيميائية الي من ضمنها الادوية
حساسية البنسلين نكدر نكول انه الأكثر يصير احمرار وطفح جلدي
لكن ممكن شخص تكون عنده الحساسية أقوى وتوصل لل anaphylactic shock وممكن الموت
لذلك ضروري من نريد نصرف علاجات من ضمن عائلة البنسلين ضروري نسأل المرضى:
خو ما عندك حساسية بنسلين

واذا ما يعرف او ما يدري
فنسوي اختبار حساسية
ببساطة :
نرسم حلقة ⭕ بقلم ع ايد المريض
و ناخذ جرعة مخففة من البنسلين ونحقنها تحت الجلد اذا صار احمرار بهاي المنطقة معناها المريض عنده حساسية بنسلين وما انطيها اله

زين فرضا اجه شخص وطلب مضاد حيوي وانطيته amoxicllin ونسينه ما سألناه عندك حساسية لو لا ؟
وطلعت عنده حساسية
ماكو داعي للارتباك 😂
اكيد اكو حل

الي عنده فكرة شلون راح اعالج هاي الحالة قبل لا انزل الحلول

سولفوا🌚

اول شي لا تنخبصون سالفة بسيطة وحلها ابسط

راح يكون عدنا طريقتين للعلاج و حسب الحالة :
1.اذا چان فاقد الوعي يعني من انطيته بنسلين فقد وعيه
الحل/احقنه ابرة ( Adrenaline ) ( نفسه epinpherin ) تحت الجلد ب سرنجة مالت الانسولين اكيد شايفيها الابر الناعمة ( حتزيد الضغط وفعالة بحالة anaphylactic )
طبعا ذكرناه سابقا بموضوع ال adrenergic agonist

2. المريض ما فاقد للوعي بس صارت عنده حكة و تورم وجهه او صار احمر وجسمه احمر
فهنا الحل /
انطي ابر ( Hydrocortiosn ) و ( Alermine ) الي هو مضاد هستامين
عن طريق العضلة علمود بسرعة تشتغل وهم اسرع من الاقراص

وهيج انتم انقذتوا حياته بعد ما لعبوا اهله بيكم طوبة وسقطوا صيدليتكم 😂😂


بالنهاية حتى ما تتعرضون لهيج مواقف
سألوا عن الحساسية افضل

ايضا من المشاكل الي ممكن تصير
هو التسمم ب المضادات الحيوية وهاي تصير وي اغلب الادوية مو بس وي المضادات

اذا انطي جرع عالية من مضاد حيوي واتجاوز ال therapeutic index ممكن اوصل للجرعة السامة او القاتلة فرح تسبب تسمم للشخص
مثلا التسمم ب aminoglycoside
تسوي ototoxicity تسمم اذني ورح نتطرق الها بفصل ال aminoglycoside


مجموعة الفلوروكينولونات
ما انطيها للاطفال وصغار السن لان هاي الاعمار تكون عظامهم مو كاملة النمو
فهاي المجموعة لان تاثر ع الأوتار والعظام تسوي tendon rupture فما انطيها لهيج اعمار
وهواي انواع من السمية رح نتطرق الها وي كل جابتر مستقبلا

هاي الي بالصورة بكتيريا

ورح نحاول احنه اثناء دراسة هاي الوحدة القضاء عليها بعدة ادوية
اكو بكتيريا جاي تبني سياج داير ما داير روحها cell wall ف احنه اثناء ما جاي تبني روح نفلشه ونمنع بناءه يسموها cell wall inhibitors الي هي عائلة ال β lactam الي تضمن البنسلينات والسيفالوسبورينات وكم دوه من دون تصنيف

وعائلة تهاجم بروتينات البكتريا
يعني البكتريا تريد تسوي بروتين مثلا علمود تتكاثر احنه نروح نمنع صناعة هذا البروتين بواسطة مجاميع من المضادات الحيوية من ضمنها aminoglycoside و macrolide و tetracycline وال Chloramphenicol وغيرها

واكو مجاميع لا نروح نهاجم بيها ال DNA مالت البكتريا ونثبط وضائفه مثل عائلة fluoroquinolones
وعوائل رح ناخذها ثانية تثبط العمليات الايضية الي يصير داخل البكتريا ع سبيل المثال تثبيط تخليق ال folic acid بواسطة ادوية Sulfonamide و trimethoprim
وهواي مجاميع ثانية نتطرق الها بالتفصيل وي كل جابتر ناخذه ان شاء الله

هاي اهم التفاصيل والمبادئ العامة الي ردت الخصها الكم قبل لا ابدي بشرح المجاميع الدوائية
والي نكدر نكول اشتقيتها من جابتر 28

ان شاء الله وراها رح نرجع لطريقتنا المعتادة ونشرح بالتفصيل ومن المصدر نصا لبقية الجابترات

ان شاء الله تكون الأمور واضحة الكم

واي سؤال انا موجود وبالخدمة ♥️