بعرف إنك من زمان ناسيه..ونادرًا ما يخطر عبالك..
ممكن يخطر وإنت بمصيبة أومشكلة..
وأول ما تنفرج بترجع تنساه..
أصلا بعرف إنك مش ملاقي وقت إله..

وبعرف إنك بطلت تجيب سيرته علسانك..
ومن زمان ما خطرلك تتقرب منه وتحكي معه..
ما بعرف ليه هيك صرت؟
بس هو بشو قصّر معك؟
ومع كل لحظات البعد ما كان يسخط عليك..ودايمًا رحمته فيك كانت تسبق غضبه..

وصلت فيك ممكن تستاء منه..وتسخط عليه..وتنتقص من قدره..
ومع ذلك ما أنزل فيك عقوية..ولا سلب منك أي نعمة..
وما استفزه الغضب..ولا استبدت فيه الرغبة بالإنتقام..!

احكيلي بصراحة كيف قادر تعيش بدونه؟
كان عادي بالنسبة إلك تنساه هيك وتتخلى عنه؟
طيب ما بكيت لما فقدته..؟ ما توجعت عفراقه..؟
ما صحيت من النوم فجأة وإنت بتردد اسمه؟
لما شفت الموت ما أيقنت بوجوده؟
ولما أنقذك من حادث سير ما أخجلك لطفه؟
.
.
.
طيب آخر إشي وجاوبني بصراحة..

ما اشتقتله...؟!

#ARK

مين على آخر هالليل رح يسمعني ويفهمني ويعرف شو جواتي؟!

مين رح يحتويني ويطبطب عليّ ويحكيلي معلش !!

مين فاضي يدرك صراعي ومحاولاتي الدائمة والمستمرة إني أكون شخص أحسن؟

مين رح يستوعب حجم آهاتي وأوجاعي..
مين رح يحس بحرقة قلبي وغصة روحي وشتات حالي ؟؟!

مين رح يفهم عليّ بدون ما أحكي..
لإنه أحيانًا الكلام صعب يعبّر عن حالتي..

مين رح يفهم إني بتوجع وبتألم وينحرق وبنخنق من جواتي؟

أنا تعبت..
والله تعبت..

وما في حد يسمعني..!!!
.
.
.
.
= الله يَسمَعُك !

وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

#القرآن_الجميل
#ARK

رح تسألني ليه اخترت الإسلام من بين آلاف الديانات؟!

ما رح أجاوبك..
بدي إياك إنت تجاوب حالك بحالك..

رح أعطيك إمتحان "ضع دائرة" مكون من 17 سؤال فقط..
من خلاله رح نختبر صدق رجل اسمه محمد بن عبدالله خرج على الناس قبل أكثر من 1400 سنة وزعم إنه نبي من عندالله !!
.
.
.
شايفه!!
هيو هناااااك واقف مع شيبة وعتبة وأبو سفيان والعاص بن وائل وأبو الحكم بن هشام والنضر بن الحارث!
قاعدين بناقشوا فيه..

استنى استنى..هيو رح يحكي...
هُسسس خلينا نسمع..
.
.
يا معشر قريش !
ما جئت بما جئتكم به أطلب أموالكم، ولا الشرف فيكم، ولا الملك عليكم، ولكن الله بعثني إليكم رسولاً، وأنزل عليّ كتابًا، وأمرني أن أكون لكم بشيرًا ونذيرًا، فبلغتكم رسالات ربي، ونصحت لكم، فإن تقبلوا مني ما جئتكم به، فهو حظكم في الدنيا والآخرة، وإن تردوه علي أصبر لأمر الله حتى يحكم الله بيني وبينكم.
.
.
.
إلى الإمتحان !

#كتاب_شبهة
#حسن_باشا
#ARK

مرة وهو صف تاسع وصله مسج من بنت: بحبك!
وقتها ردّ عليها وأنا بحبك كمان !!!
علمًا قسمًا بالله ما كان بعرف مين هي ولا كيف شكلها..
بس آخ من الحب لما يدخل القلوب بلا استئذان !
ما كان أمامه خيار آخر وكان شايفها غير عن كل بنات العالم اللي ما بعرف منهم غيرها..
حكوا فترة فيما بينهم..
واتفقوا يظلوا وفيين لبعض ويواجهوا كل ظروفهم الصعبة ويثبتوا لكل العالم حبهم..
صح قدامهم لسه عاشر وأول ثانوي وتوجيهي وجامعة بس آخرتهم يتزوجوا..

للأسف صارت خلافات بينهم وتركوا..
بعتتله أغاني بلاوي عن الفراق وإنها مصدومة وأبصر شو..
وهو ردّ عليها شو إنها غدارة وكل ذكرياته معها كدابة !!

آخر إشي بعتتله إنه ليه ننهي هيك ؟
خلينا ننهي بشكل يليق بقصة الحب اللي كانت بينا..
وإنه أنا بتمنالك التوفيق وانبسط بحياتك وإن شاء الله تلاقي البنت المناسبة إلك..
وفجأة باغتته بإشي بقشعر البدن وحكتله: بس مستحيل تحبك أكثر مني !!
.
.
إشي مضحك بعرف، خصوصًا إنه بعد سنوات نسي شو كان اسمها !
بس ممكن المضحك أكثر إنك تصادف ناس كبااااار وجامعات ومتخرجين وبتعاملوا بنفس منطق قصة هالشب أبو الصف تاسع!!

أنا الآن مش بصدد أحكي لكل شخص مرّ بتجربة فاشلة إنه كان الأصل تكون حذر وما تغلط وإلخ..لإنه خلص صار غلطان ومخلص..
أكيد رح أذكره بالتوبة ورحمة ربنا وإنه ما يرجع لهيك خطأ ويتعلم من كل شيء صار معه..

لكن رح تسألني كيف أتجاوز قصة حب مريت فيها..؟!
وعطفًا على القصة فوق، فمن أبرز الأسباب اللي ممكن تساعدك على تجاوز الموضوع إنك تدرك إنه ما كان حب أصلاً..!!

في الحقيقة كم هائل من القصص اللي بنشوفها ما دخلها بالحب..
هي مجرد ألفة ومراهقة وفراغ وفضول وتسلاي..
ولو تأملنا حال هالقصص من بدايتها ومرينا بتفاصيلها وحتى الطريقة اللي انتهت فيها..
رح نكتشف إنه صعب جدًا نطلق عليها حب..
غير إنه القصة فيما لو انتهت بتخلي طرف من الأطراف أو خيانته أو انسحابه فهذا أكبر دليل إلنا إنه القصة مش حب كامل، وبالتالي هالطرف المقابل ما بستحق منّا كل هالزعل والحزن والحسرة.

وعيك لهاي النقطة رح يسهل عليك تجاوز الموضوع..
أحسن ما تقنع حالك إنه كان حب وتحمل على عاتقك همّ نسيان إشي ما كان إله بيوم من الأيام أي وجود !!
.
.
بدي أفرض إنك شخص خالفت الكم الهائل من الناس فوق..
وفعلاً مريت بقصة حب حقيقية وفي ظروف قاهرة حالت بينك وبين نجاحها..
كيف ممكن الواحد يتجاوز قصة حقيقية زي هاي؟!

لا أخفيك هالقصص الحقيقية نادرة جدًا، ولو سلمنا بوجودها..
فربنا يلطف فيك وبقلبك..
وما تنسى إنه الدنيا دار بلاء ومش كل شيء بنحبه ممكن نحصله..
وكونك مؤمن يفترض تآمن إيمان حقيقي إنه ربنا كاتبلك الخير..
ولو القصة كان فيها خير إلك كان ربنا يسّر الأمور بينكم..

بعرف إنك بتعرف هالحكي بس المطلوب إنك تآمن فيه حتى تساعد حالك مش بس تعرفه..
إياك تستسلم لمشاعر ماضية وتحرم نفسك من إنك تعيش الحاضر بالشكل الصح..
دير بالك تقنع حالك إنه سعادتك فقط كانت مع هداك الطرف وبالتالي تحرم حالك من كل سعادة أخرى ربنا ساقها إلك..

وضروي تنهي أي تواصل بينك وبين الطرف الآخر..
حتى تثبت لربنا صدق توبتك وإنك نادم على غلطك..
نصيحة ما تسترجع تواصل في قصة منتهية لإنه هذا ظلم إلك ولشريكك بالمستقبل ..
وقد خاب من حمل ظلمًا !!

ما تنسى تدعي ربنا يساعدك ويتولى قلبك، وزاحم كل غلط بطاعة وإحرص يكون حالك مع ربنا بعد القصة أفضل من قبلها ..

ومن الأشياء اللي ممكن تساعدك إنك تستحضر إنه على مرّ العصور في ملايين من قصص الحب المأساوية !
واستحضارك إنك بتمثل قصة من بين ملايين القصص رح يساعدك تشعر إنك ما بتعاني لحالك..

رح تفقد معاناتك شيء من حدتها..
رح تصير أكثر قابلية للفهم..
وأقل من ادعائك إنها لعنة فردية !

#ARK

إنت نحلة ولا عنكبوت؟!
.
.
لما أحكيلك إنه العناكب حشرات سامّة، ونظامها الأسري والأخلاقي صفر..
فالأنثى بتأكل الذكر بعد التلقيح، والأولاد بآكلوا الأم بعد التفريخ..
وبعض العناكب بتترك الأم الذكر في العش عبين ما يكبروا الأبناء ويقضوا عليه..

كائنات بغلب عليها نمط الحياة الفردي والعدائي للآخر..
وما في إلا أعداد قليلة منهم بتعيش ضمن جماعات..

بتحكم مجتمعاتهم المصالح المؤقتة فقط، وأول ما تنتهي المصلحة بقتلوا بعضهم البعض..
بل وحتى طريقة العنكبوت في اصطياد الفرائس طريقة خبيثة ماكرة خادعة لأبعد حد ممكن تتصوروه..
***

في المقابل لما أحكيلك إنه النحل عبارة عن مجتمع جماعي منظم ومرتب بشكل مدهش ومذهل..
وكيف إنه النحل بنتج إلنا العسل والعكبر والشمع وغذاء الملكات وغيرها من الأنواع اللي فيها خير للبشرية والإنسانية..
فضلا عن دور النحل العظيم في نقل حبوب اللقاح.. واللي بدونه رح تواجه الثروة النباتية خطر عظيم ممكن يهدد حياتها وبالتالي حياتنا جميعًا..
***

القرآن ضرب إلنا مثال في منظومة الكفر والباطل بـــ(العنكبوت) !!

مَثَلُ الَّذِينَ اتَّخَذُواْ مِن دُونِ اللَّهِ أَوْلِيَآءَ كَمَثَلِ الْعَنكَبُوتِ اتَّخَذَتْ بَيْتًا وَإنَّ أَوْهَنَ الْبُيُوتِ لَبَيْتُ الْعَنكَبُوتِ لَوْ كَانُواْ يَعْلَمُونَ.

وبضرب إلنا مثال آخر مختلف تماما عن النحلة:
وَأَوْحَىٰ رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا وَمِنَ الشَّجَرِ وَمِمَّا يَعْرِشُونَ (68) ثُمَّ كُلِي مِن كُلِّ الثَّمَرَاتِ فَاسْلُكِي سُبُلَ رَبِّكِ ذُلُلًا ۚ يَخْرُجُ مِن بُطُونِهَا شَرَابٌ مُّخْتَلِفٌ أَلْوَانُهُ فِيهِ شِفَاءٌ لِّلنَّاسِ ۗ إِنَّ فِي ذَٰلِكَ لَآيَةً لِّقَوْمٍ يَتَفَكَّرُونَ.
.
.
.
طيّب شو الخط الفاصل بين كون الإنسان نحلة أو عنكبوت؟!
والجواب: الوحي !

العنكبوت (اتخذت بيتا) لحالها ومن هواها..
والنحلة "أوحى ربك" (أن اتخذي....بيوتًا) !

.
.
وإنت..
نحلة ولا عنكبوت ؟!

#القرآن_الجميل
#ARK

الآن توصيل مجــــــاني لكتاب #شبهة داخل عمان
التواصل على الواتساب من خلال الرقم: 0799545014

يتوفر الكتاب:

#عمان
- مركز الفرسان "العبدلي- مقابل المستشفى الإسلامي"
- كشك أبو علي "وسط البلد - بالقرب من حبيبة"
- كشك الكايد "وسط البلد -طلوع الشابسوغ"

#الجامعة_الأردنية
- أي كتاب "مقابل البوابة الرئيسية عمارة بيتزاهت الطابق الثاني"

#الجامعة_الهاشمية
- مركز بيع الكتب "البوك شوب"

#جامعة_العلوم_الإسلامية
- مكتبة الترتير "طبربور- بالقرب من جامعة العلوم الإسلامية"

#البولتيكنك
بوك شوب أبو علي

---------------
#الزرقاء
- مكتبة الرأي "الوكالة العربية"- شارع الملك عبدالله.
- مكتبة إيهاب
--------------
#إربد_جامعة_اليرموك
- مكتبة عادل "مقابل البوابة الشمالية - جامعة اليرموك".
--------------
#السلط_البلقاء_التطبيقية
- مكتبة التخطيط "داخل الجامعة"
--------------
#جامعة_العلوم_والتكنلوجيا
- مكتبة JUST
--------------
#جامعة_مؤتة
- مركز بغداد بجانب مطعم الكينج .
--------------
#فلسطين:
التواصل مع مكتبة الكمال (نابلس)
--------------

#موقع_جملون
https://jamalon.com/ar/catalog/product/view/id/37294618…
.
.

سعـــــــــر الكتاب

#كتاب_شُبهة
(تساؤلات الشباب عن الله والدين والشر).
المؤلف: حسن باشا -شخصية مجهولة-.
عدد الصفحات: ١٩٢
الفئة العمرية: ١٥ عام فما فوق.

كتاب لطيف وسلس وممتع، يناقش الأسئلة الوجودية المتعلقة بالله واختلاف الديانات، ومشكلة الشرّ وتقبّل وجوده، والتصالح مع الألم، بطريقة لافتة تجذب القارئ.
يتنقل الكاتب بين اللهجة العامية واللغة العربية الفصحى، وبين الأسلوب المباشر وأسلوب القصّة، مانحاً القارئ كم جيّد من المعرفة والثقافة التي أجد أنها مما لا يسع المرء جهله.
بالاطلاع على المراجع فهو يلخّص ويبسّط مراجع دسمة، مع بعض العبارات الطريفة والمتناسقة مع الموضوع.
تأخذ كتب الكاتب صفة الصحبة مع القارئ والحوار المطمئن والمتفهّم..وله من المؤلفات كتاب آخر "شهوة".
أنصح بقراءة الكتابين، وأتمنى جولة طيّبة بين دفّتي الكتاب لمن يقتنيه ^^

خالص الشكر والتقدير لـ آرك على تقديم هذا المحتوى القيّـم :))

عمركم صادفتوا بنت كانت في قمة حيويتها ونشاطها..
وكان إلها حضورها بأي مكان بتتواجد فيه وحريصة دائمًا تدخل السرور عقلوب الناس وتجبر خواطرهم..

وفجأة صارت هالإنسانة الحزينة والمسكينة والرثة وغير القادرة على ممارسة حياتها بالشكل الطبيعي!
حتى وجهها صار شاحب وملامحها تغيّرت ولا كإنها زي زمان !

لو سألنا شو صار مع هالبنت؟
خلينا نفترض الجواب: إنها مثلاً كانت خاطبة وفسخت..
أو مثلا رسبت في امتحان..

طيب السؤال: شو دخل؟
آه بعرف إنه الإشي أثر عليها نفسيًا وحقها تزعل وتحزن.. بس ليه عدم توفيقها في هذا الشيء أثر على بقية الأمور في حياتها بهذا الشكل؟؟
.
.
ليه فشلك في امتحان يعني فشلك في بقية الإمتحانات والمواد؟
طيب في ذنب وقعت فيه بالليل شو دخل تترك صلوات ثاني يوم ؟

في المقابل:
نجاحك في شيء لا يعني نجاحك في كل الأشياء الثانية..
عادي ممكن تصادف شخص ناجح في شغله لكنه فاشل في بيته، أو شخص ناجح في دراسته لكنه فاشل في علاقاته..
وهكذا..
**

الكلام السابق يسمى في علم النفس التطبيقي "العلاج الإدراكي"
ويعني إنه الإنسان لما يمر بأحداث سارّة أو أحادث سيئة بتولّد انطباع في نفسه بتناسب معها..
فالناجح في مجال بشوف نفسه ناجح في كل المجالات
والفاشل بشوف نفسه فاشل في كل المجالات..

طيب والحل:
- ميّز إنه نجاحك أو فشلك في شيء لا يعني بالضرورة نجاحك وفشلك في بقية الأشياء.

- فكّر دائماً بطريقة مختلفة اتجاه لحظات نجاحك أو فشلك وشوف وجهات نظر مختلفة، لإنه دايماً إحنا بننحاز لمشاعرنا وطرق تفكيرنا اتجاه الأشياء وبنزهد في البحث عن طرق مغايرة تخلينا ننظر للموضوع بشكل مختلف..

- تذكر بكل لحظات فشلك: فَإِنَّ مَعَ الْعُسْرِ يُسْرًا (5) إِنَّ مَعَ الْعُسْرِ يُسْرًا (6)

- استخدم طريقة "إغلاق الملفات" يعني استخلص العبر والدروس من تجربة فشلك أو نجاحك وسكّر الملف وفكر بالجاي ^^
وَلا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ ..

- أرجوك ما تنسى ربنا ولطفه وكرمه ورحمته..
جدد توبتك إله دائماً وزاحم كل معصية بطاعة وما تنسى كلمة يارب علسانك ^^
.
.
استنى !
سامع صوت معاذ بن جبل؟؟
سمعت رسول الله صلى الله عليه وسلم يقول:
اتَّقِ اللَّهَ حَيْثُمَا كُنْتَ
وأَتْبِعِ السَّيِّئَةَ الْحسنةَ تَمْحُهَا،
وخَالقِ النَّاسَ بخُلُقٍ حَسَنٍ..

#القرآن_الجميل
#ARK

حبة المطر اللي لامست خدك اليوم إلها قصة طويلة !
بدت لما كانت هالحبة في بحر..
تبخرت هالحبة بفعل أشعة الشمس وحملتها الرياح بمشوار طويل للسما..
تجمعت هالحبة مع حبات ثانية كثيرة جوا سحابة ضخمة..
ما كانت هالحبة بتعرف وين ممكن تحط رحلها..
كانت بتستنى هديك اللحظة اللي تحتَكّ فيها الشحنات الموجبة والسالبة جوا السحابة حتى آخر إشي تنزل على خدك !

وقلبـــــــــك !
.
.
وبقية الحبات نزلت على أراضي ميتة عانت من ظمأ طويل وكانت فاقدة الأمل من أي فرصة للحياة !
*
هالصورة الجمالية للمطر بصوّرها القرآن بشكل مدهش ومذهل في سورة النور:
أَلَمْ تَرَ أَنَّ اللَّهَ يُزْجِي سَحَابًا ثُمَّ يُؤَلِّفُ بَيْنَهُ ثُمَّ يَجْعَلُهُ رُكَامًا فَتَرَى الْوَدْقَ يَخْرُجُ مِنْ خِلَالِهِ وَيُنَزِّلُ مِنَ السَّمَاءِ مِنْ جِبَالٍ فِيهَا مِنْ بَرَدٍ فَيُصِيبُ بِهِ مَنْ يَشَاءُ وَيَصْرِفُهُ عَنْ مَنْ يَشَاءُ يَكَادُ سَنَا بَرْقِهِ يَذْهَبُ بِالْأَبْصَارِ * يُقَلِّبُ اللَّهُ اللَّيْلَ وَالنَّهَارَ إِنَّ فِي ذَلِكَ لَعِبْرَةً لِأُولِي الْأَبْصَارِ.

وفي سورة الأعراف أيضًا:
وَهُوَ الَّذِي يُرْسِلُ الرِّيَاحَ بُشْرًا بَيْنَ يَدَيْ رَحْمَتِهِ حَتَّى إِذَا أَقَلَّتْ سَحَابًا ثِقَالًا سُقْنَاهُ لِبَلَدٍ مَيِّتٍ فَأَنْزَلْنَا بِهِ الْمَاءَ فَأَخْرَجْنَا بِهِ مِنْ كُلِّ الثَّمَرَاتِ كَذَلِكَ نُخْرِجُ الْمَوْتَى لَعَلَّكُمْ تَذَكَّرُونَ
.
.
.
وفي سورة الحديد:
اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ.(17)

لكــــــن الدهشة إنه آية سورة الحديد ما كانت بتحكي عن إحياء الأرض الميتة فقط..!
لإنه الآية السابقة إلها كانت بتحكي عن قلبـــــــــــــــك !

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ (16)

وكأنها بتحكيلك إنه اللي قدر يحيي الأرض ويرويها بعد موتها ..
قادر إنه يحيي قلبـــــــــــك .. !

****************

#القرآن_الجميل
#ARK

مين كان بتوقع إنه هالبنت (السنفورة) واللي ما صارلها شهر بالجامعة رح تسطر موقف مدهش مستحيل يغيب عن بال أي حد حضره ؟؟

بدت القصة لما الدكتور في المحاضرة استعرض إلهم تجربته في الغرب أيام الدراسة..
ولإنه الحكي بجر حكي ولإنه الإنبهار بالغرب لازم يصاحبه انتقاد للعرب وواقعهم وحياتهم، ما خلى الدكتور نقيصة ولا مذمة عن العرب..

وأغلب الطلاب كانوا منسجمين بالكلام ومستمتعين فيه حتى لحظة ما أشار لفكرة المرأة في الغرب وحريتها على عكس واقعنا في البلاد العربية وكيف بنرغم البنات على أشياء تخضع للأعراف والتقاليد البائدة..

واسترسل في كلامه وأضاف قيود الدين على المرأة !
.
.
هون رفعت ايدها هالبنت وقابلها الدكتور بابتسامة ساخرة وحكالها تفضلي شكلو مش عاجبك الحكي ؟!

بأدب جم.. ووقار بلغ الذروة..وحياء قلّ ما نصادفه..
جاوبت البنت: لا مش كله عاجبني والله..

وقفت من مكانها وطلبت الإذن بتوضيح وجهة نظرها..
.
.
ما حد بنكر إنه الغرب بتفوق علينا بجوانب كثيرة.. وما حد بنكر كمان إنه إحنا كعرب بنعيش بظروف صعبة وصرنا على هامش الحضارات والأمم..

لكن فكرة ربط هالتخلف والتراجع بالدين مش صح..
وفكرة الإنبهار بالغرب بشكل مبالغ فيه كمان مش صح..

ببساطة دائما أي مهزوم أو مغلوب بعتقد كمال الغالب..
وبحاول يعتبره نموذج كامل وبحاكم كل الأفكار والمعتقدات إله وبفسرها بعيونه..

يعني لو سلمنا يا دكتور إنه الصين مثلاً هي صاحبة الثقافة الغالبة والمسيطرة..
رح نحرص نتعلم صيني.. ورح تصير الموضة نلبس صيني..ورح تستهوينا أفلامهم ونعجب بممثلينهم ورح تصير مطاعمنا وأكلنا زي أكلهم... والأهم رح نعكس كل أفكارهم ومعتقداتهم على واقعنا وحياتنا..

.
.
قاطعها الدكتور لشو بدك توصلي يا بنت !
ومين قلك بحكي إنه الغرب كله صح ؟؟؟
.
.
مهو أنا جاييتك بالحكي يا دكتور..
بس كان قصدي أحكيلك إنه أنا كبنت مسلمة بتعامل مع الوحي بشكل مستقل وبعزله عن أي مؤثرات أو تفسيرات جانبية..
وبعتقد إني توصلت لصحة هذا الوحي بالأدلة العقلية، ومش مجرد إيمان عاطفي عشان أهلي هيك..

ومع ذلك هذا الوحي كرّم المرأة وأحسن إلها وأعلى من قيمتها وشأنها..
ومش ذنبه إذا العرب غلبوا أعرافهم وتقاليدهم عليه..

كمان أي حرية عند المرأة الغربية؟؟
وهل هي فعلاً حرة؟
وشو تعريف الحرية أصلا؟ والحرية دايمًا إشي صح ؟
وشو قصدك إنه الدين بفرض قيود عالمرأة ؟

يعني صح الغرب مبهر في جوانب..
لكن أظن إنه مبكي في جوانب ألف..!
لما نسمع عن ملايين العائلات ما بتعيلها إلا الأم..
أو عن ملايين الأطفال اللي يجهضوا سنويًا..
وملايين حالات الاغتصاب والتحرش..
وملايين الأمراض والأوبئة اللي سببها الحرية!
غير حالات العنف الأسري والخيانات الزوجية..
وبلاوي بلاوي أشياء ثانية..

دكتور هاي الحرية اللي قصدك عنها ؟
وإذا حضرتك كثير شفقان على أحوالنا كعرب اتجاه المرأة وبتفق معك ممكن.. لكن كمان مش غلط تشفق عليهم كمان..

ومش ملاحظ إنك نظرت لحقوق المرأة بعيون غربية !
يعني ليه مثلا ما خطرلك تحكي عن حقوق المرأة الفلسطينية والسورية واليمنية والعراقية أو البورمية وغيرهم من النساء اللي بقاسوا أشد أنواع الاضطهاد والألم والعذاب !!

ببساطة لإنه النموذج الغالب نظر لحقوق المرأة من جانب واحد فقط !

وعفكرة مش غلط تشوف شو بحكي الغرب عن المرأة، شوف كلام فلاسفة اليونان قديمًا أو الفلاسفة والمفكرين في العصور الوسطى وما تنسى الكتب المقدسة كمان..
أو حتى شوف الإلحاد الحديث شو بوصف المرأة ..؟؟

وقارن كلامهم بالإسلام..
قارنه بـــ :
- ولقد كرمنا بني آدم..
- من عمل صالحا من ذكر أو أنثى
- إن المسلمين والمسلمات...

أو بالاحاديث:
- لا تكرهوا البنات..
- هن المؤنسات الغاليات
- شقائق الرجال
- من يلي من هذه البنات شيئًا فأحسن إليهن كنّ له سترًا من النار

وآخر اشي:
من كانت له أنثى فلم يئدها ولم يهنها ولا يؤثر ولده عليها أدخله الله الجنة..

وآسفة حكيت كتير !
******************

الشخص اللي نقل الي الموقف بحكيلي كيف قدرت بنت لساتها سنة أولى تجاوب هيك وتحكي بهاي الطلاقة والثقة وتستحضر كل هالأفكار أثناء كلامها لدرجة إنه خلت الدكتور يعتذر وإنه ما كان قصده ؟!

جاوبته:

يا حبيبي هاي قبل ما تدخل الجامعة درست في جامعة الإسلام..
الجامعة رئيسها محمد..
وعمدائها أصحابه..
ومنهاجها القرآن !
ومتطلباتها الصدق والإخلاص والوقار..
ورسومها: من يشري نفسه ابتغاء مرضات الله..
وما بنقبل فيها : إلا من أتى الله بقلب سليم !

#القرآن_الجميل
#ARK

هسا أنا لما أحكيلك:
صادفت رجلًا وأكرمت رجلًا.

بكون هون بحكي عن شخصين مختلفين، لإنه في اللغة العربية إذا تكررت النكرة دلّت على شيئين مختلفين.

لكــــن لما أحكيلك:
صادفت الرجل وأكرمت الرجل.
بكون هون بحكي عن شخص واحد لإنه إذا تكررت المعرفة دلت على شيء واحد فقط.
.
.
.
فَإِنَّ مَعَ الْعُسْرِ يُسْرًا (5) إِنَّ مَعَ الْعُسْرِ يُسْرًا (6)
تكررت "يُسر" نكرة، وتكررت "العسر" معرفة..

يعني:
مع كل عسر واحد فيه يسرين !!

#القرآن_الجميل
#ARK
*منقول بتصرف

*محمد..محاضرتك عال8..قووووم يلااا الساعة صارت 7..
- طيّب مشان الله ما تصرخي هيك..مشان الله ..
* محمد يا ماما طيب هيّك إنت بتصرخ!
- يا الله عالنكد كل صبح يا الله ..
*خلص أنا آسفة.. الحق علي أنا!
- اه..لإنه مش هيك الواحد بصحّي !!
.
.
كان يوم عادي.. زي أي يوم تاني..تقريبًا ما في اشي جديد .. طلعت من البيت بدون ما أتأسف من إمي عشان صرخت عليها..وما حكيت لأختي شكرًا لما لحقتني عشان كنت ناسي تلفوني من العجقة..
وكالعادة وقفت أشتري قهوة عالطريق..
بصراحة الجامعة صارت عبارة عن روتين قاتل.. ما في إشي جديد ..
المحاضرات مملة.. والمواد زنخة..والأشكال هي هي بوجهك..
يلا هانت ما أنا خريج هالفصل..بس إن شاء الله بمضي هالفصل عخير..وبتخرج وبلاقي شغل منيح..وبتقدم للبنت اللي بحبها !

ييييي ضايل أقل من 10 دقايق عالمحاضرة..
يا الله الأزمة.. يا الله ..
هي الطريق فتحت عن يميني خليني أتجاوز بسرعة..
وفجأة انصدمت بسيارة ما كنت منتبه عليها..
لااااااا

كل الناس بتركض لجهتي..وسامعهم بصرخوا: رنوا عالإسعاف رنوا عالإسعاف..
في شخص يبدو إنه دكتور كان بحاول يوقف نزيفي..وشخص تاني حط راسه على صدري يتأكد إذا لساتني عايش.. في واحد كان يصرخ عالناس إنهم يبعدوا عني عشان أقدر آخذ نفس..

وفي زلمة بلحية شايبة وملامح مطمئنة كان بحاول يلقنّي الشهادة!

بتعرفوا ..
كنت أفكر إنه الواحد قبل ما يموت بيحس إنه راح يموت!
ما كنت متوقع أبدا إنه الموت ممكن يخطفني بهاي السرعة ..
أو إنه اليوم اللي راح أموت فيه ممكن يكون زي أي يوم تاني ..
كنت بعتقد إني ممكن أحظى بدقيقة قبل موتي ..
أقدر أحكي فيها لربنا آسف..وأحكي فيها لإمي إني بحبها!
هيك كنت بفكر..
بس الموت طلع أسرع مما كنت بتصور..
أسرع بكثييير !
.
.
**
*محمد..محاضرتك عال8..قووووم يلااا الساعة صارت 7..
- يييييي أنا صليت الفجر ؟؟؟
* آه صليته ورجعت نمت..مالك ؟؟
- آه صح صليته..الحمد لله هلأ اتذكرت ههه
* طيب يلا قوووووم...
- ماما ؟
* نعم ..
- بحبك !
* وأنا كمان..بس خير شو في؟
- لا.. ولا إشي بس بحبك !

#ARK

أيام المراهقة كنت أساعد صحابي في كتابة رسائل للبنات اللي بحبوهم !

كنت دايمًا أحكيلهم لازم تحتوى رسائلكم على استعارات..
سألوني شو يعني استعارات؟!

قلتلهم لما أحكيلكم: السماء تبكي...شو يعني؟!
حكولي يعني بتمطر..سهلة..

قلتلهم هاي اسمها استعارة..

الكل وقتها حكالي يا الله الفزلكة !
بس لو هالإشي بمشي مع البنات رح نكثّر من الاستعارات والتشبيهات في كلامنا ورسائلنا..

ولا أخفيكم الشباب عجبتها القصة:
- ابتسامتك كفراشة..
- الكلام يخرج من فمك مثل العصافير
- عطرك الذي آثر المكوث ليؤنسني بعد غيابك.
- دموعك مثل ندى الفجر
- رأيتك اليوم كسنبلة شامخة..
- وجهك مثل ندف الثلج "يعني أبيض مش القصد إنه وجهك بارد" !

وبصراحة كانت الاستعارات والتشبيهات في تطور دائمًا..
يعني البداية كانت مثلا:
عينيك مثل حبتي خوخ !

مع الوقت صارت:
عينين حزينتين وواثقتين، مستديرتين كحبتي خوخ !
.
.
*****
لما اتذكر هديك الأيام بضحك على مراهقتنا وسذاجتنا..
وبحمدالله إنه الواحد صحي على حاله وأدرك إنه الحياة مش هيك..

وبصراحة بستغرب دائمًا لما أصادف قصص لناس كبيرة وواعية كانت ضحية استعارات واهتمام لحظي وكلام منمق مليان عواطف..
.
.
.
وعفكرة..
الشب اللي شاف ابتسامتك كفراشة ودموعك مثل ندى الفجر ووقفتك كسنبلة ووجهك مثل ندف الثلج وعيونك كحبتي خوخ....

متى رح يتقدم إلك (كـــــــــرجل)؟!

#ARK

صباح الخير ^^

- صباح الخير عالبنت اللي باتت ليلتها بتدرس وصبّحت تعمل ساندويشات لإخوانها عشان إمها يحرام تعبانة..

- صباح الخير عالشب اللي خلّى مخافة ربنا بين عيونه، كان بقدر يصارح هديك البنت بحبه..لكنه أصر ما يظلمها ويحافظ عرجولته وهيو بسترزق وبقول يا رب قلبها !

- عالبنت اللي بتخوض صراع الستر والحجاب كل صبح قدام المراية..
النية موجودة، واشترت أواعي أستر وبتقول يا رب اليوم !
هي ما بتعرف إنه قرّب هاليوم كثير فيما لــو حافظت على صدقها..

- صباح الخير عالشب اللي غلبه ذنبه بالليل..
لكنه قرر يزاحمه بطاعة على هالصبح..
ناوي اليوم يتصدق وهيو قاعد بقرأ الأذكار: وأنا على عهدك ووعدك ما استطعت..
يا رب كثيرًا ما استطعت ساعدني !

- صباح الخير عالبنت الصافنة من شباك الباص..
خاتم التسبيح بإصبعها..ما فرطت فيه بيوم..
وأجنحة الملائكة بترفرف فوق قلبها !

- صباح الخير عالفريق اللي عامل حملة للشتا..
يا دوب ملحقين بين دراستهم وامتحاناتهم وبين ترتيبات الحملة..
بس معلش..ممكن ما بعرفوا: مَا أُخْفِيَ لَهُمْ مِنْ قُرَّةِ أَعْيُنٍ جَزَاءً بِمَا كَانُوا يَعْمَلُونَ

- صباح الخير عالثابتين..!
اللي ما غيرتهم الدنيا وما أسرتهم المناظر والأهواء..
اللي ما مدوا أعينهم عغيرهم ولا اغتروا بحالهم.. وأدركوا إنه رزق ربنا خير وأبقى !

- الشب اللي بضحك ع هديك البنت وبعشمها..
صباح الخير!
وَعَنَتِ الْوُجُوهُ لِلْحَيِّ الْقَيُّومِ ۖ وَقَدْ خَابَ مَنْ حَمَلَ ظُلْمًا

- صباح الخير عليه هيو بهزّ راسه شايفينه..
ما عمره نسي حظ روحه من القرآن..
واليوم كان حظ روحه وصايا لقمان..

يَا بُنَيَّ إِنَّهَا إِن تَكُ مِثْقَالَ حَبَّةٍ مِّنْ خَرْدَلٍ فَتَكُن فِي صَخْرَةٍ أَوْ فِي السَّمَاوَاتِ أَوْ فِي الْأَرْضِ يَأْتِ بِهَا اللَّهُ ۚ إِنَّ اللَّهَ لَطِيفٌ خَبِيرٌ (16) يَا بُنَيَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَىٰ مَا أَصَابَكَ ۖ إِنَّ ذَٰلِكَ مِنْ عَزْمِ الْأُمُورِ (17)
.
.
#القرآن_الجميل
#ARK