إمي دخلت عالبيت بتنادي بأعلى صوتها إنه ووينننك؟
-احزر شو ؟
* شو ؟
- مش لقيتلك عروس؟!
* واو جد !
- عيونها زرق وعندها غمازات وشعرها ولا تقول حرير !
خلينا نروح نشوفها بالله عليك ما تكسر خاطري...
.
.
* بتعرفي يا ماما ذكرتيني بإشي..
بتعرفي إنه "الغمازات" عبارة عن ضعف أو انشقاق في عضلة من عضلات الوجه اسمها Zygomaticus Major !

والعيون الزرقا كان سبب زرقتها فقرها من الخلايا الصبغية في قزحيتها !

وإنه الشعر الناعم صار ناعم لإنه افتقد لطبقة نخاعية غنية بالبروتين الموجودة عند الشعر الخشن !
...........................
بحكيلك هيك لإنه خطر ببالي قديش في أشياء ناقصة بحياتنا وبنفكر حياتنا ما بتكمل إلا باكتمالها، لكن في الحقيقة حياتنا بتكون أجمل في فقدانها !

أحيانًا كثرة الموارد أسوء من قلتها..
بطر النعمة ما بقل سوء عن ألم الفقد !
أحيانًا جمالنا في عدم كمالنا..

كثير ناس بتفكر إنه (الأخذ) أفضل دائمًا من (المنع)..
وعفكرة مش شرط..
في كثير من الأحيان نعمة الله علينا في (المنع) أعظم من نعمته في (العطاء) !
.
.
- إمي قاطعتني: إنت كل إشي هيك بتقلبه فلسفة!
أصلاً الله يكون بعونها اللي بدها تاخدك..
وخبطت باب الغرفة قد ما الله أعطاها ! 😅
.
.
.
* المهم خليني أكمل إلكم الفكرة..

القرآن وضح إلنا هاي النقطة في عدد من الآيات منها:
وَلَوْ بَسَطَ اللَّهُ الرِّزْقَ لِعِبَادِهِ لَبَغَوْا فِي الأَرْضِ وَلَكِنْ يُنَزِّلُ بِقَدَرٍ مَا يَشَاءُ إِنَّهُ بِعِبَادِهِ خَبِيرٌ بَصِيرٌ

ربنا بمنعك لمصلحتك..
وبعطيك حسب حاجتك..
هو خبير وبصير بحالتك..
وأكيد الموضوع مش متعلق فقط بالشكل..
وحتى بكل مجالات حياتك..
.
.
وما يروح من بالك إنه جمالك في عدم كمالك !

#القرآن_الجميل
#ARK

كان بحكي بينه وبين حاله:

خلص بكفي لعب..
خليني أقوم أصلي ركعتين سريعات عشان العشر الأواخر وهيكا..
والله من زمان ما دعيت ربنا..
كمان أنا عارف حالي لو ما قمت صليت هسا ضميري راح يأنبني..
وأصلاً مهو طول حياتي بضيع الليالي على أشياء فاضية..
معقول ما أجور عنفسي هالليلة وأقوم أوقف بين إيدين ربنا..؟
.
.
آه قبل خليني أطفي تلفوني بلاش يلهيني ..أصلاً ملحق عليه..
.
.
الله أكبر
سمع الله لمن حمده..
الله أكبر
سبحان ربي الأعلى
سبحان ربي الأعلى
سبحان ربي الأعــ.....
.
.
لا لا خليني أكمل سجدتي وأدعي فيها عالسريع..
.
.
ممم يا رب..
أنا آسف ما بعرف أصيغ الدعاء بالشكل المناسب واللائق بس أنا بعرف إنك فاهم علي وبتسمعني..
أنا ولا مرة عصيتك فيها كنت بستخف بعظمتك..والله والله يا رب..
بس والله كانت تغرنّي رحمتك وسعة عفوك..
كمان يا رب أنا بعرف إنه العبرة ألجأ إلك..
وفي اللحظة اللي ممكن أتناسى أو أنسى وجودك راح أنسى نفسي !
فما بدي أوصل لهاي المرحلة..أرجوك..

أنا بعرف إنك عند حسن ظن عبدك فيك..
وأنا ظني فيك إنه ما رح أرفع راسي من هالسجدة إلا وإنت مسامحني وغافرلي..

حتى النار يا رب..
أنا بعرف إنها لكل طاغية وظالم ومتكبر وعنيد ومتجبر
وأنا مش منهم يا رب..
عشان هيك ثبتني.. وإعتقني من النار في هاي اللحظة..
آه يا رب..
في هاي اللحظة نادي في أهل السماء إنك أعتقتني من النار..
.
.
يا رب يسّرلي خير أعمله..
حتى أزاحم فيه أغلاطي وذنوبي..
واجعلني مبارك وين ما كنت..
وارزقني قلب ما بحتفظ بالآلام والأحقاد والغل والحسد..
هيك قلب صافي نقي طاهر مفعم بالخير والعطاء والحب..
ووو..
كمان يا رب حققلي الأشياء اللي بحبها وبحلم فيها بحياتي..
واغفر لصحابي ومعارفي اللي أدركهم الموت وهمه الآن تحت التراب..
وييسرلي ناس تدعيلي بعد موتي زي ما أنا بدعيلهم هسا..

وو كمان يا رب ما تفتني في ديني..
وما تقبض روحي إلا وإنت راضي عني..
.
.
وووو أنا بحبك يا رب..
مشان الله سامحني !

يييي كيف بحكي مشان الله إلك؟
شفت يا رب إنه ما إلي غيرك..!!!
.
.
سبحان ربي الأعلى
سبحان ربي الأعلى
سبحان ربي الأعلى ..
.
.
وَاسْتَغْفِرِ اللَّهَ إِنَّ اللَّهَ كَانَ غَفُورًا رَحِيمًا

#القرآن_الجميل
#ARK

فلانة مش محجبة !
وهديك صح محجبة لكن شوف كيف لبسها؟
.
.
إحنا كبشر بنحب فكرة القوالب والأحكام الجاهزة لأي إشي بنصادفه بوجهنا..
وما بنكلف خاطرنا نفرق بين الناس ودوافعهم في نفس القالب اللي فرضنا عليهم..

يعني خلينا نسأل مجموعة بنات مقصرين في موضوع اللبس..
رح نصادف نموذج كبيييير منهم رح يجاوب حرفياً:

أنا بعرف إنه الحجاب صح..
وإنه فرض من ربنا..
وإنه أحسن وأستر للبنت..
بس أنا بعترف إني مقصرة وضعيفة أمام هذا الإشي..
وهيني والله بحاول وببذل جهدي وبلتزم بطاعات تانية بنية ربنا يهديني ويسامحني..
وغالباً رح تختم كلامها: مشان الله ادعولي !

نموذج آخر"قليل":
رح يجاوب إنه يييي بعدين معكم !
الناس وصلت القمر وإنتوا لسه بتحكوا بحجاب وهبل !
وانا حرة وما بحب إشي يقيدني..
وغالباً رح يصدر منها عبارات بتنتقص من الدين..
وللأسف ما بتعطينا فرصة إنها توقف "المكوك" تاعها حتى نتفاهم معها..
لإنه هيك بنعطلها عن رحلتها للقمر ^^
.
.
كيف سمحنا لحالنا نحط النموذجين بنفس القالب !
ونطلق عليهم نفس الأحكام..
وننظر إلهم نفس النظرة..
وكإنه مفاتيح الجنة والنار بإيدينا
وإحنا طبعاً ضامنين الجنة لحالنا بس حابين نشوف شو مصير الناس !
.
.
نفس الفكرة شب بعيد ومقصر وبرتكب ذنوب لكنه دائما بشوف نفسه مقصر وضعيف وبرجو رحمة ربنا وبحرص وبسعى وما بترك خير بطريقه إلا وبعمله..

وبين حد استكبر وجحد وظلم وأنكر الوحي وكان بالنسبة إله محط سخرية واستهزاء..

----------------
في القرآن:
المعاصي لا تحجب عن الله !
الاستكبار والكبر والغرور هو من يحجب عن الله..

- سَأَصْرِفُ عَنْ آيَاتِيَ الَّذِينَ يَتَكَبَّرُونَ فِي الْأَرْضِ بِغَيْرِ الْحَقِّ وَإِن يَرَوْا كُلَّ آيَةٍ لَّا يُؤْمِنُوا بِهَا وَإِن يَرَوْا سَبِيلَ الرُّشْدِ لَا يَتَّخِذُوهُ سَبِيلًا وَإِن يَرَوْا سَبِيلَ الْغَيِّ يَتَّخِذُوهُ سَبِيلًا ۚ ذَٰلِكَ بِأَنَّهُمْ كَذَّبُوا بِآيَاتِنَا وَكَانُوا عَنْهَا غَافِلِينَ

- وَالَّذِينَ كَذَّبُوا بِآيَاتِنَا وَاسْتَكْبَرُوا عَنْهَا أُولَئِكَ أَصْحَابُ النَّارِ هُمْ فِيهَا خَالِدُونَ

- إِنَّ الَّذِينَ كَذَّبُوا بِآيَاتِنَا وَاسْتَكْبَرُوا عَنْهَا لَا تُفَتَّحُ لَهُمْ أَبْوَابُ السَّمَاءِ وَلَا يَدْخُلُونَ الْجَنَّةَ حَتَّى يَلِجَ الْجَمَلُ فِي سَمِّ الْخِيَاطِ وَكَذَلِكَ نَجْزِي الْمُجْرِمِينَ

- وَإِذَا تُتْلَى عَلَيْهِ آيَاتُنَا وَلَّى مُسْتَكْبِرًا كَأَنْ لَمْ يَسْمَعْهَا كَأَنَّ فِي أُذُنَيْهِ وَقْرًا فَبَشِّرْهُ بِعَذَابٍ أَلِيمٍ

- ﴿ إِنَّ الَّذِينَ يُجَادِلُونَ فِي آيَاتِ اللَّهِ بِغَيْرِ سُلْطَانٍ أَتَاهُمْ إِنْ فِي صُدُورِهِمْ إِلَّا كِبْرٌ مَا هُمْ بِبَالِغِيهِ فَاسْتَعِذْ بِاللَّهِ إِنَّهُ هُوَ السَّمِيعُ الْبَصِيرُ

- وَيْلٌ لِكُلِّ أَفَّاكٍ أَثِيمٍ * يَسْمَعُ آيَاتِ اللَّهِ تُتْلَى عَلَيْهِ ثُمَّ يُصِرُّ مُسْتَكْبِرًا كَأَنْ لَمْ يَسْمَعْهَا فَبَشِّرْهُ بِعَذَابٍ أَلِيمٍ * وَإِذَا عَلِمَ مِنْ آيَاتِنَا شَيْئًا اتَّخَذَهَا هُزُوًا أُولَئِكَ لَهُمْ عَذَابٌ مُهِينٌ

--------------------------
يا..
بالله عليك..

ما ترحل لله إلا وإنت عبده..
وبضعك وتقصيرك اعترفله..
ما تستكبر على سلطانه.
وما تتعجرف على أوامره..

وأحسن الظن فيه واطلب منه يعينك ويساعدك وما يحجبك عنه..
.
.
يا بالله عليك !

#القرآن_الجميل
#ARK

يبدو إنه مهما حاولنا نستقبل العيد بفرحة..
بتلاقينا وبشكل عفوي صرنا نستحضر أحزانّا وأوجاعنا..

كم عيلة صار العيد بالنسبة إلهم مجرد رقم بدأوا العد فيه لما الموت خطف أحد أفراد عيلتهم !
إنه هي العيد رقم كذا وفلان مش بينا..

اللاجئ العيد بالنسبة إله رقم زاده على أعياد ماضية من لحظة ما تهجّر من بلاده..

المريض قاعد بحسب هذا العيد أي عيد بعد ما المرض أفقده صحته وعافيته..

لما تكون أول طقوس العيد نزور المقبرة وندعي فيها لناس كانوا بينّا بأعياد ماضية والآن صاروا تحت التراب !

لما شيخ المسجد يأكد بخطبة العيد على ضرورة الفرح بالعيد وإنه كيف لازم ننسى أو نتناسى أوجاعنا..
وبعدها بشوي هو نفسه ما قِدر يمسك دموعه لما كان يدعي للأقصى وفلسطين وسوريا واليمن والسودان وبورما وكل بلاد المسلمين المنكوبة والمظلومة..!
.
.
مع كل ما سبق إلّا إنه للعيد فرحة لازم ما نقتلها..
إذا مش عشانّا عشان الأطفال وقلوبهم البريئة..
عشان الناس الغلبانة والمحتاجة لما نتذكرهم في العيد بصدقاتنا..
عشان الأيتام اللي انحرموا من أب يشتريلهم أواعي العيد..
عشان كثير ناس بتستنى منا خير نزرعه في ابتسامة ع وجوههم..
.
.
عشان هيك احرصوا تستقبلوا العيد بكل حب وخير وابتسامة..
احرصوا تستحضروا رحمة ربنا فيكم وتشكروه على نعمه وفضله عليكم..
احرصوا تستقبلوه بالتكبير بقلوبكم قبل لسانكم..
.
.
الله أكبر ..

"الله أكبر" من كل همومنا وأوجاعنا ومصائبنا وأحزانّا..
الله أكبر من كل ظالم طاغية متجبر شرد عائلات ويتم اطفال ورمّل نساء..
الله أكبر من كل محتل غاصب بحرمنا كل عيد نصلي بمسرى نبينا..
الله أكبر من كل الدنيا إذا راح تنسينا إنه في آخرة..
وإنه في إله رحيم رح يتجاوز عنا...
الله أكبر من كل ظلم وحزن وهم وكرب وألم ووجع وضيق صادفناه بحياتنا..

الله أكبر كبيرًا..
والحمد لله كثيرًا
وسبحان الله وبحمده بكرة وأصيلًا..
.
.
كل عام وأنتم بخير <3

#ARK

دخلت (تانيا) صاحبة الــ4 سنوات على المستشفى بصحبة إمها..

كان كاحلها بتحرك يمين وشمال وهذا بدل على إنفصاله التام عن ساقها، غير الجروح الكثيرة والتقرحات الملتهبة في باطن أقدامها..

أكثر ما صدم الدكتور إنه (تانيا) كانت بتوزع ابتسامات ولا كإنه مالها إشي!
والدكتور بوصف إنه قدر من خلال المِجَس يدخل لأنسجتها اللينة المتهتكة حتى لمح لون أبيض برّاق واللي كان عظمها !

الإم كانت ردة فعلها جداً عادية..
وحكت للدكتور قصة صارت معها لما كان عمر (تانيا) سنة..
بتحكي يا دكتور تركتها بغرفتها ورحت أجهز الأكل، ولما رجعت على الغرفة لقيتها بترسم على الأرض دوائر حمراء بأصابعها..
ولما صرخت عليها ضحكت (تانيا) حتى تبين إلي إنها قضمت أصبعها وبتلعب بدمها!

ضلينا نراقب فيها ولما كبرت شوي فهمناها إنه الأصابع ما بصير نآكلهم ونلعب فيهم هيك!
ولما فهمت تانيا خوفهم صارت بكل مرة برفضوا يشترولها لعبة أو كاندي كان تهددهم بقضم أصابعها..!

ببساطة (تانيا) كانت ما بتحس !
يعني بتكون ماشية وبدخل مسمار برجلها بدون ما تنتبه عليه ولما تنتبه بتشيله بإيدها وبتكمل طريقها عادي..
غير إنها أعطبت كل مفاصلها لإنه كثير مرات بتمشي وبلتوي كاحلها بدون ما تنتبه..

كانت إمها تضطر كل يوم تتفحص جسمها حتى تتأكد إنه ما في جروح أو قروح عندها..

----------------
تانيا كانت بتعاني من عيب جيني نادر باسم "عدم الشعور الخلقي بالألم"..
كانت سليمة من كل النواحي باستثناء: إنها ما بتشعر بالألم!
يعني بتشعر بنوع من الخدر فيما لو تعرضت لجرح أو حرق أو كسر..

للأسف بعد سنوات كانت (تانيا) في مؤسسة رعاية وبتروا سيقانها وفقدت أصابعها وكانت بتعاني من آثار العفن لتقرحات إيديها، ومن آثار المضغ تمزق لسانها !
.
.
.
أكيد حالة (تانيا) نادرة، لكن في بعض الأحوال مثل الجذام والتصلب اللويحي واضطرابات الأعصاب وإصابات النخاع الشوكي ممكن تؤدي لـــ إنعدام الإحساس بالألم !

إشي مثير للسخرية إنه إحنا بنتنقل بين الاطباء والصيادلة بحثاً عن شفاء من الألم، بينما البعض بعيش بخطر مدقع بسبب غيابه..

وبينما وظيفة الاطباء "دفع الألم"
فوظيفة بعض الأطباء الآخرين "استعادة الألم"
-------

حياتنا بدون الآم وأوجاع ومصائب بتفقد معناها وجوهرها وحقيقتها..
أجمل ما حياتنا "الملحمة" اللي بنخوضها كل يوم في مواجهة ظروفنا وابتلائاتنا ومصائبنا..

ربنا بخبرنا في القرآن إنه قدّر علينا الآلام والمصائب بعلمه وحكمته..
وفي الوقت اللي بنسلّم فيه لهاي الحكمة بهدي قلبنا..

مَا أَصَابَ مِن مُّصِيبَةٍ إِلَّا بِإِذْنِ اللَّهِ ۗ وَمَن يُؤْمِن بِاللَّهِ يَهْدِ قَلْبَهُ ۚ وَاللَّهُ بِكُلِّ شَيْءٍ عَلِيمٌ

ولما يهدي قلبنا رح ندرك إنه هذا الإله لا يستحق منا الشكر فقط على نعمه علينا..
وأيضاً يستحق الشكر على مصائبنا وآلامنا !

#القرآن_الجميل
#ARK

بنت أختك اللي يحرام وقعت على رجلها بالعيد وصارت تبكي..

وقتها أبوك صرّخ عليك تجيب ثلج بسرعة..
وأختك حضنتها وصارت تهدي فيها..
وأبوها كان بمسح الدم عن ركبتها..

الحمدلله كان مجرد جرح بسيط ورجعت بعدها بشوي بنت اختك تحزنّك على حالها وتحكيلك شوف "في واوا" !
.
.
اللي صار ببساطة مع بنت أختك نفس اللي بصير مع أي حد فينا بتعرض لألم:
- المرحلة الأولى بكون الألم مجرد إشارة لما تشعر النهايات العصبية بالخطر.
- المرحلة الثانية: بعمل النخاع الشوكي ومؤخرة الدماغ عمل "البوابة النخاعية" لتصنيف الإشارات وتوجيهها للدماغ.
- المرحلة الثالثة: الرسائل بتاخذ محلها في قشرة الدماغ، وهو بدوره بفرز الرسائل وبقرر الإستجابة إلها.

يعني: إشارة، رسالة، استجابة.
.
.
خلينا نفترض إنه بنت أختك ما وقعت عندكم بالبيت..
هي وقعت أثناء سباق في الروضة وسط جو حماسي وتنافسي..
اللي رح يصير إنه الجو التنافسي رح يرسل رسائل منافسة للمرحلة الثانية واللي بدورها رح تحجب تقدم الألم للمرحلة الثالثة..

ورح تلاقي بنت أختك قامت بسرعة وكملت السباق عادي.. ولما خلص السباق رح تتفاجأ إنه ركبتها مجروحة وبتنزّل دم !
وقتها بتيجي المرحلة الثالثة؛ رح تبكي بنت أختك ولما تزوركم رح تحكيلك شوف "في واوا" !

----------------
كل واحد فينا قادر يتحكم بطريقة استجابته للألم..
وفيما لو امتلك الشخص فينا غاية لحياته، فكرة شاغلة باله، طموح نفسه يحققه، جو حماسي برافق كل تفاصيل يومه..

فهو قادر ينافس رسائل المرحلة الثانية وما يسمح للألم يوصل دماغه بصورة قوية تعكّر صفو أيامه وعمره وتشغل كل باله وتفكيره..

وهذا بذكرني بمصطلح "تأثير أنزيو" وهو مصطلح سبكه بروفسور الطب في جامعة هارفرد "هنري بيتشير":

واحد من كل 4 جنود مصابين إصابات خطيرة - على ساحل مدينة أنزيو- كان يطلب المورفين.
علماً إنه المورفين كان متوفر مجاناً..

في المقابل أي مريض آخر كان يتوسل المورفين أو أي عقاقير مخدرة وفي كثير من الأحيان بدون حاجته إلها..

والتفسير يعود لفكرة إنه الجندي المصاب بتكون استجابته للجرح بالتشافي..
هو فرّ حيّ من أرض المعركة وسعيد بانجازه وتضحياته في سبيل وطنه..
وبالتالي امتلاكه لهاي المعاني نازع شعور الألم في دماغه!

---------

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ

الموضوع بإيدك..
إما بتحوّل الألم لمعاناة..
أو بتقاومه - بمعنى وغاية- وبتتعايش معاه ^^

#القرآن_الجميل
#ARK

ندمت إني نزلت صيفي..
آه آه لحقت أندم من أول يوم..
أصلاً ندمان إني دخلت جامعة..

يا أخي ليش ضحكوا علينا وحسسونا إنه الجامعة إشي كثير واو !
ليه الناس أول سؤال بسألوك إياه بعد شو اسمك؟ شو دارس؟

أبوي كل ما يشوفني بسألني: كيف دراستك؟
يعني ولا كإني إنسان وفي أشياء بحياتي غير الدراسة..

ومرة لما جاوبته بمقولة "جون ستيوارت ميل" :
ليس الهدف من الجامعات صنع محامين وأطباء ومهندسين ماهرين، بل صناعة بشر مؤهلين ومثقفين.

وقتها صفن فيي وقلي: خليك فاشل يابا..
وكررها ثلاثاً حتى توارى عن الأنظار..
.
.
يعني جد حاس في إشي خطأ..
الجامعات بتعلمنا بس كيف نشتغل ونجيب مصاري..
ما بتعلمنا كيف نعيش حياتنا ونتعامل فيما بينا..
معقول التعليم بس أتخصص في مجال معين في الوقت اللي أنا فيه ما بعرف أتعامل مع اللي قاعد جنبي بالمحاضرة، ولا مع الفريق المنافس لفريقي، بل حتى في التعامل مع ذاتي وكيف أواجه القلق والمخاوف اللي عندي والاقي معنى لحياتي..؟!

نفسي يكون بالجامعة كورسات جانبية غير خطتنا الدراسية:
كورس الحياة، الموت، الحكمة، الخير والعطاء، التعامل مع الآخرين، وكثير شغلات ثانية..

ليه أغلب الدكاترة ما بخطر ببالهم وهمه بكل فصل بصادفوا مئات الطلاب يحكولنا أثناء المحاضرات عن أشياء تفيدنا بحياتنا؟
يعني ما بعرفوا إنه كلمة منهم ممكن تساعد طالب وتغير حياته وطريقة تفكيره؟
.
.
---------
يلا خلص بدي أروح حكيت كثير..
اليوم بالمصلى عنا حلقة تفسير وتطبيق القرآن..
وصلنا لسورة المائدة، تحديداً آية:
مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ

في شب حكالنا رح نطبقها بدورة إسعافات أولية وكيف نتعامل مع حالات الإغماء والنزيف وبلع اللسان اللي ممكن بأي لحظة نصادفها..
لعل وعسى ربنا يكتب على إيدينا إحياء نفس وأجر إحياء الناس جميعها
.
.
.
الحمدلله..
في الوقت اللي بخلت علينا فيه الجامعة وضاقت علينا رغم اتساعها..

اتسع مصلى كليتنا الصغير لفيض كبير من النور ولأرواحنا..!

#القرآن_الجميل
#ARK

بصراحة مش عارف من وين أبلش معكم بالموضوع!

بس يعني أنا حاب أشتري سيارة بحدود 20 ألف بس..!
لو كل حد فيكم تبرع بنص دينار رح أقدر أجيب حقها..
وهيني بوعدكم ما استخدم السيارة إلا بالأمور اللي بتخص آرك..
ويعني إذا بتسمحولي بأكم مشوار جانبي مع إمي لزيارة ستي وخالاتي ^^

استنوا.. ليه بتتفرجوا عليّ هيك..؟؟!!

يعني مثلاً ( كريفالو دولار) بشو أحسن مني؟؟
اللي بدأ حملة لجمع التبرعات بعبارة:
(من فضلك تبرع لي بمبلغ صغير لإني أريد شراء طائرة خاصة ثمنها 75 مليون دولار) !

"كريفالو" كان قس أمريكي ووضع ثقته بأتباعه إنهم يساعدوه بشراء طيارة خاصة حتى يستخدمها في أعماله الدعوية..

طيّب القس (مايك موردوك) بشو أحسن مني كمان؟
هيو الثاني كمان اشترى طيارتين بمصاري ما حد بعرف من وين جابها..
وقال إنه الله هداه لفكرة ربح من وراها آلاف الدولارات..
"يا رب أنا كمان الله يهديني :D " !

والداعية التلفزيوني (كينيث كوبلند) اشتهر هو وزوجته بالترويج لل" الطب البديل من خلال الصلاة" وجمع ملايين اشترى فيهم طيارة ب20 مليون وكمان فقط لأعمال الدعوة !
علماً التقارير أثبتت إنه سافر فيها ل كولورادو وسيرلانكا والهند يغير جوّ هو وزوجته النصابة !

مالكم..؟
أنا بديش طيارة زيهم..بقلكم بس سيارة ب20 ألف!
ما تكونوا بخيلين هيك.. :\

--------------

والله إشي بقشعر البدن لما تفتح سورة الشعراء..
وتقرأ حوار الأنبياء مع أقوامهم..
حرصهم والصدق الموجود بقلوبهم إشي ببكي..!

الأنبياء ببساطة لسان حالهم ومقالهم: ما بدنا منكم مقابل ولا بدنا منكم أجر.. بس آمنوا بربنا..!

شوفوا نوح عليه السلام:
كَذَّبَتْ قَوْمُ نُوحٍ الْمُرْسَلِينَ*إِذْ قَالَ لَهُمْ أَخُوهُمْ نُوحٌ أَلا تَتَّقُونَ*إِنِّي لَكُمْ رَسُولٌ أَمِينٌ*فَاتَّقُوا اللَّهَ وَأَطِيعُونِ*وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ

وهود عليه السلام:
إِذْ قَالَ لَهُمْ أَخُوهُمْ هُودٌ أَلا تَتَّقُونَ*إِنِّي لَكُمْ رَسُولٌ أَمِينٌ*فَاتَّقُوا اللَّهَ وَأَطِيعُونِ*وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ.

صالح عليه السلام:
كَذَّبَتْ ثَمُودُ الْمُرْسَلِينَ*إِذْ قَالَ لَهُمْ أَخُوهُمْ صَالِحٌ أَلا تَتَّقُونَ*إِنِّي لَكُمْ رَسُولٌ أَمِينٌ*فَاتَّقُوا اللَّهَ وَأَطِيعُونِ*وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ.

ولوط أيضاً:
كَذَّبَتْ قَوْمُ لُوطٍ الْمُرْسَلِينَ*إِذْ قَالَ لَهُمْ أَخُوهُمْ لُوطٌ أَلا تَتَّقُونَ*إِنِّي لَكُمْ رَسُولٌ أَمِينٌ*فَاتَّقُوا اللَّهَ وَأَطِيعُونِ*وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ.

شعيب عليه السلام:
كَذَّبَ أَصْحَابُ الأَيْكَةِ الْمُرْسَلِينَ*إِذْ قَالَ لَهُمْ شُعَيْبٌ أَلا تَتَّقُونَ*إِنِّي لَكُمْ رَسُولٌ أَمِينٌ*فَاتَّقُوا اللَّهَ وَأَطِيعُونِ*وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ

.
.
.
ما في إشي بستدعي العجب إنه ختام سورة الشعراء تناول كريفالو دولار، ومايك موردوك ،وكينيث كوبلند، وكل من نهج نهجهم باستغلال الدين والكذب على الناس ولكل من خالف منهج الأنبياء وصدقهم..

هَلْ أُنَبِّئُكُمْ عَلَى مَن تَنَزَّلُ الشَّيَاطِينُ؟!
تَنَزَّلُ عَلَى كُلِّ أَفَّاكٍ أَثِيمٍ !

#القرآن_الجميل
#ARK

صباح الخير~

ربنا بحكيلنا: "ولا تقنطوا" !
ويعقوب لأولاده: "لا تيأسوا"..
ويوسف لأخوه: "لا تبتئس"..
وشعيب لموسى: "لا تخف" ..
ومحمد صلى الله عليه وسلم لأبو بكر:" لا تحزن إن الله معنا" !
.
.
انشروا الخير والطمأنينة بين الناس..
وطمنوا قلوبهم وذكروهم برحمة ربنا..
واحرصوا عقلوبهم تحسن الظن بالله..
وما تفقد الأمل منه ومن رحمته ولطفه ولو للحظة..
احكولهم كل ذنوبكم مهما بلغت بلحظة صدق مغفورة..
وكل صبركم ودموعكم وحسرتكم ووجعكم وآهاتكم مأجورة..

واحكولهم:
صباح الخير..
لا تقنطوا
ولا تيأسوا
ولا تبتئسوا
ولا تخافوا
ولا تحزنوا..

إِنَّ اللَّهَ مَعَنَا ! <3

#القرآن_الجميل
#ARK

ما قدر يتمالك نفسه لما شافها !
ولما انتبهت إنه بتفرج عليها استحت كثير وبيّن خجلها على ملامح وجهها..

واستمرت النظرات بينهم لدقائق عبين ما تجرأ وراح يحكي معها..
بداية البنت أظهرت حرصها وحياءها..
لكن بنفس الوقت ما كانت قادرة تخفي إعجابها..

أيام كانت كفيلة تبدأ قصة حبهم..
كانوا يحرصوا يشوفوا بعض كل يوم..
وما يفرطوا بلحظة تواصل بينهم..
وكل أغاني الحب اللي كانوا يسمعوها قبل لحالهم وأخيراً صارت حقيقة..
وكل الأفلام والمسلسلات استحالت لواقع بين إيديهم..

رسموا أحلامهم..
وعاشوا بالحب أيامهم..
وعاهدوا بعض يستمروا طول عمرهم..
وما يتخلوا عن بعض بيوم مهما الأمر كلفهم..

بـــس !

في ظروف كثيرة كانت بتعيق قصتهم..
يعني هي ما بتقدر تظل معه وقت طويل عشان أهلها..
ولا قادرين يعملوا كل إشي بنفسهم لإنه الدين والضمير بمنعهم..
ومجتمع تحكمه العادات والتقاليد ما كان يتركهم يرتاحوا في علاقتهم..

لكن زي ما بحكوا الحب أعمى..
وكثير من الأحيان برفض الحب يخلينا نفكر بوعينا..
وبسيطر لا وعينا ومشاعرنا وعواطفنا..

وبدل ما يفكروا كيف يوجهوا قصتهم بالشكل الصح..
شافوا الحل بالتمرد والإنقلاب على الدين والعادات والتقاليد الصحيحة وحتى ضميرهم..
ما كانوا شايفين إنه في إشي بستاهل يكون حاجز بينهم..
حبهم أكبر من أي قيد وعشقهم حطّم كل الحواجز..

ومرة بعد نقاش بينهم كان بحكيلها إشي جد على صيغة مزح:
الدين شغل صحرا وأبل وخيام مش إشي يتدخل بقصتنا !

.................
كانت صدفة حلوة...
لما تيسّر إلهم يطلعوا فصل تبادل ثقافي في إحدى الدول الغربية..
فرحتهم لا توصف..
خصوصاً إنها قدرت تقنع أهلها بعد ما كانوا رافضين..

وكانوا بحكوا عالتلفون:
هناك ما في حد يحكيلنا وين رايحيين؟
ولا أهلك يرنوا وينك تأخرتي؟
ورح تلبسي كل إشي بتحبيه..
مش مضطرة تتحجبي أكيد..
وسوف نحتسي القهوة صباحاً مع الكرواسان المقرمش المطلي بالزبدة ^^

-بحبك !
* وأنا بحبك !

------------
شوفي حتى ناخد راحتنا لازم ننسى "الله" !
لو كان موجود أصلاً فصدقيني مش نفسه "الله" تاعنا..
وما تحكيلي ضميرك بأنبك..
ولو أنبك لا يعني عشان عملتي إشي خطأ..
ببساطة لإنك هيك متربية ومع الوقت رح تنسي وتتعودي ورح تتشكل مفاهيم جديدة في داخلك تختلف تماماً عن معايير ومقاييس ومفاهيم نشأتي عليها..

والله اللي خلق هالكواكب والأكوان والنجوم والمجرات ما رح يفرق عنده تلبسي فستانك الأحمر..
ولا رح يكترث لو شربنا شوية "بيرة" مع سمك السالمون عالبحر..
وأكيد ما رح يغضب لو حضنتك وهمست في ذانك إني بحبك..
وما تقنعيني فارقة عنده سواء عبدناه أو كفرنا فيه..

ما بقلك نكفر فيه..
بس لازم ننساه..
او ننسى تصورنا الموروث عنه..
وتذكري ما بدنا أي حاجز في علاقتنا حتى لو كان "الله" نفسه..

- ماشي؟
* خلص توكلنا على الله..رح ننساه ماشي هههه !

------------
عاشوا أحلى أيام ممكن تخطر ببالكم..
حب..سينما..حفلات..متاحف..بحر..خمر..لبس..موضة..وكل إشي..

لو تشوفوا ما أحلى منظرهم وهمه مرة بأحد المتاحف والمعارض الفنية..
كان بمزح معها كيف الأدباء والفنانين بحكوا فيما بينهم..
كانوا واقفين على إحدى اللوحات:

شوفي الدراقة الوردية الممتلئة كملاك!
وصحن المحار وشريحة الليمون اللي بتعكس رموز الشره والشهوانية..
سمكة الورنك بجسدها المشقوق وهو معلق بالصنارة..
والأحشاء الملطخة بلون أحمر قان وأوردة زرقاء وعضلات بيضاء مثل صحن كاتدرائية مزخرف !

فرطت ضحك عليه وعلى طريقة كلامه المدهشة..
يا الله ما أحلامهم وأجملهم وألطفهم..

أو بدون "يا الله"
صح..همه قرروا ينسوه..

---------
يبدو إني بالغت بالنقطة السابقة..
ما كانت احلى أيامهم فعلاً..
بكل ليلة كانوا يروّحوا فيها بعد يوم شاق مليان أحداث وتفاصيل..
كان في حلقة مفقودة..
إشي مانعهم من الوصول لسعادة حقيقة..
كل المتع كانت متع في البداية فقط..
لكنها مع الوقت استحالت لأشياء عادية بل وحتى مملة !

كانت كثير بتفكر بينها وبين حالها إنه معقول هالأشياء كانت مستاهلة تنسى الله عشانها أو تترك دينها وتلبس فتنتها وتضحك على أهلها..؟
ولما جربّت كل الأشياء اللي كانت بتحلم فيها أو بتظن إنه سعادتها فيها، هل فعلاً هالأشياء وفرّت إلها بديل عن "الله" والدين في حياتها..

ومرة كانت بتحكي بينها وبين حالها:
الله فعلاً ما رح يفرق عنده لو شو ما عملت..
بس أنا اللي رح يفرق عندي كثييير شغلات..

كان ضميرها أحيانا يصحى فجأة..
وتصير تفكر إنه لو ماتت هسا شو رح يكون معنى حياتها؟

وهالسؤال صار مُلحّ أكثر عليها بعد ما مرة نجوا من حادث سير مخيف ومروع كان رح ينهي حياتهم..

لحظتها ما كان في خيار أمامهم غير يصرخوا وينادوا ويستحضروا "الله" !
اللي قرروا في وقت سابق ينسوه !

--------
ليه كانت شايفة إنه معنى حياتها كان اوضح وهي بتساعد إمها وبتحمم ستها المقعدة وبتساعد صاحبيتها اللي وقعت بمشكلة وبتتصدق على محتاج صادفته بطريقها وأكيد هديك السجدة بين إيدين ربنا لما كانت الدنيا مسكرة بوجهها.

.

كيف قدرت تنسى الله ؟
معقول ما اشتاقتله..؟
ولا حنّت للحظة بين إيديه..؟
*****

فجأة صحيت مفزوعة بتسمّي وبتستعيذ بالله من الشيطان الرجيم من هالكابوس المرعب..

أجت عينها على فستانها الأحمر اللي اشترته لعرس أخوها وهو معلق بغرفتها..
كان لونه أحمر قان بشبه أحشاء سمكة الورنك بجسدها المشقوق على الصنارة!

وهي لسه بتحاول تستوعب شو صار..
اشتغل القرآن قبل أذان الفجر في المسجد اللي جنبهم..

وَلَا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ !
.
.
.
#القرآن_الجميل
#ARK