والله وصرتي سنفورة..!
يا الله الأيام..
لسه امبارح كنا أنا وإمك بنفكر شو نسميك..؟
هيّك كبرتي وصرتي صبية، وبنتهي حاضر رح يصير مجرد ذكريات..
.
.
ثقتي فيكِ عمياء..
أنا بعرف أنا وإمك شو ربينا..
لكن هذا لا يعني ما نخاف عليك..
وندعي ربنا بكل خطوة من خطواتك إنه يحفظك ويحميك..
.
.
شوفي يابا..
زي ما بتعرفي لا تزول قدما عبد حتى يسأل عن أربع، ومنها:
عن عمره فيما أفناه؟ وعن شبابه فيما أبلاه؟

وهذا اشي بخلي الواحد يصفن..!
طيب مش الشباب فترة من العمر..؟
يعني مش "عن عمره فيما أفناه" لحالها بتكفي...؟

لا يابا وكإنه العمر إشي ومرحلة الشباب إشي..

لإنه هالمرحلة إنتِ فيها بقمة نشاطتك وصحتك وعافيتك..
وكل إشي حابة تكوني عليه بالمستقبل بعتمد على خطواتك حاليا..
بعتمد على شو رح تعملي بالجامعة..؟
كيف رح نستثمري هالمرحلة من عمرك..؟

بدك تنشغلي بدراستك وتتفوقي فيها وبنفس الوقت تطوري من مهاراتك الشخصية بالتطوع والدورات وخدمة الناس وقضاء حوائجهم..؟

ولا بدك تتمختري في الجامعة تبحثي عن شب جذاب أو عاشق كذاب..!
.
.
ديري بالك تحصري حياة رحبة فسيحة بين ايدك بلذة لحظية آنية..
رح يتبعها ندم وحسرة طول حياتك..
وديري بالك تنسي المهمة اللي انخلقتي عشانها..
وإياك تنظري نظرة ازدراء لأي حد بختلف عنك..
ديري بالك من نظرة غلط لبنت لبسها ما عجبك..
عفكرة ممكن امتحانها في الدنيا تصارع شهواتها ورغباتها وتبحث عن الحق وتخضع إله.. وامتحانك في الحياة تساعديها وتوخذي بإيدها..
.
.
وما تفكري إنك لو خدمتي الطلاب بكتاب أو حصة مراجعة أو نشاط يعني عملتي اللي عليك اتجاههم..
كل ما سبق وسائل مهمة..
والغاية تخدمي أراوحهم اللي غاب عنها الوحي..وما ارتوت من أنوار القرآن..!
.
.
المسؤولية مش سهلة..
والتحدي كبير..
والأمانة أعرضت عنها أرض وسموات وأشفقت منها جبال..

وحملها قلبك !
.
.
فاحفظي الله يحفظكِ
احفظي الله يحفظك~

#القرآن_الجميل
#ARK

ما في حد يخطب فينا الجمعة..
شيخنا مسافر وكان يفترض الأوقاف تبعث شيخ بداله بس يبدو صارت خربطة وما وصلنا حد..

والمؤذن مش أهل لهيك خطوة..فاضطر يمسك المايك ويحكي:
يخوان اللي بشوف نفسه أهل يخطب فينا يقدّم نفسه..
.
.
ما حد بادر واستمر هالمشهد لدقائق حتى وقف شخص بأول الثلاثينيات من عمره..
كثير هيئته مرتبة وبنفس الوقت مش مبين عليه هالشخص اللي ممكن يقبِل على هيك حركة..

فتحوله الناس الطريق وصعد على المنبر بخطوات ثابتة ورزينة..

أذن المؤذن وخلص الأذان..

وكل المسجد من دون استثناء بُرقبوا هالشب شو رح يحكي ؟
وهل رح ينجح بمهمة انعرضت عليه من دقائق..؟
الناس كان دافعها الفضول ولأول مرة بشوف هالكم الهائل من التركيز والترقب والإنتباه.
الفضول زاد عند الناس لما الشب تأخر بعد الأذان وهو قاعد..
كان رافع إيديه ومستغرق بالدعاء بشكل ملفت..

وقف الشب وضرب ضربتين على المايك حتى يتأكد إذا شغال أو لأ..
بعدها أخذ نفس عميق..
.
.
حمد ربنا وأثنى عليه..
وصلى على سيدنا محمد صلى الله عليه وسلم..

وبنبرة صوت جادة لأبعد حد..
مذهلة ومدهشة فوق التصور..
ما جوّد ولا تغنّى وكان بحكي طبيعي..
بس كانت أشبه بنبرة شخص بحكي شعر..
.
.
-هَلْ أَتَاكَ حَدِيثُ الْغَاشِيَةِ ؟؟
"كل حد فينا شعر إنه السؤال موجه إله بشكل شخصي.."

-وُجُوهٌ يَوْمَئِذٍ خَاشِعَةٌ
"حكاها بملامح خاشعة وكإنه الأية تجسدت على معالم وجهه.."

-عَامِلَةٌ نَّاصِبَةٌ
-تَصْلَى نَارًا حَامِيَةً
-تُسْقَى مِنْ عَيْنٍ آنِيَةٍ
-لَّيْسَ لَهُمْ طَعَامٌ إِلاَّ مِن ضَرِيعٍ

-لا يُسْمِنُ وَلا يُغْنِي مِن جُوعٍ
"كان لحظتها بأشر على بطنه "

-وُجُوهٌ يَوْمَئِذٍ نَّاعِمَةٌ
"مسح بإيده مسحة رضا على وجهه مع ابتسامة خفيفة"

-لِسَعْيِهَا رَاضِيَةٌ
"استحال الرضى على ملامح وجهُ الصادقة"

-فِي جَنَّةٍ عَالِيَةٍ
"أشار بإيده لفوق مع ابتسامة صغيرة"..

-لّا تَسْمَعُ فِيهَا لاغِيَةً
" كان بعمل إشارة (لأ) باصبعه وبعدها أشار لذانه "

-فِيهَا عَيْنٌ جَارِيَةٌ
"كان بأشر للأرض"

-فِيهَا سُرُرٌ مَّرْفُوعَةٌ
" لفـــــوق"

-وَأَكْوَابٌ مَّوْضُوعَةٌ
-وَنَمَارِقُ مَصْفُوفَةٌ
-وَزَرَابِيُّ مَبْثُوثَةٌ
"بلغة جسد رهيبة"

-أَفَلا يَنظُرُونَ إِلَى الإِبِلِ كَيْفَ خُلِقَتْ؟
"سؤال ثاني موجه إلنا بشكل شخصي.."

-وَإِلَى السَّمَاء كَيْفَ رُفِعَتْ؟
السؤال كإنه أول مرة بنسمعه بحياتنا..
"مد كلمة السمـــاء كثير .. وأشار إلها "

-وَإِلَى الْجِبَالِ كَيْفَ نُصِبَتْ؟
"رفع صوته مع كلمة الجبال"

-وَإِلَى الأَرْضِ كَيْفَ سُطِحَتْ؟
"خفض صوته "

-فَذَكِّرْ إِنَّمَا أَنتَ مُذَكِّرٌ
"سكت كثير بعد كلمة (فذكر) "

-لَّسْتَ عَلَيْهِم بِمُصَيْطِرٍ
"كان بأشر باصبعه إنه لأ "

-إِلاَّ مَن تَوَلَّى وَكَفَرَ
"مع كلمة (إلا) رفع إيده وأشار باصبع السبابة للسماء"

-فَيُعَذِّبُهُ اللَّهُ الْعَذَابَ الأَكْبَرَ
"نزل إيده بسرعه"

-إِنَّ إِلَيْنَا إِيَابَهُمْ
"أخذ نفس عميق بعدها "

-ثُمَّ إِنَّ عَلَيْنَا حِسَابَهُمْ
"حكاها بصوت منخفض جدا "
وبنبره حزينة اخترقت شغاف قلوبنا..
.
.
.
أقول قولي هذا وأستغفر الله لي ولكم، فيا فوز المستغفرين استغفروا الله..

-------------------

#القرآن_الجميل
#ARK

في ناس وقعوا بأغلاط ما كانوا بتوقعوا بيوم من الأيام إنهم ممكن يوقعوا فيها..
ولا حتى أقرب الناس إلهم ممكن يصدقوا إنه فلان وقع هالوقعة..
كيف رح يصدقوا وهو فلان ؟! اللي بطلبوا منه يدعيلهم ويساعدهم وياخد بايدهم..
.
.
وإذا كان هالإنسان اللي وقع فيه خير وقلبه لسه صاحي..
رح يعيش صراع مخيف ويتهم نفسه بالنفاق بكل لحظة بتذكر فيها أخطاء وهفوات الماضي..

وكل ما عينه تلمح ناس حافظوا على حالهم وما غلطوا زي ما غلط، بلوم نفسه الضعيفة والمقصرة وبقسو عليها، وبجلد ذاته وبشعر إنه في آخر الركب وفاته من الخير والفضل الكثير..
.
.
مش هون المشكلة بس..
المشكلة إنه ندمك وعارك من أخطاء الماضي لساته مسيطر عليك وعلى طريقة تفكيرك..
وبالتالي بُحكُم على طريقة تصرفك وتعاملك مع أخطاء الحاضر..
وللأسف بتصير الإنسان الهزيل والرث والضعيف في مواجهة شهواته ورغباته..
وهذا يعني إنك رح تفقد قدرتك على خوض صراعات الحاضر..
بحجة إنك انهزمت في الماضي..
.
.
طيب والحل؟؟

الحل إنك تفتح القرآن وتستعرض آيات الرحمة والتوبة والمغفرة..
وتسأل حالك مثلا: إنه كيف الواحد لو تاب ربنا رح يبدل سيئاته حسنات؟؟
يعني معقول لهدرجة؟ طيب كيف؟ وجد ذنوب الماضي بتصير حسنات؟؟

الفكرة إنه إنت وقعت في ذنب..ماشي؟
وقدرت تتجاوزه وتتحداه وتقهره..
واخلصت توبتك لله..

فهذا يعني إنه خطواتك بتستاهل عليها إنه يتحول هالذنب لحسنات !
يعني الصراع اللي بتخوضه في قهر ذنبك وتجاوزه إشي مش سهل..
والثبات بعد لذة المعصية مش إشي هيّن..
وهذا تحدي مش كل الناس بتقدر عليه..
عشان هيك :
فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ
.
.
والحل كمان..
إنك تتخلص من أخطاء الماضي ما دامك تبت منها..
أو تخليها حافز ودافع إلك تجتهد من خلالها للحاضر وتزاحم فيها أخطاء الماضي..
.
.
ولو إنك زعلان على حالك عشان في ناس سبقوك وما غلطوا بالماضي زيك..
فالمقارنة من أصلها غلط لإنه كل حد فينا إله تحدي واختبار شكل..

ويا سيدي بكل الاحوال هي قدامك حاضر تنافسهم وتسبقهم فيه ..

والعبرة بمن صدق لا لمن سبق !

#القرآن_الجميل
#كتاب_شهوة 🍎
#ARK

شفت صاحبك اللي كل ما يشوفك ببتسم بوجهك..
طيب شفته كيف عصّب عليك لما حكيتله: يييي انسيت أصلي الظهر!
أو لما مرة شكيتله من حالك وتقصيرك ووقتها هوّن عليك وأحيا الأمل في قلبك..
ذاكر كم مرة حكالك: أبشر ..قبل ما يعرف شو بدك منه ؟
نفسه اللي خطر ببالك لما مريت على آية: سَنَشُدُّ عَضُدَكَ بِأَخِيكَ.
.
.
شفتي صاحبتك اللي شاركتك دموعك أكثر من مرّة..!
لما بكت معك قبل ما تعرف مالك!!
شفتيها وهي بتحكيلك أصبري شوي بدي أزبطلك شالك..
أو لمّا مرة بعتتلك إنها بتحبك من غير أي مناسبة ..
ذاكرة كم مرة جننتك عشان تحضري معها حلقات المصلى ..
وأحلى اشي لما مرة حكتلك: لو بتعرفي قدّيش بدعيلك !
.
.
مع الوقت أدركت إنه الصديق الحقيقي مش بس الحريص على دنيتي ..
لا .. وكمان الحريص على آخرتي !
.
.
.
{وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ وَلا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلا تُطِعْ مَنْ أَغْفَلْنَا قَلْبَهُ عَنْ ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا}

#القرآن_الجميل
#ARK

في بداية كل فصل..وبداية كل يوم..الواحد بتفقد كل إشي.. !

-شو بدي ألبس ..؟
-الجدول ..
-لازم أحلق
- لازمني شالات جديدة
- وين نلتقي بكرا..؟
- بدي أدبر سيارة..
- أي ساعة أتحرك؟
- أحضر ولا اطنش ؟
- لازم أمر عالدكتور..
-
-
-
.
.
- طيــب و قلبك ؟!
____

لَاهِيَةً قُلُوبُهُمْ ۗ .. !
.
.
السير إلى الله سير قلوب لا سير أبدان
فما تنسى تتفقد قلبك كمان!

#القرآن_الجميل
#ARK

لما تكبري يا (لانا) ديري بالك تنسي الله!
اللي كنت وإنت صغيرة بفطرتك لما تخافي تحكي إسمه..
ما تنسي إسمه لما تكبري كمان..
الدنيا فيها كثير أشياء بتخوف أكثر من إنك تفقدي لعبتك، أو خالك الشرير ياكل من الشيبس تاعك!!

#قريبًا
#حسن_باشا
#لانا
#ARK

تتسلّل الأصوات الهادئة مع رائحة القهوة دافعةً إيّانا للابتسام بينما تتوالد الأسئلة والإجابات من أعيننا.
لا تقلق..لن أسمح ببقاءنا حبيسين في مقهى!
سأساعدك لتستعيد شيئاً من طفولتك بينما تتأرجح بين الوجود والعدم..
(لانا) ستساعد في هذا أيضاً..بينما تسدّد لكماتها الودود لصدرك!

غير عابئين بالطريق القاسي الذي نشقّه، سنمرّ على معرض لوحات في بهو مكتبة، تُعرضُ فيه هيئات أشهر العلماء. سترى بنفسك مقولاتهم المنقوشة في صدور اللوحات بحرفيّة.

ما هذا؟ ممرّ طويل يقودنا للسماء..
ما هذا الصوت؟ صوتي ههه..لا تقلق..أقلّد صوت الانفجار العظيم فحسب ^^

تعال هنا..بسرعة..سنهبط في صحراء ذات رمال ذهبية..سأترك لك فيها حريّة السؤال باستفاضة، واطمئن، لن أسيء فهمك، بل سآخذك لتسمع همهمات أشخاص قبل ألف وأربعمئة عام حول شيء أصيل بداخلك، تنازعك فيه مقولات وظنون..!

كلا..لا تذهب من هناك..الطريق من هنا يا سيّد، وتماسك طيّب؟..
فبين الماضي والحاضر تكبر الفجوة!، قد ترى أموراً لا تعجبك، ستطفر الدموع من عينيك على الأغلب، وستمتلئ بالحنق والضيق، إنه [شرّ] في النهاية، لكن لا عليك، ستكون هناك أسس بنيناها وعليها ستتكئ..

لن تقع..ستؤمن..سترتاح!
.
.
.
لحظة..
قبل أن تغادر المقهى، اسمحلي..سأدعو لك..أن يجنّبك الله "الشبهة"..!

يا إلهي..لقد فعلتَها ثانيةً وابتسمت..ما أجمل ابتسامتك وأنت تتحسّس صدرك بعد برد لطيف زاره..!
عالقة في قلبي همستك الأخيرة:

"الحمدلله على نعمة الإسلام"!

#غدًا
#حسن_باشا
#ARK

مرة بنت بعتت على آرك:
-----------

ليه الله المتصف بكل صفات الكمال يسمح للشر بالتواجد في الكون؟
ليه ما يتدخل لإزالته؟
شو ذنب أطفال سوريا وغزة يموتوا بالكيماوي؟
وكيف إله "رحيم" سمح بوجود ابتلاءات ومصائب وأوجاع وآلام..
ليه في سرطان؟ وكيماوي؟ وأمراض قاسية ومؤلمة؟!
ليه الله ما ينتقم من الظالمين والقتلة والمجرمين؟
طيب مش الله مُطّلِع على كل شيء؟
أكيد شايف شو بصير بالدنيا..صح؟!
طيب وينه؟!!

لكنها ختمته بكلمة: آسف !
وحكت والله مش قصدي بس حابة أفهم ليه؟
أنا بحب الله وما بتخيّل حياتي بدونه..
وما بدي شبهة زي هاي تبعدني عنه..

ممكن تجاوبني؟!
.
.
.
حاضر !

#اليوم
#ARK

#حسن_باشا