مرّة بنت تواصلت معي عشان شخص ببتز فيها، والحمدلله ربنا قدّرني أساعدها.
انصدمت بعد فترة لما بعتتلي إنها رجعت تتواصل مع الشب وهيّو الآن رجع يهددها..!!

وصارت أكثر من مرة أساعد ناس وقعوا بمشاكل، وبعد فترة يطلبوا مساعدة لإنهم رجعوا وقعوا بنفس الغلط لكن مع أشخاص مختلفين!!

ليه طيّب؟ ليه بنكرر نفس الغلط؟ ليه بنوقع بنفس الفخ؟ ليه ما بنتعلم من أخطائنا؟!

حسب علماء النفس في ناس عندهم نزعة شديدة وميل غريب لتكرار بعض التجارب المؤلمة في حياتهم، وهالشيء يُطلق عليه في التحليل النفسي "التكرار القهري" وإله عدة أسباب منها:

* إنه الشخص بعيد سيناريو نفس الأحداث القديمة بكل تفاصيلها وأدوارها وظروفها عشان يحاول ينهيها بطريقة مختلفة عن اللي انتهت عليه في السابق.. يعني الشخص بعيد صنع الموقف وتركيبه مع شخص أو أشخاص جداد بلبسهم الأدوار القديمة (أو حتى نفس الأشخاص القديمين) عشان يحل معاهم اللي ما عرف يحلّه زمان.. ويعمل نهاية جديدة وسعيدة بدل النهاية البائسة السابقة. وللأسف نادر ما ينجح!

* إنه الشخص غالبا بكون فى تجاربه الأولى المؤلمة ضعيف ومنكسر.. وبعتبر إنه كل هالأشياء صارت غصب عنه ومش بإرادته.. وبحس وقتها بالذل والانكسار والمهانة.. لكن الآن هو بعمل كل هالاشياء بمزاجه وإرادته وكامل وعيه.. فبحس (ولو إحساس مزيف) إنه إله السيطرة على الأمور اللي بمرّ فيها..

* إنه الشخص كان (ضحية) في اللي صار معه زمان.. كان مستسلم ومغلوب على أمره.. فبرجع هالمرة عشان ينتقم.. وبرجّع شريط حياته لورا وبكرر نفس التجربة مع شخص جديد أو نفسه، بس بكون هالمرة هو (الجاني).. عشان يوخذ بثاره! وكمان للأسف نادر ما ينجح!

* الشخص اللي بتعرض لتجارب مؤذية وقاسية فى حياته بحس بالذنب إنه ما دافع عن نفسه.. أو إنه هو اللي وصّل حاله لهيك وضع .. أو إنه هو اللي ساعد الطرف الثانى إنه يجرحه..فببدأ يتنقم من نفسه ويعذبها ويجلدها بتكرار نفس الأحداث واستدعاء نفس الأذى واستعذاب نفس الألم.
في بعض الناس بتتلذذ بتعذيب نفسها وجلد ذاتها.. ناس بتحب الوجع.. وهذا النوع من الناس بكونوا بنتقموا من أنفسهم.. أو بنتقموا من غيرهم في أنفسهم.
.
.
أكيد صادفتوا مثلا بنت بتختار شريك أناني وطمّاع ومستغل ومؤذي إلها نفسياً وعاطفياً وجسدياً، ومش بس هيك.. كمان بتكون مستمسكة فيه وما بدها تتخلى عنه.. وبتحارب الدنيا كلها عشانه.. ولو تركها بترجعله.. برغم البهدلة والاستغلال والأذى.. وحتى لو تركوا بعض لسبب ما بتصير تبحث عن شخص عنده نفس المواصفات وبترتبط فيه.. وبتعيد السيناريو من الأول بنفس تفاصيله.
وهذا حسب علماء النفس يعتبر من أعقد أنواع العلاقات وأصعبها..
.
.
في المقابل في ناس صح بتغلط، لكن هالغلط بصحيها وبوعّيها وبزيدها نضج وحكمة وفهم، وبكون هالغلط دافع إلهم حتى يصيروا أحسن وأقوى وأصلب..
ولما تشوفهم بتستغرب كيف قدروا يصيروا هيك؟ كيف تجاوزوا؟ كيف امتلكوا هالنضج فجأة.. كيف هيك صاروا قراب من ربنا؟؟!
.
.
كلنا بنغلط، لكن هالغلط..
إما بتتعلم منّه وبقدمك..
أو بنتشلك لورا وبأخرك..!!

لِمَن شَاءَ مِنكُمْ أَن يَتَقَدَّمَ أَوْ يَتَأَخَّرَ !
#ARK

من يومين في بنت مصريّة نزلت بوست:
ابن عمي الكبير ** اتحرش بيا وانا صغيرة ولما قولت لابويا مصدقنيش
باي ♥️ !

بعدها لقوها منتحرة من الطابق العاشر، أو مقتولة ما بنعرف!!
الله يرحمها ويغفر إلها..

---------
بالمناسبة، صح الأطفال بحكوا كثير وبخبرونا عن كل شيء بصير معهم، وبنقلوا إلنا كل موقف حتى لو بسيط أو تافه صار معهم.. لكن إذا كان الموضوع "تحرّش واعتداء" بفضلوا السكوت!!

الدراسات بتحكي:
38% فقط من ضحايا الاعتداء الجنسي من الأطفال يُفصِحون عما تعرَّضوا له!

طيّب ليه؟؟ ليه الأطفال مش ممكن يخبرونا بشيء فظيع مثل هيك حصل معهم؟؟!

في عدة احتمالات منها:
- شعور الطفل باللوم والذنب وإنه هو سبب بالشيء اللي صار.
- إحساس الطفل بهديك اللحظة بكون مليء بالخزي والعار فهو بفضل يسكت حتى ما يسترجع هذا الحدث في باله.
- غالبا الشخص المتحرش بقوم بتهديد الطفل، فممكن يقله بعاقبك لو بتحكي، وإنه ما حد رح يصدقك أصلا، أو رح أقتل حد من أهلك لو خبرت حد، وفي منهم بغري الأطفال بمصاري أو هدايا!
- أكثر من 30% من حالات الاعتداء بتكون من العائلة! لهيك الطفل بحتار إنه لمين أحكي؟ والشخص المتحرش من أفراد العيلة وهالشيء رح يعمل مشكلة كبيرة أو ممكن ما حد يصدقني..! وبالتالي خوفه من عواقب شيء بجهله بدفعه للسكوت تماما.
- الأطفال غالبا غير قادرين يعبروا عن الشيء اللي صار معهم، ما عندهم مصطلحات وألفاظ تسعفهم، همه نفسهم مش فاهمين إيش صار، وبعضهم بتساءل هو الشيء اللي صار طبيعي ولا مش طبيعي أصلا!
- بعض الأطفال ممكن يتقبل هيك شيء فيما لو كان مقترن بهدايا وامتيازات أو لذة أو فضول حصلوا عليه، وبالتالي هون بشعروا نفسهم مسؤولين وسبب بالشيء اللي صار معهم، فبفضلوا يسكتوا وما يفضحوا حالهم ويتعاقبوا من أهلهم..
.
.
طيّب هل في علامات ممكن تساعدنا في معرفة إذا الطفل تعرض لإعتداء؟

أكيد، مثل العزلة والاكتئاب والكوابيس والأرق والتشتت والتراجع الأكاديمي والبكاء المستمر، وخوفه وهلعه من إنه يروح مكان معين او في حال سمع اسم معين، ومشاكل في أكله وشهيته، وكمان أفكار انتحارية أو رغبته في إيذاء نفسه وجرح حاله..

وفي كمان علامات مثل رغبته المبالغ فيها بالاستحمام، أو تكراره لغسل إيديه ووجه، أو تغييره لملابسه بشكل متكرر، وصدور بعض السلوكيات النكوصية منه مثل مص الإبهام أو التبول اللإرادي..
.
.
وللأسف تعرض الطفل للتحرش بعرضه لمشاكل نفسية كبيرة، منها تفكيرهم بالانتحار أو الاكتئاب أو عدم ثقتهم بأحد، أو تجنبهم للإرتباط، أو بميلوا لعلاقات تستنزفهم تماما وبالتالي تتكرر الاعتداءات والإساءة عليهم..!
لكن هذا لا يعني إنه الشيء لا يعالج، وبنصح كل شخص مر بهيك تجربة ولا تزال مأثره عليه وما قدر يتجاوزها يلجأ لأخصائي نفسي ويواجه مشكلته ويكمل حياته..

والحل؟!
الحل ببساطة بالتوعية والكلام مع الأطفال بشكل يناسب عمرهم، ومتوفر عالإنترنت محتوى هائل ممكن يساعد الآباء والمربين على توعية الأطفال.
ومهم جدا التوعية تكون من المدرسين والمدرسات، لإنه هذا ممكن يشجع الطفل يحكي إلهم فيما لو كان الإعتداء من نفس بيت وعائلة الطفل.
أو في حال خوفه إنه لو خبر أهله ما يصدقوه أو يعاقبوه، فهيك بكون المدرسين المكان الآمن إلهم..
.
.
نقطة مهمة جدا بحب أشير إلها، إنه الاعتداء والتحرش في هالوقت مش مقتصر فقط على الواقع!!
في أهل آه بحموا أطفالهم في الواقع، لكن بتركوهم عالتلفون!!
التحرش من خلال الانترنت والألعاب وتطبيقات المحادثة شيء فظيع جدا، وقاعد بنتشر بشكل هائل!!

والله قلبي لهسا بوجعني لما بنت عمرها 12 سنة بعتتلي بيوم:
عمو ساعدني في حد خلاني أصور حالي وهلأ بهددني يخبر ماما وبابا!!!
.
.
.
هالبوست المختصر لعل وعسى يساهم في توعية الناس ولفت انتباههم لهذا الموضوع الخطير والمهم..
لعل وعسى يساهم في إنقاذ حياة الكثير من الأطفال..!

هالبوست عن روح (علياء) البنت المصريّة..
الله يرحمها ويغفر إلها..!

#ARK

(رمشة)!!

في بنت بتحكي للبنت اللي جنبها في الباص شو رأيك تقرأي معي أذكار الصباح؟!
البنت استغربت من طلبها خصوصا إنها ما بتعرفها!
بس وافقت على طلبها وشعرت إنها أمام إنسانة لطيفة..

خبرتها البنت بس لازم قراءة الأذكار تكون من قلبك، مش بس تحركي لسانك، يعني تحسي قلبك هو اللي بحكيها وتستشعري معانيها..

يعني مثلا لما تحكي: (اللهم ما أصبح بي من نعمة أو بأحد من خلقك فمنك وحدك لا شريك لك، فلك الحمد ولك الشكر.)
بدك تستشعري كل نعمة من قلبك، وبكل خشوع تحكي الحمدلله..

ابتسمت البنت وقالت حاضر، رح اقرأ الأذكار بخشوع ومن قلبي، وعد!

بدأت فعلا تقرأ الأذكار، ولما وصلت لعند:
( اللهم إني أسألك العفو والعافية في ديني ودنياي وأهلي ومالي، اللهم استر عوراتي وآمن روعاتي، واحفظني من بين يدي ومن خلفي وعن يميني وعن شمالي، ومن فوقي، وأعوذ بعظمتك أن أغتال من تحتي)..

قالت بعفوية: شو مريح! بتعرفي إني طلعت الصبح من البيت خايفة! ومش عارفة من شو خايفة! بس هالدعاء كثير ريحني..شكرا!

كملت قراءة، (اللهم إني اسـألك خير هذا اليوم، فتحه، ونصره، ونوره وبركته، وهداه)

كانت مبتسمة باطمئنان وهي بتعيد وبتتأمل بـــ (فتحه ونصره ونوره وبركته وهداه)، وقالت فجأة: يا رب... وكانت من قلبها!

لما قرأت: (اللهم أنت ربي لا إله إلا أنت، خلقتني وأنا عبدك وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك عليّ، وأبوء بذنبي فاغفر لي فإنه لا يغفر الذنوب إلا أنت).

حست بشعور غريب، هاي أول مرة بتعاهد ربنا وبتعترف إله بأخطائها بهاي الصيغة الرهيبة..
وتنفيذا لشرط صديقتها وإنها تقرأ الأذكار من قلبها، غمضت عيونها وقالت:
وأنا على عهدك ووعدك ما استطعت!

خبرتها صديقتها إنه هالدعاء اسمه (سيد الاستغفار)، حلو كتير صح؟؟
.
.
كانوا مع كل دعاء يتناقشوا ويحكوا، ومر الوقت سريعا وضايل دقيقة والبنت اللي قررت تقرأ الأذكار من قلبها تنفيذا لطلب غريب من بنت ما بتعرفها إنها تنزل من الباص..

قالت بسرعة بسرعة هسا كثيير حلو ومطمئن دعاء:
( يا حي يا قيوم برحمتك استغيث أصلح لي شأني كله ولا تكلني إلى نفسي طرفة عين)

بس شو يعني (ولا تكلني إلى نفسي طرفة عين)؟؟!

ردت عليها: تمام عالسريع عالسريع..
إنت هون بتدعي ربنا باسمه (الحيّ) و (القيوم) القائم على كل شيء، وبتستغيثي برحمته إنه يصلح إلك كل شؤونك وأحوالك وقراراتك ومسار حياتك ونفسيتك وكل إشي كل إشي..
ربنا الحيّ اللي ما بموت، والقيوم القائم على كل شيء، واللي رحمته وسعت كل شيء ما رح يعجزه إنه يصلح شأنك وحياتك..صح؟!

- آه صح!
بس سألتك عن معنى ولا تكلني إلى نفسي طرفة عين؟!!
يييي الباص وقف، لازم أنزل هلأ...

استني استني..
طرفة عين يعني (رمشة)!

باي!
.
.
نزلت من الباص وهي صافنة..
ربنا حيّ وبحيي فينا كل أمل، وقيوم بقوم على شؤون عباده، وأنا بستغيثه برحمته إنه يصلح شأني وحياتي..!

آآآه آه.. وإنه ما يتركني لنفسي ولحالي ولو لحظة، ولو بمقدار رمشة!
.
.
مر على هالموقف سنوات، ومن وقتها وبكل صبح ومسا هالبنت بتدعي من قلبها وبتقول:

يا رب ما تتركني لحالي ولو رمشة!!

#ARK

صديق إلي خبرني مرّة إنه معجب ببنت وبفكر يتقدم إلها..

قبل ما يخبرني عن البنت بفترة كان مخبرني عن منحة ماجستير برا، وخبرني بشو حاب يتخصص وبأي جامعة ... كل هذا كان قبل ما فجأة يشوف هالبنت ويقرر يأجل طموحه أو يتنازل عنه مقابل إنه يرتبط فيها..!

حسم صراعه، وفعلا تقدّم للبنت وكل الأمور سارت مثل ما بتمنى وأكثر...

بعد كتب كتابهم بأيام رنّ علي وحكالي حاب أشوفك..
قعدنا ولاحظت إنه متوتر ومهموم.. وعنده حكي حاب يحكيه..

خطرلي إنه متوتر من موضوع طموحه وسألته بتفكر بطموحك؟ وحسيت حالك ضيعت فرصة على حالك؟

- قلي: لا لا !!! هالموضوع ما بفكر فيه، وهي حد كثير بستاهل وكل يوم بحمد ربنا على نعمة وجودها... وعفكرة بقدر أجمع وأوفق بين زواجنا وطموحي..

- ارتحت لما جاوبني هيك، بس مش فاهم مالك مدايق؟!

- قلي أنا متوتر من فكرة إنه الزواج أبدي!!
يعني آه والله بحبها وبموت فيها، بس متوتر من نفس فكرة الزواج، وإنه كيف لشخصين يعيشوا مع بعض حتى الموت!
إنك فجأة تربط كل حياتك النفسية والإجتماعية والعاطفية بشخص آخر.
إنكم تكرّسوا وقتكم وجهدكم وحياتكم وقلبكم وعقلكم لبعض..
إنه شخصين يتحملوا أغلاط وهفوات بعضهم للأبد..

طيب حتى لو في حب، مش في ملل؟ مش إحنا كبشر بنحس بالإشباع مع الوقت، مش لحالنا بنفقد دهشة البدايات..؟

إنت بكرا بتخطب وبتحس بشعوري، متخيل تصحى وتاكل وتشرب وتطلع وتعيش مع نفس الحد طول العمر!!

أنا ما بقلك عن سنة ولا سنتين ولا عشرة..
بقلك عن عمر لو ربنا كتب إلنا نعيش..!!

لا تفكر إنه عندي مشكلة مع البنت، بالعكس أنا لما أشوفها بنسى كل هالأفكار ومش مصدق متى نتزوج، بس لما أكون مع نفسي بتوتر من هالفكرة.. إنك تعيش مع شخص للموت!!
----------------
.
.
بالمناسبة كلامه تساءل عنه كثير من علماء النفس..
شو بدفع شخصين يعيشوا مع بعض العمر كله؟؟
حتى لو كانوا بموتوا وبعشقوا بعض.. بس أكيد في ملل وتعود..طيّب كيف بكملوا؟

إحدى تفاسيرهم إنه علاقات الزواج علاقات مرنة ومتجددة وغير مادية..
وبالتالي ما بصير فيها الإشباع مثل ما بصير مع الأشياء المادية..

يعني إنت لما تتعامل مع شيء (مادي) ثابت أكيد رح توصل للإشباع وتمل منه...لكن في الزواج في شيء بتجاوز المادة، إنت بتعامل روح ونفس متجددة بانفعالاتها وأفكارها ودوافعها وحركاتها.. وبالتالي الإشباع مش موجود لإنه طبيعة العلاقة متجددة ومرنة جدا..
---------------
ما خبرت صديقي عن التفسير النفسي، خبرته عن تفسير من نوع ثاني..قلتله أكيد بتعرف آية ( .....لتسكنوا إليها وجعل بينكم مودة ورحمة)...

الآية في سورة الروم..
سورة الروم سورة مليئة بالكلام عن (آيات الله) يعني حججه وأدلته ومعجزاته في الخلق والكون..

آية (الزواج) أجت بين مجموعة آيات ثانية..شوف:

وَمِنْ آيَاتِهِ أَنْ خَلَقَكُم مِّن تُرَابٍ ثُمَّ إِذَا أَنتُم بَشَرٌ تَنتَشِرُونَ (20) وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ (21) وَمِنْ آيَاتِهِ خَلْقُ السَّمَاوَاتِ وَالْأَرْضِ وَاخْتِلَافُ أَلْسِنَتِكُمْ وَأَلْوَانِكُمْ ۚ إِنَّ فِي ذَٰلِكَ لَآيَاتٍ لِّلْعَالِمِينَ (22) وَمِنْ آيَاتِهِ مَنَامُكُم بِاللَّيْلِ وَالنَّهَارِ وَابْتِغَاؤُكُم مِّن فَضْلِهِ ۚ إِنَّ فِي ذَٰلِكَ لَآيَاتٍ لِّقَوْمٍ يَسْمَعُونَ (23) وَمِنْ آيَاتِهِ يُرِيكُمُ الْبَرْقَ خَوْفًا وَطَمَعًا وَيُنَزِّلُ مِنَ السَّمَاءِ مَاءً فَيُحْيِي بِهِ الْأَرْضَ بَعْدَ مَوْتِهَا ۚ إِنَّ فِي ذَٰلِكَ لَآيَاتٍ لِّقَوْمٍ يَعْقِلُونَ (24)
.
.
.
سؤالك صح، وشيء بستدعي العجب إنه كيف لشخصين يعيشوا مع بعض للموت..!!

ومن عظم الشيء ربنا ذكره كأحد آياته! كأحد معجزاته في الخلق!
القرآن اعتبر فكرة الزواج وديمومته خصيصة من خصائص القدرة الإلهية..!
شيء يستعصي على العقول استيعابه وفهمه..
فهو آية ودليل ومعجزة على وجود إله كليّ القدرة والرحمة..
مثله مثل خلق السموات والأرض!
.
.
ربنا بقلنا من آيته خلق الإنسان من تراب، وخلق السموات والأرض، ومن آياته الليل والنهار، والبرق والمطر اللي بحيي فيه الأرض بعد موتها..

ومن آياته إنه يجمع شخصين تحت سقف واحد طول العمر!
حتى الموت!!

#القرآن_الجميل
#ARK

صارت معكم إنه حد يطلب منكم طلب بسيط جدا، وبعد ما رديتوا عليه، رجع بعدها طلب شيء أكبر مع ذلك رديتوا عليه وكان صعب عليكم تعتذروا؟!

مثلا:
- حد في الجامعة طلب منك تساعده بواجب عالسريع، بعدها بفترة طلب منك تساعده بالبحث وكمان ساعدته.

- حملة طلبت منك فقط تغيّر صورة البروفايل تضامنا معها، بعد بفترة طلبوا منك التبرع للحملة وفعلا تبرعت.

- بيّاع عرض عليك منتج وقلك بس شوفه واسمعني عالسريع، وآخر شيء لقيت حالك اشتريته.

- أختك طلبت منك تعمل إلها كاسة نيسكافيه بطريقك، وثاني يوم رنّت عليك جيب بالله وجبة شاورما كمان بطريقك!!

------------
ما سبق بطلق عليه علماء السلوك: استراتيجية قدم على عتبة الباب FITD، وهي وسيلة نفسية هدفها إنه يستجيب الشخص لطلب كبير بجعله يستجيب في الأول لطلب صغير.

يعني مثلا، مرّة رنوا على ربّات بيوت وسألوهم عن المنتجات اللي بستخدموها في بيتهم، بعدها بفترة رنوا عليهم وحكولهم بدنا نرسل فريق عالبيت يعمل إحصاء لمنتجات البيت..موافقين؟
ووجدوا إنه ربّات البيوت اللي وافقوا على فريق الإحصاء همه اللي بالأول ردوا على الأسئلة بالتلفون.

كثير كثير في أمثلة عن هالتقنية والمستخدمة بكثرة في مجال التسويق تحديدا، وفي كثير ناس بستخدموها معنا أو بنستخدمها معهم في حياتنا من غير وعينا ولا وعيهم..

طيّب ليش؟
ليش في الغالب بنستجيب للطلب الكبير بعد استجابتنا للطلب الصغير؟
والجواب باختصار: حتى نحافظ على اتساقنا وإلتزامنا..
عموما إحنا بنحب نلتزم بمواقفنا ونكون متسقين معها..
فما دام ساعدنا شخص بحل واجب، مش حلوة نرفض نساعده بالبحث لإنه هيك بنكون خالفنا إلتزام إحنا قبلناه على أنفسنا في البداية..

--------
--------
في القرآن نفس الفكرة، كثير أوامر ربّانية بدأت بطلبات بسيطة جدا، وأحيانا مجرد تلميحات....ومجرد إلتزام المؤمنين فيها كان ينتقل الخطاب لنوع آخر من الأوامر..

مثل الخمر، والربا، والقتال، وغيرها
.
.
.
لهيك مثلا شخص ما بصلي وبدو يصوم رمضان، ما نقله لا منك ولا من صيامك! خليه يصوم وقبوله بالصيام وإلتزامه فيه بكرا رح يخليه يصلي..

وحدة نفسيا الحجاب عليها صعب ومش قادرة تتخذ الخطوة لسه، لكنها قررت تلبس لبس أستر...برافو، ممتاز، بكرا ربنا بجمّلها بالستر إن شاء الله..

شخص هاي أول مرة فيها بصلي بحياته، وكان مستثقل من السنن ومش متعود يصلي....معلش، خليه عالفروض أولها.. نعمة كبيرة والله إنه قرر يصلي..

.
.
مجرد ما الشخص وافق وقِبل إنه يلتزم بشيء ولو بسيط فممتاز جدا ... أصلا ما في بسيط بنظر ربنا .. !!

المهم خطوة بس، المهم تلزم نفسك بشيء، ولو آية باليوم، ولو تسبيحة، ولو بس ركعتين تراويح، ولو قطعة ملابس أطول شوي، ولو دينار واحد تتصدق فيه..

ولو سرور صغير رسمته عقلب أختك لما قررت تعمل إلها كاسة نيسكافيه!

#ARK

اشتغلت فترة بأمريكا، وكان السؤال المتكرر من الموظفين Do you have a girlfriend ؟

فكنت أجاوب: لأ.
طيب ليه؟
ممم عندي قناعة إنه لازم أحتفظ بمشاعري لزوجة المستقبل
" عجل الله في ظهورها " : )
كان هالجواب كفيل إنهم يقدروني ويحترموني ويحكولي واو شو إنك حدا كيوت ونيالها ") ^^

وكانوا دايما يسألوني كيف عايش بدون وجود Fun بحياتك..!
لا بنات، ولا شرب، ولا حشيش ولا إشي..!

كانوا ينظروا إلي بفضول كوني بالنسبة لأغلبهم أول مسلم بقابلوه بحياتهم..

المهم.. صادف وجودي هناك شهر رمضان، وفي يوم حكتلي المديرة:
تعال كل هي جبنا بيتزا ")
فأنا اعتذرت منها وقلتها صايم..حكتلي طيب هيّ مي وعصير ..
فقلتلها: شكرا بس أنا صايم عن كل إشي..
وبعفوية قالت: OMG حتى عن المي!!

وعلى ما يبدو إنه المديرة نقلت قصتي لبقية الموظفين، ولاحظت هالشيء من خلال نظرات الشفقة!
وأدركت هالشيء من خلال كلام صديقي "جون" لما قلي بما معناه:
مااااااااان ليه بتعمل بحالك هيك !!

وبيوم سألوني: ليه بتصوم؟؟ شو العبرة؟؟
وقتها شعرت بالإحراج وخفت ما أجاوب بشكل يقنعهم..
فلو مثلا حكتلهم إنه إحنا بنصوم عشان نشعر بالفقراء، فممكن يسألوني يعني الفقراء عندكم ما بصوموا؟؟

خطرلي وقتها أحكيلهم:
إنه إذا الإنسان قدر يمنع نفسه من الأكل والشرب وهي حاجات أساسية ومن دونها بتنعدم حياته، فهو من باب أولى قادر يسيطر على أي إشي ثاني..!

ووظفت جوابي لموضوع ليه ما عندي علاقات مع بنات ولا بشرب، لإنه اذا قدرت أمنع نفسي من الأكل والشرب، فهذا يعني إني قادر أسيطر وأتحكم بأي شهوة ثانية..

وبصراحة ما بعرف، لكن كلامي على بساطته شعرت إنه أثار إعجابهم!
.
.

رمضان فعلا مدرسة!
شهر بستخرج طاقاتك وإمكاناتك، شهر بثبتلك إنه إنت قادر تتخلص من شهواتك ورغباتك ورعوناتك وأهوائك ولحظات غضبك وانفعالك، لما قررت تكبحها لأنك صايم وما بدك يضيع صيامك !

بثبتلك إنه الشهوة اللي كنت تعتقد إنك ما بتصبر عليها يومين هيّك صبرت عالأكبر منها!
ممكن عشان هيك النبي صلى الله عليه وسلم وصف الصوم بالجُنّة، يعني ستر ووقاية.

"مدرسة الصيام" بتعمل على استدراجك للخير والطاعة، وبتخليك تشعر بحلاوتها وبحلاوة إنك قادر تسيطر على نفسك..
حتى يدفعك هذا الإستدراج إنك تعيش بقية أيام حياتك وكأنها رمضان... أو عالأقل قريب من أيام رمضان..
هذا الاستدراج للطاعة بمنحك أمل في بقية أيامك إنك قادر بيوم تكون نسخة أحسن من حالك..

"مدرسة رمضان" بتعلّمك إنه ما في أحلى من شعور القوة والسيطرة.
شعور إنك أقوى من شهواتك ورغباتك وحظوظ نفسك..
شعور إنك قادر تحكي "لأ" للغلط..
"لأ" للحظة استغابة..
"لأ" لكلام كنت رح تحكيه في موقف أثار غضبك..

رمضان شهر بمنحك أمل بنفسك وبقودك لإحسان الظن بذاتك بعد أشهر من جلدها..
وبمنحك فرصة تستأنف صراع كنت على وشك ترفع الراية البيضا فيه...!

.
.
.
في اللحظة اللي كانوا ينظروا إلي بشفقة..
كنت أتمتم بقلبي:

الحمدلله على نعمة رمضان ❤️ !
#ARK

- صوت صحون ومعالق وكركبة وصراخ، وفجأة بتخفت كل هالأصوات وبعمّ الهدوء اللي دايما بترافق مع نسمة هوا باردة من شباك المطبخ، وبتسمع تمتمات بصوت خاشع:

"اللهم لك صمت وعلى رزقك أفطرت. ذهب الظمأ وابتلت العروق وثبت الأجر إن شاء الله".
يلا سمّوا..

---------
- بنت صافنة من الشباك بتفكر كيف إنها من زمان ما تنفست هوا "السحر" ولا تأملت الغروب! ضلّت صافنة إنه كيف "زمن" رمضان أعاد دهشتها... بعد ما فقدتها في زمن الحياة الصاخبة!

--------
- كان بتأمل بزوجته وهي بتحضر الفطور، كان مستغرب من سرعة إنجازها، وزخم عطائها، هي درسّت الأولاد، وجهزت الفطور، ونظفت بسرعة، وجهزت للتروايح بسرعة على غير العادة في أي مشوار ثاني! وكانت محضرة أشياء زاكية توزعها عالأطفال في المسجد..

وهمه في طريقهم للتروايح قلها بتعرفي شغلة؟
أنا جد بحبك!

--------
- دكتور الجامعة بكل حنيّة قال لطلابه، لا تقلقلوا بخصوص الإمتحان، رح يكون سهل، عشان هالشهر الفضيل..
ومدير الشركة كان لطيف على غير العادة مع موظفينه..وقلهم رح ازيدكم عالراتب وأمانة ادعولي !
--------
- كان معصب جدا من شخص كان رح يعمل معه حادث، كان رح يعمل معه مشكلة، لكنّه فجأة تذكر إنه صايم، مجرد فكرة إنه صايم انتشلته من خانة رد الفعل، لخانة الإرادة الكاملة في السيطرة على انفعالاته مثل ما أراد الله!!

ابتسم وقله معلّش، كل عام وإنت بخير ^^

-------
- شب بكل عفوية بحكي لصحابه، شوفوا ترى أنا أعطل واحد فيكم، بس هذا رمضان، خلينا نعمل خير فيه قد ما نقدر... تعالوا نوزع تمر عالإشارات أو نعمل طرود خير.... يلا شباب بالله عليكم!!

-------
- بنت بتحكي لصاحبتها..بتعرفي شو نفسي هالرمضان؟؟
إنه أسجد سجدة طويلة، وما أرفع راسي منها إلا واسمي تسجّل من العتقاء!!
-------
- عجوز كان بفطر على 3 تمرات، وكاسة لبن..
تذكر حديث للصائم فرحتان، فرحة حين يفطر، وفرحة حين يلقى ربه..

ابتسم فجأة مع التمرة الثالثة..
تشهد بصوت خاشع هدّه الوجع والمرض...

ومات حتى يقابل ربه!!

#ARK

لأ لأ استنوا!
ليه بديتوا من سورة البقرة؟ طيب والفاتحة؟!

كنت بسأل أطفال في المسجد فتحوا المصحف بين التراويح وبدأوا بسورة البقرة.
حكولي طيّب إحنا حافظينها وكل يوم بنقرأها..

بعرف إنكم حافظينها بس لازم تبدأوا فيها لإنه هي المفتاح، هي كلمة السر..
مش إنتوا لما بدكم تفتحوا التابلت بتحطوا كلمة سرّ؟
نفس الشيء القرآن، بدكم حتى تقدروا تدخلوا عليه تحطوا 7 أرقام كلمة السر!
سألوني ليه 7؟؟ لإنها عدد آيات سورة الفاتحة..^^
-------
بس هاي كلمة السر غريبة، إنت مش مطلوب منك بس تحفظها، مطلوب منك تفهمها..!

صاروا يضحكوا.. وحكولي كيف نفهم كلمة السر.. كلمة السر بنحفظها مش بنفهمها!! آه آه صح كلامكم بس هاد بالتابلت، هون بدكم تفهموا وتحفظوا حتى يفتح معكم المصحف!!

طلبوا مني أفهمهم كلمة السرّ..

1- بِسْمِ اللَّهِ الرَّحْمَنِ الرَّحِيمِ = يعني إنك تستعين بالله، بتطلب منّه يعينك بكل شيء بحياتك، سواء دراستك، أو بلعبة كرة، أو بشغلة طلبها منك أبوك، أو حتى بلقمة قطايف بقشطة..! كل إشي بحياتك...بسم الله!
----------
2- الْحَمْدُ لِلَّهِ رَبِّ الْعَالَمِينَ = يعني إنك تكون إيجابي! سألوني شو يعني إيجابي؟
قلتلهم إنك بدك تشكر ربنا عكل إشي، حتى لو إشي سيء صار معك، حتى لو رسبت بامتحان، أو خسرت بلعبة كرة، أو أهلك زعلوك، أو صاحبك خاصمك، وأكيد كمان مع كل إشي خير... بدك تشكر ربنا عليه، وهيك إنت بتكون شخص إيجابي، إنك دايما راضي وبتشكر ربنا عكل إشي..!

سألوني طيب رب العالمين؟ ممم يعني رب كل إشي.. رب الفقراء والأغنياء والمرضى والأصحاء والمتعلمين والجهلاء، رب الكبار والأطفال والنساء والرجال، رب كل إشي كل إشي..

انصدمت لما طفل منهم قلي: يعني رب كل إشي، بدنا نشكره عكل إشي!
---------
3- الرَّحْمَنِ الرَّحِيمِ = تتذكروا آخر مرة لما مرضتوا؟ لما إمكم ضلت جنبكم طول الليل؟ لما كنتوا تصحوا تلاقوها غفيت جنبكم من التعب؟ لما كانت تبكي عليكم؟ الله أرحم فيكم من إمكم!!

بس لا تنسوا إنه رحمة ربنا مش شرط تقدروا تشوفوها بعيونكم! لإنه الحياة فيها صعوبات وفيها أمراض وأوجاع، فيها زلازل وحروب.. لكن الرحمة ممكن تكون مخبية، ممكن تكون غامضة غير مفهومة، بس ضروري تعرفوا إنها موجودة!
مرات بتكون متنكرة بأشكال كثيرة.. لهيك لا تتسرعوا وتقولوا انها مش موجودة ...لا موجودة دايما موجودة!

-------
4- مَالِكِ يَوْمِ الدِّينِ = يعني ربنا مالك يوم الحساب، يوم العدل!
مش قلت إلكم الدنيا فيها أمراض وأوجاع وحروب وزلازل؟؟ ربنا بطمنّا إنه هو مالك يوم الحساب واللي رح يعوض كل حد عن كل إشي صعب مرّ فيه..
عن كل ألم ومرض وفقد وخوف، حتى عن كل غزّة شوكة!!

هون الرحمة رح تكون واضحة جدا ..ما رح تكون متنكرة ومتخبية زي الدنيا !
----------

طيب قبل ما أكمل؟ لما أحكيلكم عن رب رحيم، أرحم فيكم من إمكم وعادل عن كل إشي رح يعوضكم... وكثير أنعم عليكم....شو الأصل تتصرفوا؟؟

جاوبوني نعبده!

ممتاز!!

شوفوا كلمة السر رقم 5.

5- إِيَّاكَ نَعْبُدُ وَإِيَّاكَ نَسْتَعِينُ!

إياك نعبد لخّصت أرقام السر (1-2-3-4).
وإياك نستعين مقدمة أرقام السر (6-7) !!

-------
6- اهدِنَا الصِّرَاطَ الْمُسْتَقِيمَ 7- صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلاَ الضَّالِّينَ.

مش خبرتكم إنه بدنا نسعين بربنا بكل إشي؟
لهيك هون إحنا بندعي ربنا إنه يعينّا ويهدينا للصراط المستقيم...
طريق الحق، والخير، والحب، والعطاء، الطريق اللي بنكون فيه مناح مع الناس، مع أهلنا، وأصدقائنا، لما نساعد طفل، أو عمو كبير بالشارع، لما نعمل خير، لما نصلي ونكون مناح مع الله!

مش نكون سيئين زي بعض الناس اللي نسيوا الله، اللي ما كانوا مناح مع الناس، اللي ما كانوا مناح مع الله...!!

بس لا تنسوا هاد طريق صعب، بس حلو!!
لهيك لازم بكل مرة نحكي كلمة السر ندعي ربنا يعينا ويساعدنا ويهدينا وإنه لما نبعد عن الطريق المستقيم يردنا إله وما يتركنا..

بصوت عالي وعفوي قالوا:

آآآآآآآمين!!!

#القرآن_الجميل
#ARK

صاحبي بحكيلي يلا نلحق التروايح، مش حلوة النسوان يكونوا قبلنا بالمسجد "") !!

لما شفته قلتله ليه مستغرب إنه النساء يكونوا قبل الرجال في المسجد؟
بتعرف كثير دراسات أشارت إلى إنه النساء أكثر تدينا من الرجال!!!

والدراسات ما بتحكي فقط عن البلاد الإسلامية، بل حتى بكل الديانات المرأة أكثر تدينا، وأكثر إلتزاما بالطقوس الدينية، وأكثر إحساسا بأهمية العبادة، والأكثر مشاركة في البرامج الدينية، والأكثر عطفا اتجاه الفقراء والمحتاجين!!

صاحبي استغرب، خصوصا إنه وريته دراسة لمركز بيو للدراسات الإحصائية، وكثير في دراسات ثانية بتأكد نفس النقطة..
وإن كانت في دراسات بتشير إلى إنه معيار التدين متقارب جدا بين الجنسين والفروق بينهم طفيفة جدا...
على عكس الشائع في أذهانا إنه الرجال احسن بكثير ومتفوقين دينيا !!
----------
----------
آسف إني أحكي إنه الخطاب الديني والوعظي حاليا في مجمله متحيّز لصالح الرجال، ومركّز خطابه اتجاه النساء وسلوكياتهم الخاطئة!

وبتشعر إنه الخطاب الوعظي حاليا بشتغل بمبدأ رد الفعل اتجاه الخطاب النسوي المتطرف، وبرأيي هذا خطأ..
لإنه الخطاب اللي بحكي باسم ربنا ورسوله الأصل يكون خطاب متزن، خطاب بقرب الناس لربنا، خطاب منصف وغير متحيز، وإنه يبتعد عن السخرية والاستهزاء حتى لو كان الطرف الآخر بمارسها..

أحيانا بنصدم من شخصيات دينية بتكون منزلة بوستات بشكل مبتذل وساخر عن سلوكيات البنات، في غياب واضح عن ذكر سلوكيات الشباب واللي في كثير من الأحيان بتكون أكثر جرأة وفظاعة وقبح!!

أنا مع الأمر بالمعروف والنهي عن المنكر، لكن مع إنه الخطاب يكون حريص يكسب الطرف الآخر للهداية، مش يكون هدفه يفحمه وينتصر عليه ويظهر ضلاله وضياعه وانحلاله وفقط!
ومع إنه الخطاب يكون متزّن ومنصف ويناقش الخطأ والصواب بذاتهم بعيدا عن جنس مرتكبهم..

فمثلا، بدك تحكي عن عمل المرأة؟ ممتاز موضوع مهم، لكن إحكي بطريقك عن سلوكيات الرجال في بيئة العمل!!!

بدك تحكي عن لبس البنات في الشوارع؟ حلو كثير، لكن كمان إحكي عن الشباب المتحرشين في الشوارع!!

بدك تحكي عن شلة بنات فقدوا حيائهم وبرقصوا آخر الليل؟ لا تنسى كمان تحكي عن الشباب السكرانين آخر الليل!!

بدك تنتقد بنات لجأوا لجهات برأيك مندسة وتابعة للغرب، ممكن بتفق معك إنه فعلا كثير من هالجهات عليها علامات استفهام، لكن هل وفرنا بديل؟ هل أسسنا جميعات ومنظمات تدافع عن حقوق النساء المضطهدات والمعنفات؟
.
.
مؤسف إنه الخطاب اللي بزعم دفاعة عن الأسرة الإسلامية، بهدم قيم الإسلام ذاته، بخطابه المنفر والمتعالي والساخر والبعيد عن الواقع..

مؤسف إنه الخطاب اللي بحكي باسم ربنا ورسوله ينجر من خانة الفعل لخانة رد الفعل فقط..

مؤسف إنه بناتنا وخواتنا بلجأوا لجهات فعلا ممكن تستغل مظلمتهم وحاجتهم واحنا قاعدين من ورا شاشات بنّظر!!

-------
بتمنى ما ينفهم كلامي إني بعمم، أكيد في خطابات مشرقة ومنصفة وتدور مع الحق..
وبتمنى ما ينفهم كلامي إني متحيّز لصالح طرف على آخر، أنا مع الحق والصواب وضد الظلم العدوان سواء كان مرتكبه ذكر أو أنثى..
.
.

ورجائي من كل بنت صادفت خطاب ديني مُنفر.. وقادها هالشيء لمشكلة مع الدين نفسه ..إنها تراجع نفسها وتسأل أهل العلم المتخصصين بعيدا عن بعض الوعاظ الجاهلين..

وأرجوك لا تسمحي لأي خطاب قهرك ونسي حقك إنه يقودك لتنسي الله !!
.
.

ونيابة عن الجميع..

أنا آسف !

#ARK

مرة بنت أختي جابتلي مفتاح السيارة وحكتلي:
يلا وديني عالمول!
طبعًا هي أحلى إشي عندها في الحياة لما تروح عالمول عقسم الألعاب..
لو تشوفوا دموع الفرح بعيونها وهي صافنة بكمّ الألعاب المهول قدامها!
وكنا لما نشتري إلها لعبة تقعد معها يومين بعدين نلاقيها (محطمة) ومكسّرة أو ضايعة تحت التخت والكنباي..
كبرت بنت أختي شوي وبطلّت الألعاب كثير تستهويها، وصارت تميل أكثر لألعاب التلفون، وكل ما تيجي عنا بتحكيلي بكل براءة: خالو عادي تعطيني تلفونك ألعب شوي..
لكن شو ما كانت اللعبة حلوة آخريتها تختمها أو تزهق منها..
رح تكبر بنت أختي إن شاء الله وحتصير صبية..
وممكن وقتها رح تهتم بحالها ومظهرها وشكلها ولبسها أكثر..
وما رح تسمح لأختي تلبّسها ألف لون بنفس اللبسة ^^
رح تدخل بمرحلة (الزينة) المباحة إن شاء الله وهذا شيء فطري فينا كبشر..
ولما تتخرج من الجامعة إن شاء الله..
رح تفكر بحياتها بشكل جدي اكثر، ورح تفكر كيف تبني حياتها وتكوّن نفسها وتبني أسرتها..
---------
ما سبق بتحكي عنه هالآية:
اعْلَمُوا أَنَّمَا الْحَيَاةُ الدُّنْيَا
1- لَعِبٌ
2- وَلَهْوٌ
3- وَزِينَةٌ
4- وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ
الآية ما انتهت..
وتكملة الآية بتحكيلنا:
كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ
يعني..
مثل مزارع زرع البذور وطار من الفرحة لما نزل عليها مطر من السما..
لو تشوفوا دموع فرحته وهو بشوف النبات أخضر بنمو وبكبر شوي شوي عالأرض..
كان هالمزراع معجب بالزرع ومدهوش فيه والدنيا كلها مش واسعه فرحته..
لكن هالنبات كبر وكبر حتى اختفت دهشة المزراع فيه..
صار لونه أصفر وبعدها يِبِس وجَف وصار
(حُطام) !
-------
ختام الآية:
وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ
.
.
ديروا بالكم تشغلكم الحياة بألعابها ولهوها وزينتها عن الآخرة..
ديروا بالكم تتحول حياتكم لمظاهر وتفاخر بينكم..
وما تنسوا إنه الحياة متاعها زائل ومؤقت ولحظي وما بدوم لحد..
ومهما بلغتوا فيها من المتع والسعادة والمرح واللهو واللعب آخريتها تصير حُطام تحت رجليكم..
بالضبط مثل نبات المزارع..
ومثل ألعاب (لانا) بنت أختي!

#القرآن_الجميل
#ARK

فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ

لَا نــــ
فَــــ ضّـــــ
و ا

مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ (159)

#القرآن_الجميل
#ARK

إذا صادفت واحد دارس علم نفس، أول إشي بخطرلك تحكيله: حلّلي شخصيتي!!
أو ممكن تحكيله عن مشاكلك النفسية، وغالبا رح تحكيله: بتعرف إني مهتم وبحب علم النفس!

للأسف صعب حد يحللّ شخصيتك بلقاء عابر، شخصيتك شيء معقد ومركب من عوامل عديدة، البيئة، وخبرات الطفولة، وتجاربك الشخصية، ونمط تربية أهلك، وفلسفتك ومعتقداتك، وطرق تفكيرك، وكل إشي عشته ومريت فيه..

حتى لو أوهمك البعض إنه في اختبارات بتحلل شخصيتك، أكيد فيها جانب صواب، لكن صعب جدا تدخل بغمار شخصيتك..

-------
في القرآن في سورة نفسيّة بامتياز، بتحلل جانب مهم من شخصيتك، أو بالأحرى بتصارحك فيه، جانب إنت ما بتحب تحكي عنه، أو بتدّعي إنك مش هيك، لكنّك هيك!!
بس السورة ما رح تتركك، ورح تقدملك العلاج!!

في سورة المعارج:
۞ إِنَّ الْإِنسَانَ خُلِقَ هَلُوعًا (19) إِذَا مَسَّهُ الشَّرُّ جَزُوعًا (20) وَإِذَا مَسَّهُ الْخَيْرُ مَنُوعًا (21)

إنت هلوع، ما بتصبر! لما يمسّك شر بتجزع لوقوعه، وبتفكر إنه هالشر رح يكون دائم وسرمدي في حياتك، وبتحبس نفسك بأفكار سلبية وسوداوية، وبتظن إنه ما في فرج بعد هالشدة، بتحزن وبتكتئب، وبلتهمك الجزع، وبمزقك الهلع!!

ولما يصيبك خير بتبخل وبتمنع!! بتفكر إنه الخير صابك من كدّك وكسبك وتعبك، فمش سهل عليك تضحي فيه بسهولة، لهيك بتمنع الخير يوصل لغيرك.. وممكن تسخر من خطواتهم المبتدئة وتحبطهم بوصفك لصعوبة الطريق واستحالته، بدل ما تمد إيدك لتساعدهم..ورح تعيش كمان بأفكار سودواية إنك تخسر هالخير..!

وللأسف بتعيش حياتك ما بين خوف من شيء خايف إنك ما تحصّله، وما بين شيء بين إيديك لكنك خايف تفقده..

بتعيش بالخوف!!

---------
استنى!
في استثناء.. أو علاج..
أحد أشهر العلاجات النفسية شيء يسمى "العلاج المعرفي السلوكي" فكرته قائمة على علاج أفكار الشخص وسوداويته بالتفكير، بالإضافة لسلوكيات بدّرب عليها الشخص حتى يقدر يتجاوز مشكلته ويتكيّف مع واقعه من جديد ...

الاستثناء والعلاج المعرفي السلوكي (للتشبيه وتقريب الفكرة) بتخبرنا عنه سورة المعارج:

إِلَّا الْمُصَلِّينَ (22) الَّذِينَ هُمْ عَلَىٰ صَلَاتِهِمْ دَائِمُونَ (23) وَالَّذِينَ فِي أَمْوَالِهِمْ حَقٌّ مَّعْلُومٌ (24) لِّلسَّائِلِ وَالْمَحْرُومِ (25) وَالَّذِينَ يُصَدِّقُونَ بِيَوْمِ الدِّينِ (26)

الصلاة كسلوك وأفكار !
في ظل حياة فيها خوف من شيء خايف ما تحصله، وشيء بين إيديك خايف تخسره، بتيجي فكرة الصلاة 5 مرات باليوم..
لقاء خاص بينك وبين ربنا، بتفضفض فيه لربنا خوفك، وقلقك، وهلعك، وبتطلب منه يساعدك وما يتركك لحظوظ نفسك ومخاوفك..!
لقاء بتستحضر فيه إنك بيوم رح توقف بين إيدين ربنا، مجرد استشعارك لهالفكرة.. رح تدرك إنه كل هالدنيا ما كانت بتستحق خوفك !

وكسلوك رح يعافيك من هذا الخوف والهلع والمنع، بدك تتصدق! وتنتصر على نفسك، وتحب الخير لغيرك، وتزرع الإبتسامة على وجوههم وتجبر خاطرهم..
ما تكون بخيل ومنوع، وامنح الآخرين مثل ما ربنا منحك!

وكفكرة معرفية رح تعافيك، إنك تصدّق بيوم الدين والحساب، لإنه مجرد إيمانك وتصديقك بهاي الفكرة، رح تتحررك من كثير مخاوف حبست نفسك فيها..

إيمانك بيوم حساب رح توقف فيه بين إيدين ربنا، رح يخفف من حدة أفكارك، ورح يخفف من آلامك اتجاه أشياء ما كانت مستاهلة حزنك وخوفك..

رح تكتشف إنه (يوم الدين) هو الفكرة الوحيدة اللي كانت بتستحق خوفك!
-----------
----------

بدك تنصدم؟ شوف الآيات قبل (إن الإنسان خلق هلوعا)!!

#القرآن_الجميل
#ARK

مرة بصلاة التراويح بنتين صغار بجننو صارت بينهم طوشة في المسجد..^^
كل المسجد ضحك عليهم، وحتى آبائهم ما قدروا يمسكوا حالهم من الضحك..

حتى الشيخ أجلّ الصلاة دقائق لحتى يهدي النفوس.. "))
وقتها الشيخ قلنا حديث جميل، عن طفلتين اقتتلوا أمام رسول الله صلى الله عليه وسلم وهو بصلّي في الناس!!

«كَانَ رَسُولُ اللهِ صلى الله عليه وسلم يُصَلِّي بِالنَّاسِ، فَجَاءَتْ جَارِيَتَانِ مِنْ بَنِي عَبْدِ المُطَّلِبِ تَشْتَدَّانِ اقْتَتَلَتَا، فَأَخَذَهُمَا رَسُولُ اللهِ صلى الله عليه وسلم فَنَزَعَ إِحْدَاهُمَا مِنَ الْأُخْرَى، وَمَا بَالَى بِذَلِكَ»

وفي لفظ آخر عَنِ ابْنِ عَبَّاسٍ رضي الله عنهما: أَنَّهُ جَاءَتْ جَارِيَتَانِ مِنْ بَنِي عَبْدِ المُطَّلِبِ فَأَخَذَتَا بِرُكْبَتَيِ النَّبِيِّ صلى الله عليه وسلم فَفَرَّعَ بَيْنَهُمَا وَلَمْ يَنْصَرِفْ.
--------
يعني الطفلتين وصل الشجار بينهم لعند رسول الله وهو بصلّي في الناس، كانوا بالضبط أمامه، عند ركبه صلى الله عليه وسلم..
والنبي الرحيم فرّق بينهم وهو في صلاته وكملها!!
.
.
لما طلعنا من المسجد صاحبي بحكيلي:
بتخيل هالبنتين عاشوا عمرهم وكل ما وحدة منهم تشوف الثانية تحكيلها:

تتذكري لما اطاوشنا وإحنا صغار في المسجد ورسول الله صلى الله عليه وسلم فرّق بينا!!!

-------
{لَقَدْ جَاءَكُمْ رَسُولٌ مِنْ أَنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَحِيمٌ}

#القرآن_الجميل
#ARK

بقولوا إنه العشاق في بداية حبهم بتغزلوا بالقمر، ولاحقا لما ينضج حبهم بحبوا الشمس لإنه بستهويهم دفء المشاعر وطاقة الحنان فيها..

وبحكوا إنه "جولييت" رفضت إنه "روميو" يقسم إلها بالقمر!
كانت جولييت بتشوف القمر بارد، ومجرد تابع للشمس وبسرق نوره منها، ومخادع بتغيّر وجهه كل ليلة..!!

والليل أسود، ارتبط بالحزن، والدموع، والاكتئاب، وترافق معه كثير من ذنوبنا..

على عكس الصباح..اللي ارتبط في أذهانا إنه رباح !
.
.
مهما ادّعيت إنك بتحب الليل، فإنت بتحبه لما تكون آمن بغرفتك، وبأي لحظة بتقدر بكبسة تنير عتمتك..
لكن أكيد ما رح تتقبل الليل فيما لو كنت بتمشي بطريق موحش، أو ضعت بالصحراء، أو كنت تحت الأنقاض لما سمعت إنه فرق الإنقاذ توقفت عن عملها ..

بتلاحظوا إنه الإنسان كل ما كبر بالعمر، بنام بكير، وبصحى بكير حتى يلامس خيوط الشمس ويتنفس هوا الضحى؟!

وأكيد لما نضيع بالعتمة، بنذل كل جهدنا حتى نتلمّس أي نور...ينقذنا ويرشدنا..

وعينا بالليل والنهار بشكّل بكل مرة نفوسنا وتجاربنا وخبراتنا وصراعاتنا وطرق تفكيرنا..

----------
هذا الصراع الكوني ما بين الشمس والقمر، والليل والنهار، والنور والظلام، هو ذاته صراع موجود في نفسك!

لهيك عمره خطرلك ليه ربنا قبل ما يقسم بالنفس أقسم بالشمس والقمر والليل والنهار، والسماء والأرض!!!

وَالشَّمْسِ وَضُحَاهَا (1) وَالْقَمَرِ إِذَا تَلَاهَا (2) وَالنَّهَارِ إِذَا جَلَّاهَا (3) وَاللَّيْلِ إِذَا يَغْشَاهَا (4) وَالسَّمَاءِ وَمَا بَنَاهَا (5) وَالْأَرْضِ وَمَا طَحَاهَا (6) وَنَفْسٍ وَمَا سَوَّاهَا (7) فَأَلْهَمَهَا فُجُورَهَا وَتَقْوَاهَا (8) قَدْ أَفْلَحَ مَنْ زَكَّاهَا (9) وَقَدْ خَابَ مَنْ دَسَّاهَا

نفسك بتشبه الكون!
فيها نور مثل الشمس، وفيها عتمة مثل القمر..
فيها وضوح مثل النهار، وفيها غشاء مثل الليل..
فيها رقي مثل السماء، وانحطاط مثل الأرض..

فيها فجور، والفجور من الإنفجار والإندفاع، يعني إنك ما تتحكم بانفعالاتك..
وفيها تقوى، إنك تقدر تكبح جماح انفعالاتك وغرائزك وأهوائك..

فيها فلاح فيما لو انتصرت..
وفيها خيبة!

أفلح مين غذاها بنور بالشمس وارتقى فيها للسما..
وخاب مين غشّاها بالعتمة ونزل فيها للأرض !

.
.
بنفس سورة الشمس، في قصة ثمود (إِذِ انْبَعَثَ أَشْقَاهَا)..
وصفت السورة سلوكه بالإندفاع يعني الفجور!
ووصفت شخصه (بالشقي)..
طيّب مين النبي اللي بُعث إلى ثمود؟؟!! ... اسمه (صالح)!

بالضبط، مثلك..
نفسك فيها من هالشقي.... وفيها من نبي اسمه صالح !
.
.

المهم، إنك تحاول وتصارع وتقاتل..
وحتى لو كنت بتمر بأيام مظلمة ومعتمة وموحشة، وشقية..
بدك تلحق النور... تركض وراه، تتلمسه بأي شكل من الأشكال..

بالضبط مثل القمر مع الشمس..

والقمر إذا تلاها !!!!

#القرآن_الجميل
#ARK

حسيت أبوي زعل مني لما مزحت معه وقلتله:
خلص يخلف عليك، هسا أنا بشتغل وباخذ راتبي وما بدي منك مصاري..

أبوي قلي حتى لو استقليت ماديا وما بدك مني مصاري، ما بصير تقول هيك، وكأنك يعني جاي تقلي إنك مش بحاجتي، بعد ما كنت بحاجتي طول عمرك، من اللحظة اللي أجيت فيها عالدنيا!!

-------------
-------------
كنت بقرأ سورة الشعراء، سورة بتحكي عن الأنبياء وأقوامهم..
لاحظت عبارة كررها كل الأنبياء مع أقوامهم..

نوح، هود، صالح، لوط، شعيب.. كلهم قالوا لأقوامهم:

وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ.

كلهم قالوا لأقوامهم إحنا ما بدنا منكم أجر! ما بدنا منكم مقابل! إحنا فقط بدنا تآمنوا بربنا، وإحنا أجرنا على رب العالمين..!!
.
.
بصراحة لأ، مش كل الأنبياء كرروا هالعبارة بسورة الشعراء!!
كلهم باستثناء: موسى، وابراهيــــــــم!!

في حوارات موسى وابراهيم عليهم السلام، ما قالوا: وما نسألكم عليه من أجر!!

طيّب ليه؟!!

ببساطة، ابراهيم كان بخاطب أبوه، وموسى كان بخاطب فرعون اللي تربى في بيته!!

فما كان من الحكمة واللائق إنهم يقولوا لحد أنفق عليهم، وأطعمهم، وقدّم إلهم معروف، إحنا ما بدنا منك أجر!!

كان هالشيء رح يضعف موقفهم، أو يظهرهم إنهم أنكروا فضل مين أحسن إلهم، وإنهم مجرد ما استقلوا أظهروا استغنائهم وعدم حاجتهم..

ما بليق بأنبياء الله يتحدثوا بشكل يُفهم منه إنكارهم لفضل مين رباهم..
حتى لو كان الأول ربّاه اللي قال أنا ربكم الأعلى، والثاني ربّاه صانع أصنام!
.
.
--------
رجعت لأبوي، بس ما خبرته قصة الآيات، خفت يقلي شو قصدك؟؟
أنا فرعون، ولا أبوه لابراهيم!!! " )))))))

بس قلتله حقك عليّ، أنا آسف..
وجد أنا كنت بمزح، أنا ما بنسى خيرك ومعروفك..

طيّب أقلك؟.. خلص أنا بحاجتك..
هاتلك 100 دينار ^-^ "))

#القرآن_الجميل
#ARK

وصلتني هالرسالة من بنت.. وحبيت أشاركّم فيها بعد ما أخذت الإذن من صاحبة الرسالة..
والله يجبر قلوبكم جميعا ^^
----------------
قبل كم من سنة زي هلأ كنت بدوّر كيف أنتحر بس كنت خايفة أموت عاصية..!
ما بدي أقول إني كنت شيخة.. بس يعني على حد من الالتزام.. فترات بيزيد.. فترات بيقِل..
بس هديك السنة كانت كئيبة لدرجة أفقدتني ذاتي.. واليوم بعد 4 سنين بقدر أحكي إني عم بتشافى..
حالتين وفاة في بيتنا.. كركبة.. كورونا.. 365 ليلة من البكاء.. ما كانت أيام عاديّة.. فشل قصة ارتباط.. شغل سيء.. مشاكل مع أهلي.. صراخ كتير.. طبيب نفسي.. انهيارات نفسية..
بطلت عارفة مين أنا.. أسأل ربنا ليش؟
بعد مكنت ملتزمة بالسنن صرت أقطع بالفروض.. حالة من الطنين اللامتناهي في راسي..
وشعور بالفراغ والوحدة قاتلين..
...........
اليوم..
10 رمضان.. بقدر أحكي إني رجعت لحالي..
بعد 4 سنين انطفاء..
ليش عم بحكيلك هاد الحكي؟
كنت فاتحة تويتر وعم بكتب قديش ربنا دايماً بيعطيني كل اشي بدي اياه "حرفيًا" كل اشي..
مرات متأخر شوي عن صاحباتي.. بس دايماً بيرزقني بكل اشي بتمناه..
من مستوى الأكل، لحتى السفر بيجيني على شكل هدية، عزومة، جائزة، تيسير للإشي بتدبيره.. بس كله بيجي..
صفنت وأنا بكتب بالتويتة، إنه غريب ليش ما عمري شفت هاد الشعور طول السنين الي مرقت عليّ هاي؟
ربنا كان دايماً بيمن عليّ.. كنت ألمس إنه وهّاب.. رزّاق.. جبّار..بس من شدة يأسي ما التفتت..
.......
وهلأ في جواي شعور برسالة نفسي أوصلها تعبيرًا عن امتناني واعتذاراً عن تقصيري في حق ربنا لكل حد ممكن يكون وحيد في هاي اللحظة.. شاعر إنه في ضيق..

(ستُجبَر.. والله ما كان الله ليتركنا في ظلمة وَحدتنا وهو النور..)!

صح اشتغلت بعد صاحباتي كلهم.. بس شغلي اليوم أحسن من ما بتمنى الحمدالله ودخلي جيد..
تأخرت بالتخرج.. بس كان لازم أعيش هداك الفصل لإنه كان لازم أوصل للنضج الي ناقصني..
ما ارتبطت بالشخص الي طالما دعيت إنه أرتبط فيه.. لإنه في الوقت الي تقدملي فيه اكتشفت إنه مش هو المناسب..
الي قدي صار عندهم أولاد.. بس متأكدة إنه رح يجي الوقت المناسب لأرتبط وأكون زوجة وأم بالطريقة الي بحلم فيها ومع الإنسان المُناسب..

ليش هالقد متأكدة؟
لإنه ربنا متولّيني.. الوليّ متوكل في أمري..
الي يسرلي عمرة بتدبيره وتيسيره...وفي الوقت المناسب لعندي إجاني الشغل الي بتمناه بعد تعب سنين..
وكل كبيرة وصغيرة بتمناها بيرزقني اياها..
أكيد ما رح يتركني..
ليش أظلم نفسي وأتركني لوساوس كئيبة.. وأشيل الهَم.. وأحزن.. وأنا فعلًا غرقانة بنعم ربنا..
.......
اليوم.. كل ما أحسها ضاقت.. بحب أدعي ربنا بأسماؤه.. لإنه كل وجع فينا وكل ألم ما بنقدر نحكيه.. فيه اسم وصفة ربنا حكالنا إنه فيه.. وحاشاه مش ليثبتلنا.. بس يمكن ليطمّنا..

الدنيا صعبة جد.. بس بدي أحكي إلي وإلكم إنه ما نحس حالنا لحالنا.. وتذكر أسماء ربنا في ضيقك.. تذكرهم وإنت واثق إنه ربنا ما بيهون عليه يضيعَك..
يا جبّار.. اجبر ضعفي
يا وليّ تولّ أمري ودبرني ودبرلي
يا وهّاب.. هب لي
يا فتّاح.. افتح لي أبواب رزقك
يا قهّار..
يا سميع.. يا صَمَد.. يا ودود.. ياحيّ.. يا قيّوم.. يا غفّار
حاشاك أن تردّني خائبة.. حاشاك وأنا ببابك وبلطفك.. وبجودك وكرمك متمسكة..

وبس..

#ARK

‏إن الله ليضحك إلى رجلٌ قامَ في ليلةٍ باردةٍ من فراشِه ولحافِه ودثارِه فتوضَّأَ ثمَّ قامَ إلى الصَّلاةِ.
فيقولُ اللَّهُ عزَّ وجلَّ لملائِكتِهِ: ما حملَ عبدي هذا على ما صنعَ؟
فيقولونَ: ربَّنا رجاءَ ما عندَك وشفقةً ممَّا عندَك.

فيقولُ: فإنِّي قد أعطيتُه ما رجا وأمَّنتُه ممَّا يخاف. ❤️

#ARK

عشت فترة من حياتي في تركيا، وكان معي بغرفتي بالسكن شب تركي اسمه (زاهد).

كان زاهد كل يوم قبل الفجر يصحى يصلي قيام ليل..
صراحة أنا كنت يلا يلا ألحق أصلي الفجر قبل ما تطلع الشمس!!
بس لما شفت زاهد بصحى، قررت أخجل على نفسي وأقوم أصلي كمان..

صرنا كل يوم نصحى قبل الفجر نصلي بعدها نروح للمسجد، وكانت فعلا أجمل أيام حياتي..

بيوم صحيت أنا عالقيام وزاهد ضل نايم، حاولت أصحيه لقيته مستغرق في نومه فقلت خلص بصحيه عالفجر..

لما قام زاهد عالفجر كان زعلان كثير إنه كيف راح عليه القيام!
وثاني يوم حكالي إشي غريب جدا!!

حكالي أجاني شيخي في المنام وكان زعلان مني ليه راح عليّ القيام!

أنا وقتها صفنت!! إنه معقول في هيك إشي في الحياة؟ معقول لسه في ناس هيك؟!

--------
بعد فترة حكالي زاهد تروح معي نزور شيخي؟
سألته نفسه اللي أجاك في المنام؟
حكالي آه!

رحنا أنا وزاهد وكان الشيخ اسمه (قاسم بابا)، عمره فوق الثمانين سنة..
كان بيته مليان طلاب وناس، وكان الكل بحترمه وبوقره بشكل رهيب..

كان بمجلس الشيخ قاسم بابا رجل قاعد جنب الشيخ، بساعده وبستقبل ضيوفه وبرتب كل أموره..

زاهد حكالي شايف هالرجل؟ ذكرني أقلك إشي عنه لما نطلع..

لما طلعنا حكالي:
هذا كان شخص عاصي ربنا، ما في ذنب إلا ارتكبه، دايما سكران وطافي، وشرّاني وبعمل مشاكل للناس..

وفجأة بليلة طرق بيت الشيخ قاسم، وحكاله بدي أتوب..ساعدني!!!
فالشيخ استقبله ورحبّ فيه، وطلب منه يقيم في بيته، لإنه خاف لو طلع من هون يرجع لبيئته السيئة..

وبعد أكم يوم أجت بنت كانت بتشتغل بمكان سيء، وطول حياتها غرقانة بالذنوب والفواحش وقالت للشيخ قاسم: بدي أتوب..ساعدني!!!

فالشيخ قاسم استقبلها ورحب فيها ونادى زوجته واستقبلتها وقلها كمان خليك عنا..

وبعد فترة زوجهم الشيخ قاسم من بعض!
وطلب منهم يقيموا بالقرب منه، ويشتغلوا معه..!

ومن وقتها هالرجل هو المسؤول عن ترتيبات الأخوة، وزوجته المسؤولة عن ترتيبات الأخوات!!!

------------
بحكيلي زاهد، دايما كان الشيخ قاسم يحكيلنا إياكم لما تشوفوا عاصي تدعوا عليه، لا بدكم تدعوله!
بدكم تاخدوا بإيده..
بدكم تحييوا الأمل بقلبه..
بدكم تتوسلوا ربنا لهدايته..
بدكم تهمسوا بذانه إنه الله بنتظره!
وإنه لو أقبل عليه حاشاه الكريم يرده..!

وقتها زاهد قرأ عليّ آية كنت سمعتها "فصيحة" مئات المرات في حياتي..
لكنها هالمرة دفعتني للبكاء بدهشة، لما خرجت من زاهد بلكنة أعجمية مكسرة:

قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ (53)

#القرآن_الجميل
#ARK

من شوي كنت بحلق في صالون حلاقة..

كان في شب قاعد بالصالون ما بعرفه لكنه بحكي للشباب في الصالون عن تجربته مع الوشم وكيف إنه لما عمله اضطر يسكر كثير !!!!

تفرج علي وقلي آسف حاسس الموضوع ما عجبك ..
قلتله أكيد ما عجبني..

وقتها تذكرت شيخ مرة قال:
لو شفتوا عاصي وحسيتوا إنه صعب يترك أغلاطه..فما تتركوه إلا وانتوا دالينه على خير يعمله ..

أكيد في لقاء عابر في صالون حلاقة مش رح أقدر أقنعه يغيّر سلوكه وحياته بلحظة..

وفجأة قلتله: ناوي تصوم بكرا ؟
حكالي شو بكرا؟

قلتله عاشوراء...صيامه بكّفر ذنوب السنة السابقة!

وحححد الله!
قالها بعفوية واندهاش ...
وكمل كلامه: والله غير أصوم... بالكي الله غفرلي وهداني!

........
أنا مؤمن دايما إنه الخير اللي بقرر يقوم فيه شخص فجأة وسط ذنوبه وآثامه رح يقدر هالخير بيوم ينتشله منها..
.
.
طلعت من الصالون بعد ما سلمت عليه..
وناداني وقلي اسمع...لا تفكرني بجاملك...والله غير اصومه!

ابتسمت من قلبي..

وقلت يارب ..هالشب قرر بكرا يصوم بيوم حر....بسسس عشانك ! عشان تغفرله وتهديه ..

فيا رب كرمال هالقرار المفاجئ منه، إنك تفاجئه بمغفرتك وهدايتك..

.....

طيب إنت؟
مش حاب بكرا تتفاجئ بشعور إنه ربنا غفرلك !

#Ark

بتصير معك وإنت بتتصفح تلفونك عالفيسبوك أو انستغرام مثلا، وبعدها بتسكّر التطبيق، وفجأة بشكل عفوي بترجع تفتح نفس التطبيق خلال ثواني؟!

أو مثلا قررت تنام فسكرت تلفونك، وبعد دقائق من التقلّب قبل النوم قمت رجعت مسكت تلفونك..

بتلاحظ إنه الناس بتتصفح السوشال ميديا في كل الأوقات حرفيا......في المحاضرات والمواصلات والمولات والمناسبات وحتى بعد الصلاة مباشرة مباشرة!!!

حتى كبار السن، زمان كنت تلاقيهم قبل الفجر فاتحين مصاحفهم، هسا كثير منهم بكون فاتح عالسوشال ميديا أثناء انتظار إقامة الصلاة..!

حتى إمك وأبوك!!!
إمك ما تركت شيف ولا طباخة من غير ما تعلّق عنده..
وأبوك ختم الريلز كله كله!!
وبعمل شير لكل إشي!

--------
المشكلة كلنا متفقين إنه أغلب محتوى السوشال ميديا تافه، وإنه الناس فقدت عقلها، ورغم هذا ما بغيب عنّا شو بصير في السوشال ميديا، وما بنقدر نطلع مشوار ولو بسيط من غير تلفوناتنا!!!

طيّب ليش؟!

في كثير تفاسير قدمها علماء النفس، لكن في تفسير ومصطلح لفتني وهو: "FOMO" وهو اختصار "fear of Missing Out"
ويعني: الخوف أو القلق من أن يفوتك شيء ما!

وهي حالة من التوتر النفسي بتصيب الشخص لما يغيب عن السوشال ميديا، هذا التوتر بحفز الشخص إنه يضل متصل بالسوشال ميديا، لإنه بظن إنه هالشيء رح يخفض من حالة التوتر النفسي عنده.

علماء النفس بصنفوا هالظاهرة كحالة جديدة من التشبع النفسي للفرد ، فمثل ما بحتاج الشخص إنه ياكل ويشرب ويشعر بأمان، صار كمان بحتاح يكون على اطلاع ومعرفة بكل ما يحدث حوله!!
ومجرد معرفته واطلاعه على كل ما يدور حوله بمنحه شعور واهم بالسيطرة على واقعه، وهذا بخفض توتره ولو لحظيا..

لهيك بتلاقي الشخص كل شوي بفتح السوشال ميديا يشيّك شو صار، شو الجديد، شو الترند، ومين تخرج ومين تزوج ومين سافر..وشو عملوا مشاهير التيك توك
(رغم إنه ما بطيقهم ولا بحبهم وبشوفهم تافهين، مع ذلك بعرف كل أخبارهم !!!)

أو بتلاقي الشخص دخل على جروب متعود عليه ليشوف مين آخر حد سأل وشو سأل ويطمن إنه مطلع على استشارات الناس وتساؤلاتها أول بأول..

.
.
.
وهيك بعيشوا الناس، بشعور خوف من إنه يفوتها شيء..
لكن في الحقيقة..

صدقوني ما في شيء مهم، وما رح يفوتكم شيء!
بس رح يفوتكم (عمركم) في الوقت اللي خايفين فيه يفوتكم شيء!
.
.

أو بصراحة...ممكن يفوت إمكم وصفة جديدة بتشهي..

بس اطمنوا..
بكل الأحوال، والله العظيم ما كانت رح تطبخها!!!

#ARK