وما تنسى إنه مش شرط يصير الإنتقام من كل ظالم في الدنيا..لكن كون على يقين إنه حيصير في ذلك (اليوم) !

- ما تنسى نصيحة سلمان العودة:
لكي لا تصاب بالجنون أو الاكتئاب من هذه الأحداث الغريبة المتصاعدة..
حافظ على أورادك وصلواتك ومناجاتك وثقتك بربك.

- اختار وقت يكون قلبك فيه حاضر، وإحكي مع (الله)!
وقتها ربنا رح يغرس في روحك فكرة إنه هو أرحم منك بعباده.. وإنه رحمته وسعت كل شيء..ومصائب الناس ودموعها وآهاتها شيء..

بس إنت ما تستعجل رحمته ونصرته..ولا تستعجل فهم حكمته..

انخلقنا ليختبرنا مش لنختبره !

#ARK

هل سبق وخطرلك تعمل خطتك السنوية بالتاريخ الهجري؟!
ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر، واللي غالبا أول مرة بتسمع فيه بحياتك! ")

لكـــــن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!
الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..
معظم تواريخنا الإسلامية مرتبطة (بالعمل والإنجاز)!

إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!
ما بهمنا جدا تواريخ ميلادهم...لكن بهمنا تواريخ ميلاد قلوبهم لمّا لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لسيدنا عمر يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..
لكنّه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا (فتح لك) من غير (هجرة)..!

#ARK
#1444

مرة وقفتنا الشرطة وإحنا بسيارة صاحبي..
طلع نازل تعميم على سيارته لأنه في شخص مقدّم شكوى عليه..

صاحبي انصدم..وقال للشرطي آه من فترة عملت حادث، والشخص اللي ضربت سيارته قلي ما في داعي نعمل كروكة، وخلص أعطيني مصاري وأنا بصلح سيارتي ..ووقتها أعطيته مصاري وانتهى الموضوع..

لكن للأسف تبين إلنا إنه هالشخص بعد ما أخذ المصاري راح عالشرطة وقدّم شكوى إنه هالسيارة ضربته وهربت..

صاحبي كان معه رقم هالشخص، لإنه بعد الحادث احتفظ برقمه وقله لو كلّف تصليح السيارة أعلى من المبلغ اللي أعطيتك اياه خبرني عشان أحاسبك..

رن صاحبي عالرجل وطلب يشوفه، صراحة خطرلي إنه صاحبي ناوي يضربه..
صار الشخص يتهرب وأصرّ عليه صاحبي يشوفه وقله تعال عالمغفر عشان تكون مطمّن..وصدقني ما رح يصير إلا كل خير..
.
.
استغربت جدًا لما صاحبي قال لصاحب السيارة:
عندك ولاد؟؟
فالرجل قله آه عندي 3 أولاد..ليه؟!

قله صاحبي:
اسمع...
الله بيني وبينك..
وإنت عارف إنه شكوتك تبلّي وزور وظلم..

انفعل صاحب السيارة وصار يقله لاااا إنت بعد الحادث عطلتني عن شغلي وأنا حقي أشكي و و و و

صاحبي سكّته وقله أنا مش جاي أناقشك..
أنا بقلك (الله بيني وبينك) وإنت عارف إنه شكوتك ظلم..

اسمعني منيح..
بتروح بتسحب شكوتك، واحكيلي كم كان رح يطلعلك مصاري من هالشكوى، وأنا مستعد أدفعلك اياهم عن طيب خاطر منّي..

ولا إنك تطعمي ولادك حرام!!!!

لو أخدت المصاري من الشكوى رح يكون مال حرام..
لكن روح اسحبها وأنا رح أعطيك المصاري حلال زلال عليك..

ورجع كرر:
مش قلتلي عندك 3 أولاد؟
بترجاك ما تطعميهم حرام!!
.
.
.
ما كنت متوقع إنه هالدنيا القاسية ممكن تكرم عليّ بموقف مثل هيك!
بكى صاحب السيارة وقله:
الله يخزي الشيطان والله كانت لحظة ضعف وكنت مزنوق عشوية مصاري..

بس أنا ما رح أنسى معروفك طول حياتي..
ووعد ما بيوم أدخّل عولادي قرش حرام..
.
.
.
كنت صافن بصاحبي والأرض كلها مش واسعة دهشتي وفرحتي بموقفه!
وقلبي ابتسم إني صادفت بحياتي قلب سماوي مثل قلبه..!!

{وَسَارِعُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ * الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ}

#القرآن_الجميل
#ARK

في الغالب كل اللي تخرجوا الأسابيع الماضية من الجامعة بمروا الآن بمشاعر غريبة، مشاعر مختلفة تماما عن فرحتهم وهمّه بأشروا لأهلهم إنّه هينا هووون، شفتونا؟؟؟

وفي منهم الآن بتساءل: إنه معقول هالفرحة اللي كنت بنتظرها من سنوات..طلعت بس هيك؟؟
روب تخرج، وحفلة، ولمّة أهل، وصور..وبس؟!

في الحقيقة رح يصابوا بنوع من الخيبة لما يكتشفوا إنه تصورهم عن فرحة التخرج وهمّه على مقاعد الدراسة ما طلعت بتشبه أبدا فرحتهم لما تخرجوا فعلا!!

نفس فكرة عروسين بعد أيام من زواجهم، واللي ممكن يتساءلوا في سرهم: إنه معقول الموضوع طلع بس هيك؟!

أو مثل شخص نجح بشيء صارله بطمح وبسعى إله شهور وسنوات، ومجرد ما حققه بتنتابه مشاعر غريبة، وبتساءل يا ترى ليه أنا الآن مش كثير سعيد؟ وممكن يتساءل ليه أنا حزين؟!!

بالضبط نفس ما قال (جو) في فيلم الإنيميشن (Soul) لما وصل لشو كان بحلم، وقتها قال:

it is just I have been waiting on this day for my entire life I thought I'd feel different !
.
.
.
ما سبق بتشير إله بعض كتب علم النفس، بمصطلح:
( اكتئاب ما بعد النجاح | Post-success depression )

وهو مصطلح بتناول الناس اللي كانوا يطمحوا لهدف وحلم في حياتهم، ومجرد ما وصلوا إله صابتهم أعراض اكتئاب غير متوقعة وغير مفهومة!
وبالتالي ما شعروا بطعم النجاح، وما فرحوا مثل ما اتوقعوا إنهم يفرحوا..وبالعكس حزنوا وييأسوا وشعروا بسخافة رحلتهم وما شافوا أي معنى لتجربتهم..

بعض التفسيرات (لإكتئاب ما بعد النجاح) إنه الإنسان بعد ما يوصل لهدفه بشعر إنه ما كان هذا هدفه، وإنه الشيء ما كان بستحق أصلا، وممكن هذا برجع لطبيعة الإنسان غير القنوعة..

وفي تفسيرات بتحيل الموضوع لفجوة روحية داخل الإنسان، ومستحيل أي انجاز من إنجازات الدنيا يعبيها، وإنه الإنسان مهما سعى وحاول بضل في داخله ثُقب ما بملؤه إلا الله، وحتى البعض أطلق عليه (ثقــــــــب الله) !!

وفي تفسيرات بتحكيلنا إنه الموضوع برجع ببساطة لنسبية السعادة، وإنه ما في سعادة كاملة أبدا، وإنه كل أفراح الدنيا مؤقتة ولحظية وما في سعادة مطلقة..

وفي تفسيرات بتشير لفكرة (أصالة الحزن) فينا..وإنه الحزن شيء متجذر فينا عكس السعادة والفرح باعتبارها مجرد أشياء عابرة وطارئة ووقعها خفيف على نفوسنا..
وممكن هذا بفسر تأثرنا وتفاعلنا وتذكرنا للقصص والأفلام الحزينة أكثر من السعيدة.
.
.
المهم..
عمركم فكرتوا ليه يوم الخميس أحلى من يوم الجمعة؟
ليه فترة الخطبة أحلى من الزواج؟
ليه الناس الداخلين عالمطعم مبسوطين أكتر من الطالعين؟
ليه الطالب على مقاعد الدراسة، أسعد من الخريج؟

ببساطة إحنا بنستمتع برحلتنا نحو السعادة، أكثر من استمتاعنا بلحظة السعادة نفسها !!!
إحنا بدهشنا توقنا للحلم المجهول، أكثر من الحلم نفسه!
إحنا بنضحك من قلبنا وإحنا بطريق الرحلة، أكثر من الرحلة نفسها..!

ببساطة السعادة في الرحلة، مش في الوصول!
السعادة في السعي، مش في النتيجة!

لهيك كثير ناس للأسف بتنسى تعيش سعادة سعيها ورحلتها وطريقها..
وبتعيش بتوتر وخوف وقلق..
ولما توصل لحلمها بتكتشف إنه السعادة كانت بالرحلة، ويا ريت عشنا تفاصيلها !!
.
.

وأكيد يفترض ما ننسى إنه ما في سعادة مطلقة في الدنيا، ولا يعني هذا إنه ما نعيشها، لكن مجرد وعينا لهذا الشيء بجعلنا أكثر حكمة، وأكثر صدق وتواضع في لحظات سعادتنا...

القرآن ذكر السعادة الحقيقة مرتين:
- يَوْمَ يَأْتِ لا تَكَلَّمُ نَفْسٌ إِلا بِإِذْنِهِ فَمِنْهُمْ شَقِيٌّ وَسَعِيدٌ(105)
- وَأَمَّا الَّذِينَ سُعِدُوا فَفِي الْجَنَّةِ خَالِدِينَ فِيهَا مَا دَامَتِ السَّمَاوَاتُ وَالأَرْضُ إِلا مَا شَاءَ رَبُّكَ عَطَاءً غَيْرَ مَجْذُوذٍ(108)

الآية الأولى بيّنت زمن السعادة (يوم القيامة).
والآية الثانية بيّنت مكان السعادة (الجنة).

القرآن بطلب منا نكون أكثر هدوء وواقعية وحكمة..القرآن بحكيلنا بصراحة:
ما تبحثوا عن السعادة المطلقة في غير مكانها..
ولا تنتظروها في غير أوانها..!!

#القرآن_الجميل
#ARK

أختي بتحكيلي مش قادرة أصدق كيف مع كل جريمة أو اعتداء أو تحرش بتتعرض إله بنت بنقرأ تعليقات بتلوم البنت وبتحملها المسؤولية!!!

لااا اللي قاهرني أكثر.. إنه حتى في كثير بنات بلوموا البنت الضحية!!!

وتعليقاتهم ما بتفرق عن تعليقات بعض الرجال إنه أبصر شو عاملة حتى قتلها؟ طيب شو مطلّعها بهيك وقت؟ أبصر شو كانت لابسة حتى يتحرشوا فيها ..الخ!!

.
.
حكيت لأختي بتفق معك إنه لما تكون الضحية بنت بكون اللوم عليها أكبر، لكن بدي أحكيلك اشي في علم النفس الإجتماعي:

فكرة "لوم الضحية" مش حاضرة فقط بموضوع البنات، إحنا لما حد ينسرق، بنحكي: كيف وليش ما انتبه؟
لما بنت صغيرة تنخطف، بنحكي: وين إمها؟
لما حد يندعس، بنحكي: طيب ليه ما انتبه قبل ما يقطع الشارع..
مش من فترة أب وأم فقدوا أطفالهم الخمسة؟؟ ما لاحظتي كيف أغلب التعليقات كانت: وين أهلهم لما صار الحريق؟!

ببساطة فكرة "لوم الضحية" حاضرة بكل المناسبات والظروف سواء كانت الضحية بنت أو طفل أو رجل أو عيلة..

وسبب لومنا للضحية باختصار:
إنه إحنا كبشر لما نسمع بأي جريمة أو حادث بنحاول نطمئن أنفسنا بأي شكل من الأشكال..وبنحاول نقنع أنفسنا إنه اللي صار مع هالضحايا ما رح يصير معنا... وبندّعي بكل ثقة إنه هالضحايا تعرضت لاعتداء وجريمة أو حادث نظرا لعيب وخطأ صدر منهم..
وإحنا مش زيهم... وبالتالي ما رح نتعرض لجريمة أو حادث مثلهم!!

أختي كانت صافنة..وحكتلي ممكن توضح أكثر؟!

قلتلها إحنا عقلنا بحاول يخفي عنّا الحقيقة اللي ممكن تهدد حياتنا وسلامتنا، وبالتالي عقلنا مستعد يخلق أي عيب أو خطأ صدر من الضحية، عشان يريحنا ويطمّنا إنه ما رح يصير معنا مثل ما صار معها، لإنه إحنا أخذنا بالأسباب وانتبهنا عكس الضحية!

يعني لو سألتك شو الأصعب عليك، تسمعي قصة بنت انقتلت لإنه زوجها اكتشف خيانتها، ولا قصة بنت زوجها قتلها من غير أي سبب؟!

أكيد القصتين بشعات، لكن فكرة إنه بنت تنقتل من غير سبب شيء مخيف أكثر، لهيك رح تلاقي (حتى البنات) عقلهم بحاول يبحث عن أي خطأ وسوء تصرف صدر من البنت لحتى انقتلت، حتى يطمّنوا نفسهم إنهم ما رح يكونوا بيوم مكان هالضحية..!

نفس الفكرة، صعب على أي أم تسمع عن طفلة انخطفت من غير أي تقصير من أمها، وكثير الموضوع بكون أسهل عليها لما تسمع إنه الحق والتقصير كان من أمها..

طيب بتعرفي شو موقف الناس لما يعرفوا إنه الضحية بريئة تماما، وما صدر منها أي خطأ أو سوء تصرف؟!
ببساطة بستخدموا تحيز اسمه "الإدراك المتأخر"، يعني بصيروا يحكوا إنه هالضحية فشلت تتنبأ بالاعتداء والجريمة اللي تعرضت إلها، وإنه الله يسامحها ليه ما راحت لأهلها؟ ليه ضلت عايشة معه؟ ليه ما خبرت الشرطة من الأول؟
طيب كيف هالأم ما انتبهت للشخص اللي خطف بنتها؟
كيف الأم والأب ما سمعوا صراخ أطفالهم قبل ما ينحرقوا..

وبنرجع من جديد نلوم هالضحايا، وبنرجع نقنع أنفسنا إنه لو كنا محلهم كنّا رح نتصرف على نحو مختلف تماما، وكنا رح نقدر نتنبأ بشو ممكن يصير معنا..
.
.
.
إحنا بنلوم الضحية لإنه ما بدنا نعترف ببشاعة العالم اللي بنعيش فيه، وعقولنا ما بدها تتخيل فكرة إنه كلنا معرضين نكون بيوم محلها..

ما في زوجة بتستوعب فكرة إنها تنقتل من غير سبب..
ولا أم بتستوعب فكرة إنه ممكن حد يخطف بنتها..
ولا أب بتخيل فكرة أنه ممكن يفقد كل أطفاله بلحظة..

إحنا صح بنتعاطف مع كل ضحية.. لكن في داخلنا صوت بلومها...صوت بحملها مسؤولية شو صار معها..
في داخلنا صوت بحاول يطمنّا إنه مش ممكن بيوم نكون محلها..
صوت دايما بقنعنا إنه الحق كله على الضحية، وإنه الدور الجاي مستحيييل يكون علينا..

إحنا أشطر وأذكى من إنه حد يسرق مصارينا.. أو نسمح لحد يعتدي على أبنائنا.. أو نقطع الشارع من غير ما نشوف حولينا..أو إنه ننام وننسى نتفقد الكهرباء بغرفة أطفالنا.. إحنا أوعى وأنضج إنه نرتكب خطأ ممكن يسبب بقتلنا..

إحنا غير عن كل هالضحايا..
.
.

بسأل أختي: بتعرفي شو هالصوت اللاواعي اللي بنلوم فيه أي ضحية؟؟

صفنت..

آه...صوت خوفنا!!!

#ARK

مرة لما مات أحد مشاهير السوشال ميديا (الله يرحمه) صارت ضجة كبيرة وكان الموقف صادم لأغلب الناس..

بعد موته حضرت أكم فيديو لأصدقاء المتوفي بحكوا عنه، وللأسف كثير انزعجت وشفت إنه حزنهم ودموعهم وتأثرهم ((مصطنع)) !!
أكيد في حزن، لكن الطاغي جدا هو حرصهم على استعطاف الناس وبالتالي زيادة متابعينهم...!!!

بعدها بفترة صرت كل فترة أتابع مقابلة مع أحد مشاهير السوشال ميديا، وكنت دائما أستغرب إنهم بنطلقوا من فكرة إنهم (ضحية) وإنه في ناس أذوهم وخذلوهم وإنه نجاحهم أكبر رد عليهم..
وسبحان الله أغلبهم حبيباتهم تركوهم وخذلوهم!!!

هذا الخطاب طبعا رح تلاقي مليون شب وبنت تأثروا فيه، ورح تلاقيهم اقتطعوا هالكلام ونشروه ريلز مع موسيقى حزينة..
ومع الوقت رح نصير ننظر لهذا المشهور باعتباره نجح بعد فشل، وقام بعد ما سقط، وانتصر بعد خذلان..
.
.
طيّب ليه هيك بصير؟
ببساطة الشخص المشهور مع الوقت بكون كل همّه حب الناس وتأثرهم فيه، وأسرع طريقة حتى توصل لهذا الشيء إنك تستعطفهم..
حتى لو كان الاستعطاف على حساب موضوع مخيف جدا!!
على حساب موت صديقك المقرب...

في دراسات نفسية بتحكي إنه أغلب اللي بعيشوا دور الضحية وخصوصا من المشاهير همّه في الحقيقة ما كانوا ضحية لشيء!!!
لكنهم استحضروا موقف عابر كلنا كبشر ممكن نمر فيه، وهالموقف كان عابر في حياتهم وما أثر عليهم وتجاوزوه تماما.. لكنهم فجأة بستحضروه بشكل درامي أمام الجمهور حتى يكسبوا تعاطفهم..

ما بتلاحظوا انه قصص النجاح اللي بنسمعها أغلبها متعلق بحبيب خذل ..وصديق هجر ..واستاذ ضربني بالمدرسة ..وطلاب تنمروا علي.. وصاحبي مات بحادث سيارة !!

والناس بتنخدع بحججهم الأخلاقية اللي يستخدموها ليظهروا عمق الألم اللي مروا فيه علما إنهم في الحقيقة مش ضحية لأي شيء، وإنهم كملوا حياتهم طبيعي بعد هالألم..
لكن فجأة بوهموك إنه هالحدث هو كل شيء في حياتهم..

وهذا اللي صار يدفعنا أول ما ننجح إنه نستحضر شيء سيء مرينا فيه بطريقنا، علما ما كان لهدرجة سيء، وأصلا تجاوزناه زمان، ونجاحنا ما كان مرتبط فيه، لكن خلص هيك دراما أكثر ^^

هذا النوع من المشاهير ما بتورع عن استخدام أي وسيلة أمامه حتى يزيد معجبيته ومحبينه..

فعادي جدا تلاقيه برمضان بحكي في الدين، وببكي من خشية الله، بالضبط مثل ما بكى على موت صاحبه..

طيب وهالدموع وين حضورها في سلوكك وحياتك ومحتواك لاحقا ؟!
لا شيء طبعا..!
.
.
.
المهم..
الشهرة مرض حقيقي ..
وبعرف إنه ممكن بيوم يراودك شعور إنك حاب تكون مشهور..
طبيعي تشعر هيك، لكن أرجوك ما تسمح لهذا الشعور يسيطر عليك..

في أنبياء ما آمن فيهم إلا رجل ورجلين، وأنبياء ما آمن فيهم حد..!!
وصدقني مهما كنت مشهور، في اللحظة اللي بتموت فيها الكل رح ينساك، ورح تتحول لمجرد ذكرى عابرة، ورح تلتفت وجوه الناس لغيرك..

لهيك نصيحة اهتم بوجه واحد فقط..
وجه ربنا ...وهو رح يكفيك ويغنيك عن كل الوجوه..!!
.
.
ولا تنسى إنه مش مهم تتسلّط عليك الأضواء..
لكن المهم ما تغيب عنك الأنوار !!!!

#ARK

مرة اشتغلت في مكان عام لجمع التبرعات..
كان معي بروشورات وصندوق ولافتة بتوضّح الحملة..

بصراحة كنت لما ألمح شخص عليه علامات الدين أقوم بسرعة أعطيه بروشور أو أنادي عليه عشان أشرح إله عن الحملة..
ونفس الفكرة لأي بنت كان مظهرها ملتزم..

في المقابل كنت أستثني أي حد هيئته وشكله بعيد عن الدين تماما، لدرجة لما كان شخص يوقف قدامي يقرأ عن الحملة أو يسألني عنها ما كنت أعطيه هالاهتمام لقناعتي إنه بسأل بس فضول وإنه هالناس ما بتهتم بهيك حملات أصلا..

ضليت أيام من غير ما أجمع (شلن) واحد، مع العلم إنه الحملة اللي بشتغل معها مرخصة وقانونية ومشهورة عند كثير ناس حتى..
.
.
بالصدفة وأنا مروح عالبيت فتحت كتاب على مكتبي كنت اشتريته من أكثر من سنة وما قرأته، ولقيت في الكتاب قصة قديمة لمندوب مبيعات في شركة نيسان، وكان هالشخص يبيع أكثر من 20 سيارة شهريا، وهذا الرقم يعتبر مهول وقتها، خصوصا إنه ببيع سلعة غالية جدا، مش ثلاجة ولا غسالة ولا خلاط، ببيع سيارات!

هذا المندوب لفت انتباه علماء النفس والتسويق، وأجروا معاه مجموعة مقابلات حتى يفهموا هو شو بعمل حتى يقدر يبيع هالكم من السيارات شهريا..

وقتها ببساطة جاوب:
لا يمكنك إصدار الحكم على الناس في هذا العمل، إن إصدار الأحكام المسبقة بمثابة قُبلة الموت. يجب عليك إعطاء الجميع أفضل ما لديك، فالبائع عديم الخبرة ينظر إلى العميل ويقول "يبدو أن هذا الشخص لا يستطيع شراء سيارة.

ببساطة كان هالمندوب يعطي اهتمام لكل عميل من غير ما يحكم عليه، وبحكي ما كنت أفرق بين شب صغير أو رجل أسود أو مزارع رث الثياب أو غني أجي عالمعرض ببدلته الفخمة، ببساطة كنت أمنحهم جميعا نفس الاهتمام..
.
.
ثاني يوم لما رحت للشغل ضلت ببالي فكرة هالمندوب إني ما أحكم على حد أبدا، العجيب والغريب إنه بيوم واحد جمعت اللي كان مطلوب مني أجمعه بأسابيع!
ببساطة اهتميت بالكل..

واكتشفت إنه الشب الفايع أبو السنسال والوشم كان ببحث عن أي خير يقدمه، والبنت اللي استبعدت تماما نظرا لهيئتها إنه هالحملة ممكن تلفتها أجت ودفعت مبلغ كبير..
في منهم بكى لما كنت اوريه فيديوهات للحملة اللي بنجمع إلها..

الغريب إنه المبلغ اللي جمعته من الناس اللي هيئتهم ملتزمة لا يكاد يذكر، لا يعني إنه الملتزمين ما بتبرعوا، ممكن لإنه متاح إلهم كثير مجالات للتبرع في حياتهم على عكس غيرهم..
غير إنه في دراسات بتحكي إنه الشخص اللي بتذكر مناسبة تبرع فيها، بكون أقل بنسبة 60% إنه يتبرع مقارنة بشخص ما تذكر متى أخر مرة تبرع فيها..
.
.
المهم..
بعيدا عن السيارات وحملة جمع التبرعات، خطرلي إنه كيف اغلب خطاباتنا بتنطلق من فكرة (الحكم على الآخرين) والنظر للسوء اللي بصدر منهم، كثير خطابات للأسف هدفها فقط تثبت ضلال وخطأ وسوء الآخرين، وقليل خطابات هدفها فعلا تكسبهم وتحنن قلوبهم لاستقبال الوحي..
وكثير بننسى إنه هالناس غالبا ممكن ما توفرت إلهم بيئة تساعدهم أو حتى تخبرهم ولو بشكل بسيط عن دينهم..
.
.

مرة بالشغل كنت بصلي، ولما خلصت الصلاة حكتلي بنت بتعرف عمره ما حد حكالي عن الصلاة في حياتي.. وبحسرة قالت: شو نفسي أعرف الله!

صفنت وقتها إنه كيف كنت أتعالى بنظرتي على هالبنت وغيرها وأشوف نفسي أفضل منهم، طيّب أنا أبوي كان يجرني معه جرّ للمسجد..
وهي ما صادفت في حياتها حد يحكي معها.. !!
.
.
كثير ناس ممكن نحكم ونسيء ونحقد وندعي ونتعالى عليها، وبننسى إنه هالناس ممكن بدهم بس كلمة، بدهم أي حد ياخد بإيدهم لربنا، بدهم أي باب خير يخطوا فيه خطوة..
ممكن هالناس بآخر الليل بتقلبوا بفراشهم وبقولوا بحسرة:
شو نفسنا نقرب من الله..!

وللأسف..بدل ما نمد إيدينا إلهم، بنأشر بأصابعنا وبنحكم عليهم !!!!

ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ ۖ وَجَادِلْهُم بِالَّتِي هِيَ أَحْسَنُ ۚ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ ۖ وَهُوَ أَعْلَمُ بِالْمُهْتَدِينَ

#القرآن_الجميل
#ARK

الآن في جروبات "استشارة" عالسوشال ميديا..
بتقدر تخفي اسمك لو استشارتك محرجة، ويلا شاور الناس بمشاكلك الحساسة والمصيريّة..!!

جروبات الاستشارة والأسئلة ممكن تكون مفيدة عشان الناس تسأل عن مطعم، محل، صالون منيح، هدية محتارين فيها، عن اجراءات التقديم لسفر أو شغل، أو أي موضوع عام بحاجة الشخص يعرف عنّه معلومات أكثر..

أما إنك تشاور بقضايا شخصية متعلقة بالزواج أو الارتباط أو تعاملك مع شريكك أو مشاكلك النفسية وغيره، فهون إنت للأسف بتجني على نفسك!

كثير كنت أنصدم لما أقرأ تعليقات مثل: طلّق!! سيبك منها! قدم استقالتك!
وأكيد في جروبات البنات: اخلعيه! ردي على حماتِك كذا! احكي لمديرتِك كذا!
.
.
معظم الأجوبة على الاستشارات مضللة جدا، والسبب:

- عموم الموجودين في جروبات الاستشارات غير متخصصين، وبالتالي أجوبتهم بناء على نمط شخصيتهم وطريقة تفكيرهم، وقلّة قليلة بتمتلك علم وخبرة في الموضوع اللي بشيروا عالناس فيه!!

فمثلا: بنت ممكن تنزل عن مشكلة نفسية، وكلامها حرفيا بنطبق على اضطراب نفسي حسب معايير التشخيص، ومع ذلك حتكون الأجوبة عامة جدا أو ممكن تصادف تعليقات تسخف من مشكلتها، ولاحقا رح تعتقد البنت إنها حاولت تستشير وردت على التعليقات لكـــــن ما تغيّرت حالتها، وبالتالي تتفاقم مشكلتها.

- المستشار يفترض يكون مطلع على كل جوانب المشكلة حتى يقدر يجاوب، وفي الجروبات نادر ما شخص يعرض مشكلته بالتفصيل، وحتى لو عرضها بالتفصيل رح يضل في جوانب غامضة، غير إنه المستشار ما بعرف رغبات ومخاوف وميولات وظروف وطبيعة شخصية السائل.. وأكيد ما بعرف الأشياء اللي قرر يخفيها بقصته!

فمثلا: الشخص اللي بشكي من تصرفات زوجته غالبا ما رح يكون كاتب إلنا عن عدم اهتمامه فيها...والعكس..

- جزء من الموجودين في الجروبات بحبوا يلفتوا أنظار الآخرين في الجروب من خلال إجاباتهم الدائمة على أغلب الاستشارات..
وهذا بجعل كثير من الإجابات هي رد من أجل الرد فقط..
ومجرد استعراض معرفي مش أكثر...

- في ظاهرة بعلم النفس الاجتماعي اسمها (استقطاب المجموعة Group Polarisation) فمثلا.. شخص نزّل سؤال بستشير بغلط صدر من البنت اللي تقدّم إلها... التعليقات في البداية ممكن تكون عقلانية ومتفهمة إنه معلش وعادي وصارحها، بعدها بتصير التعليقات أكثر حدّة وإنه بهدلها وحطلها حدّ من هسا، وبعدها بتصير متطرفة إنه سيبك منها واتركها..!

استقطاب المجموعة فكرتها إنه الشخص لما يحكي وجهة نظره أمام مجموعة بميل إنه يعبّر عن وجهة نظره بشكل أكثر تطرف من لما يكون لحاله.. وبحب يبالغ بوجهة نظره بحيث يفوق وجهات النظر اللي سبقته..

- المستشار مش وظيفته يقرر أبدا أبدا...
وظيفته يفكر مع الشخص بصوت عالي، يضوّي الأماكن المعتمة بتفكيره، يكتب معه إيجابيات وسلبيات كل قرار، يلفت انتباهه لأمور غايبة عنه...وآخر شيء يتركه يقرر لحاله..

- لا يعني من كلامي إني بعمم، وأكيد هالجروبات ساعدت كثير ناس، لكن بنفس الوقت دمّرت حياة ناس..
لهيك هالكلام لعلّ وعسى يساهم في توعية المُستشيرين والمستشارين..

- والخلاصة:
لو أجاك شخص يستشيرك سواء في الواقع أو على جروبات الإستشارة وكان عندك علم وخبرة بطبيعة استشارته..
المفروض إنك تسمعه..
وتسأله وتستفسر عن كل نقطة..
وترسم معه كل السيناريوهات المتوقعة..
وتفكر معه بصوت عالي..
وتوجّه طريقة تفكيره..
وتحاول تكون صوت عقله لو كان بحكي بعاطفه..
وتكون عاطفته لما يغيب حكم عقله..
وتكتب معه سلبيات وإيجابيات قراراته..
وتنبّهه عن الأمور اللي غابت عن باله..

وآخر إشي..
أوعك تقرر عنه..
اتركه يقرر لحاله ^^

#ARK

الدنيا مطر!!

في آية رقمها (17) في سورة اسمها الحديد بتحكيلنا عن أراضي ميتة، جافة، صلبة، عانت من ظمأ طويـــــل وكانت فاقدة الأمل من أي فرصة في الحياة..
وفجأة نزل عليها المطر فأحياها..

اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ(17)
.
.
لكن في آية رقمها (16) قبل آية المطر بالضبط، ما كانت بتحكي عن أراضي جافّة ميتة، لكنها كانت بتحكي عن قلبـــــــــك!!!

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا (نَزَلَ) مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ (16)

مطر (نزل) عالأرض..
ووحي (نزل) عقلبك..

واللي قدر يروي الأرض ويحييها بعد موتها ..
قادر إنه يحيي قلبـــــــــــك..!

#القرآن_الجميل
#ARK

هُوَ الَّذِي يُرِيكُمُ الْبَرْقَ خَوْفًا وَطَمَعًا وَيُنشِئُ السَّحَابَ الثِّقَالَ * وَيُسَبِّحُ الرَّعْدُ بِحَمْدِهِ وَالْمَلَائِكَةُ مِنْ خِيفَتِهِ وَيُرْسِلُ الصَّوَاعِقَ فَيُصِيبُ بِهَا مَن يَشَاءُ

(وَهُمْ) يُجَادِلُونَ فِي اللَّهِ!!!

(وَهُوَ) شَدِيدُ الْمِحَالِ!

#القرآن_الجميل

مرّة بنت تواصلت معي عشان شخص ببتز فيها، والحمدلله ربنا قدّرني أساعدها.
انصدمت بعد فترة لما بعتتلي إنها رجعت تتواصل مع الشب وهيّو الآن رجع يهددها..!!

وصارت أكثر من مرة أساعد ناس وقعوا بمشاكل، وبعد فترة يطلبوا مساعدة لإنهم رجعوا وقعوا بنفس الغلط لكن مع أشخاص مختلفين!!

ليه طيّب؟ ليه بنكرر نفس الغلط؟ ليه بنوقع بنفس الفخ؟ ليه ما بنتعلم من أخطائنا؟!

حسب علماء النفس في ناس عندهم نزعة شديدة وميل غريب لتكرار بعض التجارب المؤلمة في حياتهم، وهالشيء يُطلق عليه في التحليل النفسي "التكرار القهري" وإله عدة أسباب منها:

* إنه الشخص بعيد سيناريو نفس الأحداث القديمة بكل تفاصيلها وأدوارها وظروفها عشان يحاول ينهيها بطريقة مختلفة عن اللي انتهت عليه في السابق.. يعني الشخص بعيد صنع الموقف وتركيبه مع شخص أو أشخاص جداد بلبسهم الأدوار القديمة (أو حتى نفس الأشخاص القديمين) عشان يحل معاهم اللي ما عرف يحلّه زمان.. ويعمل نهاية جديدة وسعيدة بدل النهاية البائسة السابقة. وللأسف نادر ما ينجح!

* إنه الشخص غالبا بكون فى تجاربه الأولى المؤلمة ضعيف ومنكسر.. وبعتبر إنه كل هالأشياء صارت غصب عنه ومش بإرادته.. وبحس وقتها بالذل والانكسار والمهانة.. لكن الآن هو بعمل كل هالاشياء بمزاجه وإرادته وكامل وعيه.. فبحس (ولو إحساس مزيف) إنه إله السيطرة على الأمور اللي بمرّ فيها..

* إنه الشخص كان (ضحية) في اللي صار معه زمان.. كان مستسلم ومغلوب على أمره.. فبرجع هالمرة عشان ينتقم.. وبرجّع شريط حياته لورا وبكرر نفس التجربة مع شخص جديد أو نفسه، بس بكون هالمرة هو (الجاني).. عشان يوخذ بثاره! وكمان للأسف نادر ما ينجح!

* الشخص اللي بتعرض لتجارب مؤذية وقاسية فى حياته بحس بالذنب إنه ما دافع عن نفسه.. أو إنه هو اللي وصّل حاله لهيك وضع .. أو إنه هو اللي ساعد الطرف الثانى إنه يجرحه..فببدأ يتنقم من نفسه ويعذبها ويجلدها بتكرار نفس الأحداث واستدعاء نفس الأذى واستعذاب نفس الألم.
في بعض الناس بتتلذذ بتعذيب نفسها وجلد ذاتها.. ناس بتحب الوجع.. وهذا النوع من الناس بكونوا بنتقموا من أنفسهم.. أو بنتقموا من غيرهم في أنفسهم.
.
.
أكيد صادفتوا مثلا بنت بتختار شريك أناني وطمّاع ومستغل ومؤذي إلها نفسياً وعاطفياً وجسدياً، ومش بس هيك.. كمان بتكون مستمسكة فيه وما بدها تتخلى عنه.. وبتحارب الدنيا كلها عشانه.. ولو تركها بترجعله.. برغم البهدلة والاستغلال والأذى.. وحتى لو تركوا بعض لسبب ما بتصير تبحث عن شخص عنده نفس المواصفات وبترتبط فيه.. وبتعيد السيناريو من الأول بنفس تفاصيله.
وهذا حسب علماء النفس يعتبر من أعقد أنواع العلاقات وأصعبها..
.
.
في المقابل في ناس صح بتغلط، لكن هالغلط بصحيها وبوعّيها وبزيدها نضج وحكمة وفهم، وبكون هالغلط دافع إلهم حتى يصيروا أحسن وأقوى وأصلب..
ولما تشوفهم بتستغرب كيف قدروا يصيروا هيك؟ كيف تجاوزوا؟ كيف امتلكوا هالنضج فجأة.. كيف هيك صاروا قراب من ربنا؟؟!
.
.
كلنا بنغلط، لكن هالغلط..
إما بتتعلم منّه وبقدمك..
أو بنتشلك لورا وبأخرك..!!

لِمَن شَاءَ مِنكُمْ أَن يَتَقَدَّمَ أَوْ يَتَأَخَّرَ !
#ARK

من يومين في بنت مصريّة نزلت بوست:
ابن عمي الكبير ** اتحرش بيا وانا صغيرة ولما قولت لابويا مصدقنيش
باي ♥️ !

بعدها لقوها منتحرة من الطابق العاشر، أو مقتولة ما بنعرف!!
الله يرحمها ويغفر إلها..

---------
بالمناسبة، صح الأطفال بحكوا كثير وبخبرونا عن كل شيء بصير معهم، وبنقلوا إلنا كل موقف حتى لو بسيط أو تافه صار معهم.. لكن إذا كان الموضوع "تحرّش واعتداء" بفضلوا السكوت!!

الدراسات بتحكي:
38% فقط من ضحايا الاعتداء الجنسي من الأطفال يُفصِحون عما تعرَّضوا له!

طيّب ليه؟؟ ليه الأطفال مش ممكن يخبرونا بشيء فظيع مثل هيك حصل معهم؟؟!

في عدة احتمالات منها:
- شعور الطفل باللوم والذنب وإنه هو سبب بالشيء اللي صار.
- إحساس الطفل بهديك اللحظة بكون مليء بالخزي والعار فهو بفضل يسكت حتى ما يسترجع هذا الحدث في باله.
- غالبا الشخص المتحرش بقوم بتهديد الطفل، فممكن يقله بعاقبك لو بتحكي، وإنه ما حد رح يصدقك أصلا، أو رح أقتل حد من أهلك لو خبرت حد، وفي منهم بغري الأطفال بمصاري أو هدايا!
- أكثر من 30% من حالات الاعتداء بتكون من العائلة! لهيك الطفل بحتار إنه لمين أحكي؟ والشخص المتحرش من أفراد العيلة وهالشيء رح يعمل مشكلة كبيرة أو ممكن ما حد يصدقني..! وبالتالي خوفه من عواقب شيء بجهله بدفعه للسكوت تماما.
- الأطفال غالبا غير قادرين يعبروا عن الشيء اللي صار معهم، ما عندهم مصطلحات وألفاظ تسعفهم، همه نفسهم مش فاهمين إيش صار، وبعضهم بتساءل هو الشيء اللي صار طبيعي ولا مش طبيعي أصلا!
- بعض الأطفال ممكن يتقبل هيك شيء فيما لو كان مقترن بهدايا وامتيازات أو لذة أو فضول حصلوا عليه، وبالتالي هون بشعروا نفسهم مسؤولين وسبب بالشيء اللي صار معهم، فبفضلوا يسكتوا وما يفضحوا حالهم ويتعاقبوا من أهلهم..
.
.
طيّب هل في علامات ممكن تساعدنا في معرفة إذا الطفل تعرض لإعتداء؟

أكيد، مثل العزلة والاكتئاب والكوابيس والأرق والتشتت والتراجع الأكاديمي والبكاء المستمر، وخوفه وهلعه من إنه يروح مكان معين او في حال سمع اسم معين، ومشاكل في أكله وشهيته، وكمان أفكار انتحارية أو رغبته في إيذاء نفسه وجرح حاله..

وفي كمان علامات مثل رغبته المبالغ فيها بالاستحمام، أو تكراره لغسل إيديه ووجه، أو تغييره لملابسه بشكل متكرر، وصدور بعض السلوكيات النكوصية منه مثل مص الإبهام أو التبول اللإرادي..
.
.
وللأسف تعرض الطفل للتحرش بعرضه لمشاكل نفسية كبيرة، منها تفكيرهم بالانتحار أو الاكتئاب أو عدم ثقتهم بأحد، أو تجنبهم للإرتباط، أو بميلوا لعلاقات تستنزفهم تماما وبالتالي تتكرر الاعتداءات والإساءة عليهم..!
لكن هذا لا يعني إنه الشيء لا يعالج، وبنصح كل شخص مر بهيك تجربة ولا تزال مأثره عليه وما قدر يتجاوزها يلجأ لأخصائي نفسي ويواجه مشكلته ويكمل حياته..

والحل؟!
الحل ببساطة بالتوعية والكلام مع الأطفال بشكل يناسب عمرهم، ومتوفر عالإنترنت محتوى هائل ممكن يساعد الآباء والمربين على توعية الأطفال.
ومهم جدا التوعية تكون من المدرسين والمدرسات، لإنه هذا ممكن يشجع الطفل يحكي إلهم فيما لو كان الإعتداء من نفس بيت وعائلة الطفل.
أو في حال خوفه إنه لو خبر أهله ما يصدقوه أو يعاقبوه، فهيك بكون المدرسين المكان الآمن إلهم..
.
.
نقطة مهمة جدا بحب أشير إلها، إنه الاعتداء والتحرش في هالوقت مش مقتصر فقط على الواقع!!
في أهل آه بحموا أطفالهم في الواقع، لكن بتركوهم عالتلفون!!
التحرش من خلال الانترنت والألعاب وتطبيقات المحادثة شيء فظيع جدا، وقاعد بنتشر بشكل هائل!!

والله قلبي لهسا بوجعني لما بنت عمرها 12 سنة بعتتلي بيوم:
عمو ساعدني في حد خلاني أصور حالي وهلأ بهددني يخبر ماما وبابا!!!
.
.
.
هالبوست المختصر لعل وعسى يساهم في توعية الناس ولفت انتباههم لهذا الموضوع الخطير والمهم..
لعل وعسى يساهم في إنقاذ حياة الكثير من الأطفال..!

هالبوست عن روح (علياء) البنت المصريّة..
الله يرحمها ويغفر إلها..!

#ARK

(رمشة)!!

في بنت بتحكي للبنت اللي جنبها في الباص شو رأيك تقرأي معي أذكار الصباح؟!
البنت استغربت من طلبها خصوصا إنها ما بتعرفها!
بس وافقت على طلبها وشعرت إنها أمام إنسانة لطيفة..

خبرتها البنت بس لازم قراءة الأذكار تكون من قلبك، مش بس تحركي لسانك، يعني تحسي قلبك هو اللي بحكيها وتستشعري معانيها..

يعني مثلا لما تحكي: (اللهم ما أصبح بي من نعمة أو بأحد من خلقك فمنك وحدك لا شريك لك، فلك الحمد ولك الشكر.)
بدك تستشعري كل نعمة من قلبك، وبكل خشوع تحكي الحمدلله..

ابتسمت البنت وقالت حاضر، رح اقرأ الأذكار بخشوع ومن قلبي، وعد!

بدأت فعلا تقرأ الأذكار، ولما وصلت لعند:
( اللهم إني أسألك العفو والعافية في ديني ودنياي وأهلي ومالي، اللهم استر عوراتي وآمن روعاتي، واحفظني من بين يدي ومن خلفي وعن يميني وعن شمالي، ومن فوقي، وأعوذ بعظمتك أن أغتال من تحتي)..

قالت بعفوية: شو مريح! بتعرفي إني طلعت الصبح من البيت خايفة! ومش عارفة من شو خايفة! بس هالدعاء كثير ريحني..شكرا!

كملت قراءة، (اللهم إني اسـألك خير هذا اليوم، فتحه، ونصره، ونوره وبركته، وهداه)

كانت مبتسمة باطمئنان وهي بتعيد وبتتأمل بـــ (فتحه ونصره ونوره وبركته وهداه)، وقالت فجأة: يا رب... وكانت من قلبها!

لما قرأت: (اللهم أنت ربي لا إله إلا أنت، خلقتني وأنا عبدك وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك عليّ، وأبوء بذنبي فاغفر لي فإنه لا يغفر الذنوب إلا أنت).

حست بشعور غريب، هاي أول مرة بتعاهد ربنا وبتعترف إله بأخطائها بهاي الصيغة الرهيبة..
وتنفيذا لشرط صديقتها وإنها تقرأ الأذكار من قلبها، غمضت عيونها وقالت:
وأنا على عهدك ووعدك ما استطعت!

خبرتها صديقتها إنه هالدعاء اسمه (سيد الاستغفار)، حلو كتير صح؟؟
.
.
كانوا مع كل دعاء يتناقشوا ويحكوا، ومر الوقت سريعا وضايل دقيقة والبنت اللي قررت تقرأ الأذكار من قلبها تنفيذا لطلب غريب من بنت ما بتعرفها إنها تنزل من الباص..

قالت بسرعة بسرعة هسا كثيير حلو ومطمئن دعاء:
( يا حي يا قيوم برحمتك استغيث أصلح لي شأني كله ولا تكلني إلى نفسي طرفة عين)

بس شو يعني (ولا تكلني إلى نفسي طرفة عين)؟؟!

ردت عليها: تمام عالسريع عالسريع..
إنت هون بتدعي ربنا باسمه (الحيّ) و (القيوم) القائم على كل شيء، وبتستغيثي برحمته إنه يصلح إلك كل شؤونك وأحوالك وقراراتك ومسار حياتك ونفسيتك وكل إشي كل إشي..
ربنا الحيّ اللي ما بموت، والقيوم القائم على كل شيء، واللي رحمته وسعت كل شيء ما رح يعجزه إنه يصلح شأنك وحياتك..صح؟!

- آه صح!
بس سألتك عن معنى ولا تكلني إلى نفسي طرفة عين؟!!
يييي الباص وقف، لازم أنزل هلأ...

استني استني..
طرفة عين يعني (رمشة)!

باي!
.
.
نزلت من الباص وهي صافنة..
ربنا حيّ وبحيي فينا كل أمل، وقيوم بقوم على شؤون عباده، وأنا بستغيثه برحمته إنه يصلح شأني وحياتي..!

آآآه آه.. وإنه ما يتركني لنفسي ولحالي ولو لحظة، ولو بمقدار رمشة!
.
.
مر على هالموقف سنوات، ومن وقتها وبكل صبح ومسا هالبنت بتدعي من قلبها وبتقول:

يا رب ما تتركني لحالي ولو رمشة!!

#ARK

صديق إلي خبرني مرّة إنه معجب ببنت وبفكر يتقدم إلها..

قبل ما يخبرني عن البنت بفترة كان مخبرني عن منحة ماجستير برا، وخبرني بشو حاب يتخصص وبأي جامعة ... كل هذا كان قبل ما فجأة يشوف هالبنت ويقرر يأجل طموحه أو يتنازل عنه مقابل إنه يرتبط فيها..!

حسم صراعه، وفعلا تقدّم للبنت وكل الأمور سارت مثل ما بتمنى وأكثر...

بعد كتب كتابهم بأيام رنّ علي وحكالي حاب أشوفك..
قعدنا ولاحظت إنه متوتر ومهموم.. وعنده حكي حاب يحكيه..

خطرلي إنه متوتر من موضوع طموحه وسألته بتفكر بطموحك؟ وحسيت حالك ضيعت فرصة على حالك؟

- قلي: لا لا !!! هالموضوع ما بفكر فيه، وهي حد كثير بستاهل وكل يوم بحمد ربنا على نعمة وجودها... وعفكرة بقدر أجمع وأوفق بين زواجنا وطموحي..

- ارتحت لما جاوبني هيك، بس مش فاهم مالك مدايق؟!

- قلي أنا متوتر من فكرة إنه الزواج أبدي!!
يعني آه والله بحبها وبموت فيها، بس متوتر من نفس فكرة الزواج، وإنه كيف لشخصين يعيشوا مع بعض حتى الموت!
إنك فجأة تربط كل حياتك النفسية والإجتماعية والعاطفية بشخص آخر.
إنكم تكرّسوا وقتكم وجهدكم وحياتكم وقلبكم وعقلكم لبعض..
إنه شخصين يتحملوا أغلاط وهفوات بعضهم للأبد..

طيب حتى لو في حب، مش في ملل؟ مش إحنا كبشر بنحس بالإشباع مع الوقت، مش لحالنا بنفقد دهشة البدايات..؟

إنت بكرا بتخطب وبتحس بشعوري، متخيل تصحى وتاكل وتشرب وتطلع وتعيش مع نفس الحد طول العمر!!

أنا ما بقلك عن سنة ولا سنتين ولا عشرة..
بقلك عن عمر لو ربنا كتب إلنا نعيش..!!

لا تفكر إنه عندي مشكلة مع البنت، بالعكس أنا لما أشوفها بنسى كل هالأفكار ومش مصدق متى نتزوج، بس لما أكون مع نفسي بتوتر من هالفكرة.. إنك تعيش مع شخص للموت!!
----------------
.
.
بالمناسبة كلامه تساءل عنه كثير من علماء النفس..
شو بدفع شخصين يعيشوا مع بعض العمر كله؟؟
حتى لو كانوا بموتوا وبعشقوا بعض.. بس أكيد في ملل وتعود..طيّب كيف بكملوا؟

إحدى تفاسيرهم إنه علاقات الزواج علاقات مرنة ومتجددة وغير مادية..
وبالتالي ما بصير فيها الإشباع مثل ما بصير مع الأشياء المادية..

يعني إنت لما تتعامل مع شيء (مادي) ثابت أكيد رح توصل للإشباع وتمل منه...لكن في الزواج في شيء بتجاوز المادة، إنت بتعامل روح ونفس متجددة بانفعالاتها وأفكارها ودوافعها وحركاتها.. وبالتالي الإشباع مش موجود لإنه طبيعة العلاقة متجددة ومرنة جدا..
---------------
ما خبرت صديقي عن التفسير النفسي، خبرته عن تفسير من نوع ثاني..قلتله أكيد بتعرف آية ( .....لتسكنوا إليها وجعل بينكم مودة ورحمة)...

الآية في سورة الروم..
سورة الروم سورة مليئة بالكلام عن (آيات الله) يعني حججه وأدلته ومعجزاته في الخلق والكون..

آية (الزواج) أجت بين مجموعة آيات ثانية..شوف:

وَمِنْ آيَاتِهِ أَنْ خَلَقَكُم مِّن تُرَابٍ ثُمَّ إِذَا أَنتُم بَشَرٌ تَنتَشِرُونَ (20) وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ (21) وَمِنْ آيَاتِهِ خَلْقُ السَّمَاوَاتِ وَالْأَرْضِ وَاخْتِلَافُ أَلْسِنَتِكُمْ وَأَلْوَانِكُمْ ۚ إِنَّ فِي ذَٰلِكَ لَآيَاتٍ لِّلْعَالِمِينَ (22) وَمِنْ آيَاتِهِ مَنَامُكُم بِاللَّيْلِ وَالنَّهَارِ وَابْتِغَاؤُكُم مِّن فَضْلِهِ ۚ إِنَّ فِي ذَٰلِكَ لَآيَاتٍ لِّقَوْمٍ يَسْمَعُونَ (23) وَمِنْ آيَاتِهِ يُرِيكُمُ الْبَرْقَ خَوْفًا وَطَمَعًا وَيُنَزِّلُ مِنَ السَّمَاءِ مَاءً فَيُحْيِي بِهِ الْأَرْضَ بَعْدَ مَوْتِهَا ۚ إِنَّ فِي ذَٰلِكَ لَآيَاتٍ لِّقَوْمٍ يَعْقِلُونَ (24)
.
.
.
سؤالك صح، وشيء بستدعي العجب إنه كيف لشخصين يعيشوا مع بعض للموت..!!

ومن عظم الشيء ربنا ذكره كأحد آياته! كأحد معجزاته في الخلق!
القرآن اعتبر فكرة الزواج وديمومته خصيصة من خصائص القدرة الإلهية..!
شيء يستعصي على العقول استيعابه وفهمه..
فهو آية ودليل ومعجزة على وجود إله كليّ القدرة والرحمة..
مثله مثل خلق السموات والأرض!
.
.
ربنا بقلنا من آيته خلق الإنسان من تراب، وخلق السموات والأرض، ومن آياته الليل والنهار، والبرق والمطر اللي بحيي فيه الأرض بعد موتها..

ومن آياته إنه يجمع شخصين تحت سقف واحد طول العمر!
حتى الموت!!

#القرآن_الجميل
#ARK

صارت معكم إنه حد يطلب منكم طلب بسيط جدا، وبعد ما رديتوا عليه، رجع بعدها طلب شيء أكبر مع ذلك رديتوا عليه وكان صعب عليكم تعتذروا؟!

مثلا:
- حد في الجامعة طلب منك تساعده بواجب عالسريع، بعدها بفترة طلب منك تساعده بالبحث وكمان ساعدته.

- حملة طلبت منك فقط تغيّر صورة البروفايل تضامنا معها، بعد بفترة طلبوا منك التبرع للحملة وفعلا تبرعت.

- بيّاع عرض عليك منتج وقلك بس شوفه واسمعني عالسريع، وآخر شيء لقيت حالك اشتريته.

- أختك طلبت منك تعمل إلها كاسة نيسكافيه بطريقك، وثاني يوم رنّت عليك جيب بالله وجبة شاورما كمان بطريقك!!

------------
ما سبق بطلق عليه علماء السلوك: استراتيجية قدم على عتبة الباب FITD، وهي وسيلة نفسية هدفها إنه يستجيب الشخص لطلب كبير بجعله يستجيب في الأول لطلب صغير.

يعني مثلا، مرّة رنوا على ربّات بيوت وسألوهم عن المنتجات اللي بستخدموها في بيتهم، بعدها بفترة رنوا عليهم وحكولهم بدنا نرسل فريق عالبيت يعمل إحصاء لمنتجات البيت..موافقين؟
ووجدوا إنه ربّات البيوت اللي وافقوا على فريق الإحصاء همه اللي بالأول ردوا على الأسئلة بالتلفون.

كثير كثير في أمثلة عن هالتقنية والمستخدمة بكثرة في مجال التسويق تحديدا، وفي كثير ناس بستخدموها معنا أو بنستخدمها معهم في حياتنا من غير وعينا ولا وعيهم..

طيّب ليش؟
ليش في الغالب بنستجيب للطلب الكبير بعد استجابتنا للطلب الصغير؟
والجواب باختصار: حتى نحافظ على اتساقنا وإلتزامنا..
عموما إحنا بنحب نلتزم بمواقفنا ونكون متسقين معها..
فما دام ساعدنا شخص بحل واجب، مش حلوة نرفض نساعده بالبحث لإنه هيك بنكون خالفنا إلتزام إحنا قبلناه على أنفسنا في البداية..

--------
--------
في القرآن نفس الفكرة، كثير أوامر ربّانية بدأت بطلبات بسيطة جدا، وأحيانا مجرد تلميحات....ومجرد إلتزام المؤمنين فيها كان ينتقل الخطاب لنوع آخر من الأوامر..

مثل الخمر، والربا، والقتال، وغيرها
.
.
.
لهيك مثلا شخص ما بصلي وبدو يصوم رمضان، ما نقله لا منك ولا من صيامك! خليه يصوم وقبوله بالصيام وإلتزامه فيه بكرا رح يخليه يصلي..

وحدة نفسيا الحجاب عليها صعب ومش قادرة تتخذ الخطوة لسه، لكنها قررت تلبس لبس أستر...برافو، ممتاز، بكرا ربنا بجمّلها بالستر إن شاء الله..

شخص هاي أول مرة فيها بصلي بحياته، وكان مستثقل من السنن ومش متعود يصلي....معلش، خليه عالفروض أولها.. نعمة كبيرة والله إنه قرر يصلي..

.
.
مجرد ما الشخص وافق وقِبل إنه يلتزم بشيء ولو بسيط فممتاز جدا ... أصلا ما في بسيط بنظر ربنا .. !!

المهم خطوة بس، المهم تلزم نفسك بشيء، ولو آية باليوم، ولو تسبيحة، ولو بس ركعتين تراويح، ولو قطعة ملابس أطول شوي، ولو دينار واحد تتصدق فيه..

ولو سرور صغير رسمته عقلب أختك لما قررت تعمل إلها كاسة نيسكافيه!

#ARK

اشتغلت فترة بأمريكا، وكان السؤال المتكرر من الموظفين Do you have a girlfriend ؟

فكنت أجاوب: لأ.
طيب ليه؟
ممم عندي قناعة إنه لازم أحتفظ بمشاعري لزوجة المستقبل
" عجل الله في ظهورها " : )
كان هالجواب كفيل إنهم يقدروني ويحترموني ويحكولي واو شو إنك حدا كيوت ونيالها ") ^^

وكانوا دايما يسألوني كيف عايش بدون وجود Fun بحياتك..!
لا بنات، ولا شرب، ولا حشيش ولا إشي..!

كانوا ينظروا إلي بفضول كوني بالنسبة لأغلبهم أول مسلم بقابلوه بحياتهم..

المهم.. صادف وجودي هناك شهر رمضان، وفي يوم حكتلي المديرة:
تعال كل هي جبنا بيتزا ")
فأنا اعتذرت منها وقلتها صايم..حكتلي طيب هيّ مي وعصير ..
فقلتلها: شكرا بس أنا صايم عن كل إشي..
وبعفوية قالت: OMG حتى عن المي!!

وعلى ما يبدو إنه المديرة نقلت قصتي لبقية الموظفين، ولاحظت هالشيء من خلال نظرات الشفقة!
وأدركت هالشيء من خلال كلام صديقي "جون" لما قلي بما معناه:
مااااااااان ليه بتعمل بحالك هيك !!

وبيوم سألوني: ليه بتصوم؟؟ شو العبرة؟؟
وقتها شعرت بالإحراج وخفت ما أجاوب بشكل يقنعهم..
فلو مثلا حكتلهم إنه إحنا بنصوم عشان نشعر بالفقراء، فممكن يسألوني يعني الفقراء عندكم ما بصوموا؟؟

خطرلي وقتها أحكيلهم:
إنه إذا الإنسان قدر يمنع نفسه من الأكل والشرب وهي حاجات أساسية ومن دونها بتنعدم حياته، فهو من باب أولى قادر يسيطر على أي إشي ثاني..!

ووظفت جوابي لموضوع ليه ما عندي علاقات مع بنات ولا بشرب، لإنه اذا قدرت أمنع نفسي من الأكل والشرب، فهذا يعني إني قادر أسيطر وأتحكم بأي شهوة ثانية..

وبصراحة ما بعرف، لكن كلامي على بساطته شعرت إنه أثار إعجابهم!
.
.

رمضان فعلا مدرسة!
شهر بستخرج طاقاتك وإمكاناتك، شهر بثبتلك إنه إنت قادر تتخلص من شهواتك ورغباتك ورعوناتك وأهوائك ولحظات غضبك وانفعالك، لما قررت تكبحها لأنك صايم وما بدك يضيع صيامك !

بثبتلك إنه الشهوة اللي كنت تعتقد إنك ما بتصبر عليها يومين هيّك صبرت عالأكبر منها!
ممكن عشان هيك النبي صلى الله عليه وسلم وصف الصوم بالجُنّة، يعني ستر ووقاية.

"مدرسة الصيام" بتعمل على استدراجك للخير والطاعة، وبتخليك تشعر بحلاوتها وبحلاوة إنك قادر تسيطر على نفسك..
حتى يدفعك هذا الإستدراج إنك تعيش بقية أيام حياتك وكأنها رمضان... أو عالأقل قريب من أيام رمضان..
هذا الاستدراج للطاعة بمنحك أمل في بقية أيامك إنك قادر بيوم تكون نسخة أحسن من حالك..

"مدرسة رمضان" بتعلّمك إنه ما في أحلى من شعور القوة والسيطرة.
شعور إنك أقوى من شهواتك ورغباتك وحظوظ نفسك..
شعور إنك قادر تحكي "لأ" للغلط..
"لأ" للحظة استغابة..
"لأ" لكلام كنت رح تحكيه في موقف أثار غضبك..

رمضان شهر بمنحك أمل بنفسك وبقودك لإحسان الظن بذاتك بعد أشهر من جلدها..
وبمنحك فرصة تستأنف صراع كنت على وشك ترفع الراية البيضا فيه...!

.
.
.
في اللحظة اللي كانوا ينظروا إلي بشفقة..
كنت أتمتم بقلبي:

الحمدلله على نعمة رمضان ❤️ !
#ARK

- صوت صحون ومعالق وكركبة وصراخ، وفجأة بتخفت كل هالأصوات وبعمّ الهدوء اللي دايما بترافق مع نسمة هوا باردة من شباك المطبخ، وبتسمع تمتمات بصوت خاشع:

"اللهم لك صمت وعلى رزقك أفطرت. ذهب الظمأ وابتلت العروق وثبت الأجر إن شاء الله".
يلا سمّوا..

---------
- بنت صافنة من الشباك بتفكر كيف إنها من زمان ما تنفست هوا "السحر" ولا تأملت الغروب! ضلّت صافنة إنه كيف "زمن" رمضان أعاد دهشتها... بعد ما فقدتها في زمن الحياة الصاخبة!

--------
- كان بتأمل بزوجته وهي بتحضر الفطور، كان مستغرب من سرعة إنجازها، وزخم عطائها، هي درسّت الأولاد، وجهزت الفطور، ونظفت بسرعة، وجهزت للتروايح بسرعة على غير العادة في أي مشوار ثاني! وكانت محضرة أشياء زاكية توزعها عالأطفال في المسجد..

وهمه في طريقهم للتروايح قلها بتعرفي شغلة؟
أنا جد بحبك!

--------
- دكتور الجامعة بكل حنيّة قال لطلابه، لا تقلقلوا بخصوص الإمتحان، رح يكون سهل، عشان هالشهر الفضيل..
ومدير الشركة كان لطيف على غير العادة مع موظفينه..وقلهم رح ازيدكم عالراتب وأمانة ادعولي !
--------
- كان معصب جدا من شخص كان رح يعمل معه حادث، كان رح يعمل معه مشكلة، لكنّه فجأة تذكر إنه صايم، مجرد فكرة إنه صايم انتشلته من خانة رد الفعل، لخانة الإرادة الكاملة في السيطرة على انفعالاته مثل ما أراد الله!!

ابتسم وقله معلّش، كل عام وإنت بخير ^^

-------
- شب بكل عفوية بحكي لصحابه، شوفوا ترى أنا أعطل واحد فيكم، بس هذا رمضان، خلينا نعمل خير فيه قد ما نقدر... تعالوا نوزع تمر عالإشارات أو نعمل طرود خير.... يلا شباب بالله عليكم!!

-------
- بنت بتحكي لصاحبتها..بتعرفي شو نفسي هالرمضان؟؟
إنه أسجد سجدة طويلة، وما أرفع راسي منها إلا واسمي تسجّل من العتقاء!!
-------
- عجوز كان بفطر على 3 تمرات، وكاسة لبن..
تذكر حديث للصائم فرحتان، فرحة حين يفطر، وفرحة حين يلقى ربه..

ابتسم فجأة مع التمرة الثالثة..
تشهد بصوت خاشع هدّه الوجع والمرض...

ومات حتى يقابل ربه!!

#ARK

لأ لأ استنوا!
ليه بديتوا من سورة البقرة؟ طيب والفاتحة؟!

كنت بسأل أطفال في المسجد فتحوا المصحف بين التراويح وبدأوا بسورة البقرة.
حكولي طيّب إحنا حافظينها وكل يوم بنقرأها..

بعرف إنكم حافظينها بس لازم تبدأوا فيها لإنه هي المفتاح، هي كلمة السر..
مش إنتوا لما بدكم تفتحوا التابلت بتحطوا كلمة سرّ؟
نفس الشيء القرآن، بدكم حتى تقدروا تدخلوا عليه تحطوا 7 أرقام كلمة السر!
سألوني ليه 7؟؟ لإنها عدد آيات سورة الفاتحة..^^
-------
بس هاي كلمة السر غريبة، إنت مش مطلوب منك بس تحفظها، مطلوب منك تفهمها..!

صاروا يضحكوا.. وحكولي كيف نفهم كلمة السر.. كلمة السر بنحفظها مش بنفهمها!! آه آه صح كلامكم بس هاد بالتابلت، هون بدكم تفهموا وتحفظوا حتى يفتح معكم المصحف!!

طلبوا مني أفهمهم كلمة السرّ..

1- بِسْمِ اللَّهِ الرَّحْمَنِ الرَّحِيمِ = يعني إنك تستعين بالله، بتطلب منّه يعينك بكل شيء بحياتك، سواء دراستك، أو بلعبة كرة، أو بشغلة طلبها منك أبوك، أو حتى بلقمة قطايف بقشطة..! كل إشي بحياتك...بسم الله!
----------
2- الْحَمْدُ لِلَّهِ رَبِّ الْعَالَمِينَ = يعني إنك تكون إيجابي! سألوني شو يعني إيجابي؟
قلتلهم إنك بدك تشكر ربنا عكل إشي، حتى لو إشي سيء صار معك، حتى لو رسبت بامتحان، أو خسرت بلعبة كرة، أو أهلك زعلوك، أو صاحبك خاصمك، وأكيد كمان مع كل إشي خير... بدك تشكر ربنا عليه، وهيك إنت بتكون شخص إيجابي، إنك دايما راضي وبتشكر ربنا عكل إشي..!

سألوني طيب رب العالمين؟ ممم يعني رب كل إشي.. رب الفقراء والأغنياء والمرضى والأصحاء والمتعلمين والجهلاء، رب الكبار والأطفال والنساء والرجال، رب كل إشي كل إشي..

انصدمت لما طفل منهم قلي: يعني رب كل إشي، بدنا نشكره عكل إشي!
---------
3- الرَّحْمَنِ الرَّحِيمِ = تتذكروا آخر مرة لما مرضتوا؟ لما إمكم ضلت جنبكم طول الليل؟ لما كنتوا تصحوا تلاقوها غفيت جنبكم من التعب؟ لما كانت تبكي عليكم؟ الله أرحم فيكم من إمكم!!

بس لا تنسوا إنه رحمة ربنا مش شرط تقدروا تشوفوها بعيونكم! لإنه الحياة فيها صعوبات وفيها أمراض وأوجاع، فيها زلازل وحروب.. لكن الرحمة ممكن تكون مخبية، ممكن تكون غامضة غير مفهومة، بس ضروري تعرفوا إنها موجودة!
مرات بتكون متنكرة بأشكال كثيرة.. لهيك لا تتسرعوا وتقولوا انها مش موجودة ...لا موجودة دايما موجودة!

-------
4- مَالِكِ يَوْمِ الدِّينِ = يعني ربنا مالك يوم الحساب، يوم العدل!
مش قلت إلكم الدنيا فيها أمراض وأوجاع وحروب وزلازل؟؟ ربنا بطمنّا إنه هو مالك يوم الحساب واللي رح يعوض كل حد عن كل إشي صعب مرّ فيه..
عن كل ألم ومرض وفقد وخوف، حتى عن كل غزّة شوكة!!

هون الرحمة رح تكون واضحة جدا ..ما رح تكون متنكرة ومتخبية زي الدنيا !
----------

طيب قبل ما أكمل؟ لما أحكيلكم عن رب رحيم، أرحم فيكم من إمكم وعادل عن كل إشي رح يعوضكم... وكثير أنعم عليكم....شو الأصل تتصرفوا؟؟

جاوبوني نعبده!

ممتاز!!

شوفوا كلمة السر رقم 5.

5- إِيَّاكَ نَعْبُدُ وَإِيَّاكَ نَسْتَعِينُ!

إياك نعبد لخّصت أرقام السر (1-2-3-4).
وإياك نستعين مقدمة أرقام السر (6-7) !!

-------
6- اهدِنَا الصِّرَاطَ الْمُسْتَقِيمَ 7- صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلاَ الضَّالِّينَ.

مش خبرتكم إنه بدنا نسعين بربنا بكل إشي؟
لهيك هون إحنا بندعي ربنا إنه يعينّا ويهدينا للصراط المستقيم...
طريق الحق، والخير، والحب، والعطاء، الطريق اللي بنكون فيه مناح مع الناس، مع أهلنا، وأصدقائنا، لما نساعد طفل، أو عمو كبير بالشارع، لما نعمل خير، لما نصلي ونكون مناح مع الله!

مش نكون سيئين زي بعض الناس اللي نسيوا الله، اللي ما كانوا مناح مع الناس، اللي ما كانوا مناح مع الله...!!

بس لا تنسوا هاد طريق صعب، بس حلو!!
لهيك لازم بكل مرة نحكي كلمة السر ندعي ربنا يعينا ويساعدنا ويهدينا وإنه لما نبعد عن الطريق المستقيم يردنا إله وما يتركنا..

بصوت عالي وعفوي قالوا:

آآآآآآآمين!!!

#القرآن_الجميل
#ARK

صاحبي بحكيلي يلا نلحق التروايح، مش حلوة النسوان يكونوا قبلنا بالمسجد "") !!

لما شفته قلتله ليه مستغرب إنه النساء يكونوا قبل الرجال في المسجد؟
بتعرف كثير دراسات أشارت إلى إنه النساء أكثر تدينا من الرجال!!!

والدراسات ما بتحكي فقط عن البلاد الإسلامية، بل حتى بكل الديانات المرأة أكثر تدينا، وأكثر إلتزاما بالطقوس الدينية، وأكثر إحساسا بأهمية العبادة، والأكثر مشاركة في البرامج الدينية، والأكثر عطفا اتجاه الفقراء والمحتاجين!!

صاحبي استغرب، خصوصا إنه وريته دراسة لمركز بيو للدراسات الإحصائية، وكثير في دراسات ثانية بتأكد نفس النقطة..
وإن كانت في دراسات بتشير إلى إنه معيار التدين متقارب جدا بين الجنسين والفروق بينهم طفيفة جدا...
على عكس الشائع في أذهانا إنه الرجال احسن بكثير ومتفوقين دينيا !!
----------
----------
آسف إني أحكي إنه الخطاب الديني والوعظي حاليا في مجمله متحيّز لصالح الرجال، ومركّز خطابه اتجاه النساء وسلوكياتهم الخاطئة!

وبتشعر إنه الخطاب الوعظي حاليا بشتغل بمبدأ رد الفعل اتجاه الخطاب النسوي المتطرف، وبرأيي هذا خطأ..
لإنه الخطاب اللي بحكي باسم ربنا ورسوله الأصل يكون خطاب متزن، خطاب بقرب الناس لربنا، خطاب منصف وغير متحيز، وإنه يبتعد عن السخرية والاستهزاء حتى لو كان الطرف الآخر بمارسها..

أحيانا بنصدم من شخصيات دينية بتكون منزلة بوستات بشكل مبتذل وساخر عن سلوكيات البنات، في غياب واضح عن ذكر سلوكيات الشباب واللي في كثير من الأحيان بتكون أكثر جرأة وفظاعة وقبح!!

أنا مع الأمر بالمعروف والنهي عن المنكر، لكن مع إنه الخطاب يكون حريص يكسب الطرف الآخر للهداية، مش يكون هدفه يفحمه وينتصر عليه ويظهر ضلاله وضياعه وانحلاله وفقط!
ومع إنه الخطاب يكون متزّن ومنصف ويناقش الخطأ والصواب بذاتهم بعيدا عن جنس مرتكبهم..

فمثلا، بدك تحكي عن عمل المرأة؟ ممتاز موضوع مهم، لكن إحكي بطريقك عن سلوكيات الرجال في بيئة العمل!!!

بدك تحكي عن لبس البنات في الشوارع؟ حلو كثير، لكن كمان إحكي عن الشباب المتحرشين في الشوارع!!

بدك تحكي عن شلة بنات فقدوا حيائهم وبرقصوا آخر الليل؟ لا تنسى كمان تحكي عن الشباب السكرانين آخر الليل!!

بدك تنتقد بنات لجأوا لجهات برأيك مندسة وتابعة للغرب، ممكن بتفق معك إنه فعلا كثير من هالجهات عليها علامات استفهام، لكن هل وفرنا بديل؟ هل أسسنا جميعات ومنظمات تدافع عن حقوق النساء المضطهدات والمعنفات؟
.
.
مؤسف إنه الخطاب اللي بزعم دفاعة عن الأسرة الإسلامية، بهدم قيم الإسلام ذاته، بخطابه المنفر والمتعالي والساخر والبعيد عن الواقع..

مؤسف إنه الخطاب اللي بحكي باسم ربنا ورسوله ينجر من خانة الفعل لخانة رد الفعل فقط..

مؤسف إنه بناتنا وخواتنا بلجأوا لجهات فعلا ممكن تستغل مظلمتهم وحاجتهم واحنا قاعدين من ورا شاشات بنّظر!!

-------
بتمنى ما ينفهم كلامي إني بعمم، أكيد في خطابات مشرقة ومنصفة وتدور مع الحق..
وبتمنى ما ينفهم كلامي إني متحيّز لصالح طرف على آخر، أنا مع الحق والصواب وضد الظلم العدوان سواء كان مرتكبه ذكر أو أنثى..
.
.

ورجائي من كل بنت صادفت خطاب ديني مُنفر.. وقادها هالشيء لمشكلة مع الدين نفسه ..إنها تراجع نفسها وتسأل أهل العلم المتخصصين بعيدا عن بعض الوعاظ الجاهلين..

وأرجوك لا تسمحي لأي خطاب قهرك ونسي حقك إنه يقودك لتنسي الله !!
.
.

ونيابة عن الجميع..

أنا آسف !

#ARK

مرة بنت أختي جابتلي مفتاح السيارة وحكتلي:
يلا وديني عالمول!
طبعًا هي أحلى إشي عندها في الحياة لما تروح عالمول عقسم الألعاب..
لو تشوفوا دموع الفرح بعيونها وهي صافنة بكمّ الألعاب المهول قدامها!
وكنا لما نشتري إلها لعبة تقعد معها يومين بعدين نلاقيها (محطمة) ومكسّرة أو ضايعة تحت التخت والكنباي..
كبرت بنت أختي شوي وبطلّت الألعاب كثير تستهويها، وصارت تميل أكثر لألعاب التلفون، وكل ما تيجي عنا بتحكيلي بكل براءة: خالو عادي تعطيني تلفونك ألعب شوي..
لكن شو ما كانت اللعبة حلوة آخريتها تختمها أو تزهق منها..
رح تكبر بنت أختي إن شاء الله وحتصير صبية..
وممكن وقتها رح تهتم بحالها ومظهرها وشكلها ولبسها أكثر..
وما رح تسمح لأختي تلبّسها ألف لون بنفس اللبسة ^^
رح تدخل بمرحلة (الزينة) المباحة إن شاء الله وهذا شيء فطري فينا كبشر..
ولما تتخرج من الجامعة إن شاء الله..
رح تفكر بحياتها بشكل جدي اكثر، ورح تفكر كيف تبني حياتها وتكوّن نفسها وتبني أسرتها..
---------
ما سبق بتحكي عنه هالآية:
اعْلَمُوا أَنَّمَا الْحَيَاةُ الدُّنْيَا
1- لَعِبٌ
2- وَلَهْوٌ
3- وَزِينَةٌ
4- وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ
الآية ما انتهت..
وتكملة الآية بتحكيلنا:
كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ
يعني..
مثل مزارع زرع البذور وطار من الفرحة لما نزل عليها مطر من السما..
لو تشوفوا دموع فرحته وهو بشوف النبات أخضر بنمو وبكبر شوي شوي عالأرض..
كان هالمزراع معجب بالزرع ومدهوش فيه والدنيا كلها مش واسعه فرحته..
لكن هالنبات كبر وكبر حتى اختفت دهشة المزراع فيه..
صار لونه أصفر وبعدها يِبِس وجَف وصار
(حُطام) !
-------
ختام الآية:
وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ
.
.
ديروا بالكم تشغلكم الحياة بألعابها ولهوها وزينتها عن الآخرة..
ديروا بالكم تتحول حياتكم لمظاهر وتفاخر بينكم..
وما تنسوا إنه الحياة متاعها زائل ومؤقت ولحظي وما بدوم لحد..
ومهما بلغتوا فيها من المتع والسعادة والمرح واللهو واللعب آخريتها تصير حُطام تحت رجليكم..
بالضبط مثل نبات المزارع..
ومثل ألعاب (لانا) بنت أختي!

#القرآن_الجميل
#ARK