الدنيا مطر!
وفي سورة في القرآن اسمها (الحديد)..
فيها آية بتحكيلنا عن أراضي ميتة، جافة، صلبة، عانت من ظمأ طويــــــل وكانت فاقدة الأمل من أي فرصة للحياة..
وفجأة نزل عليها المطر فأحياها..

اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ.(17)
.
.
لكــــــن الدهشة إنه آية الحديد ما كانت بتحكيلك عن إحياء الأرض الميتة فقط..
لإنه الآية السابقة إلها مباشرة كانت بتحكي عن قلبـــــــــــــــك!

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ (16)
.
.
اللي قدر يروي الأرض ويحييها بعد موتها ..
قادر إنه يحيي قلبـــــــــــك..!
❤
#القرآن_الجميل
#ARK

ليه ساكت؟!
طيب ممكن تحكي أي إشي حتى أفهم مالك؟
مش قادر تحس برمضان..صح؟!
ولّا مثلا بتشعر إنك فقدت الأمل من نفسك بعد شهور من الغفلة؟!
عملت ذنب كبير؟!
طيّب مثلا حاس إنه قلبك ميّت؟؟!
بتتخيل إنه ربنا مش ممكن يقبلك؟ ولا يحيي قلبك؟!

يا الله.. ليه ساكت!! طيب احكيلي آه ولا لأ..
بس فهمني مالك؟!
.
.
ممم كيف؟؟ كيف يحيي قلبي؟! جد كيف بعد كل إشي عملته وخبصته؟
.
.
وأخيرا حكيت ")!
هاد مرّة شخص مرّ على قرية خاوية على عروشها تماما..
صفن في هالقرية وسأل سؤال بشبه سؤالك: كيف الله رح يحييها؟
فربنا موّته 100 سنة، وبعدها بعثه وخلاه يشهد على قدرة ربنا كيف ممكن يحيي هالأرض بعد موتها!
وما كان من هالشخص إلا إنه يعترف بقدرة ربنا..
فكانت خلاصة القصة لما اعترف وقال: أعلم أن الله على شيء قدير..!

أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا ۖ فَأَمَاتَهُ اللَّهُ مِائَةَ عَامٍ ثُمَّ بَعَثَهُ ۖ قَالَ كَمْ لَبِثْتَ ۖ قَالَ لَبِثْتُ يَوْمًا أَوْ بَعْضَ يَوْمٍ ۖ قَالَ بَل لَّبِثْتَ مِائَةَ عَامٍ فَانظُرْ إِلَىٰ طَعَامِكَ وَشَرَابِكَ لَمْ يَتَسَنَّهْ ۖ وَانظُرْ إِلَىٰ حِمَارِكَ وَلِنَجْعَلَكَ آيَةً لِّلنَّاسِ ۖ وَانظُرْ إِلَى الْعِظَامِ كَيْفَ نُنشِزُهَا ثُمَّ نَكْسُوهَا لَحْمًا ۚ فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَىٰ كُلِّ شَيْءٍ قَدِيرٌ.
.
.

هالشخص كثير بشبهك لما هو تساءل عن قرية كبيرة، وإنت تساءلت عن قلبك!
وربنّا خلّد قصته حتى بكل مرة لما نتساءل عن (كيف؟) يجاوبنا..
ونقل إلنا ردّه حتى نستأنس فيه بكل مرة بنسأل (كيف؟) بنبرة يأس تملّكت من قلوبنا..

إنت.. مش مضطر تموت 100 سنة حتى تدرك الجواب!
إنت مش مطلوب منك غير لحظة صدق، تعترف فيها لربنا من قلبك إنه قادر على كل شيء!
وقلبك شيء!

ومجرد ما ربنا اطلع على حسن ظنك فيه وإيمانك بقدرته..
وقتها رح تلاقي إجابة سؤالك:

كيف ربنا رح يحيي قلبك!

#القرآن_الجميل
#ARK

من فترة كنت بلعب مع بنت أختي..
كانت اللعبة إنها تتخبى وأنا بكون ماشي فهي فجأة بتنط قدامي وبتصرخ..
فأنا بخـــــــــاف وبنقز وهي بتصير تضحك إنها خوفتني..

وفي أحد أشواط اللعبة بالغت بردة فعلي إني فعلا خفت منها، فهي ضحكت كثير عليّ، وبعدها أجتني وسألتني:

إنت عنجد خفت؟ ولا بس عشان اللعبة..
فقلت إلها لاااا جد كتيييير خفت..

فحكتلي: مرة المس حكتلنا لما نخاف نقرأ آية الكرسي..
يلا اقرأ آية الكرسي عبين ما أنا رايحة اتخبى! ")
.
.
طيّب، عمره خطر ببالكم ليه آية الكرسي تحديدا بنقرأها بأغلب أوقات يومنا؟
الصبح والمسا وقبل النوم ولما نصحى ولما نمرض ونخاف ونحس بوحشة ولما نمشي بطريق عتمة بالليل لحالنا!

آية الكرسي باختصار بتحكيلنا عن إله حيّ قيوم مستغني عن جميع خلقه، ما بنام ولا بنعس، إله بملك السموات والأرض، بعلم بأمور خلقه كلها سواء اللي صارت أو بدها تصير، وكرسيه وسع السموات والأرض..
والسموات والأرض على كبرهم واتساعهم (لَا يَئُودُهُ حِفْظُهُمَا) يعني ما بشق عليه ولا بعجزه إنه يحفظهم، وهو العليّ العظيم!!

فهمت ليه بنقرأ هالآية بكل لحظات يومنا؟!
إذا كان هالإله الحيّ والقيوم ما بعجزه ولا صعب عليه يحفظ السموات والأرض على كبرهم، فمن باب أولى ما بعجزه إنه يحفظك إنت!!
.
.
المهم..
خايفين من الحياة جد؟!!
طيّب اسمعوا نصيحة بنت أختي!

#ARK
#القرآن_الجميل

لو سألتك تكمل هالآية:
كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ (.....)؟!

برافو عليك، الجواب (تَتَّقُونَ)..

بنفس الوقت لو سألتك شو يعني تتقون؟ وقتها ممكن تصفن شوي أو تجاوبني جواب تقليدي مثل كتب الدين في المدرسة، لما كنا نحفظ تعريف التعاون والصدق والأمانة والتقوى ")

تمام.. أنا ما بدي آخد من وقتك كثير..
لكن، ضروري بداية تعرّف إنه الكلمات اللي بتيجي بعد كلمة (لعلّكم) في القرآن غالبا بتمثّل غايات وأهداف القرآن..
فمثلا: لعلكم تشكرون، تعقلون، تذكرون، ترحمون، تتقون..
إلخ من الغايات المدهشة..
.
.
المهم.. غاية التقوى، من الغايات المركزية والمهمة في القرآن..وحتى أسهّل عليك الجواب لفهم أحد أبرز معاني التقوى، شوف هالآية:

وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَانِ.
يعني (البر) بقابله (الإثم)
و(التقوى) بقابلها (العدوان).

ببساطة..التقوى إنك ما تكون إنسان معتدي!
معتدي على نفسك وتهلكها بالآثام..
معتدي على أموال غيرك..
معتدي بلسانك وكلامك عن أعراض الناس وأخطائها!
معتدي بواسطتك على فرصة غيرك!
معتدي على حقوق خواتك وبناتك..!

التقوى إنك ما تظلم نفسك وتظلم غيرك!
.
.
وعدتك ما آخذ من وقتك، لكني بدعوك تبحث عن معادلات التقوى في رحلتك مع القرآن..
ولو بتحب افتح على سورة الأنعام عالآية 151 واقرأ لعند الآية 153..ايوا بالضبط لعند (لعلكم تتقون)..

ما بعرف لو رح تلاحظ إنه الآيات بتحكيلنا إنه ما نعتدي عالنفس البشرية بالقتل ولا على أنفسنا بارتكاب الفواحش ولا على مال الأيتام، ولا نعتدي بالكيل والميزان، ولا نعتدي بمخالفة عهودنا، ولا بأقوالنا وشهاداتنا...

كل هذا (لعلّــــكم تتقون)!
.
.
-----
وإنت صايم بتقدر عفكرة تشرب وتاكل بدون ما حد يشوفك، لكن ما رح تعمل هيك لأنك ببساطة مدرك إنه في رب عظيم شايفك..

ممتاز، هذا الهدف تحديدا اللي بطمح إله شهر رمضان..
إنك تستشعر مراقبة ربنا إلك مش فقط بالأكل والشرب، وكمان لما تقرر تعتدي على نفسك وتظلم غيرك!!

فهمت الآن ليه انكتب عليك الصيام؟!

#القرآن_الجميل
#ARK

أختي بتعشق ورق العنب، أو الدوالي، اليلنجي، اليبرق، أو الدولمة بالتركي ")
وبتطلب من إمي بالأسبوع 10 مرات تطبخها..
وحتى لما اختي تزوجت، صرت أشتغل طلبات عندها لأوصّل دوالي.. ")
.
.
عمره خطر ببالكم ليش الدوالي بتكون معروشة؟
ليه مثلا ما يتركوها عالأرض تمد لحالها؟؟
حتى في القرآن:
وَهُوَ الَّذِي أَنشَأَ جَنَّاتٍ مَّعْرُوشَاتٍ وَغَيْرَ مَعْرُوشَاتٍ وَالنَّخْلَ وَالزَّرْعَ مُخْتَلِفًا أُكُلُهُ..

ببساطة لإنه ورق العنب لو كان عالأرض رح يتمدد بلا اتجاه، ورح يستهلك أوراقه الحلزون واليرقات، وبالتالي فش دوالي.
.
.
طيّب، بتعرفوا إنه الإنسان بطبيعته كائن بتسلّق وبتمدد مثله مثل الدوالي؟!
ولو انترك حر بدون تقليم وتحديد رح يمتد ويخرّب ويصير مؤذي..ولو انترك عالأرض رح يتآكل تماما ويفنى!

وهون بيجي دور الوحي..
بقيدك وبحددك بإطار التشريعات حتى يحفظك ويحفظ غيرك..
وبرفعـــــك عن الأرض حتى ما تتآكل روحك!!
.
.
القرآن بوضّح هالفكرة تمامًا وبضرب إلنا مثال بشخص ربنا رفعه بالوحي..
لكنه للأسف أبى إلا إنّه يلازم الأرض..
وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ (175) وَلَوْ شِئْنَا (لَرَفَعْنَاهُ) بِهَا وَلَٰكِنَّهُ (أَخْلَدَ) إِلَى الْأَرْضِ وَاتَّبَعَ هَوَاهُ..
.
.
حتى القرآن لما يحكيلنا عن الهدى والضلال:
قُلْ مَن يَرْزُقُكُم مِّنَ السَّمَاوَاتِ وَالْأَرْضِ ۖ قُلِ اللَّهُ ۖ
وَإِنَّا أَوْ إِيَّاكُمْ (لَعَلَىٰ هُدًى) أَوْ (فِي ضَلَالٍ) مُّبِينٍ.

في الكلام عن الهــــدى استخدم "علـى" الدالة على الاستعلاء والإرتفاع..
وفي الكلام عن الضلال استخدم "فـــي" الدالة على الإنخفاض والإنغمار..
.
.
المهم..
القرار في النهاية قرارك..
ربنا يسّر إلك الوحي..
يا بترتفع فيه وبتحفظ روحك..
يا بتنسلخ عنه وبتخلُد للأرض وبتتآكل روحك!!

#ARK
#القرآن_الجميل

تواصل معي صديقي وخبرني إنه ضروري أترك كل إشي بإيدي وأجيه هسا هسا!!!

هو كان من فترة مخبرني عن بنت معجب فيها وبراقب فيها وناوي يتقدم إلها..وأول ما لمحته حسيت إنه كثير متوتر ومعجوق، بصراحة من ملامح وجهه تخيلت يقلي إنه البنت خطبت ")!!

فجأة قلي..
اسمع هي إمي حجزت موعد مع أهل البنت، والله متوتر وملخوم ومش عارف شو أعمل؟؟ طيب شو المفروض أحكي؟ عندك فكرة شو ألبس؟ طيّب الواحد بأول زيارة باخد معه إشي؟ عندك فكرة كيف أمشّط؟ طيب يا ترى أبوها شو ممكن يسألني؟؟

اسمع..تخيل حالك أبوها.. شو رح تسألني؟؟ ")

بصراحة وتّرني معه!! وممكن لأول مرة في حياتي بشعر إني مش قادر أساعد حد، وخيالي ما استوعب فكرة إني أتخيل حالي أب وحد يتقدم لبنتي وأفكر شو ممكن أسأله؟؟
لأنه المنطق بحكي قبل ما أفكر بعريس بنتي أفكر أول بإمها! ")
.
.
ومرة صديق ثاني جنّنا عشان عنده موعد في السفارة الأمريكية، وبدو إيانا نساعده شو يحكي ويتصرف ويعمل بالمقابلة..

وأنا مرة كان عندي مقابلة بمكان كثير كنت حاب أشتغل فيه، وقتها قعدت ساعة بزبط بحالي، ولبست من باب الأمانة بدلة مرتبة، حتى إمي وقتها حكتلي: بتجنن!!
-----------------

اللقاءات والمقابلات السابقة سواء كانت للزواج أو السفر أو الشغل، كانت بتحتوي على مشاعر عديدة..
أمل، خوف، رهبة، توتر، قلق، رجاء..وممكن حب!!

لإنه عموما مثل هاللقاءات بترتب عليها مستقبل الإنسان ومصيره..وبتلاقيه بجمع أكبر قدر من المعلومات عشان تعينه..وبكون عايش على أمل الموافقه عليه، أو خوف ورعب من رفضه..
وصحيح بكون متهيب منها..
لكن رغم مشاعره المتناقضة ببذل أقصى جهده يستعد نفسيّا وماديا إلها..
.
.
.
---------
وأنا بقرأ القرآن، لاحظت إنه القرآن كثير بذكّرنا بلقاء ومقابلة من نوع آخر..
والناس بتتفاوت في اسجابتها ونظرتها لهذا اللقاء..

ناس بترجوا هذا اللقاء:
الَّذِينَ يَظُنُّونَ أَنَّهُم مُّلَاقُو رَبِّهِمْ وَأَنَّهُمْ إِلَيْهِ رَاجِعُونَ

وناس غفلت عنه:
إِنَّ الَّذِينَ لاَ يَرْجُونَ لِقَاءَنَا وَرَضُواْ بِالْحَيَاةِ الدُّنْيَا وَاطْمَأَنُّواْ بِهَا وَالَّذِينَ هُمْ عَنْ آيَاتِنَا غَافِلُونَ
.
.
.
صح بيوم رح تقابل البنت اللي نفسك تخطبها..
أو مدير الشركة اللي حاب تشتغل فيها..
أو موظف السفارة للبلد اللي حاب تهاجر إلها..

لكن بيوم رح يكون اللقاء مع (الله)!
فما تنسى...!

#ARK
#القرآن_الجميل

كنت بقلّب ستوريات الوتساب، فلقيت ستوريات أختي كلها عن:
الحمدلله..وإنّه الشوكة يشاكها المؤمن فربنا بغفر خطاياه...وما يصيب المؤمن من هم ولا غم ولا حزن ولا أذى إلا وربنا غفرله...وإنه الحمدلله مصيبة الإنسان مش في دينه...الخ..

صراحة خفت، وقلت أبصر شو صاير مع أختي..
وأنا بعرف أختي مش من النوع اللي بحب يستعرض آلامه وأحزانه ومشاعره، بحسها بتعيش كل شيء مع نفسها، بالرغم من وجود أشياء في حياتها بتستحق إنها تخبر الناس عنها وتتباهى فيها..

المهم..رنيت عليها، خير مالك؟

فقالت: ولا إشي، والستوريات حتى أذكر نفسي بعوض ربنا..
لإنه سيارتي انشخطت، وهسا صار بدها دهان من الجنب!!!!

صراحة ما مسكت حالي وفرطت ضحك، وقلت إلها والله لما شفت ستورياتك والأحاديث قلت هاي صاير معها مصيبة.. طلعت سيارتك مخدوشة؟؟

وقتها حكتلي: طيّب مش أنا هسا انقهرت وزعلت شوي؟
مش نكدت لإنه صار بدي أدهن السيارة وأنا ما عندي وقت وفوق راسي ألف قصة؟
مش هالموقف البسيط أثر على نفسيتي ولو حتى نتفة؟؟

طيّب..معناته إلي أجر يا شاطر..!!
.
.
صراحة كنت كثير مبتسم وأنا بسمع كلامها العفوي، وصفنت لحظتها إنه والله كلامها صح، وفعليا الأحاديث بتحكيلك إنه حتى لو كانت مصيبتك في شوكة وجعها ثواني فإنت مأجور على هذا الشيء..

لكن اللي صدمني أكثر صراحة وأنا ببحث عن الأحاديث اللي بتحكي عن نفس الفكرة، هو حديث ورد عن سيدتنا عائشة:

في يوم سيدتنا عائشة سألت رسول الله عن هالآية:
‏{‏مَنْ يَعْمَلْ سُوءًا يُجْزَ بِهِ‏}‏
فجاوبها صلى الله عليه وسلم:
(‏يا عائشة هذه مبايعة اللّه للعبد مما يصيبه من الحمى والنكبة والشوكة حتى البضاعة فيضعها في كمه فيفزع لها فيجدها في جيبه حتى إن المؤمن ليخرج من ذنوبه كما أن الذهب يخرج من الكير‏)‏.

للتوضيح:
عمرها صارت معك تكون مخبي شيء في جيبتك، وتمد إيدك عشان تطوله وما تلاقيه؟ وقتها بتحس بخوف وهلع إنك تكون ضيعت هالشيء؟؟
بعدها بثواني تمد إيدك على جيبتك التانية أو تفتح شنتتك وتلاقيه..

تمام.. شفت ثواني الهلع والخوف اللي عشتهم عشان فكرت حالك مضيع شيء؟؟

هذا أجر...وكفارة لذنوبك!!!!

-------------

إذا ربنا بغفرلك عشان لحظة نكد عابرة، أو غزة شوكة، أو شخطة السيارة، أو لحظة خوفك من إنك تكون مضيع محفظتك..

فما بالك مرضك وألمك ودموعك وخوفك وفراق أحبابك ولحظات انهيارك..
ما بالك وجعك لما حد يخذلك ويخدش قلبك!!

#القرآن_الجميل
#ARK

تخيّل أجت تستشيرك امرأة متزوجة..
وحكتلك أنا بدي أنفصل عن زوجي!

ولما سألتها عن السبب، كان جوابها:
هو شخص خلوق ومتدين..لكن مرة لمحته بين مجموعة رجال، فكان أقصر وأبشع واحد فيهم... وصراحة حاسة إني ما بحبه ولا بطيقه، وأنا خايفه كرهي إله يكون سبب إني اوقع بالحرام !!!!
.
.
ما تقنعني إنك ما رح تنظر نظرة سلبية اتجاه هالمرأة..
وممكن تحكي عنها مجنونة إنها قررت تنفصل لسبب سخيف مثل هيك..
لأ..وبتحكيلك لو بضل معه بخاف أوقع بالحرام!!
.
.
تمام..
هالموقف مش من نسج الخيال..
هالموقف لزوجة الصحابي الجليل (ثابت بن قيس بن شماس)!
وهي بتوصف قيس: "كنت أرفع الخباء فأراه مقبلًا في القوم أقصرهم قامة، وأقبحهم منظرًا"!!!

وأجت لرسول الله صلى الله عليه وسلم بتطلب الطلاق، وقالت:
يا رسول الله، ثابت بن قيس ما أعتب عليه في خلق ولا دين، ولكني أكره الكفر في الإسلام، فقال رسول الله صلى الله عليه وسلم: أتردين عليه حديقته، قالت: نعم، قال رسول الله صلى الله عليه وسلم: اقبل الحديقة وطلقها تطليقة.
.
.
جواب رسول الله كان جدا منطقي..
حتى لو كان طلبها مش مقنع ولا بعبّر عن سبب حقيقي..
هي خلص اتخذت قراراها..
وهي أدرى بحالها..
وممكن فعلا بقائها معه يكون سبب في ارتكابها لحرام يخزيها ويخزي زوجها..
أكيد ممكن نختلف معها، لكن في النهاية هي حرة وهذا قرارها...!

ممكن تحكيلي بس قرارها مش مقنع؟ وهي هيك دمّرت بيتها؟ طيب شو ذنب قيس؟

تمام..ورسول الله مدرك لهذا الكلام...وحق قيس كان إنه تتنازل عن حقوقها المادية...وبضل هذا قرارها ..
.
.
.
ذكرت هالقصة حتى أخبركم عن خطأ شائع جدا بصير معنا لما نقرر نستشير ناس، سواء كانوا أصدقاء أو مستشارين نفسيين أو تربويين.. أو لما ناس تقرر تستشيرنا..

او لما تكتب مشكلتك على جروب والناس تصير ترد عليك وتحكيلك شو تقرر !!

المستشار مش من وظيفته أبدا يقرر عنك، وأكبر خطأ لما تسأل المستشار أتزوج فلانة أو لا؟ أقبل بفلان ولا لا؟ أسافر ولا أضل بالبلد؟؟ أدرس كذا ولا كذا؟

لإنه المستشار مهما حكيتله تفاصيل رح يضل في تفاصيل غامضة عنه، غير إنه مش قاعد جواتك ولا بعرف رغباتك ومخاوفك وميولاتك وطبيعة شخصيتك وظروفك..
وأكيد ما بعرف الأشياء اللي إنت قررت تخفيها بقصتك!!!

لهيك أكبر خطأ لما المستشار يقرر عن شخص أجى يستشيره..
المستشار وظيفته يفكر مع الشخص بصوت عالي، يضوّي الأماكن المعتمة بتفكيره، يكتب معه إيجابيات وسلبيات كل قرار، يلفت انتباهه لأمور غايبة عنه...وآخر شيء يقله إنت قرر لحالك وتحمّل نتيجة اختيارك!

وفيما لو أجى للمستشار شخص مقرر ومنهي أموره، وهالقرار ما بشكل خطر حقيقي على حياته....فالأصل يتركه براحته..
.
.
.
وأكيد سمعتوا كثير قصص، وياما نساء ورجال انفصلوا مثلا بسبب إنهم سمحوا للناس تقرر عنهم...ولاحقا أدركوا إنه هالقرار دمّر حياتهم..!

لهيك لو أجاك شخص يستشيرك..
اسمعه واسمعه واسمعه..
اسأله عن كل نقطة..
فكر معه بصوت عالي..
وجّه طريقة تفكيره..
حاول تكون صوت عقله لو كان بحكي بعاطفه..
وتكون عاطفته لما يغيب حكم عقله..
اكتب معه سلبيات وإيجابيات قراراته..
احكيله عن الأمور اللي غابت عن باله..

وآخر إشي..
اتركه يقرر لحاله ^^

#ARK

وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا (93)

#سورة_النساء

ملاحظات حول #جريمة_التطبيقية:

- الله يرحم إيمان وينتقم من قاتلها.

- أي شخص بشكل مباشر أو غير مباشر برر للمجرم جريمته، أو اتهم البنت وحمّلها جزء من المسؤولية، أو قال أي عبارة بتعرّض بالبنت وبتعطي سبب للمجرم....فيا ويله..يا ويله.. يا ويله من رب العالمين!!!

إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيـــــــــــــــــمٌ !!!!!

وَقَدْ خَابَ مَنْ حَمَلَ ظُلْمًا!!!!

- أي بنت أو شب بتعرض لأي نوع من التهديد أو الإزعاج أو الإبتزاز ضروري ما يسكت، وفي مليون خيار ممكن الشخص يلجأ إله ويطلب مساعدة، في شرطة، في أهل، في أشخاص أصحاب خبرة في مثل هالقضايا، في ناس أصحاب نفوذ، في دكتور جامعة ممكن يحتوي الموضوع، في أستاذ مدرسة قادر يحكيلك شو تعمل..

شوف الخيار الأنسب إلك، وما تسكت!!!

- أي جهة بتحوّل مثل هيك قضايا لمعارك جانبية، وبتحول الموضوع لصراع ذكر وأنثى، وبتسيء للمجتمع كله من خلال تعميماتها العاطفية، وبتصرفنا عن القضية الرئيسية فهي جهة شريكة بالسوء اللي بننحدر إله...

- أي خطاب ديني بتناسى مثل هيك قضايا وبحكي عنها بشكل عابر وسطحي وعلى استحياء، في الوقت اللي ممكن ياكلوا راسنا أكل عن حق زواج القاصرات!!! فهذا خطاب خائن لله ورسوله!!

- القائمين على القوانين المخزية والمتأثرة بالمنظمات الحقوقية الغربية اللي بترفض القصاص ... دم إيمان وكل ضحية برقبتكم!!

وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ.

- إياكم ننسى دم إيمان مثل ما نسينا دماء اللي سبقوها، وإياكم ننجر لمعارك جانبية تنسينا القضية الأصلية والمتعلقة بحساب المجرمين وتطبيق القصاص وبذل الجهود حتى نحافظ على أرواح الناس بمجتمعنا..

- ما تنسوا إيمان من دعواتكم، وما تنسوا تدعوا لأهلها إنه ربنا يصبرهم..

ولا حول ولا قوة إلا بالله..

#ARK

حين تذهب الجريمة بلا عقاب، فإن العالم يختل، وحين يمضي الظلم بلا ثأر فإن السماء ترمقنا بعين الخزي!

#إعدام_قاتل_التطبيقية

مرجعي الأول في فهم واستيعاب كل القضايا المتعلقة بالمرأة هي (أختي)!

أنا بوثق برأيها وفكرها، فضلا عن كونها أنثى وهي أدرى وأعلم وأفهم ببنات جنسها..

وفي كل قضيّة بتشكِل عليّ أثناء متابعتي للحروب الطاحنة ما بين الذكر والأنثى على السوشال ميديا... ببعتلها:
أختي النجدة ^^

مرة ناقشتي أختي بموضوع (عمل المرأة) وحكتلي إنها حضرت مجموعة فيديوهات لمشايخ ودعاة بحذروا من موضوع عمل المرأة..أو بحكوا عن أثره على شخصيتها..

وحكتلي من باب الإنصاف بتفق مع جزء من كلامهم، وفعلا في جزء من البنات عملهم جلب مفاسد لحياتهم أكثر من المصالح، وإنه في منهم تدمرت حياتهم وحياة أولادهم، غير اللي تنازلوا وفقدوا مبادئهم..

وأنا كإمرأة عاملة بعترف إني شفت مصايب..
لكــــــــــــــن بنفس الوقت يا ترى ما بعرفوا إنه كم هائل من البنات لو ما اشتغلوا ما في مين يصرف عليهم؟
وإنه في بنات لو ما اشتغلوا ما معهم حق لبسة جديدة؟!
وإنه كثير بنات اشتغلوا لإنه إخوانهم أكلوا حقهم بالمصروف والورثة..
وإنه كثير بنات بلمحوا زوجات إخوانهم كل مرة بلبسة جديدة وهمّه عطول السنة بأكم لبسة..!

قالتي بالله عليك..شو شعور البنت لما تشوف صور إخوانها كل يوم بمطعم ومحل وسفر وهي بتسأل لو المادة متوفرة pdf لإنه ما معها مصاري تطبعها..!!

حكتلي أنا آه مع تحذير المرأة وتذكيرها بمخافة ربنا وبالحدود أثناء عملها، ومع إنه لو مش مضطرة للعمل فتربية أولادها أهم في هذا الزمن المخيف..

لكني ما بحب الخطابات اللي فعلا بعيدة عن واقع مجتمعنا، واللي بتحكي من برج عاجي، وما عندها أدنى فكرة عن واقع الناس وصعوبة ظروفها وحياتها..

حكتلي صدّقني كمّ هائل من البنات أحب ما على قلبهم يقعدوا مع ولادهم، بس ببساطة لو ما اشتغلوا ما معهم يطعموا ولادهم!!

والإشي الأهم من كلام أختي، لما حكتلي إنه في المقابل ما بتذكر إني سمعت كلام عن ضوابط العمل عند الرجال، ولا كلام بحذر الرجال من استغلال النساء في بيئة العمل أو وعيد ربنا لكل رجل دمّر حياة بنت، أو شو عقاب الرجل اللي أكل مال حرام لما أكل حق خواته من المصروف والورثة..!!

أكيد في كثير ناس حكت هيك، لكني بصراحة ما سمعت!
أو لو سمعت بتقدر تقارنة بكميّة الخطاب الموجه للمرأة؟!

إنت بصراحة عمرك سمعت إشي؟!

قلتها: لأ صراحة..أو ممكن مرة أو مرتين بحياتي..
.
.
والإشي الأهم كمان لما قالت: يا ريت الخطابات تكون موجّه كمان للحكومات الفاسدة اللي جوعّت الناس وأفقرتها واضطرتها تترك ولادها عشان تدرسهم وتصرف عليهم..

أصل أغلب مشاكلنا سياسية، وإحنا بنتفشش ببعض وبنخوض معارك وصراعات وهمية لإنه مش قادرين نواجه المسبب الأول لأغلب أشكال الظلم بمجتمعنا..!!
.
.
.....
.....
المهم..
كرجل بدك تقدم خطاب ديني أو دعوي أو حتى سياسي وإعلامي ومهتم بقضايا وصراعات الرجل والمرأة..

نصيحة...أقعد مع أختك ^^

#ARK

كشخص بتمتلك حساب عالسوشال ميديا، فإنت للأسف معرّض جدًا للإصابة بما يسمى Compassion fatigue = إعياء التعاطف!

فإنت خلال أقل من أسبوع شفت فيديو لشخص بذبح طالبة بمصر، وسمعت عن شخص أطلق 6 رصاصات على طالبة في الأردن، وشخص طعن زوجته 16 طعنة في الإمارات، وبنات صف عاشر حاولوا يرموا زميلتهم من السطح، وأكيد بالصدفة طلع إلك أكم بوست وفيديو عن عيلة محتاجة، أو حالة وفاة لشب بأول عمره، أو فيديو لبنت سورية بتحكيلنا شو صار معها بالسجن..!!

هذا غير المواقف الشخصية اللي بتمر فيها، لما صاحبك أجى يفضفض إلك عن مشكلة بمر فيها، أو صديقتك حكت معِك بتبكي عشان موقف سيء مرّت فيه..
.
.
وإنت كنت (تتعاطف) مع كل المواقف السابقة، وكنت تمر بمشاعر الحزن والألم وممكن حتى الخوف!

تعاطفك شيء جميل، وهذا دليل إنسانيتك، لكنّك للأسف لو ضليتك تتعامل مع هيك قصص بشكل يومي، فإنت معرَض للإصابة بإعياء التعاطف..

وهو عبارة عن استنزاف عاطفي وجسدي بنتج عن الاهتمام بالآخرين بشكل متواصل ومتكرر، ويمكن يصير الشخص المفرط في عاطفته غير مبالي بالآخرين وقصصهم، أو بجد صعوبة بالاستمرار في الاهتمام بالآخرين وبفضل يبعد نفسه عنهم.

إعياء التعاطف بوصلك لحالة من اللامبالاة إتجاه أي قصة بتسمعها، أو مشاعر غضب وحقد رهيبة في داخلك، واللي ممكن ومن غير وعي تعكسها على أقرب الناس إلك، وتدمر وتخسر علاقاتك..!

وممكن يصيبك إعياء التعاطف في حال كان في شخص بحياتك بنتظر منك (دااااائما) تهتم فيه وتسمع إله وتحل مشاكله وتكون سنده وعونه وأمانه وقت خوفه..
وممكن يحملك مسؤولية أي أذى او مكروه بصيبه لأنك ما كنت معه لحظتها..
هذا مع الوقت ممكن يستنزف طاقتك وتعاطفك وبالتالي بلحظة تنهي كل شيء متعلق فيه، أو تشعر بنوع من اللامبالاة اتجاهه..

وإعياء التعاطف ممكن يسبب إلك مشاكل نفسية، مثل: التوتر، والشعور باليأس والحزن والإكتئاب، والعزلة، وتأنيب الضمير ولوم الذات..

وكمان ممكن يسبب إلك مشاكل جسدية، مثل: الصداع، والغثيان، ومشاكل في الشهية والجهاز الهضمي والنوم..
.
.
فيما مضى كانوا المعرضين للإصابة بإعياء التعاطف همّه الناس اللي مجال عملهم متعلق بمشاكل الناس مباشرة، مثل المعالجين النفسيين أو العاملين في المنظمات الإنسانية، لكن الآن ومع السوشال ميديا صرنا كلنا معرضين للإصابة بإعياء التعاطف!!
.
.
طيّب، والحل؟!

- ضروري تمتلك وعي اتجاه حقيقة هالدنيا!
وإنها دار شقاء وبلاء مهما حاول مدربين التنمية البشرية يقنعوك بعكس هالكلام ^^
ولا يعني هالكلام إنه الدنيا ما فيها أشياء حلوة، اكيد فيها لكن هالحقيقة رح تساعدك في موازنة انفعالاتك وقت الكوارث والصدمات.

- إنت مش مطالب بإيجاد جواب ومعنى وحكمة لكل إشي بصير، بس إنت مطالب تتحمّل وتحترم عجزك وضعفك عن إدراك معنى وحكمة من كل إشي بصير!

- أي قصة بتسمعها وبتثير تعاطفك، فإنت عليك تسأل نفسك شو ممكن أقدم؟ بقدر أدعي أو أتصدق، أو أواسي صاحب المصيبة، أو استثمر القصة في توعية الناس حولي..
وبالتالي قدّم الشيء اللي بتقدر عليه، ولو ما في إشي تقدمه فلا تلوم نفسك لإنه ما إلك ذنب بأي إشي صار ورح يصير..

- مش غلط كل فترة تعتزل السوشال ميديا تماما، بحيث تستعيد توزانك وترتب أولوياتك وتفكر بإنجازك وما تعيش حياتك فقط على مبدأ (ردات الفعل) لإنه هذا الشيء مع الوقت رح يستنزفك، فلا إنت ساعدت أصحاب المصائب ولا أنجزت شيء بحياتك..

- ما تنسى نفسك! وتذكر إنك بشر وبتمر بأوقات صعبة وظروف ضاغطة وفترات فتور، وبالتالي وقتها الأولوية تتعاطف مع نفسك وما تهلكها بفرط التعاطف مع غيرك..

- لو صادفت ناس بشتركوا معك بنفس تعاطفك، فمش غلط تقعد معهم وتحكي وتفضفض وتتناقش وتنفّس عن كل إشي جواتك..
ولو ما لقيت فضفض مع نفسك..
مثل ما بقول ابن حزم عن الناس اللي ما وجدوا شخص يفضفضوا إله:
فكان ينفرد في المكان النازح عن الأنيس، ويناجي الهواء، ويكلم الأرض، ويجد في ذلك راحة كما يجد المريض في التأوه، والمحزون في الزفير، فإن الهموم إذا ترادفت في القلب ضاق بها، فإن لم يفض منها شيء باللسان، لم يلبث أن يهلك غمّا ويموت أسفا...!!

- في حال أتيحت إلك الفرصة لممارسة نشاط مبهج، فلا تلوم نفسك إنك طالع تنبسط وغيرك بتوجّع وبتألم.. بالعكس اطلع وغير جوّ وانبسط..
وما تنسى كلام أبو الدرداء: إني لأستجم نفسي بالشيء من اللهو، لأستعين به على الحق.

- أصعب انواع التعاطف لما يكون تعاطفك متعلق بقصة شخص أو أشخاص مظلومين ..وبعرف شعور صعب تصادف هالكم الهائل من الظلم، ومقدر شعورك بالقهر لما تغيب قدرتنا عالإنتقام..
لكن أرجوك لا تنسى إنه القرآن بخبرنا عن (يوم)،
يوم ربنا فيه رح يروي جوعنا القارص وظمأنا القاتل في الإنتقام..
*وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ (لِيَوْمٍ) تَشْخَصُ فِيهِ الْأَبْصَارُ.
*(الْيَوْمَ) تُجْزَىٰ كُلُّ نَفْسٍ بِمَا كَسَبَتْ ۚ لَا ظُلْمَ (الْيَوْمَ ۚ) إِنَّ اللَّهَ سَرِيعُ الْحِسَابِ.

وما تنسى إنه مش شرط يصير الإنتقام من كل ظالم في الدنيا..لكن كون على يقين إنه حيصير في ذلك (اليوم) !

- ما تنسى نصيحة سلمان العودة:
لكي لا تصاب بالجنون أو الاكتئاب من هذه الأحداث الغريبة المتصاعدة..
حافظ على أورادك وصلواتك ومناجاتك وثقتك بربك.

- اختار وقت يكون قلبك فيه حاضر، وإحكي مع (الله)!
وقتها ربنا رح يغرس في روحك فكرة إنه هو أرحم منك بعباده.. وإنه رحمته وسعت كل شيء..ومصائب الناس ودموعها وآهاتها شيء..

بس إنت ما تستعجل رحمته ونصرته..ولا تستعجل فهم حكمته..

انخلقنا ليختبرنا مش لنختبره !

#ARK

هل سبق وخطرلك تعمل خطتك السنوية بالتاريخ الهجري؟!
ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر، واللي غالبا أول مرة بتسمع فيه بحياتك! ")

لكـــــن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!
الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..
معظم تواريخنا الإسلامية مرتبطة (بالعمل والإنجاز)!

إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!
ما بهمنا جدا تواريخ ميلادهم...لكن بهمنا تواريخ ميلاد قلوبهم لمّا لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لسيدنا عمر يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..
لكنّه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا (فتح لك) من غير (هجرة)..!

#ARK
#1444

مرة وقفتنا الشرطة وإحنا بسيارة صاحبي..
طلع نازل تعميم على سيارته لأنه في شخص مقدّم شكوى عليه..

صاحبي انصدم..وقال للشرطي آه من فترة عملت حادث، والشخص اللي ضربت سيارته قلي ما في داعي نعمل كروكة، وخلص أعطيني مصاري وأنا بصلح سيارتي ..ووقتها أعطيته مصاري وانتهى الموضوع..

لكن للأسف تبين إلنا إنه هالشخص بعد ما أخذ المصاري راح عالشرطة وقدّم شكوى إنه هالسيارة ضربته وهربت..

صاحبي كان معه رقم هالشخص، لإنه بعد الحادث احتفظ برقمه وقله لو كلّف تصليح السيارة أعلى من المبلغ اللي أعطيتك اياه خبرني عشان أحاسبك..

رن صاحبي عالرجل وطلب يشوفه، صراحة خطرلي إنه صاحبي ناوي يضربه..
صار الشخص يتهرب وأصرّ عليه صاحبي يشوفه وقله تعال عالمغفر عشان تكون مطمّن..وصدقني ما رح يصير إلا كل خير..
.
.
استغربت جدًا لما صاحبي قال لصاحب السيارة:
عندك ولاد؟؟
فالرجل قله آه عندي 3 أولاد..ليه؟!

قله صاحبي:
اسمع...
الله بيني وبينك..
وإنت عارف إنه شكوتك تبلّي وزور وظلم..

انفعل صاحب السيارة وصار يقله لاااا إنت بعد الحادث عطلتني عن شغلي وأنا حقي أشكي و و و و

صاحبي سكّته وقله أنا مش جاي أناقشك..
أنا بقلك (الله بيني وبينك) وإنت عارف إنه شكوتك ظلم..

اسمعني منيح..
بتروح بتسحب شكوتك، واحكيلي كم كان رح يطلعلك مصاري من هالشكوى، وأنا مستعد أدفعلك اياهم عن طيب خاطر منّي..

ولا إنك تطعمي ولادك حرام!!!!

لو أخدت المصاري من الشكوى رح يكون مال حرام..
لكن روح اسحبها وأنا رح أعطيك المصاري حلال زلال عليك..

ورجع كرر:
مش قلتلي عندك 3 أولاد؟
بترجاك ما تطعميهم حرام!!
.
.
.
ما كنت متوقع إنه هالدنيا القاسية ممكن تكرم عليّ بموقف مثل هيك!
بكى صاحب السيارة وقله:
الله يخزي الشيطان والله كانت لحظة ضعف وكنت مزنوق عشوية مصاري..

بس أنا ما رح أنسى معروفك طول حياتي..
ووعد ما بيوم أدخّل عولادي قرش حرام..
.
.
.
كنت صافن بصاحبي والأرض كلها مش واسعة دهشتي وفرحتي بموقفه!
وقلبي ابتسم إني صادفت بحياتي قلب سماوي مثل قلبه..!!

{وَسَارِعُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ * الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ}

#القرآن_الجميل
#ARK

في الغالب كل اللي تخرجوا الأسابيع الماضية من الجامعة بمروا الآن بمشاعر غريبة، مشاعر مختلفة تماما عن فرحتهم وهمّه بأشروا لأهلهم إنّه هينا هووون، شفتونا؟؟؟

وفي منهم الآن بتساءل: إنه معقول هالفرحة اللي كنت بنتظرها من سنوات..طلعت بس هيك؟؟
روب تخرج، وحفلة، ولمّة أهل، وصور..وبس؟!

في الحقيقة رح يصابوا بنوع من الخيبة لما يكتشفوا إنه تصورهم عن فرحة التخرج وهمّه على مقاعد الدراسة ما طلعت بتشبه أبدا فرحتهم لما تخرجوا فعلا!!

نفس فكرة عروسين بعد أيام من زواجهم، واللي ممكن يتساءلوا في سرهم: إنه معقول الموضوع طلع بس هيك؟!

أو مثل شخص نجح بشيء صارله بطمح وبسعى إله شهور وسنوات، ومجرد ما حققه بتنتابه مشاعر غريبة، وبتساءل يا ترى ليه أنا الآن مش كثير سعيد؟ وممكن يتساءل ليه أنا حزين؟!!

بالضبط نفس ما قال (جو) في فيلم الإنيميشن (Soul) لما وصل لشو كان بحلم، وقتها قال:

it is just I have been waiting on this day for my entire life I thought I'd feel different !
.
.
.
ما سبق بتشير إله بعض كتب علم النفس، بمصطلح:
( اكتئاب ما بعد النجاح | Post-success depression )

وهو مصطلح بتناول الناس اللي كانوا يطمحوا لهدف وحلم في حياتهم، ومجرد ما وصلوا إله صابتهم أعراض اكتئاب غير متوقعة وغير مفهومة!
وبالتالي ما شعروا بطعم النجاح، وما فرحوا مثل ما اتوقعوا إنهم يفرحوا..وبالعكس حزنوا وييأسوا وشعروا بسخافة رحلتهم وما شافوا أي معنى لتجربتهم..

بعض التفسيرات (لإكتئاب ما بعد النجاح) إنه الإنسان بعد ما يوصل لهدفه بشعر إنه ما كان هذا هدفه، وإنه الشيء ما كان بستحق أصلا، وممكن هذا برجع لطبيعة الإنسان غير القنوعة..

وفي تفسيرات بتحيل الموضوع لفجوة روحية داخل الإنسان، ومستحيل أي انجاز من إنجازات الدنيا يعبيها، وإنه الإنسان مهما سعى وحاول بضل في داخله ثُقب ما بملؤه إلا الله، وحتى البعض أطلق عليه (ثقــــــــب الله) !!

وفي تفسيرات بتحكيلنا إنه الموضوع برجع ببساطة لنسبية السعادة، وإنه ما في سعادة كاملة أبدا، وإنه كل أفراح الدنيا مؤقتة ولحظية وما في سعادة مطلقة..

وفي تفسيرات بتشير لفكرة (أصالة الحزن) فينا..وإنه الحزن شيء متجذر فينا عكس السعادة والفرح باعتبارها مجرد أشياء عابرة وطارئة ووقعها خفيف على نفوسنا..
وممكن هذا بفسر تأثرنا وتفاعلنا وتذكرنا للقصص والأفلام الحزينة أكثر من السعيدة.
.
.
المهم..
عمركم فكرتوا ليه يوم الخميس أحلى من يوم الجمعة؟
ليه فترة الخطبة أحلى من الزواج؟
ليه الناس الداخلين عالمطعم مبسوطين أكتر من الطالعين؟
ليه الطالب على مقاعد الدراسة، أسعد من الخريج؟

ببساطة إحنا بنستمتع برحلتنا نحو السعادة، أكثر من استمتاعنا بلحظة السعادة نفسها !!!
إحنا بدهشنا توقنا للحلم المجهول، أكثر من الحلم نفسه!
إحنا بنضحك من قلبنا وإحنا بطريق الرحلة، أكثر من الرحلة نفسها..!

ببساطة السعادة في الرحلة، مش في الوصول!
السعادة في السعي، مش في النتيجة!

لهيك كثير ناس للأسف بتنسى تعيش سعادة سعيها ورحلتها وطريقها..
وبتعيش بتوتر وخوف وقلق..
ولما توصل لحلمها بتكتشف إنه السعادة كانت بالرحلة، ويا ريت عشنا تفاصيلها !!
.
.

وأكيد يفترض ما ننسى إنه ما في سعادة مطلقة في الدنيا، ولا يعني هذا إنه ما نعيشها، لكن مجرد وعينا لهذا الشيء بجعلنا أكثر حكمة، وأكثر صدق وتواضع في لحظات سعادتنا...

القرآن ذكر السعادة الحقيقة مرتين:
- يَوْمَ يَأْتِ لا تَكَلَّمُ نَفْسٌ إِلا بِإِذْنِهِ فَمِنْهُمْ شَقِيٌّ وَسَعِيدٌ(105)
- وَأَمَّا الَّذِينَ سُعِدُوا فَفِي الْجَنَّةِ خَالِدِينَ فِيهَا مَا دَامَتِ السَّمَاوَاتُ وَالأَرْضُ إِلا مَا شَاءَ رَبُّكَ عَطَاءً غَيْرَ مَجْذُوذٍ(108)

الآية الأولى بيّنت زمن السعادة (يوم القيامة).
والآية الثانية بيّنت مكان السعادة (الجنة).

القرآن بطلب منا نكون أكثر هدوء وواقعية وحكمة..القرآن بحكيلنا بصراحة:
ما تبحثوا عن السعادة المطلقة في غير مكانها..
ولا تنتظروها في غير أوانها..!!

#القرآن_الجميل
#ARK

أختي بتحكيلي مش قادرة أصدق كيف مع كل جريمة أو اعتداء أو تحرش بتتعرض إله بنت بنقرأ تعليقات بتلوم البنت وبتحملها المسؤولية!!!

لااا اللي قاهرني أكثر.. إنه حتى في كثير بنات بلوموا البنت الضحية!!!

وتعليقاتهم ما بتفرق عن تعليقات بعض الرجال إنه أبصر شو عاملة حتى قتلها؟ طيب شو مطلّعها بهيك وقت؟ أبصر شو كانت لابسة حتى يتحرشوا فيها ..الخ!!

.
.
حكيت لأختي بتفق معك إنه لما تكون الضحية بنت بكون اللوم عليها أكبر، لكن بدي أحكيلك اشي في علم النفس الإجتماعي:

فكرة "لوم الضحية" مش حاضرة فقط بموضوع البنات، إحنا لما حد ينسرق، بنحكي: كيف وليش ما انتبه؟
لما بنت صغيرة تنخطف، بنحكي: وين إمها؟
لما حد يندعس، بنحكي: طيب ليه ما انتبه قبل ما يقطع الشارع..
مش من فترة أب وأم فقدوا أطفالهم الخمسة؟؟ ما لاحظتي كيف أغلب التعليقات كانت: وين أهلهم لما صار الحريق؟!

ببساطة فكرة "لوم الضحية" حاضرة بكل المناسبات والظروف سواء كانت الضحية بنت أو طفل أو رجل أو عيلة..

وسبب لومنا للضحية باختصار:
إنه إحنا كبشر لما نسمع بأي جريمة أو حادث بنحاول نطمئن أنفسنا بأي شكل من الأشكال..وبنحاول نقنع أنفسنا إنه اللي صار مع هالضحايا ما رح يصير معنا... وبندّعي بكل ثقة إنه هالضحايا تعرضت لاعتداء وجريمة أو حادث نظرا لعيب وخطأ صدر منهم..
وإحنا مش زيهم... وبالتالي ما رح نتعرض لجريمة أو حادث مثلهم!!

أختي كانت صافنة..وحكتلي ممكن توضح أكثر؟!

قلتلها إحنا عقلنا بحاول يخفي عنّا الحقيقة اللي ممكن تهدد حياتنا وسلامتنا، وبالتالي عقلنا مستعد يخلق أي عيب أو خطأ صدر من الضحية، عشان يريحنا ويطمّنا إنه ما رح يصير معنا مثل ما صار معها، لإنه إحنا أخذنا بالأسباب وانتبهنا عكس الضحية!

يعني لو سألتك شو الأصعب عليك، تسمعي قصة بنت انقتلت لإنه زوجها اكتشف خيانتها، ولا قصة بنت زوجها قتلها من غير أي سبب؟!

أكيد القصتين بشعات، لكن فكرة إنه بنت تنقتل من غير سبب شيء مخيف أكثر، لهيك رح تلاقي (حتى البنات) عقلهم بحاول يبحث عن أي خطأ وسوء تصرف صدر من البنت لحتى انقتلت، حتى يطمّنوا نفسهم إنهم ما رح يكونوا بيوم مكان هالضحية..!

نفس الفكرة، صعب على أي أم تسمع عن طفلة انخطفت من غير أي تقصير من أمها، وكثير الموضوع بكون أسهل عليها لما تسمع إنه الحق والتقصير كان من أمها..

طيب بتعرفي شو موقف الناس لما يعرفوا إنه الضحية بريئة تماما، وما صدر منها أي خطأ أو سوء تصرف؟!
ببساطة بستخدموا تحيز اسمه "الإدراك المتأخر"، يعني بصيروا يحكوا إنه هالضحية فشلت تتنبأ بالاعتداء والجريمة اللي تعرضت إلها، وإنه الله يسامحها ليه ما راحت لأهلها؟ ليه ضلت عايشة معه؟ ليه ما خبرت الشرطة من الأول؟
طيب كيف هالأم ما انتبهت للشخص اللي خطف بنتها؟
كيف الأم والأب ما سمعوا صراخ أطفالهم قبل ما ينحرقوا..

وبنرجع من جديد نلوم هالضحايا، وبنرجع نقنع أنفسنا إنه لو كنا محلهم كنّا رح نتصرف على نحو مختلف تماما، وكنا رح نقدر نتنبأ بشو ممكن يصير معنا..
.
.
.
إحنا بنلوم الضحية لإنه ما بدنا نعترف ببشاعة العالم اللي بنعيش فيه، وعقولنا ما بدها تتخيل فكرة إنه كلنا معرضين نكون بيوم محلها..

ما في زوجة بتستوعب فكرة إنها تنقتل من غير سبب..
ولا أم بتستوعب فكرة إنه ممكن حد يخطف بنتها..
ولا أب بتخيل فكرة أنه ممكن يفقد كل أطفاله بلحظة..

إحنا صح بنتعاطف مع كل ضحية.. لكن في داخلنا صوت بلومها...صوت بحملها مسؤولية شو صار معها..
في داخلنا صوت بحاول يطمنّا إنه مش ممكن بيوم نكون محلها..
صوت دايما بقنعنا إنه الحق كله على الضحية، وإنه الدور الجاي مستحيييل يكون علينا..

إحنا أشطر وأذكى من إنه حد يسرق مصارينا.. أو نسمح لحد يعتدي على أبنائنا.. أو نقطع الشارع من غير ما نشوف حولينا..أو إنه ننام وننسى نتفقد الكهرباء بغرفة أطفالنا.. إحنا أوعى وأنضج إنه نرتكب خطأ ممكن يسبب بقتلنا..

إحنا غير عن كل هالضحايا..
.
.

بسأل أختي: بتعرفي شو هالصوت اللاواعي اللي بنلوم فيه أي ضحية؟؟

صفنت..

آه...صوت خوفنا!!!

#ARK

مرة لما مات أحد مشاهير السوشال ميديا (الله يرحمه) صارت ضجة كبيرة وكان الموقف صادم لأغلب الناس..

بعد موته حضرت أكم فيديو لأصدقاء المتوفي بحكوا عنه، وللأسف كثير انزعجت وشفت إنه حزنهم ودموعهم وتأثرهم ((مصطنع)) !!
أكيد في حزن، لكن الطاغي جدا هو حرصهم على استعطاف الناس وبالتالي زيادة متابعينهم...!!!

بعدها بفترة صرت كل فترة أتابع مقابلة مع أحد مشاهير السوشال ميديا، وكنت دائما أستغرب إنهم بنطلقوا من فكرة إنهم (ضحية) وإنه في ناس أذوهم وخذلوهم وإنه نجاحهم أكبر رد عليهم..
وسبحان الله أغلبهم حبيباتهم تركوهم وخذلوهم!!!

هذا الخطاب طبعا رح تلاقي مليون شب وبنت تأثروا فيه، ورح تلاقيهم اقتطعوا هالكلام ونشروه ريلز مع موسيقى حزينة..
ومع الوقت رح نصير ننظر لهذا المشهور باعتباره نجح بعد فشل، وقام بعد ما سقط، وانتصر بعد خذلان..
.
.
طيّب ليه هيك بصير؟
ببساطة الشخص المشهور مع الوقت بكون كل همّه حب الناس وتأثرهم فيه، وأسرع طريقة حتى توصل لهذا الشيء إنك تستعطفهم..
حتى لو كان الاستعطاف على حساب موضوع مخيف جدا!!
على حساب موت صديقك المقرب...

في دراسات نفسية بتحكي إنه أغلب اللي بعيشوا دور الضحية وخصوصا من المشاهير همّه في الحقيقة ما كانوا ضحية لشيء!!!
لكنهم استحضروا موقف عابر كلنا كبشر ممكن نمر فيه، وهالموقف كان عابر في حياتهم وما أثر عليهم وتجاوزوه تماما.. لكنهم فجأة بستحضروه بشكل درامي أمام الجمهور حتى يكسبوا تعاطفهم..

ما بتلاحظوا انه قصص النجاح اللي بنسمعها أغلبها متعلق بحبيب خذل ..وصديق هجر ..واستاذ ضربني بالمدرسة ..وطلاب تنمروا علي.. وصاحبي مات بحادث سيارة !!

والناس بتنخدع بحججهم الأخلاقية اللي يستخدموها ليظهروا عمق الألم اللي مروا فيه علما إنهم في الحقيقة مش ضحية لأي شيء، وإنهم كملوا حياتهم طبيعي بعد هالألم..
لكن فجأة بوهموك إنه هالحدث هو كل شيء في حياتهم..

وهذا اللي صار يدفعنا أول ما ننجح إنه نستحضر شيء سيء مرينا فيه بطريقنا، علما ما كان لهدرجة سيء، وأصلا تجاوزناه زمان، ونجاحنا ما كان مرتبط فيه، لكن خلص هيك دراما أكثر ^^

هذا النوع من المشاهير ما بتورع عن استخدام أي وسيلة أمامه حتى يزيد معجبيته ومحبينه..

فعادي جدا تلاقيه برمضان بحكي في الدين، وببكي من خشية الله، بالضبط مثل ما بكى على موت صاحبه..

طيب وهالدموع وين حضورها في سلوكك وحياتك ومحتواك لاحقا ؟!
لا شيء طبعا..!
.
.
.
المهم..
الشهرة مرض حقيقي ..
وبعرف إنه ممكن بيوم يراودك شعور إنك حاب تكون مشهور..
طبيعي تشعر هيك، لكن أرجوك ما تسمح لهذا الشعور يسيطر عليك..

في أنبياء ما آمن فيهم إلا رجل ورجلين، وأنبياء ما آمن فيهم حد..!!
وصدقني مهما كنت مشهور، في اللحظة اللي بتموت فيها الكل رح ينساك، ورح تتحول لمجرد ذكرى عابرة، ورح تلتفت وجوه الناس لغيرك..

لهيك نصيحة اهتم بوجه واحد فقط..
وجه ربنا ...وهو رح يكفيك ويغنيك عن كل الوجوه..!!
.
.
ولا تنسى إنه مش مهم تتسلّط عليك الأضواء..
لكن المهم ما تغيب عنك الأنوار !!!!

#ARK

مرة اشتغلت في مكان عام لجمع التبرعات..
كان معي بروشورات وصندوق ولافتة بتوضّح الحملة..

بصراحة كنت لما ألمح شخص عليه علامات الدين أقوم بسرعة أعطيه بروشور أو أنادي عليه عشان أشرح إله عن الحملة..
ونفس الفكرة لأي بنت كان مظهرها ملتزم..

في المقابل كنت أستثني أي حد هيئته وشكله بعيد عن الدين تماما، لدرجة لما كان شخص يوقف قدامي يقرأ عن الحملة أو يسألني عنها ما كنت أعطيه هالاهتمام لقناعتي إنه بسأل بس فضول وإنه هالناس ما بتهتم بهيك حملات أصلا..

ضليت أيام من غير ما أجمع (شلن) واحد، مع العلم إنه الحملة اللي بشتغل معها مرخصة وقانونية ومشهورة عند كثير ناس حتى..
.
.
بالصدفة وأنا مروح عالبيت فتحت كتاب على مكتبي كنت اشتريته من أكثر من سنة وما قرأته، ولقيت في الكتاب قصة قديمة لمندوب مبيعات في شركة نيسان، وكان هالشخص يبيع أكثر من 20 سيارة شهريا، وهذا الرقم يعتبر مهول وقتها، خصوصا إنه ببيع سلعة غالية جدا، مش ثلاجة ولا غسالة ولا خلاط، ببيع سيارات!

هذا المندوب لفت انتباه علماء النفس والتسويق، وأجروا معاه مجموعة مقابلات حتى يفهموا هو شو بعمل حتى يقدر يبيع هالكم من السيارات شهريا..

وقتها ببساطة جاوب:
لا يمكنك إصدار الحكم على الناس في هذا العمل، إن إصدار الأحكام المسبقة بمثابة قُبلة الموت. يجب عليك إعطاء الجميع أفضل ما لديك، فالبائع عديم الخبرة ينظر إلى العميل ويقول "يبدو أن هذا الشخص لا يستطيع شراء سيارة.

ببساطة كان هالمندوب يعطي اهتمام لكل عميل من غير ما يحكم عليه، وبحكي ما كنت أفرق بين شب صغير أو رجل أسود أو مزارع رث الثياب أو غني أجي عالمعرض ببدلته الفخمة، ببساطة كنت أمنحهم جميعا نفس الاهتمام..
.
.
ثاني يوم لما رحت للشغل ضلت ببالي فكرة هالمندوب إني ما أحكم على حد أبدا، العجيب والغريب إنه بيوم واحد جمعت اللي كان مطلوب مني أجمعه بأسابيع!
ببساطة اهتميت بالكل..

واكتشفت إنه الشب الفايع أبو السنسال والوشم كان ببحث عن أي خير يقدمه، والبنت اللي استبعدت تماما نظرا لهيئتها إنه هالحملة ممكن تلفتها أجت ودفعت مبلغ كبير..
في منهم بكى لما كنت اوريه فيديوهات للحملة اللي بنجمع إلها..

الغريب إنه المبلغ اللي جمعته من الناس اللي هيئتهم ملتزمة لا يكاد يذكر، لا يعني إنه الملتزمين ما بتبرعوا، ممكن لإنه متاح إلهم كثير مجالات للتبرع في حياتهم على عكس غيرهم..
غير إنه في دراسات بتحكي إنه الشخص اللي بتذكر مناسبة تبرع فيها، بكون أقل بنسبة 60% إنه يتبرع مقارنة بشخص ما تذكر متى أخر مرة تبرع فيها..
.
.
المهم..
بعيدا عن السيارات وحملة جمع التبرعات، خطرلي إنه كيف اغلب خطاباتنا بتنطلق من فكرة (الحكم على الآخرين) والنظر للسوء اللي بصدر منهم، كثير خطابات للأسف هدفها فقط تثبت ضلال وخطأ وسوء الآخرين، وقليل خطابات هدفها فعلا تكسبهم وتحنن قلوبهم لاستقبال الوحي..
وكثير بننسى إنه هالناس غالبا ممكن ما توفرت إلهم بيئة تساعدهم أو حتى تخبرهم ولو بشكل بسيط عن دينهم..
.
.

مرة بالشغل كنت بصلي، ولما خلصت الصلاة حكتلي بنت بتعرف عمره ما حد حكالي عن الصلاة في حياتي.. وبحسرة قالت: شو نفسي أعرف الله!

صفنت وقتها إنه كيف كنت أتعالى بنظرتي على هالبنت وغيرها وأشوف نفسي أفضل منهم، طيّب أنا أبوي كان يجرني معه جرّ للمسجد..
وهي ما صادفت في حياتها حد يحكي معها.. !!
.
.
كثير ناس ممكن نحكم ونسيء ونحقد وندعي ونتعالى عليها، وبننسى إنه هالناس ممكن بدهم بس كلمة، بدهم أي حد ياخد بإيدهم لربنا، بدهم أي باب خير يخطوا فيه خطوة..
ممكن هالناس بآخر الليل بتقلبوا بفراشهم وبقولوا بحسرة:
شو نفسنا نقرب من الله..!

وللأسف..بدل ما نمد إيدينا إلهم، بنأشر بأصابعنا وبنحكم عليهم !!!!

ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ ۖ وَجَادِلْهُم بِالَّتِي هِيَ أَحْسَنُ ۚ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ ۖ وَهُوَ أَعْلَمُ بِالْمُهْتَدِينَ

#القرآن_الجميل
#ARK

الآن في جروبات "استشارة" عالسوشال ميديا..
بتقدر تخفي اسمك لو استشارتك محرجة، ويلا شاور الناس بمشاكلك الحساسة والمصيريّة..!!

جروبات الاستشارة والأسئلة ممكن تكون مفيدة عشان الناس تسأل عن مطعم، محل، صالون منيح، هدية محتارين فيها، عن اجراءات التقديم لسفر أو شغل، أو أي موضوع عام بحاجة الشخص يعرف عنّه معلومات أكثر..

أما إنك تشاور بقضايا شخصية متعلقة بالزواج أو الارتباط أو تعاملك مع شريكك أو مشاكلك النفسية وغيره، فهون إنت للأسف بتجني على نفسك!

كثير كنت أنصدم لما أقرأ تعليقات مثل: طلّق!! سيبك منها! قدم استقالتك!
وأكيد في جروبات البنات: اخلعيه! ردي على حماتِك كذا! احكي لمديرتِك كذا!
.
.
معظم الأجوبة على الاستشارات مضللة جدا، والسبب:

- عموم الموجودين في جروبات الاستشارات غير متخصصين، وبالتالي أجوبتهم بناء على نمط شخصيتهم وطريقة تفكيرهم، وقلّة قليلة بتمتلك علم وخبرة في الموضوع اللي بشيروا عالناس فيه!!

فمثلا: بنت ممكن تنزل عن مشكلة نفسية، وكلامها حرفيا بنطبق على اضطراب نفسي حسب معايير التشخيص، ومع ذلك حتكون الأجوبة عامة جدا أو ممكن تصادف تعليقات تسخف من مشكلتها، ولاحقا رح تعتقد البنت إنها حاولت تستشير وردت على التعليقات لكـــــن ما تغيّرت حالتها، وبالتالي تتفاقم مشكلتها.

- المستشار يفترض يكون مطلع على كل جوانب المشكلة حتى يقدر يجاوب، وفي الجروبات نادر ما شخص يعرض مشكلته بالتفصيل، وحتى لو عرضها بالتفصيل رح يضل في جوانب غامضة، غير إنه المستشار ما بعرف رغبات ومخاوف وميولات وظروف وطبيعة شخصية السائل.. وأكيد ما بعرف الأشياء اللي قرر يخفيها بقصته!

فمثلا: الشخص اللي بشكي من تصرفات زوجته غالبا ما رح يكون كاتب إلنا عن عدم اهتمامه فيها...والعكس..

- جزء من الموجودين في الجروبات بحبوا يلفتوا أنظار الآخرين في الجروب من خلال إجاباتهم الدائمة على أغلب الاستشارات..
وهذا بجعل كثير من الإجابات هي رد من أجل الرد فقط..
ومجرد استعراض معرفي مش أكثر...

- في ظاهرة بعلم النفس الاجتماعي اسمها (استقطاب المجموعة Group Polarisation) فمثلا.. شخص نزّل سؤال بستشير بغلط صدر من البنت اللي تقدّم إلها... التعليقات في البداية ممكن تكون عقلانية ومتفهمة إنه معلش وعادي وصارحها، بعدها بتصير التعليقات أكثر حدّة وإنه بهدلها وحطلها حدّ من هسا، وبعدها بتصير متطرفة إنه سيبك منها واتركها..!

استقطاب المجموعة فكرتها إنه الشخص لما يحكي وجهة نظره أمام مجموعة بميل إنه يعبّر عن وجهة نظره بشكل أكثر تطرف من لما يكون لحاله.. وبحب يبالغ بوجهة نظره بحيث يفوق وجهات النظر اللي سبقته..

- المستشار مش وظيفته يقرر أبدا أبدا...
وظيفته يفكر مع الشخص بصوت عالي، يضوّي الأماكن المعتمة بتفكيره، يكتب معه إيجابيات وسلبيات كل قرار، يلفت انتباهه لأمور غايبة عنه...وآخر شيء يتركه يقرر لحاله..

- لا يعني من كلامي إني بعمم، وأكيد هالجروبات ساعدت كثير ناس، لكن بنفس الوقت دمّرت حياة ناس..
لهيك هالكلام لعلّ وعسى يساهم في توعية المُستشيرين والمستشارين..

- والخلاصة:
لو أجاك شخص يستشيرك سواء في الواقع أو على جروبات الإستشارة وكان عندك علم وخبرة بطبيعة استشارته..
المفروض إنك تسمعه..
وتسأله وتستفسر عن كل نقطة..
وترسم معه كل السيناريوهات المتوقعة..
وتفكر معه بصوت عالي..
وتوجّه طريقة تفكيره..
وتحاول تكون صوت عقله لو كان بحكي بعاطفه..
وتكون عاطفته لما يغيب حكم عقله..
وتكتب معه سلبيات وإيجابيات قراراته..
وتنبّهه عن الأمور اللي غابت عن باله..

وآخر إشي..
أوعك تقرر عنه..
اتركه يقرر لحاله ^^

#ARK