قُلْ هَلْ تَرَبَّصُونَ بِنَا إِلَّا إِحْدَى الْحُسْنَيَيْنِ ۖ ؟!

وَنَحْنُ نَتَرَبَّصُ بِكُمْ أَن:
- يُصِيبَكُمُ اللَّهُ بِعَذَابٍ مِّنْ عِندِهِ
- أَوْ بِأَيْدِينَا ۖ
.
.
فَتَرَبَّصُوا إِنَّا مَعَكُم مُّتَرَبِّصُونَ (52) !

#القرآن_الجميل
#ARK

ليه "الله" ما ينصر أهل غزة؟؟
شو ذنب الأطفال يموتوا تحت القصف؟؟

طيّب مش الله "رحيم"...ليه ما يرحمهم؟!
مش الله "قادر" ليه ما ينتصر إلهم؟

كيف لإله رحيم "أرحم من الأم بولدها" يسمح بكل هالشر؟!!

مش الله مطلع على كل إشي؟
أكيد شايف شو بصير بالدنيا..صح؟
طيّب وينه؟؟
.
.
هذا سؤال وصلني بما معناه من أكثر من شخص فيكم..
وفي بنت ختمت سؤالها وقالت:

أنا آســـــــــــفة!
والله مش قصدي بس أنا حابة أفهم..

أنا بحب "الله" وما بتخيّل حياتي بدونه..
وما بدي شبهة مثل هاي تبعدني عنّه..

ممكن تجاوبني؟؟!

-----------

وأنا جاوبت بالتفصيل، وبشكل سلس وبسيط وبعيدا عن أي تعقيد في #كتاب_شبهة.
بالفصل الرابع تحديدا واللي بحمل عنوان #الشبهة_الأكبر..
صفحة: 121

بتمنى من أي شخص خطرت بباله هالأسئلة إنه يروح الآن ويفتح صفحة 121 من الكتاب...
قبل ما هالأسئلة لا سمح الله تخطف إيمانه!

* رابط الكتاب pdf:
https://cutt.us/d4Waq

امبارح دخلت عالبنك وكان قدامي دور طويل، وقتها صرت أفكر بأي إشي أشغل حالي فيه لحتى ييجي دوري..

وقلت: أرد عمسجات البيج؟ لا لا بتاخد وقت..
طيّب أرن على أختي؟ ييي لو حكت ما بتسكت..
طيّب أقرأ من الكتاب اللي بين إيدي؟ لا مش رح أركز..
طيّب شو أعمل؟؟
.
.
للأسف مهما حاولت أعمل إشي مفيد ما رح أقدر لإنه بالي مشغول متى ييجي دوري..
ما رح أقدر أركز بإشي لإنه بخاف ينادوا عرقمي وأنا مش سامع..
ولو التهيت بإشي مفيد رح أتشتت لإني كل شوي مضطر أرفع راسي أشوف متى ييجي دوري..
.
.
خطرلي لحظتها كم فكرة "الإنتظار" بشعة!
وكيف إنها بتحرمنا نلتفت لحياتنا..
وكيف إنه الإنتظار كفيل يعطّل إنجازنا ويحرمنا نعيش الحاضر اللي بين إيدينا..

خطرلي كم في ناس ضيّعت سنوات من حياتها وهي بس بتنتظر!
كم ناس علّقوا أحلامهم وطموحاتهم وشغفهم على شيء بنتظروه!
كم في ناس ربطوا سعادتهم على إشي مش موجود، وكل شوي برفعوا راسهم وبتركوا كل إشي بين إيديهم حتى يشوفوا لو أجى أو قرب دورهم!
.
.
ليه بننسى دايما إنه الأشياء اللي بننتظرها ممكن ما تصير أصلا!
وليه بننسى إنه ممكن نموت قبلها!
وكيف نسينا حياة رحبة فسيحة مدهشة بين إيدينا، وقررنا ننتظر حياة ممكن ما إلها وجود أصلا ولا بيوم كانت مكتوبة إلنا..

عشان هيك..
ما تنتظروا إشي..
عيشوا اللحظة اللي بين إيديكم بكل تفاصيلها..
وإياكم تعلقوا سعادتكم وأحلامكم على إشي مش موجود أصلا..
.
.
وديروا بالكم تخسروا حياتكم على (وهم)!
وتفرطوا بسنوات من عمركم على (ولا إشي) !

نصيحة..
قبل ما ترفعوا راسكم وتكتشفوا إنه الدور كثييييير مطول...
أو
قبل ما تكتشفوا إنكم بتنتظروا بمكان ما إلكم فيه دور أصلا!!!
#ARK

أحكيلكم إشي كفيل يحيي الأمل فيكم ويخليكم تضحكوا من قلبكم!
بالضبط مثل ما ضحكت إمكم "عائشة" عليه!!

تقول عائشة رضي الله عنها في الحديث الصحيح:
لما رأيت من النبي صلى الله عليه وسلم طيب نفس قلت: يا رسول الله ادع الله لي.
فقال: اللهم اغفر لعائشة ما تقدم من ذنبها وما تأخر، وما أسرّت وما أعلنت.

فضحكت عائشة حتى سقط رأسها في حجرها من الضحك!
فقال لها رسول الله صلى الله عليه وسلم: أيسرّك دعائي؟
فقالت: وما لي لا يسرني دعاؤك!!

فقال صلى الله عليه وسلم:
والله إنها لدعائي لأمتي في كل صلاة. <3

#ARK

أنصحكم نصيحة غريبة!!

ما تعملوا (فييك أكاونت) بحياتكم!
إلا لو كان لشيء طارئ وضروري ومستعجل ولفترة بسيطة ولغرض واضح ومؤقت..

لكن إنكم تعلموا حساب على أي تطبيق أو موقع ويكون "فييك" فهذا خطأ كبير جدا بترتكبوه بحق أنفسكم!!

الدراسات النفسية بتحكيلنا إنه كونك مجهول فهذا كفيل يعطّل وسائل التحكم عندك، وكفيل يعطّل ضميرك ووعيك الذاتي وشعورك بالمسؤولية الشخصية، وكفيل يعطّل أخلاقك وشعورك بالذنب والخزي والخوف والعار بعد أي خطأ بصدر منك !!

والسبب:
- تقليل نماذج المحاسبة الإجتماعية ( ما حد بالمجتمع بعرف مين أنا)!
- تقليل الإهتمام بتقييم الذات ( ما دام ما حد بعرفني، ما رح أكترث لمبادئي وقناعاتي وأخلاقي ورح أعمل شو بنفسي) !!

وكونك من "فييك أكاونت" فهذا رح يخلق شيء يسمى (سلب الذات)،
وهي حالة نفسية مــــا بخضع فيها السلوك لمبادئك وأخلاقك..
بالعكس..بخضع فيها السلوك لمقتضيات الموقف اللي بتمر فيه، ولنوازعك وشهواتك اللحظية والآنية!!
ورح تسود رغبتك في تحقيق متعة مباشرة على قدرتك على تعطيل هالرغبة..!

الحسابات الوهمية خلقت شخصيات في الواقع إشي، ومن ورا الشاشة إشي مختلف تماما..

ومع استرسال الشخص بالكلام من خلال حسابات وهمية بوصل مرحلة بختفي فيها صوت ضميره، والمشكلة الحقيقية لما يوهم نفسه إنه كل إشي بصدر منّه من خلالها ما بمثله..
اللي بمثله فقط شخصيته اللي بتعرفها الناس عنه في الواقع..!!
.
.
مرة قرأت دراسة مخيفة بتحكي عن المجازر الوحشية اللي ارتكبتها بعض الجيوش في حق الأبرياء..
وتبين إنه أكثر هالجيوش وحشية كانوا قادتها يغيروا أسماء جنودهم قبل المعركة، وبنفس الوقت يحطوا قناع على وجوههم!
يعني كانوا (يحجبوا ويسلبوا ذاتهم) وبالتالي الجندي برتكب أفظع الجرائم لإنه بحمل اسم آخر، ووجه مغطى وما حد بعرفه..!

ومجرد ما أنهى الجندي المعركة كان ينزع قناعه ويرجع لإسمه الحقيقي ويكمل حياته طبيعي بدون ما يرف إله جفن على ضحايا قتلها ومزق أشلائها!!
لإنه ببساطة "سلب ذاته" وأوهم نفسه إنه كل إشي صدر منّه ما كان منّه!!
.
.
.
وآخر إشي..
حتى لو أخفيتوا أنفسكم، وحتى لو ما حد عرفكم، وحتى لو تنكرتوا لذواتكم
ما تنسوا إنه (الله) بعرفكم!!

سبحانه...
يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنْزِلُ مِنَ السَّمَاءِ وَمَا يَعْرُجُ فِيهَا وَهُوَ مَعَكُـــــــــــــمْ أَيْنَ مَا كُنْتُــــــــــمْ !!

وَاللَّهُ بِمَا تَعْمَلُونَ بَصِيرٌ
#القرآن_الجميل
#ARK

من أكم يوم كنت مع أحد أصدقائي، وأثناء الكلام كان بخبرني عن شغلة صارت معه وما كان قصده يحكيلي عنها، لكنها أجت لحالها بسياق الكلام..
وكان الحوار كالتالي:

مهو أنا كنت حاسب حسابي هالشهر أخلّص أقساط السيارة، بس في شب مسكين ظروفه صعبة كنت مداينه من مدة وكان الأصل يسدني هالشهر..
وكنت بدي أرن عليه أذكره بوقت السداد..
لكني عرفت إنه إمه الفترة الأخيرة تعبانة وبطارد فيها عالمستشفيات.. فبعتله مسج وقتها:
معلّم..بخصوص موضوع الدين انسى..
مسامحك دنيا وآخرة، وربنا يقوّم الحجة بالسلامة..

وهسا تأجلت أقساط السيارة للشهر الجاي، فهمت عليّ؟!
--------
.
هو ما كان قصده يحكيلي عن هالخير اللي عمله، بس هو كان بحكيلي ليه تأخر بسداد أقساط سيارته..

المهم مجرد ما خلّص كلامه أنا ابتسمت وصرت أضحك..
وقلتله والله يا معلم نيــــــــالك!!!

هو انصدم قلي مالك؟
شو اللي بضحك؟؟

قلتله استنى أوريك شغلة..فتحت تلفوني وعملت بحث سريع على جوجل، وقلتله تفضل شوف!!

بلّش يقرأ بصوت عالي:
قال صلى الله عليه وسلم..
أُتِى اللَّه تَعالى بِعَبْد مِنْ عِبَادِهِ آتاهُ اللَّه مَالًا، فَقَالَ لَهُ: ماذَا عمِلْتَ في الدُّنْيَا؟ قَالَ: يَاربِّ آتَيْتَنِي مالَكَ فَكُنْتُ أُبايِعُ النَّاسَ، وَكانَ مِنْ خُلُقي الجوازُ، فكُنْتُ أَتَيَسرُ عَلى المُوسِرِ، وأُنْظِرُ المُعْسِر. فَقَالَ اللَّه تَعَالى: أَنَا أَحقُّ بِذا مِنْكَ، تجاوزُوا عَنْ عبْدِي!!

رجعلي التلفون وقلي ما فهمت كثير..اشرحلي بالله..
حكيتله في شخص ربنا أعطاه مال، ويوم القيامة لما ربنا سأله عن خير عمله، قله ما عندي غير إني كنت أداين الناس، ولما ييجي يوم السداد كان اللي ما يقدر يسدني منهم أسامحه وأعفو عنه..

فربنا قله:
أنا أحق بذلك منك..
تجاوزوا عن عبدي!!
.
.
---------
ما أظن بيوم أنسى نظراته لحظتها..!
سألته فهمت الحديث؟
ضل ساكت وما حكى حرف..
رجعت كررت سؤالي..مالك؟ فهمت الحديث..؟

ابتسم وقلي:
آه.. والله العظيم فهمته..ومستحيل أنساه..!!

وبعفوية قلي: بس بالله تعيد آخره؟!
.
.
أنا أحق بذلك منه..
تجاوزوا عن عبدي..!!
.
.
#ARK
وَإِن كَانَ ذُو عُسْرَةٍ فَنَظِرَةٌ إِلَىٰ مَيْسَرَةٍ ۚ وَأَن تَصَدَّقُوا خَيْرٌ لَّكُمْ ۖ إِن كُنتُمْ تَعْلَمُونَ <3

الله..أكبـــــر..
الله أكبر.. من كل إشي..!

الله أكبر من كل همومي !
الله أكبر من كل لحظة ألم تسللت لقلبي..
أكبر من كل مصيبة استنزفت عمري..
أكبر من خذلان أقرب الناس إلي..
أكبر من كل ذنب كان حاجز بيني وبينه..
أكبر من كل لحظات الضياع والوجع اللي بتعصف بحياتي..
الله أكبر من دنيا ربطت فيها سعادتي..
أكبر من اهتمام كنت بنتظره من أقرب الناس إلي..
أكبر من ناس رفضت تسمعني..
وأكبر من كره وكِبر وظلم وحقد عشعش بقلوبهم..
.
.
الله أكبر من كل إشي بحول بيني وبين أحلامي وأهدافي..
أكبر من كل خطوات استصعبت أكملها..
وأحلام قررت أتنازل عنها..
وصراعات ياما فكرت أنسحب من مواجهتها..
.
.
الله أكبر من كل لحظة فتور حرمتني من قربه..
من كل مرة حرمت فيها حظ روحي من كلامه..
من كل لحظة كسل كانت حاجز من السجود فيها بين ايديه ومناجاته..
من كل إشي شغلني عن فكرة ذكره واستحضار رحمته ومعيته..
.
.
الله أكبر من كل إشي..
الله أكبر من كل إشي!

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً ❤

#القرآن_الجميل
#ARK

من أكم يوم دخلت على أحد شركات الإتصالات وكان المكان كثير أزمة والدور طويييل جدا..

مباشرة دخلت وراي بنت وكانت حاملة أكثر من كيس وواضح عليها علامات التعب والإرهاق..

ما في مكان نقعد فيه والكراسي كلها مليانة، وأقل شيء الواحد بدو يستنى نص ساعة حتى ييجي دوره..

وأخيرا وبعد طول انتظار قرّب دوري ودور البنت اللي فاتت وراي..

وفي هديك اللحظة صار موقف أدهشني!
ما ببالغ إنه هالموقف ترك أثر رهيب جواتي، وأنقذني من لحظات فتور وتعب كنت بمر فيها..

لحظتها دخلت حجة كبيرة بالعمر..
كانت بتمشي شوي شوي ومش قادرة تحمل حالها..
قامت البنت "اللي دخلت وراي واللي صارلها أكثر من نص ساعة بتستنى دورها" وقالت للحجة:
أشوف ورقة الدور اللي معك!
وقامت أخذت ورقة دورها وأعطتها ورقتها!!

وقالت إلها:
ما في داعي تستني، هيّ شوي وبيجي دورك.. !!!

ابتسمت الحجة وصارت تدعي إلها بدعوات من قلبها..
ورجعت البنت لمكانها بكل عفوية وهي ممكن غير مدركة إنه هالموقف البسيط ممكن يكون السبب في نجاتها!
وإنه هالموقف دَفع أقدار سيئة كانت رح تصيبها..
ممكن ما بتعرف إنه دعوات الحجة أمّن عليها ملائكة..
ولا بتعرف إنه في اللحظة اللي أعطت فيها دورها للحجة كانوا الملائكة في الملأ الأعلى بنادوا بإسمها!!
.
.
.
طلعت من المكان وأنا مدهوش من حجم الخير الساكن بقلب هالبنت!
وكيف إنه الدنيا مثل ما بتصدمنا بناس سيئة كمان بتصدمنا بناس ما بنقدر لما نشوفهم إلا ندعيلهم ونقول: الدنيا لسه بخير..
.
.
للبنت اللي قالت للحجة: ما في داعي تستني، هيّ شوي وبيجي دورك.. !!!

شكرًا!
وأرجوك خليك مثل ما إنت..
وما تسمحي للدنيا تغيرك..

وإلهي مثل ما جبرتي خاطر هالحجة إنّه يجبر خاطرك!
#ARK

هل سبق وخطرلك تعمل خطتك السنوية بالتاريخ الهجري؟!
ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر، واللي غالبا أول مرة بتسمع فيه بحياتك! ")
لكـــــن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!

الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..
معظم تواريخنا الإسلامية مرتبطة (بالعمل والإنجاز)!
إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!
ما بهمنا جدا تواريخ ميلادهم...لكن بهمنا تواريخ ميلاد قلوبهم لمّا لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لسبدنا عمر إنه يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..
لكنه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
يوم الثلاثاء 1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا (فتح لك) من غير (هجرة)..!

#ARK

اليوم بسأل إمي:
هسا لو إنت أدركتي لحظة الهجرة، كنتِ رح تهاجري مع النبي -صلى الله عليه وسلم - وتتركي بيتك وحياتك في مكة؟؟!!

فقالت: طبـــــــــعا آه بهاجر وأول وحدة كمان..
وسرحت بخيالها وصارت تقول: أنا أصلا كنت رح أكون مع أسماء بنت أبو بكر وهي رايحة توصّل إلهم أكل..
أنا اللي رح أطبخ أصلا "))))

وكنت رح اضرب أبو جهل عشان مدّ إيده على أسماء "الله يكسّر إيديه" لما سألها وين أبوك أبو بكر؟!

وفجأة قالت: يييي والله يا خوفي إنت اللي ما تهاجر! ")))
.
.
صدقا كان من أجمل الحوارات اللي خضتها بحياتي مع إمي..
كان نقاش جدا عفوي وجميل خصوصا لما أقنعتها وارتاحت إنه والله العظيم كنت رح أهاجر يمّة! ")))

انتهى نقاشنا لما حكيت لإمي قصة صحابي منعته ظروفه وكبر عمره يهاجر مع الرسول وأصحابه..
لكن هالصحابي ما تحمّل برودة الكفر في مكة..
وما تحمل فكرة إنه الصحابة بصافحوا وجه النبي صلى الله عليه وسلم وهو لأ..

فقرر يهاجر..
وللأسف وهو في الطريق أدركه الموت..
وفي لحظات احتضاره ضرب كف بكف وقال: اللهم هذه بيعتي لك.
وضرب كف بكف وقال: اللهم هذه بيعتي لرسولك.

ومات!

فنزلت فيه آية:
وَمَن يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً ۚ وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ ۗ وَكَانَ اللَّهُ غَفُورًا رَّحِيمًا.
.
.
.
إمي شعرت إنها بتشبه هالصحابي!
هي كمان كانت حابة تهاجر مع الرسول وأصحابه..
كانت حابة تمشي مع أسماء عالغار وتخاطر بحياتها..
كانت حابة تقدم أي شيء....
حتى لو طبخة تطبخها لرسول الله حتى يدعيلها..!
.
.
بعفوية لقيت إمي بعد هالقصة بتضرب كف بكف وبتقول:
اللهم هذه بيعتي لك!
وضربت كف بكف مرة ثانية وقالت:
اللهم هذه بيعتي لرسولك!

#القرآن_الجميل
#ARK

- كان عنّا بنت في الكلية جننتنا حرفيّا إنه يلا بدنا نجمع مصاري عشان نكفل أيتام..!

- ومرة كنا بنلعب كرة قدم وأجينا نريّح شوي ونشرب مي، ولما أجيت أعطي مطرة الميّ لأحد الشباب، قلي شكرا بس أنا صايم!
وقتها قلتله يا رجل ما إنت عارف عنّا لعبة كرة؟!
قلي آه بس أنا الصيام عندي إشي عادي وجدا سهل..

- صديق إلي عنده خواته كل إشي بحياته، مش طبيعي شو بهتم فيهم، ونص راتبه بروح بس هدايا إلهم..

- عنّا بنت في الحارة بآخر كل أسبوع بتلم أطفال الحارة وبتوزع عليهم أشياء زاكية وبتحكيلهم قصص يستفيدوا منها..

- أختي طبيبة أطفال، يا الله شو ساعدت أطفال بدون أي مقابل!

- بعرف شب عادي جدا جدا، لكن في 5 عائلات عفيفة بصرف عليهم!

- وفي بنت عايشة حياتها تمشي بحوائج الناس وتجبر خاطرهم..

-----------
المشترك بين كل هالأشخاص إنهم اهتدوا لباب طاعة ميسّر إلهم..
باب بتقربوا من خلاله لربنا بجهد خفيف ومن غير أي تكلّف..

كل بشر فينا عنده طاعات بستثقلها شوي، لكن في نفس الوقت في طاعات بألفها وبتكون خفيفة جدا عليه..

أرجوك ما تنام الليلة قبل ما تكتشف هالباب الميسّر إلك، هالباب اللي بتعمل من خلاله خير من غير أي تكلف أو مشقة..

وأرجوك إلزم هالباب طول حياتك..
وخليك مواصل فيه حتى لحظة وفاتك..!

#ARK

مرة من المرات رحت تصدقت بنيّة إنه ربنا يحفظني وما يفتني..
بتذكر ليلتها وقفت بين إيدين ربنا ودعيته بكل صدق يارب أرجوك ثبتني..
بس الله ما استجاب!

أيام معدودة ووقعت بغلط ما كنت متوقع إني ممكن أوقع فيه..
ممكن غرّتني صدقاتي ودعواتي وظنيت إنها شيء كافي..
بعدها..
خاطبت ربنا بأسلوب مش لائق للأسف...
كان كلامي بحمل في طيّاته عتب!
طيّب يا رب أنا تصدقت ودعيتك وبكيت بين إيديك...ليه ما حفظتني؟
أنا ما طلبت منك شيء دنيوي...أنا بس بدي ما أعصيك...ليه ما استجبتلي؟؟!
انتهى العتاب بـــ آسف يارب!
وطلبت منه يسامحني على أسلوبي وكلامي..
.
.
تبت من غلطي وما رجعت إله أبدا لكنّه ظل حمل ثقيل جوا روحي..
حسيته غلط كسرني وغيّر نظرتي اتجاه نفسي..
صرت أحسد كل شخص ما غلط زيي..
صرت أقارن حالي مع غيري وأقول لا همّه ما غلطوا غلطي..
والله تعبت واكتئبت وفقدت شغفي وحماسي..
كنت متأكد إنه ربنا سامحني..لكن أنا ما سامحت حالي..
وضل هالغلط مثل ندبة...
زال وجعها لكن ظل أثرها محفور جواتي!
.
.
مع الأيام اكتشفت إنه محور حياتي صار هالغلط..
حتى لو ربنا غفرلي.. بس كنت حريص أغفر لنفسي..
اكتشفت إنه هالغلط غيّرلي كثير أشياء في حياتي..
صرت اكثر حذر بعده...صرت أفضل بعده..
قلبي صار ألّيَن...ودموعي اللي كنت بتغلّب أنزلها صارت مع كلمة يا رب تنسال لحالها ع خدي..
صلاتي صارت أحسن...وحتى صدقاتي وتعاملي مع أهلي..
وقدرت الحمدلله أساعد كثير ناس وقعوا بنفس غلطي لإني فاهمهم..
وقدرت أمنع كثير ناس قبل ما يوقعوا وأحذرهم..
.
.
ورحمة ربنا شاءت إنه يتحول العتاب من ليه يارب؟ للحمد لله يارب..
أنا فعلا إنسان جديد بعد هالغلط..!
--------------

أحيانا الخير إلك بغلط يصحيك ويحذرك ويعلمك..
أحيانا الخير إلك بغلط وذنب يكسرك!

﴿ وَآخَرُونَ اعْتَرَفُوا بِذُنُوبِهِمْ خَلَطُوا عَمَلًا صَالِحًا وَآخَرَ سَيِّئًا عَسَى اللَّهُ أَنْ يَتُوبَ عَلَيْهِمْ إِنَّ اللَّهَ غَفُورٌ رَحِيمٌ * خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِمْ بِهَا وَصَلِّ عَلَيْهِمْ إِنَّ صَلَاتَكَ سَكَنٌ لَهُمْ وَاللَّهُ سَمِيعٌ عَلِيمٌ * أَلَمْ يَعْلَمُوا أَنَّ اللَّهَ هُوَ يَقْبَلُ التَّوْبَةَ عَنْ عِبَادِهِ وَيَأْخُذُ الصَّدَقَاتِ وَأَنَّ اللَّهَ هُوَ التَّوَّابُ الرَّحِيمُ ﴾

#القرآن_الجميل
#ARK

كتاب #شبهة و #شهوة متوفر في #معرض_عمان_الدولي_للكتاب 📚
# جناح رقم: B 23 ( مركز الفرسان).

# المكان: معرض عمان الدولي للسيارات "طريق المطار".
من تاريخ 23 سبتمبر وحتى 2 اكتوبر 2021.

يا أهلا وسهلا ")
#ARK
#حسن_باشا 😉

في الوقت اللي بتتفقدوا فيه أموركم لدوام بكرا..
جدولكم ولبسكم ومواصلاتكم ومتى رح تتحركوا وبمين رح تلتقوا...

أمانة ما تنسوا تفتحوا عيونكم..
وما تنسوا تطلبوا من ربنا يعينكم ويثبتكم..
يمموا وجوهكم شطر المستقبل..
حضروا قلوبكم لاحتضان تجارب جديدة أجمل، أنضج وأدوم..
تجنبوا العزلة والوحدة واشغلوا حالكم جدا جدا..
اعطوا صورة حلوة بأي مكان بتكونوا فيه..
خلي اللي يشوفكم يدعي للي رباكم..
امنحوا الآخرين سعادة وصدقوني رح ترجع إلكم..
اجبروا خاطرهم وربنا رح يجبر خاطركم..
استروا عليهم وربنا رح يستركم..
وادعولهم حتى الملائكة بالمثل تدعيلكم..
.
.
وما تنسوا إنه السير إلى الله سير قلوب لا سير أبدان!
فأمانة وإنتوا بتتفقدوا لبسكم ومواصلاتكم وجدولكم..
ما تنسوا تتفقدوا قلبكم..!! <3

#ARK

الدنيا مطر!
وفي سورة في القرآن اسمها (الحديد)..
فيها آية بتحكيلنا عن أراضي ميتة، جافة، صلبة، عانت من ظمأ طويــــــل وكانت فاقدة الأمل من أي فرصة للحياة..
وفجأة نزل عليها المطر فأحياها..

اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ.(17)
.
.
لكــــــن الدهشة إنه آية الحديد ما كانت بتحكيلك عن إحياء الأرض الميتة فقط..
لإنه الآية السابقة إلها مباشرة كانت بتحكي عن قلبـــــــــــــــك!

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ (16)
.
.
اللي قدر يروي الأرض ويحييها بعد موتها ..
قادر إنه يحيي قلبـــــــــــك..!
❤
#القرآن_الجميل
#ARK

ليه ساكت؟!
طيب ممكن تحكي أي إشي حتى أفهم مالك؟
مش قادر تحس برمضان..صح؟!
ولّا مثلا بتشعر إنك فقدت الأمل من نفسك بعد شهور من الغفلة؟!
عملت ذنب كبير؟!
طيّب مثلا حاس إنه قلبك ميّت؟؟!
بتتخيل إنه ربنا مش ممكن يقبلك؟ ولا يحيي قلبك؟!

يا الله.. ليه ساكت!! طيب احكيلي آه ولا لأ..
بس فهمني مالك؟!
.
.
ممم كيف؟؟ كيف يحيي قلبي؟! جد كيف بعد كل إشي عملته وخبصته؟
.
.
وأخيرا حكيت ")!
هاد مرّة شخص مرّ على قرية خاوية على عروشها تماما..
صفن في هالقرية وسأل سؤال بشبه سؤالك: كيف الله رح يحييها؟
فربنا موّته 100 سنة، وبعدها بعثه وخلاه يشهد على قدرة ربنا كيف ممكن يحيي هالأرض بعد موتها!
وما كان من هالشخص إلا إنه يعترف بقدرة ربنا..
فكانت خلاصة القصة لما اعترف وقال: أعلم أن الله على شيء قدير..!

أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا ۖ فَأَمَاتَهُ اللَّهُ مِائَةَ عَامٍ ثُمَّ بَعَثَهُ ۖ قَالَ كَمْ لَبِثْتَ ۖ قَالَ لَبِثْتُ يَوْمًا أَوْ بَعْضَ يَوْمٍ ۖ قَالَ بَل لَّبِثْتَ مِائَةَ عَامٍ فَانظُرْ إِلَىٰ طَعَامِكَ وَشَرَابِكَ لَمْ يَتَسَنَّهْ ۖ وَانظُرْ إِلَىٰ حِمَارِكَ وَلِنَجْعَلَكَ آيَةً لِّلنَّاسِ ۖ وَانظُرْ إِلَى الْعِظَامِ كَيْفَ نُنشِزُهَا ثُمَّ نَكْسُوهَا لَحْمًا ۚ فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَىٰ كُلِّ شَيْءٍ قَدِيرٌ.
.
.

هالشخص كثير بشبهك لما هو تساءل عن قرية كبيرة، وإنت تساءلت عن قلبك!
وربنّا خلّد قصته حتى بكل مرة لما نتساءل عن (كيف؟) يجاوبنا..
ونقل إلنا ردّه حتى نستأنس فيه بكل مرة بنسأل (كيف؟) بنبرة يأس تملّكت من قلوبنا..

إنت.. مش مضطر تموت 100 سنة حتى تدرك الجواب!
إنت مش مطلوب منك غير لحظة صدق، تعترف فيها لربنا من قلبك إنه قادر على كل شيء!
وقلبك شيء!

ومجرد ما ربنا اطلع على حسن ظنك فيه وإيمانك بقدرته..
وقتها رح تلاقي إجابة سؤالك:

كيف ربنا رح يحيي قلبك!

#القرآن_الجميل
#ARK

من فترة كنت بلعب مع بنت أختي..
كانت اللعبة إنها تتخبى وأنا بكون ماشي فهي فجأة بتنط قدامي وبتصرخ..
فأنا بخـــــــــاف وبنقز وهي بتصير تضحك إنها خوفتني..

وفي أحد أشواط اللعبة بالغت بردة فعلي إني فعلا خفت منها، فهي ضحكت كثير عليّ، وبعدها أجتني وسألتني:

إنت عنجد خفت؟ ولا بس عشان اللعبة..
فقلت إلها لاااا جد كتيييير خفت..

فحكتلي: مرة المس حكتلنا لما نخاف نقرأ آية الكرسي..
يلا اقرأ آية الكرسي عبين ما أنا رايحة اتخبى! ")
.
.
طيّب، عمره خطر ببالكم ليه آية الكرسي تحديدا بنقرأها بأغلب أوقات يومنا؟
الصبح والمسا وقبل النوم ولما نصحى ولما نمرض ونخاف ونحس بوحشة ولما نمشي بطريق عتمة بالليل لحالنا!

آية الكرسي باختصار بتحكيلنا عن إله حيّ قيوم مستغني عن جميع خلقه، ما بنام ولا بنعس، إله بملك السموات والأرض، بعلم بأمور خلقه كلها سواء اللي صارت أو بدها تصير، وكرسيه وسع السموات والأرض..
والسموات والأرض على كبرهم واتساعهم (لَا يَئُودُهُ حِفْظُهُمَا) يعني ما بشق عليه ولا بعجزه إنه يحفظهم، وهو العليّ العظيم!!

فهمت ليه بنقرأ هالآية بكل لحظات يومنا؟!
إذا كان هالإله الحيّ والقيوم ما بعجزه ولا صعب عليه يحفظ السموات والأرض على كبرهم، فمن باب أولى ما بعجزه إنه يحفظك إنت!!
.
.
المهم..
خايفين من الحياة جد؟!!
طيّب اسمعوا نصيحة بنت أختي!

#ARK
#القرآن_الجميل

لو سألتك تكمل هالآية:
كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ (.....)؟!

برافو عليك، الجواب (تَتَّقُونَ)..

بنفس الوقت لو سألتك شو يعني تتقون؟ وقتها ممكن تصفن شوي أو تجاوبني جواب تقليدي مثل كتب الدين في المدرسة، لما كنا نحفظ تعريف التعاون والصدق والأمانة والتقوى ")

تمام.. أنا ما بدي آخد من وقتك كثير..
لكن، ضروري بداية تعرّف إنه الكلمات اللي بتيجي بعد كلمة (لعلّكم) في القرآن غالبا بتمثّل غايات وأهداف القرآن..
فمثلا: لعلكم تشكرون، تعقلون، تذكرون، ترحمون، تتقون..
إلخ من الغايات المدهشة..
.
.
المهم.. غاية التقوى، من الغايات المركزية والمهمة في القرآن..وحتى أسهّل عليك الجواب لفهم أحد أبرز معاني التقوى، شوف هالآية:

وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَانِ.
يعني (البر) بقابله (الإثم)
و(التقوى) بقابلها (العدوان).

ببساطة..التقوى إنك ما تكون إنسان معتدي!
معتدي على نفسك وتهلكها بالآثام..
معتدي على أموال غيرك..
معتدي بلسانك وكلامك عن أعراض الناس وأخطائها!
معتدي بواسطتك على فرصة غيرك!
معتدي على حقوق خواتك وبناتك..!

التقوى إنك ما تظلم نفسك وتظلم غيرك!
.
.
وعدتك ما آخذ من وقتك، لكني بدعوك تبحث عن معادلات التقوى في رحلتك مع القرآن..
ولو بتحب افتح على سورة الأنعام عالآية 151 واقرأ لعند الآية 153..ايوا بالضبط لعند (لعلكم تتقون)..

ما بعرف لو رح تلاحظ إنه الآيات بتحكيلنا إنه ما نعتدي عالنفس البشرية بالقتل ولا على أنفسنا بارتكاب الفواحش ولا على مال الأيتام، ولا نعتدي بالكيل والميزان، ولا نعتدي بمخالفة عهودنا، ولا بأقوالنا وشهاداتنا...

كل هذا (لعلّــــكم تتقون)!
.
.
-----
وإنت صايم بتقدر عفكرة تشرب وتاكل بدون ما حد يشوفك، لكن ما رح تعمل هيك لأنك ببساطة مدرك إنه في رب عظيم شايفك..

ممتاز، هذا الهدف تحديدا اللي بطمح إله شهر رمضان..
إنك تستشعر مراقبة ربنا إلك مش فقط بالأكل والشرب، وكمان لما تقرر تعتدي على نفسك وتظلم غيرك!!

فهمت الآن ليه انكتب عليك الصيام؟!

#القرآن_الجميل
#ARK

أختي بتعشق ورق العنب، أو الدوالي، اليلنجي، اليبرق، أو الدولمة بالتركي ")
وبتطلب من إمي بالأسبوع 10 مرات تطبخها..
وحتى لما اختي تزوجت، صرت أشتغل طلبات عندها لأوصّل دوالي.. ")
.
.
عمره خطر ببالكم ليش الدوالي بتكون معروشة؟
ليه مثلا ما يتركوها عالأرض تمد لحالها؟؟
حتى في القرآن:
وَهُوَ الَّذِي أَنشَأَ جَنَّاتٍ مَّعْرُوشَاتٍ وَغَيْرَ مَعْرُوشَاتٍ وَالنَّخْلَ وَالزَّرْعَ مُخْتَلِفًا أُكُلُهُ..

ببساطة لإنه ورق العنب لو كان عالأرض رح يتمدد بلا اتجاه، ورح يستهلك أوراقه الحلزون واليرقات، وبالتالي فش دوالي.
.
.
طيّب، بتعرفوا إنه الإنسان بطبيعته كائن بتسلّق وبتمدد مثله مثل الدوالي؟!
ولو انترك حر بدون تقليم وتحديد رح يمتد ويخرّب ويصير مؤذي..ولو انترك عالأرض رح يتآكل تماما ويفنى!

وهون بيجي دور الوحي..
بقيدك وبحددك بإطار التشريعات حتى يحفظك ويحفظ غيرك..
وبرفعـــــك عن الأرض حتى ما تتآكل روحك!!
.
.
القرآن بوضّح هالفكرة تمامًا وبضرب إلنا مثال بشخص ربنا رفعه بالوحي..
لكنه للأسف أبى إلا إنّه يلازم الأرض..
وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ (175) وَلَوْ شِئْنَا (لَرَفَعْنَاهُ) بِهَا وَلَٰكِنَّهُ (أَخْلَدَ) إِلَى الْأَرْضِ وَاتَّبَعَ هَوَاهُ..
.
.
حتى القرآن لما يحكيلنا عن الهدى والضلال:
قُلْ مَن يَرْزُقُكُم مِّنَ السَّمَاوَاتِ وَالْأَرْضِ ۖ قُلِ اللَّهُ ۖ
وَإِنَّا أَوْ إِيَّاكُمْ (لَعَلَىٰ هُدًى) أَوْ (فِي ضَلَالٍ) مُّبِينٍ.

في الكلام عن الهــــدى استخدم "علـى" الدالة على الاستعلاء والإرتفاع..
وفي الكلام عن الضلال استخدم "فـــي" الدالة على الإنخفاض والإنغمار..
.
.
المهم..
القرار في النهاية قرارك..
ربنا يسّر إلك الوحي..
يا بترتفع فيه وبتحفظ روحك..
يا بتنسلخ عنه وبتخلُد للأرض وبتتآكل روحك!!

#ARK
#القرآن_الجميل

تواصل معي صديقي وخبرني إنه ضروري أترك كل إشي بإيدي وأجيه هسا هسا!!!

هو كان من فترة مخبرني عن بنت معجب فيها وبراقب فيها وناوي يتقدم إلها..وأول ما لمحته حسيت إنه كثير متوتر ومعجوق، بصراحة من ملامح وجهه تخيلت يقلي إنه البنت خطبت ")!!

فجأة قلي..
اسمع هي إمي حجزت موعد مع أهل البنت، والله متوتر وملخوم ومش عارف شو أعمل؟؟ طيب شو المفروض أحكي؟ عندك فكرة شو ألبس؟ طيّب الواحد بأول زيارة باخد معه إشي؟ عندك فكرة كيف أمشّط؟ طيب يا ترى أبوها شو ممكن يسألني؟؟

اسمع..تخيل حالك أبوها.. شو رح تسألني؟؟ ")

بصراحة وتّرني معه!! وممكن لأول مرة في حياتي بشعر إني مش قادر أساعد حد، وخيالي ما استوعب فكرة إني أتخيل حالي أب وحد يتقدم لبنتي وأفكر شو ممكن أسأله؟؟
لأنه المنطق بحكي قبل ما أفكر بعريس بنتي أفكر أول بإمها! ")
.
.
ومرة صديق ثاني جنّنا عشان عنده موعد في السفارة الأمريكية، وبدو إيانا نساعده شو يحكي ويتصرف ويعمل بالمقابلة..

وأنا مرة كان عندي مقابلة بمكان كثير كنت حاب أشتغل فيه، وقتها قعدت ساعة بزبط بحالي، ولبست من باب الأمانة بدلة مرتبة، حتى إمي وقتها حكتلي: بتجنن!!
-----------------

اللقاءات والمقابلات السابقة سواء كانت للزواج أو السفر أو الشغل، كانت بتحتوي على مشاعر عديدة..
أمل، خوف، رهبة، توتر، قلق، رجاء..وممكن حب!!

لإنه عموما مثل هاللقاءات بترتب عليها مستقبل الإنسان ومصيره..وبتلاقيه بجمع أكبر قدر من المعلومات عشان تعينه..وبكون عايش على أمل الموافقه عليه، أو خوف ورعب من رفضه..
وصحيح بكون متهيب منها..
لكن رغم مشاعره المتناقضة ببذل أقصى جهده يستعد نفسيّا وماديا إلها..
.
.
.
---------
وأنا بقرأ القرآن، لاحظت إنه القرآن كثير بذكّرنا بلقاء ومقابلة من نوع آخر..
والناس بتتفاوت في اسجابتها ونظرتها لهذا اللقاء..

ناس بترجوا هذا اللقاء:
الَّذِينَ يَظُنُّونَ أَنَّهُم مُّلَاقُو رَبِّهِمْ وَأَنَّهُمْ إِلَيْهِ رَاجِعُونَ

وناس غفلت عنه:
إِنَّ الَّذِينَ لاَ يَرْجُونَ لِقَاءَنَا وَرَضُواْ بِالْحَيَاةِ الدُّنْيَا وَاطْمَأَنُّواْ بِهَا وَالَّذِينَ هُمْ عَنْ آيَاتِنَا غَافِلُونَ
.
.
.
صح بيوم رح تقابل البنت اللي نفسك تخطبها..
أو مدير الشركة اللي حاب تشتغل فيها..
أو موظف السفارة للبلد اللي حاب تهاجر إلها..

لكن بيوم رح يكون اللقاء مع (الله)!
فما تنسى...!

#ARK
#القرآن_الجميل