اعتبر هذا البوست رسالة شخصية مني إلك : )))
**
بدي أطلب منك طلب بشرط توعدني تعمله!
وحتى أعرف إذا قبلت طلبي أو لأ ما عليك إلا تكتب كومنت أو تعمل (منشن) لحدا حابب يطبق معك هذا الطلب..
.
.
المهم..
ما تقنعني إنك بحياتك ما مريت بشعور القرب من ربنا..
يعني مثلاً سمعت آية أثّرت فيك..
صليت ركعتين وبكيت فيهم..
تصدقت صدقة وحدا دعالك..
حضرت فيديو حرّك قلبك..
عملت خير ما حد بعرفه عنك..
وإلخ..

كمان أظن إنك غالباً وفي يوم من الأيام وقعت بذنب..
طبعًا بعدها ندمت وزعلت وجلدت ذاتك وضاقت عليك الأرض بما رحبت..
قمت لحظتها صليت ركعتين بآخر الليل..
وبالسجود بكيت وبكيت حتى ارتحت..
ولما رفعت راسك من السجود اجاك شعور غريب قدرت تفهم منه إنه ربنا قبل توبتك!
.
.
طلبي إلك كالتالي:
ما ضل لرمضان إشي..
بدي إياك تختار يوم فيهم مع سبق الإصرار..
يوم تكون نفسياً فيه مرتاح وما عليك إلتزامات كثيرة..
مش مطلوب منك غير تصلي ركعتين خفاف بس بشرط يكون آخر سجود طويل شوي..

بدي إياك تفضفض لربنا كل إشي جواتك..
تحكيله إنك بتحبه وإن كنت بتعصيه..
وما تنسى تحكيله عن مشاكلك وهمومك وعن كل إشي بعرقل مسيرك إله..
وأكيد اطلب منه يغفرلك ويسامحك ويعينك عالخير فيما تبقى إلك من أيام حياتك..

والأهم: ما ترفع راسك من السجود إلا واجاك هذاك الشعور اللي كنت تفهم منه إنه ربنا قبل توبتك..

لكـــــــن هالمرة شعور إنه كتبك من عتقاء هذا الشهر!

وبس : )))

وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُلْ سَلَامٌ عَلَيْكُمْ كَتَبَ رَبُّكُمْ عَلَى نَفْسِهِ الرَّحْمَةَ أَنَّهُ مَنْ عَمِلَ مِنْكُمْ سُوءًا بِجَهَالَةٍ ثُمَّ تَابَ مِنْ بَعْدِهِ وَأَصْلَحَ فَأَنَّهُ غَفُورٌ رَحِيمٌ
#القرآن_الجميل
#ARK

مرة طلعنا عمرة مع شباب الجامعة، وكان معنا شب كثير عفوي وفايع ")

بنفس الوقت كان أكثر واحد فينا متحمس للعمرة، وكان هالحماس واضح من خلال انصاته لكلام الشيخ في الباص، ومن خلال أسئلته العفوية والمضحكة أحيانا^^

- شيخ مش قادر أحفظ آية الصفا والمروة..والله طويلة..
- طيّب لو خربطت بعدّ الأشواط..إن شاء الله بعيد من الأول؟
- شيخ هسا شو أحكي بالزبط عشان الله يغفرلي؟
- شيخ هسا أنا لما أزور قبر النبي وأسلّم عليه يعني هو رح يعرف إني سلمت عليه؟؟
- طيّب شيخ هسا بقدر أدعي أشياء بالعامية؟ أنا بعرفش بالفصحى أدعي زيكم !!
.
.
.
وفي ليلة من ليالي الرحلة، كنّا كلنا متجمعين وسهرانين..
فهو قام وقال: خلص يا شباب بالله خلينا ننام عشان نلحق الفجر.. ترى اليوم ناوي أصلي جنب الكعبة..

لحظتها دخل الشيخ وقلنا ما تنسوا تنزلوا قبل الفجر بوقت عشان صلاة التهجد..

نط هو وقال شيخ شو يعني صلاة التهجد؟؟؟

رد الشيخ: يعني صلاة القيام، وما تنسوا حديث النبي صلى الله عليه وسلم:
إذا كان الثلث الأخير من الليل، ينزل ربنا إلى سماء الدنيا فينادي فيقول: هل من سائل فأعطيه؟ هل من مستغفر فأغفر له؟ هل من تائب فأتوب عليه؟
.
.
لحد هاللحظة ما بتغيب عن بالي ردة فعله لما سمع الحديث!
شيييييخ يعني ربنا بنادي علينا؟؟ مين عنده سؤال؟ مين بدو أغفرله؟ مين بدو أتوب عليه؟؟؟

ابتسم الشيخ من عفويته وقله آه...

فجأة قام من مكانه..
قلناله وين؟؟؟

فقال:
الله بنادي...
وأنا رايح أرد عليه !!

------------

طيّب وإنت...
ما بدك ترد عليه؟؟!!
#ARK

في قصة بتحكي عن بنت كانت بتركض على سلالم المترو حتى تلحّق القطار...
ولما قربت من القطار انقسمت القصة لمسارين محتملين في حياتها..
حياة بتكون فيها لحقت القطار، وحياة ثانية بكون القطار فاتها..

وبالرغم من هالحدث التافه بنظرنا إلّا إنه سمح بتباعد مسارات حياتها..
فحياة منهم بتكون سعيدة، وحياة بتعاني فيها من البؤس والشقاء..

القصة بتأكد على فكرة إنه حياتنا ممكن يختلف مسارها تماما بحدث بسيط مرينا فيه..
وإنه كل فعل بنمارسه مهما كان بسيط أو تافه راح يكون إله عواقب وآثار بتلامس مسارات وتفاصيل حياتنا..
.
.
إنت لما تعمل خير رح تجد عواقبه في حياتك، واحتمال يغيّر مسارها..
وللأسف لما تعمل شرّ كمان رح يكونله عواقبه، ورح يغيّر مسار حياتك..

هالفكرة مرعبة..
كم غلط عملناه وانسيناه لكن عواقبه الآن حاضرة في حياتنا؟
كم ذنب استسهلناه لكنّه غيّر مسار حياتنا للأسوء..
كم حرام قلنا عنه عادي لكن عواقبه صنعت حياة بشعة وقاسية؟

الفكرة أكيد مرعبة لكـــــــــن بدون اسم الله "العفـــــــــــو" !!

هو ما بغفرلك ذنبك بس...
هو بمحيه محي..
بمحي تاريخه وعواقبه وآثاره وتدخله في مسارات حياتك..
هو بهوّن عليك خوفك من آثار ذنبك..
بهوّن عليك شكك وخوفك إنك رح تنحرم من الخير عشان ذنب بلحظة ضعف ارتكتبه..

هو برد عليك لما تحكي " مستحيل الله يوفقني للخير لإني بيوم غلطت هالغلط" !

وبقلك لأ..
أصلا فش غلط!!
هو اختفى تماما..
وإنت بتستاهل الخير لإني أنا "الكريـــــــــم" معك !!
.
.

المهم فهمتوا هسا ليه بندعي:
((اللَّهُمَّ إِنَّكَ عُفُــــــــوٌّ كَرِيــــــــــمٌ تُحِبُّ الْعَفْوَ فَاعْفُ عَنِّا)) ؟!!

#ARK

عنّا بتلاقي بنت صغيرة أموره وبتجنن، ولما تسألها شو اسمك يا عمو؟؟
بتجاوبك: جهـــــــــــــــــاد!!
هالاسم كثير بنحبه، لدرجة بنسمّي فيه بناتنا وولادنا..

وعنّا تقديس رهيب لفكرة الشهيد، فلانة زوجة شهيد، وهدول أبوهم شهيد، وهالعيلة جد جدهم مات شهيد!!
ولو سألت أي حد بالشارع بتحب تموت شهيد؟؟
بدون تردد رح يقلك: آآآه !

وعنّا بتلاقي بنت بتهرب وبتخاف لما تشوف صرصور..
مش عارف كيف أشرحلك إياها..
بس هي ما بتخاف من جيش وسلاح وقنابل ورصاص..!
هي ما بتخاف من الموت!!

عنّا شباب وصبايا لمّا تلمحهم ما رح يخطر ببالك أبدا إنهم ما بناموا الليل وهمّه بفكروا شو ممكن يقدموا للأقصى!
ولا رح يخطر ببالك إنه قضايا الأمة بتسكن بقلوبهم بكل إخلاص..

عنّا الناس بتقوم عالشيخ اللي ما حكى عن فلسطين والجهاد، ولو كان إله مواقف مشبوهة منهم بنقله: يا جباااااااان !!

عنّا اللي بحاول يلغي أو يعطل آيات الجهاد في القرآن.. أوعك تفكر بنشوفه إنساني وراقي ومتحضر.... لا لا بنشوفه مش زلمة ") !!

عنّا قرآن فيه كثير آيات فيها حب وخير وجمال وإنسانية...
بس كمان فيه آيات ما بترضى إلنا الذل والهوان، ما بترضى لحدا يستوطي حيطنا!
فيه آيات بتقلنا في أعداء ما بنفع معهم صلح أو سلام..

في أعداء ما بنفع معهم إلا " الجهــــــــــــــــاد" !!

بالضبط مثل اسم البنوتة الأمورة اللي سألتها شو اسمك يا عمو؟؟
وردت عليك:

جهاااااااااااااد ") !

------------------

-وَقَاتِلُوا فِي سَبِيلِ اللَّهِ الَّذِينَ يُقَاتِلُونَكُمْ وَلَا تَعْتَدُوا إِنَّ اللَّهَ لَا يُحِبُّ الْمُعْتَدِينَ.

- وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ

- وَأَعِدُّوا لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ
#القرآن_الجميل
#ARK

⁨#SaveSheikhJarrah

إِنَّ الَّذِينَ أَجْرَمُوا كَانُوا مِنَ الَّذِينَ آمَنُوا يَضْحَكُونَ ﴿29﴾ وَإِذَا مَرُّوا بِهِمْ يَتَغَامَزُونَ ﴿30﴾ وَإِذَا انْقَلَبُوا إِلَىٰ أَهْلِهِمُ انْقَلَبُوا فَكِهِينَ ﴿31﴾ وَإِذَا رَأَوْهُمْ قَالُوا إِنَّ هَٰؤُلَاءِ لَضَالُّونَ ﴿32﴾ وَمَا أُرْسِلُوا عَلَيْهِمْ حَافِظِينَ ﴿33﴾ فَالْيَوْمَ الَّذِينَ آمَنُوا مِنَ الْكُفَّارِ يَضْحَكُونَ ﴿34﴾ عَلَى الْأَرَائِكِ يَنْظُرُونَ ﴿35﴾ هَلْ ثُوِّبَ الْكُفَّارُ مَا كَانُوا يَفْعَلُونَ ﴿36﴾

#القرآن_الجميل

فَلَمْ تَقْتُلُوهُمْ وَلَٰكِنَّ اللَّهَ قَتَلَهُمْ ۚ وَمَا رَمَيْتَ إِذْ رَمَيْتَ وَلَٰكِنَّ اللَّهَ رَمَىٰ ۚ وَلِيُبْلِيَ الْمُؤْمِنِينَ مِنْهُ بَلَاءً حَسَنًا ۚ إِنَّ اللَّهَ سَمِيعٌ عَلِيمٌ (17)
.
.
إنتوا ما قتلتوهم لكــــــــن الله أعانكم على قتلهم..
وإنتوا لما رميتوا صورايخكم ما رميتوها! لــــكن الله رماها..!

الله بإمكانه ينصركم بدون حرب وصورايخ وجرحى وشهداء لـــكنه حب يبتليكم حتى يرفع مقامكم ودرجاتكم، وحتى يظهر للعالم قوتكم بالرغم من قلة عددكم وتآمر العالم كله عليكم!

وما تنسوا إنه الله سميع لدعواتكم..
و عليم بأعمالكم وجهادكم وتضحيتكم! <3

#القرآن_الجميل
#ARK

وَلاَ تَحْسَبَنَّ الَّذِينَ قُتِلُواْ فِي سَبِيلِ اللّهِ أَمْوَاتاً بَلْ أَحْيَاء عِندَ رَبِّهِمْ يُرْزَقُونَ{169}

فَرِحِينَ بِمَا آتَاهُمُ اللّهُ مِن فَضْلِهِ وَيَسْتَبْشِرُونَ بِالَّذِينَ لَمْ يَلْحَقُواْ بِهِم مِّنْ خَلْفِهِمْ أَلاَّ خَوْفٌ عَلَيْهِمْ وَلاَ هُمْ يَحْزَنُونَ{170}

يَسْتَبْشِرُونَ بِنِعْمَةٍ مِّنَ اللّهِ وَفَضْلٍ وَأَنَّ اللّهَ لاَ يُضِيعُ أَجْرَ الْمُؤْمِنِينَ{171}

الَّذِينَ اسْتَجَابُواْ لِلّهِ وَالرَّسُولِ مِن بَعْدِ مَا أَصَابَهُمُ الْقَرْحُ لِلَّذِينَ أَحْسَنُواْ مِنْهُمْ وَاتَّقَواْ أَجْرٌ عَظِيمٌ{172}

الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ{173}

#حسبنا_الله_ونعم_الوكيل
#GazaUnderAttack
#ARK

كلنا ميتين يا خالتي..
كُلُّ مَنْ عَلَيْهَا فَانٍ..

طبّ وإحنا ليش ما نموت بالشهادة!!!

#GazaUnderAttack

#غزة_تحت_القصف
#GazaUnderAttack
----------------

أنا بنت عشت طول حياتي على الأفلام والأغاني الأجنبية، وهالإشي مع الوقت خلاني مهوسة بكل ما هو غربي..

وحلم حياتي أسافر وأعيش برا..
حبي وهوسي للغرب كان يقابله كرهي للعرب..
لا لا مش بس كره...وحقد كمان..!

بكل يوم بمشي فيه بالشارع بلعن الساعة اللي انولدت فيها ببلد عربي..
وأكيد أكيد هالحقد قادني لكره المسلمين، وآسفه أحكيلكم إنه كمان لكره الإسلام!!

علما إني مسلمة بالهوية، بس ما بنكر إني فقدت الإسلام من زمان..
ما بعرف متى اللحظة اللي فقدته فيها، لكن المهم إني فقدته!

وما بقدر أخفي فرحتي لما أشوف بوست بسخر من العرب والمسلمين!
عمري ما تعاطفت مثلا مع الأحداث اللي بتصير مع اللاجئين والمسلمين بالغرب، وكنت أقول إنهم بستاهلوا لإنهم رجعيين!

ما بحكي إنه الغرب جنّة وبعرف إنه فيه كثير مصايب، لكن على الأقل فيه الحرية اللي بحلم فيها..
الحرية اللي كبتها ديني ومجتمعي المتخلّف..!

بـــــس ما تلوموني أرجوكم..
بكل فيلم حلو كنت أحضره كان يطلع بوجهي فيديو لشيخ بحكي عن إشي سخيف!
بكل عرض ازياء كنت أشوفه كنت أصادف كلام ساذج عن العفة والحجاب!
بكل رقصة عفوية كنت أشوفها بشوارع الغرب كان يطلع بوجهي خبر بحكي عن ضحايا بشوارع سوريا واليمن والعراق!
.
.
لكـــــــــــــن فجأة طلع بوجهي فيديوهات عن غزة!
عمري ما بكيت زي ما بكيت على رعب أطفالهم من صوت الصواريخ..
شفت آباء حاملين جثث أطفالهم..!
شفت امهات ببكوا على ولادهم..!
شفت بنات بنضربوا بالقدس..
اطفال يتم اعتقالهم..
شباب بعمر الورد فقدوا عيونهم..
وشفت عالم كله متآمر عليهم..!

مع كل فيديو كنت أشوفه كان ينمحي غباش تراكم سنوات على قلبي!
مع كل صورة لجثة طفل كنت أشوف فيها صورة الغرب الحقيقية..!
مع كل قطرة دم كانت تتحول مشاعر الحقد لمشاعر حزن وقهر!
مع كل دمعة على خد إم كانت تغسل وهم جواتي..
ومع صرخة عيلة خايفة من الصواريخ، صرّخت بشكل عفوي ولأول مرة بحياتي:

الله أكبر!!

الله أكبر شو ذنبهم!
الله أكبر عالغرب.. الله أكبر ما أكذب إنسانيتهم..
الله أكبر ما أحلى أفلامهم، وما أبشع حقيقتهم وإجرامهم!!!
.
.
رح تستغربوا إني بكتب هالكلام بعد ركعتين صليتهم..
يا الله من زمان ما صليت!!
ركعتين كان حاضر فيهم صور جثث الأطفال بحضن آبائهم وأمهاتهم..
يا ربي مش قادرة أنسى منظرهم!

والغرب ساكت!
يا ريت ساكت.. برفع أعلام الكيان وبدافع عنه!

للأسف أرواح هالأطفال رخيصة، وأغلى منها روح بسّة علّقت على شجرة، أو مجموعة بطّ بقطعوا الشارع، أو كلاب في منظمات بتنادي بحقوقهم!!!!

عاهدت ربنا أكون وفيّة لقضايا هالأمة المقهورة..
عاهدته ما أنسى بيوم شو عمل الغرب فيهم!
عاهدته ما أضعف لحظة عن نصرتهم ورفع الظلم عنهم..
.
.
ما كنت متخيلة إنه صرخة ودمعة وقطرة دم شفتهم بشكل عابر كانوا كفيلات يحولوا إنسانة من حد مغرم بالغرب حاقد عالعرب والمسلمين..

لإنسانة بتبكي هاللحظة..
وبتسأل ربنا وبكل صدق

الشهادة!!!
#ARK

قُلْ هَلْ تَرَبَّصُونَ بِنَا إِلَّا إِحْدَى الْحُسْنَيَيْنِ ۖ ؟!

وَنَحْنُ نَتَرَبَّصُ بِكُمْ أَن:
- يُصِيبَكُمُ اللَّهُ بِعَذَابٍ مِّنْ عِندِهِ
- أَوْ بِأَيْدِينَا ۖ
.
.
فَتَرَبَّصُوا إِنَّا مَعَكُم مُّتَرَبِّصُونَ (52) !

#القرآن_الجميل
#ARK

ليه "الله" ما ينصر أهل غزة؟؟
شو ذنب الأطفال يموتوا تحت القصف؟؟

طيّب مش الله "رحيم"...ليه ما يرحمهم؟!
مش الله "قادر" ليه ما ينتصر إلهم؟

كيف لإله رحيم "أرحم من الأم بولدها" يسمح بكل هالشر؟!!

مش الله مطلع على كل إشي؟
أكيد شايف شو بصير بالدنيا..صح؟
طيّب وينه؟؟
.
.
هذا سؤال وصلني بما معناه من أكثر من شخص فيكم..
وفي بنت ختمت سؤالها وقالت:

أنا آســـــــــــفة!
والله مش قصدي بس أنا حابة أفهم..

أنا بحب "الله" وما بتخيّل حياتي بدونه..
وما بدي شبهة مثل هاي تبعدني عنّه..

ممكن تجاوبني؟؟!

-----------

وأنا جاوبت بالتفصيل، وبشكل سلس وبسيط وبعيدا عن أي تعقيد في #كتاب_شبهة.
بالفصل الرابع تحديدا واللي بحمل عنوان #الشبهة_الأكبر..
صفحة: 121

بتمنى من أي شخص خطرت بباله هالأسئلة إنه يروح الآن ويفتح صفحة 121 من الكتاب...
قبل ما هالأسئلة لا سمح الله تخطف إيمانه!

* رابط الكتاب pdf:
https://cutt.us/d4Waq

امبارح دخلت عالبنك وكان قدامي دور طويل، وقتها صرت أفكر بأي إشي أشغل حالي فيه لحتى ييجي دوري..

وقلت: أرد عمسجات البيج؟ لا لا بتاخد وقت..
طيّب أرن على أختي؟ ييي لو حكت ما بتسكت..
طيّب أقرأ من الكتاب اللي بين إيدي؟ لا مش رح أركز..
طيّب شو أعمل؟؟
.
.
للأسف مهما حاولت أعمل إشي مفيد ما رح أقدر لإنه بالي مشغول متى ييجي دوري..
ما رح أقدر أركز بإشي لإنه بخاف ينادوا عرقمي وأنا مش سامع..
ولو التهيت بإشي مفيد رح أتشتت لإني كل شوي مضطر أرفع راسي أشوف متى ييجي دوري..
.
.
خطرلي لحظتها كم فكرة "الإنتظار" بشعة!
وكيف إنها بتحرمنا نلتفت لحياتنا..
وكيف إنه الإنتظار كفيل يعطّل إنجازنا ويحرمنا نعيش الحاضر اللي بين إيدينا..

خطرلي كم في ناس ضيّعت سنوات من حياتها وهي بس بتنتظر!
كم ناس علّقوا أحلامهم وطموحاتهم وشغفهم على شيء بنتظروه!
كم في ناس ربطوا سعادتهم على إشي مش موجود، وكل شوي برفعوا راسهم وبتركوا كل إشي بين إيديهم حتى يشوفوا لو أجى أو قرب دورهم!
.
.
ليه بننسى دايما إنه الأشياء اللي بننتظرها ممكن ما تصير أصلا!
وليه بننسى إنه ممكن نموت قبلها!
وكيف نسينا حياة رحبة فسيحة مدهشة بين إيدينا، وقررنا ننتظر حياة ممكن ما إلها وجود أصلا ولا بيوم كانت مكتوبة إلنا..

عشان هيك..
ما تنتظروا إشي..
عيشوا اللحظة اللي بين إيديكم بكل تفاصيلها..
وإياكم تعلقوا سعادتكم وأحلامكم على إشي مش موجود أصلا..
.
.
وديروا بالكم تخسروا حياتكم على (وهم)!
وتفرطوا بسنوات من عمركم على (ولا إشي) !

نصيحة..
قبل ما ترفعوا راسكم وتكتشفوا إنه الدور كثييييير مطول...
أو
قبل ما تكتشفوا إنكم بتنتظروا بمكان ما إلكم فيه دور أصلا!!!
#ARK

أحكيلكم إشي كفيل يحيي الأمل فيكم ويخليكم تضحكوا من قلبكم!
بالضبط مثل ما ضحكت إمكم "عائشة" عليه!!

تقول عائشة رضي الله عنها في الحديث الصحيح:
لما رأيت من النبي صلى الله عليه وسلم طيب نفس قلت: يا رسول الله ادع الله لي.
فقال: اللهم اغفر لعائشة ما تقدم من ذنبها وما تأخر، وما أسرّت وما أعلنت.

فضحكت عائشة حتى سقط رأسها في حجرها من الضحك!
فقال لها رسول الله صلى الله عليه وسلم: أيسرّك دعائي؟
فقالت: وما لي لا يسرني دعاؤك!!

فقال صلى الله عليه وسلم:
والله إنها لدعائي لأمتي في كل صلاة. <3

#ARK

أنصحكم نصيحة غريبة!!

ما تعملوا (فييك أكاونت) بحياتكم!
إلا لو كان لشيء طارئ وضروري ومستعجل ولفترة بسيطة ولغرض واضح ومؤقت..

لكن إنكم تعلموا حساب على أي تطبيق أو موقع ويكون "فييك" فهذا خطأ كبير جدا بترتكبوه بحق أنفسكم!!

الدراسات النفسية بتحكيلنا إنه كونك مجهول فهذا كفيل يعطّل وسائل التحكم عندك، وكفيل يعطّل ضميرك ووعيك الذاتي وشعورك بالمسؤولية الشخصية، وكفيل يعطّل أخلاقك وشعورك بالذنب والخزي والخوف والعار بعد أي خطأ بصدر منك !!

والسبب:
- تقليل نماذج المحاسبة الإجتماعية ( ما حد بالمجتمع بعرف مين أنا)!
- تقليل الإهتمام بتقييم الذات ( ما دام ما حد بعرفني، ما رح أكترث لمبادئي وقناعاتي وأخلاقي ورح أعمل شو بنفسي) !!

وكونك من "فييك أكاونت" فهذا رح يخلق شيء يسمى (سلب الذات)،
وهي حالة نفسية مــــا بخضع فيها السلوك لمبادئك وأخلاقك..
بالعكس..بخضع فيها السلوك لمقتضيات الموقف اللي بتمر فيه، ولنوازعك وشهواتك اللحظية والآنية!!
ورح تسود رغبتك في تحقيق متعة مباشرة على قدرتك على تعطيل هالرغبة..!

الحسابات الوهمية خلقت شخصيات في الواقع إشي، ومن ورا الشاشة إشي مختلف تماما..

ومع استرسال الشخص بالكلام من خلال حسابات وهمية بوصل مرحلة بختفي فيها صوت ضميره، والمشكلة الحقيقية لما يوهم نفسه إنه كل إشي بصدر منّه من خلالها ما بمثله..
اللي بمثله فقط شخصيته اللي بتعرفها الناس عنه في الواقع..!!
.
.
مرة قرأت دراسة مخيفة بتحكي عن المجازر الوحشية اللي ارتكبتها بعض الجيوش في حق الأبرياء..
وتبين إنه أكثر هالجيوش وحشية كانوا قادتها يغيروا أسماء جنودهم قبل المعركة، وبنفس الوقت يحطوا قناع على وجوههم!
يعني كانوا (يحجبوا ويسلبوا ذاتهم) وبالتالي الجندي برتكب أفظع الجرائم لإنه بحمل اسم آخر، ووجه مغطى وما حد بعرفه..!

ومجرد ما أنهى الجندي المعركة كان ينزع قناعه ويرجع لإسمه الحقيقي ويكمل حياته طبيعي بدون ما يرف إله جفن على ضحايا قتلها ومزق أشلائها!!
لإنه ببساطة "سلب ذاته" وأوهم نفسه إنه كل إشي صدر منّه ما كان منّه!!
.
.
.
وآخر إشي..
حتى لو أخفيتوا أنفسكم، وحتى لو ما حد عرفكم، وحتى لو تنكرتوا لذواتكم
ما تنسوا إنه (الله) بعرفكم!!

سبحانه...
يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنْزِلُ مِنَ السَّمَاءِ وَمَا يَعْرُجُ فِيهَا وَهُوَ مَعَكُـــــــــــــمْ أَيْنَ مَا كُنْتُــــــــــمْ !!

وَاللَّهُ بِمَا تَعْمَلُونَ بَصِيرٌ
#القرآن_الجميل
#ARK

من أكم يوم كنت مع أحد أصدقائي، وأثناء الكلام كان بخبرني عن شغلة صارت معه وما كان قصده يحكيلي عنها، لكنها أجت لحالها بسياق الكلام..
وكان الحوار كالتالي:

مهو أنا كنت حاسب حسابي هالشهر أخلّص أقساط السيارة، بس في شب مسكين ظروفه صعبة كنت مداينه من مدة وكان الأصل يسدني هالشهر..
وكنت بدي أرن عليه أذكره بوقت السداد..
لكني عرفت إنه إمه الفترة الأخيرة تعبانة وبطارد فيها عالمستشفيات.. فبعتله مسج وقتها:
معلّم..بخصوص موضوع الدين انسى..
مسامحك دنيا وآخرة، وربنا يقوّم الحجة بالسلامة..

وهسا تأجلت أقساط السيارة للشهر الجاي، فهمت عليّ؟!
--------
.
هو ما كان قصده يحكيلي عن هالخير اللي عمله، بس هو كان بحكيلي ليه تأخر بسداد أقساط سيارته..

المهم مجرد ما خلّص كلامه أنا ابتسمت وصرت أضحك..
وقلتله والله يا معلم نيــــــــالك!!!

هو انصدم قلي مالك؟
شو اللي بضحك؟؟

قلتله استنى أوريك شغلة..فتحت تلفوني وعملت بحث سريع على جوجل، وقلتله تفضل شوف!!

بلّش يقرأ بصوت عالي:
قال صلى الله عليه وسلم..
أُتِى اللَّه تَعالى بِعَبْد مِنْ عِبَادِهِ آتاهُ اللَّه مَالًا، فَقَالَ لَهُ: ماذَا عمِلْتَ في الدُّنْيَا؟ قَالَ: يَاربِّ آتَيْتَنِي مالَكَ فَكُنْتُ أُبايِعُ النَّاسَ، وَكانَ مِنْ خُلُقي الجوازُ، فكُنْتُ أَتَيَسرُ عَلى المُوسِرِ، وأُنْظِرُ المُعْسِر. فَقَالَ اللَّه تَعَالى: أَنَا أَحقُّ بِذا مِنْكَ، تجاوزُوا عَنْ عبْدِي!!

رجعلي التلفون وقلي ما فهمت كثير..اشرحلي بالله..
حكيتله في شخص ربنا أعطاه مال، ويوم القيامة لما ربنا سأله عن خير عمله، قله ما عندي غير إني كنت أداين الناس، ولما ييجي يوم السداد كان اللي ما يقدر يسدني منهم أسامحه وأعفو عنه..

فربنا قله:
أنا أحق بذلك منك..
تجاوزوا عن عبدي!!
.
.
---------
ما أظن بيوم أنسى نظراته لحظتها..!
سألته فهمت الحديث؟
ضل ساكت وما حكى حرف..
رجعت كررت سؤالي..مالك؟ فهمت الحديث..؟

ابتسم وقلي:
آه.. والله العظيم فهمته..ومستحيل أنساه..!!

وبعفوية قلي: بس بالله تعيد آخره؟!
.
.
أنا أحق بذلك منه..
تجاوزوا عن عبدي..!!
.
.
#ARK
وَإِن كَانَ ذُو عُسْرَةٍ فَنَظِرَةٌ إِلَىٰ مَيْسَرَةٍ ۚ وَأَن تَصَدَّقُوا خَيْرٌ لَّكُمْ ۖ إِن كُنتُمْ تَعْلَمُونَ <3

الله..أكبـــــر..
الله أكبر.. من كل إشي..!

الله أكبر من كل همومي !
الله أكبر من كل لحظة ألم تسللت لقلبي..
أكبر من كل مصيبة استنزفت عمري..
أكبر من خذلان أقرب الناس إلي..
أكبر من كل ذنب كان حاجز بيني وبينه..
أكبر من كل لحظات الضياع والوجع اللي بتعصف بحياتي..
الله أكبر من دنيا ربطت فيها سعادتي..
أكبر من اهتمام كنت بنتظره من أقرب الناس إلي..
أكبر من ناس رفضت تسمعني..
وأكبر من كره وكِبر وظلم وحقد عشعش بقلوبهم..
.
.
الله أكبر من كل إشي بحول بيني وبين أحلامي وأهدافي..
أكبر من كل خطوات استصعبت أكملها..
وأحلام قررت أتنازل عنها..
وصراعات ياما فكرت أنسحب من مواجهتها..
.
.
الله أكبر من كل لحظة فتور حرمتني من قربه..
من كل مرة حرمت فيها حظ روحي من كلامه..
من كل لحظة كسل كانت حاجز من السجود فيها بين ايديه ومناجاته..
من كل إشي شغلني عن فكرة ذكره واستحضار رحمته ومعيته..
.
.
الله أكبر من كل إشي..
الله أكبر من كل إشي!

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً ❤

#القرآن_الجميل
#ARK

من أكم يوم دخلت على أحد شركات الإتصالات وكان المكان كثير أزمة والدور طويييل جدا..

مباشرة دخلت وراي بنت وكانت حاملة أكثر من كيس وواضح عليها علامات التعب والإرهاق..

ما في مكان نقعد فيه والكراسي كلها مليانة، وأقل شيء الواحد بدو يستنى نص ساعة حتى ييجي دوره..

وأخيرا وبعد طول انتظار قرّب دوري ودور البنت اللي فاتت وراي..

وفي هديك اللحظة صار موقف أدهشني!
ما ببالغ إنه هالموقف ترك أثر رهيب جواتي، وأنقذني من لحظات فتور وتعب كنت بمر فيها..

لحظتها دخلت حجة كبيرة بالعمر..
كانت بتمشي شوي شوي ومش قادرة تحمل حالها..
قامت البنت "اللي دخلت وراي واللي صارلها أكثر من نص ساعة بتستنى دورها" وقالت للحجة:
أشوف ورقة الدور اللي معك!
وقامت أخذت ورقة دورها وأعطتها ورقتها!!

وقالت إلها:
ما في داعي تستني، هيّ شوي وبيجي دورك.. !!!

ابتسمت الحجة وصارت تدعي إلها بدعوات من قلبها..
ورجعت البنت لمكانها بكل عفوية وهي ممكن غير مدركة إنه هالموقف البسيط ممكن يكون السبب في نجاتها!
وإنه هالموقف دَفع أقدار سيئة كانت رح تصيبها..
ممكن ما بتعرف إنه دعوات الحجة أمّن عليها ملائكة..
ولا بتعرف إنه في اللحظة اللي أعطت فيها دورها للحجة كانوا الملائكة في الملأ الأعلى بنادوا بإسمها!!
.
.
.
طلعت من المكان وأنا مدهوش من حجم الخير الساكن بقلب هالبنت!
وكيف إنه الدنيا مثل ما بتصدمنا بناس سيئة كمان بتصدمنا بناس ما بنقدر لما نشوفهم إلا ندعيلهم ونقول: الدنيا لسه بخير..
.
.
للبنت اللي قالت للحجة: ما في داعي تستني، هيّ شوي وبيجي دورك.. !!!

شكرًا!
وأرجوك خليك مثل ما إنت..
وما تسمحي للدنيا تغيرك..

وإلهي مثل ما جبرتي خاطر هالحجة إنّه يجبر خاطرك!
#ARK

هل سبق وخطرلك تعمل خطتك السنوية بالتاريخ الهجري؟!
ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر، واللي غالبا أول مرة بتسمع فيه بحياتك! ")
لكـــــن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!

الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..
معظم تواريخنا الإسلامية مرتبطة (بالعمل والإنجاز)!
إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!
ما بهمنا جدا تواريخ ميلادهم...لكن بهمنا تواريخ ميلاد قلوبهم لمّا لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لسبدنا عمر إنه يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..
لكنه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
يوم الثلاثاء 1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا (فتح لك) من غير (هجرة)..!

#ARK

اليوم بسأل إمي:
هسا لو إنت أدركتي لحظة الهجرة، كنتِ رح تهاجري مع النبي -صلى الله عليه وسلم - وتتركي بيتك وحياتك في مكة؟؟!!

فقالت: طبـــــــــعا آه بهاجر وأول وحدة كمان..
وسرحت بخيالها وصارت تقول: أنا أصلا كنت رح أكون مع أسماء بنت أبو بكر وهي رايحة توصّل إلهم أكل..
أنا اللي رح أطبخ أصلا "))))

وكنت رح اضرب أبو جهل عشان مدّ إيده على أسماء "الله يكسّر إيديه" لما سألها وين أبوك أبو بكر؟!

وفجأة قالت: يييي والله يا خوفي إنت اللي ما تهاجر! ")))
.
.
صدقا كان من أجمل الحوارات اللي خضتها بحياتي مع إمي..
كان نقاش جدا عفوي وجميل خصوصا لما أقنعتها وارتاحت إنه والله العظيم كنت رح أهاجر يمّة! ")))

انتهى نقاشنا لما حكيت لإمي قصة صحابي منعته ظروفه وكبر عمره يهاجر مع الرسول وأصحابه..
لكن هالصحابي ما تحمّل برودة الكفر في مكة..
وما تحمل فكرة إنه الصحابة بصافحوا وجه النبي صلى الله عليه وسلم وهو لأ..

فقرر يهاجر..
وللأسف وهو في الطريق أدركه الموت..
وفي لحظات احتضاره ضرب كف بكف وقال: اللهم هذه بيعتي لك.
وضرب كف بكف وقال: اللهم هذه بيعتي لرسولك.

ومات!

فنزلت فيه آية:
وَمَن يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً ۚ وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ ۗ وَكَانَ اللَّهُ غَفُورًا رَّحِيمًا.
.
.
.
إمي شعرت إنها بتشبه هالصحابي!
هي كمان كانت حابة تهاجر مع الرسول وأصحابه..
كانت حابة تمشي مع أسماء عالغار وتخاطر بحياتها..
كانت حابة تقدم أي شيء....
حتى لو طبخة تطبخها لرسول الله حتى يدعيلها..!
.
.
بعفوية لقيت إمي بعد هالقصة بتضرب كف بكف وبتقول:
اللهم هذه بيعتي لك!
وضربت كف بكف مرة ثانية وقالت:
اللهم هذه بيعتي لرسولك!

#القرآن_الجميل
#ARK