لحد هاي اللحظة مش قادر أسامح نفسي عشان مرة وأنا طالع من البيت لمحت طالبة مدرسة ما أظن عمرها بتجاوز 15 سنة واقفة مع شب أقل شيء عمره 20 سنة ورا شجرة قاعدين بحكوا..

كانت البنت كثير خايفة !
ومبين عليها متوترة جداً..

ما بعرف كيف ما وقّفت.. كان عندي موعد مهم ومتأخر عنه أصلاً..
بعد ما مشيت شوي صفنت باللي عملته!
ولك كيف ما وقّفت ؟؟!!!
ليه ما نزلت تحكي معها وتنبهها وتحذرها وتنصحها.. ؟

مباشرة لفيت ورجعت..
بس للأسف ما كانوا موجودين..
وقعدت أكثر من نص ساعة بلف بالشوارع بس بدوّر عليهم..
ما تركت شارع ولا زقة ولا مكان إلا وصرت أدور فيه..

كنت عارف إنه هاي البنت منيحة..
وإنها قررت تحكي مع الشب بعد حنان واهتمام فقدته ببيتها ونزلت تبحث عنه في الشارع..
كنت عارف إنه أبوها مشغول بوظيفته.. وإمها مشغولة مع الجارات أو حتى ممكن بالمركز !
وإنه إخوانها ما كلفوا خاطرهم بيوم يطمئنوا على أختهم..

مخي ما وقف تفكير شو ممكن يكون مصير هالبنت لو انضحك عليها..
وكيف رح تنجر لطريق غلط بأول عمرها..
وكيف راح يضيع مستقبلها وتفقد معنى لحياتها..

للأسف ما لقيتهم..
وثاني يوم بنفس الوقت ضليت ألف بالشوارع على أمل ألاقيهم..
بس عالفاضي..

بهديك اللحظات أذّن العصر..
وخطر ببالي "الله" !

ما في غيره يساعدني..

طلبت منه أول إشي يسامحني عشان ترددت..
وطلبت منه ينقذ البنت ويساعدها..
وعاهدته ما أتردد بيوم من الأيام ولو لحظة عن خير ممكن أعمله أو شر ممكن أدفعه..
ودعيته توصل هالكلمات للبنت هديك و لغيرها كتيييير ما شفتهم..

إنه ديروا بالكم !
إنتوا لسه صغار والدنيا قدامكم..
صدقوني ما في شب بحكي معكم وإنتوا بهيك عمر إلا بكون بدو يجركم لطريق غلط..
طريق رح تندموا طول عمركم عشان مشيتوا فيه..
طريق رح يفقدكم إشي جواتكم صعب الأيام تسترجعه..
وحتى لو انحرمتوا من عطف وحنان ببيوتكم فلا يعني الشارع رح يكرم عليكم فيه !

ما تنسوا "الله" !
الله بحبكم وبدو الخير إلكم..
ما تتخلوا عنه بيوم
وما تفقدوا إيمانكم فيه..

وديروا بالكم تنسوا تدعوه يربط عقلوبكم ويحفظكم ويحميكم..
وأحسنوا الظن فيه وهو رح يكون السند والعون والحب والخير إلكم !

واحفظوا الله يحفظكم ..
احفظوا الله يحفظكم !

#ARK

كل إشي إله دخل برقم 7 بتحبه..
وبالتالي أكيد شهر 7 كان شهرها المفضل..

السموات السبع..آيات الفاتحة..طواف الكعبة..ألوان الطيف..حديث سبعة يظلهم الله في ظله..حتى سورتها المفضلة في القرآن سورة رقم 7 !

كانت في كل مرة بتحضّر لشهر 7 وكإنه سنة جديدة..
خطة جديدة..مراجعة للخطة الماضية..قائمة كتب لازم تقرأها..علاقتها مع الله كيف؟..
وردها من القرآن..وشو لازم تنجز من هون لشهر 7 الجاي..

وقال شو حتى عرسها بدها تشرّط على اللي بدو يتقدم إلها إنه يكون بشهر 7 ^^
.
.
كان الأصل اليوم تكون قعدة صاحبتنا المعتادة حتى ترسم فيها خطتها وأحلامها لشهر 7 الجاي..

بس للأسف ما قعدتها..!

هي تغيرت تماماً..
وفقدت الشغف والدافع في كل خطواتها..
صارت تشعر إنه ما في إشي في الحياة مستاهل نتعب عشانه..
وأصلاً لا أهل ولا صحاب ولا حد في هالدنيا بقدّر إشي ..
حتى مبادئها وقيمها اكتشفت إنه ما كانوا بستحقوا تقاتل عشانهم..
أصلا هي مش عارفة حالها هي ع صح ولا غلط..
الحياة طلعت أصعب مما كانت بتتصور..
وفكرة الثبات فيها بمثّل استثناء مقارب للمستحيل..
حتى إنها وقعت بذنوب ما كانت بتتوقع بيوم من الأيام توقع فيها..
صح كان في خير جواتها يدفعها للتوبة والندم..
بس حتى ولو .. مين كان يتخيل إنه حياتها حتصير عبارة عن توبة وندم !
وين راح شغفها وأحلامها..؟
كيف هيك تنازلت عن مبادئها ؟
كان عادي تفرط بقيمها وأخلاقها؟
يا الله من زمان ما شفنا حتى ابتسامتها !
.
.
الإشي الوحيد اللي ما تغير عليها رقم 7 !
ضل رقمها المفضل وكل إشي إله دخل فيه بتحبه..

السموات السبع..آيات الفاتحة..طواف الكعبة..ألوان الطيف..حديث سبعة يظلهم الله في ظله..حتى سورتها المفضلة في القرآن سورة رقم 7 !
.
.
صفنت وهي بتحكي :
سورة الأعراف !
سورة الصراع ما بين منظومة الحق والباطل..
سورة أهل الجنة والنار..
السورة اللي بتكشف استراتيجيات الشيطان في اغوائنا !
سورة قصص الانبياء مع أقوامهم..
وكيف إنهم واصلوا طريقهم رغم عناد أقوامهم وأهلهم وأقرب الناس إلهم..
سورة الثبات حتى لو كانت فكرته بتمثّل استثناء بقارب المستحيل !
.
.
بدت تقلب بصفحاتها وآياتها زي إم بتتفحص وبتتحسس وجه إبنها بكل لهفة بعد طول غياب..

كانت مع كل آية بتستعيد شغفها وطاقتها حتى تستأنف صراع كانت قررت من مدة تنسحب عن خوضه..

رجع القرآن بوصلتها واكتشفت سبب فتورها وضعفها واستسلامها..
ومن خلاله كانت حريصة تشكّل من جديد مسارها وهويتها وكينونتها..

ما مسكت دموعها لما مرت على آية:
وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ *
وَلَوْ شِئْنَا لَرَفَعْنَاهُ بِهَا وَلَٰكِنَّهُ أَخْلَدَ إِلَى الْأَرْضِ وَاتَّبَعَ هَوَاهُ ۚ ...
.
.
وبكل عفوية صارت تردد:
لا مش انا ..
مش انا ..

وهمّت بسرعة ع دفترها مستحضرة حسن ظنها بالله حتى تكتب خطتها لشهر 7 الجاي..

واللي كانت بعنوان :
لرفعناه بها..!!

#القرآن_الجميل
#ARK

امبارح كنت بالهند ^^
يا الله شو بتجنن..
كنت في زيارة لمعتزل مخصص لممارسة التأمل واليوغا في إحدى القرى النائية..
وصلت تقريبًا قبل الفجر وكانوا الناس في المعتزل صاحيين بنشدوا "الأراتي" وهي ترنيمة سنسكريتية بنشدوها كل صبح..

بصراحة كيّفت عليها علما إني ما كنت فاهم إشي..
لما خلصنا "الأراتي" رحنا على قاعة معتمة كلها بخور وناس قاعدين على الأرض..
كانت هالقاعة للتأمل وكل حد فينا بقعد لمدة ساعتين تقريبا بدون ما يتحرك حركة وحدة..
وقتها شرحولي لإني جديد إنه لازم أتنفس بهدوء وأحكي "المانترا" شوي شوي..

أوم.
نا.
شي.
فا.
يا.
أوم ناماه شيفايا

ما صدقت وتخلص هالساعتين !
والذبان والبعوض أكلني أكل..
أصلا مضيتها صافن بالناس اللي جنبي إنه كيف هيك بقدروا يتأملوا؟
زي ما بصير معي بمكتبة الجامعة لما أصفن بالناس اللي بدرسوا كيف هيك بدرسوا؟!

بعدها حكولي لازم يكون إلك معلم لممارسة اليوغا..
ما قدرت أحصّل "غورو" يعني مزاول يوغا عظيم حتى ينقلي التنوير وحكولي عملية نقل التنوير من الغورو للتلميذ اسمها "مانتراتفيريا" يعني قوة الوعي المُنار !

المهم دبرولي مزاول يوغا عادي ماشي حاله..
وأكيد الغورو ما رح يرشدني وأنا جاي من الأردن والمعتزل مليان بنات من أمريكا وأوروبا !

بصراحة عصبت..
وقلتهم عليم الله ما انا حاضر معكم جلسة التأمل الجاي!
أقلكم..
والله ما انا مطلق العنان للكونلداليني شاكتي تاعتي..
ومسامحكم بالصعود للسبع شاكرات "مراكز الطاقة"..

كنت مخنوق جد..
وراسي صدع من الاناشيد السنسكريتية اللي مش فاهم منها إشي..
.
.
.
*******
إمي أنقذتني لما صحتني من النوم أصلي الفجر!
حكتلي يا ماما لسه ما أقاموا الصلاة يلا قوم بتلحقها بالمسجد..

قرأ الإمام من سورة الحديد:
{هُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ ثُمَّ اسْتَوَى عَلَى الْعَرْشِ يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنْزِلُ مِنَ السَّمَاءِ وَمَا يَعْرُجُ فِيهَا وَهُوَ مَعَكُمْ أَيْنَ مَا كُنْتُمْ وَاللَّهُ بِمَا تَعْمَلُونَ بَصِيرٌ}

رجعت من الصلاة وكنت ناوي أحكي لإمي عن الحلم اللي حلمته بالهند..
بس لقيت حالي بحكيلها عن: وَهُوَ مَعَكُمْ أَيْنَ مَا كُنْتُمْ !

وإنه كيف ربن قريب منا!
وكيف إنه إحنا مش بحاجة لوساطة حد حتى نشعر بقربه ولطفه ورحمته ونوره فينا..
.
.
.
وانا رايح أكمل نومتي إلا إمي بتحكيلي:

هو معك أينما كنت..
فكن معه أينما كنت !

#القرآن_الجميل
#ARK

قبل فترة صادفت مقهى لطيف بطريقي فقررت أمر عليه..
كنت حامل بإيدي كتاب لأحد أشهر الملاحدة..!

دخلت المقهى واخترت طاولة في الزاوية وقعدت أستنى الشخص اللي بياخذ الطلبات حتى أوصيه على قهوة سادة..

لحظات وأجى شب بالثلاثينيات تقريبًا..
أخذ طلبي وبعد ما مشى خطوتين رجع عليّ وحكالي:
هذا الكتاب إلك؟؟
قلتله: آه
- عادي أنصحك نصيحة؟؟
- أكيد تفضل..
- ولا استنى استنى خليني أعمل القهوة وأرجعلك..
.
.
اسمع..
نصيحة سيبك من هاي الكتب والله غير توجع راسك..
أنا صارلي 5 سنوات ملحد..
ما بتتصور شو إشي صعب قدام أهلك لما يحسوا عليك..
وبكرا أكيد رح تتزوج، وبصراحة حرام تاخذ بنت مسلمة تظلمها معاك..
وبنفس الوقت هات لاقي ملحدة تتوافق معها..
غير إنه الحياة بدون الله صعبة..
هيني ملحد !
بقلك إنها صعبة..
غير إنك لو كملت قراءة بهيك مواضيع رح تنصدم من كثير أشياء تربيت وتعلمت عليها..
يعني لما تكتشف فجأة إنه محمد مش نبي والقرآن مش كلام الله..!!
وإنه كل هالأديان صناعة بشرية وإنه إحنا مضحوك علينا..

قاطعته:
طيب وإنت توصلت لهيك بعد بحث وقراءة وهيكا؟

آه آه طبعاً..
صارلي سنوات بقرأ وببحث وبقلب بالكتب..
بتعرف إنه محمد سرق أغلب الدين من زاردشت !
بتعرف إنه زاردشت كان عنده وضوء وصلوات خمسة وعذاب قبر ويوم حساب؟؟

استنى استنى ما تفكرني بحاول أخليك تكفر..
بس بنصحك سيبك من كل هالطابق..
صدقني رح تندم !
.
.
****
بصراحة انا ما بعرف لو كنت جاد وصادق في بحثك أو لأ !
لإنه بعتقد لو كلفت خاطرك شوي وقرأت منيح وما اكتفيت بفيديو لحد عاليوتيوب ما بحترم عقلك كان اكتشفت إنه "الأفستا " وهو كتاب زارادشت كتب بعد وفاة "محمد" بأكثر من 700 سنة !

لا يا زلمة شو بتحكي !

وفصّلت بالإجابة بما لا يدع مجالاً للشك إنه كل كلامه غلط بغلط..
وقلتله تأكد زي ما بدك..

وقتها قام وذكر مجموعة شبهات مختلفة وأتبعها بـــ:
"شفت إنه الدين مش من عند الله!"
وصار نقاش طويل لأكثر من ساعة تقريباً..

- طيّب تسمحلي أنا أنصحك نصيحة؟
- أكيد تفضل..
.
.
- إنت حر سواء حبيت تآمن أو تكفر..
لكن أرجوك كون صادق مع نفسك..
ما تدّعي إنك بحثت وقرأت وإنت بس حاضر أكم فيديو، وقارئ أكم مقالة بدون ما تكلف حالك تشوف شو الردود عليهم..

إنت ما بدك تآمن !
إنت هيك مقرر صدقني..
إنت بدك أي إشي يشجعك تترك الدين..
بتتعلق بأي شبهة حتى تفكر حالك قررت صح..
بتحاول تقنع حالك بإشي إنت ما بذلت فيه أي جهد حتى تتوصله..
بتتعجرف وبتكابر حتى تغطي عصوت ضميرك اللي ما بمل من تأنيبك في كل لحظة بتصفن فيها بالسما..
إنت بدك إشي يسوغ استسلامك لشهواتك ورغباتك..

سهل تضحك عليّ وتقنعني إنك بحثت جد وتعبت!
وسهل تضحك عشيخ ما امتلك جواب لكل أسئلتك..
سهل تضحك عحالك..

بس صدقني مش سهل تضحك عربنا..!

------
القرآن بوضح هاي الحقيقة..
وبحكيلنا إنه في ناس قلوبها صادقة وحريصة على الوصول للصواب..
وفي ناس في قلوبها زيغ ومقررة مسبقاً تعرض، وتكابر، وما تخضع وتستسلم للحق..

هُوَ الَّذِي أَنزَلَ عَلَيْكَ الْكِتَابَ مِنْهُ آيَاتٌ مُّحْكَمَاتٌ هُنَّ أُمُّ الْكِتَابِ وَأُخَرُ مُتَشَابِهَاتٌ ۖ فَأَمَّا الَّذِينَ فِي قُلُوبِهِمْ زَيْغٌ فَيَتَّبِعُونَ مَا تَشَابَهَ مِنْهُ ابْتِغَاءَ الْفِتْنَةِ وَابْتِغَاءَ تَأْوِيلِهِ ۗ وَمَا يَعْلَمُ تَأْوِيلَهُ إِلَّا اللَّهُ ۗ وَالرَّاسِخُونَ فِي الْعِلْمِ يَقُولُونَ آمَنَّا بِهِ كُلٌّ مِّنْ عِندِ رَبِّنَا ۗ وَمَا يَذَّكَّرُ إِلَّا أُولُو الْأَلْبَابِ

والقرآن بقدملك نموذجين مختلفين في مسألة الإيمان والكفر:

وَإِذَا مَا أُنزِلَتْ سُورَةٌ فَمِنْهُم مَّن يَقُولُ أَيُّكُمْ زَادَتْهُ هَٰذِهِ إِيمَانًا ۚ فَأَمَّا الَّذِينَ آمَنُوا فَزَادَتْهُمْ إِيمَانًا وَهُمْ يَسْتَبْشِرُونَ (124) وَأَمَّا الَّذِينَ فِي قُلُوبِهِم مَّرَضٌ فَزَادَتْهُمْ رِجْسًا إِلَىٰ رِجْسِهِمْ وَمَاتُوا وَهُمْ كَافِرُونَ (125)

وأي نموذج بتختاره بعتمد على صدق قلبك أو زيغه..
والقرآن جاهز ومستعد..
وعادي بصارحك وبحكيلك:

إنت شو بدك ؟
بدك تآمن ولا تكفر ؟
بدك القرآن يزيد إيمانك ولا رجسك؟
.
.
كله موجود !
-------------------------
بواصل القرآن إدهاشنا وبحكيلنا:

أَوَلَا يَرَوْنَ أَنَّهُمْ يُفْتَنُونَ فِي كُلِّ عَامٍ مَّرَّةً أَوْ مَرَّتَيْنِ ثُمَّ لَا يَتُوبُونَ وَلَا هُمْ يَذَّكَّرُونَ (126) وَإِذَا مَا أُنزِلَتْ سُورَةٌ نَّظَرَ بَعْضُهُمْ إِلَىٰ بَعْضٍ هَلْ يَرَاكُم مِّنْ أَحَدٍ ثُمَّ انصَرَفُوا ۚ صَرَفَ اللَّهُ قُلُوبَهُم بِأَنَّهُمْ قَوْمٌ لَّا يَفْقَهُونَ (127) لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيمٌ (128)

فَإِن تَوَلَّوْا فَقُلْ حَسْبِيَ اللَّهُ لَا إِلَٰهَ إِلَّا هُوَ ۖ عَلَيْهِ تَوَكَّلْتُ ۖ وَهُوَ رَبُّ الْعَرْشِ الْعَظِيمِ (129)

#القرآن_الجميل
#ARK

كل ما عيني تلمح تلفونه أنتبه لحضور مكثّف لقلوب حب حمرا في المحادثة..
وأحيانا قلوب حب صفرا..
فكرة استخدام قلوب الحب بشكل مبالغ فيه وخصوصًا باللون الأصفر اللي بعتبره من وجهة نظري الشخصية إشي محرم ذوقاً؛ خلاني أتأكد إنه الشب بتخوث !

وعلى سيرة المبالغة دخلت عالباص وكانت جداً مبالغة في لبسها..
بعرف إنه ما دخلني بس يا عمي والله من شكلها مبينة مش مرتاحة..
البنت كل شوي بتفتح تلفونها عالكاميرا الأمامية وبتتأكد من شكلها !
والله إني تضايقت عليها ..يعني والله مش حياة :\

أما شو واحد من الشباب لما شافها..
تغيرت قعدته تمامًا.. وفجأة فجأة صار يمزح مع الكنترول !
وعمل فيها الشب النهفة وخفيف الدم ..
ومع كل تنهيفه كان يتفرج عليها بطرف عينه حتى يشوف ردة فعلها !

وأنا طبعا صافن.. إنه معقول يحبوا بعض من هيك موقف؟ معقول؟؟
والله بعملوها تستبعدش !

المهم وبلا طول سيرة ..
هو أنا كاين أحسن منهم يعني..مهيني من الزهق قاعد بتأمل في هالناس أو بشيك على تلفوني..

==
بهديك اللحظة إجت عيني عليها ..
كانت ماسكة كتاب برتقالي صغير كان لونه ملفت بصراحة !
مكتوب عليه حِصن المسلم ..

تخيلوا هسا لانتبهت عليها ..
يا الله شو هادية في قعدتها.. شو وقورة في حركتها .. شو بريئة في ملامحها ..
غنيّة عن أي استعراض يكمّلها ..
كانت كل ما تقرأ كلمة تميّل راسها عالشباك وتغمض عيونها وهي بتمتم فيها ..
.
.
في الوقت اللي كان فيه كل الباص عالواتسب والفيسبوك ..
كانت أجنحة الملائكة بترفرف فوق قلبها ..

وفي الوقت اللي معظم كلامنا مش بإشي مفيد ..
كانت هي بتعاهد ربنا وبتحكي :
خلقتني وأنا أمَتُك وأنا على عهدك ووعدك ما استطعت !

وفي الوقت اللي كل الناس مشغولة بـِ ولا بإشي ..
كانت هي حريصة ما تنسى حظ روحها من القرآن !
.
.
كانت بتبتسم بصمت وهي بتشهِد الله وحملة عرشه وملائكته وجميع خلقه:
أنه هو الله لا إله إلا هو، وحده لا شريك له، وأن محمداً عبده ورسوله <3 !
.
.
.
الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ

#القرآن_الجميل
#ARK

قبل سنوات وصلتني رسالة من بنت!
كنت بتمنى أموت قبل ما اقرأها..
لإنها كانت بالنسبة إلي موجعة فوق الوصف..

وهيّ مضى على الرسالة سنوات وأنا لحد هاللحظة مش قادر أنساها..
مستحيل أنساها قطعًا..
بس يا ريت أقدر ما أخليها حاضرة بكل تفاصيل يومي وحياتي..
يا ريت بقدر أرجع للإنسان اللي كنته قبل الرسالة..
لما كانت الحياة حلوة أو بالأحرى لما ما كانت بهديك القسوة والظلم اللي شفتهم بعد ما قرأت الرسالة..
.
.
**
أنا بنت منيحة ومن بيت محافظ..
قبل الجامعة كنت بمراكز قرآن وبعرف الصح من الخطأ..
وكنت على قدر من الوعي يخليني ما أنجر ورا أي غلط..
وبصراحة أنا بنت حلوة وعمري ما كنت طالعة بمكان مع أهلي إلا ناس يوقفوا أمي ويطلبوا رقمها عشان عندهم إبن بدوروله على عروس..
وكنا نضحك وكانت إمي تجاوبهم لساتها سنفورة !
أكيد ما رح نجوزها هسا..

دخلت الجامعة وأنا واعية إنها بيئة مش سهلة والواحد بصادف فيها أشكال وألوان..
مع ذلك ومع كل حرصي وتحفظي وما بدي أطوّل عليك بالكلام وقعت بحب شب !
مع ذلك كنت حريصة إنه حتى بعلاقتي معه يكون فيه حدود..
وهو أصلاً أكبر مني وبفصل تخرجه..
وكنت حريصة أوجه الموضوع للحلال لإنه هو حكالي بعد سنة رح يتقدم إلي وأنا بكون سنة ثانية، وأظن أهلي رح يوافقوا فيما لو كنت سنة ثالثة أتزوج..

تطورت علاقتنا بشكل رهيب..
ما كنت متصورة إنه الحب حلو هالقد!
وغضيت النظر عن كل ملاحظات البنات حول الشباب لإني كنت شايفته غير عنهم..
وكان بينّا ثقة عمياء..

وهالثقة العمياء كان أحد أكبر تجلياتها لما مرة بلحظة ضعف غاب صوت الوعي والضمير وغاب عن بالي نظر ربنا اللي ما بفوته شيء مهما صغر..

ما تفهم من كلامي إني غلطت ووقعت بكبيرة..
لكن صدرت مني أفعال وتصرفات فاضحة كان الأصل ما تصدر مني وما توقعت بيوم تصدر مني..!

والنقطة المهمة
"أوووووه حكيت كتير آسفة..خلص ركز بالجاي"

النقطة المهمة إنه الثقة العمياء تجلت إني أسمحله يصور الإشي اللي صار فيديو..
بعرف رح تحكيلي إني غبية والأصل ما أسمح بس زي ما بحكوا: الحب أعمى!
أولها رفضت يصور لكني استسلمت إله، وبصراحة ما بقدر أشكك فيه ولا نتفة إنه هالشخص اللي رح يصير زوجي وأبو ولادي ممكن بيوم يستغلني ويبتزني !

خبرني لاحقاً وبعد إلحاح مستمر إنه حذف الفيديو ..
وأنا والله تبت لربنا وندمت وما رجعت أبدًا لهيك تصرفات..
وهو أصلاً تخرج وبطلت أشوفه زي زمان..
وما بدي أفصّل اكثر لكن انتهت علاقتنا !

تجاوزت الإشي..
واشتغلت على حالي ورجعت لربنا وهو أشعرني أكثر من مرة إنه قبل توبتي والدليل إنه فتحلي أبواب خير كثيرة، وبنفس الوقت كان الشب يحاول يرجع يتواصل معي وكنت أرفض تمامًا تمامًا حتى أثبت لربنا صدقي..
مع العلم كنت أحس حالي لسه بحبه وكنت ما رح أرفضه فيما لو تقدم إلي بالحلال..

مرت سنوات من الخير والعطاء والتطوع والإلتزام والصحبة الصالحة والقرآن واكتشفت إنه الحب ما طلع حلو هالقد..!
لإنه ما في أحلى من شعور الإنسان يكون قريب من ربنا..
والحب حلو هالقد لما يكون بالحلال وبرضى ربنا..

كنت كل ما أتذكر فصلي الأول أضحك عحالي كيف كنت هيك..
وأحكي الحمدلله..
.
.
تخرجت والشب هداك تقريباً من سنة بطّل يبعت إشي لإني كنت أعمله بلوك وخلص هو يئس مني تماماً وعرف إني صرت إنسانة غير، مو زي البنت إم الـ 18 سنة اللي كان يعرفها..

تقدملي شب على قدر كبير من الأخلاق والدين ووافقت عليه وتزوجنا الحمدلله..
وعايشين حياة أسعد منها ما في!
أسعد منها ما في حتى لحظة ما وصلني بيوم مسج من "فييك أكاونت"!
ما كنت أتصور إنه الدنيا بشعة هالقد..
كان المسج من هداك الشب بسألني فيه سؤال واحد:
ذاكرة الفيديو !

تجمدت بمكاني!
واضطريت أرد عليه شو بدك؟ مشان الله شو بدك ؟

خبرني وقتها إنه كان صادق معي لما طلبت منه يحذف الفيديو..
بس للأسف قدر يرجعه وكان ببتز فيي بشكل واضح وصريح إنه رح ينشره ويبعته لزوجي لو ما برد عليه !

مع ذلك لو شو ما صار مستحيل أرد عليه..
بس أنا عايشة برعب !
والفيديو فعلاً لسه موجود عنده..
وحكالي رح يرفعه يوتيوب ويبعته لكل الناس اللي عندي..
وهو برا البلد حتى لو بدي أخبر الجرائم الإلكترونية رح يكون الإجراء صعب وانتربول وأبصر شو وممكن تضيع القصة بين قصص ثانية كثيرة..

إحكيلي شو أعمل..مشان الله !
أنفصل عن زوجي وخلص قبل ما يعرف !
بس كيف أنفصل وما صارلنا 6 أشهر متزوجين وفش بينا مشكلة وحدة !
طيب أعترفله وأنا ما بضمن ردة فعله..وما أظن يستوعب إنه الغلط كان وأنا عمري 18 وكنت هبلة وغشيمة وهل رح يصدقني لو قلتله إنه الفيديو كان دقيقة استثناء وضعف من عمري اللي كنت حريصة فيه على ديني وأخلاقي وعفتي وحيائي !
طيب أحكي لأهلي؟
بتعرف أبوي رح ينجلط متأكدة..
وأخوي الكبير متأكدة ممكن بفورة غضب يقلتني !

مشان الله..شو اعمل ؟؟

**************
جاوبتها جواب طويل جدًا..
وحكلتها رح نآخذ بالأسباب بخصوص الجرائم الإلكترونية..
وطلبت منها ما تتسرع بأي تصرف وإني رح أربطها بناس يساعدوها..
وختمت الرسالة

بافتراض لأسوء سيناريو -لا سمح الله- ممكن يصير:

يعني لا سمح الله فعلاً يبعت الفيديو وزوجك وأهلك يعرفوا..
زوجك ما يتقبل الإشي وتنفصلي عنه لا سمح الله..
أهلك وإخوانك يتصرفوا بشكل عنيف معك..
وتتشوه سمعتك بين دائرة معارفك..

قلتلها هذا أسوء سيناريو ممكن يصير وحله ببساطة : "الله" !
خلص مش إنت تبتي وهالغلط كان دقيقة وزلة بعمرك القريب منه..
مش إنت حكيتيلي إنه هو أشعرك إنه غفرلك وتاب عليك..
صدقيني هو المهم فقط..

ولو صار هالسيناريو فهذا بلاء كبير ما إلك خيار غير الصبر عليه، صح رح تخسري زوجك وأهلك وسمعتك لكن تذكري هالدنيا لفترة محدودة..
بعرف إنه الكلام سهل بس ما إلك خيار غير تصبري وتحتسبي..
وصبر على هيك خيار صدقيني ما بليق فيه إلا الفردوس الأعلى..
ومع أول قدم في الجنة إن شاء الله رح تقسمي بربنا إنك ما شفتي بحياتك أي بؤس أبدًا..

أنا شفت صدق كبير برسالتك بس ديري بالك تركيزك ينصب على معادلة الدنيا فقط..
ما تنسي "الآخرة"..
هي العزاء والأمل وربنا رح يعوضك فيها عن كل ألم..
ورح ينتقم من كل حد ظلمك !

**********
الخاتمة:

هالبنت المظلومة !
غامدية هذا العصر..
واللي توبتها لو وزعت على أهل الأرض لوسعتهم..
ولعلها اليوم أقرب أهل الأرض إلى أهل السماء..

وصلني مسج منها من خلال صاحبتها:

أسوء سيناريو صار فعلًا..!!
بس أخوي ما قتلني ويا ريته قتلني وريحني من هالحياة !
شكراً إنك ذكرتني بمعادلة الآخرة وإنه الدنيا لفترة محدودة..
وإنه ربنا هو المهم فقط..
وإنه مع أول قدم بالجنة رح أقّسِم بربنا إني ما شفت أي بؤس أو شقاء في الدنيا..
يا الله معقول جد أنسى كل هالجحيم اللي عايشته..؟
معقول أنسى نظرة زوجي إلي لما عرف..؟
ونظرة الناس اللي كنت أفكرهم أقرب الناس إلي؟
جد رح أنسى الوجع والألم اللي تعرضتله لما أخوي الكبير ضربني بكل قسوة !

متى الآخرة؟
متى رح يتبدد كل هالوجع؟
متى رح أحط إلي أول قدم بالجنة؟

بتعرف إني كثير كنت بفكر أنتحر بس تذكرت "الآخرة" اللي صارت بتمثل إلي العزاء والأمل..
هي هسا بالنسبة إلي كل الأشياء اللي بخلت عليّ فيها الدنيا..
.
.
بدي اطلب منك آخر طلب..
ممكن تدعي ربنا يعجّل في قبض روحي..
لإني تعبت..

واشتقتله !

#ARK

من دون أيّ نيّة مسبقة انقاد لمغامرة فجائية..!
وللأسف هالمغامرة كانت سبب في وقوعه بخطأ كبيييير جدًا رح يندم عليه طول عمره..
مع العلم كان يشوف إنه مستحيل يوقع بهيك غلط في يوم من الأيام..

لكنه للأسف وقع !
.
.
صادفت كثير ناس ووصل على آرك كثير مسجات من بنات وشباب بوصفوا فيها ندمهم بعد وقوعهم بذنب كبير..
وأغلبهم كان يصرّح إنه لحظة الخطأ كانوا شبه فاقدين الوعي..
وشعروا نفسهم منساقين اتجاه الخطأ..
وما صحيوا على حالهم إلا بعد ما وقعوا وخلصوا !!

وأنا بدوري بهيك مواقف وكونه الخطأ صار وخلّص ما بملك إلا أذكرهم برحمة ربنا وسعة عفوه وبذكرهم بالتوبة وضرورة الثبات عليها وعدم الرجوع بأي شكل من الأشكال لهذا الخطأ..
وما بشوف نفسي مضطر أوصيهم "عالندم" وهو حاضر بكل كلمة وهمسة ودمعة ونبضة بقلوبهم !
.
.
*
يا ناس..
الله لا يحوجكم بيوم لحد يذكركم برحمة ربنا بعد غلط كبير وقعتوا فيه..
كلنا بنعرف إنه ربنا رحيم وبقبل توبتنا فيما لو أقبلنا عليه بصدق لكن ما تنسوا إنه الندم رح ياكلكم أكل، ورح يصاحبكم شعور كنتوا رح تآثروا الموت عليه..

عشان هيك حاب أوجه رسالة لكل حد فيكم لحد هاي اللحظة ما وقع بغلط كبير ولا ارتكب كبيرة:

أرجوك تثبت !

ودير بالك تفكّر إنه الثبات سهل وبالمتناول..
غيرك كان أشطر وأحرص وأكثر منك إلتزاماً لكنه للأسف وقع..
ودير بالك تغتّر بثباتك وتنسى فضل ربنا عليك..
وخلي ببالك إنه الحياة مخبية إلك كثير فتن ومغامرات..
لازم تمتلك إيمان قوي وإرادة صلبة حتى تواجهها..

وضروري ضروري تعرف..
إنه فش حد بوقع بغلط كبير فجأة..
الغلط الكبير إله كثيييييير مقدمات وصغائر !
وبالتالي راجع صغائر ذنوبك وتوب منها أول بأول وما تسمح إلها توصلك لكبيرة تتمنى لو الموت خطفك قبل ما توقع فيها !

ومن الأشياء اللي ممكن تساعدك إنه كل صبح تعاهد نفسك وتذكر حالك بالثبات..
وزي ما كل صبح بتتأمل بخزانتك حتى تعرف شو تلبس لازم كمان تتأمل بأفكارك وتصرفاتك وأفعالك..
أنا وين رايح؟ الموضوع الفلاني لازم أكون حذر فيه أكثر؟ أنا بدي أتجنب أي طريق ممكن يوصلني لحرام؟
لا لا بديش أندم !
بديش أرتكب خطأ أعيش كل عمري وأنا بحاول أصلح فيه..
.
.
الموضوع ما رح ياخذ منك دقيقة..
بس هالدقيقة كفيلة تمنحك وعي تقدر من خلاله تواجه أي غلط أو حدث فجائي ممكن يعصف فيك..

وما تنسى تدعي ربنا يعنيك ويساعدك ويقويك ويحفظك ويثبتك..!
**
.
.
.
رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِن لَّدُنكَ رَحْمَةً ۚ إِنَّكَ أَنتَ الْوَهَّابُ.

يارب ~ !

#القرآن_الجميل
#ARK

- سارة طالبة بتدرس بالأردنية، قررت بعد أشهر من التفكير تتخلى عن دينها !
ما كانت حابة إشي يقيّد حريتها..
وكانت شايفة إنه دين بتحكّم بتصرفاتها وعلاقاتها ولبسها وبفرض عليها تصلي باليوم 5 مرات، وتصوم شهر بالسنة بعزّ الحر والشوب، إشي رجعي وتخلّف وإحنا في القرن الواحد والعشرين !

___
*ا Sara طالبة بتدرس بجامعة شيكاغو، كانت أول صدمة بتتلقاها بحياتها لما أختها الوحيدة تركت البيت وهي بعمر الـ 18 وراحت تعيش مع الـ "بوي فريند" تاعها..
أولها كان في تواصل خفيف بينهم..
بعدها انقطع تمامًا حتى لحظة ما خبروها إنه أختها كانت ضحية لجريمة اغتصاب أودت بحياتها !

كان الخبر صادم ومؤلم وقاسي بالنسبة إلها..
خصوصًا إنها عايشة لحالها..
لإنه إمها وأبوها انفصلوا بعد مشاكل كثيرة وأبرزها الخيانة!
أبوها كمل حياته مع صاحبته وإمها أسرفت بالشرب حتى أدمنت واختفت من حياتها وما بتعرف وين آخر إشي صفت..
آخر رسالة وصلتها من إمها بتحكيلها إنها سجلت في منظمة Alcoholics Anonymous
وهي منظمة مدمنين الكحول المجهولين..

_
- سارة كانت مبهورة بحضارة الغرب !
ومع كل فيلم بتحضره كان يتعزز في داخلها شعور الكره للمجتمع والدين..
علمًا إنها عارفة إنه الدين بتعارض مع كثير عادات في المجتمع لكنها كانت تحطّهم بنفس الخانة..
كان حلم حياتها تسافر برا وتعيش حياتها بحريّة..

كانت مهووسة بكل إشي أمريكي..
نفسها تعيش قصة حب زي ما في بأفلامهم..
وتشرب "واين" وتدخن سجيار كوبي في أحد بارات شيكاغو بدون ما حد يحكي معها..
وتلبس فستان حلو وترقص Square dancing..
كانت تضحك وهي بتتخيل وتحكي بينها وبين حالها:
رح أكون بشبه الفراشات!

_
* ملّت Sara من المجتمع اللي هي فيه..
مجتمع فقط بتحكمه المادة بدون أي حظ للروح..
كانت دايمًا بتفكر لوين رايح هالمجتمع؟
ونسب الإغتصاب الرهيبة كانت تروّعها..
وحدة من بين كل 6 نساء أمريكات تعرضوا لمحاولة اغتصاب!
كانت هي وحدة من هدول الـ 6..
لما مرة تعرّض إلها سكران وقدرت تتخلص منه بآخر لحظة..
غير نسب الجرائم والسرقة والإنتحار والتحرش اللي كانت تبكي كل ما تمر عليها..
__
- سارة كانت شايفة إنها مش مضطرة تسافر برا حتى تعيش بحريّتها..
ما دامها أخدت سكن وخفت قيود أهلها..
فهي قادرة تشرب وتصاحب وتحب وتطلع وتيجي زي ما بدها..
كل إشي مباح ما دام فش دين..
وتأنيب الضمير بس أولها..
_
* قررت Sara تخوض تجربة تبحث فيها عن معنى لحياتها..
تبحث فيها عن إشي يخاطب روحها..
تيّسر إلها تطلع فصل دراسة عالأردن،وكانت أول مرة بتصادف مجتمع مسلم..
أكثر ما لفت إنتباهها بالإسلام بساطته !
إنه الواحد يستسلم لإله واحد فقط ويتحرر من عبوديته لشهواته ورغباته وأهوائه..
وكثير أعجبت بفلسفة العبادة في الإسلام..
وإنها العبادة مش مجرد طقوس وحركات وإنه إلها تجلياتها في كل مجالات الحياة..

وتجربتها مع القرآن كانت تجربة روحية بامتياز..


- نزلّت سارة بوست عالفيسبوك: Reading, God Is Not Great
لــــ كريستوفر هيتشنز.

* نزلت Sara بوست على صفحتها عالفيسبوك: Reading Quraan
وحكت فيه عن آيات لامست قلبها وروحها بهذا الكتاب..
وحكت إنه هذا الكتاب بطلب منك تكون:
محسن، وغفور، ورحيم، وكريم، وصادق، وعادل، ومقسط، ومسامح، ومتواضع، ومسالم، ومحب للآخرين..!

أن تكون محسناً:
- وَبِالْوَالِدَيْنِ إِحْسَانًا وَذِي الْقُرْبَىٰ وَالْيَتَامَىٰ وَالْمَسَاكِينِ وَقُولُوا لِلنَّاسِ حُسْنًا.

أن تكون رحيماً:
- وَتَوَاصَوْا بِالصَّبْرِ وَتَوَاصَوْا بِالْمَرْحَمَةِ.

أن تكون غفوراً مسامحاً للآخرين:
- وَإِن تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَّحِيمٌ

أن تكون عادلاً:
- وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ

أن تكون كريماً:
-وَآتَى الْمَالَ عَلَىٰ حُبِّهِ ذَوِي الْقُرْبَىٰ وَالْيَتَامَىٰ وَالْمَسَاكِينَ وَابْنَ السَّبِيلِ وَالسَّائِلِينَ وَفِي الرِّقَابِ

أن تكون صادقاً:
- الصَّابِرِينَ وَالصَّادِقِينَ وَالْقَانِتِينَ وَالْمُنفِقِينَ وَالْمُسْتَغْفِرِينَ بِالْأَسْحَارِ

أن تكون متواضعاً:
-إِنَّ اللَّهَ لَا يُحِبُّ مَنْ كَانَ مُخْتَالًا فَخُورًا.

أن تكون مسالماً :
- وَإِذَا خَاطَبَهُمُ الْجَاهِلُونَ قَالُوا سَلَامًا.

أن تكون محباً:
-إِنَّ الَّذِينَ آمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَٰنُ وُدًّا.

أن تحمي الضعيف:
- وَالْمُسْتَضْعَفِينَ مِنَ الْوِلْدَانِ وَأَن تَقُومُوا لِلْيَتَامَىٰ بِالْقِسْطِ ۚ وَمَا تَفْعَلُوا مِنْ خَيْرٍ فَإِنَّ اللَّهَ كَانَ بِهِ عَلِيمًا.

وختمت البوست بـــ: GOD IS GREAT....Allahu akbar !
__
.
.
.
بنسمع "لا إله إلا الله" فصيحة مئات المرات وبنستقبلها بروح الإعتياد..
لكنها هالمرة دفعتنا للبكاء بإصرار وهي بتخرج بكل جهد من فم Sara..

استقبلتها الملائكة بحفاوة..
وكانت بتردد اسمها في الملأ الأعلى..
روحها كانت طايرة وهي بتسقبل أنوار الوحي..
ش

و كانت بتشبه الفراشات !

__
- يَا أَيُّهَا الَّذِينَ آمَنُوا مَن يَرْتَدَّ مِنكُمْ عَن دِينِهِ
* فسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ

#القرآن_الجميل
#ARK

وصلني مسج من أختي الطبيبة الساعة 3 الفجر:
صاحي؟ لو صاحي رنلّي حابة أحكي معك

رنيت مباشرة عليها وكان صوتها ماله إشي..

أختي كانت لحظتها مناوبة بالمستشفى، وبعد ما سألتني كيف حالك وكيف ماما وبابا وشو عامل..؟

حكتلي ما بعرف ليه بعتلك بس مخنوقة جد !
حابة أحكي معك..
ليه هيك الدنيا..؟
ليه الناس هيك بتتصرف..؟
وكان بصوتها نبرة ألم وشهقات مكتومة ياما صادفتهم بأختي البريئة..
.
.
ذكرتلي موقفين صاروا قدامها بنفس اليوم بالمستشفى..
الأول عن أب قدر وهو بالمستشفى -بستنى زوجته تولد- يتعرف على إحدى الموظفات !
حكتلي بعرف ما بصير أحكي هيك ولازم الواحد يحسن الظن..
بس كان إشي واضح زي عين الشمس..
كيف هيك غابت إنسانيته واستغل لحظة غياب زوجته وأقبل على هيك خطوة!
وكيف هي رضيت على حالها تنجر إله بسهولة..؟

حكتلي ما لحقت أتناسى هالموقف حتى وهي بغرفة المناوبة كانت إحدى الزميلات بتحكي تلفون مع زوجها ويبدو كان بينهم في مشكلة
خلصت التلفون من هون وحكت بالحرف: جكر فيك هه !
وقامت رنت على شب بنص الليل وصارت تحكي معه...

أختي ما تمالكت نفسها وطلعت من الغرفة وبعتتلي المسج..
صح إنه الطبيب بشوف كثير أمور بحياته..
وإنه مجرد عمله بالمستشفى بكشفله كم الحياة مؤلمة وقاسية..

لكن بالنسبة لأختي كان عادي بالنسبة إلها تشوف جثث وموتى وأطفال بتعذبوا وناس بصارعوا الموت..
بس ما تشوف ناس "بتخون" وبتخرج عن فطرتها وإنسانيتها !!
.
.
حكينا انا وأختي كلام طويل..
وخبرتها إنه هالقصص الحمدلله بتظل شاذة بالمجتمع وإنه الناس لسه فيها خير..
وإنه يفترض نحمد ربنا على نعمة الثبات والفطرة السليمة والسوية اللي بتخلينا نستهجن هيك إشي ونرفضه تمامًا..

كانت أختي تقاطعني طيب ليه يتزوجوا إذا بدهم يخونوا؟
ليه يخلفوا أولاد رح يتربوا على عقد نفسية..؟
طيب مش مرتاحين بزواجهم ينفصلوا ما حد جابرهم..!
يعني إيش بستفيدوا هيك..؟؟

خبرتها والله ما بعرف إيش بستفيدوا؟
وهمه ما بعرفوا إنه قرار زي هيك رح يكلفهم كثير كثير !

لما البنت تشعر للحظة إنها ندمانة على إخلاصها لزوج ما حبته..
وتشوف إنه جمالها اقترب من الغروب وبدأت ألوانه المتوهجة تلح عليها بالاختيار ما بين دينها وأمومتها وبين رغبتها المراهقة والمتأخرة !
لما تتأرجح إرادتها بين قطبين..
وواحد منهم رح تندم عليه في الدنيا والآخرة..

وهي ما بتعرف إنه مجرد ما سمحت لنفسها تكون بين قطبين يعني إنه في كثير ناس رح تنتهز هالفرصة وتستغل ضعفها..

في رجال دوافعهم الشريرة دائما متأهبة في كل وقت..
جاهزة تلاحق أي فريسة بتظهر إلهم ترددها..
دائما جاهزين للمغامرة والمجازفة..
والرغبة ساكنيتهم طول الوقت..
رغبة مقامر مش عاشق أو محب...
بتتحكم فيهم شهواتهم بكل نظرة ولقاء وابتسامة خاطفة..
ما عمرهم فكروا إنه في آخرة!
وإنهم بدمروا أسر وبيوت ومجتمعات بتصرفاتهم الدنيئة..

ويا ويلهم من ربنا !
يا ويلهم من ربنا يا اختي..
.
.

بس إنت ما تزعلي..
وما يضرك أغلاط الناس ما دامك ثابتة..
وفرصة تدركي قديش ربنا رحيم فينا بأوامره وتشريعاته..
اللي فيها بتجلى معنى حياتنا وإنسانيتنا وفطرتنا..
.
.
***
أختي اضطرت تروح لما نادوا بالإذاعة الداخلية في المستشفى:
كود بلو !

"إحدى الشيفرات الرمزية في المستشفيات بتشير إنه أحد المرضى في حالة خطرة جدا.."

راحت أختي وكان آخر كلامها:
شايف هالحياة!
والله ما فيها إشي مستاهل نزعّل ربنا عشانه..
والله ما في ..

سلام..!

(یَـٰۤأَیُّهَا ٱلَّذِینَ ءَامَنُوا۟ عَلَیۡكُمۡ أَنفُسَكُمۡۖ لَا یَضُرُّكُم مَّن ضَلَّ إِذَا ٱهۡتَدَیۡتُمۡۚ إِلَى ٱللَّهِ مَرۡجِعُكُمۡ جَمِیعࣰا فَیُنَبِّئُكُم بِمَا كُنتُمۡ تَعۡمَلُونَ)

#القرآن_الجميل
#ARK

مرّت سنة على أول لقاء بينا..
ما كنت بتصور إنه حياة الإنسان ممكن تنقلب بلحظة !

أنا حياتي انقلبت لحظة ما شفتك فيها..
كنت أشوف فيك شخصين..
شخص مُتّقد مفعم بالنشاط في عيونه مرح ولهو ومغامرة..
بنفس الوقت شخص حازم،صارم، وراكز ومثقف ومؤدب..
كإنك بتعيش حياة مزدوجة وكل جانب فيهم مبهر بحد ذاته..

يومها لما روحت صرفت ساعات بس أعرف عنك وأشوف بوستاتك وشو بكتبولك صحابك واستولت عليّ ولأول مرة مشاعر من نوع غريب..!

حاولت أصرف النظر عنها في البداية وكإنه إشي ما صار..
لكن بكل مرة كنت أشوفك فيها كان يتحرك إشي جواتي..
ولما القدر جمعنا في فريق تطوعي واحد استحالت حياتي لمغامرة نفسيّة ما بعرف شو نهايتها..

كان يستفزني إنك محطّ أنظار بنات كثير غيري..
نفس البنات اللي كنت أسخر منهم لما يجيبوا سيرة شب ثاني، هيني الآن متلبسة معهم بنفس السخف اللي كنت أشوفه فيهم..

بس أنا والله غير عنهم..
أنا مش بنت سخيفة وخفيفة وممكن إشي زي هيك يأثر عليّ أبدا..
عشان هيك بقدر أحكيلك وبكل ثقة إني جد غير عنهم..

أنا كنت أحتفظ بمشاعري لنفسي وما أبعثرها زيهم..ولا أنتهكها بالكلام فيها..
ما كنت ألهو فيها زي ما بنت صغيرة بتلهو بلعبتها..

لإني مؤمنة إني صادقة اتجاهك..
وهذا الصدق بحتّم عليّ ما أبوح فيه لحد..
غير ربنا !
.
.
مرة صادفتك عالباب وفتحتلي إياه وابتسمت وتفرجت بعيوني وحكيتلي:
تفضلي..!

موقف ما تجاوز ثواني شفت فيه ابتسامتك الرقيقة ونظرتك الوديعة وصوتك الذابل لحظتها..

وقلبي اللي كان حيطير من مكانه!

.............................
*************
مرّت سنة على أول خدعة بحياتي!
على أكبر وهم وأسخف لقاء..

ما بعرف كيف سمحت لنفسي أضيّع سنة بكل تفاصيلها عشان "وهم" !
عشان ابتسامة متكلفة منك..
ونظرات من بعيد أشعرتني إنك بتبادلني الإشي اللي جواتي..

يا الله كيف ممكن تخدعنا المظاهر!
كيف ممكن تغرّنا الكلمات والنظرات..

إنت خدعتني..!
وخدعت كثير غيري بزيفك وتملقك..

خليك عايش على نظرات الإعجاب حتى ترضي غرورك..
وبتدّعي التعفف حتى يبالغوا في تقديرك..

ابتسامتك الرقيقة اللي بتجود فيها على كل بنت بتمر جنبك..
ولطفك المبالغ فيه واهتمامك..
ومراسلاتك الخاصة آخر الليل اللي بتعشّم فيهم ألف بنت..
ترى إشي ما بعكس إلا مرضك..!

الحمدلله صحيت على حالي..
صحيت لما أدركت إنه ربنا بدو يخفف عنا وإحنا بنختار الوجع بإيدينا..
وربنا بدو يتوب علينا وإحنا بنركض للفتنة برجلينا..

صحيت لما عرفت إنه المؤمن عزيز بالاستغناء عن الناس..
وقلبه أطهر من إنه يصرفه على مشاعر ساذجة..
ووقته أثمن من إنه يضيع على شخص ماكله الغرور أكل!
.
.
**
مرّت سنة على أول لقاء بينا..
تعمدت أبدأ رسالتي بإشي ينفخ غرورك..
وأنهيها بإشي يفضح حقيقتك..

مع ذلك..
يا رب تصحى عحالك..
.
.
وَاللَّهُ يُرِيدُ أَن يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا (27) يُرِيدُ اللَّهُ أَن يُخَفِّفَ عَنكُمْ ۚ وَخُلِقَ الْإِنسَانُ ضَعِيفًا (28)

#القرآن_الجميل
#ARK

كنت زمان أفكر إنه إذا الواحد خلى مخافة ربنا بين عيونه وبعّد عن الحرام ربنا راح يرزقه مباشرة ويفتحها عليه من أوسع أبوابه .. هيك كنت بفكر؟؟
عبين ما تخرجت وصحلّي أكثر من شغل بس المشكلة فيهم حرام..فما قبلت ولا بوظيفة عشان من "ترك شيئا لله عوضه الله خيرا منه"..!!
بس صارلي سنتين وانا يلا يلا أطلع مصروفي..
وصحابي اللي قبلوا بهديك الوظائف هيهم مبسوطين ونزّلوا سيارات وأغلبهم تزوجوا وأنا قاعد مكاني..!!
.
.
طيب بلاش أنا .. هي أختي..
أحسن بنت بالكوكب..
بنت متمسكة بدينها وحجابها..
بحياتها ما فرطت باشي من مبادئها..
طول حياتها معتزة بدينها وأخلاقها..
ما سمحت لأي حد يعبث بقلبها ..
وكانت مخافة ربنا بين عيونها..
ومع ذلك ..
معظم صاحباتها خطبوا واتزوجوا وهي لسه !!
علما إنه صاحباتها ما كانوا على هذا القدر من الإلتزام وجزء كبير منهم عاش حياة عادية بدون ضوابط.. بس هيهم هلأ معظمهم مبسوطين وأحلى من هيك ما في !!
.
.
بلاش أنا وأختي هي كثير ناس غيرنا ماشيين صح بحياتهم..
وملتزمين بكل أوامر ربنا إلهم..
بس حياتهم مش ماشية..وعايشين في ابتلاء ورا ابتلاء..
==
بحكي مرة لأختي وإحنا طالعين..
إنه وين "من ترك شيئا لله عوضه الله خيرا منه ؟"
وينها...؟؟؟
كنت بتصور لحظتها إنه اختي راح تأيدني بكلامي..أو تفضفضلي شو بقلبها ؟
أو تشكيلي من ظروفها..
سكتت ثواني وطلبت مني ما أقاطعها بالكلام اللي بدها تحكيه.. :
.
.
اسمع..
ما بحب هاي الطريقة الساذجة بالتفكير..
وما بحب الواحد يتعامل مع ربنا بمنطق الصفقات!
إنه يلا يا رب هيّ عبدتك وفقني !!
ما بحب حد ينظر لعلاقته مع ربنا بهاي السطحية..
وحابة أذكرك إنه ربنا غني عنك وعن صلاتك وعبادتك!
غني عني وعن حجابي وجلبابي..
بس إحنا الفقراء إله..إحنا اللي ولا إشي بدونه..
وإذا إنت بتعبد ربنا عشان تنزل سيارة أو تتزوج البنت اللي بتحبها أو تشتغل شغل أحسن..
فحابة أحكيلك عيد النظر بالاشي اللي إنت عليه..
وإذا إنت عايش حياتك بتقلّب نظرك في الناس اللي ربنا انعم عليها وحرمك..
فبنصحك تعيد النظر في طريقة تفكيرك!
ممكن أعرف وين مفهوم "الآخرة " بحياتك إذا كل إشي بدك ثوابه هلأ ؟؟
.
.
عفكرة ممكن ما تقاطعني؟ خليني أكمل فكرتني..
ما تفكرني بحكيلك ما تسعى وتآخذ بالأسباب..
وما بحكيلك إنه ربنا مش ممكن يعوضك بالدنيا..

بس بحكيلك ما تتعامل مع ربنا هيك..
إحنا انخلقنا ليختبرنا مش لنختبره !
.
.
وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ

#القرآن_الجميل
#ARK

كان لما يكون زهقان يطلع يتمشى لحاله..
في أغلب الأوقات يحط هالسماعات ويسمع كل إشي بخطر عبالكم..
بس بتعرفوا هديك اللحظة لما تحس حالك زهقان من كل إشي..؟
لما راسك يصير يوجعك وتحس إنه لا أغاني ولا موسيقى ولا حتى اناشيد طايق تسمع..؟

شال السماعات وكمل طريقه..
فتح يشيك عالفيسبوك والواتسب سريعا..
كالعادة كان واصله مسج من إمه لإنها كل يوم بتبعت أشياء زي صباح الخير ومساء الورد وصورة وردة بتطفي وبتضوي أو صورة فنجان قهوة مع صباح الأمنيات الجميلة..

إمه ما كان بوصلها إشي عجروب الجارات إلا مباشرة بتعمله شير عكل مكان..
وهو من زمان عامل "Mute" للمحادثة معها وحطه لسنة كاملة !

هالمرة إمه كات باعته صورة فيها تكبيرات..
الله أكبر..الله أكبر..الله أكبر..
وإنه يستحب التكبير في هاي الأيام..

سكّر التلفون وهو ببتسم من عفوية إمه..
رد بسرعة فتح عالمحادثة ورد عليها بقلوب وحكالها إنه بحبها..
وكمل طريقه..
***
وبدأ يتمتم بشكل عفوي..
الله أكبر..الله أكبر..الله أكبر..

قرر يتخلى عن عفويته بالتكبير..
ويركّز أكتر..

الله..
أكبـــــر..

الله....... أكبـــر..

الله أكبر.. من كل إشي..
.
.
الله أكبر من كل همومي !
أكبر من كل لحظة ألم تسللت لقلبي..
أكبر من كل مصيبة استنزفت عمري..
أكبر من خذلان أقرب الناس إلي..
أكبر من كل ذنب كان حاجز بيني وبينه..
أكبر من كل لحظات الضياع والوجع اللي بتعصف بحياتي..

الله أكبر من دنيا ربطت فيها سعادتي..
أكبر من اهتمام كنت بنتظره من أقرب الناس إلي..
أكبر من ناس رفضت تسمعني..
من حب بخل فيه كثير من الناس..
وأكبر من كره وكبر وظلم عشعش بقلوبهم..
.
.
الله أكبر من كل إشي بحول بيني وبين أحلامي وأهدافي..
أكبر من كل خطوات استصعبت أكملها..
وأحلام قررت أتنازل عنها..
وصراعات ياما فكرت أنسحب من مواجهتها..
.
.
الله أكبر من كل لحظة فتور حرمتني من قربه..
من كل مرة حرمت فيها حظ روحي من كلامه..
من كل لحظة كسل كانت حاجز من السجود فيها بين ايديه ومناجاته..
من كل إشي شغلني عن فكرة ذكره واستحضار رحمته ومعيته..
.
.
الله أكبر من كل إشي..

من كل إشي..!
.
.
الله أكبر..
الله أكبر..
الله أكبر..

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً

#القرآن_الجميل
#ARK

كنت صافن فيه وهو بكنّس!
عاش حياته الصعبة بس عشان يأمن لقمة لولاده..
ومع ذلك جرب إسأله كيف حالك عمّي؟
راح يجاوبك: بخير ورضا وفضل من رب العالمين..الحمد لله..الحمدلله !
وممكن وقتها يسهب في الكلام معك بعفوية، ويحكيلك عن ولاده وبناته وكيف إنهم شاطرين بدراستهم !

راح تلمح في وجه رضا واطمئنان وسكينة نادرًا ما تصادفهم في وجه غيره..
****

عند ربنا مش شرط تكون غني أو قوي أو مشهور أو مسلّطة عليك الأضواء حتى تسبق..
ويا الله كم في ناس سُلّطت عليها الأضواء وغابت عنها الأنوار..؟!
وإن الله لا ينظر إلى صوركم وأموالكم ولكن ينظر إلى قلوبكم !
وأشار إلى قلبه صلى الله عليه وسلم <3
.
.
أدركت وأنا صافن فيه إنه الناس اللي زي هيك اختبارهم في هالدنيا إنهم يصبروا على ضعفهم وفقرهم وحاجتهم..
في المقابل في ناس اختبارها تصبر على النعم اللي بين إيديها وتوظفها في جبر قلوب الناس الغلبانة وتسد فقرهم وتمشي بحاجتهم..

ولو حالت الظروف بينك وبين مساعدة هالناس ما تنسى تحكيلهم: شكرًا !
والله بشوفوها إشي كبير وهيك بتدخل السرور عقلبهم..

وما تنسى إنه هذا الشخص بملابسه المتسخة وقلبه النقي ممكن يكون سبقك لله بمراحل..
وممكن لو أقسم على الله لأبرّه..
وممكن يكون من أحب أهل الأرض إلى أهل السماء !

فما تنسى تحكيله: ادعيلي!
.
.
.
وَهُوَ الَّذِي جَعَلَكُمْ خَلَائِفَ الْأَرْضِ وَرَفَعَ بَعْضَكُمْ فَوْقَ بَعْضٍ دَرَجَاتٍ لِّيَبْلُوَكُمْ فِي مَا آتَاكُمْ ۗ إِنَّ رَبَّكَ سَرِيعُ الْعِقَابِ وَإِنَّهُ لَغَفُورٌ رَّحِيمٌ.

#القرآن_الجميل
#ARK

إمك وأبوك كانوا للأسف جدًّا لطيفين معك بطفولتك..
ربطوا خوفك بإبرة الدكتور اللي لو ما كنت شطور وخلّصت صحنك رح يغزّك اياها..
وبالشرطي صاحب المسدس اللي لو ما نمت بكير رح يودوك عليه..
يعني إنت بآمان ما دامك بعيد عن إبرة الدكتور ومسدس الشرطي..

لما كبرت أدركت إنه حتى الكبار بخافوا!
أولهم إمك وأبوك..

لما إمك كانت بتبكي وبترجف من الخوف لما واحد من إخوانك حرارته وصلت 40..
وأبوك اللي كان يتناقش مع إمك بآخر الليل وهو خايف من المستقبل وكيف بدو يدرسكم ويعلمكم !

ومجرد ما تتأمل بحياة الناس رح تكتشف إنها مسكونة بالخوف !
حياتها عبارة عن خوف بتّنقل من مرحلة لمرحلة وهو محافظ على حضوره القوي بكل تفاصيل يومهم وحياتهم..
.
.
تخيّل لو الله ما خلق الخوف!
كيف حيكون تجبّر الناس وعنادهم وفرعنتهم..؟
كيف كانت حتكون الحياة لو كانت الناس ما بتنكسر ولا بتخاف؟
رح تحكيلي الحياة سيئة..بس كانت حتكون أسوء بكثيييير بدون خوف...
.
.
هاي المكابدة هي أحد تجليات رحمة الله فينا..
الخوف والقلق والمشقة والتعب والعناء والمرض والبلاء كلها عبارة عن أدوية..
بعالجنا الله فيها حتى نتعلم إنه المرض بقدر علينا، والفقر بقدر علينا، والألم بقدر علينا، وظلم البشر بقدر علينا..
ونوائب الدهر..
والسرطان..
والمصائب والأوجاع والأحزان بتقدر علينا !
.
.
الله بعلمنا حتى ما ننسى للحظة..
إنه خالق كل شيء ومدبر كل شيء..
كمان بقدر علينا !!
.
.
لَقَدْ خَلَقْنَا الْإِنسَانَ فِي كَبَدٍ (4) أَيَحْسَبُ أَن لَّن يَقْدِرَ عَلَيْهِ أَحَدٌ (5)

#القرآن_الجميل
#ARK

عفكرة بعرف إنه أبوك الشيخ اللي كل كلامه: قال الله وقال الرسول، هو نفسه اللي بظلمك وبهينك وبصرخّ عليك وممكن بضربك!

وبعرف إنه إمِك اللي من مركز لمركز بتعطي دروس تجويد وكيف الواحد ينطق مخارج الحروف بالشكل الصحيح، ما كلّفت نفسها من زمان تسأل عنك وتطمن عليك وتحكيلك مالك؟

الشيخ اللي درسّك بالمسجد وعرفت لاحقًا إنه طلع فاسد وكان سهل عليه يتهاون بمصاري التبرعات..

ومتصوّر صدمتك لما مسؤول الفريق اللي صدّع راسكم بكلامه عن ضوابط التعامل مع الجنس الآخر وطلع معشم ألف بنت عندكم بالفريق !
.
.
أظن إنكم على قدر من الوعي وقادرين لحالكم تميزوا إنه هاي التصرفات ما إلها دخل بالدين..
والدليل استهجانكم وتعجبكم واستغرابكم منها..

بس ليه تكون تصرفاتهم مبرر نفسي إلك تكره الدين وكل الملتزمين؟؟؟
وتقطع كل الحبال بينك وبين الله عشان ناس غلبتهم أهوائهم على الحق اللي بدّعوا إنهم بمثلوه؟

طيب شو بدك تحكي لربنا لما يسألك ليه هيك تصرفت؟؟
ليه بعدّت عني؟
رح تحكيله عشان فلان وفلان !
طيب والقرآن اللي بين إيديك..
وسنة النبي وأصحابه..
والناس الكثيرة بينا اللي ثبتوا على دينهم وأخلاقهم وما غيّرتهم الدنيا..
****

اسمع..
سيبك من الناس جد..
وحافظ عالخير جواتك حتى لو بخل فيه كثير ناس..
وما تسمح لأي حد يعرقل مسيرك لربنا..
ودير بالك من حجج نفسية تضحك فيها على نفسك حتى تبرر بعدك عن الدين..
وما تنسى إنه ربنا مُطّلع على قلبك..

واحرص تكون المسلم اللي نفسك تقابله !
.
.
.
يَا أَيُّهَا الَّذِينَ آمَنُوا عَلَيْكُمْ أَنفُسَكُمْ ۖ لَا يَضُرُّكُم مَّن ضَلَّ إِذَا اهْتَدَيْتُمْ ۚ إِلَى اللَّهِ مَرْجِعُكُمْ جَمِيعًا فَيُنَبِّئُكُم بِمَا كُنتُمْ تَعْمَلُونَ
#القرآن_الجميل
#ARK

وإحنا ماشيين..
فجأة رح يوقفنا شخص هندوسي متدين من طائفة "هير كريشنا" برأسه الحليق وملابسه صاحبة اللون الزعفراني!

وراح يقدّم إلنا وردة ومعها دعوة إنه تصير من أتباع كريشنا؟!

#قريبًا 🍏
#حسن_باشا
#ARK

تقريبًا صارلي 3 سنوات و6 أشهر متوفية..
لما متت كان عمري 23 سنة بالزبط..
كنت يا دوبي لسه متخرجة..
خطفني الموت فجأة!
علمًا كنت أحس حالي لسه صغيرة عليه..
والغريب إنه لما كنت على قيد الحياة وأسمع حد بعمري مات أتناسى تمامًا إنه الدور الجاي ممكن يكون علي..

وفعلا كان !
.
.
أنا حاليًا زي ما إنتو عارفين بحفرة صغيرة مظلمة ضيقة تحت الأرض..
الكل بخاف منها وبنقز من سيرتها..
أنا عفكرة زيكم كنت بخاف والله..
بس أدركت أول ما دخلوني عليها إنه الظلام الحقيقي كان ظلام جوا قلوبنا وأجسادنا لسه بتنبض بالحياة..!
.
.
ما في مجال للأسف أرجع حتى أصلح أغلاطي وأعتذر عن خطأ تصوراتي اتجاه كثير شغلات..
واًصلا لو رجعت في الغالب رح أرجع زي ما كنت !
طلعت في آية بالقرآن بتحكي: وَلَوْ رُدُّوا لَعَادُوا لِمَا نُهُوا عَنْهُ !

يعني قبل لحظة الموت الموضوع بايدك..
بعد الموت إنت هيك استنفذت كل فرصك..
يعني ما تخاف لو عندك فرص تانية كان ربنا مدّ بعمرك عشانها..

وبالتالي فيما لو قبضك الموت وإنت ما استثمرت إشي من الفرص اللي أجتك..
فهذا يعني إنك حكمت على نفسك وسمحت لشهواتك ورغباتك تستمكن منك..
لدرجة إنك لو رجعت مرة تانية عالحياة رح ترجع زي ما كنت !

والخلاصة وما بدي اطول عليكم أكيد وراك دنيا وانشغالات كثيرة!
إنه قبل الموت إنت مطالب تبذل كل جهدك في هذا الصراع..
يعني ما دام فيك نفس فالموضوع بايدك وإنت بتقرر..
وأي محاولة منك بعد الموت للرجوع محاولة فاشلة وتبرير مش مقنع..
ولا يظلم ربك أحدا..
.
.
آه صح..
ممكن حد يسألني طيب لو رجعت فيك الحياة شو ممكن تعملي..؟؟

بس أنا خبرتكم إني استنفذت كل فرصي..
بس كان ممكن أتعامل مع القرآن والدين بشكل جدي أكثر..
وما أشكل تصوراتي عنهم بشكل سطحي ساذج حتى بس أرضي غروري وأعيش الحياة زي ما أنا حابة.. لإنه مع لحظة قبض الروح أدركت إني كنت بضحك عحالي !

كمان كان ممكن أختصر كثير نقاشات وقعدات غيبة ونميمة..
وأكيد رح أحرص ما أظلم حد ولا اتكبر عليه حتى لو بكلمة وحدة..
لإنه كل إشي مسجل..!!

كان ممكن أرتب أولوياتي من جديد..
وأهم إشي ما أتعلق بوهم وأكتشف لاحقا إنه عمري ضاع عليه..

بصراحة كمان كان قللت تعلقي بالدنيا وما فيها..
كان ما زعلت ولا على إشي فيها..ولا حرقت أعصابي عشانها..

ويا الله شو رح أعمل أعمال خير كثيرة..
هديك الصدقة اللي مرة تصدقتها رح أكررها كل ما أقدر..
وكمان الركعتين اللي مرة صليتهم بآخر الليل وحكيت لربنا فيهم آسف..
وما رح أقصر عن أي عمل خير بصادفه بطريقي..
ولو ما لقيت بدي أدور عخير اعمله..

مممم وأكيد أكيد كنت رح أقرأ قرآن كثير..
لإنه كل إشي مريت فيه بحياتي..
وكل إشي بمر فيه بعد موتي طلع مكتوب بالتفصيل !
.
.
.
بعرف رح تحكولي طيب إنتِ بالقبر وهو أول منازل الآخرة..فشو مصيرك؟؟

ربنا رحيم ..
بس مش مهم شو مصيري..أو بالأحرى شو رح تفرق عندكم..

المهم شو مصيركم إنتوا !

#القرآن_الجميل
#ARK

عفكرة كانت بتقدر تكون زي بقية بنات جيلها !
كانت بتقدر تعطي مجال لهداك الشب اللي كان بحاول يحكي معها ..
وكانت بتقدر تلفت إنتباه بقية الشباب زي ما عملت مرة صاحبتها ..
كانت بتقدر تتساهل في لبسها..
وما حد إله عندها لو قررت تلبس فتنتها..
وعادي كانت بتقدر تتمختر وتتمايل وترفع صوتها ..
كانت بتقدر تستغيب وتنم وتفتّن بكل قعدة من قعداتها ..
وكانت بتقدر تتنازل عن دينها..
ومش إشي صعب تتخلى عن مبدائها وأخلاقها وحياءها..

كانت وكانت وكانت ..
.
.
.
.
لَوْلَا أَن رَّبَطْنَا عَلَىٰ قَلْبِهَا !

#القرآن_الجميل
#ARK

كيف صبر علينا ؟ وإحنا بننكر وجوده وبنسيء إله وبننتقص من قدره وجلاله ؟؟
كيف كنا نجادل فيه ونتهمه بالظلم والتسلّط..!
ومع ذلك قابلنا بالنعم وأبقانا على قيد الحياة ؟
بدون ما يستفزه الغضب أو تستبد فيه الرغبة بالإنتقام؟؟؟
.
.
*ممكن لإنه رحيم ؟
- بدون ممكن..
هو رحيم !

#قريبًا
#حسن_باشا
#ARK