القصة اللي انتهــــــــت بنجاة بنت من حادث سير مميت..
بــــدت لما نور انكبت عليها كاسة الشاي وهي بطريقها تاخد معها لانا..
اضطرت نور ترجع عالبيت حتى تغير أواعيها وتحط شوية ثلج لتخفف من آثار كاسة الشاي السخنة عليها..

رجعت نور تحركت من البيت ومرت بطريقها عالكازية حتى تعبي بنزين..
وبس عبّت وخلّصت وأجت بدها تحاسب اكتشفت إنها ناسيه شنتتها بالبيت مع عجقة كاسة الشاي الصبح..

يا الله الإحراج !
والله آسفة يا عمو والله نسيت شنتتي..
عادي أرجع عالبيت أجيب المصاري وأحاسبك ؟؟
العامل ما رضي يتعاون معها وحكالها مش ناقصني أتحملهم أنا..
وبعد ألف ترجاي راحت للمدير في الكازية وشاف إنها مبين عليها بنت عالم وناس فسمح إلها تروح تجيب المصاري وترجع..
.
.
يوم نور السيء ما وقف عند هدول الموقفين بس..
للأسف نور بعد ما قربت من بيت لانا..
خبرتها لانا إنه اجوهم ضيوف وما رح تقدر تطلع معها..
المشكلة نور كانت بعز الأزمة فقررت تروح من طريق فرعي أطول شوي بس ولا إنها توقف بالأزمة...
وبنص طريقها الفرعي طلعت الإشارة الصفرا على التابلو إنه السيارة بدها بنشر !!
.
.
لا مش طبيعي شو بصير معي !
مستحيل شو هالحظ هاد..؟؟؟
ليه أنا يا رب..؟
طيب والله مش عاملة إشي غلط ليصير معي هيك..؟
من وين بدي اجيب حد يعملي البنشر هسا؟
خلص مهي المصايب بتيجي مرة وحدة..
يا ربييي على حظي يا ربييي !
.
.
تقريبا أخذ معها موضوع البنشر ساعة وشوي..
لإنه قبل البنشر بلحظات وصلها مسج إنه خلّص اشتراكها تاع التلفون..
واضطرت تمشي للدكانة للبعيدة حتى تشحن وتحكي مع أخوها يساعدها..
كملت نور طريقها وهي مش مصدقة متى ممكن توصل البيت ومتى يخلص هاليوم الغريب!!
.
.
نور ما تمالكت أنفاسها وهي بتحكي الحمد لله الحمد لله الحمد لله..
لما كان بفصلها عن حادث مميت ثواني معدودة !
في المقابل السيارة اللي سبقت سيارة نور بثواني غالبا مات اللي فيها..

كان الموقف مؤلم جدا بالنسبة لنور..
اول مرة بحياتها بتشوف موقف زي هيك..
نسيت نور كاسة الشاي وموقف الكازية واعتذار لانا وبنشر السيارة وكملت طريقها بس تحكي: الحمد لله !
***************
.
.
بــدت "القصــــة" لما نور شربت كاسة شاي من زمان ما شربت زيها..
عبت بنزين وفرطت ضحك لما عمو الشايب قلها صباح الفل يا ست !
ولانا لأول مرة بتكون جاهزة وبتستناها وما بتتأخر عليها كالعادة..
الشوارع ما كانت أزمة على غير العادة..
وكان يوم حلو بكل تفاصيله..
.
.
القصة اللي انتــــــــهت بوفاة بنت بحادث سير !

#ARK

امبارح رحت لإمي بدي أحكيلها شغلة..
حكتلي والله إنت زي الشيطان!
كل ما أجي بدي أسبّح بتطلعلي..!!

قلتها طيّب يا "مَلَك" إنتِ... ")
إحكيلي شو بتعرفي عن "سبحـــان الله" ؟؟!
قالت: سهلة، سبحان الله يعني تنزيه الله عن كل نقص وعيب وسوء.
مفكرني بعرفش؟؟؟

لأ ما قلت هيك..
بس بدي أحكيلك شغلة عن "سبحان الله" رح تخليك تنظري إلها بشكل ينعكس على حياتك، وبنفس الوقت تفهمي ليه مطلوب منّا نسبح ربنا بكل تفاصيل يومنا وحياتنا؟
ومنها كمان حتى تتأكدي إني حدا منيح ومش شيطان ")
.
.
يا ماما..
أكيد إنتِ كمسلمة بتعترفي بكمال ربنا وبتنزيهه عن كل نقص وعيب..
لكن إنتِ كبشر ممكن أحيانا لما تصادفي مظاهر رحمة، كرم، جود، علم، حكمة وغيرها من الأمور اللي بتصف فيها ربنا وبنفس الوقت ممكن يتصفوا فيها الناس..
فوقتها ما يروح من بالك أبدا إنه " سبحان الله" !
ربنا أكمل من كل خير شفتيه من الناس..
وربنا منزّه عن أي نقص ممكن يصدر من هالناس اللي اتصفوا ببعض صفاته..
.
.
كمان ما تنسي إنه أحيانا إحنا كبشر بننظر لصفات ربنا من منطق بشري!
يعني إحنا تعوّدنا إنه نشوف كرم الكريم، ونسمع حكمة الحكيم، ونشهد رحمة الرحيم، وقوة القوي..

فوقتها ممكن نستعجل ونطلب من ربنا أمور وننتظر يحققها إلنا مباشرة، وممكن يدخل الشك لقلوبنا لما يتأخر في الرد علينا..
فوقتها لازم ما ننسى إنه "سبحـــــان الله" !
لازم ما ننسى إنه ربنا منزّه عن هذا الشك اللي دخل بقلوبنا..
وإنه حكيم ما بعاملنا بنفس المنطق اللي بنتعامل فيه بينّا..
.
.
أنا بعرف يا ماما إنك بتثبتي الكمال لربنا..
لكن مش ممكن أحيانا الواحد فينا ينظر فقط لصفة وحدة من صفاته ويعزلها عن بقية صفاته؟
فمثلا: شخص بشوف ربنا إنه رحيم فقط؟
وبنسى كمان إنه عادل..
شخص بشوف ربنا كريم فقط..
وبنسى إنه حكيم..
شخص بشوف ربنا شديد العقاب، وبنسى إنه كمان غفور ورحيم؟

فــ "سبحان الله" بتذكّرنا بكمال وتكامل صفاته..
وبتنزه ربنا عن كل نقص نسبناه إله لما قررنا ننظر لصفة وحدة ونتجاهل كل صفاته !
.
.
عشان هيك " سبحـــــان الله"..
في كل صبح ومسا..
وبعد كل صلاة..
وقبل النوم..
ولمّا نصحى..
ولما نتعجّب..
وبكل تفاصيل يومنا..

حتى ما ننسى إنه ربنا أكمل من كل تصوّر ببالنا..
وإنه منزّه عن كل نقص وعيب نسبناه إله من غير وعينا..

"سبحان الله" من كل لحظة عاملنا فيها ربنا بمنطقنا..
"سبحان الله" لما استعجلنا إجابته عتساؤلاتنا ودعواتنا..
"سبحان الله" من كل لحظة شك عصفت بقلوبنا !
.
.

(يَا أَيُّهَا الَّذِينَ آمَنُوا اذْكُرُوا اللَّـهَ ذِكْرًا كَثِيرًا * وَسَبِّحُوهُ بُكْرَةً وَأَصِيلًا)
#القرآن_الجميل
#ARK

لحظة ما طلعت روحي سمعت الناس بترن على أهلي وبتحكيلهم: البقية بحياتكم!

اضطروا يحطوني بالثلاجة لبكرا، واتفقوا يكون الدفن بعد صلاة الظهر..
ما أسخف تفكيري لما كنت عايش وبفكر بالثلاجة وعتمتها وبرودتها !
كيف ما كنت أفكر بالأهم؟؟ بالمصير اللي بستناني !!

ثاني يوم الصبح غسّلوني بالكافور وعطّروني بالمسك..
ما حضر تغسيلي كثير ناس وعلى ما يبدو الخوف منعهم!
وبعدها كفنوني وحملوني عالبيت عشان أهلي يودعوني..
.
.
استقبلوني بالبيت بدموعهم وصراخهم وعويلهم وحزنهم!
ما حد بكى عليّ قد إمي..
لما تحرّك جفني شوي قدرت ألمحها..
يا الله شو ندمان عكل لحظة مرّت عليّ من غير ما أبوس إيدها وأطلب رضاها..!!
.
.
حملوني بعدها للمسجد..
وجثتي كانت بتتحرك وبتهتز وهي فوق أكتاف الناس..
لكنها أخيرا استقرت في المحراب..
وكبّر الشيخ عليّ أربع تكبيرات وانتقلوا بعدها لقبري !
.
.
حطوني صحابي شوي شوي في القبر، ولحظة ما حطوا آخر بلاطة صاح واحد في الناس:
أيها الناس سلوا لأخيكم الخير فإنه الآن يُسأل!
ونادى واحد ثاني: يخوان آجروا آجروا..
وبلشت الناس تهيل التراب جوا القبر في الوقت اللي كان فيه الشيخ بلقي موعظة قصيرة عن الموت وبذكرهم إنهم كلهم رح يموتوا وإنهم لازم يجهزوا حالهم لهاي اللحظة !
.
.
دقائق معدودة وسمعت قرع نعالهم وهي بتغادر المقبرة..!
الكل راح..
والله الكل راح...
وضليت لحالي..!
----------------------------
لا !
هيّ أعمالي..
هيّ صدقاتي وصلواتي والخير اللي كنت أمشي فيه بين الناس..
هيّ توباتي بعد كل غلط، وحسن ظني بالله اللي حافظت عليه حتى آخر رمق..
هيّ كلمة لأ اللي حكيتها بوجه غلط كبير كان ممكن أوقع فيه..
وهيّ لما سترت ع فلان، ولما جبرت خاطر الثاني، وطبطبت عالثالث إني معاه !

هي استسلامي لأوامر ربنا بعد ما كنت رح أستكبر عليها..
وهي لحظة ما صارحت ربنا إني ممكن أضعف وأقصر لكني مستحيل أجحد واستكبر..

هيّ سجدة سجدتها بعد يوم متعب..
لما بعفوية قلت لربنا: أنا آسف عكل إشي.. وأنا بحبك !
---------------------------

وإنت كمان..
بتقدر ما تظل لحالك !
#ARK

في شخص كان نايم على "جنبه" وبفكر بمصيبة تعرّض إلها طيّرت النوم من عيونه..وقتها صار يقول: يارب ساعدني..يارب ساعدني..!

حتى إنه لحظتها قام من مكان نومه و"قعد" على طرف تخته وكمّل دعواته يارب..يارب..

ممكن وقتها شعر إنه لازم "يقوم" يصلي ويدعي ربنا لعلّ وعسى يستجيبله ويكشف عنه مصابه.

كان على (جنبه) بعدها (قعد) بعدها (قام) وهو بقول يارب.

وربنا المجيب فعلا استجابله، لكنها للأسف أيام معدودة نسي فيها لُطف ربنا وكمّل بأغلاطه وظلمه وإسرافه !

------------
شخص آخر ما كان ماله إشي!
حياته كلها تمام الحمدلله..

وبيوم كان صافن بالسما والأرض وبفكّر بعظمة ربنا وقدرته..
وليلتها لمّا وصل البيت فرد سجادته و "قام" يصلي لربنا ويدعيه ويناجيه ويحمده عكل إشي..

وقتها تعب شوي فــ "قعد" وكمّل دعواته حتى آخر إشي نام على "جنبه" وهو بقول يارب !

(قام) بعدها (قعد) بعدها نام على (جنبه)!

وربنا الكريم فعلا استجابله كل دعواته..
وكفّر عنه كل سيئاته ووعده بالجنة!

-----------
الشخص الأول اللي كان على جنبه وبعدها قعد وقام حتى يدعي ربنا...للأسف ما عرف ربنا ولا تذكرّه إلا بوقت الشدة..
وبعدها نسيـــــه..!

وَإِذَا مَسَّ الْإِنسَانَ الضُّرُّ دَعَانَا لِجَنبِهِ أَوْ قَاعِدًا أَوْ قَائِمًا فَلَمَّا كَشَفْنَا عَنْهُ ضُرَّهُ مَرَّ كَأَن لَّمْ يَدْعُنَا إِلَىٰ ضُرٍّ مَّسَّهُ ۚ كَذَٰلِكَ زُيِّنَ لِلْمُسْرِفِينَ مَا كَانُوا يَعْمَلُونَ (12)
.
.
والشخص الثاني اللي دعا وهو قائم وقاعد وعلى جنبه عرف ربنا بالرخاء قبل الشدة..
وضل ربنا حاضر بكل تفاصيل يومه وحياته!

إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآيَاتٍ لِّأُولِي الْأَلْبَابِ (190) الَّذِينَ يَذْكُرُونَ اللَّهَ قِيَامًا وَقُعُودًا وَعَلَىٰ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَٰذَا بَاطِلًا سُبْحَانَكَ فَقِنَا عَذَابَ النَّارِ (191)
.
.
المهم..
إنت أي شخص فيهم؟ ")
#القرآن_الجميل
#ARK

البنت الـــ Single ما بتسلم من كلام الناس!
وأحيانا يُنظر إلها إنه يحرام ما في حد متقبلها!!

والشب لما يتأخر في الإرتباط بنحكى عنه..

نظرة المجتمع السلبية اتجاه السنجل صارت تدفع بعض الناس إنهم يخوضوا أي علاقة بغض النظر عن كثير أشياء بس عشان ما يشعروا نفسهم غريبين وعندهم مشكلة!

وللأسف المعظم بتجاهل تبعات هالعلاقات من ألم وندم وحسرة وضياع!
ونظرة المجتمع أحيانا بتصير أسوء فيما لو كنت إنت وبكامل وعيك وإرادتك رافض ترتبط أو تخوض أي علاقة..
.
.
سبب هالنظرة في الغالب هو الكم الهائل من المسلسلات والأفلام والأغاني اللي خاطبت لاوعي الناس لدرجة صار الشخص يشعر بفجوة ونقص فيما لو كان Single !

بناء على ما سبق:
- ما تسمح للمجتمع ونظرته تأثر عليك وعلى قراراتك وتضطرك تتنازل عن مبادئك!

- إنك (سنجل) لا يعني إنك شخص غير مرغوب فيه..
وأكيد صادفت بحياتك كثير ناس إنت بتتميز عنهم ووجدوا مين يرغب فيهم..
وبالتالي ما دخل إنك شخص غير مرغوب فيه.

- من علامات نضج الإنسان إنه يعترف إنه نفسيًا غير مؤهل للإرتباط حاليا، وهيك بنقذ نفسه وبنقذ غيره من علاقة فاشلة.

- شعور السلام الداخلي والرضا والإطمئنان فيما لو ما عشته وإنت سنجل، من الصعب تعيشه وإنت مرتبط!

- فيما لو تساوى عند الشخص خيار البقاء سنجل وخيار الإرتباط يعتبر قراره حــــــــــر!

- إياك تهرب من مشاكلك كشخص سنجل بالارتباط، لو ما حليتها هسا ما رح تحلها لما ترتبط.

- الشخص السنجل لا يعني إنه شخص من غير مشاعر وأحاسيس، بالعكس هو شايف مشاعره شيء ثمين ولازم يحتفظ فيها للإنسان اللي بستحقها!
ومش مستعد يفرط فيها بس عشان نظرة المجتمع ^^

- أمر المؤمن كله خير!
كله كله والله..!

- قال صلى الله عليه وسلم: «إنَّ رُوحَ القُدُسِ نَفَثَ فِي روعِي أنَّ نَفْساً لَنْ تَمُوتَ حَتَّى تَسْتَكْمِلَ أَجَلَهَا، وَتَسْتَوْعِبَ رِزْقَهَا، فَاتَّقُوا اللهَ، وَأَجْمِلُوا فِي الطَّلَبِ، وَلاَ يَحْمِلَنَّ أَحَدَكُمُ اسْتِبْطَاءُ الرِّزْقِ أَنْ يَطْلُبَهُ بِمَعْصِيَةٍ، فَإِنَّ اللهَ تَعَالَى لاَ يُنَالُ مَا عِنْدَهُ إلاَّ بِطَاعَتِهِ»

- وقال الله تعالى:
وَلْيَسْتَعْفِفِ الَّذِينَ لَا يَجِدُونَ نِكَاحًا حَتَّىٰ يُغْنِيَهُمُ اللَّـهُ مِن فَضْلِهِ ❤ !
#ARK

قبل سنوات طويلة دار هالحوار في ليلة ممطرة بين أب وبنته:

- بتحبي أحكيلك قصة حبة المطر اللي نزلت على خدك اليوم؟؟

- آه آه بابا..إحكيلي..

- هالحبة اللي عخدك ربنا العظيم خلقها مثل ما خلقك ")

هالحبة كانت في بحــر كبيــــــر..
بعدها هالحبة تبخرت بفعل أشعة الشمس وطارت مع الرياح بمشوار بعيد للسما..

بعدها التقت هالحبة مع صاحباتها التانيات اللي كانوا معها بالبحر بسحابة كبيـــــرة وضخمة كتير كتير..

هالحبة كانت بتستعد تخوض رحلة جديدة من السما للأرض..
بس ما كانت بتعرف هالمرة وين رح تنزل؟

كانت بتستنى هديك اللحظة اللي تحتَكّ فيها الشحنات الموجبة والسالبة جوا السحابة حتى آخر إشي تنزل عالأرض..

ودّعت صاحباتها لإنه ممكن بأي لحظة تغادر من السحابة..

وفجأة نزلت على خدك ")
.
.
------------
بعد مرور سنوات على القصة..

- تتذكري قصة حبة المطر اللي كنت أحكيلك إياها بكل شتا؟
وقتها كل ما تمطّر الدنيا كنتِ تطلعي توقفي تحت المطر حتى تستقبلي حبات المطر بعد ما ودعوا صاحباتهم..
وتحكيلي أنا صاحبتهم الجديدة !! ")

أنا وياهم ربنا خلقنا!!

- آه...بتذكر!!

- بتتوقعي كم حبة مطر ربنا خلقها؟؟

- كثيـــــر!!

- فعلا.. ربنا خلق كثـــير حبات مطر..
لكنّه مع ذلك بِحِب منــك

دمعة !!
#ARK

امبارح تواصل معي شب عشان أرافقه بمشوار حتى يوصّل مصاري جمعها لعيلة عفيفة..
وقلي حرام بكونوا محتاجين قبل المنخفض..

وإحنا بالطريق حكالي شو رأيك نعرض عليهم نوصلهم للسوق بدل ما يطلعوا بهيك جو ويتبهدلوا؟

قلتله تمام ما في مشكلة..

لما وصلنا أعطى الزلمة المبلغ وقله لو بتحب نوصلك عالسوق بدل ما تطلع بهيك جو...؟ فالزلمة قله هسا صعب والموضوع بسيط ما تشغل بالك..

لما ركب صاحبي بالسيارة قلّي:
منيح عرضنا عليه نوصله للسوق..!

قلتله: مش فاهم..ليش! مهو إحنا ما وصلناهم!!

قلي: يييي يا أهبل...انكتب إلنا أجر النية...!
يعني لو ما نوينا نوصلهم عالسوق كان راح علينا الأجر!!

وكمّل كلامه بعفوية:
ولكّ إنت لازم دايما تنوي الخير..
حتى لو مش قادر تحققه..
بس إنت إنوي وما عليك..!

يعني مثلا أنا بنيتي أعطيه ضعف المبلغ اللي أعطيته إياه..بس ما قدرت أجمع أكثر منه..
بس ربنا بكون كتبلي أجر المبلغ اللي كان بنيتي وببالي..

فهمت عليّ؟؟

ولكّ إنت بس إنوي ما بتخسر إشي..
وبعدها اترك الباقي عربنا..
.
--------
نسيت أخبركم إنه هالشب عادي جدّا!
يعني مش شيخ ولا ملتزم كثير..

يعني اللي بشوفه ما رح يتخيل إنه هالشب بهيك وقت بكون باله مشغول بالعائلات المحتاجة..
ما رح يتخيّل إنه هالشب ساكن فيه كل هالخير..
وإنه فاهم النيّة بهاي الطريقة..!!

وإنه قلبه الصغير قِدِر يوسع نية بحجم جبال!!
.
.
.
لما أجى ينزلني من السيارة قلّي بعفوية ومزح:
كثير ناس ربنا أعطاهم ويسّر إلهم يعملوا خير..

بس أنا رح أسبقهم كلهم

بالنيّة! ")

#ARK

من فترة كنت بمحاضرة أونلاين عالتيمز.
وكانت وقتها الدكتورة بتحكي عن المادة وتوزيع العلامات وطبيعة الإمتحانات وغيره..

ولما خلّصت الدكتورة كلامها وقالت مين عنده سؤال..؟

قامت بنت وحكت: دكتورة أنا بنت (ضريرة) وممكن أحتاج مساعدة في كتابة الواجبات أو حد يسجلي بعض النصوص المهمة بصوته.

وفجأة بنت ثانية فتحت المايك واندفعت بعفوية!
وبصوت عالي "طرشتنا" فيه قالت:

دكتورة أنااااااااااااا!!!
أنا بساعدها بكل إشي..
أنا بسجللها كل إشي بدها إياه، وبكتبلها كل إشي بدها إياه..
ولو بتحب كمان بقعد معها بالمكتبة وبندرس المادة سوا..!
.
.
الموقف على بساطته لكنّه أدهشنا جميعا..!
من بين أكتر من 100 طالب في المحاضرة هالبنت سبقتنا كلنا..
حتى الدكتورة أثنت عالخير الكبير الموجود في قلبها..

لحظتها خطرتلي آية:
أُولَٰئِكَ يُسَارِعُونَ فِي الْخَيْرَاتِ وَهُمْ لَهَا سَابِقُونَ (61)

في ناس مش إنهم بعملوا خير بس..
وكمان بسارعوا فيه..

وبنظروا لأي خير بصادفوه بحياتهم كفرصة..
وكإشي ربنا ساقه إلهم حتى يقربهم منّه..

وبكل عفوية بقولوا:
أناااااااا!!
.
.
----------
للبنت اللي قالت: أناااااا..

أرجوك خليك مثل ما إنت..
وما تسمحي للدنيا تغيرك..

وأوعك الحياة وظروفها تخليك بيوم تبخلي بالخير العظيم الموجود بقلبك..!

#القرآن_الجميل
#ARK

دايمًا لما نسمع خبر موت شخص..
أول سؤال بخطر ببالنا: كيف مات؟!
وبنكون لحظتها بنستنى الجواب اللي يريحنا ويطمّنا إنه سبب الوفاة مثلا مرض..

لكن الصدمة الحقيقية لما الجواب يخالف توقعاتنا ويكون:
مات فجأة!
.
.
فكرة الفرار النفسي من الموت، ومحاولاتنا الدائمة في البحث عن مبررات كانت السبب في وفاة الناس اللي بنعرفهم..بتجاوبنا عليه آيات كثيرة ومنها:

قُلْ إِنَّ الْمَوْتَ الَّذِي ((تَفِرُّونَ مِنْهُ)) فَإِنَّهُ مُلَاقِيكُمْ ۖ ثُمَّ تُرَدُّونَ إِلَىٰ عَالِمِ الْغَيْبِ وَالشَّهَادَةِ فَيُنَبِّئُكُم بِمَا كُنتُمْ تَعْمَلُونَ.
.
.
اكبر مشكلة إنك تتعامل مع الموت بهذا المنطق..!
منطق (الفرار النفسي) دائما..
وإنك تستبعد فكرة إنه المرة الجاي ممكن يكون الدور عليك إنت..!
وفجأة من دون سابق إنذار..!
.
.
ومن الملفت إنه القرآن مثل ما قدم إلنا فكرة (الفرار النفسي) عند البعض، قدم إلنا نموذج آخر مختلف تماما:

- الَّذِينَ يَظُنُّونَ أَنَّهُم مُّلَاقُو رَبِّهِمْ وَأَنَّهُمْ إِلَيْهِ رَاجِعُونَ..
- فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ ۖ وَمَا بَدَّلُوا تَبْدِيلًا
.
.
الفكرة إنه الموت مرحلة وكلنا راح نمر فيها..
وإنت أمام خيارين في التعامل مع مسألة الموت..

إما فرار نفسي دائم..
وإما يقين بلقاء الله..
.
.
ولا أحسن من يقين بلقاء الله!

#القرآن_الجميل
#ARK

بمناسبة #اليوم_العالمي_للمرأة. ")

عمركم لاحظتوا تدرج القرآن في تناول موضوع المرأة؟؟!

الخطاب القرآني "المكي" بالمجمل بتناول المرأة بشكل عام وعابر من غير ما يخصص الخطاب إلها مباشرة أو حتى يذكر اسمها..!!
(امرأة عمران، أم موسى، امرأة فرعون).

مع الوقت وبمجرد ما انتقلت الدعوة للمرحلة "المدنية" رح نجد إنه الخطاب القرآني اختلف بشكل جوهري..
رح نلاقي سور قرآنية جاءت تتناول وتوضّح بعض القضايا الخاصة بالمرأة..
مثلا: (سورة النساء، الحجرات، الطلاق، الاحزاب، الممتحنة، المجادلة)..

هذا التدرج في الخطاب كان ضروري جدًا في مجتمع قائم على انتقاص المرأة واحتقارها وعدم مراعاة حقوقها..
وبمدة قياسية جدًا استطاع القرآن يمهد لنوع من المساواة العادلة في الحقوق والواجبات ما بين الرجل والمرأة.

- يعني سورة النساء "مدنية" أول آية فيها:
يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً ۚ وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ ۚ إِنَّ اللَّهَ كَانَ عَلَيْكُمْ رَقِيبًا (1)

- وفي الحجرات إن أكرمكم عند الله أتقاكم:
{ يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ }

- وفي التحريم بضرب مثل لكل العالم بامرأتين !
وَضَرَبَ اللَّهُ مَثَلًا لِّلَّذِينَ آمَنُوا امْرَأَتَ فِرْعَوْنَ إِذْ قَالَتْ رَبِّ ابْنِ لِي عِندَكَ بَيْتًا فِي الْجَنَّةِ وَنَجِّنِي مِن فِرْعَوْنَ وَعَمَلِهِ وَنَجِّنِي مِنَ الْقَوْمِ الظَّالِمِينَ (11) وَمَرْيَمَ ابْنَتَ عِمْرَانَ الَّتِي أَحْصَنَتْ فَرْجَهَا فَنَفَخْنَا فِيهِ مِن رُّوحِنَا وَصَدَّقَتْ بِكَلِمَاتِ رَبِّهَا وَكُتُبِهِ وَكَانَتْ مِنَ الْقَانِتِينَ (12)

- وفي الأحزاب بحكيلنا إنه ما في فرق بينكم:
إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُم مَّغْفِرَةً وَأَجْرًا عَظِيمًا (35)

- وفي الممتحنة النساء ببايعوا الرسول مثلهم مثل غيرهم:
﴿ يَا أَيُّهَا النَّبِيُّ إِذَا جَاءَكَ الْمُؤْمِنَاتُ يُبَايِعْنَكَ عَلَى أَنْ لَا يُشْرِكْنَ بِاللَّهِ شَيْئًا وَلَا يَسْرِقْنَ وَلَا يَزْنِينَ وَلَا يَقْتُلْنَ أَوْلَادَهُنَّ وَلَا يَأْتِينَ بِبُهْتَانٍ يَفْتَرِينَهُ بَيْنَ أَيْدِيهِنَّ وَأَرْجُلِهِنَّ وَلَا يَعْصِينَكَ فِي مَعْرُوفٍ فَبَايِعْهُنَّ وَاسْتَغْفِرْ لَهُنَّ اللَّهَ إِنَّ اللَّهَ غَفُورٌ رَحِيمٌ ﴾

والأمثلة والشواهد من القرآن والأحاديث لتدرّج الخطاب -بشكل عبقري- كثيرة..
.
.
.
من المؤسف بصراحة إنه بعض الرجال مُصرّين ينظروا للمرأة بنظرات جاهلية..
ونسيوا أو تناسوا خطابات الوحي المتكررة لترسيخ حقوقهم والتحذير من ظلمهم!

ومن المؤسف كمان إنه في بنات حكموا عالدين والوحي من خلال نظرات هالرجال الجاهلية!!

وكلا الطرفين قطعا ما تدبروا القرآن ")
.
.
-------
المهم..
وفي يوم المرأة العالمي..
ومثل ما الدين وصّانا بالنساء خير..

فكل عام ونساء العالم بكل خيـــر ")

#القرآن_الجميل
#ARK

رح تسألني كيف أتجاوز قصة حب مريت فيها..؟!

بداية لما نشوف حد بغرق وبنادي علينا نساعده، مش منطق نحكيله الحق عليك! ليه تقرّب من الميّ ؟ ليه ما تعلمت تسبح من قبل...؟؟
الأصل ننقذه وبعدها نوضحله الصح من الغلط ")

وجوابي إلك:
ممكن من أبرز الأمور اللي ممكن تساعدك على تجاوز قصة حب إنك تدرك إنها غالبا ما كانت حب.!!

في الحقيقة كم هائل من القصص اللي بنشوفها ما دخلها بالحب..
هي مجرد ألفة ومراهقة وفراغ وفضول وتسلاي..
ولو تأملنا حال هالقصص من بدايتها ومرينا بتفاصيلها وحتى الطريقة اللي انتهت فيها..
رح نكتشف إنه صعب جدًا نطلق عليها حب..

غير إنه القصة فيما لو انتهت بتخلي طرف من الأطراف وانسحابه أو خيانته، فهذا أكبر دليل إنه ما كان حب، وبالتالي الموضوع ما بستحق منّا كل هالزعل والحزن والحسرة.

وعيك لهاي النقطة رح يسهل عليك تجاوز الموضوع..
أحسن ما تقنع حالك إنه كان حب وتحمل على عاتقك همّ نسيان إشي ما كان إله بيوم أي وجود !!
.
.
بدي أفرض إنك شخص فعلا مريت بقصة حب حقيقية..
وفي ظروف قاهرة حالت بينك وبين نجاحها..
كيف ممكن الواحد يتجاوز قصة حقيقية زي هاي؟!

لا أخفيك هالقصص الحقيقية نادرة جدًا، ولو سلمنا بوجودها..
فربنا يلطف فيك وبقلبك..
وما تنسى إنه الدنيا دار بلاء ومش كل شيء بنحبه ممكن نحصّله..
وكونك مؤمن يفترض تآمن إيمان حقيقي إنه ربنا كاتبلك الخير..
بعرف إنك بتعرف هالحكي بس المطلوب إنك تآمن فيه من قلبك مش بس تعرفه..

إياك تستسلم لمشاعر ماضية وتحرم نفسك من الحياة الرحبة والفسيحة بين إيديك..
دير بالك تقنع حالك إنه سعادتك فقط كانت مع الطرف الثاني وبالتالي تحرم حالك من كل سعادة ثانية ربنا ساقها وبسوقها إلك..

وضروري حتى تثبت لربنا حرصك وصدقك إنك تنهي أي تواصل بينك وبين الطرف الآخر..
نصيحة ما تسترجع تواصل في قصة منتهية لإنه هذا ظلم إلك ولشريكك بالمستقبل ..
وقد خاب من حمل ظلمًا !!

ما تنسى تدعي ربنا يساعدك ويتولى قلبك، وزاحم كل غلط بطاعة وإحرص يكون حالك مع ربنا بعد القصة أفضل من قبلها ..

ومن الأشياء اللي ممكن تساعدك إنك تستحضر إنه على مرّ العصور في ملايين من قصص الحب المأساوية!
واستحضارك إنك بتمثل قصة من بين ملايين القصص رح يساعدك تشعر إنك ما بتعاني لحالك..

رح تفقد معاناتك شيء من حدتها..
رح تصير أكثر قابلية للعقلنة والفهم..
ورح تدرك إنها مش لعنة فردية صابتك لحالك..

إنت بتمثّل قصة من بين ملايين القصص..
والحياة في النهاية بدها تمشي ^^
.
.
المهم..
هات إيديك..
ويلا انفض عن قلبك غبار الماضي..
وقول: يارب <3

#ARK

زمان وأنا صغير كنت أعبي بلالين ميّ وأرميهم عالسيارات..
وبيوم لمحتني بنت جيرانا وكان اسمها "لينة"، وكانت بتدرس إنجليزي بالجامعة الأردنية، يعني عمرها ما كان بتجاوز 22 سنة..

وقتها نزلت لينة عالحارة ومسكتني من ذاني وشدتها وقالت والله لو برجع أشوفك بتعمل هيك غير أذبحك!
بتعرف إنك لما ترمي عالسيارات بلون ميّ ممكن السايق يعمل حادث ويدعس أطفال ويموّتهم !!!

أنا صرت أبكي من كلامها..وقلتها وعد ما أعيدها....
أنا ما بدي أكون سبب بموت أطفال !!

لاحقا لينة كانت كل ما تشوفني تبتسم..
وأحيانا تشتريلي من الدكانة لإني شطور ومؤدب..
ودايما تحكيلي: دير بالك من السيارات..!
.
.
بصراحة زمان كان الواحد يشعر إنه المجتمع كلّه مسؤول عن التربية..
يعني كل فرد بالمجتمع بقوم بمهمة وليّ الأمر في حال غيابه..
وبشوف نفسه مسؤول عن أي طفل أمامه..

التربية ما كانت متعلقة فقط بالأب والأم..
في أستاذ ومس وشيخ وجار وأخ كبير وأخت كبيرة وبنت جيران اسمها لينة!

كلهم بشوفوا نفسهم شركاء بالتربية..وكلهم حملوا على عاتقهم توجيه أي طفل بصادفوه بطريقهم..
.
.
-----------
ما بعرف شو صاير بالدنيا؟؟
حتى الإم والأب بتشعر إنهم تخلوا عن دورهم إتجاه أطفالهم!
فما بالكم المجتمع؟؟

ياما اندهشت من قصص أطفال بتعرضوا لتحرش وابتزاز وإدمان ومشاكل نفسية هائلة وأهلهم ولا عندهم فكرة !

ياما اسأل أطفال كيف هي صار؟؟ وين أهلكم؟؟ طيّب ما حسوا عليكم؟
ويجاوبوني: أهلي مشغولين !!
.
.
شو نفسي بعد كل هالسنوات أشوف بنت جيرانا "لينة" وأشكرها على لطفها والخير الموجود بقلبها..

وشو نفسي أقلها إنه حرصك وصدقك معي ومع غيري من الأطفال اللي ما بتعرفيهم..

عجزت عنه كثير أمهات مع أطفالهم!!

#ARK

اشتغلت فترة بأمريكا، وكان السؤال المتكرر من الموظفين you have a girlfriend ؟

فكنت أجاوب: لأ.
طيب ليه؟
ممم عندي قناعة إنه لازم أحتفظ بمشاعري لزوجة المستقبل
" عجل الله في ظهورها " : )
كان هالجواب كفيل إنهم يقدروني ويحترموني ويحكولي شو إني حدا كيوت ونيالها ") ^^

وكانوا دايما يسألوني كيف عايش بدون وجود Fun بحياتك..!
لا بنات، ولا شرب، ولا حتى جربت تلعب قمار..

كانوا ينظروا إلي بفضول كوني بالنسبة لأغلبهم أول مسلم بقابلوه بحياتهم..

المهم.. صادف وجودي هناك شهر رمضان، وفي يوم حكتلي المديرة:
تعال كل هي جبنا بيتزا ")
فأنا اعتذرت منها وقلتها صايم..حكتلي طيب هي مي وعصير ..
فقلتلها: شكرا بس أنا صايم عن كل إشي..
وبعفوية قالت: OMG حتى عن المي!!

وعلى ما يبدو إنه المديرة نقلت قصتي لبقية الموظفين، ولاحظت هالإشي من خلال نظرات الشفقة منهم!
وأدركت هالشيء من خلال كلام صديقي "جون" لما قلي بما معناه:
مااااااااان ليه بتعمل بحالك هيك !!

وبيوم سألوني: ليه بتصوم؟؟ شو العبرة؟؟
وقتها شعرت بالإحراج وخفت ما أجاوب بشكل يقنعهم..
فلو مثلا حكتلهم إنه إحنا بنصوم عشان نشعر بالفقراء، فممكن يحكولي يعني الفقراء عندكم ما بصوموا؟؟

خطرلي وقتها أحكيلهم:
إنه إذا الإنسان قدر يمنع نفسه من الأكل والشرب وهي حاجات أساسية ومن دونها بتنعدم حياته، فهو من باب أولى قادر يسيطر على أي إشي ثاني..

ووظفت جوابي لموضوع ليه ما عندي علاقات مع بنات ولا بشرب، لإنه اذا قدرت أمنع نفسي من الأكل والشرب، فهذا يعني إني قادر أسيطر وأتحكم بأي شهوة ثانية..

وبصراحة ما بعرف، لكن كلامي على بساطته شعرت إنه أثار إعجابهم!
.
.

يا الله رمضان فعلا مدرسة!
شهر بستخرج طاقاتك وإمكاناتك، شهر بثبتلك إنه إنت قادر تتخلص من شهواتك ورغباتك، بثبتلك إنه الشهوة اللي كنت تعتقد إنك ما بتصبر عليها يومين هيّك صبرت عالأكبر منها!
ممكن عشان هيك النبي صلى الله عليه وسلم وصف الصوم بالجُنّة، يعني ستر ووقاية.

"مدرسة الصيام" بتعمل على استدراجك للخير والطاعة، وبتخليك تشعر بحلاوتها وبحلاوة إنك قادر تسيطر على شهواتك..
حتى يدفعك هذا الإستدراج إنك تعيش بقية أيام حياتك وكأنها رمضان.

"مدرسة رمضان" بتعلّمك إنه ما في أحلى من شعور القوة والسيطرة.
شعور إنك أقوى من شهواتك ورغباتك..
شعور إنك قادر تحكي "لأ" للغلط..
وإنك قادر تستأنف صراع كنت على وشك الإستسلام فيه..
.
.
.
في اللحظة اللي كانوا ينظروا إلي فيها نظرة شفقة..
كنت أتمتم بقلبي:

الحمدلله على نعمة رمضان <3 !
#ARK

سورة البقرة "ثقيلة"!
ما بتحب المجاملات..
ورح تبدأ معك بداية صريحة جدا..

بتحكيلك الحياة مش وردية..
والناس مش شرط يكونوا مناح..
في منهم (خدّاعين) و (بقلوبهم مرض)..!
في منهم (فاسدين) بالوقت اللي بدّعوا فيه (صلاحهم)!
في ناس (بتشتري بآيات الله ثمنا قليلا) وبتكذب عربنا..
وناس ظالمين تملّكت الحياة وماديتها (العجل) من قلوبهم..
استولى عليهم الجشع والطمع وكفر النعمة..
وبدل ما يحكوا الحمدلله تشرطوا عربنا بدهم نِعم ثانية على مزاجهم!

رح تحكيلك عن ناس قلوبهم أقسى من الحجارة!
وناس رح تفسد وتسفك دماء أبرياء ومساكين والملائكة بتسأل عن سبب وجودهم!!

عن ناس ممكن يعجبك كلامهم، ويشهدوا الله عالإشي الموجود في قلبهم إنهم صادقين اتجاهك....وهمّه ألد الخصام!!
.
.
الحياة مش وردية..
فيها طلاق وألم وفراق وموت وأيتام وقتل وقصاص وقتال وأشياء كره إلكم!
فيها صراع مرّ..
فيها قسوة كالحجارة
أو
أشد قسوة!
.
.
في المقابل:
في ناس بتبحث عن (قبلة) ووجهة حتى تخفف من عناء صراعها..
فيها ناس صادقة بدها (قلبها يطمئن) من الأسئلة اللي شغلت بالها..
في ناس صلّت وصامت ودعت وتصدقت وقالت يا رب من قلبها..

ناس الآن واقفين بين إيدين ربنا..
بواجهوا صراعات سورة البقرة بدعوات آخر البقرة:

لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ

#القرآن_الجميل
#ARK

في لحظات نصرك ونجاحك إنت بحاجة لحد يضبط مشاعرك وانفعالاتك، لحدا يذكرك إنه نجاحك كان بفضل ربنا ثم بفضل الناس حولك..
لحدا يطلب منك تتواضع وما تتكبر وتشكر ربنا عكل إشي أنعمه عليك..

وفي لحظات هزيمتك وفشلك إنت بحاجة لحد يمنحك أمل من جديد، لحدا يخبرك إنه هيك الدنيا يوم إلك ويوم عليك، لحدا يقلك إنت أكبر وأعلى وأقوى من أي فشل ويأس وهزيمة..
لحد يذكرك بإنتصارت قادمة بتنتظرك!
.
.
في سورة آل عمران لما انتصر المسلمين في معركة بدر، نزلت الآية:

وَلَقَدْ نَصَرَكُمُ اللَّهُ بِبَدْرٍ وَأَنتُمْ (أَذِلَّـــــــةٌ ۖ) فَاتَّقُوا اللَّهَ لَعَلَّكُمْ تَشْكُرُونَ.

لكن لما انهزموا في أحد، كانت الأسلوب مختلف تماما!

وَلَا تَهِنُوا وَلَا تَحْزَنُوا وَأَنتُمُ (الْأَعْلَــــــوْنَ) إِن كُنتُم مُّؤْمِنِينَ (139) إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ ۚ وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنكُمْ شُهَدَاءَ ۗ وَاللَّهُ لَا يُحِبُّ الظَّالِمِينَ (140)
.
.
آل عمران بتعرف إنك رح تمر بيوم (بدر) ورح تمر بأيام (أحد)!
في إيدين رح تصفق إلك لنجاحك!
وفي إيدين رح تطعنك في ظهرك..
في انتصارات سعيدة..
وفي هزائم موجعة متتالية..

في ناس رح تبكي فرح بنجاحك، وناس رح تضحك وقت انكسارك..
.
.
آل عمران بتذكرك بلحظات "نصرك" بالذل والتواضع بين إيدين ربك..
وبتذكرك بلحظات "هزيمتك" وإنكسارك..

إنك الأعلى بإيمانك!

#القرآن_الجميل
#ARK

- الشب اللي ممكن ملامحه بتوحي إنه بعيد عن ربنا..
قرر اليوم يسجد سجدة طويلة..
ومن كل قلبه كان بدعي: يا رب ما تتركني!

- البنت اللي ما كانت راضية عن حياتها.. ما كنّا معها وهي بتبكي وبتسأل ربنا بصلاتها يعينها عالطاعة والخير والستر..

- الشب اللي بخاف الله بقلب إنسانة حبها..
قبل ما يحط راسه عالمخدة رفع إيديه للسما، وقال:
يا رب ما بدي حرام..ورح أصبر عشانك..فما تحرمني من قلبها بالحلال..!

- ما تركت تلفونها وهي بترن وبتبعت وبتشيّر لحملات طرود خير وإفطارات أيتام..
يا الله هالبنت قديش قلبها مسكون بالخير..
ودايما أجنحة الملائكة بترفرف فوق قلبها !!

- الإم اللي كل العيلة بتكون نايمة قبل الفطور وهي واقفة عرجليها عشان تحضّر السفرة إلهم وتدعيلهم..!
والأب اللي شاب شعره وهو بداري على أوجاعه وأمراضه..
كان صافن بولاده وبسأل حاله: أبصر راح أفطر معهم رمضان الجاي؟
وتمتم بسرّه: الله يحفظهم ويحميهم ويرزقني حسن الخاتمة..
.
.
- في شب طفى تلفونه وسكّر على حاله باب غرفته وسجد لربنا سجدة طويلة..

يا رب..
مش عندك في كل ليلة عتقاء من النار..؟
وقتها سكت شوي...وكمّل:
مش صح إنت حكيت: "أنا عند ظن عبدي بي..؟"
أنا ظني فيك إنك راح ترحمني وتعتقني!

وبكى..
.
.
.
ما كان بعرف إنه السما استقبلت دعواته بحفاوة..
وإنه في اللحظة اللي مسح فيها دموعه، ربنا مسحله كل ذنوبه..

وفي اللحظة اللي رفع راسه فيها من السجود..
كان ربنا عند حسن ظنه..

فعفا عنه..

وأعتقه ❤ !
#ARK

أحكيلكم عن سرّ بعمله؟؟

أنا كثير بحب أدعي للناس سواء بعرفهم أو ما بعرفهم..
ومتأكد يوم القيامة كثير ناس رح تنصدم من دعوات اندعت إلهم مني..

يعني لما أزور صاحبي ببيته، بدعي إله ولأهله كلهم..
ولما أحضر عرس بدعي كثير للعروسين..
ولما أشوف طفل بالشارع بدعي ربنا يحميه وينبته نبات حسن..
ولما أشوف شب بعمل غلط بدعي ربنا يهديه ويستر عليه..
ولما ألمح بنت بالغت بلبسها بدعيلها ربنا يجمّلها بالستر..
ولما أشوف شب وبنت سوا، بقول يارب تجنبهم الغلط وتجمعهم بالحلال..
ولما أشوف زوجين ماشيين بالشارع بدعي ربنا يغرس المودة والسكينة بينهم..
ولما أقرأ بوست حلو بدعي جدًا لصاحبه..
وبالمستشفى بدعي لكل مريض ربنا يخفف عنه ويشفيه..
ولكل دكتور ربنا يعينه ويقويه..

وأكثر من مرة أشوف جنازة ما بعرف صاحبها ومع ذلك بكمّل معهم وبدعي لصاحبها من كل قلبي..
.
.
اليوم رحت أشتري حليب وكان قدامي بنت بدها تحاسب وعربايتها فلّ وأنا بس معي باكيتين حليب..
حكتلي تعال بدالي إنت عالسريع بتحاسب وأنا عربايتي فلّ ومطولة..

شكرتها جدا..
بس متأكد يوم القيامة رح تنصدم لما تعرف قديش دعيتلها..!
-------

أمانة ادعوا للناس بكل تفاصيل يومكم..
وما تنسوا في ملائكة بتحكي "آمين ولكم بالمثل" على دعواتكم..

وكونوا متأكدين..
زي ما بتدعوا للناس ربنا رح ييسر إلكم مين يدعيلكم..

ممكن دعوة من بنت سمحتوا إلها تاخد دوركم..
أو دعوة غريب قرر فجأة يمشي بجنازتكم !!!

#ARK

بتتذكر مشاعرك بعد الغلط؟ لما تشعر إنك خجلان ومستحي من ربنا؟
لما يكون نفسك تهرب وتركض بعيــــــــــد مع علمك إنه ربنا شايفك..!!

بالضبط نفس اللي صار معهم..
لما وقعوا في الخطيئة هربوا!
لحظتها استحوا وخجلوا وما كان بإيدهم إلا إنهم يهربوا..

ممكن عشان هيك بعد الخطأ ربنا قلهم:
أَلَمْ أَنْهَكُمَا عَن تِلْكُمَا الشَّجَرَةِ
(تلك) إشارة للبعيد..
الشجرة صارت بعيدة عنهم..

لكن قبل الخطأ كانت قريبة منهم:
وَلَا تَقْرَبَا هَٰذِهِ الشَّجَرَةَ
(هذه) إشارة للقريب..
.
.
.
تصرف إمنا وأبونا كان عفوي بعبّر عن الحياء والخجل من ربنا..
وهمه أكيد عارفين إنهم مهما هربوا ما رح يغيبوا عن عينه..
لكن مجرد الحياء والهروب كان دليل صدقهم وندمهم..

ما كابروا ولا جاهروا ولا جحدوا لكنهم خجلوا فهربوا..
ممكن عشان هيك الخطاب الرباني كان لطيف لأبعد حد..
وبصيغة استفهامية عتابية رقيقة:
وَنَادَاهُمَا رَبُّهُمَا أَلَمْ أَنْهَكُمَا عَن تِلْكُمَا الشَّجَرَةِ ؟؟!
مش حكيت إلكم ما تقربوا عالشجرة؟

ما أجمل القرآن وهو بحذّر بقوة قبل الخطأ، وبعد الخطأ بعاتب بحب وبذكرنا إنه باب التوبة لسه مفتوح..
.
.
اعترفوا بغلطهم:
قَالَا رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ

ولحظات معدودة ومن غير تطويل ولا إبطاء أجاهم الرد:
فَـــتَلَقَّىٰ آدَمُ مِن رَّبِّهِ كَلِمَاتٍ فَتَابَ عَلَيْهِ ۚ إِنَّهُ هُوَ التَّوَّابُ الرَّحِيمُ

توبة ناجزة قاطعة خصوصا للي استوعب الدرس!
للي حافظ على شعور الحياء من ربنا بعد كل خطأ..
للي اعترف بظلمه لنفسه وقال يا رب إذا ما بتغفرلي رح أخسر!
وأنا ما بدي أخسر..
سامحني يا رب !

#القرآن_الجميل
#ARK

بعرف إنه انتصف رمضان وإنت لسه مش ملاقي قلبك..!
وبعرف إنك كنت تحكي بس ييجي رمضان أكيد رح أتغير..
وهيو أجى وقرب يخلص ولساتك زي ما إنت..

حاسس فيك وإنت بتعاتب حالك إنه بحياتها التراويح ما كانت ثقيلة عليك هالقد..
والقرآن مش عارف تنجز فيه إشي..
لما أجاك شعور اليأس والقنوط وصرت تحكي مع حالك:
إذا الواحد برمضان ما تغير متى بدو يتغير..؟

لما اكتشفت إنه الصراع اللي إنت عايشه مع شهواتك ورغباتك طلع مش بالبساطة اللي كنت بتعتقدها..
-----------
وفي اللحظة اللي بتفكر فيها تستسلم وتنسحب من هذا الصراع..
فجأة....بتتسلل لروحك نفحة إلهية!
فجأة بتفتح المصحف وعينك بتصادف آيات بتخاطبك إنت شخصيّا..

- {إِن تَجْتَنِبُوا كَبَائِرَ مَا تُنْهَوْنَ عَنْهُ نُكَفِّرْ عَنكُمْ سَيِّئَاتِكُمْ وَنُدْخِلْكُم مُّدْخَلًا كَرِيمًا}

- {إِنَّ اللَّهَ لَا يَظْلِمُ مِثْقَالَ ذَرَّةٍ ۖ وَإِن تَكُ حَسَنَةً يُضَاعِفْهَا وَيُؤْتِ مِن لَّدُنْهُ أَجْرًا عَظِيمًا}

- {وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللَّهَ يَجِدِ اللَّهَ غَفُورًا رَّحِيمًا}

- {وَلَوْ أَنَّهُمْ إِذ ظَّلَمُوا أَنفُسَهُمْ جَاءُوكَ فَاسْتَغْفَرُوا اللَّهَ وَاسْتَغْفَرَ لَهُمُ الرَّسُولُ لَوَجَدُوا اللَّهَ تَوَّابًا رَّحِيمًا}

فجأة بتحس إنه ربنا أقرب إلك مما كنت بتتصور..
وإنه ما دام فيك نفس يعني في أمل..
فجأة بشتاق قلبك لرحمة ربنا ولطفه..
لما تشعر فجأة إنه نفسك تسجد بين إيدين ربنا وتحكيله كل إشي جواتك..
---------
نصيحة بكفي يأس وقنوط..
بكفي تجلد ذاتك وتحتقر نفسك..
بكفي تظن إنه رحمة ربنا مش أكبر من كل أغلاطك وهفواتك وزلاتك..
.
.
وما تنسى..
رمضان لسه ما خلّص..
صحيح ممكن ما أحسنت الإستقبال..
لكن بإيدك تِحسن الوادع..!

#القرآن_الجميل
#ARK

اعتبر هذا البوست رسالة شخصية مني إلك : )))
**
بدي أطلب منك طلب بشرط توعدني تعمله!
وحتى أعرف إذا قبلت طلبي أو لأ ما عليك إلا تكتب كومنت أو تعمل (منشن) لحدا حابب يطبق معك هذا الطلب..
.
.
المهم..
ما تقنعني إنك بحياتك ما مريت بشعور القرب من ربنا..
يعني مثلاً سمعت آية أثّرت فيك..
صليت ركعتين وبكيت فيهم..
تصدقت صدقة وحدا دعالك..
حضرت فيديو حرّك قلبك..
عملت خير ما حد بعرفه عنك..
وإلخ..

كمان أظن إنك غالباً وفي يوم من الأيام وقعت بذنب..
طبعًا بعدها ندمت وزعلت وجلدت ذاتك وضاقت عليك الأرض بما رحبت..
قمت لحظتها صليت ركعتين بآخر الليل..
وبالسجود بكيت وبكيت حتى ارتحت..
ولما رفعت راسك من السجود اجاك شعور غريب قدرت تفهم منه إنه ربنا قبل توبتك!
.
.
طلبي إلك كالتالي:
ما ضل لرمضان إشي..
بدي إياك تختار يوم فيهم مع سبق الإصرار..
يوم تكون نفسياً فيه مرتاح وما عليك إلتزامات كثيرة..
مش مطلوب منك غير تصلي ركعتين خفاف بس بشرط يكون آخر سجود طويل شوي..

بدي إياك تفضفض لربنا كل إشي جواتك..
تحكيله إنك بتحبه وإن كنت بتعصيه..
وما تنسى تحكيله عن مشاكلك وهمومك وعن كل إشي بعرقل مسيرك إله..
وأكيد اطلب منه يغفرلك ويسامحك ويعينك عالخير فيما تبقى إلك من أيام حياتك..

والأهم: ما ترفع راسك من السجود إلا واجاك هذاك الشعور اللي كنت تفهم منه إنه ربنا قبل توبتك..

لكـــــــن هالمرة شعور إنه كتبك من عتقاء هذا الشهر!

وبس : )))

وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُلْ سَلَامٌ عَلَيْكُمْ كَتَبَ رَبُّكُمْ عَلَى نَفْسِهِ الرَّحْمَةَ أَنَّهُ مَنْ عَمِلَ مِنْكُمْ سُوءًا بِجَهَالَةٍ ثُمَّ تَابَ مِنْ بَعْدِهِ وَأَصْلَحَ فَأَنَّهُ غَفُورٌ رَحِيمٌ
#القرآن_الجميل
#ARK

مرة طلعنا عمرة مع شباب الجامعة، وكان معنا شب كثير عفوي وفايع ")

بنفس الوقت كان أكثر واحد فينا متحمس للعمرة، وكان هالحماس واضح من خلال انصاته لكلام الشيخ في الباص، ومن خلال أسئلته العفوية والمضحكة أحيانا^^

- شيخ مش قادر أحفظ آية الصفا والمروة..والله طويلة..
- طيّب لو خربطت بعدّ الأشواط..إن شاء الله بعيد من الأول؟
- شيخ هسا شو أحكي بالزبط عشان الله يغفرلي؟
- شيخ هسا أنا لما أزور قبر النبي وأسلّم عليه يعني هو رح يعرف إني سلمت عليه؟؟
- طيّب شيخ هسا بقدر أدعي أشياء بالعامية؟ أنا بعرفش بالفصحى أدعي زيكم !!
.
.
.
وفي ليلة من ليالي الرحلة، كنّا كلنا متجمعين وسهرانين..
فهو قام وقال: خلص يا شباب بالله خلينا ننام عشان نلحق الفجر.. ترى اليوم ناوي أصلي جنب الكعبة..

لحظتها دخل الشيخ وقلنا ما تنسوا تنزلوا قبل الفجر بوقت عشان صلاة التهجد..

نط هو وقال شيخ شو يعني صلاة التهجد؟؟؟

رد الشيخ: يعني صلاة القيام، وما تنسوا حديث النبي صلى الله عليه وسلم:
إذا كان الثلث الأخير من الليل، ينزل ربنا إلى سماء الدنيا فينادي فيقول: هل من سائل فأعطيه؟ هل من مستغفر فأغفر له؟ هل من تائب فأتوب عليه؟
.
.
لحد هاللحظة ما بتغيب عن بالي ردة فعله لما سمع الحديث!
شيييييخ يعني ربنا بنادي علينا؟؟ مين عنده سؤال؟ مين بدو أغفرله؟ مين بدو أتوب عليه؟؟؟

ابتسم الشيخ من عفويته وقله آه...

فجأة قام من مكانه..
قلناله وين؟؟؟

فقال:
الله بنادي...
وأنا رايح أرد عليه !!

------------

طيّب وإنت...
ما بدك ترد عليه؟؟!!
#ARK