أحيانا إنك تضرب اللي قدامك كفّ أفضل بمراحل من إنك تحكيله كلمة سيئة أو جارحة..

أجروا مجموعة من الدراسات على بعض المساجين وسألوهم لو بإمكانكم تنتقموا من سجّانينكم مين بتختاروا فيهم؟
معظم الإجابات اختارت السجّانين اللي كانوا يتلفظوا بألفاظ سيئة ومهينة إلهم..
يعني لو خُيّر الشخص فيهم إنه ينتقم من السجّان اللي ضربه وعذبه أو السجّان اللي غلط عليه وسبّه كان الاختيار يقع ع اللي غلط عليه وسبّه وأهانه..!

ألم الإهانة اكبر بمراحل من ألم الجسد أو الضربة..
وفي الوقت اللي بتتلقى فيه ضربه على جزء من جسدك، بتهزّ الكلمة السيئة كل كيانك..
ألم الضربة بصيبك من برا، لكن ألم الكلمة بنخر في روحك من جوا..!
وجع ضربة الجسد بزول بعد ساعات غالبا، وألم الكلمة بلازمك للأبد..

يا ترى الناس شو بتخسر لو حكت كلام منيح وحلو؟
شو بتخسر الإم لما تحكي لإبنها الله يرضى عنك..
والصاحبة لصاحبتها حليانة أو اشتقتلك..
والأخ لأخوه أبشر..
والزوج لزوجته تكرم عينك..
والزوجة لزوجها حاضر..

ترى في ناس ما بناموا الليل من كلمة انحكت إلهم..
وناس انقهر قلبها عتعليق وصلهم..
وناس انتحرت لإنه ما حدا حكالهم كلمة حلوة بحياتهم..!
.
.
دائما دائما القرآن بلامس روحي لما يخاطبنا بعتب ويحكيلنا:
يَا أَيُّهَا الَّذِينَ آمَنُوا لا يَسْخَرْ قَومٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ وَلا نِسَاءٌ مِنْ نِسَاءٍ عَسَى أَنْ يَكُنَّ خَيْرًا مِنْهُنَّ وَلا تَلْمِزُوا أَنْفُسَكُمْ وَلا تَنَابَزُوا بِالألْقَابِ بِئْسَ الاسْمُ الْفُسُوقُ بَعْدَ الإيمَانِ وَمَنْ لَمْ يَتُبْ فَأُولَئِكَ هُمُ الظَّالِمُونَ.

أو لما يحذرنا ويخوفنا:
وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا

ولمّا يوصينا وصية عامة نستخدمها بكل تفاصيل حياتنا:
- وَقُولُوا لِلنَّاسِ حُسْنًا
- وَقُلْ لِعِبَادِي يَقُولُوا الَّتِي هِيَ أَحْسَنُ

وفي الحديث:
- ليس المؤمن بالطعان ولا اللعان ولا الفاحش ولا البذيء.
- اتّقوا النار ولو بشق تمرة فإن لم تجدوا فبكلمة طيبة.
- إن من موجبات المغفرة بذل السلام وحسن الكلام.

-------------
في يوم من الأيام اختلف سيدنا عثمان وعلي، فعاتبه سيدنا عثمان..
وسيدنا علي ساكت بدون ما يجاوبه..

فسأله عثمان: ما لك لا تجيبني؟
فجاوبه علي:

إن قلت لم أقل إلا ما تكرهه..
وليس لك عندي إلا ما تُحب <3 !
--------
ممكن من اكبر النعم اللي ممكن تحظى فيها بحياتك، إنه ربنا يرزقك حد ما بتسمع منه إلا الكلمة الحلوة اللي بتصنع يومك!

#القرآن_الجميل
#ARK

إمي بتخبرني قصة عن وحدة من صاحباتها كانت بتقوّر كوسا..
ولما كان ضايل عليها بس 3 كوسيات أذّن..

المنطق إنها تكمل تقوير هال3 كوسيات وتخلص منهم بعدين تقوم تصلي أو تعمل شو ما بدها..

لكن هالمرأة كانت ماخذة عهد على نفسها إنه ما يأذن إلا تقوم مباشرة وتترك كل إشي بإيديها وتلبي نداء ربنا..

وكانت تحكي للناس دائمًا:
كلنا لما يدق باب البيت بنترك كل إشي بإيدينا وبنقوم نشوف مين عالباب، ولو كان ضيف فمش من عاداتنا نأخر الضيف ونخليه واقف عالباب يستنى!

كان صوت الأذان بالنسبة إلها ما بختلف عن صوت طرقات الباب..
وكانت بتشوف إنه استجابتها السريعة لطرقات البشر على الأبواب ما لازم تختلف عن استجابتها السريعة لنداء الله:
حيّ على الصلاة، حيّ على الفلاح..
.
.
تركت هال3 كوسيات وقامت تلّبي نداء الله..
توضت ولبست أواعي الصلاة وكبّرت ودخلت في صلاتها..

وماتت وهي ساجدة!
.
.
.
إِنَّ الَّذِينَ هُم مِّنْ خَشْيَةِ رَبِّهِم مُّشْفِقُونَ (57) وَالَّذِينَ هُم بِآيَاتِ رَبِّهِمْ يُؤْمِنُونَ (58) وَالَّذِينَ هُم بِرَبِّهِمْ لَا يُشْرِكُونَ (59) وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ أَنَّهُمْ إِلَىٰ رَبِّهِمْ رَاجِعُونَ (60) أُولَٰئِكَ يُسَــــارِعُونَ فِي الْخَيْرَاتِ وَهُمْ لَهَا سَابِقُونَ (61)

#القرآن_الجميل
#ARK

- في شب صافن من شباك الباص بفكّر بمصاريف دراسة أخته وبقول يا رب ارزقني وافتح عليّ..
يا رب ما تحرمني من ضحكتها لما أحكيلها إني أمّنت أقساطها.. .
الملائكة أمّنت على دعائه وربنا كتبله أجر "المجاهد"!

- وبنت نامت وقلبها بوجعها من همومها وأحزانها..
لما صحيت قررت تقرأ أذكار الصباح..
ولما مرّت على:
يَا حَيُّ يَا قيُّومُ بِرَحْمَتِكَ أسْتَغِيثُ أصْلِحْ لِي شَأنِي كُلَّهُ وَلاَ تَكِلْنِي إلَى نَفْسِي طَـرْفَةَ عَيْنٍ.

يبدو إنه هالدعاء طلع من قلبها..
وربنا الكريم أصلح كل شأنها وبلحظات تلاشى وجعها وحزنها..

- في شب نام على معصية، هو ندم كثير على غلطه ولام نفسه ليه بضل يرجع لنفس الغلط؟؟ وقال يارب ساعدني..
الله صحّاه يصلّي الفجر...وهو بطريقه للمسجد ردد دعاء حفّظه إياه سيده وهو صغير لما كان يروح معاه عالمسجد:

اللهم إني أسألك بحق السائلين عليك وبحق ممشاي إليك، فإني لم أخرج أَشَرًا ولا بَطَرًا ولا رياءً ولا سمعة، خرجت اتقاء سخطك وابتغاء مرضاتك، أسألك أن تنقذني من النار، وأن تغفر لي ذنوبي، إنه لا يغفر الذنوب إلا أنت.

و (الله) غفرله !

- "نور" راحت بيوم تصلي الظهر في مصلى الكلية، صادفتها بنت وتعرفت عليها ولما عرفت إنه اسمها نور خبرتها عن دعاء كثيييير حلو بحمل اسمها:

اللهم اجعل في قلبي نوراً، وفي لساني نوراً، وفي بصري نوراً، وفي سمعي نوراً، وعن يميني نوراً، وعن يساري نوراً، ومن فوقي نوراً، ومن تحتي نوراً، ومن أمامي نوراً، ومن خلفي نوراً، واجعل لي في نفسي نوراً، وأعظم لي نوراً.

هالموقف صارله 5 سنوات، ونور من وقتها ما بتشرق شمس ولا بتغيب بدون ما تدعيه..
وبكل مرة بتحط إيدها عقلبها وهي بتحكي: اللهم اجعل في قلبي نورا!

- كان كثير منسجم وهو واقف بسيارته عالإشارة بدعي.
كان منظره غريب بالنسبة للسيارات اللي جنبه..
ما كانوا بعرفوا إنه كان يحكي مع الله:

اللهمّ أنت حسبي حين تضيق الحياة وأنت المُنتصر حين يغلبني الوجع، اللهمّ أنت عوني ونجاتي حين أفقد الحيلة.

- اليوم أول يوم بتطلع فيه "زينة" بحجابها ولبسها الساتر..
كانت طايرة من الفرح وهي بتّمتم:
اللهم لك الحمد أنت كسوتنيه!
أنت كسوتنيه...أنت كسوتنيه يارب..
ثبتني عليه وجمّلني بالستر والعفاف..

كانت كل شوي تفتح كاميرا تلفونها حتى تشوف شكلها بالحجاب، وجننت كل صاحباتها وهي بتحكيلهم: لبست حجاااااااب ولبسي صار أستر.. ")

الغريب إنه "زينة" بتحكي لصاحبة إلها: حاسه حالي حـــــرة!!
مش مضطرة أتقيد بالموضة واللبس ومعايير الجمال اللي بفرضها المجتمع..
أنا هلأ حــــرة، أنا هلأ زينـــــة !

وبكل مرة بتشوف حالها بالمراي بتردد: أنت كسوتنيه!

كانت وقتها بتحكي مع (الله) !
.
.
.
- وإنت؟
حكيت اليوم مع (الله)..؟

#ARK

أي واحد فيكم جرّب يعمل (رجيم) رح يدرك كم أحيانا جدول الأكل بكون قاسي..
وأول ما تبلش رح تصير تسأل نفسك: معقول أنا كاين آكل وقت ما بدي عادي؟
يعني هسا وجبة الشاورما اللي ما كنت أفكر قبل ما أشتريها صرت أستنى يوم الFree عشانها ") !

ونفس الإشي للناس اللي بتلعب رياضة..
في أكثر الاحيان بتكون التمارين الرياضية فعلا قاسية..
ولو دخلت على أي نادي رياضي رح تلاحظ إنه في ناس بتبذل مجهود مش سهل أبدا..
في ناس بتصرّخ وبتتعذب وبتتعب وبتعرق وحالتها حالة..
وغالبا رح يتبادر لذهنك سؤال: شو جابرهم!!

بالرغم من قسوة الحمية الغذائية وقسوة التمارين الرياضية إلا إنه أصحابها بكونوا سعيدين جدا بإنجازهم..

مع الوقت بصير شعور إني أحكي للوجبة الفلانية لأ واستمر في جدولي الغذائي أحلى من شعور أكل الوجبة نفسها..

وإني أركض ساعة أو أرفع أوزان ثقيلة أحب إلي من من قعدة الكوفي شوب والأرجيلة!

الرياضة رغم قسوتها لكنها تعتبر علاج للإكتئاب بعادل عقار "بروزاك"..!
وعلماء الأعصاب إلهم أبحاثهم الكثيرة في تأثير الرياضة على خلايا المخ..

يعني شفت هذا ابو الجيم اللي بصرّخ بأعلى صوته حتى يرفع الأوزان وبتلاقيه بحسب أكله بالجرامات حتى ما يأثر على جسمه..؟

رغم قسوة هالشيء إلا إنه سعيد بنفسه، ومن خلال هالقسوة بحارب اكتئابه وتعاسته..
--------------------------

الكابتن في الجيم ربنا أعطاه حكمة عجيبة..
وكثير كان يقسوا على اللاعبين ويبهدلهم بس لإنهم كسروا جدول اكلهم، او ما لعبوا كامل تمارينهم..

دائما ما بمل من تذكير اللاعبين إنه لازم تتعبوا وتحرموا حالكم حتى تصلحوا أجسادكم..

وكمل كلامه وقال:
نفس الإشي أرواحكم..!

أرواحكم مستحيل تسمو بدون قسوة..
بدون قيود..
بدون كلمة لأ للغلط..
بدون ما تكسروا نومكم بصلاة الفجر..
بدون ما تتركوا كل إشي بإيدكم وتصلوا..
بدون ما تشيلوا من مالكم وتتصدقوا..

زي ما بتحكوا للأكل (لأ) رغم حبكم إله..
بدكم تحكوا للشهوة (لأ) رغم رغبتكم فيها..
.
.
القيود اللي بفرضها القرآن علينا بالرغم من صعوبتها وقسوتها أحيانا..
لكنها في الحقيقة بتكون لصالح خفة ورشاقة وسعادة أرواحنا..

ومع الوقت رح يجد المؤمن الصادق سعادته وحياته وطمأنينته وسلام روحه من خلال هالقيود..

من خلال كلمة (لأ)..

أكثر من سعادة الشب اللي قال (لأ) لكسله وطلع عالجيم..
أو سعادة البنت اللي قالت (لأ) لوجبة الشاورما ")

#ARK

من الأشياء الملفتة جدّا في القرآن تسلسله وتدرجه في تناول موضوع (المرأة) !

يعني الخطاب القرآني المكي بالمجمل بتناول المرأة بشكل عام وعابر من غير ما يخصص الخطاب إلها مباشرة أو حتى يذكر اسمها..
(امرأة عمران، أم موسى، امرأة فرعون).

مع الوقت وبمجرد ما انتقلت الدعوة للمرحلة المدنية رح نجد إنه الخطاب القرآني اختلف بشكل جوهري..
رح نلاقي سور قرآنية جاءت تتناول وتوضّح بعض القضايا الخاصة بالمرأة..
مثلُا: (سورة النساء، الحجرات، الطلاق، الاحزاب، الممتحنة، المجادلة)..

هذا التدرج في الخطاب كان ضروري جدًا في مجتمع قائم على انتقاص المرأة واحتقارها وعدم مراعاة حقوقها..

وبمدة قياسية جدًا استطاع القرآن يمهد لنوع من المساواة العادلة في الحقوق والواجبات ما بين الرجل والمرأة.

يعني سورة النساء أول آية فيها:
يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً ۚ وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ ۚ إِنَّ اللَّهَ كَانَ عَلَيْكُمْ رَقِيبًا (1)

وفي الحجرات إن أكرمكم عند الله أتقاكم:
{ يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ }

وفي التحريم بضرب مثل لكل العالم بامرأتين !
وَضَرَبَ اللَّهُ مَثَلًا لِّلَّذِينَ آمَنُوا امْرَأَتَ فِرْعَوْنَ إِذْ قَالَتْ رَبِّ ابْنِ لِي عِندَكَ بَيْتًا فِي الْجَنَّةِ وَنَجِّنِي مِن فِرْعَوْنَ وَعَمَلِهِ وَنَجِّنِي مِنَ الْقَوْمِ الظَّالِمِينَ (11) وَمَرْيَمَ ابْنَتَ عِمْرَانَ الَّتِي أَحْصَنَتْ فَرْجَهَا فَنَفَخْنَا فِيهِ مِن رُّوحِنَا وَصَدَّقَتْ بِكَلِمَاتِ رَبِّهَا وَكُتُبِهِ وَكَانَتْ مِنَ الْقَانِتِينَ (12)

وفي الأحزاب بحكيلنا إنه ما في فرق بينكم:
إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُم مَّغْفِرَةً وَأَجْرًا عَظِيمًا (35)

وفي الممتحنة النساء ببايعوا الرسول مثلهم مثل غيرهم:
﴿ يَا أَيُّهَا النَّبِيُّ إِذَا جَاءَكَ الْمُؤْمِنَاتُ يُبَايِعْنَكَ عَلَى أَنْ لَا يُشْرِكْنَ بِاللَّهِ شَيْئًا وَلَا يَسْرِقْنَ وَلَا يَزْنِينَ وَلَا يَقْتُلْنَ أَوْلَادَهُنَّ وَلَا يَأْتِينَ بِبُهْتَانٍ يَفْتَرِينَهُ بَيْنَ أَيْدِيهِنَّ وَأَرْجُلِهِنَّ وَلَا يَعْصِينَكَ فِي مَعْرُوفٍ فَبَايِعْهُنَّ وَاسْتَغْفِرْ لَهُنَّ اللَّهَ إِنَّ اللَّهَ غَفُورٌ رَحِيمٌ ﴾

والأمثلة والشواهد من القرآن والأحاديث لتدرّج الخطاب -بشكل عبقري- كثيرة..
.
.
.
من المؤسف بصراحة إنه بعض الرجال وبعد أكثر من 1400 سنة من نزول الوحي مُصرّين ينظروا للمرأة بنظرة جاهلية..!
ونسيوا أو تناسوا خطابات الوحي المتكررة لترسيخ حقوقهم والتحذير من ظلمهم!

ومن المؤسف كمان إنه في بنات اقتطعت من النصوص على كيفها، وفسرتها على مزاجها وحكمت عالدين كله من خلالها وسمحت لمين ما كان يشكّل تصوراتها وقناعاتها..

وللأسف لو إنها أمعنت النظر شوي لأدركت كيف إنه القرآن كان حريص يكرّس ويطالب ويدافع عن حقوقها.. <3

#القرآن_الجميل
#ARK

وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا (93)

#سورة_النساء

متأكد إنه كثير رجال لما سمعوا بقصة أحلام قالوا في نفسهم: ياريت كنّا موجودين لحظتها كان قدرنا ننقذها من بين إيدين أبوها..

ومش كل أب بلحق بنته في طوبة، في آباء الواحد فيهم بشتغل ليل ونهار حتى يأمن أقساط بنته..

في رجل شايب سألوه في أحد البرامج شو حلمك في الحياة؟
قلهم أدرس بنتي..!

ومرة على جروب شباب نزّل واحد بوست: شباب معي 25 دينار حوشتهم وبدي أجيب فيهم هدية لزوجتي..بعرف إنه المبلغ قليل بس هي بنت أصل ورح تتفهم ظرفي..احكولي شو بقدر أجيب إلها لإني حاب أبسطها..؟

وشب ثاني بشتغل شغلين حتى يدبر مهر البنت اللي بحبها..
وكل ما يتعب وينهدّ حيله من شغله بقول: بهمش...بشتغل كل عمري كرمال قلبها..

في إخوان مستعدين يحرقوا العالم مقابل دمعة على خد أختهم..
أبوهم ربّاهم وعلّمهم إنه خواتكم كل إشي..
ورح أغضب عليكم كلكم لو بيوم بتقصروا معهم أو بتزعلوهم أو بتاكلوا حقهم..

جربي كبنت توقفي اي شخص في الشارع وتطلبي منه مساعدة..
غالبا رح يساعدك بعيونه من دون أي أجر أو مقابل أو مصلحة..

لحد الآن مش قادر أنسى قتلة أكلتها من أبوي عشان رفعت صوتي على أختي علما هي كانت الغلطانة!

وفي أب رعم شيبته ووقاره وكبر عمره ما قدر يمسك دموعه كالأطفال لحظة ما نادوا على اسم بنته في حفل التخرج..

الإمام أحمد بن حنبل كان يبشر أي شخص ربنا رزقه بنات:
أخبروه أن الأنبياءَ آباءُ بنات !

القرآن خلّد موقف بسيط عمله سيدنا موسى..
بسيط بنظرنا، لكنه بنظر ربنا عظيم لما قام سيدنا موسى وبالرغم من تعبه سقى للبنتين..
.
.
-------------
مع كل قصة مؤلمة بنسمعها بتدفعنا عواطفنا نطلق ونعمم احكامنا اتجاه المجتمع..
البعض بلوم الدين والأعراف والتقاليد وبحملّها مسؤولية أي جريمة..
مع العلم إنه الجرائم في البلاد الثانية واللي ما فيها لا دين ولا أعراف وتقاليد لا تقارن بحجم الجرائم عنّا..
ودينّا بحرم هالجرائم والظلم وبتوعد مرتكبينها بأقسى وأبشع وأفظع العقوبات..
وبالتالي ربط هالجرائم بالدين أبعد ما يكون عن العقل والمنطق..

وهالقصص بالرغم من قسوتها فالبعض بعتبرها استثناء..
لكن لا يعني أبدا أبدا لو سلّمنا بكونها استثناء يعني نتوقف عن ذكرها ونتقاعس ونتهرب من إنقاذ الناس المظلومة واللي ممكن بأي لحظة نصحى على خبر مقتلها..

لكن القصد إنه ما بدنا تدفعنا عواطفنا وحميّتنا إنه نعمم احكامنا بشكل مجحف اتجاه المجتمع لإنه هذا ما رح يفيدنا بشيء..

بالعكس لازم نأكد إنه هذا المجتمع نفسه بنعوّل عليه في تغيير الواقع والأنظمة والقوانين..
وفي شباب مستعدين يموتوا حتى ينقذوا بنت ما بعرفوها..
وأباء بركضوا ورا بناتهم بالحب مش بطوبة..!

وإنه المجتمع لازم يكفّ عن جلد ذاته ولازم يفكر كيف يساهم في انقاذ كل مظلوم ومظلومة بشبهوا أحلام..

وإذا كان ربنا خلّد ذكر موقف بسيط لنبي سقى لبنتين..
يا ترى كيف رح يجازي مجتمع انقذ أرواح و(أحلام) بناته؟! <3

#ARK
#صرخات_أحلام

للأسف ما في إعدام!
هيك منظمات حقوق الإنسان بدها..
لإنها بتشوف إنه الإعدام انتهاك لحقوق الإنسان..

ولا كأنه المقتول إنسان وإله حقوقه!

وعفكرة لو أي حد تابع تبريرات هالمنظمات لمنع الإعدام رح يجد عدة مبررات منها:
إنه الإعدام ما فيه رجعة وبالتالي ممكن يحصل أخطاء.
وإنه الإعدام ما بردع الجريمة..
وإنه بعض الدول ممكن تصير تستخدمه بشكل تعسفي وتعدم فيه السياسيين مثلا..
وإنه الإعدام فيه تمييز وراح تروح على الناس الأقل حظا واللي من الصعب عليهم يوفروا محامين وقانونيين يدافعوا عنهم..

والخ..
.
.
طبعا الكلام أعلاه مجرد هرطقات..
وعادي بإمكانهم يشرّعوا قوانين إعدام لكن بضوابط معينة.. مش يتم إلغاء القانون بالكامل لإنهم خايفين من سوء استخدامه..

لإنه القانون لمّا تعطل استثمر المجرمين تعطيله..

يعني همه ما عندهم مشكلة يشغلوا طياراتهم ويقصفوا فيها بلدان بأكملها بنسائها واطفالها وشيوخها..
بس عند الإعدام لا Nooooo حقوق الإنسان وهيكا ")
.
.
القرآن واضح في هالمسألة أشد الوضوح..
صح إنه الأعدام ما رح يرجّع حق المظلوم ولا رح يحيي المقتول..
لكنه شيء لا بد منه كمواساة مؤقتة قبل جزاء الآخرة..
يعني مجرد ما انقتل القاتل رح نرتاح ولو قليلا..
رح ينشفي غليلنا ولو شوي..
رح ناخذ نفس عميق ولو للحظات..
رح نبتسم لبرهة..

لكن أي راحة رح تيجينا لما نعرف إنه القاتل بلعب شدة في زنزانته مع الشباب؟!

يَا أَيُّهَا الَّذِينَ آمَنُوا كُتِبَ عَلَيْكُمُ الْقِصَاصُ فِي الْقَتْلَى الْحُرُّ بِالْحُرِّ وَالْعَبْدُ بِالْعَبْدِ وَالْأُنْثَى بِالْأُنْثَى فَمَنْ عُفِيَ لَهُ مِنْ أَخِيهِ شَيْءٌ فَاتِّبَاعٌ بِالْمَعْرُوفِ وَأَدَاءٌ إِلَيْهِ بِإِحْسَانٍ ذَلِكَ تَخْفِيفٌ مِنْ رَبِّكُمْ وَرَحْمَةٌ فَمَنِ اعْتَدَى بَعْدَ ذَلِكَ فَلَهُ عَذَابٌ أَلِيمٌ (178) وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ (179) (البقرة)
.
.
.
هذا العالم بتخوث والله..
صدقوني من الصعب أحيانا تفهموا بأي منطق بفكروا هالأوغاد !

#القرآن_لجميل
#ARK

شو ما شكيت للناس ألمك وحزنك ووجعك رح يتعاطفوا معك أولها بعدين مع الوقت رح ينسوا..
ولما يشوفوك بعد فترة رح ينسوا يسألوك: صار معك إشي؟
في الوقت اللي إنت بتستنى منهم هذا السؤال..

وكثير قصص مؤلمة صادفناها في المجتمع وتعاطفنا معها وأكلت من قلوبنا أكل لحظتها، لكنها أيام معدودة ونسيناها تماما وكمّلنا حياتنا..

أحيانا ممكن تقدم للناس خدمة تكون أخذت من وقتك وجهدك ومالك وتفكيرك واستنزفت كل قوتك، لكن للأسف مع أول خطأ منك رح ينسوها..

هيك الإنسان مفطور على النسيان..
ويقال سمّي الإنسان إنسانا لأنه ينسى.

وفي القرآن وصف لأبونا آدم عليه السلام:
وَلَقَدْ عَهِدْنَا إِلَى آدَمَ مِنْ قَبْلُ (فَنَسِيَ) وَلَمْ نَجِدْ لَهُ عَزْمًا
.
.
ممكن عشان هيك ربنا في القرآن بطمئنا وبريحنا وبواسي قلوبنا وبطبطب عليها لما يخبرنا:
﴿ وَمَا كَانَ رَبُّكَ نَسِيًّا ﴾

الله الوحيد اللي ما رح ينسى وجعك وألمك وحزنك وتعبك وجهدك وكل خير قدمته في حياتك.

الناس كلها رح تنسى..
لكن رب الناس ما رح ينسى <3 !

#القرآن_الجميل
#ARK

ملاحظة:
ممكن البعض يسأل كيف ربنا بخبرنا في هالآية إنه ما بنسى..
لكنه في آيات ثانية بحكي إنه بنسى؟!
{نسوا الله فنسيهم}
{فاليوم ننساهم كما نسوا لقاء يومهم هذا}

هون لازم نعرف إنه النسيان إله معنيين:
1- نسيان = عكس التذكر، يعني غياب الشيء في الذهن ونسيانه.
وهذا النوع حاشا إنه ينطبق على ربنا.

2- نسيان= بمعنى الترك أو التغافل.
مثلا مش إحنا أحيانا بنحكي: ما تنساني!
بنكون بنقصد فيها: ما تتركني..

أو العرب قديما كانوا يحكوا: قد نسينا فلان فما عاد يذكرنا..
يعني فلان تركنا وتجاهلنا ومش مهتم فينا..

فربنا لما يحكي: {نسوا الله فنسيهم}
يعني تركوا الله فتركهم !
.
.
فيارب ما تتركنا! <3

واحد بحكيلي نفسه يتقدم لبنت حبها ومعجب فيها زي ما في الأفلام..
يعني يروح على حفلة تخرجها مثلا ويحمل معاه خاتم وورد ولما يقرب منها يثني ركبته عالأرض ويرفع الخاتم إلها ") !

قلتله: هسا إنت حاضرلي فيلم وعايش الدور.. : \

فحكالي بالله عليك ما هو إشي حلو؟ يعني لحظة مثل هيك كفيلة تتخلد في ذاكرتهم طول العمر..

جاوبته:
إحنا بنشوف هاللحظة والمشهد الدرامي إشي حلو لإنه ببساطة سمحنا لأنفسنا نستسلم وننبهر بكل ما هو غربي.. والإشي الحلو بنظرهم رح يصير حلو بنظرنا..

الموضوع بسيط وما بدي أعقده ولا بقدر أحكم عليه إنه غلط.. لكن انبهارك فيه مش شيء سليم..

الزواج بعرفهم وتقاليدهم بختلف عنّا..
يعني عندهم بعيشوا ألف علاقة قبل الزواج وغالبا ما إلهم أي ارتباط بعائلاتهم وما في هالمسؤوليات والواجبات بينهم..
وبالتالي الإشي عادي وسهل ومش مطلوب من الرجل غير يشتري خاتم ويوقفها بالشارع ويثني ركبته ويطلب الزواج منها..

عنّا الزواج من وجهة نظر الدين ميثاق غليظ!
وعقد أبدي، ومشروع حياة، وغرس شجرة قائمة عالمودة والرحمة والعطاء..
وبالتالي بدايته فيها نوع من الجدية والصرامة!

عنّا في أعرافنا لو بدك إياها بدك تبعت لأهلها خيرة الرجال حتى تطلب وتشفع وتحضر وتشهد وتبارك!
وقبل الجاهة في مفاوضات وتعاقدات وجلسات وتحضيرات حتى يضمن الجميع إنه هالبنت محمية ومصونة بين كل هالرجال، وإنها رح ترتبط برجل مدرك لمسؤوليته وقادر على تحمل الشيء اللي قرر يقبل عليه..

صدقني الإشي لو فكرت فيه رح تكتشف إنه مسؤولية عظيمة..
ورح تكون ظالم في اللحظة اللي بتقصر فيها بأحد حقوق زوجتك..
وفي الحديث: كفى بالمرء إثماً أن يضيّع من يَقُوت.
يعني أي إثم رح يلحق بالرجل اللي ضيّع قوت وإعالة ومسؤولية اللي ربنا استرعاه عليهم..؟

وفي الحديث: أكمل المؤمنين إيماناً أحسنهم خلقاً، وخياركم خياركم لنسائهم.
معيّار الخيرية عنّا في الدين إنك تكون منيح مع زوجتك..

الزواج في الدين عبارة عن مسؤوليات وواجبات وأمانة رح تنسأل عنها..

والرجولة إنك تكون قد هالامانة والتكليف..
مش بس تثني ركبتك وترفع الخاتم إلها!
.
.
----------
القرآن ذكر إلنا قصة عجيبة جدا عن زواج سيدنا موسى..
فبعد ما اجته البنت على استحياء تطلب منه لقاء ابوها:

فَجَاءَتْهُ إِحْدَاهُمَا تَمْشِي عَلَى اسْتِحْيَاءٍ قَالَتْ إِنَّ أَبِي يَدْعُوكَ لِيَجْزِيَكَ أَجْرَ مَا سَقَيْتَ لَنَا ۚ فَلَمَّا جَاءَهُ وَقَصَّ عَلَيْهِ الْقَصَصَ قَالَ لَا تَخَفْ ۖ نَجَوْتَ مِنَ الْقَوْمِ الظَّالِمِينَ (25) قَالَتْ إِحْدَاهُمَا يَا أَبَتِ اسْتَأْجِرْهُ ۖ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ (26)

قَالَ إِنِّي أُرِيدُ أَنْ أُنكِحَكَ إِحْدَى ابْنَتَيَّ هَاتَيْنِ عَلَىٰ أَن تَأْجُرَنِي ثَمَانِيَ حِجَجٍ ۖ فَإِنْ أَتْمَمْتَ عَشْرًا فَمِنْ عِندِكَ ۖ وَمَا أُرِيدُ أَنْ أَشُقَّ عَلَيْكَ ۚ سَتَجِدُنِي إِن شَاءَ اللَّهُ مِنَ الصَّالِحِينَ (27) قَالَ ذَٰلِكَ بَيْنِي وَبَيْنَكَ ۖ أَيَّمَا الْأَجَلَيْنِ قَضَيْتُ فَلَا عُدْوَانَ عَلَيَّ ۖ وَاللَّهُ عَلَىٰ مَا نَقُولُ وَكِيلٌ (28)

أي رجولة وحب في قلب سيدنا موسى..
لما وافق يدفع 10 سنوات شغل من عمره مهر لزوجته!

#القرآن_الجميل
#ARK

هل في الدين شيء اسمه (جرائم شرف)؟!
👇

يبدو إنه المرأة ما بتتعرض فقط لظلم من المجتمع، كمان بتتعرض لظلم من الناس اللي بطالبوا في حقوقها..!

لما نحوّل قضية عظيمة مثل قضية المرأة ومظلوميتها لشعارات سطحية وساذجة وغير واضحة ولا مدروسة فهذا اكبر ظلم للمرأة..

أعداد هائلة من النساء اليوم بترفض إنه يتم تمثيل قضيتهم بهذا الشكل السطحي والساذج واللي رح يفاقم مشاكل المرأة أكثر من حلها..

لما يكون في بنات بتعرّضوا لقتل وظلم وتعنيف وإيذاء ونجد إنه الشعارات ما ركّزت على القوانين بقدر تركيزها على (أنا حرّة، وبدي أعيش حياتي، وما حد دخله بغشاء بكارتي، أو شعارات بتشن الحرب بشكل طفولي وساذج على كل الرجال والأباء)..
ففي هيك حالة إحنا للأسف سطّحنا وسخّفنا قضية المرأة!

دائما كنت أجد نفسي منحاز لقضية المرأة، وانحيازي كان بدافع ديني بحت، كون المرأة الأكثر مظلومية في مجتمعاتنا، وكونه رسول الله صلى الله عليه في أكثر من موضع أوصانا..

ومن جميل ما قاله الشيخ الطريفي: ظلم المرأة عند الله أشد من ظلم الرجل، لأن انتصار الله للضعيف بمقدار عجز الضعيف عن نصرة نفسه، قال ﷺ (إني أُحرج حق الضعيفين اليتيم والمرأة).

لكني اليوم بشعر بالأسى من هالمتاجرة والإستغلال لقضية المرأة من اللي بزعموا إنهم خرجوا من أجل حقوقها..
-----------------
دائمًا بتلفت انتباهي سورة النســـــــــاء!
سورة النساء سورة سياسية بامتياز..
سورة بتحكي عن النظام السياسي ودولة القانون..
سورة بتتناول العدل كركيزة..
سورة كل تركيزها على سنّ القوانين والأنظمة..
لإنه من خلال العدل والقوانين الصارمة مش فقط رح ننصف المرأة والضعفاء، وكمان رح نساهم في تغيير كل الأوضاع اللي ساهمت بداية في استضعافهم..!

سورة بتكرر فيها الحكم والعدل والقسط والتحذير من الظلم..
- وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ
- يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ
.
.
السورة بتتناول مجموعة قوانين وأنظمة بتخص المرأة والأيتام..
فيما يتعلق بالنساء: معاشرتهم بالمعروف..حقهم بالميراث..العدل معهم..حقهم بالمهر..وبعض القضايا المتعلقة بشؤون أزواجهم..حفظ كرامتهم..وحتى طريقة التعامل معهم في حال ظلمهم!
وبالرغم من تناول السورة لقضايا عديدة لكنها مع ذلك حافظت على اسمها (النساء) !
وكل ما السورة تستعرض بعض الجوانب السياسية والتشريعية بترجع لموضوع النساء وبتأكد عليه..

ببساطة..ما في نظام سياسي قوي وعادل بغفل وبتناسى حقوق النساء والضعفاء وما بساهم في حمايتهم والدفاع عنهم..

وَمَا لَكُمْ لَا تُقَاتِلُونَ فِي سَبِيلِ اللَّهِ وَالْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ..
.
.
النساء رمز للمستضعفين في الأرض..
كثير نالهم ظلم حتى من اللي بنادوا بحقوقهم!
كثير ناس تاجرت واستغلت واستثمرت قضيتهم..

سورة النساء ما بطّالبك تذرف دموع عليهم..
ولا تردد وترفع شعارات ساذجة وسطحية لتنصفهم..

السورة بتطلب منك تتقي ربنا وتعدل وتقسط وتحكم بالحق وتسن القوانين
و"تقاتــــل" لرفع الظلم عنهم!

#القرآن_الجميل
#ARK

شيء غريب جدًا!

أي رجـــــل في الدنيا رح تجد إنه من المواضيع المؤرقة بالنسبة إله (البيت)!
يعني كيف يوفر أجار البيت أو حقه..
وفي كثير من الأحيان بضطر ياخذ قروض ويلزم نفسه بأقساط لعشرات السنوات حتى يدفع ثمن البيت أو الشقة اللي قرر يشتريها..

بالرغم من كل جهود الرجل وكدحه وتعبه وعرقه في توفير (بيت) يسكن فيه هو وعائلته..
بتفتح القرآن وبتنصدم إنه القرآن نسب البـــيت للمرأة مش للرجل!

* في بيوت النبي صلى الله عليه وسلم بتنزل آيات بتنسب البيوت لزوجاته!
- { وَقَرْنَ فِي (بُيُوتِكُنَّ) وَلَا تَبَرَّجْنَ تَبَرُّجَ الْجَاهِلِيَّةِ الْأُولَىٰ ۖ وَأَقِمْنَ الصَّلَاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ ۚ إِنَّمَا يُرِيدُ اللَّهُ لِيُذْهِبَ عَنكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا }

- { وَاذْكُرْنَ مَا يُتْلَىٰ فِي (بُيُوتِكُنَّ) مِنْ آيَاتِ اللَّهِ وَالْحِكْمَةِ }

* حتى في أوقات الخلاف والطلاق!!
- { يَا أَيُّهَا النَّبِيُّ إِذَا طَلَّقْتُمُ النِّسَاءَ فَطَلِّقُوهُنَّ لِعِدَّتِهِنَّ وَأَحْصُوا الْعِدَّةَ وَاتَّقُوا اللَّهَ رَبَّكُمْ لَا تُخْرِجُوهُنَّ مِن (بُيُوتِهِنّ)...}

* وفي قصة يوسف عليه سلم، نسب البيت لإمرأة العزيز مش لزوجها:
- { وَرَاوَدَتْهُ الَّتِي هُوَ فِي (بَيْتِهَا) عَنْ نَفْسِه ِ} .

* الحالة الوحيدة اللي ما نسب فيها القرآن البيت للمرأة هي في حالة خيــانتها..!
في هالحالة بسحب منها القرآن هذا التكريم لإنها ما استحقته ولا كانت أهل إله ولا قدرت تصون وتحفظ بيتها..

- { وَاللاَّتِي يَأْتِينَ الْفَاحِشَةَ مِن نِّسَآئِكُمْ فَاسْتَشْهِدُواْ عَلَيْهِنَّ أَرْبَعةً مِّنكُمْ فَإِن شَهِدُواْ فَأَمْسِكُوهُنَّ (فِي الْبُيُوتِ) ...}
.
.
.
لاحقًا أدركت إنه هالآيات ما فيها إشي بستدعي العجب..
ما دام القرآن من الأصل شايف المرأة بذاتــها (سكــــــن) !

{ وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا (لِّتَسْكُنُوا إِلَيْهَا) وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ }

#القرآن_الجميل
#ARK

مرة صار موقف قدامي لبنت صغيرة فلّتت إيد إمها وركضت عالشارع...
بسرعة ركض أبوها وراها وأول ما مسكها قرصها من خدها!

بكت البنت وركضت على حضن إمها..
والأب صار يقلها: يعني تدعسك سيارة أحسن؟! لو بتعيديها غير تشوفي..!

البنت أكيد ما بكت من قرصة خدها..
غالبًا بكت من غلطها وخوفها..

لكن هذا الخوف بلحظات تبدد واستحال لـحُب لما سمعت البنت كلام إمها..
"بابا قرصك لإنه كان خايف عليك ..هو كثير بحبك يا ماما.."!

أدركت البنت إنه هالقرصة كانت قرصة عتب وحب..
فرجعت لأبوها وقالتله آسف...انا بحبك بابا..!
فاستقبلها الأب بأحضانه وهو ببتسم وبمسح دموعها..
.
.
أحيانا القدر بصفعنا صفعة على وجهنا أو بقرصنا قرصة على خدنا..
لحظتها إحنا ما رح نبكي من وجع الصفعة أو القرصة..
لكن رح نبكي من وجع جواتنا كان محتاج لقرصة تستفزه وتكشفه وتظهره..

القرصة كانت عالخد لكن ألمها صاب قلوبنا فاستحثّت دموعنا حتى نبكي...فبكينا..!

ووقتها ما بنلاقي ملجأ ولا ملاذ غير ربنا..
وهو برحمته بستقبلنا وبمسح دموعنا وبخفف وجعنا..

---------
لما تحس بألم ووجع وقرصة!
اعرف إنه ربنا حب يردك إله..
حب إنك تقبل عليه بأخطائك وأوجاعك..
حب إنك يسمع منك همومك واحزانك..
حب إنك تستغفره حتى يغفرلك كل ذنوبك وآثامك..

والغريب إنك بمجرد ما أقبلت عليه رح يشكر سعيّك!
لأنه هو (الشكور)..

ابتلاك وامتحنك واستفزّك وقرصك حتى تقبل عليه..
فلما أقبلت عليه شكرك بالرغم من إنه هو اللي جابك..!

وَكَانَ سَعْيُكُم مَّشْكُورًا
.
.
.
رب هذا جماله..!
لــيه لما (يقرصك) بتتأخر عليه..؟!

#القرآن_الجميل
#ARK

كان لما يكون زهقان يطلع يتمشى لحاله..
في أغلب الأوقات يحط هالسماعات ويسمع كل إشي..
بس بتعرفوا هديك اللحظة لما تحس حالك زهقان من كل إشي..؟
لما راسك يصير يوجعك وتحس إنه ولا إشي طايق تسمع؟

شال السماعات وكمل طريقه..
فتح يشيّك عالفيسبوك والواتساب سريعا..
كالعادة كان واصله مسج من إمه. هي كل يوم بتبعت أشياء زي صباح الخير ومساء الورد مع صورة وردة بتطفي وبتضوي أو صورة فنجان قهوة مع صباح الأمنيات الجميلة.. ")

إمه ما كان بوصلها إشي عجروب الجارات إلا مباشرة بتعمله شير عكل مكان..
وهو من زمان عامل "Mute" للمحادثة معها وحاطه لسنة كاملة !

هالمرة إمه كات باعته صورة فيها تكبيرات..
الله أكبر..الله أكبر..الله أكبر..
وإنه يستحب التكبير في هالأيام..

سكّر التلفون وهو ببتسم من عفوية إمه..
رد بسرعة فتح عالمحادثة ورد عليها بقلوب وحكالها إنه بحبها..
وكمل طريقه..
***
وبدأ يتمتم بشكل عفوي..
الله أكبر..الله أكبر..الله أكبر..

قرر يتخلى عن عفويته بالتكبير..ويركّز أكتر..

الله..
أكبـــــر..

الله....... أكبـــر..

الله أكبر.. من كل إشي..

الله أكبر من كل همومي !
الله أكبر من كل لحظة ألم تسللت لقلبي..
أكبر من كل مصيبة استنزفت عمري..
أكبر من خذلان أقرب الناس إلي..
أكبر من كل ذنب كان حاجز بيني وبينه..
أكبر من كل لحظات الضياع والوجع اللي بتعصف بحياتي..

الله أكبر من دنيا ربطت فيها سعادتي..
أكبر من اهتمام كنت بنتظره من أقرب الناس إلي..
أكبر من ناس رفضت تسمعني..
من حب بخل فيه كثير من الناس..
وأكبر من كره وكبر وظلم عشعش بقلوبهم..
.
.
الله أكبر من كل إشي بحول بيني وبين أحلامي وأهدافي..
أكبر من كل خطوات استصعبت أكملها..
وأحلام قررت أتنازل عنها..
وصراعات ياما فكرت أنسحب من مواجهتها..
.
.
الله أكبر من كل لحظة فتور حرمتني من قربه..
من كل مرة حرمت فيها حظ روحي من كلامه..
من كل لحظة كسل كانت حاجز من السجود فيها بين ايديه ومناجاته..
من كل إشي شغلني عن فكرة ذكره واستحضار رحمته ومعيته..
.
.
الله أكبر من كل إشي..

الله > من كل إشي!

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً <3

#القرآن_الجميل
#ARK

لــو الله ما خلقك يؤسفني أحكيلك إنه حياة الناس اللي بتحبها وبتعرفها رح تكون أسوء بكثير مما بتتخيل..!!

- تتذكري لما وقفتي مع صاحبتك وضليتي معها حتى تخففي عنها وتحلّي مشكلتها؟
لو الله ما خلقك كانت رح تنتحر!

- وإنتَ لما مرة لقيت ولد صغير بنص الشارع، وقمت ركضت حتى تبعده عن السيارات..
لو الله ما خلقك كان هالطفل رح يندعس ويموت..
بتعرف إنه الآن كبر وقاعد بستنى نتائج التوجيهي^^

- تتذكري لما نصحتي بنت جيرانك الأصغر منك شو تدرس؟ وساعدتيها بتعبئة طلبها؟
ونصحتيها أكم نصيحة عن الجامعة وكيف تتعامل فيها..؟
لولاك كان اختلف كل مسار حياتها..
ولولا كلامك وحرصك عليها كان شفتيها بحال ما رح يسرّك أبدا أبدا..!

- مرة لما سمعت إنه صاحبك عنده شبهات، فقمت رتبت لقاء مع أحد الدكاترة المتخصصين. وصاحبك طرح عليه كل شبهاته وأسئلته..
حتى آخر إشي صاحبك اقتنع وزالت شبهاته واستعاد إيمانه..
لو الله ما خلقك كان صاحبك الآن ملحد!

- تتذكري لما مرة تصدقتي بمصاري كانت زايدة معك؟
وقتها أعطيتيها لعيلة محتاجة..
الإشي اللي ما بتعرفيه إنه هالمبلغ أنقذ هالعيلة من أزمة حقيقة كانت رح تنتهي بسجن الأب..
وسجنه كان كثييير رح يأثر على زوجته وبناته..

- لو الله ما خلقك..كان حياة أختك اللي بتحبها وبتخاف عليها جدا تعيسة..!
كانت رح تفقد السند..
كانت رح تفقدك إنت..!

- وإنتِ لو الله ما خلقك...كان ما وقفتي قدام طالباتك ونصحتيهم هديك النصيحة...ذاكريتها؟
الله لا يوريك كيف كانت رح تكون حياتهم بدونها..!
نصيحتك وقتها لامست قلوبهم كلهم..
ورح يموتوا وهمّه متذكرينها بكل تفاصيلها..
.
.
-------
حياتك كشخص (منيح) مرتبطة ارتباط عجيب بحياة الناس من حولك..
وبالرغم من كون الحياة صعبة وقاسية ومؤلمة...
لكنها كانت رح تكون أكثر ألم وقسوة على الناس اللي بتعرفهم لو الله ما خلقك..!

عشان هيك لو إنت بيوم قدمت خير واحد بكل حياتك..
فما تحكي ياريت الله ما خلقني..

لإنه هالخير اللي قدمته أنقذ حياة شخص واحد على الأقل..
هالخير خفف عنه ولو شوي من قسوة الحياة ومعاناتها..

هالخير امتد لأماكن ما بتعرفها ولا بتتخيلها..
واشتبك بحياة كثير ناس بطريقة مش ممكن تتصورها..

هذا التعقيد المدهش للخير اللي قدمته بس ربنا اللي بعلم فيه..
ورح يخبرك فيه..."يَوْمَ تَجِدُ كُلُّ نَفْسٍ مَا عَمِلَتْ مِنْ خَيْرٍ مُحْضَرًا"
.
.
وبالتالي بس حبيت أحكيلك إنه ما تحكي: ياريت الله ما خلقني..!

بالعكس..
شكرًا لوجودك وللخير اللي جواتك..

والــحمد لله..
إنه ربنا خلقك <3

#ARK

في أمريكا كان إلنا جار "ش ا ذ" !
أنا ما عمري شفته ولا كنت بعرف..

وبيوم قرروا الشباب "العرب" يروحوا يزوروه بس هيك من باب الفضول والزناخة.. ")
وكان معنا شب نهفة قلنا شباب البسوا لبس واسع ومش غلط تتحجبوا ::))

توقعت صراحة نلاقي شب، وكانت المفاجأة إنه هالجار زلمة شايب!
وزوجــــه بنفس العمر تقريبا..
كانوا عايشين مع بعض فترة تجريب قبل ما يقرروا الزواج : ) !

وقتها سألناه: يعني إنت طول حياتك هيك؟ عمرك مثلا ما كنت سوي وعالفطرة؟!
ضحك عسؤالنا وقال: عندي ولاد بعمركم!! وكان إلي علاقات مع بنات بس مع الوقت شفت متعتي ولذتي هيك..

والله هاللقاء لسه حاضر ببالي بكل تفاصيله..
ولحد هسا بتذكر لما حكالنا أنا ما بحب الشب المخنث..لا بروح مع بنت وبختصر..!
انا بحب شب شب..
وقتها الشب النهفة قلنا: شباب RUN! ")

ولحظتها تذكرت مقولة الفيلسوف الوجودي "كيركجارد" لما وصف حالته بعد ما جرّب كل الشهوات، فقال:
"لم أجد قعرًا لبحر اللذات أرسِل إليه مرساتي"!

اللي بصير مع الناس إنهم بفكروا بمجرد ما اطلقوا العنان لشهواتهم رح يرتاحوا..
لكن الواقع بحكي خلاف هالحكي تماما..

الشهوة ما إلها حد أبدا..
ومهما اطلقت العنان إلها مستحيل تشبع..
رح يضل بدك كمان وكمان..
ورح تضطر بكل مرة تجرّب أشياء جديدة تنوّع فيها لذتك ولحظات استمتاعك..
وبعدين...؟!!
بعدين ولا إشي.. يا بتعيش كل حياتك هيك..يا بتزهق وبتمل وبتنتحر!!
.
.
أغلب الناس ما بتعرف كمّ الإنحرافات السلوكية اللي بتتولد عند الناس اللي حبّت تشبع رغباتها بلا قيود وحدود..
مع ملاحظة إنه مش شرط كل إنسان شا ذ يعني جرّب كتير حتى صار شا ذ..
في ناس عندهم بكون عنده مشاكل نفسية وغيره وهدول أكيد يفترض ندعيلهم ونساعدهم وناخذ بإيدهم حتى يتعالجوا..

مثلا بخصوص الإنحرافات عنّا:
حب ممارسة الجنس مع الأطفال Pedophilia، ومع الموتى Necrophilia، ومع الحيوانات Zoophilia ، ومع شخص بتألم Dacryphilia، ومع كبار السن والعواجيز Gerontophilia، ومع أشياء غير حية Sexual fetishism، ومع شخص نايم أو فاقد الوعي Somnophilia، ومع شخص مشوّه Teratophilia ومع الأشجار Dendrophilia، ومع السيارات والآلات الميكانيكية Mechanophilia، ومع الأقدام Podophilia، ومع الأنوف Nasophilia، ومع الأشياء القذرة Mysophilia،ومع المعاقين عن الحركة Abasiophilia ، ومع أصحاب الأطراف المبتورة Acrotomophilia، وحب التحرش بشخص مش موافق عملامستك إله Frotteurism ، وحب الإيذاء الجسدي Sadism، وحب الاغتصاب Biastophilia ، وكمان أكل اجزاء من المُغتَصب Anthropophagolagnia، وحب تعذيب الحيوانات للوصول للنشوة الجنسية Zoosadism..!

الله لما يفرض علينا قيود غاياته يحافظ على إنسانيتنا..
غايته يحمينا ويحفظنا من هوى نفوسنا وجشعها وطمعها..
الله بقيّد حريتنا حتى يخفف عنّا ويرحمنــــا !!

وَاللَّهُ يُرِيدُ أَن يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا (27)
يُرِيدُ اللَّهُ أَن يُخَفِّفَ عَنكُمْ ۚ وَخُلِقَ الْإِنسَانُ ضَعِيفًا.

(تنهيدة)!

طلعت من عند جارنا وانا بحمد ربنا على إنه في إشي اسمه (حرام وممنوع) في حياتي!

شكرا يا الله..

ولكل إشي بتطلبه مني وبتحرمه عليّ:
حاضر <3 !

#القرآن_الجميل

القصة وما في فيها باختصار..
في شباب وبنات كانوا مناح وماشيين بالطريق الصح، أكيد بغلطوا وبعصوا وبذنبوا لكنهم كانوا يتوبوا مباشرة من أغلاطهم ويظهروا لربنا صدقهم وإخلاصهم..

- لكــــن مع الوقت تغيّرت صحبتهم وقناعاتهم وأفكارهم..
(وفتحوا عحالهم كل أبواب الفتن)
علما إنه أبواب الفتنة لازم نصفعها بكل قوتنا مش نغلقها برفق ونضل قاعدين عبوابها..!

- لما فتحوا عحالهم أبواب الفتن وغلطوا..للأسف ما تابوا لربنا ورجعوا إله زي ما كانوا زمان!
صاروا (يرتابوا ويأجلوا ويأخروا توبتهم ورجعتهم لربنا)..

وفي يوم من الأيام صاروا يحكوا بينهم وبين حالهم:
إحنا لمتى رح نضل عايشين حياة تأنيب الضمير هاي؟؟
يعني شو هالحياة كل إشي فيها حرام..؟
هي كل الناس عايشة حياتها وبتعمل شو ما بدها.. إلا إحنا حيضل هالضمير ملازمنا بكل لحظة ومنكد علينا عيشتنا..

- وقتها (ارتابوا) وشكّوا في دينهم!
وقرروا حتى يواجهوا وجع ضميرهم إنهم يتنازلوا عن إيمانهم..
وصاروا يحكوا أصلا شو بضمنّا إنه الإسلام صح؟
وشو بعرفنا إنه القرآن كلام الله..
وليه نصدق البخاري ومسلم؟؟
أصلا الأديان صناعة بشرية..
ومش أكيد في حياة بعد الموت..

بلا أديان بلا تخلف..!

- وآخر إشي للأسف (غرّتهم الدنيا) وعاشوا حياتهم مثل ما كان بدهم بالضبط، بدون تأنيب ضمير ولا حد يقلهم هذا حرام..

- حتى اللحظة اللي باغتهم فيها (الموت) فجأة..

- وماتوا مخدوعين بأوهام الشيطان..!

--------------------
يوم القيامة...
وفي موقف أغلبكم بعرفه بصيروا ينادوا عالمؤمنين حتى يمدّوهم بشوي من نورهم..
لكن من حواراتهم الملتفة مع المؤمنين لمّا ينادوا عليهم: مش كنّا معكم؟؟؟؟

يُنَادُونَهُمْ أَلَمْ نَكُن مَّعَكُمْ ؟؟

والمؤمنين بردوا عليهم:

قَالُوا بَلَىٰ وَلَٰكِنَّكُمْ:

- فَتَنتُمْ أَنفُسَكُمْ
- وَتَرَبَّصْتُمْ
- وَارْتَبْتُمْ
- وَغَرَّتْكُمُ الْأَمَانِيُّ
- حَتَّىٰ جَاءَ أَمْرُ اللَّهِ
- وَغَرَّكُم بِاللَّهِ الْغَرُورُ

فماتوا مخدوعين بأوهام الشيطان..!

#القرآن_الجميل

هل سبق وخطرلك تعمل خطتك السنوية بالتاريخ الهجري؟!

ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر ^^
غالبا أول مرة بتسمع فيه ")

لكن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!

الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..

معظم تواريخنا الإسلامية مرتبطة (بالعمل والإنجاز)!
إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!

ما بهمنا جدا تواريخ ميلادهم...لكن بهمنا تواريخ ميلاد قلوبهم لما لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لعمر إنه يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..

لكنه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
غدا 1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا فتح (لك) من غير هجرة..!

شو كان نفسي أسمع كلمة "لا تحزن" من رسول الله وهو بواسي فيها أبو بكر.
وكان نفسي أتأمل ابتسامة أبو بكر لما حكالنا: فشرب النبي حتى رضيت!
يا الله سيدتنا أسماء وهي بتشقّ حزام ثوبها حتى تربط فيه الأكل إلهم..
وحيرة سراقة بن مالك ورسول الله بوعده "بسواري كسرى" بهيك موقف!
عمر وهو بتوعد أي حد يوقف بطريقه..
وعلي لمّا كان بتقلب في فراش النبي صلى الله عليه بفديه بروحه وحياته!

كنت بتساءل كيف كان منظر أولاد المهاجرين والأنصار وهمة بيتسلّقوا النخل براقبوا متى حبيبهم يوصل..؟
وكيف كانت صرخة أول صحابي لمح النبي صلى الله عليه وسلم لما وصل..
يا الله "طلع البدر علينا" ما أحلاها بصوت الصحابة !
وما أحن دموع الصحابيات بشوفة النبي صلى الله عليه وسلم اللي ربنا بعثه رحمه فيهم.
فرحة إم أيوب لما خبرها أبو أيوب الأنصاري إنه رسول الله ضيفنا..
وأطفال الأنصار وهمه بسمّعوا لرسول الله قرآن علّمهم إياه مصعب..
وقلوب الأنصار وهي بتسقبل وحي نزل يحكي فيهم:

وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ ۚ
ودموعهم اللي انتهى فيها المشهد..
.
.
مرة وأنا بقرأ بسورة النساء مريت على آية خلتني أعيش لحظات الهجرة:

وَمَن يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً ۚ وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ ۗ وَكَانَ اللَّهُ غَفُورًا رَّحِيمًا

الآية سبب نزولها إنه أحد الصحابة الكبار في العمر ما قدر يهاجر مع بقية الصحابة..
لكنه مع الوقت ما تحمل هذا البعد..وما تحمل فكرة إنه الصحابة بصافحوا وجه النبي صلى الله عليه وسلم وهو لا..
فقرر الهجرة..
علمًا إنه معذور وظرفه ما بسمحله لكبر عمره..
وهو بالطريق شعر إنه رح يدركه الموت ..
قام هالصحابي ضرب كف بكف وقال: اللهم هذه بيعتي لك
وأعاد الكرّة وقال: اللهم هذه بيعتي لرسولك..
ومـــات..!

ممكن من وقتها وكل ما أصادف ذكرى الهجرة..
بضرب كف بكف وبحكي: اللهم هذه بيعتي لك..
وبضرب كف بكف وبحكي: اللهم هذه بيعتي لرسولك..

#القرآن_الجميل