في اليوم اللي أعلنوا فيه إنه بكرا حظر
رحت عالمكتبة أشتري كتب..
وأنا داخل عالمكتبة كان طالع منها شخص ما ركزت بملامحه..
ندمت لاحقا بعد ما عرفت قصته إني يا ريت لو سلمت عليه وطلبت منه يدعيلي!
.
.
دخلت عالمكتبة ورحّب فيي صاحبها اللي بتجمعني فيه صداقة قد ما بمر عليه وبجننه ^^
المهم دار بينا نقاش عام تقليدي، عن الكتب والحياة والدين والزواج ومتى بدنا نزوجك؟

حكالي شفت الزلمة اللي طلع من المكتبة وإنت داخل عليها؟
- آه شفته..
* اقعد اقعد أحكيلك قصته اللي ممكن ما تصدقها..!
.
.
هذا يا سيدي العزيز كل أولاده حافظين القرآن..
وكل يوم هو وزوجته براجعوا القرآن لولادهم..
فضلا عن همتهم في طلب العلم..
يعني لا أزكيه على الله لكن هالرجل من أولياء الله!!

في داخلي صفنت إنه آه حلو وما شاء الله...ربنا يثبتهم
بس يعني وين الإشي اللي ممكن ما أصدقه؟
.
.
الإشي اللي ممكن تشك فيه وما تصدقه، إنه هالشخص كان بيوم من الأيام سكرجي ما يطلع من الخمارة إلا آخر الليل!!
بس الغريب إنه ما يطلع من الخمارة لبيته..
كان يروح عالمسجد عشان يصلي الفجر!!

وألف مرة المصلين يحكوله يا عمي إصحى أول بعدين تعال عالمسجد!
وهو يرد عليهم: هذا بيت الله مش بيتكم..
وأنا بدي أصلي فيه خاوة عنكم..!!

حاولوا المصلين معاه أكثر من مرة لكن عالفاضي..وبكل مرة بزيد عناده وإصراره وبصلّي معهم الفجر
"خاوة عنهم" !

مع الوقت أدرك المصلين الخير جواته..وحاولوا مع الشيخ يشتغلوا عليه لعل وعسى يترك الشرب ويسلك طريق الخير والطهارة..

وسبحان الهادي ربنا هداه وتاب عليه..
ولما التزم طريق الخير شافوله بنت يخطبها..
ولما راح يشوفها حلم بنفس الليلة إنه نزلت سلّة من السما فيها نفس البنت اللي شافها..
كانت بمثابة هدية من الله إله..
وهي نفسها الآن اللي بتربي ولاده وبتسمعلهم قرآن..!
---------------
هالشخص رغم ذنوبه وأغلاطه سابقا، إلا إنه كان حريص ما ينسى الله..
صح ما قدر يترك الشرب، لكنّه كمان ما ترك ربنا..
وصح أغلاطه كبيرة، لكن رحمة ربنا بالنسبة إله كانت أكبر منها..
كان يصرّ عالغلط، بنفس الوقت يصرّ علقاء ربنا..

وبلحظة صدق!
شلال من نور هبط عصدره
دثار دافي أحاط بقلبه..
وميض من ضوء سافر بعروقه..
ملك من السما تسلل لروحه..
دمعة صدق نزلت من عيونه..

لحظة ما قرأ الشيخ عالفجر اللي قرر يصليها "خاوة عنهم":

قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ

#القرآن_الجميل
#ARK

سورة البقرة "ثقيلة"!
ما بتحب المجاملات..
ورح تبدأ معك بداية صريحة جدا..

بتحكيلك الحياة مش وردية^^
والناس مش شرط يكونوا مناح..
في منهم (خدّاعين) و (بقلوبهم مرض)..!
ناس (فاسدين) بالوقت اللي بدّعوا فيه (صلاحهم)!

في ناس (بتشتري بآيات الله ثمنا قليلا) وبتكذب عربنا..
عن ناس ظالمين تملّكت الحياة وماديتها (العجل) من قلوبهم..
واستولى عليهم الجشع والطمع وكفر النعمة..!
وبدل ما يحكوا الحمدلله تشرطوا عربنا بدهم نِعم ثانية على مزاجهم!

رح تحكيلك عن ناس قلوبهم أقسى من الحجارة!
وناس رح تفسد وتسفك دماء أبرياء ومساكين..

عن ناس ممكن يعجبك كلامهم، ويشهدوا الله عالإشي الموجود في قلبهم إنهم صادقين اتجاهك....وهمّه ألد الخصام!!

الحياة مش وردية..
فيها طلاق وألم وفراق وموت وأيتام وقتل وقصاص وقتال وأشياء كره إلكم!
فيها صراع مرّ..
فيها قسوة كالحجارة أو أشد قسوة!
.
.
في المقابل:
في ناس بتبحث عن (قبلة) ووجهة حتى تخفف من عناء صراعها..
فيها ناس صادقة بدها (قلبها يطمئن) من الأسئلة اللي شغلت بالها..
في ناس صلت وصامت ودعت وتصدقت وقالت يا رب من قلبها..

ناس الآن واقفين بين إيدين ربنا..
بواجهوا صراعات سورة البقرة بدعوات آخر البقرة:

لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ

#القرآن_الجميل
#ARK

بتبدأ "آل عمران" بهمســـــة:
إِنَّ اللَّهَ لَا يَخْفَىٰ عَلَيْهِ شَيْءٌ فِي الْأَرْضِ وَلَا فِي السَّمَاءِ!

الله ما بخفى عليه شيء..ماشي؟!

بتطلب منك بعدها ما تتسرع في الحكم عالأشياء
عشان هيك رح تلاحظ إنها سورة (الموازنات)!
بتحكيلك ضروري تنظر للصورة بالكامل..
خلي عينك على "أم الكتاب" وما تمشي ورا "المتشابه" لأنه رح يشوش عليك..

بتخبرك السورة عن امرأة عمران اللي كانت بتطمح يكون الجنين ببطنها "ذكر" حتى يتمكن من حماية وخدمة بيت المقدس..
لحظة الولادة طلعت أنثى (وليس الذكر كالأنثى) يارب؟!!
امرأة عمران ما بتعرف إنه "مريم" مش أي أنثى..
لاحقا رح تدرك إنها كانت حامل بسيدة نساء العالمين!!

ولإنه ربنا ما بخفى عليه شيء ولا حتى دعوات زكريا..
جبر خاطره بيحيى..

وربنا ما بخفى عليه فرحتكم بنصر بدر..
ولإنها لحظة نصــــر بتوازن آل عمران مشاعرهم وبتحكيلهم:
وَلَقَدْ نَصَرَكُمُ اللَّهُ بِبَدْرٍ وَأَنتُمْ (أَذِلَّةٌ ۖ) فَاتَّقُوا اللَّهَ لَعَلَّكُمْ تَشْكُرُونَ.

لكن لما انهزموا في أحد، ربنا ما خفي عليه حزنهم وانكسارهم، فوازنت آل عمران ورفعت معنوايتهم:
وَلَا تَهِنُوا وَلَا تَحْزَنُوا وَأَنتُمُ (الْأَعْلَوْنَ) إِن كُنتُم مُّؤْمِنِينَ
.
.
آل عمران بتعرف إنك رح تمر بيوم (بدر) وممكن تمر بأيام (أحد)!
رح تتلقى فيها طعنات غادرة..
وهزائم موجعة متتالية..

فما تحزن!
وانظر للصورة بالكامل..
وما تنسى إنه ربنا ما بخفى عليه وجعك وحزنك وانكسارك..

ولا تنسى آخر وصية في آل عمران إلك:
يَا أَيُّهَا الَّذِينَ آمَنُواْ اصْبِرُواْ وَصَابِرُواْ وَرَابِطُواْ وَاتَّقُواْ اللَّهَ لَعَلَّكُمْ تُفْلِحُونَ

#القرآن_الجميل
#ARK

عكس ما بتتوقع..
سورة النساء لونها مش زهري!
ومش حريصة تستجدي فقط عواطفك ودموعك..
وشعاراتك الزائفة لانصاف المرأة مش من ضمن اهتمامها..!
.
.
سورة النساء سورة سياسية بامتياز..
سورة بتحكي عن النظام السياسي ودولة القانون..
سورة بتتناول العدل كركيزة..
سورة كل تركيزها على سنّ القوانين والأنظمة..
لإنه من خلال العدل والقوانين الصارمة مش فقط رح ننصف المرأة والضعفاء، وكمان رح نساهم في تغيير كل الأوضاع اللي ساهمت بداية في استضعافهم..!

سورة بتكرر فيها الحكم والعدل والقسط والتحذير من الظلم..
- وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ
- يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ
.
.
السورة بتتناول مجموعة قوانين وأنظمة بتخص المرأة والأيتام..
فيما يتعلق بالنساء: معاشرتهم بالمعروف..حقهم بالميراث..العدل معهم..حقهم بالمهر..وبعض القضايا المتعلقة بشؤون أزواجهم..حفظ كرامتهم..وحتى طريقة التعامل معهم في حال ظلمهم!
.
.
العجيب إنه السورة كمان فيها قوانين تشريعية وقضايا سياسية بعيدة عن موضوع النساء والأيتام تماما!!
يعني مثلا بتحكي عن الجهاد والقتال ومعاملة الأعداء..
بتحكي عن بعض التشريعات المتعلقة بالقتل الخطأ والوضوء والتيمم وصلاة الخوف والقصر وتحريم الخمر..
فيها عن دور اليهود والمنافقين في المجتمع الإسلامي وطرق التعامل معهم..
فيها عن الهجرة إلى دار الإيمان..
فيها وفيها..

مع ذلك حافظت على اسمها (النساء) !
وكل ما السورة تستعرض بعض الجوانب السياسية والتشريعية بترجع لموضوع النساء وبتأكد عليه..

ببساطة..ما في نظام سياسي قوي وعادل بغفل وبتناسى حقوق النساء والضعفاء وما بساهم في حمايتهم والدفاع عنهم..

وَمَا لَكُمْ لَا تُقَاتِلُونَ فِي سَبِيلِ اللَّهِ وَالْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ..
.
.
النساء رمز للمستضعفين في الأرض..
كثير نالهم ظلم..وكثير ناس أكلت حقوقهم..
سورة النساء ما بطّالبك تذرف دموع عليهم..
ولا تردد وترفع شعارات تنصفهم..

السورة بتطلب منك تتقي ربنا وتعدل وتقسط وتحكم بالحق..
و"تقاتــــل" لرفع الظلم عنهم!

#القرآن_الجميل
#ARK

قبل ما نبدأ محاضرتنا لازم نتفق عبعض الأمور..
ممنوع العلكة أثناء المحاضرة..وممنوع الأكل والكلام الجانبي..
وأي حد بتجاوز الحد المسموح فيه بالغياب رح ينحرم من المادة..
بخصوص الإمتحانات أي حد بغش رح يتحول لمجلس ضبط واحتمال ينفصل من الجامعة كلها..!!
وعفكرة..في شعب سابقة إلكم ما التزمت بالقوانين ونالت عقابها!!
.
.
سورة المائدة ^^
بتبدأ معك بداية مشابه..
يَا أَيُّهَا الَّذِينَ آمَنُوا أَوْفُوا بِالْعُقُودِ ۚ أُحِلَّتْ لَكُم بَهِيمَةُ الْأَنْعَامِ إِلَّا مَا يُتْلَىٰ عَلَيْكُمْ غَيْرَ مُحِلِّي الصَّيْدِ وَأَنتُمْ حُرُمٌ ۗ إِنَّ اللَّهَ يَحْكُمُ مَا يُرِيدُ (1)

بتطلب منك الإلتزام بأمور ممكن تكون سهلة بنظرك..
إنك ما تاكل ميتة ودم ولحم خنزير ولا منخنقة وموقوذة ومتردية ونطيحة ولا ما أكل السبع..

سورة المائدة بترسّخ فكرة (العقد) بداية بأشياء بسيطة
لاحقا رح تنتقل معك لعقود أكبر مش بسيطة..

لكـــن قبل..
بتذكرك ببني اسرائيل والنصاري كيف نقضوا العقد والميثاق:
- فَبِمَا نَقْضِهِم مِّيثَاقَهُمْ لَعَنَّاهُمْ وَجَعَلْنَا قُلُوبَهُمْ قَاسِيَةً ۖ
- وَمِنَ الَّذِينَ قَالُوا إِنَّا نَصَارَىٰ أَخَذْنَا مِيثَاقَهُمْ فَنَسُوا حَظًّا مِّمَّا ذُكِّرُوا بِهِ فَأَغْرَيْنَا بَيْنَهُمُ الْعَدَاوَةَ وَالْبَغْضَاءَ إِلَىٰ يَوْمِ الْقِيَامَةِ
.
.
بعدها بتنقل إلك قصة حصلت أول التاريخ لما قابيل قتل هابيل..
فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ!

هالقصة وبشكل مفاجئ رح تنقلك من عقد متعلق بطعامك..لعقد متعلق بالنفس البشرية وحرمتها وحرمة دمائها..
وبتحذرك من عاقبة دنيوية قبل الآخرة لأي نقض منك متعلق بدماء الناس وحقوقها..

مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ وَلَقَدْ جَاءَتْهُمْ رُسُلُنَا بِالْبَيِّنَاتِ ثُمَّ إِنَّ كَثِيرًا مِّنْهُم بَعْدَ ذَٰلِكَ فِي الْأَرْضِ لَمُسْرِفُونَ (32) إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَن يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُم مِّنْ خِلَافٍ أَوْ يُنفَوْا مِنَ الْأَرْضِ ۚ ذَٰلِكَ لَهُمْ خِزْيٌ فِي الدُّنْيَا ۖ وَلَهُمْ فِي الْآخِرَةِ عَذَابٌ عَظِيمٌ (33)

وأيضا عقد متعلق بحقوق الناس المادية..
وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِّنَ اللَّهِ ۗ وَاللَّهُ عَزِيزٌ حَكِيمٌ!

ولاحقا عقد متعلق بالخمر:
يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ

العقوبات لا شك قاسية..
لكنها ضرورية لوضع حد للمجرمين ولردع مجرمين آخرين من ارتكاب جرائمهم..
.
.
العقود مهمة..
والنفس البشرية بلا حدود وقيود ورادع رح تتمادى..
والحياة بلا عقود وحدود حياة جاهلية!!
أَفَحُكْمَ الْجَاهِلِيَّةِ يَبْغُونَ ۚ وَمَنْ أَحْسَنُ مِنَ اللَّهِ حُكْمًا ؟!
--------------
.
.
من ممنوع تاكل علكة...لــــممنوع تغش في الإمتحان!
كذلك المائدة..
من ممنوع تاكل ميتة ودم.....لممنوع تسرق وتشرب خمر وتسفك دم!

#القرآن_الجميل
#ARK

في ناس ما بصادفوا آية إلا وكانوا عنها معرضين!
وناس كذّبوا بآيات ربنا وافتروا عليه الكذب وكانوا مستهزئين..
وبحكوا: إِنْ هِيَ إِلَّا حَيَاتُنَا الدُّنْيَا نَمُوتُ وَنَحْيَا وَمَا نَحْنُ بِمَبْعُوثِينَ!
موتى..صم..بكم..عايشين بظلام..حادوا عن الصراط المستقيم..
الله ببتليهم لعل وعسى يرجعوا ويتضرعوا..وَلَٰكِن قَسَتْ قُلُوبُهُمْ وَزَيَّنَ لَهُمُ الشَّيْطَانُ مَا كَانُوا يَعْمَلُونَ.

طيّب سؤال: شو رح تعملوا لو أجاكم عذاب الله بغتة وجهرة؟
وكيف نسيتوا لما ربنا نجّاكم من ظلمات البر والبحر لما دعيتوه تضرعا وخفية؟

طيّب خلص بنآمن بشرط: بدنا كتاب نلمسه بإيدينا! وبدنا نشوف ملك بعيونّا..وبدنا نحكي مع الموتى..وقسما بالله رح نآمن لو ربنا أرسل آية حسب طلبنا.

وسورة الأنعام ترد:
قُلْ إِنَّمَا الْآيَاتُ عِندَ اللَّهِ ۖ وَمَا يُشْعِرُكُمْ أَنَّهَا إِذَا جَاءَتْ لَا يُؤْمِنُونَ (109) وَنُقَلِّبُ أَفْئِدَتَهُمْ وَأَبْصَارَهُمْ كَمَا لَمْ يُؤْمِنُوا بِهِ أَوَّلَ مَرَّةٍ وَنَذَرُهُمْ فِي طُغْيَانِهِمْ يَعْمَهُونَ (110)وَلَوْ أَنَّنَا نَزَّلْنَا إِلَيْهِمُ الْمَلَائِكَةَ وَكَلَّمَهُمُ الْمَوْتَىٰ وَحَشَرْنَا عَلَيْهِمْ كُلَّ شَيْءٍ قُبُلًا مَّا كَانُوا لِيُؤْمِنُوا إِلَّا أَن يَشَاءَ اللَّهُ وَلَٰكِنَّ أَكْثَرَهُمْ يَجْهَلُونَ (111)
.
.
في المقابــــــل..
في ناس رفعوا روسهم للسما..بالضبط زي ما عمل أبوهم ابراهيم..
شافوا ملكوت السموات والأرض.. فكانوا موقنين..
قدروا يشوفوا بكل شيء آية من آيات ربنا وارتسمت عقلوبهم ابتسامة رضا مع الحمدلله رب العالمين..

يا الله قلوبهم اللي سكنت فيها محبة الله..!
الله العظيم..اللي بتحكيلهم عنه سورة الأنعام..
فَالِقُ الْحَبِّ وَالنَّوَىٰ
فَالِقُ الْإِصْبَاحِ
بَدِيعُ السَّمَاوَاتِ وَالْأَرْضِ
خَالِقُ كُلِّ شَيْءٍ ۖ
الْغَنِيُّ ذُو الرَّحْمَةِ
وَهُوَ الْقَاهِرُ فَوْقَ عِبَادِهِ ۚ وَهُوَ الْحَكِيمُ الْخَبِيرُ...
.
.
ناس بخافوا لما يعصوا ربنا عذاب يوم عظيم..
لكنها رحمة ربنا بتداركهم بكل مرة بعصوا فيها..
والأنعام بطبطب عليهم وبتواسيهم وبتحكيلهم:
سَلَامٌ عَلَيْكُمْ ۖ كَتَبَ رَبُّكُمْ عَلَىٰ نَفْسِهِ الرَّحْمَةَ ۖ أَنَّهُ مَنْ عَمِلَ مِنكُمْ سُوءًا بِجَهَالَةٍ ثُمَّ تَابَ مِن بَعْدِهِ وَأَصْلَحَ فَأَنَّهُ غَفُورٌ رَّحِيمٌ <3 !
.
.
ناس قرروا تكون صلاتهم ونسكهم ومحياهم ومماتهم لرب العالمين..

ناس آثرت حياة فيها الله..
على حياة لحظية عبثية عدمية

كالأنعام!

#القرآن_الجميل
#ARK

كل إشي إله دخل برقم 7 بتحبه..
شهر 7..السموات السبع..آيات الفاتحة..طواف الكعبة..ألوان الطيف..حديث سبعة يظلهم الله في ظله..حتى سورتها المفضلة في القرآن سورة رقم 7 !

هي بكل سنة بتستنى رمضان حتى تسترد روحها..
حتى تغسل وتعالج آلامها وأوجاعها..
حتى تعدل بوصلتنا ومسارها..
والأهم تجدد العهد مع الله إنها ما تتنازل عن مبادئها..
.
.
للأسف هالرمضان غير!
يا الله شو تغيرت..
فقدت الشغف والدافع بكل خطواتها..
صارت تشعر إنه ما في إشي في الحياة مستاهل نتعب عشانه..
حتى مبادئها وقيمها اكتشفت إنهم ما بستحقوا تقاتل عشانها
أصلا هي مش عارفة حالها هي ع صح ولا غلط..
الحياة طلعت أصعب مما كانت بتتصور..
وفكرة الثبات فكرة تقارب المستحيل!

وين راح شغفها وأحلامها..؟
كيف هيك تنازلت عن مبادئها ؟
ليه هيك بتفرّط برمضانها؟
.
.
الإشي الوحيد اللي ما تغير عليها رقم 7..
ضل رقمها المفضل وكل إشي إله دخل فيه بتحبه..

السموات السبع..آيات الفاتحة..طواف الكعبة..ألوان الطيف..حديث سبعة يظلهم الله في ظله..حتى سورتها المفضلة في القرآن سورة رقم 7 !
.
.
سورة الأعراف !
سورة الصراع ما بين منظومة الحق والباطل..
سورة أهل الجنة والنار..
السورة اللي بتكشف استراتيجيات الشيطان في اغوائنا !
سورة قصص الانبياء مع أقوامهم..
وكيف إنهم واصلوا طريقهم رغم عناد أقوامهم وأهلهم وأقرب الناس إلهم..
سورة الثبات حتى لو كانت فكرته بتقارب المستحيل !
.
.
بدت تقلب بصفحاتها وآياتها زي إم بتتفحص وبتتحسس وجه إبنها بكل لهفة بعد طول غياب..

كانت مع كل آية بتستعيد شغفها وطاقتها حتى تستأنف صراع كانت قررت من مدة تنسحب عن خوضه..

رجع القرآن بوصلتها واكتشفت سبب فتورها وضعفها واستسلامها..
ومن خلاله كانت حريصة تشكّل من جديد مسارها وهويتها وكينونتها..

هزّت راسها مع آية: قَالَا رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ
وقالت: أنا كمان يارب..

ومع آية: لَا يَفْتِنَنَّكُمُ الشَّيْطَانُ....قالت: حاضر!

وابتسم قلبها لما مرت على:
وَالَّذِينَ عَمِلُوا السَّيِّئَاتِ ثُمَّ تَابُوا مِن بَعْدِهَا وَآمَنُوا إِنَّ رَبَّكَ مِن بَعْدِهَا لَغَفُورٌ رَّحِيمٌ

وانتفضت على آية:
وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ *
وَلَوْ شِئْنَا لَرَفَعْنَاهُ بِهَا وَلَٰكِنَّهُ أَخْلَدَ إِلَى الْأَرْضِ وَاتَّبَعَ هَوَاهُ ۚ ...

وبكل عفوية صارت تردد:
لا مش انا ..
مش انا ..

وقامت تكتب خطتها لنهاية رمضان..
واللي كانت بعنوان :
لرفعناه بها..!!

#القرآن_الجميل
#ARK

معظم امتحانات الــ Open Book اللي قدمتها بحياتي خبصت فيها..

يعني لو كان امتحان عادي كان ممكن أجاوب أحسن..
أقلّها بكون فاتح المادة قبل وعارف عن شو بتحكي..
أما مع الOpen Book بكون بكتشفها لحظة الإمتحان..

في دراسة لجامعة "نيو ساوث ويلز" في استراليا بتحكي:
من أكبر الأخطاء الشائعة عند الطلاب إنهم بعتقدوا إنه الإمتحان المفتوح مش بحاجة إلى دراسة..

وبتكمل الدراسة:
إنه الطلاب اللي ما بدرسوا قبل الإمتحان المفتوح بعانوا من مشكلة عدم مقدرتهم على استخراج الجواب من الكتاب..
لدرجة إنهم بعتقدوا إنه الجواب المطلوب منهم مش موجود أصلا في الكتاب وبالتالي انخدعوا بموضوع الإمتحان المفتوح !
.
.
الفكرة باختصار..
إنت مش مطلوب منك تحفظ المادة وتبصمها بصم حتى تنجح بالإمتحان..
ممكن مطلوب منك تفهم منيح..وتقرأ بشكل واعي ومتكرر ودقيق..
حتى تقدر لما تقدم الإمتحان المفتوح تستخرج الإجابات بسهولة بدون ما تبذل عناء كبير في البحث عنها..
أو تعتقد لوهلة إنه الإجابات مش موجود أصلا بالكتاب..!

************

الكتاب المفتوح: القرآن.

ما تطلع من امتحانات الدنيا المتكررة تحكي:
ما لقيت الجواب بالقرآن..!

والقصة وما فيها إنك مش مكلف حالك تفتحه إلا بلحظة الإمتحان..!
.
.

كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُولُو الْأَلْبَابِ

#القرآن_الجميل
#ARK

سكت الشيخ فجأة أثناء القراءة..أنا فكرته نسي..
لكنّه بعدها كمّل قراءة بصوت برجف..وبدموع بحاول يحبسها..
.
.
بعد الصلاة خبرنا الشيخ إنه قرأ علينا من سورة هود..
وخبرنا عن حديث النبي صلى الله عليه وسلم: شيبتني هود وأخواتها!

وعاد علينا قراءة آية:
﴿ وكُلاًّ نَّقُصُّ عَلَيْكَ مِنْ أَنبَاء الرُّسُلِ مَا نُثَبِّتُ بِهِ فُؤَادَكَ وَجَاءَكَ فِي هَذِهِ الْحَقُّ وَمَوْعِظَةٌ وَذِكْرَى لِلْمُؤْمِنِينَ﴾ .

رجعت عالبيت وعندي فضول عجيب أقرأ سورة هود..
.
.
يا إلهي..
السورة عجيبة في توصيف قصص الأنبياء مع أقوامهم.. والأعجب الإشارات الربانية لمحمد صلى الله عليه وسلم..

يا محمد..مهما بدت الطريق بالنسبة إلك خالية وموحشة ومظلمة ..
هي قصص إخوانك من قبلك..
حتى نثبت فيها فؤادك..!
.
.
كنت مصدوم وأنا بمر عالآيات المدهشة والمذهلة في تأكيد فكرة (الثبات)..!
﴿ فَاسْتَقِمْ كَمَا أُمِرْتَ وَمَن تَابَ مَعَكَ وَلاَ تَطْغَوْا ﴾
﴿ وَلا تَرْكَنُواْ إِلَى الَّذِينَ ظَلَمُواْ فَتَمَسَّكُمُ النَّارُ ﴾
﴿ وَأَقِمِ الصَّلاةَ طَرَفَيِ النَّهَارِ وَزُلَفًا مِّنَ اللَّيْلِ ، إِنَّ الْحَسَنَاتِ يُذْهِبْنَ السَّيِّئَاتِ ﴾
﴿ وَاصْبِرْ فَإِنَّ اللَّهَ لاَ يُضِيعُ أَجْرَ الْمُحْسِنِينَ ﴾
﴿ فَلَوْلَا كَانَ مِنَ الْقُرُونِ مِن قَبْلِكُمْ أُوْلُواْ بَقِيَّةٍ يَنْهَوْنَ عَنِ الْفَسَادِ فِي الأَرْضِ ﴾
﴿ وَكُلاًّ نَّقُصُّ عَلَيْكَ مِنْ أَنبَاء الرُّسُلِ مَا نُثَبِّتُ بِهِ فُؤَادَكَ ﴾
﴿ فَاعْبُدْهُ وَتَوَكَّلْ عَلَيْهِ ﴾
.
.
.
هود.. وحكايات الثبات..شيبت شعره ﷺ..
فهل يا تُرى حركت فينا شعره ؟!

#القرآن_الجميل
#ARK

بعرف إنه انتصف رمضان وإنت لسه مش ملاقي قلبك..!
وبعرف إنك كنت تحكي بس ييجي رمضان أكيد رح أتغير..
وهيو أجى وقرب يخلص ولساتك زي ما إنت..

حاسس فيك وإنت بتعاتب حالك إنه بحياتها التراويح ما كانت ثقيلة عليك هالقد..
والقرآن مش عارف تنجز فيه إشي..

لما أجاك شعور اليأس والقنوط وصرت تحكي مع حالك:
إذا الواحد برمضان ما تغير متى بدو يتغير..؟

لما اكتشفت إنه الصراع اللي إنت عايشه مع شهواتك ورغباتك طلع مش بالبساطة اللي كنت بتعتقدها..
-----------
وفي اللحظة اللي بتفكر فيها تستسلم وتنسحب من هذا الصراع..

فجأة
بتتسلل لروحك نفحة إلهية!
فجأة بتفتح المصحف وعينك بتصادف آيات بتخاطبك إنت شخصيّا..

- {إِن تَجْتَنِبُوا كَبَائِرَ مَا تُنْهَوْنَ عَنْهُ نُكَفِّرْ عَنكُمْ سَيِّئَاتِكُمْ وَنُدْخِلْكُم مُّدْخَلًا كَرِيمًا}

- {إِنَّ اللَّهَ لَا يَظْلِمُ مِثْقَالَ ذَرَّةٍ ۖ وَإِن تَكُ حَسَنَةً يُضَاعِفْهَا وَيُؤْتِ مِن لَّدُنْهُ أَجْرًا عَظِيمًا}

- {وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللَّهَ يَجِدِ اللَّهَ غَفُورًا رَّحِيمًا}

- {وَلَوْ أَنَّهُمْ إِذ ظَّلَمُوا أَنفُسَهُمْ جَاءُوكَ فَاسْتَغْفَرُوا اللَّهَ وَاسْتَغْفَرَ لَهُمُ الرَّسُولُ لَوَجَدُوا اللَّهَ تَوَّابًا رَّحِيمًا}

فجأة بتحس إنه ربنا أقرب إلك مما كنت بتتصور..
وإنه ما دام فيك نفس يعني في أمل..
فجأة بشتاق قلبك لرحمة ربنا ولطفه وكرمه..
فجأة بتحس حالك نفسك تسجد بين إيدين ربنا وتحكيله كل إشي جواتك..
---------
نصيحة بكفي يأس وقنوط..
بكفي تجلد ذاتك وتحتقر نفسك..
بكفي تظن إنه رحمة ربنا مش أكبر من كل أغلاطك وهفواتك وزلاتك..
.
.
وما تنسى..
رمضان لسه ما خلّص..
صحيح ممكن ما أحسنت الإستقبال..
لكن بإيدك تِحسن الوادع..!

#القرآن_الجميل
#ARK

هسا إنت كبنت منيحة لو بعتلك شب:
ممكن نتعرف؟
غالبا رح تضحكي وتعملي بلوك ^^

لكــــن لو بعتلك مثلا: شفت إلك بوست ديني وعندي سؤال؟
أنا حاب التزم ومش عارف؟
عندي شبهة في الموضوع الفلاني..!

في عدد لا بأس به من البنات وعن حسن نية بقرروا يساعدوا هذا الشخص وبشفقوا عليه وكل نيتهم خير ومساعدة ^^

------------
باختصار إنت كبنت مش مطالبة بهداية شب!
وفي ألف طريقة غير إنك تناقشي الشب بمسائل دينية..

مؤخرا وصلتني عشراااااات الأسئلة من بنات انتهت محاوراتهم مع الشباب بأمور سيئة!
وبدل ما يأثروا بالشباب تأثروا للأسف..

علما إنهم هدفهم بداية خير ودعوة وهداية الطرف الآخر..

بصراحة مع كثرة القصص اللي وصلتني..
أكاد أجزم إنه في مجموعة من الشباب كل هدفهم يبعتوا لبنات محافظات ملتزمات مناح حتى يفتحوا معهم حوار وكل نيتهم أمور سيئة وجرّ رجلهم لأشياء غلط..

والدليل إنه أغلب هالشباب لما مثلا يتواصل معهم شب..
أو تحكيله إحنا جاهزين نقعد معك ونجاوبك..

بتلاقيه اختفى!!

هو سبحان الله بس بتناقش مع بنات :)

أرجوكم احذروا..
أنا اضطريت أكتب هالبوست بعد كثير قصص شفتها وسمعتها..
والإشي وصل لمرحلة وجب التحذير منه..

الله يثبتكم ^^

أنا كثير تعبت والله !
مش قادر الاقي حل..مش قادر أرجع لربنا..
ما أظنه يرحمني بعد كل إشي عملته..
خجلان أحكي معه وادعيه وأبكي بين إيديه..!

اليأس سيطر عليّ..
حتى بحياتي كثير انحرمت من أشياء كنت بمتلكها وكثير
في أشياء نفسي فيها..

(يأس!)
هالكلمة بتلخص حياتي حرفيّا..
يأس من رحمة الله..يأس من أشياء فقدتها..يأس من أشياء بطلبها وما قدرت أحصّلها!
----------------
القرآن تناول اليأس من 3 جوانب، نفس كلام صاحبنا:
- يأس من رحمة الله: لا تَقْنَطُوا مِنْ رَحْمَةِ اللَّهِ
- يأس من مفقود: اذْهَبُوا فَتَحَسَّسُوا مِن يُوسُفَ وَأَخِيهِ وَلَا تَيْأَسُوا مِن رَّوْحِ اللَّهِ ۖ
- يأس من مطلوب: قَالُوا بَشَّرْنَاكَ بِالْحَقِّ فَلَا تَكُن مِّنَ الْقَانِطِينَ

لكــــــن القرآن بتناول اليأس في سياق النهي: لا...ولا...فلا...!

القرآن بنهاك عن اليأس..
لكنه ما بكتفي بنهيك وتحذيرك..

مجرد ما قلّبت صفحاته رح تصادف آيات كثيرة تذكرك برحمة ربنا، وآيات كثيرة بتظهر قدرة وعظمة الله، وآيات بتتناول قصص ناس جبر الله بخاطرها وعوضها..

هالآيات عبارة عن عزاء إلك..
وتذكير إلك بكل مرة بتسلل فيها اليأس لقلبك..

والخلاصة:
لا..ولا.. فلا
أكبر من كل يأسك!

#القرآن_الجميل
#ARK

ممكن ما حد يحكيلي الأصل إنك ما غلطت هيك أغلاط..!
خلص غلطت ومش وقته هالحكي..

وما حد أرجوكم يقارنلي بين عز الطاعة وذل المعصية..لإني جربت وعرفت!

وبعرف إنه ربنا أمهلني مرة ومرتين وألف.. وإنه كان ممكن بعزّ الغلط يقبض روحي..

ومش بحاجة إنكم تنصحوني إنه لازم أستر عحالي، لإني والله مستحيل أجاهر بغلط..وكله بيني وبين ربي..

كل إشي ممكن تحكولي اياه بعرفه..وممكن بقدر أصيغه بشكل أفضل منكم..!
.
.
في هالليالي مش وقت هالحكي!
ممكن وقت تحكولي إنه في أمل أرجع لربنا !
احكولي إنه ربنا زي ما هو رحيم وكريم كمان قادر..
قادر ينتشلني وينقذني ويساعدني وياخد بايدي..
احكولي عن لحظة ينظرلي فيها نظرة رضا وما يسخط عليّ بعدها أبدا..
أو لما ينادي في السماء إنه غفرلي..
أو ينادي إنه بحبني..!!
آه يحبني..
احكولي عن آية: إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ.

وعادي أسمع منكم قصة موسى لما قتل شخص وربنا غفرله؟
قَالَ رَبِّ إِنِّي ظَلَمْتُ نَفْسِي فَاغْفِرْ لِي فَغَفَرَ لَهُ ۚ إِنَّهُ هُوَ الْغَفُورُ الرَّحِيمُ

طيّب آدم: فَتَلَقَّىٰ آدَمُ مِن رَّبِّهِ كَلِمَاتٍ فَتَابَ عَلَيْهِ ۚ إِنَّهُ هُوَ التَّوَّابُ الرَّحِيمُ.

احكولي عن الإستثناء في آية: إِلَّا الَّذِينَ تَابُوا مِنْ بَعْدِ ذَٰلِكَ وَأَصْلَحُوا فَإِنَّ اللَّهَ غَفُورٌ رَحِيمٌ

وهديك الآية تاعت يا عبادي.
قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ
.
.
------------
غلطت وأسرفت عنفسي..!
وبعترف بضعفي وعجزي وتقصيري..
وكثير خجلان من ربنا كم ستر عليّ..
كم امهلني وسامحني..
وبكل مرة كنت ارجعله كان يقبلني..

احكولي إنه كمان هالأيام رح يقبلني وما يردني..

احكولي إنه عفو وكريم وبحب العفو ورح يعفو عني!

#ARK

مرة من المرات رحت تصدقت بنية إنه ربنا يحفظني ويثبتني وما يفتني..
بتذكر ليلتها دعيت ربنا بكل صدق إنه يارب أرجوك ثبتني لاني لما أعصيك بكرهني!

بس الله ما استجاب!
أيام معدودة ووقعت بغلط ما كنت متوقع إني ممكن أوقع فيه..
ممكن غرّتني صدقاتي ودعواتي وظنيت إنها شيء كافي..

بعدها..
خاطبت ربنا بأسلوب مش لائق للأسف...
كان كلامي بحمل في طيّاته عتب!
طيّب يا رب أنا تصدقت ودعيتك وبكيت بين إيديك...ليه ما حفظتني؟
أنا ما طلبت منك شيء دنيوي..أنا بس بدي ما أعصيك...ليه ما استجبتلي؟؟!

انتهى العتاب بـــ آسف يارب!
وطلبت منه يسامحني على أسلوبي وكلامي بس والله لحظتها كان قلبي بحرقني..
.
.
تبت من غلطي وما رجعت إله أبدا لكنه ظل حمل ثقيل جواتي..
حسيته غلط كسرني وغيّر نظرتي اتجاه نفسي..
صرت أحسد كل شخص ما غلط مثلي..
صرت أقارن حالي مع غيري وأقول لا همّه ما غلطوا غلطي..
والله تعبت واكتئبت وفقدت شغفي وحماسي..

كنت متأكد إنه ربنا سامحني..لكن انا ما سامحت حالي..
وضل هالغلط مثل ندبة...
زال وجعها لكن ظل أثرها محفور جوا روحي..
.
.
مع الأيام اكتشفت إنه محور حياتي صار هالغلط..
حتى لو ربنا غفرلي.. بس كنت حريص أغفر لنفسي..
اكتشفت إنه هالغلط غيّرلي كثير أشياء بحياتي..
صرت اكثر حذر بعده..صرت أفضل بعده..
قلبي صار ألين...ودموعي اللي كنت بتغلب أنزلها صارت مع كلمة يا رب تنسال لحالها ع خدي..
صلاتي صارت أحسن..وحتى صدقاتي..
وقدرت الحمدلله أساعد كثير ناس وقعوا بنفس غلطي لإني فاهمهم..
وقدرت أمنع كثير ناس قبل ما يوقعوا وأحذرهم..

أنا إنسان جديد بعد هالغلط..!
--------------

أحيانا الخير إلك بغلط يصحيك ويحذرك ويعلمك..
أحيانا الخير إلك بغلط وذنب يكسرك!

#ARK

مرة رحت أرخّص السيارة وكان عليّ مخالفات كثيرة..
ولما أجيت بدي ادفع المخالفات استغربت انه صدر عفو عام وما علي ولا مخالفة!!

فرحتي لحظتها لا توصف..
خصوصا إنها أجت بعد اعتقادي بعقوبة مادية رح ادفعها وعقوبة معنوية ونفسية من أبوي رح اتلقاها..
.
.
الله عفو!
بتجاوز عن ذنوبك وأغلاطك ولا كأنها صارت..
فجأة بختفي الذنب اللي كسرك ووجعك ودمّر حياتك..

ومن رحمة ربنا بعطيك صلاحية باصدار عفو عام بحق نفسك!
فيما لو قررت تتوجه إله بصدق وتطلب منه يعفو عنك ويتجاوز عن أغلاطك..
.
.
ربنا عفو ^^
هالاسم بمنحك الأمل بحياة جديدة...وبنسيك ماضي مليان بآثامك..
وبلفت انتباهك لمستقبل لازم تخوض غماره في علاقة أحسن مع الله..

اسم بنزّل دموعك في الوقت اللي برسم فيه ابتسامة رضا جواتك..
اسم حريص يطبطب عليك بكل مرة بتفقد فيها الأمل من نفسك..
اسم بلحظة بنتشل روحك..

اسم حريص بكل ليلة قدر يثير دهشتك واستغرابك!
.
.
اللهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي
#العفو
#ARK

زماااان طلعت أنا وإمي بالسيارة حتى نصلي التراويح وصادفنا بالطريق جارتنا وبنتها..
فإمي حكتلهم لو بدكم تعالوا معنا إحنا رايحين عالمسجد^^

طلعت جارتنا وبنتها..
سلّمت عليّ جارتنا^^
وإمي سلّمت عالبنت وكيف المدرسة معك..؟عندك امتحانات هالفترة؟ شدي حيلك اسم الله عليك شو بتجنني ^^
وهي وقتها ردت بصوت واطي ومؤدب كله خجل وحياء وأنوثة^^

صفيت السيارة قريب من المسجد، وخبرتهم بنبرة كلها رجولة واتزان وادب وأخلاق إنه بعد الصلاة بنتلاقى هون عند السيارة..
وسبقتهم عالمسجد ولا تقول أرطغرول اللي ماشي.. بس اللهم لابس دشداشة وبدل السيف حامل مسبحة^^

أيامها كانت أحلى فقرة بحياتي لما نوصلهم معنا..

طبعا أنا وقتها كثير دراما وكان عندي فراغ عاطفي مش عارف وين أروح فيه..
يعني كنت ادخل المسجد بس قلبي وعقلي مع بنت جيرانا : ) !
وأصير اتخيل شو ممكن أعمل أشياء تلفت انتباهها..
والله خطرلي إنه يا ريت توقع للثريا تاعت المسجد وانقذ الناس من تحتها ويذيع صيتي في المسجد واتلقى شكر على الملأ من إمام مسجدنا..
او يتشردق الشيخ بنص الصلاة ويقدموني أصلي في الناس وأخشع كثير وأبكي من خشية الله وقتها..
تمنيت سيارة تكون على وشك تدعسها وهي طالعة وأقوم أنا وبكل بسالة وشجاعة ابهدل وأضرب صاحبها..
ولو اندعست عادي بس أنا اللي أوصلها عالمستشفى..
وأكيد لازم أعكس الجانب الإنساني واللطيف في شخصيتي، يعني بزبطش كله أرطغرول، يعني لا ضير بقليل من الفرفشة وخفة الدم والنغاشة مع ولاد حارتنا..
-------------------
.
.
هالقصة قديمة وكل ما اتذكرها بضحك عحالي ^^
بس ممكن هالقصة ضلت ببالي رغم تفاهتها لإنها كانت تمثل إلي أول مرة بشعر فيها إني بعمل إشي مش لله..!
كل إشي كنت اعمله كنت استحضر فيه بنت جيرانا ونظرتها..
كنت كثير أفكر كيف أبهرها وأدهشها وألفت انتباهها..

أكيد وعيت لاحقا، لكني بعترف إنه هالموقف بمثل إلي رمزية لكل عمل ممكن اعمله ويكون هدفي منه نظرة الناس وثنائها ومدحها..

أكيد الآن ما رح أكون دراما وساذج، ولا رح أضحك عحالي وأسرح بخيالي..ولا الشيطان رح يلعب بمخي بهاي السذاجة زي ما لعب وقتها..
بـــس هذا لا يعني إنه ما في صراع (بنت جيران) بأشكال أخرى في كل عمل بعمله وفي كل خطوة بنويها لربنا..
.
.
كثير بستغرب من الكم الهائل من (الاستعراض الديني) على وسائل التواصل الإجتماعي!
صرنا نستعرض اعمالنا وورعنا وخشيتنا واخلاصنا وخوفنا ورجائنا ودموعنا وكل إشي بينّا وبين ربنا..!!

دائما بحكي معقول عادي الإشي عندهم؟ معقول ما في صراع جواتهم؟ معقول ضمنوا نيتهم؟

معقول ما في (بنت جيران) بحياتهم! ^^
.
.
----------------
نصيحة قبل أي عمل جددوا نيتكم..
واصحوا عحالكم..
وتذكروا إنه ما في بشر رح ينفعكم..
وكثرة الناس ورضاها عنكم ما رح تفيدكم لو كان الله ساخط عليكم..
انسوا الناس وصانعوا وجه الله..وهو بكفيكم كل وجوههم!
.
.
وديروا بالكم (بنت الجيران) تسلبكم كل أجركم! : )

#ARK

عن شعورك دائمًا بآخر يوم برمضان..
لما تلوم نفسك على تقصيرك وتفريطك بأيامه ولياليه..
لما تصير تحكي: كان الأصل أكون أفضل..
كان من المفترض أتغير فعلا..
لما تنتابك مشاعر الندم والألم والحسرة..
ولما تخاف إنك ممكن ترجع لأغلاط كنت بتستنى رمضان حتى تكسرها وتتخلص منها..

عن دعواتك اللي بتحمل في طياتها خجل من ربنا..
يارب لو بلغتني رمضان الجاي وعد رح أكون أحسن..!
.
.
لو مريت بهذا الشعور فإنت على خير!
صدقوني ما حد بتحسر على فوات طاعة إلا والخير مالي قلبه..
ما حد بخاف يغلط إلا وفي صدق جواته..
ما حد بدعي ربنا يبلغه رمضان الجاي وبعاهده يكون أفضل إلا وهو حريص عرضاه وقربه..
.
.
الآن مش وقت تسمح للندم يسيطر عليك..
الآن وقت إنك ترسم خطة لبعد رمضان تثبت فيها لربنا حرصك وصدقك..
وقت إنك تعاهده بحد أدنى من الخير ما تتنازل عنه..
وقت إنك تستحضر إنك داخل على صراع جديد وممكن الشيطان يوقعك بغلط كنت مفكر حالك تخلصت منه..
وقت إنك تستمسك برحمة ربنا ومغفرته وعفوه..
.
.
الآن وقت إنك تودع رمضان بدعوات صادقة من قلبك:
يارب لو بلغتني رمضان الجاي وعد رح أكون أحسن..

ولو ما بلغك إياه!
فربنا الرحيم حيحاسبك على نيتك <3 !

#ARK

- طفح الكيل يا بنت الحلال..أنا بطلت أتحمل النياطة تاعتك..
ليه تسهري..؟ قلتلك ما تسهري..!

* لا إله إلا الله بس!
مهو خلّص رمضان ورجعت الشياطين ورجع نكدهم معاك!
كمان أنا طول الليلة صاحية بعمل كعك ومش قاعدة رجل عرجل..
وأكيد البنات لسه ما لحقوا يناموا..

- هسا والله لأوريك فيهم..
يلا قوموا ضايل ساعة عالفجر بدنا وقت لنوصل..
وبدنا نلحق نوصل المسجد قبل الازمة..
والله إذا ما بتقوموا فش إلكم عيدية..!

* عادي ماما بتعطينا ههه
- طيّب أنا رايح أجيب ميّ أرش عليكم..

* لا لا خلص هينا قايمين..
يا الله طيب خلينا نصلي هون ضروري نصلي هناك..؟
كمان الساعة لسه 3 خلينا نغفى شوي ..
يا بابا يااااااا

-خلص خليكم هيني رايح أجيب الميّ : )

* خلص خلص والله رح نقوم..
- فش راح نقوم....قدامي يلا..
------------------
-هي بدنا ننزل نصلي الفجر هون..
قسما بالله بتتأخروا غير أوريكم..
غير اتركم في الغـــور وأمشي..
إن شاء الله الذبان يوكلكم أكل هههه

* ماما ليه هيك بابا أعصابه محروقة..
- حقّه يا ماما ..حقّه ..
ما بتقدري تلومي حد على إشي بحبه..وصارله سنوات محروم منه..!

- بابا كم ضايل..؟؟
* أقل من ربع ساعة إن شاء الله...بس الله يستر من الأزمة..
مهو هسا كل الأردن بتكون هناااااك!

آخخخ الحمد لله إني عشت هاللحظة قبل موتي..
يا الله شو كنت خايف أموت قبلها..
إنتو مش عارفين يا بنات قديش كنا نحلم وندعي ونبكي حتى نعيش هاللحظة..
الحمد لله يا رب..
الحمد لله يا رب..

ييييي شوفوا شوفوا هيّو بيّن..
صحي أختك بسرعة...

- قومي قومي قومي..ولك قوميييي..

*طيب شوي شوي...مشان الله مش هيك الواحد بصحي..
صايرة زي بابا بالتصحاي!!

- ولك إصحي..

هي وصلنا الأقصى !

#ARK

في فتاة اسمها عائشة ضيّعت عقدها!
وخولة أجت تشكي من زوجها..
وزينب ما كانت بتحب زيد..
وأخوة يوسف بغاروا منه..
وفي أعمى انكسر خاطره لما رسول الله انشغل عنه..
وأخت موسى مشت كثير حتى تنقذه..
وقتها "أصبح فؤاد أم موسى فارغا" بس الله ربط عقلبها..
ويا نساء النبي ما تخضعوا بالقول لإنه في ناس بقلوبها مرض..
ولما بدكم تزوروا رسول الله كلوا وانتشروا وما تستأنسوا بالكلام وتقعدوا وقت طويل عنده..هالإشي كان بزعجه وكان بستحي يخبركم..
ولما بدكم تروحوا على ناس خذوا اذن بالأول، وما تفوتوا حتى يسمحوا إلكم ولو ما سمحوا خلص ارجعوا..
.
.
لما تقرأ اقرآن رح تصادف كثير آيات بتتناول قضايا ممكن تكون بنظرك بسيطة وجزئية!
وممكن تسأل نفسك أو تسمع ناس بتسأل: كيف خالق هالكون ممكن يتحدث بهيك تفاصيل؟!

وفي نفس الوقت رح تصادف كثير آيات كونية عظيمــــة بتحكي عن السموات والأرض والشمس والقمر والنجوم والسحاب والرياح والمطر وعن قدرة الله وعلمه وعظمته وحكمته..!
.
.
-------------
القرآن بحكيلك إنه خالق الكون على عظمته ما بتغيب عنه شكاوى خولة ودموع يعقوب ولا قلب أم موسى وخاطر الأعمى ومشاعر هاجر وخوف موسى ورهبة مريم وحياء رسوله من ضيوفه..

ولا عقد عائشة لما ضيعته..
لما في ناس اتهموها بشرفها وحكوا بعرضها..!!

إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيم

كلامكم عن هالحادثة مش شيء بسيط وهيّن!!
هو عند الله عظيــــــــم..!
.
.

ممكن اكثر عظمة وأهمية من كوارث المجرات وموت النجـــوم!

#القرآن_الجميل
#ARK