ما في بنت شريفة!
ما في شب شريف!

طبعًا الواحد فيهم مضى حياته على صفحات الإعترافات يتابع فضايح الناس وقصصها..
وما حرم نفسه من كل المواقع والتطبيقات المشبوهة..
وحكى مع بنات أو حكت مع شباب لقالوا بس..
وبفرحوا أشد الفرح لما يصادفوا بوست أو فيديو بأكد نظريتهم إنه ما في حد شريف !!

ناس هشّة !
ضعيفة أمام شهواتها ورغباتها..
بترتكب أخطاء قد المجتمع كله..
وعمرهم ما حاكموا الناس بالأحكام اللي بحاكموا فيها نفسهم..
المحرّك الأول إلهم غرورهم!
غرورهم هو زادهم الوحيد..هو القوة اللي بتحركهم والإشي الإستثنائي اللي بحبوه أكثر من حالهم..

بدّعوا المثالية والشرف!
وبفكروا إنهم لما يعمموا بأحكامهم يعني الناس رح تشهد بصلاحهم وعفتهم..
بحبوا تشيع الفاحشة بين الناس حتى يصدروا أحكامهم ويأكدوا نظرايتهم..
بستلذوا على قصص الخيانات والشرف لإنها بتروي مرضهم وعقدهم..
.
.
اتركوهم!
ما تردوا عليهم ولا تعيروهم اهتمام..
رح ييجي يوم ينذلوا ويتلطخوا ويتحطموا ويتعثروا وخلي غرورهم ينفعهم!
فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ..

مجتمعنا مش مثالي أكيد..
لكن مش زي ما بصوروا إلنا..
وقمة الظلم لما نعمم عمجتمع كامل ونساوي فيه الصالح والطالح..
قمة الظلم نسيء لبنات أصحاب مبدأ ودين ووقار وحياء..
ولشباب قلوبهم مليانة خير..
وفيهم بتشوف معنى الرجولة..
--------------
احكوا للصبح..
الدنيا لسه بخير..

وَإِذَا سَمِعُوا اللَّغْوَ أَعْرَضُوا عَنْهُ وَقَالُوا لَنَا أَعْمَالُنَا وَلَكُمْ أَعْمَالُكُمْ سَلَامٌ عَلَيْكُمْ لَا نَبْتَغِي الْجَاهِلِينَ

#القرآن_الجميل
#ARK

الناس بفترة الإمتحانات بتتحول لكائنات أخرى!

بصير الواحد فجأة مهتم بأشياء عمره ما اهتم فيها..
وبتشغل باله أسئلة عمره ما فكر فيها..
وهو مستعد يعمل أي إشي في الحياة إلا إنه يدرس ويركز في امتحانه..

وهذا الإشي كنت ألمحه فيي لما يكون عندي امتحان..
لما فجأة أحب أقرأ مسجات إمي اللي بتوصلها من الجارات عالوتساب..
وفجأة بكتشف إني زمان ما حكيت مع اختي..
ويضيق صدري من غير سابق انذار على أحوال الأمة والناس..
وفجأة بتذكر المستقبل وبصير أفكر بأسماء ولادي وبناتي..

وهذا الإشي كمان كنت ألمحه فيكم من خلال أسئلتكم على آرك بفترة الإمتحانات..
سبحان الله فجأة بتصيروا حابين تعرفوا شو معنى هالآية..
وفجأة بتتذكروا إنكم مقصرين وبدكم ترجعوا لربنا..
ومرة حد بعت إنه افرض أنا مسيّر وربنا كاتب علي أرسب بكرا!
غير أسئلة حكم الإنتحار اللي دائما بتوصلني بليالي الإمتحانات..

وأحلى إشي مرة شب بعت: ادعيلي استشهد!
وحد ثاني قلتله بجاوبك بأقرب وقت على سؤالك..
حكالي لا لا هسا.. لإني بعد امتحان بكرا ما بهمني أعرف الإجابة!
-----------------------------
.
.
هالدنيا اللي عايشين فيها عبارة عن امتحان..
من لحظة ما نصير مكلّفين وحتى لحظة وفاتنا..
معقول إحنا بنتعامل مع هالإمتحان زي ما بنتعامل مع امتحانات الجامعة!
لما نحاول نشغل حالنا بأي إشي حتى نلتهي عنها..
أي إشي مهما كان فارغ أو تافه أو ساذج بس المهم ننسى..

ليه دائما بنتغافل وبنتناسى حقيقة إنه حياتنا كلها امتحان..؟
امتحان بين الخير والشر..العدل والظلم..الحق والباطل ..
وإنه رح تيجي لحظة رح تنسحب من بين إيدينا ورقة الإمتحان فجأة..
وقتها ما في مجال نضيف حرف واحد عليها..
وما في فرصة نقدم فيها توسلاتنا واعذارنا..
.
.
.
ملاحظة:
الورقة لسه بين إيديكم..!

{يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ . وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ . وَلَن يُؤَخِّرَ اللَّهُ نَفْساً إِذَا جَاء أَجَلُهَا وَاللَّهُ خَبِيرٌ بِمَا تَعْمَلُونَ}

#القرآن_الجميل
#ARK

مرة بنت أختي جابتلي مفتاح السيارة وحكتلي:
يلا وديني عالمول!

طبعًا هي أحلى إشي عندها في الحياة لما تروح عالمول عقسم الألعاب..
لو تشوفوا دموع الفرح بعيونها وهي صافنة بكم الألعاب المهول قدامها!

وكنا لما نشتري إلها لعبة تقعد معها يومين بعدين نلاقيها (محطمة) ومكسّرة أو ضايعة تحت التخت و الكنباي..

كبرت بنت أختي شوي وبطلّت الألعاب كثير تستهويها، وصارت تميل أكثر لألعاب التلفون أو البلاي ستيشن، وكل ما تيجي عنا بتحكيلي بكل براءة: خالو عادي تعطيني تلفونك ألعب شوي..

لكن شو ما كانت اللعبة حلوة آخريتها تختمها أو تزهق منها..

رح تكبر بنت أختي إن شاء الله وحتصير صبية..
وممكن وقتها رح تهتم بحالها ومظهرها وشكلها ولبسها أكثر..
وما رح تسمح لأختي تلبّسها سبعين الف لون بنفس اللبسة ^^
رح تدخل بمرحلة (الزينة) المباحة إن شاء الله وهذا شيء فطري فينا كبشر..

ولما تتخرج من الجامعة إن شاء الله..
رح تفكر بحياتها بشكل جدي اكثر، ورح تكون حريصة تشتغل بمكان منيح وتجيب سيارة خاصة إلها، وإن شاء الله ربنا بيسّر إلها ابن الحلال وبنشوف ولادها..^^

---------
ما سبق بتحكي عنه هالآية:
اعْلَمُوا أَنَّمَا الْحَيَاةُ الدُّنْيَا
1- لَعِبٌ
2- وَلَهْوٌ
3- وَزِينَةٌ
4- وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ

الآية ما انتهت..
وتكملة الآية بتحكيلنا:
كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ

يعني..
مثل مزارع زرع البذور وطار من الفرحة لما نزل عليها مطر من السما..
لو تشوفوا دموع فرحته وهو بشوف النبات أخضر بنمو وبكبر شوي شوي عالأرض..
كان هالمزراع معجب بالزرع ومدهوش فيه والدنيا كلها مش واسعة فرحته..

لكن هالنبات كبر وكبر حتى اختفت دهشة المزراع فيه..
صار لونه أصفر وبعدها يِبِس وجَف وصار
(حُطام) !

-------

ختام الآية:
وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ
.
.
ديروا بالكم تشغلكم الحياة بألعابها ولهوها وزينتها عن الآخرة..
ديروا بالكم تتحول حياتكم لمظاهر وتفاخر بينكم..
وما تنسوا إنه الحياة متاعها زائل ومؤقت ولحظي وما بدوم لحد..
ومهما بلغتوا فيها من المتع والسعادة والمرح واللهو واللعب آخريتها تصير حُطام تحت رجليكم..

بالضبط مثل نبات المزارع..
ومثل ألعاب (لانا) بنت أختي!

#القرآن_الجميل
#ARK

شكرًا يا الله!
آرك وصل إلى 100000 متابع..

ولاحظوا إني كتبت (آرك) مش (آراك) زي ما بعضكم بكتبها..

وآرك|ARK معناها (الفلك) فلك سيدنا نوح عليه السلام.
وَاصْنَعِ الْفُلْكَ بِأَعْيُنِنَا وَوَحْيِنَا

وآرك بالمناسبة مذكّر وليس مؤنث^^

لإنه في القرآن (الفلك) لما تكون جمع بتكون بصيغة المؤنث، مثلا:
وَ الْفُلْكِ الَّتِي تَجْرِي فِي الْبَحْرِ بِمَا يَنفَعُ النَّاسَ.

لكن لما تكون مفردة مش جمع، القرآن بعتبرها مذكّر:
وَآيَةٌ لَّهُمْ أَنَّا حَمَلْنَا ذُرِّيَّتَهُمْ فِي الْفُلْكِ الْمَشْحُونِ وَ خَلَقْنَا لَهُم مِّن مِّثْلِهِ مَا يَرْكَبُونَ

شفتوا كيف؟
الآية الاولى بتحكي عن مجموعة فلك فجاءت مؤنث.
والآية الثانية بتحكي عن فلك سيدنا نوح فقط فجاءت مذكّر ^^
.
.
المهم:

آرك مدين إلكم جدًا!
شكرا لتفاعلكم ولايكاتكم وشيراتكم ودعواتكم..
شكرا لملاحظاتكم وحرصكم وهمّكم..
دائمًا كنت أحمد الله على نعمة وجودكم..

ويا رب نكون 100 ألف أثر ^^

اسمعوا:

بالله عليكم ما تنسوا الناس الغلبانة والمحتاجة..
ما تنسوا إنه إحنا عايشين لفترة محدودة ولازم نعمل أي خير بنصادفه بطريقنا !
ما تحرموا الناس من ابتسامتكم ومن الخير الموجود في قلوبكم..
أحيوا الأمل في قلوب الناس من جديد ..
واحكولهم إنه ربنا راح يقبلكم بمجرد ما قررتوا الرجوع إله..
ادعوا ربنا إنه ينفع فيكم دايما..وإنه يجعلكم مباركين وين ما كنتوا..
سامحوا اللي غلطوا بحقكم..
وجربوا شعور توقفوا بين إيدين ربنا وتدعولهم!
حاولوا تستحضروا معية ربنا بكل تفاصيل يومكم وحياتكم..
وحاولوا ناجوه كل فترة بسرّكم..
احكوله إنكم مع كل معاصيكم وأغلاطكم إلا إنكم بتحبوه..
عاهدوه إنه إيش ما الحياة عملت فيكم ما راح تيأسوا من رحمته !

حاولوا يكون في إشي بينكم وبين ربنا..
إشي ما حد يعرفه عنكم..
جبر خاطر..صدقة سر..دمعة قبل الفجر..وكلمة يارب تطلع من شغاف قلوبكم..

وأهم إشي ..
ما تنسوا حظ روحكم من القرآن <3 !

#ARK
#القرآن_الجميل
#100ألف_أثر

يلا عقبال ما نفرح فيكي !
-----------
بس هي كانت واعية لدرجة إنها ما تعلق آمالها وطموحاتها على وهم !
كل همّها كيف تعيش اللحظة وتبني مستقبلها المشرق بإيدها..
وهذا ما منعها تدعي ربنا ييسر إلها الخير وين ما كان..
كانت مسَلّمِة أمورها لربنا..وبتعرف إنه الدنيا مش كل إشي ..
وإنه مش شرط أي إشي بترغب فيه تحصّلُه ..
في النهاية الدنيا دار بلاء مش دار جزاء ..
وكانت عايشة سلام داخلي مع نفسها الناس بتحسدها عليه..
كانت بتحاول ترسم سعادتها بالإشي الموجود بين إيدها حاليا..
ولإنه عندها قناعة ذاتية إنه ربنا عليم وحكيم ورحيم ما سمحت لكلام الناس يأثر عليها..
.
.
بس والله المجتمع ما برحم !
عاملين فيها الحريصين عليها وكل همهم يسمّعوها حكي ويسمّوا بدنها..
إيش يعني؟ عشان تأخر نصيبها..
ليش لو أجى نصيبها رح تسكتوا؟
ليه مُصرّين إنه النجاح والسعادة في هذا الإشي..
شو بدكم إياها تعمل يعني..
تقوم تلف بالشوارع وتبحث عن شاب جذاب أو عاشق كذاب !
ولّا تقبل بأي حد وتعيش عيشة تندم عليها طول حياتها حتى تصير ناجحة بنظركم ومقاييسكم!
.
.
بس المشكلة لما أقرب الناس إلها وحتى أهلها ينظرولها نظرة المجتمع السطحية..
زمان كانت الناس بتقتل ولادها وبناتها خشية الفقر..

واليوم بتقتلهم بكلامها "خشية " كلام الناس ونظرة المجتمع ..
.
.
يا ناس
ما تقتلوا آمال وطموحات وأحلام بناتكم "خشية" كلام الناس ونظرة المجتمع..
.
.
إِنَّ قَتْلَهُمْ كَانَ خِطْئًا كَبِيرًا !!!

#القرآن_الجميل
#ARK

مما قيل:

لا أحب لك الجلوس تحت شجرة الأحزان مقيدةً إلى همومك تنزفين الألم في صمت وتنسين الحياة الرحبة الفسيحة التي بين يديك!
وهذا طريق لا يستطيع الإنسان فيه السير وحده، ولكنه يمضي متوكئًا على فقره لربه وذلته بين يديه؛ لتغشاه نسمات السكينة وتورق في روحه الحياة من جديد..
وربنا تعالى هو الحي الذي به حياة كل شيء، والقيوم القائم على كل شيء يدبره ويكلؤه..
وهو المقيت الذي يعطي كل مخلوق قُوته. فلو أقات قلبكِ قوت السكينة والسعادة، وأقامه من رماد همه حيًا وافر البهجة، فإن هذا هو النعيم العاجل!
والذي قبض روح هذا يحيي روح ذاك، ولعل ما التفتنا إليه بأعين ملأى بالدمع لو حصَّلناه وظفرنا به لبكينا منه وضاقت نفوسنا به.
.
.
.
.

ونظرا لإنه وصلت أسئلة كثيرة متعلقة بهذا الموضوع..
بنصحكم بحلقة بعنوان (تأخر الزواج) لمصطفى حسني على اليوتيوب

- أنا مسؤول في فريق تطوعي..أنا بنت ملتزمة جدّا والناس بتستشيرني بأغلاطها..أنا بدرّس في دور قرآن..أنا قائد في الجامعة...أنا الناس كلها بتظن فيي ظن خير...
أنا وانا ....
بــــــــــــس شهوتنا بتغلبنا!
لدرجة إنه أحيانا ما بنشعر بتأنيب الضمير أصلا..
------------
- هارجارد: قائد اجتماعي يشتهر بمحاربته لحقوق الشواذ وضبط وهو يمارس أفعالهم المشينة !
- سبيتزر: الحاكم والمدعي العام في مدينة نيويورك والذي حارب الفساد بلا رحمة، واتضح أنه عميل منتظم في شبكة للتجارة غير شرعية.
- إداواردز: مرشح رئاسي ديمقراطي خاسر بنى حملته على قوة قيمة العائلة، بينما كان يخون زوجته والتي كانت تصارع السرطان !
.......... الخ .
-----------
هاي الأسئلة والقصص بتقودنا لنقطة مهمة جدا وهي:
إنه مش دائما بنستسلم للشهوات لإنه فقدنا السيطرة عليها وما امتلكنا قوة إرادة، لا لا،
في كثير من الاحيان إحنا بنعطي لحالنا الإذن إنه نغلط ونوقع في الشهوات..

وهذا يطلق عليه " بالرخصة الأخلاقية " يعني لما تعمل إشي منيح بتصير أكثر ثقة بنوازعك، وبالتالي بتسمح لنفسك تعمل اشي غلط !

كثير من أعمال الخير اللي بنعملها بتعمينا عن قرارات شريرة في حق أنفسنا راح نتخذها !
فمثلا: الأشخاص اللي بتذكروا مناسبة من المناسبات تبرعوا فيها بكرم، هم أقل بنسبة 60% من الأشخاص اللي ما تذكروا ماضيهم في عمل الخير!
الأشخاص اللي بكون عندهم مجرد نية بالتبرع، بتزيد عندهم الرغبة في مكافاة أنفسهم لما يتسوقوا !

ومش القصد هون لا سمح الله الاساءة للأشخاص اللي وقعوا في هذا الفخ، لكن القصد إنه يتم تنبيههم إنه في فرق بين إنه الشهوة تغلبك بعد محاولاتك وحرصك إنك تتغلب عليها، وبين إنك إنت تتوجه إلها كمكآفاة لنفسك عشان خير قدمته!
وإنه الخير لازم يقودك لخير ثاني، مش يقودك لتبرر لنفسك الغلط.
-----------
وسبحان الله ما أجمل دعاء سيدنا موسى عليه السلام بعد ما قدم خير للبنتين في مدين وسقى إلهم.

لما استراح دعا بدعاء مذهل ومدهش:
ربِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ
.
.
يا رب مع هالخير اللي منحنتني إياه إلا إني مفتقر إلك..
ومفتقر لأعمال خير ثانية تيسّرها إلي !

#القرآن_الجميل
#ARK
#كتاب_شهوة

رابط الكتاب PDF

https://drive.google.com/file/d/1FABhtD8m2u-vRT8dYR1d523iRMgQegpv/view?fbclid=IwAR1Z8XwT7mMmOSqeY7gkDcchxAkomK_o6SAzQth0_YCeUcHLAjJf_hqE5QI

مرة إمي وأبوي اختلفوا بشغلة في البيت..
وأنا كنت بفزّع بينهم وعامل فيها الإبن المرضي والعاقل.. ^^

المهم وفي خضم النقاش وتعالي الأصوات اللي عبّت الحارة.. إلا إمي بتحكيلي:
يعني أبوك هو هو...مفكرني متأملة يتغيّر بعد هالعمر؟؟
شو مستني منه وهو بعد أكم يوم من زواجنا صلّى فيي صلاة العشا وقرأ:

يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَرُوهُمْ

امي وقتها صفنت بنص الصلاة إنه بسم الله ماله؟ ههه
.
.
المهم رحت على أبوي وقلتله: قال يابا هالقصة صح؟
يعني سبحان الله من بين 6236 آية في القرآن ما لقيت إلا هالآية؟
طيب وين (وجعل بينكم مودة ورحمة) وين (لتسكنوا إليها) ؟؟

طبعًا وقتها أبوي صفن فيي صفنة غريبة فهمت منها:
حلّ عني إنت وإمك!
وفجأة خطرلي إنه الآية كمان بتحكي (وأولادكم!)
ييييي يعني هو كمان شايفني عدو زي إمي!!

وبلحظة مرّ شريط عمري وقدرت أستوعب ليه أبوي بجحرني من فترة لفترة، وليه بحملني مسؤولية كل خبر عاجل عالجزيرة! وليه دائمًا مُصرّ إني أحد أسباب تخلف النصر!
---------------

رجعت للتفاسير حتى أفهم شو معنى هالآية؟
وكيف أوفّق بينها وبين آيات المودة والرحمة والسكينة..

المهم..
طلع معنى الآية إنه أحيانا أقرب الناس للشخص ممكن يكونوا أعداء إله.
حتى الأزواج والأولاد..

لإنه أحيانا الأهل ممكن يثنوا الشخص عن أعمال خير كان ممكن يعملها..
زي إنه يتصدق أو يجاهد ويهاجر في سبيل الله..

والآية بتحكي (من) مش (كل) أزواجكم وأولادكم!
---------------
رجعت لأبوي وقلتله يابا ترى الآية معناها هيك هيك..
وإنت شكلك فاهم خطأ..
وحاولت قدر الإمكان انتقي عباراتي بشكل أبين فيه حدا فهمان وواعي ومثقف ومش أحد أسباب تخلف النصر زي ما هو شايفني.. ")

وقلتله يابا ترى إحنا مش مانعينك من الصدقة ولا مانعينك من الجهاد في سبيل الله!
عادي والله تصدق وجاهد براحتك ^^
كمان يا سيدي لو سلمنا إنه إحنا أعداء إلك شوف تكملة الآية شو بتحكي:
يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَرُوهُمْ ۚ وَإِن تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَّحِيمٌ

شفت كيف؟
إحنا مش أعداء والله..
صح يمّة إحنا مش إعداء؟

آه آه مش أعداء!

صفن فينا وقال:
طيب خلص اسكتوا وجعتوا راسي!
------------
.
.
مش قلتلك أبوك هو هو بحياته ما رح يتغير!
:)

#القرآن_الجميل
#ARK

احكيلي مالك؟
بشو حاس؟
------
لو طلبت منك الآن توصفلي مشاعرك فغالبًا رح توصفلي مشاعرك اللحظية اللي بتمّر فيها وبتعيشها..
وكل واحد رح يعبّر حسب الظرف والحالة اللي بعيشها مؤخرًا..

بس لو طلبت منك توصفلي مشاعرك بشكل عام؟
يعني من غير انفعالات اللحظة الراهنة..
هون رح يصير الموضوع أصعب بكثير..

يعني هي عبارة عن مجموعة من الأفكار والذكريات والمشاعر والحوارات بينك وبين نفسك، وبتتفاوت بين عمقها وسذاجتها..
وقي كل مرة مشاعر مختلفة والموضوع أشبه بأمواج متلاطمة في داخلك..
"سعادة..حب..أمل..يأس..إحباط..اكتئاب..حزن..دموع..خوف..إلخ"
.
.
تخيّل مقدار الراحة النفسية لما تتوجه كل هالمشاعر على اختلافها نحو غاية واحدة!
وما يحرّك دفتها إلا سبب واحد..؟

لما ما يوقف ورا حزنك وفرحك، وحبك وكرهك، ترددك وثقتك، تفاؤلك وقلقك، ملَلَك وحماسك، إلا سبب واحد وهو:
(الله) !
.
.
في المقابل كم رح يزيد مقدار تعاستك وتشتتك وضياعك وتمزقك فيما لو كانت دوافع مشاعرك مختلفة والغايات متعددة!

القرآن دائماً بذكرنا بالراحة النفسية المترتبة على عبادة إله واحد..
وزي ما بنحرص ما نشرك مع ربنا في عبادته أحد..
لازم كمان نحرص ما نشرك في دوافعنا وغاياتنا ومشاعرنا أحد..!

أَأَرْبَابٌ مُتَفَرِّقُونَ خَيْرٌ أَمِ اللَّهُ الْوَاحِدُ الْقَهَّارُ ؟!
.
.
.
بل الله الواحد القهار!

#القرآن_الجميل
#ARK
.

"جلنار" بنت جامعية عادية زيها زي غيرها..
بتعيش حياة سعيدة ومستقرة نوعًا ما..
ومعظم الناس بقدروها وبحترموها وبكونوا سعيدين بصحبتها..

فجأة!
جلنار وقعت بغلط كبييير..
وهذا الغلط للأسف قلب حياتها تمامًا من حياة الإستقرار والسعادة إلى حياة الشقاء والتعاسة..
وخسرت احترام وتقدير الناس إلها لدرجة إنها فكرت بالإنتحار..
ودايماً بتسأل ربنا الموت لإنها شايفه فيه راحتها وخلاصها!
***
((ملاحظة))
خطأ جلنار كبييير ومستهجن إنه حد زيها يوقع فيه..
وهي بحالها ندمانة وبتتمنى لو ما صار..
لكنه خطأ مش نابع من شرّ كامن فيها.. "لإنها حد مش سيء أو شرير"
يعني خطأ كان نتيجة "إساءة تقدير" أو "زلة في تقدير العواطف والإنفعالات" ..
بنقدر نسميه "كبوة" أو "زلة"..
***
((معلومة))
قصة جلنار نموذج مصغّر جداً من فن كبير اسمه: "فن التراجيديا"!
فكرة هذا الفن إنه بينقل إلنا قصص ومسرحيات بتتناول حياة ناس عادية -زينا زيها- وقعت بخطأ وكانت نتيجته إنقلاب حياتها رأساً على عقب..

وهذا الفن بشترط شروط في صياغة القصة أو المسرحية وبينّها أرسطو وهي باختصار:
- شخصية "البطل"..
وشرط يكون عادي وبمستوى أخلاقي قريب من الجمهور أو القراء، يعني إنسان سهل نلاقي نفسنا فيه بدون أي مشقة.

- ارتكاب خطأ لكن شرط إنه يكون مش نابع من شر كامن فيه وزي ما ذكرت هو أشبه بزلة وإساءة تقدير.

- الحياة للبطل بعد هذا الخطأ عبارة عن شقاء وتعاسة وحسرة وندامة.
***
((معلومة 2))
الهدف من هذا الفن إنه يمد جسور ما بين المذنب وما بين الناس اللي بتدّعي إنها مبرأة من هذا الذنب..
وبنفس الوقت بعلّمنا إنه الناس اللي وقعت بخطأ يفترض نعطف عليها ونصغي إلها وما نتسرع في إطلاق الأحكام عليها..

وبعلمنا التواضع بشأن قدراتنا على تجنب الأخطاء والذنوب والكوارث اللي ممكن تصيبنا، وإنه الموضوع مش بشطارتنا وإنه لو كنا محلهم كان ممكن نوقع بنفس هذا الخطأ..لإنهم في النهاية ناس زينا زيهم وفي كثير شغلات مشتركة بيننا وبينهم..

وهذا خلّى الناس تغادر المسرح أو تغلق القصة وهي معرضة تماماً عن التحدث بنبرة تعالي وسخرية وشماتة بالناس اللي وقعت بأغلاط..
وكانت تستبدلها بتعاطف وشفقة وسؤال: كيف ممكن نساعدهم؟
***
((الخلاصة))
ما في داعي نعرف عن فن التراجيديا حتى نغيّر نظرتنا اتجاه الناس المذنبين اللي ما أحوجهم لدعواتنا وكلامنا حتى ينتشلهم من الحالة اللي صاروا فيها..

القرآن قدّم العزاء للمذنبين في سياقات كثيرة..
وسنة النبي صلى الله عليه وسلم بتعلّمنا كيف نتعامل مع المخطئين والمذنبين..
وكيف لازم بدل ما نشمَت أو نشهّر أو نسخر منهم؛ نسأل ربنا العون والتوبة إلهم..
والثبات والسلامة إلنا..!
.
.
- {إِنَّ اللَّهَ لَا يَغْفِرُ أَن يُشْرَكَ بِهِ وَيَغْفِرُ مَا دُونَ ذَٰلِكَ لِمَن يَشَاءُ ۚ وَمَن يُشْرِكْ بِاللَّهِ فَقَدِ افْتَرَىٰ إِثْمًا عَظِيمًا}

- {وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللَّهَ يَجِدِ اللَّهَ غَفُورًا رَّحِيمًا}

- {وَلَوْ أَنَّهُمْ إِذ ظَّلَمُوا أَنفُسَهُمْ جَاءُوكَ فَاسْتَغْفَرُوا اللَّهَ وَاسْتَغْفَرَ لَهُمُ الرَّسُولُ لَوَجَدُوا اللَّهَ تَوَّابًا رَّحِيمًا}

- ﴿ فَمَنْ تَابَ مِنْ بَعْدِ ظُلْمِهِ وَأَصْلَحَ فَإِنَّ اللَّهَ يَتُوبُ عَلَيْهِ إِنَّ اللَّهَ غَفُورٌ رَحِيمٌ ﴾

- ﴿ وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُلْ سَلَامٌ عَلَيْكُمْ كَتَبَ رَبُّكُمْ عَلَى نَفْسِهِ الرَّحْمَةَ أَنَّهُ مَنْ عَمِلَ مِنْكُمْ سُوءًا بِجَهَالَةٍ ثُمَّ تَابَ مِنْ بَعْدِهِ وَأَصْلَحَ فَأَنَّهُ غَفُورٌ رَحِيمٌ ﴾

- ارحموا تُرحموا، واغفروا يغفر الله لكم !

#القرآن_الجميل
#ARK

خلينا نفترض إنه رئاسة الجامعة قررت تستبدل (برج الساعة) في الجامعة الأردنية بتمثال منحوت على صورتك وملامحك.
وتكريمًا لجهودك العظيمة والجبارة ما في كلية إلا ومعلّق فيها صورة إلك..
ومدرج الحسن غيروا اسمه لإسمك، وكمان مدرج سمير الرفاعي لعيونك..
ولإنك حد مش قليل أضافوا مادة اجبارية عكل طالب بتتناول سيرتك العطرة..
وهوية الطلاب بتزمّر عالأبواب كلمة من كلامتك بصوتك الشذي والعذب..

وفي سجاد أحمر إلك خصيصا في اللحظة اللي بتقرر فيها تدخل الجامعة..
وفي أمن جامعي بحيط فيك حتى يحميك من المعجبين والمعجبات اللي يحرام في منهم ممكن يغمى عليه بطلتك البهية ووجهك المشرق!

والأغاني اللي بتصدح بالتمجيد إلك وذكر مناقبك بتشتغل بلحظة دخولك..
وأحيانا في كل أوقات الدوام..
.
.
طيّب..وبعدين؟
مبسوط؟
اوك ماشي الكل عرفك وإنت حدا مشهور والكل بعشقك وبموت فيك وبتمنى يصير زيك..
وبعدين؟
*
في الحقيقة (وبعدين) ولا إشي!
الناس مهما حبت شخص وقدّرته بظل إلها حياتها الخاصة وهمومها وأوجاها والآمها اللي بتشغلها عن هذا الشخص..
وأكيد ما رح تتقلب في فراشها وهي بتفكر فيه لإنه اللي فيها مكفيها..

والسؤال:
لو كل الكرة الأرضية اجمعت على حبك واتفقت عليك..
شو ممكن يفيدوك؟
بقدروا يضيفوا لعمرك دقيقة؟ أو يردوا عليك صحتك بعد ما تفقدها؟
بقدروا يدخلوك الجنة؟ أو يحرموا وجهك عن النار؟

الجواب للأسف: لأ.
*
أغلبنا بحب يكون محط أنظار الناس واهتمامها..
وكلنا مفطورين على حب التقدير وكلمة شكرًا من الناس إلنا..
لكن الغلط لما يصير المحرك لأفعالنا وتصرفاتنا وأقوالنا الناس ونظرتهم إلنا..

ومهما يا صديقي بلغت من الشهرة صدّقني الناس رح تنسى..
ولما تموت قلة قليلة رح تتذكرك..
وممكن يتذكروك بعد سنة ويعملوا إلك حفل تأبين وبعدها رح يمضي كل واحد فيهم لحياته..
.
.
شفت كيف فش إشي مستاهل؟
شفت كيف محاولاتك وحرصك عالشهرة مجرد فكرة بائسة رح تعيّشك برعب وقلق وتوتر وضياع حتى لحظة موتك!

***
قالوا قديمًا:
لمصانعة وجه واحد (يعني وجه الله)
تكفك كل الوجوه!
.
.

#ARK

كثير من المشاكل اللي بنمر فيها بتتعقد وبتزداد سوء بسبب عدم مقدرتنا على إنهائها بطريقة سليمة، وهذا بدفعنا لمشاعر القلق والغضب والكره والحقد وبزداد حالنا سوء مع الوقت.

القرآن وبلفتة مدهشة بدفعنا نعالج هالمشكلات اللي بنمر فيها بـــ (الجَمَال)!
وبطلب منّا نتعامل مع هالمشكالات وننهيها بشكل (جميل) عشان نحط حد لكل المشاعر السلبية والمؤذية اللي ممكن نتعرض إلها لاحقًا.
وهذا بخلينا نواصل حياتنا بنفس جديد وبتحرر تام من كل أذى تعرضنا إله سابقًا.

- فَاصْفَحِ الصَّفْحَ الْجَمِيلَ
- وَأُسَرِّحْكُنَّ سَرَاحًا جَمِيلًا
- وَاهْجُرْهُمْ هَجْرًا جَمِيلًا
- فَصَبْرٌ جَمِيلٌ
.
.
.
القرآن يأمرنا:
بالنهايات الجميلة <3 !

#القرآن_الجميل
#ARK

- بتتذكر لما استيأست وبكيت من كل قلبك..؟
وكنت تتمنى يكون هداك اليوم آخر يوم بحياتك..!
لما صرت تحكيلي معقول رح ييجي يوم أرجع أبتسم فيه عادي؟
لما رمقتني بنظرات تكذيب لما كنت أواسي فيك وأذكرك بلطف ربنا ورحمته..
هيها انتهت هديك الأيام يا صاحبي !
أوعدني ما تنسى..

-تتذكر لما مرة كنا بنحكي عن ستر ربنا؟
وإنه كيف ربنا ستر علينا كثير وكثير..
وكيف لو انكشف ستره عنا كانت رح تستحيل حياتنا لخجل وعار وعذاب!
أوعدني ما تنسى..

- تتذكر لما كنت معصب عشان ما استجابلك ربنا هديك الدعوة..
وقتها لما صرت تتأسف وتستغفر عشانك حكيت بشكل عفوي:معقول الله ما بسمعنا؟!
تتذكر بعدها بفترة لما أجيت عليّ تحكيلي: ربنا بسمعنا وبختار الخير إلنا كمان..الحمدلله ما استجابلي !
اوعدني ما تنسى..

- تتذكر لما الناس كانت بتركض علينا بعد الحادث..
كلهم فكرونا ميتين لما شافوا السيارة..
وكلهم انصدموا لما شافونا عايشين..
وقتها ربنا منحنا فرصة نحكيله فيها عن كثير شغلات: آسف..
اوعدني ما تنسى..
-------------
أوعدني تكون عادل ومنصف وشاكر وحافظ لجميل صنع ربنا فيك..
أوعدني ما تكون صاحب ذاكرة متحيزة ناقمة ما بِعلَق فيها إلا كل ألم وحزن، في الوقت اللي بتطرد فيه كل إشي لطيف..!
أوعدني ما تنسى رحمة ربنا المختبئة بكل وجع ومصيبة.
أوعدني تسمع منيح لصوت العبرة المصاحب لأصوات عبراتنا..
ولصوت البشرى بعد دموعنا وآهاتنا..
.
.
وَإِذَا أَذَقْنَا النَّاسَ رَحْمَةً فَرِحُوا بِهَا وَإِنْ تُصِبْهُمْ سَيِّئَةٌ بِمَا قَدَّمَتْ أَيْدِيهِمْ إِذَا هُمْ يَقْنَطُونَ

أوعدني ما تقنط..
وأوعدني ما تنسى!

#القرآن_الجميل
#ARK

#كتاب_شبهة
تساؤلات الشباب عن الله والدين والشر
تأليف: #ARK #حسن_باشا

وأخيرًا أصبح متوفرًا بصيغة PDF

قراءة ممتعة :D

https://drive.google.com/file/d/12hc0OpsEWWjDR077Noih9yjVmfKuh5TG/view