هي يحرام بكل سنة بتتعلق بأحلام جديدة!
ومع كل سنة صارت تتراكم هالأحلام جواتها..
وهي للأسف ربطت سعادتها بتحقيقها..
عشان هيك سنة عن سنة بزيد وجعها وشتاتها وضياعها..
مع كل سنة جديدة بتفقد بوصلتها..
بتنحرف تدريجيّا عن مسارها..
بتتنازل عن شيء من مبادئها..

والخاسر الأكبر: قلبها !
.
.
هي ما بتعرف إنه السعادة مش شرط تكون في الأحلام اللي رسمتها..
وإنه خيالها بغبّش عليها الصورة وبفرض عليها تعتقد كمال وصحة أحلامها..
هي ما بتعرف إنه لو تحقق هالحلم رح تكتشف إنه مش حلمها الحقيقي..
مش هدفها المنشود..
مش نفس الإشي اللي رسمته ببالها..

رح تكتشف إنه أحلامها كانت مجرد حجة لفراغها واكتائبها..
مجرد اختراع من هواها وحنينها..

هي ما بتعرف إنه أحيانًا عدم تحقيق أحلامنا أقل خيبة لآمالنا فيما لو تحققت !

-------------
بليلة شتوية باردة..
كانت صافنة بالسقف بتفكر كالعادة في أحلامها للسنة الجديدة..
وفجأة إشي دفعها تبث كل إشي جواتها للسما..
طوّلت وهي ساجدة..
يا الله شو حكت..!
حكت كثير كثير وما خلّت إشي بقلبها..

كانت صادقة فعلًا في طلب المساعدة من ربنا..

شعرت إنه كل أمنية من أمنياتها وكل حلم من أحلامها طلع من قلبها للسما..
والسما رتبتها وعدلتها وصاغتها وقلّمتها وشذبتها ورجعتها على أطهر حال !

كان رايح من بالها إنه الأحلام إذا تأخرت بقلوبنا بتفسد..
وسنة عن سنة بتشوبها شوائب، وبتتراكم عليها غبار من الأنانية والحسد والملل واليأس..

-----------
شلال من نور هطل عليها..
دثار دافي أحاط بروحها..
وميض من ضوء سافر بعروقها..
ملك من السما تسلل لروحها وحضنها..
ابتسامة رضا ارتسمت على وجهها..

وقررت تخوض غمار سنة جديدة..
لكن هالمرة وهي مستمسكة بمبادئها..
وهي مستسلمة لأوامر ربها..
والوحي معيّار أحلامها..

والرابح الأكبر: قلبها !

#ARK

- أنا روحي فرفطت منكم!
خلص بطلّت أقدر أتحمل..
لو أبيع على عرباية ترمس أشرفلي..
وبكل مرة صوتي بروح وأنا بس بقلكم أقعدوا وما تشاغبوا !!

وإنت يا محمود قرب يخلص المركز وإنت لسه مش مسمّع سورة "البينة" !!

* شيخ والله صعبة..

- ولك لسانك شبرين وما بتوقف برم طول الوقت وعند التسميع بتصير مش عارف تحكي!!

وإنت يا يحيى قال سبيت على خالد امبارح؟؟

* شيخ والله ما سبيت..
شيخ تردش عليه والله إنه كذاب...كمان هو حكى واللط مش والله !!

- يحيى حكيت والله ولا واللط؟؟!
أنا كم مرة قلتلكم المؤمن ما بكذب ولا بسب ولا بحلف أيمان مش صادق..
وحتى لو حكيت واللط ربنا عارف شو جوا قلبك يا يحيى..!

* شيخ خلص أنا آسف..

- والله إني تعبت معكم!
المشكلة أهاليكم مش قادرين عليكم حتى أقدر أنا..
همّه أصلا ببعتوكم عالمركز عشان يخلصوا منكم..
وأنا حاس حالي من كثر ما بتعصبوني وبتخلوني أتنرفز إني بكسب إثم مش أجر معكم..

كمان حاب أقلكم فش رحل من هون ورايح..
عشان فضايحكم بآخر رحلة بترموا الوسخ من الشباك..وفي المسبح بتمزحوا مزح ثقيل..
وأنا منبهكم ستين ألف مرة ما تمزحوا بالمي..
مش ناقصني حد فيكم يغرق ويموت وأنا أتحمل مسؤوليته !!

* شيخ خلص مالك معصب اليوم؟؟
ابتسم يا شيخ الإبتسامة صدقة..
آه آه شيخ ابتسم..
كمان شيخ إنت نفسك بتخربط بسورة البينة..ههههه
والله بنحبك شيخ بس بالله عليك ما تحرمنا من الرحل..
يا شيخ ياااااا
والله غير نسمّع قرآن وإذا بدك كمان بنّظف المركز..

- هههه تمام خلص رح أعطيكم آخر فرصة..
وهو بيني وبينكم سورة البينة جد صعبة..ههه

* أحلى زقفة للشيخ..
ايىىىى ايىىىىىى

- خلص صوتك إنت واياه..
أنا والله بعصب عليكم من حرصي..
أنا بحبكم.. جد بحبكم يا طيوري ! (كان بحب يناديهم يا طيوري)..
ونفسي تكبروا وتكونوا أحسن شباب بالدنيا..
بشد عليكم لإني بحب تطلعوا رجال..
الناس لما تشوفكم تحترمكم وتدعيلكم وتقول شوفوا المراكز كيف بتخرّج رجال !
ما بحب تسميه أولاد المراكز لإنه المراكز ما بطلّع إلا رجال..
بحب أشوف فيكم صحابة الرسول اللي ياما حكينا عنهم..
الله يرضى عنهم..
وعنكم..

وأنا لما أنبهكم في الرحل ما تمزحوا مزح ثقيل ولا تطلع روسكم من الشبابيك..
لإني جد بخاف عليكم..
بتعرفوا لو صار بحد فيكم إشي والله غير أموت من حسرتي !

بعيد الشر يا ربي..
بعيد الشر !!
------------------------

بعد سنوات طويلة شاءت الأقدار يلتقي هالشيخ مع طلابه..
يا الله شو كبرانين !
صايرين رجال..

هجموا عليه يحضنوه ويشكروه عكل لحظة في طفولتهم..
خبروه إنهم لهسا مش ناسيين نصائحه وملاحظاته..
مش ناسيين قصص الصحابة اللي كانت تلهب حماسهم وشغفهم..
والقرآن اللي حفظّهم اياه من وقتها بصلوا فيه صلواتهم..
خبروه إنهم ممكن يضعفوا ويقصروا ويبعدوا لكن حب الله ورسوله حاضر في قلوبهم..
.
.
بكى شيخهم لما شافهم..
ونسي كل لحظة تعب وصراخ وعصبية ونرفزة معهم..
بكى لما شاف طيوره كبرت وصارت رجال بتسكن في قلوبها محبة الله ورسوله..

وكمل طريقه وهو بدعيلهم وبتمتم:
رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ

#القرآن_الجميل
#ARK

هُسسسسسسسس !

اسمع:

وَلَهُ مَا سَكَنَ فِي اللَّيْلِ وَالنَّهَارِ ۚ وَهُوَ السَّمِيعُ الْعَلِيمُ !
.
.
.
القرآن بحكيلك إنه ربنا أحاط بالأشياء الساكنة الخفيّة الصغيرة في الليل والنهار..
يعني مثلاً:
صوت المطر على شباك غرفتك..
دبيب أقدام النمل في صحراء سينا..
حفيف أوراق الشجر في غابة مهملة على حدود سيبيريا..
رفرفة فراشة على جبال البرازيل..
صوت غراب على شجرة في الجامعة..
.
.
.
هذا الإله اللي أحاط بكل هالأشياء الساكنة..

رح يغيب عنه وجعك وألمك وحزنك ودموعك...
وكلمة يا رب اللي حكيتها على لسانك في جوف الليل أو في وضَح النهار ؟!!

#القرآن_الجميل
#ARK

في الغالب إنت حالياً مش راضي عن نفسك..
في مشاكل كثيرة بحياتك..
دراستك أو شغلك مش ولا بد..
في ذنب مش قادر تتخلص منه..
علاقتك مع ربنا في تراجع مستمر !

****
أجريت على مجموعة من الفئران تجارب لقياس حافزهم للعيش تحت ظل ظروف مختلفة. أسقط العلماء فأرًا في وعاء مملوء بالماء ووضعوه في ظلام دامس وقاسوا الفترة التي سيواصل فيها الفأر السباحة قبل أن يستسلم ويترك نفسه للغرق. ووجدوا أنه عادة مالا يستمر الفأر أكثر من 3 دقائق.

ثم ألقوا بفأر آخر في نفس نوعية الوعاء لكن عوضاً عن وضعه في ظلام دامس سمحوا بشعاع من الضوء يسطع عليه، تحت ظل هذه الظروف، واصل الفأر السباحة لمدة 36 ساعة. وهذا يعني أكثر من 700 مرة أطول من الفأر الذي أبقوا عليه في الظلام.
لإن الفأر كان بوسعه أن يرى، واستمر لديه الأمل !

***

الفكرة إنه مهما كانت ظروفك قاسية وصعبة ودائماً ما يساورك شعور الضعف في مواجهة واقعك وظروفك بل وحتى شهواتك ورغباتك..
لازم ما تتخلى عن فكرة الضوء "النور" في حياتك حتى ما تستسلم للغرق !

هذا النور أو الأمل ممكن تتحصل عليه بلحظة صدق بينك وبين ربنا..
إنك مثلاً تتصدق أو تصلي ركعتين بالليل تشكو فيهم ضعفك وقلة حيلك..
إنك تقرر تعمل خير بكرا أو تقرر تقرأ أذكار المساء قبل نومك..
إنك تلازم التوبة حتى لو بكل مرة بترجع لنفس الغلط..

إنك تقرأ القرآن بنية إنه ربنا يقذف نوره في صدرك ويحيي الأمل في قلبك..!
إنك تمر على آيات الرحمة وتستحضر رحمته وآيات القدرة وتستحضر قدرته وآيات العفو والصفح والمغفرة وتنهيها بكلمة: يا رب !
***

هذا النور اللي فقدته من مدة..
بلحظة صدق رح يتجلى أمامك وينقذك من الغرق بعد ما كنت على وشك الإستسلام إله..
ورح يخليك تستأنف صراع كنت مقرر تنسحب منه..
.
.
وَلَقَدْ أَنزَلْنَا إِلَيْكُمْ آيَاتٍ مُبَيِّنَاتٍ وَمَثَلاً مِنْ الَّذِينَ خَلَوْا مِنْ قَبْلِكُمْ وَمَوْعِظَةً لِلْمُتَّقِينَ (34) اللَّهُ نُورُ السَّمَوَاتِ وَالأَرْضِ مَثَلُ نُورِهِ كَمِشْكَاةٍ فِيهَا مِصْبَاحٌ الْمِصْبَاحُ فِي زُجَاجَةٍ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِنْ شَجَرَةٍ مُبَارَكَةٍ زَيْتُونِةٍ لا شَرْقِيَّةٍ وَلا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ نُورٌ عَلَى نُورٍ يَهْدِي اللَّهُ لِنُورِهِ مَنْ يَشَاءُ وَيَضْرِبُ اللَّهُ الأَمْثَالَ لِلنَّاسِ وَاللَّهُ بِكُلِّ شَيْءٍ عَلِيمٌ (35)

سورة "النـــــور" <3

#القرآن_الجميل
#ARK

كانت بتغلبه شهواته وذنوبه بكل ليلة تقريبًا!
وكالعادة بندم وبقول خلص هالمرة أكيد آخر مرة...

امبارح كان على وشك يوقع لكن أذان الفجر الأول منعه..
خجل إنه يذنب مع صوت الأذان اللي كان ببذل جهده يتناساه ويعمل حاله مش سامعه..
لكن نداء ربنا اخترق أسماعه وكان أقوى من كل جهوده ومحاولاته..

هالليلة ما بدي أغلط!
ليه بكل ليلة بحكي بكرا ما بدي أغلط؟
ليه ما أقرر من نفس الليلة..؟
بعرف إنه ممكن لاحقًا أضعف..
بس أقلّها أحكي: لأ ولو لمرة..
أثبت لنفسي فيها إني لسه بمتلك إرادة..
ومع الوقت ممكن تتجاوز الـ (لأ) لحظات استسلامي..
وممكن بكل مرة أحكي فيها (لأ)، ربنا يشوف صدقي وحرصي ويساعدني..
خلص معناته الليلة: لأ !
---------------------
في الطريق لصلاة الفجر، باغته شخص قوي البنية من وراه وخنقه!
حاول صاحبنا يصرّخ ويستغيث لكن للأسف ما حد سمعه..
استجمع قوته وانفلت من قبضة خصمه وضربه ضربة قوية وأسقطه عالأرض..
كان الظلام دامس، ما قدر يبصر ملامح عدوه لكنه سمع صوت حشرجته وغضبه..
قام عدوه من الأرض وركض اتجاهه..
تهيأ صاحبنا حتى يدافع عن نفسه بالرغم من شدة بأس خصمه وقوة عزيمته..
كان بقدر ينسحب ويرجع عبيته ويختصر هذا الصراع والنزاع..
حاول خصمه يساومه وحكاله لو بتروح ما رح أأذيك ولا أضرك!
لكن صاحبنا ما هانت عليه رجولته..
وكان مستعد يموت ولا إنه يظهر بمظهر الضعيف والمستسلم.
فقله: لأ!
وضربه ضربة قوية وكمّل طريقه من غير ما يلتفت وهو بردد:
لأ !
الليلة: لأ
---------------------
لأ وحدة كانت كفيلة بجرّ (لاءات) كثيرة بعدها..
صاحبنا بشَـر وكانت تمر عليه لحظات يضعف فيها..
وكانت تمر أيام تكون فيها الغلبة لعدوه وخصمه وشيطانه!
لكن مع كل (لأ) كان يثبت فيها لربنا صدقه وإخلاصه..
مع كل (لأ) كان يستأنف صراع كان مفكر حاله مش قده..
مع كل (لأ) كان تزيد ثقته بنفسه ويقينه برحمة ربنا ولطفه..
----------------------
مع الأيام صار نادرًا ما يصادف عدوه القديم..
آخر مرة شافه فيها كان هزيل وضعيف من غير شدة بأس وقوة عزيمة!

كان يصادف بالطريق شخص آخر..
شخص بختلف تمامًا عن عدوه وخصمه القديم..
كان يستقبله بوجه سمح وابتسامة مشرقة..

ما خنقه ولا أذاه ولا ضرّه..
ابتسم بوجهه وقله:

يا من عدى ثم اعتدى ثم اقترف
ثم انتهى ثم ارعوى ثم اعترف
أبشر بقول الله في آياته:
إِن يَنتَهُوا يُغْفَرْ لَهُم مَّا قَدْ سَلَفَ ~

#القرآن_الجميل
#ARK

كل ما أتعب وأفقد الأمل من نفسي كنت الجأ إله..
كان بكل مرة يكفكف دمعي ويستحث همتي ويلملم جراحي..
وما أكثر جراحي..!
.
.
بادرني قائلًا:
- وهل تحسب أن حياتي كانت طريقا قاصدا، كلا، يا فتى..
لقد ساومني قومي، وحين أعيتهم مساومتهم إيّاي آذوني. هزأ بي صناديد قريش. فتنوني وأغروا بي الأوغاد. أما ثقيف فقد أرسلت إليّ بسفهائها يرمونني بالحجارة..!
أخرجوني من قريتي وتعقّبوني ليقتلونني.
نمت بالمدينة على الطوى، وأدمى بي الحصير، وهزأ بي الكفّار، وتآمر عليّ المنافقون وتكالب عليّ المشركون..
وأنا لا حول لي ولا قوة..!!

أي نعم، في جسمي ندوب جراح، وفي قلبي آهات وحسرات!

* إنت؟؟ إنت يا رسول الله آذوك وجرحوك ووجعوك؟!
إنت يا حبيب الله؟؟!!
لحظتها بكيت..!

- نعم يا فتى، وهل تحسب الهجرة في الله سفرًا قاصدا؟ بل هي معاناة. بل هي كدح وجهاد.

* بس أنا ضعيف يا رسول الله..
ما عندي قوة أقارع الجبابرة، وما بقوى على حمل الامانة..
أنا أضعف من حملها..

- لن تحبني حقّا حتى أكون أحب إليك من نفسك ومما قد يدعو إليه هواك.

* بس أنا بحبك!

- ولكنك تحب الدنيا أيضا، وتحب نفسك أكثر مما تحبني، فأنت لا تريد أن تمسك بالجمرة..

* بس بتوجّع!

- ولكنها الجمرة التي حملها ويحملها ذوو العزم من الرجال والنساء لتنير يومًا، لتنير السبيل..

* رح أقدر أحملها؟ وأنا أنا؟؟
بكل أغلاطي وآثامي وذنوبي؟

- أوَلم تعِ ما قاله تعالى:
إِنَّ الْحَسَنَاتِ يُذْهِبْنَ السَّيِّئَاتِ ۚ

* حافظها للآية وبعرفها..

- لكنك لم تفهمها ولم تدرك قصدها..
اسمع..
لا تنظر إليّ كشخص من شخوص التاريخ. أريدك أن تنظر إليّ كنور ينبعث من فؤادك، وحينها ستحبني أكثر مما تحب نفسك، لإن حبك لي هو ارتقاء بك، هو انتشال لك من أوحال النفس والهوى، هو زجّ بك في بحار الفضل..

* والله إني بحبك!

- تجرّد من حطام الدنيا، لا بدّ أن تهاجر إلى الله يا فتى.
لا فتح من غير هجرة!
لا فتح (لك) من غير هجرة..

ومضى صلى الله عليه عليه وسلم..

وبكيت!

#ARK

#2020

افتحوا عيونكم..
ويمموا وجوهكم شطر المستقبل..
وما تنسوا تطلبوا من ربنا يعينكم..
حضروا قلوبكم لاحتضان تجارب جديدة أجمل، وأنضج، وأدوم!

اصبروا عكل ألم واستشعروا أجركم عند ربنا..
رح تكتشفوا مع الوقت إنه التعايش مع الألم والازمات أيسر مما كنتوا بتعتقدوا..

ما تحشدوا مشاكلكم كلها مرة وحدة وكأنها جيش غربان حطّ فوق روسكم..
احكوا للمقربين منكم مشاكلكم وهمومكم وفضفضوا إلهم بدون ما تثقلوا عليهم وتحملوهم فوق طاقتهم..

تجنبوا العزلة والوحدة واشغلوا حالكم جدا جدا !

اعطوا صورة حلوة بأي مكان بتكونوا فيه..
صورة تعكس تربايتكم وأدبكم ودينكم..

امنحوا الآخرين سعادة ورح ترجع إلكم..
حتى لو حبة ملبس أو ابتسامة عابرة مع كلمة صباح الخير..
.
.
ما تنسوا الله..
ادعوه يسكب عقلوبكم رضا وسكينة، ويعوضكم خير عن أي إشي أخذه منكم..

ما تسمحوا للشيطان ييأسكم من رحمته..
وتوبوا دائما ومع كل خطأ..
ولن يمل الله حتى تملوا..
.
.
الحياة صعبة!
بس إحنا مضطرين نخوضها..
والربّان الماهر بوظف الرياح العاتية لدفع سفينته بدل تحطيمها..

في سنة جديدة بتستناكم..
سنة بتتسع لمحاولاتكم وتجاربكم وسعيكم..

احرصوا تكون في جنب الله..
وكما قيل:

"الحياة في جنب الله لا تعني الحصول على حصانة من المحن بل التحلي بسلام في أثنائها."!

#ARK
#2020

لما وقعوا في الخطيئة هربوا !
لحظتها استحوا وخجلوا من ربنا وما كان بإيدهم إلا إنهم يهربوا..

ممكن عشان هيك بعد الخطأ ربنا قلهم:
أَلَمْ أَنْهَكُمَا عَن تِلْكُمَا الشَّجَرَةِ
(تلك) إشارة للبعيد..
الشجرة صارت بعيدة عنهم..

لكن قبل الخطأ كانت قريبة منهم:
وَلَا تَقْرَبَا هَٰذِهِ الشَّجَرَةَ
(هذه) إشارة للقريب..
.
.
.
تصرف إمنا وأبونا كان عفوي بعبّر عن الحياء والخجل من ربنا عز وجل..
وهمه أكيد عارفين إنهم مهما ركضوا وهربوا ما رح يغيبوا عن عينه..

مجرد الحياء والهروب كان دليل صدقهم وندمهم..
ما كابروا ولا جاهروا ولا جحدوا ولا تعذّروا وفقط خجلوا واستحوا وهربوا..

ممكن عشان هيك الخطاب الرباني كان لطيف لأبد حد، وبصيغة استفهامية تقريعية:
وَنَادَاهُمَا رَبُّهُمَا أَلَمْ أَنْهَكُمَا عَن تِلْكُمَا الشَّجَرَةِ ؟؟!

مش حكيت إلكم ما تقربوا الشجرة؟

ما أجمل القرآن وهو بحذر بقوة قبل الخطأ، وبعد الخطأ بعاتب عتاب لطيف مُحب وبذكرنا إنه باب التوبة لسه مفتوح..

قَالَا رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ
.
.
لحظات معدودة ومن غير تطويل ولا إبطاء ولا شروط..
فَـــتَلَقَّىٰ آدَمُ مِن رَّبِّهِ كَلِمَاتٍ فَتَابَ عَلَيْهِ ۚ إِنَّهُ هُوَ التَّوَّابُ الرَّحِيمُ

توبة ناجزة قاطعة خصوصا للي استوعب الدرس!
للي حافظ على شعور الحياء من ربنا بعد كل خطأ..
واللي اعترف بظلمه لنفسه وقال يا رب إذا ما بتغفرلي رح أخسر!
وأنا ما بدي أخسر..
سامحني يا رب !
.
.
.
-------------
لا تزال كلمات الأبوين المنكسرة المتوجّعة تذكّرنا بالطريق الآمن إلى الله كلما حاصرنا الذنب!

#القرآن_الجميل
#ARK

بتتذكر دموع بنت أختك يحرام لما وقعت على رجلها وصارت تنزّل دم..

كان الحمدلله جرحها بسيط ورجعت بعد شوي تحزنّك على حالها وتحكيلك:
شوف خالو في "واوا" !
.
.
اللي صار ببساطة مع بنت أختك نفس اللي بصير مع أي حد فينا بتعرض لألم:
- المرحلة الاولى بكون الألم مجرد إشارة لما تشعر النهايات العصبية بالخطر.
- المرحلة الثانية: بعمل النخاع الشوكي ومؤخرة الدماغ عمل "البوابة النخاعية" لتصنيف الإشارات وتوجيها للدماغ.
- المرحلة الثالثة: الرسائل بتاخذ محلها في قشرة الدماغ، وهو بدوره بفرز الرسائل وبقرر الإستجابة إلها.

يعني: اشارة، رسالة، استجابة.

خلينا نفترض إنه بنت أختك ما وقعت عندكم بالبيت..
هي وقعت أثناء سباق في الروضة وسط جو حماسي وتنافسي..
اللي رح يصير إنه الجو التنافسي رح يرسل رسائل منافسة للمرحلة الثانية واللي بدورها رح تحجب تقدم الألم للمرحلة الثالثة..

ورح تلاقي بنت أختك قامت بسرعة وكملت السباق عادي.. ولما خلّص السباق رح تتفاجىء إنه ركبتها مجروحة وبتنزّل دم !
ووقتها بيجي دور المرحلة الثالثة ورح تبكي بنت أختك ولما تزوركم رح تحكيلك:
شوف خالو في "واوا" !
----------------
كل واحد فينا قادر يتحكم بطريقة استجابته للألم..
وفيما لو امتلك الشخص فينا غاية لحياته، فكرة شاغلة باله، طموح نفسه يحققه، جو حماسي برافق كل تفاصيل يومه وحياته..

فهو قادر ينافس رسائل المرحلة الثانية وما يسمح للألم يوصل دماغه بصورة قوية تعكّر أيامه وعمره وتشغل كل باله وتفكيره..

وهذا بذكرني بمصطلح "تأثير أنزيو" وهو مصطلح سبكه بروفسور الطب في جامعة هارفرد "هنري بيتشير":

واحد من كل 4 جنود مصابين إصابات خطيرة - على ساحل مدينة أنزيو- كان يطلب المورفين...علماً إنه المورفين كان متوفر مجاناً..

في المقابل أي مريض آخر كان يتوسل المورفين أو أي عقاقير مخدرة حتى لو ما كان بحتاجها..

والتفسير برجع لفكرة إنه الجندي المصاب بتكون استجابته للجرح بالتشافي..
هو فرّ حيّ من أرض المعركة وسعيد بانجازه وتضحياته في سبيل وطنه..
وبالتالي امتلاكه لهاي المعاني نازع شعور الألم في دماغه!
امتلك معنى بحجب تقدم ألمه للمرحلة الثالثة..
---------

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ

ما أجمل إنك تربط كل ألم وصراع بربنا..
تستحضر مباشرة إنك بتعيش حياة مؤقتة قائمة عفكرة البلاء..
وإنه رح تيجي لحظة ترجع فيها لربنا!
وقتها رح يعوضك عن ألم ومصيبة مريت فيها..
رح يعوضك عن كل دمعة نزلت على خدك

أو حزن صاب قلبك..
.
.
وإنا لله وإنا إليه راجعون <3
#القرآن_الجميل

البنت اللي دخلت المستشفى وكانت بتعاني من هبوط نفسي حاد، وجهازها العصبي ما قدر يتحمل ألمها العاطفي، وقلبها بدأ تدريجياً يتكاسل في أداء وظيفته وكان ممكن ينهي حياتها بأي لحظة..
ما كانت بتبالغ عفكرة..!

ولما سألناها مالك؟
كان الجواب: الشخص اللي بحبه تركني !
.
.
خلينا نفترض إنه الشخص اللي بتحبه ما تركها..
وفعلاً تزوجوا وعاشوا حياة حلوة..
لكن للأسف اللي صار إنه زوجها عمل حادث سير وتوفى من لحظتها..

بتعرفوا إنه جهازها العصبي ما رح يعمل أكثر من اللي عمله فيها وقت ما تركها الشخص اللي بتحبه!
هي استنفدت طاقتها ومقدرتها على الحزن في أمر لا يقارن مع المصائب اللي بتنتظرها في الحياة !

بتعرفوا إنه الطفل اللي بكى بحرقة عشان أهله ما اشتروله اللعبة اللي بدو إياها بعيش نفس مقدار الحزن اللي إنت بتعيشه لما تفشل في زواج أو شغل أو دراسة..

لكن اللي بصير إنه الطفل مع الوقت بتعلم كيف يصنف أحزانه إلى درجات وألوان، فبعد ما تنكسر رجله وتموت جدته ويرسب في دراسته، بدرك متى يحزن ومتى يبكي ومتى يتألم شوي ومتى ينسى كل إشي..!

--------
الفكرة إنه الإنسان عنده مقدرة على الحزن ما بتتعلق فقط بحجم مصائبه ولكن بالطريقة اللي بنظر فيها لمصائبه..!

القرآن قدّم إلنا عزاءات مختلفة فيما يتعلق بالحزن..

لكن من العزاءات الغريبة اللي قدمها القرآن في معالجة الحزن هو الحزن نفسه!
لما إنت تمر بمصيبة ومشكلة وتتربع على عرش آلامك النفسية..
ببتليك ربنا بحزن آخر بنازع حزنك السابق وبصير إشي عادي قادر تتعايش معاه وتتجاوزه..
وهذا أكيد بقويك أكثر في مواصلة سيرك في هاي الحياة..

فَأَثَابَكُمْ غَمًّا بِغَمٍّ لِّكَيْلَا تَحْزَنُوا عَلَىٰ مَا فَاتَكُمْ وَلَا مَا أَصَابَكُمْ ۗ وَاللَّهُ خَبِيرٌ بِمَا تَعْمَلُونَ
.
.
.
ما أجمل أحزانك!
وهي بتتصارع في داخلك وبتمحي بعضها البعض وبتنفي بعضها البعض !

#القرآن_الجميل
#ARK

ما في بنت شريفة!
ما في شب شريف!

طبعًا الواحد فيهم مضى حياته على صفحات الإعترافات يتابع فضايح الناس وقصصها..
وما حرم نفسه من كل المواقع والتطبيقات المشبوهة..
وحكى مع بنات أو حكت مع شباب لقالوا بس..
وبفرحوا أشد الفرح لما يصادفوا بوست أو فيديو بأكد نظريتهم إنه ما في حد شريف !!

ناس هشّة !
ضعيفة أمام شهواتها ورغباتها..
بترتكب أخطاء قد المجتمع كله..
وعمرهم ما حاكموا الناس بالأحكام اللي بحاكموا فيها نفسهم..
المحرّك الأول إلهم غرورهم!
غرورهم هو زادهم الوحيد..هو القوة اللي بتحركهم والإشي الإستثنائي اللي بحبوه أكثر من حالهم..

بدّعوا المثالية والشرف!
وبفكروا إنهم لما يعمموا بأحكامهم يعني الناس رح تشهد بصلاحهم وعفتهم..
بحبوا تشيع الفاحشة بين الناس حتى يصدروا أحكامهم ويأكدوا نظرايتهم..
بستلذوا على قصص الخيانات والشرف لإنها بتروي مرضهم وعقدهم..
.
.
اتركوهم!
ما تردوا عليهم ولا تعيروهم اهتمام..
رح ييجي يوم ينذلوا ويتلطخوا ويتحطموا ويتعثروا وخلي غرورهم ينفعهم!
فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ..

مجتمعنا مش مثالي أكيد..
لكن مش زي ما بصوروا إلنا..
وقمة الظلم لما نعمم عمجتمع كامل ونساوي فيه الصالح والطالح..
قمة الظلم نسيء لبنات أصحاب مبدأ ودين ووقار وحياء..
ولشباب قلوبهم مليانة خير..
وفيهم بتشوف معنى الرجولة..
--------------
احكوا للصبح..
الدنيا لسه بخير..

وَإِذَا سَمِعُوا اللَّغْوَ أَعْرَضُوا عَنْهُ وَقَالُوا لَنَا أَعْمَالُنَا وَلَكُمْ أَعْمَالُكُمْ سَلَامٌ عَلَيْكُمْ لَا نَبْتَغِي الْجَاهِلِينَ

#القرآن_الجميل
#ARK

الناس بفترة الإمتحانات بتتحول لكائنات أخرى!

بصير الواحد فجأة مهتم بأشياء عمره ما اهتم فيها..
وبتشغل باله أسئلة عمره ما فكر فيها..
وهو مستعد يعمل أي إشي في الحياة إلا إنه يدرس ويركز في امتحانه..

وهذا الإشي كنت ألمحه فيي لما يكون عندي امتحان..
لما فجأة أحب أقرأ مسجات إمي اللي بتوصلها من الجارات عالوتساب..
وفجأة بكتشف إني زمان ما حكيت مع اختي..
ويضيق صدري من غير سابق انذار على أحوال الأمة والناس..
وفجأة بتذكر المستقبل وبصير أفكر بأسماء ولادي وبناتي..

وهذا الإشي كمان كنت ألمحه فيكم من خلال أسئلتكم على آرك بفترة الإمتحانات..
سبحان الله فجأة بتصيروا حابين تعرفوا شو معنى هالآية..
وفجأة بتتذكروا إنكم مقصرين وبدكم ترجعوا لربنا..
ومرة حد بعت إنه افرض أنا مسيّر وربنا كاتب علي أرسب بكرا!
غير أسئلة حكم الإنتحار اللي دائما بتوصلني بليالي الإمتحانات..

وأحلى إشي مرة شب بعت: ادعيلي استشهد!
وحد ثاني قلتله بجاوبك بأقرب وقت على سؤالك..
حكالي لا لا هسا.. لإني بعد امتحان بكرا ما بهمني أعرف الإجابة!
-----------------------------
.
.
هالدنيا اللي عايشين فيها عبارة عن امتحان..
من لحظة ما نصير مكلّفين وحتى لحظة وفاتنا..
معقول إحنا بنتعامل مع هالإمتحان زي ما بنتعامل مع امتحانات الجامعة!
لما نحاول نشغل حالنا بأي إشي حتى نلتهي عنها..
أي إشي مهما كان فارغ أو تافه أو ساذج بس المهم ننسى..

ليه دائما بنتغافل وبنتناسى حقيقة إنه حياتنا كلها امتحان..؟
امتحان بين الخير والشر..العدل والظلم..الحق والباطل ..
وإنه رح تيجي لحظة رح تنسحب من بين إيدينا ورقة الإمتحان فجأة..
وقتها ما في مجال نضيف حرف واحد عليها..
وما في فرصة نقدم فيها توسلاتنا واعذارنا..
.
.
.
ملاحظة:
الورقة لسه بين إيديكم..!

{يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ . وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ . وَلَن يُؤَخِّرَ اللَّهُ نَفْساً إِذَا جَاء أَجَلُهَا وَاللَّهُ خَبِيرٌ بِمَا تَعْمَلُونَ}

#القرآن_الجميل
#ARK

مرة بنت أختي جابتلي مفتاح السيارة وحكتلي:
يلا وديني عالمول!

طبعًا هي أحلى إشي عندها في الحياة لما تروح عالمول عقسم الألعاب..
لو تشوفوا دموع الفرح بعيونها وهي صافنة بكم الألعاب المهول قدامها!

وكنا لما نشتري إلها لعبة تقعد معها يومين بعدين نلاقيها (محطمة) ومكسّرة أو ضايعة تحت التخت و الكنباي..

كبرت بنت أختي شوي وبطلّت الألعاب كثير تستهويها، وصارت تميل أكثر لألعاب التلفون أو البلاي ستيشن، وكل ما تيجي عنا بتحكيلي بكل براءة: خالو عادي تعطيني تلفونك ألعب شوي..

لكن شو ما كانت اللعبة حلوة آخريتها تختمها أو تزهق منها..

رح تكبر بنت أختي إن شاء الله وحتصير صبية..
وممكن وقتها رح تهتم بحالها ومظهرها وشكلها ولبسها أكثر..
وما رح تسمح لأختي تلبّسها سبعين الف لون بنفس اللبسة ^^
رح تدخل بمرحلة (الزينة) المباحة إن شاء الله وهذا شيء فطري فينا كبشر..

ولما تتخرج من الجامعة إن شاء الله..
رح تفكر بحياتها بشكل جدي اكثر، ورح تكون حريصة تشتغل بمكان منيح وتجيب سيارة خاصة إلها، وإن شاء الله ربنا بيسّر إلها ابن الحلال وبنشوف ولادها..^^

---------
ما سبق بتحكي عنه هالآية:
اعْلَمُوا أَنَّمَا الْحَيَاةُ الدُّنْيَا
1- لَعِبٌ
2- وَلَهْوٌ
3- وَزِينَةٌ
4- وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ

الآية ما انتهت..
وتكملة الآية بتحكيلنا:
كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ

يعني..
مثل مزارع زرع البذور وطار من الفرحة لما نزل عليها مطر من السما..
لو تشوفوا دموع فرحته وهو بشوف النبات أخضر بنمو وبكبر شوي شوي عالأرض..
كان هالمزراع معجب بالزرع ومدهوش فيه والدنيا كلها مش واسعة فرحته..

لكن هالنبات كبر وكبر حتى اختفت دهشة المزراع فيه..
صار لونه أصفر وبعدها يِبِس وجَف وصار
(حُطام) !

-------

ختام الآية:
وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ
.
.
ديروا بالكم تشغلكم الحياة بألعابها ولهوها وزينتها عن الآخرة..
ديروا بالكم تتحول حياتكم لمظاهر وتفاخر بينكم..
وما تنسوا إنه الحياة متاعها زائل ومؤقت ولحظي وما بدوم لحد..
ومهما بلغتوا فيها من المتع والسعادة والمرح واللهو واللعب آخريتها تصير حُطام تحت رجليكم..

بالضبط مثل نبات المزارع..
ومثل ألعاب (لانا) بنت أختي!

#القرآن_الجميل
#ARK

شكرًا يا الله!
آرك وصل إلى 100000 متابع..

ولاحظوا إني كتبت (آرك) مش (آراك) زي ما بعضكم بكتبها..

وآرك|ARK معناها (الفلك) فلك سيدنا نوح عليه السلام.
وَاصْنَعِ الْفُلْكَ بِأَعْيُنِنَا وَوَحْيِنَا

وآرك بالمناسبة مذكّر وليس مؤنث^^

لإنه في القرآن (الفلك) لما تكون جمع بتكون بصيغة المؤنث، مثلا:
وَ الْفُلْكِ الَّتِي تَجْرِي فِي الْبَحْرِ بِمَا يَنفَعُ النَّاسَ.

لكن لما تكون مفردة مش جمع، القرآن بعتبرها مذكّر:
وَآيَةٌ لَّهُمْ أَنَّا حَمَلْنَا ذُرِّيَّتَهُمْ فِي الْفُلْكِ الْمَشْحُونِ وَ خَلَقْنَا لَهُم مِّن مِّثْلِهِ مَا يَرْكَبُونَ

شفتوا كيف؟
الآية الاولى بتحكي عن مجموعة فلك فجاءت مؤنث.
والآية الثانية بتحكي عن فلك سيدنا نوح فقط فجاءت مذكّر ^^
.
.
المهم:

آرك مدين إلكم جدًا!
شكرا لتفاعلكم ولايكاتكم وشيراتكم ودعواتكم..
شكرا لملاحظاتكم وحرصكم وهمّكم..
دائمًا كنت أحمد الله على نعمة وجودكم..

ويا رب نكون 100 ألف أثر ^^

اسمعوا:

بالله عليكم ما تنسوا الناس الغلبانة والمحتاجة..
ما تنسوا إنه إحنا عايشين لفترة محدودة ولازم نعمل أي خير بنصادفه بطريقنا !
ما تحرموا الناس من ابتسامتكم ومن الخير الموجود في قلوبكم..
أحيوا الأمل في قلوب الناس من جديد ..
واحكولهم إنه ربنا راح يقبلكم بمجرد ما قررتوا الرجوع إله..
ادعوا ربنا إنه ينفع فيكم دايما..وإنه يجعلكم مباركين وين ما كنتوا..
سامحوا اللي غلطوا بحقكم..
وجربوا شعور توقفوا بين إيدين ربنا وتدعولهم!
حاولوا تستحضروا معية ربنا بكل تفاصيل يومكم وحياتكم..
وحاولوا ناجوه كل فترة بسرّكم..
احكوله إنكم مع كل معاصيكم وأغلاطكم إلا إنكم بتحبوه..
عاهدوه إنه إيش ما الحياة عملت فيكم ما راح تيأسوا من رحمته !

حاولوا يكون في إشي بينكم وبين ربنا..
إشي ما حد يعرفه عنكم..
جبر خاطر..صدقة سر..دمعة قبل الفجر..وكلمة يارب تطلع من شغاف قلوبكم..

وأهم إشي ..
ما تنسوا حظ روحكم من القرآن <3 !

#ARK
#القرآن_الجميل
#100ألف_أثر

يلا عقبال ما نفرح فيكي !
-----------
بس هي كانت واعية لدرجة إنها ما تعلق آمالها وطموحاتها على وهم !
كل همّها كيف تعيش اللحظة وتبني مستقبلها المشرق بإيدها..
وهذا ما منعها تدعي ربنا ييسر إلها الخير وين ما كان..
كانت مسَلّمِة أمورها لربنا..وبتعرف إنه الدنيا مش كل إشي ..
وإنه مش شرط أي إشي بترغب فيه تحصّلُه ..
في النهاية الدنيا دار بلاء مش دار جزاء ..
وكانت عايشة سلام داخلي مع نفسها الناس بتحسدها عليه..
كانت بتحاول ترسم سعادتها بالإشي الموجود بين إيدها حاليا..
ولإنه عندها قناعة ذاتية إنه ربنا عليم وحكيم ورحيم ما سمحت لكلام الناس يأثر عليها..
.
.
بس والله المجتمع ما برحم !
عاملين فيها الحريصين عليها وكل همهم يسمّعوها حكي ويسمّوا بدنها..
إيش يعني؟ عشان تأخر نصيبها..
ليش لو أجى نصيبها رح تسكتوا؟
ليه مُصرّين إنه النجاح والسعادة في هذا الإشي..
شو بدكم إياها تعمل يعني..
تقوم تلف بالشوارع وتبحث عن شاب جذاب أو عاشق كذاب !
ولّا تقبل بأي حد وتعيش عيشة تندم عليها طول حياتها حتى تصير ناجحة بنظركم ومقاييسكم!
.
.
بس المشكلة لما أقرب الناس إلها وحتى أهلها ينظرولها نظرة المجتمع السطحية..
زمان كانت الناس بتقتل ولادها وبناتها خشية الفقر..

واليوم بتقتلهم بكلامها "خشية " كلام الناس ونظرة المجتمع ..
.
.
يا ناس
ما تقتلوا آمال وطموحات وأحلام بناتكم "خشية" كلام الناس ونظرة المجتمع..
.
.
إِنَّ قَتْلَهُمْ كَانَ خِطْئًا كَبِيرًا !!!

#القرآن_الجميل
#ARK

مما قيل:

لا أحب لك الجلوس تحت شجرة الأحزان مقيدةً إلى همومك تنزفين الألم في صمت وتنسين الحياة الرحبة الفسيحة التي بين يديك!
وهذا طريق لا يستطيع الإنسان فيه السير وحده، ولكنه يمضي متوكئًا على فقره لربه وذلته بين يديه؛ لتغشاه نسمات السكينة وتورق في روحه الحياة من جديد..
وربنا تعالى هو الحي الذي به حياة كل شيء، والقيوم القائم على كل شيء يدبره ويكلؤه..
وهو المقيت الذي يعطي كل مخلوق قُوته. فلو أقات قلبكِ قوت السكينة والسعادة، وأقامه من رماد همه حيًا وافر البهجة، فإن هذا هو النعيم العاجل!
والذي قبض روح هذا يحيي روح ذاك، ولعل ما التفتنا إليه بأعين ملأى بالدمع لو حصَّلناه وظفرنا به لبكينا منه وضاقت نفوسنا به.
.
.
.
.

ونظرا لإنه وصلت أسئلة كثيرة متعلقة بهذا الموضوع..
بنصحكم بحلقة بعنوان (تأخر الزواج) لمصطفى حسني على اليوتيوب