*محمد..محاضرتك عال8..قووووم يلااا الساعة صارت 7..
- طيّب مشان الله ما تصرخي هيك..مشان الله ..
* محمد يا ماما طيب هيّك إنت بتصرخ!
- يا الله عالنكد كل صبح يا الله ..
*خلص أنا آسفة.. الحق علي أنا!
- اه..لإنه مش هيك الواحد بصحّي !!
.
.
كان يوم عادي.. زي أي يوم تاني..تقريبًا ما في اشي جديد .. طلعت من البيت بدون ما أتأسف من إمي عشان صرخت عليها..وما حكيت لأختي شكرًا لما لحقتني عشان كنت ناسي تلفوني من العجقة..
وكالعادة وقفت أشتري قهوة عالطريق..
بصراحة الجامعة صارت عبارة عن روتين قاتل.. ما في إشي جديد ..
المحاضرات مملة.. والمواد زنخة..والأشكال هي هي بوجهك..
يلا هانت ما أنا خريج هالفصل..بس إن شاء الله بمضي هالفصل عخير..وبتخرج وبلاقي شغل منيح..وبتقدم للبنت اللي بحبها !

ييييي ضايل أقل من 10 دقايق عالمحاضرة..
يا الله الأزمة.. يا الله ..
هي الطريق فتحت عن يميني خليني أتجاوز بسرعة..
وفجأة انصدمت بسيارة ما كنت منتبه عليها..
لااااااا

كل الناس بتركض لجهتي..وسامعهم بصرخوا: رنوا عالإسعاف رنوا عالإسعاف..
في شخص يبدو إنه دكتور كان بحاول يوقف نزيفي..وشخص تاني حط راسه على صدري يتأكد إذا لساتني عايش.. في واحد كان يصرخ عالناس إنهم يبعدوا عني عشان أقدر آخذ نفس..

وفي زلمة بلحية شايبة وملامح مطمئنة كان بحاول يلقنّي الشهادة!

بتعرفوا ..
كنت أفكر إنه الواحد قبل ما يموت بيحس إنه راح يموت!
ما كنت متوقع أبدا إنه الموت ممكن يخطفني بهاي السرعة ..
أو إنه اليوم اللي راح أموت فيه ممكن يكون زي أي يوم تاني ..
كنت بعتقد إني ممكن أحظى بدقيقة قبل موتي ..
أقدر أحكي فيها لربنا آسف..وأحكي فيها لإمي إني بحبها!
هيك كنت بفكر..
بس الموت طلع أسرع مما كنت بتصور..
أسرع بكثييير !
.
.
**
*محمد..محاضرتك عال8..قووووم يلااا الساعة صارت 7..
- يييييي أنا صليت الفجر ؟؟؟
* آه صليته ورجعت نمت..مالك ؟؟
- آه صح صليته..الحمد لله هلأ اتذكرت ههه
* طيب يلا قوووووم...
- ماما ؟
* نعم ..
- بحبك !
* وأنا كمان..بس خير شو في؟
- لا.. ولا إشي بس بحبك !

#ARK

أيام المراهقة كنت أساعد صحابي في كتابة رسائل للبنات اللي بحبوهم !

كنت دايمًا أحكيلهم لازم تحتوى رسائلكم على استعارات..
سألوني شو يعني استعارات؟!

قلتلهم لما أحكيلكم: السماء تبكي...شو يعني؟!
حكولي يعني بتمطر..سهلة..

قلتلهم هاي اسمها استعارة..

الكل وقتها حكالي يا الله الفزلكة !
بس لو هالإشي بمشي مع البنات رح نكثّر من الاستعارات والتشبيهات في كلامنا ورسائلنا..

ولا أخفيكم الشباب عجبتها القصة:
- ابتسامتك كفراشة..
- الكلام يخرج من فمك مثل العصافير
- عطرك الذي آثر المكوث ليؤنسني بعد غيابك.
- دموعك مثل ندى الفجر
- رأيتك اليوم كسنبلة شامخة..
- وجهك مثل ندف الثلج "يعني أبيض مش القصد إنه وجهك بارد" !

وبصراحة كانت الاستعارات والتشبيهات في تطور دائمًا..
يعني البداية كانت مثلا:
عينيك مثل حبتي خوخ !

مع الوقت صارت:
عينين حزينتين وواثقتين، مستديرتين كحبتي خوخ !
.
.
*****
لما اتذكر هديك الأيام بضحك على مراهقتنا وسذاجتنا..
وبحمدالله إنه الواحد صحي على حاله وأدرك إنه الحياة مش هيك..

وبصراحة بستغرب دائمًا لما أصادف قصص لناس كبيرة وواعية كانت ضحية استعارات واهتمام لحظي وكلام منمق مليان عواطف..
.
.
.
وعفكرة..
الشب اللي شاف ابتسامتك كفراشة ودموعك مثل ندى الفجر ووقفتك كسنبلة ووجهك مثل ندف الثلج وعيونك كحبتي خوخ....

متى رح يتقدم إلك (كـــــــــرجل)؟!

#ARK

صباح الخير ^^

- صباح الخير عالبنت اللي باتت ليلتها بتدرس وصبّحت تعمل ساندويشات لإخوانها عشان إمها يحرام تعبانة..

- صباح الخير عالشب اللي خلّى مخافة ربنا بين عيونه، كان بقدر يصارح هديك البنت بحبه..لكنه أصر ما يظلمها ويحافظ عرجولته وهيو بسترزق وبقول يا رب قلبها !

- عالبنت اللي بتخوض صراع الستر والحجاب كل صبح قدام المراية..
النية موجودة، واشترت أواعي أستر وبتقول يا رب اليوم !
هي ما بتعرف إنه قرّب هاليوم كثير فيما لــو حافظت على صدقها..

- صباح الخير عالشب اللي غلبه ذنبه بالليل..
لكنه قرر يزاحمه بطاعة على هالصبح..
ناوي اليوم يتصدق وهيو قاعد بقرأ الأذكار: وأنا على عهدك ووعدك ما استطعت..
يا رب كثيرًا ما استطعت ساعدني !

- صباح الخير عالبنت الصافنة من شباك الباص..
خاتم التسبيح بإصبعها..ما فرطت فيه بيوم..
وأجنحة الملائكة بترفرف فوق قلبها !

- صباح الخير عالفريق اللي عامل حملة للشتا..
يا دوب ملحقين بين دراستهم وامتحاناتهم وبين ترتيبات الحملة..
بس معلش..ممكن ما بعرفوا: مَا أُخْفِيَ لَهُمْ مِنْ قُرَّةِ أَعْيُنٍ جَزَاءً بِمَا كَانُوا يَعْمَلُونَ

- صباح الخير عالثابتين..!
اللي ما غيرتهم الدنيا وما أسرتهم المناظر والأهواء..
اللي ما مدوا أعينهم عغيرهم ولا اغتروا بحالهم.. وأدركوا إنه رزق ربنا خير وأبقى !

- الشب اللي بضحك ع هديك البنت وبعشمها..
صباح الخير!
وَعَنَتِ الْوُجُوهُ لِلْحَيِّ الْقَيُّومِ ۖ وَقَدْ خَابَ مَنْ حَمَلَ ظُلْمًا

- صباح الخير عليه هيو بهزّ راسه شايفينه..
ما عمره نسي حظ روحه من القرآن..
واليوم كان حظ روحه وصايا لقمان..

يَا بُنَيَّ إِنَّهَا إِن تَكُ مِثْقَالَ حَبَّةٍ مِّنْ خَرْدَلٍ فَتَكُن فِي صَخْرَةٍ أَوْ فِي السَّمَاوَاتِ أَوْ فِي الْأَرْضِ يَأْتِ بِهَا اللَّهُ ۚ إِنَّ اللَّهَ لَطِيفٌ خَبِيرٌ (16) يَا بُنَيَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَىٰ مَا أَصَابَكَ ۖ إِنَّ ذَٰلِكَ مِنْ عَزْمِ الْأُمُورِ (17)
.
.
#القرآن_الجميل
#ARK

اليوم كان كتابنا مميز كتاب شبهة..🥰
ناقشنا مواضيع الكتاب الجميلة وحكينا عن فكرة انه كثير منا بفكر حاله بعيد عن أي سؤال ممكن يسببله شبهة في دينه،
لكن بعد ما قرأنا الكتاب عرفنا انه بحكي عن مشاعر جواتنا وأسئلة راودتنا 😑يمكن كنا ننفض رؤوسنا لما كانت هالتساؤلات بتمر بعقولنا ونصير نستغفر ربنا ونحكي يا رب مش قصدنا نحكي هيك
بس بعد ما قرأنا الكتاب عرفنا انه في كثير أسئلة عاديه ومنطقيه بس الي مش عادي نخبيها وما نلاقي اجاباتها وتظل بعقلنا الباطن مترسبه 😞
لغة الكتاب بسيطه في متناول الجميع
بناسب كل الأعمار
ومثل ما حكيت عن كتاب شهوة على قد ما كنت متخوف اقرأ بالعاميه لاني ما بحبها☺️ على قد ما رح تحكي بعد ما تكمل الكتاب
شو هالابداع كيف قدر الكاتب يبسط هالافكار العميقه بهالشكل 😉
شكرا حسن باشا
شكرا صفحة ارك

"مَن عرفَ اللهَ أحبَّهُ لا مَحالة"

بكل مرة كنت بقبِل على قراءة كتاب حتى أعرف كيف ممكن أواجه مشكلة عن الإلحاد بيوم من الأيام كنت أخاف!
وفعليًا أحضرت كتب عن هالموضوع وحطّيت قائمة بأسماء كتب أخرى بس بكل مرة كانت حجتي لازم أتثبّت من الدين أكثر
ما كنت بعرف إنه لو قرأت كتاب واحد فقط أو مقالة أو جواب لكم سؤال عن الموضوع رح أشعر بهاي الكمية من السّخافة اللي بتركوا النّاس فيها عبادة الله لحتى يتجهوا لعبادة اللاشيء .

ما بعرف كيف ممكن لحدا شايف كل هالكون بنظامه وبخيره وبشرّه وبخلقه يفكّر إنه وجد بالصدفة أو من العدم أو من اللاشيء!!

إحنا شو كنا لولا لُطف ربنا فينا ورحمته ولولا كلامه اللي بطبطب عقلوبنا بكل موقف وحزن وسعادة وألم !

عفكرة حتى الألم نعمة لازم نشكر الله عليها !

بكل مرة بنشوف الظلم والشر والقتل والحرب مفروض يكون دافع إلنا لنحمد الله ،لإنه لكل فعل سبب وكل أفعال الدّنيا ومصائبها وأفراحها إلها حكمة حتى لو غُيّبت عنّا وعن علمنا إحنا البشر .

أنا متأكدة لو ما كان لكل شيء نقيض بهالكون ما كنا حنحس بالمعنى
كيف حنشعر بلذة القرب لو مافي بُعد!
كيف رح نشعر بلذة الخير لو مافي شر !
كيف رح نشعر بلذة الصحة لو ما في ألم !
كيف رح نشعر بلذة الحياة لو مافي موت !
كيف رح نشعر بلذة وجودنا لو مافي خالق!!

آرك بكل مرة بدهشونا سواء بمنشوراتهم أو ردودهم أو كتبهم،
من قبل كتاب #شهوة وهلا كتاب #شُبهة

شكرًا عكل حرف كتبتوه وكل جهد بذلتوه وكل هم حملتوه
الله ينفع فيكم دائمًا وأبدًا ويجعلكم من الهادين المُهتدين ❤️!

#كتاب_شبهة
تساؤلات الشباب عن الله والدين والشر

الكتاب مكون من خمس فصول:
- الفصل الأول "لانــــا":
عن الكون ووجود الله وسؤال "مين خلق الله" وليه اخترنا إله الإسلام من بين كل الآلهة؟!

- الفصل الثاني "ضع دائرة حول الإجابة الصحيحة ":
مكون من 17 سؤال من خلالهم رح نختبر صدق رجل اسمه محمد بن عبدالله!، ورح نجاوب على سؤال "ليه اخترنا الإسلام من بين آلاف الديانات".

- الفصل الثالث "شبهة":
بجاوب على أسئلة زي: ليه ربنا يخلقنا، ليه نعبده وهو غني عنا، وشو مصير غير المسلمين، ووين العدل إذا ربنا بضل من يشاء ويهدي من يشاء، وبجاوب عن التسيير والتخيير والقضاء والقدر.

- الفصل الرابع "الشبهة الأكبر":
بناقش مشكلة الشر، وليه ربنا يسمح بالشر يتواجد في الكون وليه ما يتدخل لإزالته.

- الفصل الخامس "سارة وأشياء أخرى":
مجموعة قصص تتناسب مع محتوى الكتاب.
.
.
ما بعرف إذا رح أقدر أجاوبك!
بس كنت بدعي ربنا وإنت بتسألني إنه يسبقني لقلبك..
وإنه ما تنتهي قعدتنا إلا وإنت بتردد من قلبك:
"الحمدلله على نعمة الإسلام !"
---------------
أماكن بيع الكتاب:
#عمان
- مركز الفرسان "العبدلي- مقابل المستشفى الإسلامي"
- كشك أبو علي "وسط البلد - بالقرب من حبيبة"
- كشك الكايد "وسط البلد -طلوع الشابسوغ"
- مكتبة دنديس

#الجامعة_الأردنية
- أي كتاب "مقابل البوابة الرئيسية عمارة بيتزاهت الطابق الثاني"
- مركز الرائد "مقابل كلية الزراعة"

#الجامعة_الهاشمية
- مركز بيع الكتب "البوك شوب"

#جامعةالعلومالإسلامية
- مكتبة الترتير "طبربور- بالقرب من جامعة العلوم الإسلامية"

#البولتيكنك
بوك شوب أبو علي
---------------
#الزرقاء
- مكتبة الرأي "الوكالة العربية"- شارع الملك عبدالله.
- مكتبة إيهاب
--------------
#إربدجامعةاليرموك
- مكتبة عادل "مقابل البوابة الشمالية - جامعة اليرموك".
- مكتبة تسجيلات النور
--------------
#جامعةالعلوموالتكنلوجيا
- مكتبة JUST
--------------
#السلطالبلقاءالتطبيقية
- مكتبة التخطيط "داخل الجامعة"
--------------
#جامعة_مؤتة
- مركز بغداد بجانب مطعم الكينج .
--------------
#فلسطين:
التواصل مع مكتبة الكمال (نابلس)
--------------
#متجر_اقتباسات

#موقع_جملون
https://jamalon.com/ar/catalog/product/view/id/37294618…

سعـــــــــر الكتاب:
4 دنانير
---------------

لما تمسك ورقة وقلم بس عشان تكتب جدول ممكن عارف حالك رح تقصّر فيه بتناول أذكار الصباح والمساء، وصلاة الضحى والوتر ووردك من القرآن.

لما تسجل زلاتك وانتكاستك وتعاهد نفسك ما تكررها..
ولما تفرح عشانك بتتحسن، أو تلوم نفسك لإنك متراجع..!

لما تقرر مع سبق الإصرار إنه خلص اليوم بدي أصلي ركعتين قبل ما أنام وأدعي فيهم..
وكمان لما تقرر بكرا تتصدق عشان في ذنب غلبك بالليل..

لما تستشعر نظر ربنا لخطواتك وإنت رايح تعمل خير، لما تدعي مع كل خطوة وتقول: يا رب

لما تغلبك عفويتك وإنت بتحسب عالورقة أغلاطك وحسناتك..
ولما تبتسم ابتسامة حسن ظن بالله إنه رح يمشيلك اياها هالمرة..
وتتبعها بضحكة رضا إنه شكرًا يا رب عشان سامحتني !

لما تستشعر نظر ربنا إلك وتحرص تظهرله صدقك ومحاولاتك وعدم قنوطك واستسلامك..
.
.
إنت هيك بتكون بتعمل بوصية:

أروا الله من أنفسكم خيرًا..!
----------------

الله بعلم بالخير جواتك..
لكن حياتك كثير رح تفرق لما إنت تقرر تفرجيه إياه..!

#ARK

الساعة كانت 1 ليلا..
وانا بتمشى صادفت موقف وتصرفت فيه بشكل عفوي..
وعلى إثر هذا الموقف أجاني شب عرفت لاحقا إنه إسمه مصطفى سلّم عليّ وحكالي لو عادي إنه يتمشى معي..

مشينا أنا ومصطفى وتعرفنا على بعض وطلع هو كمان ما صارله أكم يوم مسافر زيي وأنا وياه جداد على هالبلد والمنطقة..
حكينا عن الحياة وصعوبتها وهمومها وآلامها..
ومصطفى زي ما بحكوا فتحلي قلبه وحكالي تقريبا عن كل إشي في حياته...
وحكالي عن الظروف الصعبة اللي بمر فيها..
ما قدرت أجاوب مصطفى إلا إنه ما ييأس ويستعين بربنا ويتوكل عليه وقلتله ما تنسى تحكيله نفس الكلام اللي حكيتلي اياه.. !

صفن فيي مصطفى وحكالي رح أدعيه وأحكيله إن شاء الله..
علمًا إني خجلان منه لإني امبارح "سكرت" بعد انقطاع طويل عن الشرب، بس والله كنت في حالة سيئة جدًا..

شجعت مصطفى عالتوبة وذكرتّه فيها وقلتله خلص ما ترجع وإن شاء الله ربنا بقبل توبتك وبجنبك الخمرة وشرّها..
واسهبت في نصيحته والأخذ بإيده..
---------
صفن فيي مصطفى وقلي بدي أبادلك نصائحك بنصيحة..عادي؟!
أكيد عادي...تفضل..
أنا شب غلطت بحياتي أغلاط كبيرة والحمدلله ما رجعت ولا لغلط منهم باستثناء الشرب امبارح وأنا جد ندمان وما رح أرجع إن شاء الله...
بس نصيحتي إلك كشخص لسه ما وقع بأغلاط كبيرة إنه يدير باله وما يفتح عحاله بواب هو بغنى عنها..
صدقني لو فتحت على حالك بواب الغلط رح يكون صعب عليك لاحقا تغلقها..
فليه تفتحها على حالك من الأصل وتعيش صراع صعب جدًا كان بإمكانك تتفاداه تماما..
وعشان أشجعك تثبت وما تنجر للطريق الغلط:
صدّقني ما في غلط مستاهل !
قسما بالله أزعم غلط لذته ما بتتجاوز ساعة وحدة !!
وبلّش مصطفى يعددلي كل انواع الآثام والأغلاط في الدنيا حتى يثبتلي كلامه إنه ما في غلط لذته بتوصل لساعة !
وأنهى كلامه بـــ: ساعة وحدة لكنها للأسف ممكن تكلفك كل عمرك وحياتك!
.
.
قشعر بدني من كلام مصطفى، وتذكرت مقولة مرة قرأتها إنه أبواب الفتن يفترض بالإنسان ما يغلقها برفق، بل يفترض يصفعها صفع!
وكيف إنه في الحقيقة أي غلط كبير ببدأ بتساهل في أغلاط صغيرة كان ممكن نتفاداها بداية ونتجنبها..
والخلاصة زي ما قال مصطفى: فش غلط مستاهل !
.
.
.
صارت الساعة 3 واضطرينا ننهي اللقاء أنا ومصطفى...

مصطفى..
شكرًا إلك.. جد شكرًا..
رسالتك رح توصل لكثير ناس إن شاء الله..
التقيتك صدفة وما بعرف إذا ممكن نلتقي مرة ثانية..
بس في مجال نوعد بعض وعد رجال إنه ما بيوم نوقع بغلط كبير وناخذ كل حذرنا؟!
وعد؟؟

صافحنا بعض بحرارة وكان آخر كلام بينا:
وعــــد !
.
.
وإنتوا....
وعـــد؟

إِن تَجْتَنِبُوا كَبَائِرَ مَا تُنْهَوْنَ عَنْهُ نُكَفِّرْ عَنكُمْ سَيِّئَاتِكُمْ وَنُدْخِلْكُم مُّدْخَلًا كَرِيمًا

#القرآن_الجميل
#ARK

كنت أنا سنة ثانية وهو خريج لما تعرفنا على بعض..
وصرنا أنا وياه صحبة غير شكل..

وقتها نصحني أشتغل عمل تطوعي في الجامعة..وحكالي أنا راح أساعدك وأقنعني إنه الكلية بحاجة ..
وفعلًا بديت أشتغل في الكلية وكان حرفياً ماشي معي خطوة خطوة..
كان يوجهني ويعلمني ويرشدني ويحكيلي كيف أتصرف وأشتغل..
لدرجة إنه كان مرات يكتبلي البوستات اللي أنزلها عجروبات الكلية..
ولو انطلب مني أحكي كلمة قدام الفريق كان يساعدني شو أحكي..
مره بحكيله طيب ليه مش إنت؟
حكالي أنا خريج أما إنت قدامك سنوات قادر تنجز فيها!
===
في الوقت اللي أنا فيه صرت أعرف نص الكلية..والحمد لله صارلي علاقات مع العميد والدكاترة والطلاب..
وأصدقائي عالفيسبوك صاروا بالآلاف ومئات اللايكات على أي بوست بنزله..
كان هو إذا نزّل بوست ما بجيب 10 لايكات!
كنت ألجأ إله بكل إشي وعمره ما قصر معي ..
كان يساعدني بحل أي مشكلة بواجهها..
ويا الله ما أصدق ابتسامته وفرحته لما كنا ننجز نشاط في الكلية..
أو إشارته إلي من بعيد وأنا عالمسرح حتى يحكيلي: هيني هون..شايفني!
===

مرة قبل ما أنام خطر في بالي كم هالإنسان رائع !
وقررت أبعتله عالواتسب إني بحبه وأشكره من كل قلبي لإنه بحياتي..

لقيته كاتب status عالواتسب:
كم من مغمور في الأرض..مشهور في السماء !
.
.
﴿وَمَا لِأَحَدٍ عِنْدَهُ مِنْ نِعْمَةٍ تُجْزَى * إِلَّا ابْتِغَاءَ وَجْهِ رَبِّهِ الْأَعْلَى * وَلَسَوْفَ يَرْضَى ﴾

#القرآن_الجميل
#ARK

ما تحكموا على ناس وقعوا بغلط نصيحة !
وإياكم تغفلوا عن الخير الموجود فيهم...
ويا ويلكم لو شوهتوا سمعتهم واشمتوا فيهم وشعرتوا بداخلكم بلذة فضيحتهم !
هون غلطكم ما بقل شأن عن غلطهم..
وشماتتكم وادّعاء حرصكم وتقواكم ما بعكس غير تشوّه إنسانيتكم..
نصيحة خلوا تفكيركم منصب على فكرة انقاذهم وانتشالهم والأخذ بإيدهم..
وديروا بالكم تغفلوا تدعولهم بظهر الغيب إنه ربنا يعينهم ويساعدهم..
.
.
انتشلوهم من الخطأ بالحـــــب !
لإنهم بعد الغلط بكونوا ظمأنين لحب ولإيد تمسك فيهم وابتسامة تعاهدهم إنه ما رح نتخلى عنهم..

وفي اللحظة اللي همه فيها بلعنوا العالم والبشر وممكن بفكروا بالإنتحار..
أظهروا إلهم حبكم واشملوا نفوسهم برحمتكم وعطفكم..
ورح تنصدموا من ردة فعلهم !
رح يبهركم الخير والعواطف والمشاعر المكبوتة فيهم..
رح يشعروا إنهم انولدوا من جديد، ورح ينسوا غلطهم ويزاحموه بخير كبير في قادم أيامهم..
ورح يحبوا الله !
جدًا جدًا رح يحبوه..

ورح تتفتح أرواحهم متى خطفت أبصارهم رأفة الله وطيبة عبده الإنسان !
#ARK

لوهلة ممكن تشوفها بنت عادية ما في إشي بميزها عن غيرها..
لكن فيما لو تأملت في ملامحها بشكل أدق رح تكتشف إنها حلوة !

" لونها قمحي، وخدّاها متوردان توردا خفيفا عند الوجنتين،وكانت تقاطيع وجهها جريئة"

هيك وصفها بالضبط لما دخلت عالمقهى في الوقت اللي كان فيه منهمك في كتابة أول رواياته!
هو في الحقيقة شخص غير مبالي اتجاه موضوع البنات، وكانت عنده قيّم ومبادىء بتحكم علاقته مع الجنس الآخر..

حتى لحظة ما دخلت عالمقهى هالبنت "القمحية"!
ما قدر يمنع نفسه من تأملها وبرر لنفسه إنه ملامحها ممكن توحي إله شيء يجسده في أحد شخصيات روايته..

" بهية الطلعة، ممشوقة القد، لها ألق وبهاء لم أعهدها في أنثى..الحق أنها جميلة، جميلة جدًا..! "
.
.
أجت عيونهم ع بعض، وفي هديك اللحظة خجل ونزّل عيونه وانكب على أوراقه يكمّل كتابه..
رجع بعدها من باب الفضول بس حتى يشوف لو هي بتتفرج عليه أو لا..
ومجرد ما رفع راسه شوي حتى تلاقت عيونهم مرة ثانية..!

صراحة هو أول مرة بمر بموقف هيك..
وشعر نفسه متوتر جدًا خصوصا لما تكررت نظراتهم لبعضهم البعض..
شعر نفسه بنقاد لمغامرة جديدة والفضول في داخله اشتعل حتى يعرف شو بعد هالنظرات المتبادلة !

وهالنظرات سرعان ما استحالت لتأمل وابتسامة خفيفة وكل حد فيهم بنتظر من الثاني الخطوة الجاي..

كان قلبه بدق حرفيّا !
وفي هديك اللحظة نسي تمامًا قيمه ومبادئه اللي ما كانت تسمحله يلقي نظرة عبنت في الشارع، فضلا عن كونه يتأملها ويبادلها الإبتسامات !

أضاف لأوراقه لحظتها:
" ذلك وجه يجعل اقل الرجال اكترثا وأشدهم ذهولا ولو في وسط جمهور مضطرب أو في زحمة شارع أن يتوقف لحظة أمام هذا الوجه ويتذكره كثيرا.."

الغريب صراحة إنه كان بعرف إنه هالمغامرة ما رح ينتج عنها قصة حب، ولا ممكن يفكر فيها كزوجة، الإشي كان تسلية مش أكثر !
ومغامرة حلوة حاب يخوض غمارها..
.
.
انتهى المشهد وأخيرا بكلام بينهم وتبادل النظرات انتهى بتبادل تلفونات وقرروا بكرا إنهم يلتقوا !

ومضى ليلته وهو بحكي معها !
وصلاة العشا شلفقها شلفقة والفجر راحت عليه بطبيعة الحال لإنه الدنيا برد وهو كثير نعسان..

كل تفكيره منصب على لقاء بكرا..
طبيعة الكلام بينهم والظروف كانت بتشير لإشي خطأ حيصير بينهم !
هو كان عارف لكنه قرر "يعمي" بصره وبصيرته عن تبعات هالمغامرة..
--------------
لحظات بتفصله عن لقائها..
كان الوقت جدًا متأخر..
وبشكل عفوي حتى يريّح صدره المتوتر وأنفاسه المكتومة قال: يا رب !

يا رب..!!

فجأة تذكر ربنا اللي كان ناسيه..
وخطرت بباله آية:
إِنَّ الَّذِينَ اتَّقَوْا إِذَا مَسَّهُمْ طَائِفٌ مِنَ الشَّيْطَانِ تَذَكَّرُوا فَإِذَا هُمْ مُبْصِرُونَ

مبصرون !

وشعر إنه لحظتها فعلا كان أعمى عن الحق وانجر لهواه ولشهواته بدافع الفضول !
فجأة..
أبصر ربنا..
وأبصر طائف الشيطان..
وأبصر تبعات أي غلط ممكن يرتكبه..
وأبصر إنه ما في غلط بستاهل..
وقدر يبصر ظل العرش يوم القيامة !
وأبصر عود الفتنة اللي بنعرض على قلبه والنكتة السوداء اللي كان ممكن تنغمس بقلبه..
أبصر زوجته المستقبلية اللي كان حريص يكون مخلص إلها حتى في عدم حضورها ووجودها..
أبصر الملائكة وهي بتسجل حسنة عشان سيئة همّ فيها وما عملها..
أبصر الندم اللي كان ممكن يصيبه وشعور ذل المعصية اللي رح يرافقه..
أبصر واستشعر عزّ الطاعة ولذة كلمة لأ للحرام..

وانتهى المشهد..
لما أبصر الملائكة وهي بترفرف بأجنحتها في الملأ الأعلى وبتحجز إله مكان تحت ظل عرش الرحمن.. !

#ARK
#القرآن_الجميل

قبل فترة كان في مجموعة أولاد وبنات صغار بلعبوا..
وكان من بينهم بنت أكبر منهم بشوي الواضح إنها أختهم الكبيرة ^^
وصراحة لفت انتباهي جديّتها وحرصها وعصبيتها على إخوانها وخواتها..
ولا كإنها طفلة صغيرة لسه..
وكانت بتهددهم إنهم لو طلعوا عالشارع رح تضربهم بالعصاي !
وكانوا كلهم يحرام ملتمسين منها وخايفين..

طبعًا هالموقف ذكرني بأختي الكبيرة، اللي كنت أحسب إلها حساب أكثر من إمي وأبوي..
وعليم الله أكلت منها كفوف لقلت بس...
وكنت أرتعب من ردة فعلها لما أعمل إشي خطأ..
ومرة بالمدرسة دافعت عني لما كنت بطوشة..
طبعًا مش إنه أختي حدا شرير وعصبي وإيدها والكف..
لا لا بس هي كانت تتشاطر علي وعلى بقية إخواني، وسايقة فيها إنها المعنية والمسؤولة عنّا..
---------
أي حد عنده أخت كبيرة رح يدرك كلامي تمامًا..
لما الأهل يكونوا زهقوا وتعبوا من التربية بتلاقي الأخت الكبيرة تحملت جزء كبير من مسؤولياتهم..
سواء بشغل البيت أو الاهتمام والعناية ببقية إخوانها وخواتها..

ليه بحكي هذا الحكي؟!
لإنه في آية في القرآن كل ما أمر عليها بتدفعني للإبتسام بشكل عفوي وبتذكرني بأختي وحرصها..
وكنت أستغرب من هالآية إنه كيف القرآن آثر يذكرها علما إنها موقف عادي جدًا مقارنة بآلاف المواقف الأخرى..
كلنا بنعرف قصة سيدنا موسى كم فيها تفاصيل وأشياء مهمة جدًا..
مع ذلك آثر القرآن يخلّد ذكر أخت سيدنا موسى وخطواتها لما قال:

وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَىٰ عَيْنِي (39) إِذْ تَمْشِي أُخْتُكَ فَتَقُولُ هَلْ أَدُلُّكُمْ عَلَىٰ مَن يَكْفُلُهُ ۖ فَرَجَعْنَاكَ إِلَىٰ أُمِّكَ كَيْ تَقَرَّ عَيْنُهَا وَلَا تَحْزَنَ

الآية مدهشة !
والمــــــد بكلمة تمشـــــــــــي بخليك تستشعر خطواتها وأنفاسها وحرقتها وحرصها ومغامرتها وجرأتها في إنقاذ أخوها موسى..

القرآن بذكّر سيدنا موسى بعد سنوااااات من هالموقف بخطوات أخته وفضلها عليه..
ربنا أوحى لأم موسى تلقيه في اليم..
لكن المهمة الأصعب كانت على عاتق أخته..
لما مشت حتى قصر فرعون حتى تنقذه وترده لإمه !
.
.
.
----------------
مرة شيخ قلي:
من أعظم أعمال القربات الإحسان للأخوات ! <3

#القرآن_الجميل
#ARK