Шайх, доктор Ваҳба Мустафо Зуҳайлий роҳимаҳуллоҳ бир учрашувда қуйидаги сўзларни айтган эканлар:
“Илмий ишларимнинг барчаси 120 мужаллад бўлиб, 50 минг саҳифадан иборатдир. Қишин-ёзин тонгги соат 04:00 дан кечки 20:30 гача бўлган бутун вақтимни илмий иш устида ўтказаман”.
У зот 1932 йили Дамашқнинг Дияри атийя шаҳарчасида дунёга келганлар. Оталари Мустафо Қуръон ҳофизи, илмга чанқоқ киши бўлган. Ваҳба Зуҳайлий академик лицейни тамомлагач, Мисрга келиб, Азҳари шариф университетининг шариат факультетини аъло баҳоларга тамомлаган, кейинчалик ўша университетда мударрислик қилган. Қоҳира университетитинг ҳуқуқ факультетида эса магистрлик даражасини қўлга киритган. 
Ҳаётларининг асосий қисми дарс, таълиф, кўрсатма бериш, умумий ва хос лекциялар ўтган. Устоз бир кунда 16 соат ишлаган.
Олимнинг машҳур асарларидан, учта йирик энциклопедия бўлиб, улар:
1. “Исломий фиқҳ ва унинг далиллари”, 8 мужаллад. Уни турк, малайзия, инглизча, урдуча ва бундан бошқа тилларга таржима қилинган.
2. “Мунир тафсири”, 16 мужаллад. Уни қисқартириб “Тафсиру важийз” бир мужаллад, “Тафсиру васийт” деб уч мужалладда чоп этилган. У турк тилига таржима қилинган. 
3. “Исломий фиқҳ усуллари” 2 мужаллад. Турк тилига ҳам таржима қилинган.
Устоз илмий фаолиятлари давомида 70 дан ортиқ магистр ва докторлик рисолаларига раҳбарлик қилган. Араб давлатларида кўплаб дарслик ва рисолаларни чоп этилишида ҳам раҳбарлик қилган. Макка, Жидда, Ҳиндистон, Америка ва Судандаги фиқҳ академияси аъзоси бўлган. 
 Ваҳба Зуҳайлий 2014 йилги жаҳоннинг энг нуфузли мусулмонларининг 500 талик рўйхатига киритилган. 16 мужалладдан иборат “Мунир тафсири” эса 1995 йилнинг Ислом оламидаги энг яхши китоби дея эълон қилинган
Шайх Зуҳайлий юртимизда  шайх Муҳаммад Содиқ Муҳаммад Юсуф раҳимаҳуллоҳнинг бевосита раҳбарликлари остида бошлаган уламолар жамоаси томонидан чоп этиб келинаётган "Олтин силсила" саҳиҳ ҳадислар мажмуаларининг академик нашри хусусида қуйидаги сўзларни битган эди:  "Ана шу ишларнинг мантиқий давоми бўлган «Олтин силсила» рукнида ҳадис тўпламларининг нашр этилаётганини мен сизнинг юртингизда маънавий тараққиёт масаласига доимий равишда катта эътибор берилаётганининг яна бир амалий тасдиғи деб биламан. Ушбу муборак илмий меросни халқингиз, келажак авлодларингизга ўз она тилингизда тақдим этишдек шарафли ишда сизларни Аллоҳнинг Ўзи қўллаб, ҳифзу ҳимоясида асрасин. Ҳеч шубҳасиз, Аллоҳ яхшилик қилувчиларни севади."
Олимнинг Расулуллоҳ алайҳиссаломнинг ҳаётлари ва сийратларига бағишланган "Шамоилул Мустафо" китоби ўзбек тилига таржима қилиниб, нашрдан чиққан. 
Шайх Зуҳайлий 2015 йил, 8 августда Дамашқда вафот этганлар.

Бобур Аҳмад тайёрлади.