♥️♥️يلا نبلش بسم الله ♥️♥️

اذا متذكرين فخير على خير
و اذا ناسين فاليوم وصلنا للأخت الچبيرة مال الادوات النافية الي هي ( ما )

مثل ما تعرفون الاخت الچبيرة عادةً تتطبع بطباع امها
زين منو امها 😅😅
امها ( ليس )
اوك زين شون تتطبع بطباعها😟

يعني اول شي رح تسوي هي انو تعمل عملها
( تنظيف و كنس و مسح ) لا لا 😂😂

عملها الاعرابي و المعنوي
بالدخول ع الجملة و تأثيرها عليها

و طبعاً مو دائماً تعمل عمل امها
لا ..
حسب نوعها

و هسه نجي ناخذ الانواع بالتفصيل 😅😅

طبعاً هاي الاخت الچبيرة عدها صديقات ( انواع )
هسه رح ناخذها هي
و بعدين ناخذ صديقاتها 😅 ( انواع ما الاخرى )

🟦🔴 اولاً // ما النافية للجنس ( العاملة عمل ليس ) الاخت الجبيرة العاملة عمل امها😅😅

يعني تكىن نافية للجملة الاسمية و تسمى ( ما الحجازية )

وبما انو تعمل عمل ليس فاكيد رح ترفع المبتدا و تنصب الخبر

بس شنوو ( عدها شروط ) لان البنية متكون مثل امها تماماً الا اذا توفرت بيها هاي الشروط😅😅

🔹🔺- ان لا يتقدم الخبر على الاسم
🔹🔺- ان لا ينتقض نفيها بـ ( الا)

امثلة على ما الحجازية 🙂
✅ ما هذا بشراً ان هذا الا ملك كريم
✅ ما الحسن في وجه الفتى الا شرفاً له
✅ ما المجدُ زخرف قولٍ تطالعه

تگدرون تستبدلوها بأمها ( ليس ) 😅
و رح تشوفون نفس المعنى و نفس الاعراب للمبتدا و الخبر بعدها



🔴🔴ملاحظة : اذا فقدت ( ما ) العاملة احد الشرطين اعلاه فسوف تعتبر نافيه مهملة
يعني ما رح تشتغل شغل امها 😟😟✋🏻
مثل//
✅ و ما محمد الا رسول
هنا انتقض نفيها بإلافاصبحت نافية مهملة

✅ و ما للمرء خيرٌ في حياة اذا ما عد في سقط المناع
و هنا تقدم خبرها ع اسمها فايضاً صارت مهملة



🔴🔴 ملاحظة : قد يدخل حرف الجر الزائد على خبر ( ما ) العاملة عمل ليس فيجره لفظاً و ينصبه محلاً
✅و ما ربك بظلام للعبيد
✅و ما هم بضارين به من احد الا بإذن الله



🔴🔴 ملاحظة_مهمة_جداً
احنا مو گلنا ما الحجازية تصير بنت ( ليس ) 😅
لذلك من حقنا نخليها بمكان امها او نجيب امها بدالها
بس لازم ننتبه :

عند استبدال ( ليس ) بـ ( ما ) النافية و بالعكس يجب ان ننتبه الى اسمها 👇

🔹🔹اذا جاء اسم ( ليس ) ضمير مستتر او متصل فيجب تحويله الى ضمير منفصل ظاهر ثم الاستبدال
🔺لستُ .... تصبح ، ما انا
🔺ليس .... تصبح ، ما هو
🔺لسنا ... تصبح ، ما نحن
.
.
.
الخ

ليش هيج ؟؟☹️☹️

لان اسم ما النافية للجنس لازم يكون اسم ظاهر او ضمير ظاهر منفصل مو ضمير متصل ❗️❗️

و بسسس
هذا كل ما يخص الاخت الچبيرة ( ما الحجازية )

هسه نجي لصديقات ما الحجازية 🙃🙃


🟦🔴 ثانياً // ما النافية غير العاملة ( مهملة ) نافية للجملة الاسمية

هاي منيه 🙂🙂🙂
هاي نفسها الاخت الجبيرة الحجازية
بس انتقضت شروطها
لذلك تعاقبت و صارت مهملة خطية 😞😂

و انتبهوا هنا بعد ما نگول حجازية
ولا نگول عاملة عمل ليس
نگول نافية غير عاملة مهملة

شوكت ؟
🔹🔺 اذا انتقض نفيها بإلا ( يعني اذا اكو الا الاستثنائية بالجملة )
🔹🔺 اذا تقدم خبرها ع اسمها

و هنا بما انو غير عاملة
فالمبتدا و الخبر وراها اثنينهن حيكونن مرفوعات

✅ وقفت و ما للموت شك في لواقف كأنك في جفن الردى و هو نائم
✅ ما بيننا يوم الفخار تفاوت ابداً كلانا في المفاخر معرق


سؤال // بم تعلل اهمال ( ما ) الواردة
و ما حال الخبر بعدها و لماذا
اجعلها عاملة بتعبير اخر
✅ و ما عجبٌ موت المحبين في الهوى و لكن حياة العاشقين عجيب

🔴الجواب // مهملة : لان تقدم خبرها على اسمها
حال الخبر بعدها // ( عجب ) مرفوع لانها مهملة غير عاملة
اجعلها عاملة // ارجع الخبر لمكانه و اقدم المبتدا

تصير : و ما موت المحبين في الهوى عجباً

🔴مثل ما تلاحظون رجعنا الخبر ( عجب ) و سويناه منصوب
بعد ما كان مرفوع لان ( ما ) صارت عاملة

🔴🔴 ملاحظة //
قد ترد ( ما )نافية مهملة اذا تلاها الحرف الزائد ( إنْ )
يعني وين ما تشوفون ما و وراها ( إن ) الزائد
گولوا هاي مهملة

✅ ما ان انتم ذهب و لا صريف


🔴🔴 ملاحظة // قد يدخل حرف الجر الزائد للتوكيد ( من ) على اسم ما النافية المهملة
و طبعاً هذا الحرف يدخل ع المبتدا المؤخر النكرة

✅و ما للظالمين من انصار
✅و ما من شفيع الا من بعد اذنه


🌹و بسسس هذا كل ما يخص المهملة 🌹

🟦🔴 ثالثاً : ( ما ) نافية غير عاملة
داخلة ع الجملة الفعلية

شوكت اعرفها هاي 🙂🙂
🔺🔺 من يجي وراها فعل ماضي
🔺🔺 او يجي وراها فعل مضارع مرفوع!!

هنا تكون نافية الفعل معنوياً
بس اعراب الفعل يبقى مثل ما هو
لانها غير عاملة 😕😕

✅ و النجم اذا هوى ، ما ضل صاحبكم و ما غوى
✅ و ما خلقت الجن و الانس الا ليعبدون
✅ و ما تنفقون الا ابتغاء وجه الله
✅ يغضي حياءً و يغضى من مهابته فما يكلمُ الا حين يبتسمُ

هنا بما انو وراها ماضي او مضارع مرفوع
فهي غير عاملة و يكون اعراب الفعل عادي
مثله مثل اي فعل بأي جملة


🔴🔴ملاحظة1 : اذا دخلت ( ما ) النافية غير العاملة على المضارع فأنها تخلص زمنه للحال فلا نحتاج لقرينة تدل على الحال الحال
( الان الحين ، الساعة ، اليوم )

سؤال // أيمكن استخدام لفظة ( الحين ) مع الجملة الاتية ؟ و لماذا ؟
✅ و ليلة مرضت من كل ناحية .. فما يضيء لها نجم ولا قمر

الجواب // كلا لا يمكن استخدام لفظة ( الحين )
لان ما النافية تخلص زمن الفعل للحال فلا تحتاج لقرينة دالة على الحال



🔴🔴 ملاحظة2 : النفي بـ ( ما ) النافية غير عاملة نفي غير مؤكد و لغرض توكيده نحتاج لقسم مناسب يسبقه ( والله ، بالله ، و ربك ،،،،،الخ )

يعني اذا گاللكم اجعل النفي مؤكداً
فلازم تسبقون الجملة بقسم

✅ فوالله ما ندري اذا ما فاتنا طلب اليك من الذي نتطلب
✅ فوالله ما اغويت كفي لريبة و لا حملتني نحو فاحشة رجلي

سؤال // في البيت التالي ما صفة النفي ثم
اجعله مؤكداً
✅ ما جئت بابك مادحاً بل داعياً و من المديح تضرع و دعاء

صفة النفي غير مؤكد
نجعله مؤكد باضافة قسم
تصير الجملة ( والله ما جئت .... )

لحد هنا خلصنا ما الحجازية و صديقاتها الاثنين المقربات. البيست فريندز 😅😅
و عرفنا انو ( اثنينهن مثل مشفتوا غير عاملات )

هسه نجي ناخذ صديقاتها من بعيد
يعني مجرد زميلات مو مو مقربات
ليش مو مقربات 🙂🙂
لان مالهن علاقة بالنفي
لعد شنو هنه 🙂🙂
كل وحدة محتارة بروحها و تعمل عمل شكل حسب معناها 😂😂

هسه نفصلهن 👇👇👇

🔴🔴 انواع ( ما ) ليس لها علاقة بالنفي


🟦1: ما الاستفهامية
شرحناها بالاستفهام شرح كامل ( راجعولي اسم الاستفهام ما )🙂🙂
✅و ما تلك بيمينك يا موسى



🟦2: ما ( الموصولة ) بمعنى الذي
و هم شرحناها و عرفناها سابقاً🙂🙂

🔺🔺 هاي تعرب حسب موقعها من الجملة ،،، و الي بعدها يعرب اعراب عادي و وره ما تكملون اعرابه تگولون ( جملة صلة الموصول لا محل لها من الاعراب )
✅ له ما في السموات و ما في الارض



🟦3: ما ( الشرطية الجازمة )
والله هم اتذكر شرحناها 😂
و گلنا هاي تجزم فعلين ( فعل الشرط و جواب الشرط )
✅و ما اصابكم من مصيبة فبما كسبت ايديكم


🟦4: ما ( التعجبية )
و هاي هم شرحناها وداعتكم😅

و عرفنا انو ترد في صيغة التعجب القياسي ( ما افعله )
🔺 و تعرب مبتدأ ( تذكروها بأسلوب التعجب مو ؟ )
✅سبحانه من اله ما اعظمه ( دعاء جبريل ☺️)

لا زلنا في الصديقات البعيدات للاداة ( ما ) 😅😅


🟦5: ( ما ) المصدرية و ايضاً شرحناها و عيونكم😅
تؤول مع ما بعدها بمصدر يعرب حسب موقعه من الكلام
✅ليس للانسان الا ما سعى .... التقدير الا سعيه

🔴🔴 ملاحظة: بهاي الجملة المصدر المؤول ☝️☝من ( ما و الماضي ) يعرب في محل رفع اسم ليس مؤخر


🟦6: ما ( مصدرية ظرفية )
ما اتذكر اذا شرحناها لو لا 😅😅
و تكون بمعنى ( مدة ، طالما )
🔺🔺 و غالباً تأتي قبل الافعال ) دام . عاش . زال ، بقى ،،،الخ )
✅ ما دام قلبي بخير فلن أبالي لاحد 😅😅 ( اهم شي قلبي ) 😅


🟦7: ما ( زائدة للتوكيد )
و هم درسناها بموضوع التوكيد ✋🏻

🔴هاي متجي وحدها لازم تسبق باداة
و تجي وراها و تكون زائدة
✅ انما الاعمال بالنيات و انما لكل امرئ ما نوى
✅اينما تكونوا يدركْكُم الموتُ ولو كنتم في بروج مشيدة

#اموت ع هاي الاية الفوگ مادري ليش 💜😍

لحد هنا كملنا
الاخت الچبيرة 😅
و صديقاتها من قريب و من بعيد
كافي عيب هواي تدخلنا بحياتها😅😅😅😅

+ اي سؤال اي شي مو واضح اي استفسار
اني موجودة🌹🌹🌹

@Pride_lady

تعالووو
بما انو حالياً دا اجاوب اسئلتكم

تحبون اشارك وياكم الاسئلة الي تجيني و اجوبتي عنها ؟!

@Pride_lady

صوتولي هنا 👇👇👇👇

عيني حبايب طلاب
بخصوص الاسئلة الي دا يختبركم بيها الاستاذ محمد رمضان
اي استفسار عندكم حولها
اي شي متعرفوه
راسلوه ع معرفه الي طالع گدامكم
@was_dreams

اما اني فدا اجاوب اسئلتكم العامة عن النفي و عن القواعد بشكل عام

طلاب حبايبي الرابط مال الاختبار باجر ان شاءالله انزله ♥️
صار عندي خلل بسبب ضعف النت

امتحان قواعد شامل

https://forms.gle/w5rCi3xXtAByi8DRA

ركزوا باجوبتكم و اتاكدوا من الاختيارات قبل لا تدزون

اي طالب عنده سؤال يراسلني
@was_dreams

طلاب ركزوا بالاجوبه
الاسئلة كلها صح ما بيها اي خطأ

من مجموع 209 طالب
فقط 2 ماخذين 100

طلاب باجر ان شاءالله انزللكم الاجوبه الي خطآنين بيها هواي و اشرحلكم اياها


ابد لتخافون و تكولون ما ضابطين هذا الامتحان بس تختبرون نفسكم بي و بالوزاري يجي اسهل منه لو ماخذ صفر بهذا الامتحان هم عادي مو مشكله ف اطمأنوا و لتخافون♥️

راح ابدي اشرحلكم الاسئلة الي غلطانين بيها اكثر الطلاب