كل عام وأنتم طيبين جميعًا، وتنعاد عليكم الأيام بكل خير يا رب العالمين.

"كتب عليكم الصيام ... لعلكم تتقون"، فمن علامات التقوى (ما كنت تجد وتجتهد له طوال شهر رمضان) أن تفرح بالعيد "ذلك ومن يعظم شعائر الله فإنها من تقوى القلوب".

أنا عارف كويس أوي أد ايه الوضع العام مؤلم، وأن الآلام لا تُحصى ولا تُعد، ولكن يومنا يوم عيد، فمهما كانت حالتك افرح، واخرج للصلاة رجلًا كنت أو امرأة وإن كنت حائض (ولكن لا تدخلي المصلى)، وزُر الأقارب والأصحاب، ولاعب الصغار، وأحيي سنة التكبير.

"لتعلم يهود أن في ديننا فسحة، إني أرسلت بحنيفية سمحة".


كل عام وأنتم بخير :")

عادة ببكون الإدمان بكل أنواعه رد فعل على مشاكل أخرى، فبنهرب منها للإدمان، فاولًا اقعدي مع نفسك وشوفي هل فعلًا دا موجود معاك؟ في أشياء ضاغطة عليك فبتهربي منها؟

ثانيًا اعرفي إن دايمًا صعب على النفس الإنسانية إننا نقولها لأ، فدايمًا العبي على نفسك من الناحية التانية، حاولي متخليش نفسك تلجأ للفعل فتقوليلها لأ متعمليهوش لأن حتمًا مش هتقدري، ولكن قللي وحدي من الأشياء ال ممكن تقولي عليها لأ، وفي كتاب اسمه "إراردة الإنسان في شفاء الإدمان" كويس جدًا في النقطة دي.

طيب نعمل دا ازاي؟
غيري نظام حياتك بالكلية، حطي نظام أصلًا لحياتك، ابدأي اظبطي يومك، وبداية ظبط اليوم بتبدأ من ظبط النوم.
شوفي محتاجة تعملي ايه، اعملي جداول خفيفة، ووزعي المهام على مدار اليوم، وأفضل طريقة لإدارة اليوم إنك تظبطيها على مواعيد الصلاة، وإنك تستشعري إن الصلاة إلى الصلاة مكفرات ما بينهن ما اجتنب الكبائر.

ومتكثريش من المهام على نفسك علشان ميتحولش الأمر لضغط عليك، فتهربي منه للإدمان مرة تانية :"D

اقرأي مقال "جسر التعب" في كتاب مسلكيات لإبراهيم السكران، وابدأي يلا :"D

وبعد فترة كدا لما تشدي حيلك ابقي اقرأي كتاب إدارة الوقت بين التراث والمعاصرة

اقرأي القايمة دي، ابدأي بمقال جسر التعب وقومي اقعدي مع نفسك زي ما قلنا، وبعدين اقرأي جدد حياتك، وبعدين الماجريات، وبعدين إرادة الإنسان في علاج الإدمان.

وممكن مع دول بالتوازي تاخدي كتاب إدارة الوقت، طويل شوية، فقسميه على أجزاء صغيرة كل يوم.

أهم شيء تتخلصي من وهم الكمال والمثالية وأنت بتجدولي أمورك.

وليه سعادة مؤقتة؟ وليه أصلًا الأمر مشكلة؟

نماذج الذكاء الاصطناعي زي Chat GPT و deepseek من الأشياء الجميلة جدًا ال ممكن تساعدك في شغلك وتوفر عليك وقت كبير، وكذلك من الأشياء ال ممكن تفكر معاك.

أنا بستعملهم كبديل للمدرسين والدكاترة الجامعين في ظل ضعف مستوى الدكاترة ال بنقابله في الجامعات، بعطيله نص الكتاب وأخليه يشرحلي وأستفسر منه على كل صغيرة وكبيرة.

كمان في نموذج من جوجل رائع جدًا، تعطيله المصادر سواء كتب أو لينك شيء معين، وتسأله في المحتوى ال أنت رافعه ليه دا ويرد عليك، فبيكون الأمر رائع جدًا، هسيبلك اللينك بتاعه.

ولكن علشان تستخدم النماذج دي لازم يكون عندك معرفة مسبقة ولو بسيطة في الأشياء ال بتستفسر منه فيها؛ علشان تعرف توجهه صح وتقدر تستخدمه بالشكل ال يفيدك (بمعنى آخر علشان متلخبطهوش)، آاه علشان أنت ال متلخبطهوش، إنما هو نموذج رائع وابن ناس كمان 😁

ايه المشاكل ال بتواجهنا في الأمور دي؟
هوضحهالك في إجابة أخرى :"D

مشاكل نماذج الذكاء الاصطناعي لما تعتمد عليها اعتماد كلي، وتخليها تفكر وتشتغل مكانك، هنا أنت بتساعد في تذكية النموذج (تجعله أذكى)، وتغبية نفسك (تجعلك أغبى).
وهنا لأن النموذج دا هو عبارة عن
Machine learning model
وطريقة عملها مبنية على
Try and error
المحاولة والخطأ، والتعلم من الخطأ في المرات ال بعد كدا، فأنت لما تعتمد عليه هتكون بتعلمه، وبتضعف نفسك على التفكير مع الوقت، فأنت استخدمه كآداة تساعدك في التعليم وتفكر معاك، مش آداة تستبدل بيها نفسك (ممكن الكلام دا لإخواتنا المهندسين أكتر، لا سيما المبرمجين).

أما بقى مشكلة النماذج دي على المستوى العام إنها بتجمع بيانات عنك؛ علشان أبينلك الأمر أكتر خليني أضربلك مثال بإيلون ماسك.

إيلون ماسك عمل نموذج زي دا اسمه Grok وضمه لشركة X (تويتر سابقًا)، فبقى فين المشكلة؟
بقى النموذج دا بيتغذى على بيانات الناس وتفاعلهم مع بعض على منصة X، وشوف بقى المنصة بيستخدمها كام مليون.

تاخد مثال آخر؟
مارك وشركة Meta، مارك عنده فيسبوك (تفاعل الناس في السوشيال ميديا)، وإنستجرام (تفاعل الناس على الصور والأمور البصرية)، وواتساب (تفاعل الناس بعمق بقى والأسرار ال بنحكيها لبعض)، تخيل بقى نموذج يتغذى على كل دا 😁

فاقرأوا كتاب الماجريات، وقاطعوا كل وسيلة سوشيال ملهاش لازمة، وعلى فكرة الفيس بوك ملهوش أي لازمة، وضرره أكبر من نفعه بمراحل :"D

أما بقى مشكلة إنك لا تعمل ولا تنفذ إلا القليل، فمعلش دي مشكلتك أنت، متلبسهاش للنماذج بنت الناس دي.

اقعد مع نفسك وشوف ايه معطلك، اعرف السبب، فإذا عرف السبب؟ شاطر، بطل العجب :"D

واقرأ مقال "جسر التعب"، أنا برشحه كتير؟ آسف والله، لكن كتب إبراهيم السكران كلها بتتاكل والله مش بتتقرأ.

هنا المقال

لو عايز تشوف Chat GPT عارف أد ايه عنك لو بتستخدمه كتير، وعايز برضو حد قريب منك (هو) يكشفك قدام نفسك، استخدم ال Promt دا

"based on everything you know about me roast me and do not hold back, use Arabic language (Egyptian accent specifically)"

ودا النموذج بتاع جوجل ال اتكلمت عنه فوق

https://notebooklm.google/

كنا بنتكلم عن الزواج والتربية، ايه ال جابنا هنا؟ 😁

لكن يلا مش مشكلة لأجل عيونكم :"D

جماعة أنتم ليه مش بتراعوا إننا مش هنقدر نسألكم عن معطيات أكتر لإجابة السؤال؟ ابقوا فصلوا في السؤال يا جماعة، وساعدونا بكل المعطيات علسان منجاوبش عليكم إجابة عامة.

يضبط الإنسان نفسه بالمجاهدة؛ فالنبي -صلى الله عليه وسلم- يقول: "إنما العلم بالتعلم، وإنما الحلم بالتحلم، ومن يتحرَّ الخير يعطه، ومن يتقِ الشرّ يوقه".

فأنت عايز تتعلم؟ اجبر نفسك على التعليم لحد ما تتعود، بتغضب بسرعة؟ عود نفسك على الحلم لحد ما ربنا يرزقك إياه، عايز تتعلم الصبر؟ عود نفسك على الصبر لحد ما تتعود عليه...وهكذا بقى "والذين جاهدوا فينا لنهدينهم سبلنا"، فاخلص النية وربنا هبكرمك بإذن الله.

أما مسألة الكسل فهسيبلك كتيب صغير كدا "الحرب على الكسل" لدكتور خالد أبو شادي.

ومسألة الإحباط بأن تضبط سقف التوقعات والمعقولات، فلا ترفع سقف التوقعات، ولا تخفض سقف المعقولات، وازن بين الأمرين.

وافتكر قول الله -سبحانه وتعالى- "ما أصاب من مصيبة في الأرض ولا في أنفسكم إلا في كتاب من قبل أن نبرأها إن ذلك على الله يسير، لكيلا تأسوا على ما فاتكم ولا تفرحوا بما آتاكم والله لا يحب كل مختال فخور".

نفس حديث "إنما العلم بالتعلم" ال قلناه فوق، والله يا جماعة لا يمل الله -سبحانه وتعالى- حتى نمل نحن، فأنت مليت من المحاولة وبقى في فجوة، من الذي سيقع عليه الضرر؟ أنت! كان سيدنا عمرو بن العاص يقول: "إن الملال من سيء الأخلاق".

فارجعي احفظي تاني ولو كم بسيط كل يوم، شوفي صحبة تعينك، ولو مفيش مش مشكلة، حفظ القرآن عايز شيخ أو حد متقن علشان يصحح تلاوتك.

خلي بالك من الذنوب؛ لأنها تعطل كل شيء، وعليك بالدعاء فأنت كلك لله، فاسأليه واصدقي السؤال، ربنا يرزقنا جميعًا حفظ القرآن والعمل به يا رب العالمين.

الأمر مبقاش زي زمان مع تقدم الطب والعلوم بشكل عام، لا سيما إن دا الطبيعي حاليًا في العالم كله، العالم كله دلوقت يعاني من تأخر الزواج؛ لأسباب كتير منها النظام التعليمي، وتخلف المجتمع وما إلى ذلك.

فمتخليش الأمر ياخد أكبر من حجمه، واستشيري طبيب في حالتك؛ لأن الأمر مش مجرد إصابة الطفل، لأ ممكن يكون الأمر خطير عليك أنت كمان حسب حالتك، فالأفضل هنا استشارة طبيب، وإن أثبت فعلًا إن في ضرر في الموضوع فليك إنك تمتنعي بعد تشاور مغ الزوج ورضاه.

اقرأي النص دا للشيخ ابن جبرين: " لا يجوز العلاج لقطع الحمل أو إيقافه إلا عند الضرورة، إذا قرر الأطباء " المعتبرون " أن الولادة تسبب إرهاقاً ، أو تزيد المرض ، أو يخاف من الحمل والوضع الهلاك خوفاً غالباً .
ولا بد مع ذلك من رضى الزوج وموافقته على القطع أو الإيقاف، ثم متى زال العذر أعيدت المرأة إلى حالتها الأولى".

والله طالما ظابط سقف التوقعات والمعقولات، وفاهم تقدير ذاتك كويس، وعارف نقاط قواها وضعفها، فاطمح براحتك، الطموح جميل، استعن بالله ولا تعجز :")

الله يرزقك التوفيق والسداد يا رب العالمين