مبدئيًا متسمعيش كلام معلمتك دي تاني، جماعة هو ايه حوار معلمتكم دي؟ يعني امتى ظهر المصطلح دا؟ والعلاقة بينكم بتقرب كدا ازاي إن أنتم تاخدوا رأيهم؟

طبعًا ارضي أهلك؛ النقاب بين الاستحباب والوجوب، وبر الأهل واجب ومقدم على النقاب، وديننا واسع جدًا؛ فلو عايزة تلبسي النقاب كعبادة فعلًا والنية خالصة لوجه لله، فهتاخدي ثواب العبادة (لبس النقاب) وإن لم تفعليها؛ لحديث سيدنا عمر "إنما الأعمال بالنيات".

ومن وقت للتاني انكشيهم بكل لطف وحب، ولا تزعليهم أبدًا، والمفروض لو أنت بتعمليه عبادة فمتزعليش برضو؛ لأنك هتكوني بتاخدي الثواب كدا كدا، فلو في زعل فإحنا محتاجين نراجع النية.

واتعلموا تختار الشخص اللي تسألوه الله يرضي عنكم، واختاروا مَن تأخذون عنه دينكم.


" إنسان "

مين صوّر للناس أن الدين يدعو للتصادم بين الناس؟

لا حول ولا قوة إلا بالله، زعلت والله من السؤال.

" إنسان "

السؤال دا من أكتر الأشياء المستفزة وبتعصب، ولو تعرف كم الزعل والعصبية اللي عمال أرد بيها وأحذف وأقول دول غلابة وضحايا فبراحة عليهم معلش، هتشفق عليا.

فأنا همتنع عن الرد عن أي سؤال شبيه، وبالمناسبة لو شوفت أي سؤال شبهه في المساق هخرج صاحبه :')

" إنسان "

علشان في خطوة قبل كل دا اسمها آداب التعلم حضرتك محتاج ترجعلها الأول :')

" إنسان "

فَأَوْجَسَ فِي نَفْسِهِ خِيفَةً مُّوسَى(٦٧) طه
سيدنا موسى عليه السلام لما السحرة رموا العُصيّ بتاعتهم وهو شافها اتحولت لثعابين ، فحس بخوف جواه
ولكن ألم يقل الله له إني معكما أسمع وأرى !!
فأتاه الرد من السماء فوراً
جاءه التثبيت من قيوم السماوات والأرض من الجبار سبحانه بأن لا تخف إنك أنت الاعلى
لا تخف يا موسى انت على الحق وهم على الباطل والحق ظاهر دائما
مينفعش تخاف أنت معاك الله انت معاك العليّ القادر سبحانه
ربنا مش هيتركك طول م انت بتبلغ عنه وبتنشر دينه
مهما الباطل اشتد ، طول م انت ماشي ع الطريق الصح
خلي ف بالك دايما قول الله لسيدنا موسى لا تخف إنك انت الاعلى
لما تلاقي الناس كلها شايفينك غلط ومستغربين ، اوقف بثبات وقولهم انا بتبع ربنا انتوا بقا بتتبعوا مين !!
خليك واثق دايما ان الله سينصرك
سيدنا موسى لما اتاه الرد تثبت واتشجع
وَأَلْقِ مَا فِي يَمِينِكَ تَلْقَفْ مَا صَنَعُوا إِنَّمَا صَنَعُوا كَيْدُ سَاحِرٍ وَلَا يُفْلِحُ السَّاحِرُ حَيْثُ أَتَى(٦٩)طه
إنما صنعوا كيد ساحر ولا يفلح الساحر حيث اتى
عمر م الباطل هيفلح ، عمر م المتبرجات هينتصروا على النقاب والحجاب
عمر م العلمانيين والكفار هيقدروا يوقفوا دين الله
مهما عملوا ومهما حطوا ف قوانين منع النقاب ومنع الحجاب ومحاربة المسلمين بدعوى الارهاب
ف الاخر ...
ولا يفلح الساحر حيث أتى
وإنك انت الاعلى
دين الله اعلى منهم ، فلن يمسوه
انت اعلى منهم انت معاك الله فتخاف ليه ، توكل على الله وأمضي هتلاقي ربنا معاك وهتلتقي ف الاخر ..
فألقي لسحرة سجداً قالوا آمنا برب هارون وموسى
سيدنا موسى لما يشوف المشهد دا قدامه
كان لازم ساعة م جنود فرعون حاصروه عند البحر يقف بكل يقين وينادي كلا إن معي ربي سيهدين..


لا تخش الباطل .. إنك أنت الاعلى

⚙️

حضرتك ليه بتسألينا لما أنت بالفعل واخدة القرار؟

من عموم البلوى انتشار الفتاوي بين العوام

رحم الله ابن عوف لما أوقف الفاروق عن الخطبة وسط العوام قائلًا: "يا أمير المؤمنين، إن الموسم يجمع رعاع الناس وغوغاءهم، وإنهم هم الذين يغلبون على قربك حين تقوم في الناس، وأنا أخشى أن تقوم فتقول مقالة يطير بها هؤلاء عنك كل مطير، وأن لا يعوها، وأن لا يضعوها على مواضعها، فأمهل حتى تقدم المدينة، فإنها دار الهجرة والسنة، فتخلص بأهل الفقه وأشراف الناس، فتقول ما قلت متمكنًا، فيعي أهل العلم مقالتك، ويضعونها على مواضعها.

عامةً، حضرتك تعرفي ايه هو ضابط الفتن الموجبة للنقاب؟ ولا أنت شايفة الدنيا بايظة، فقلت الزمن زمان فتن، وبدأ الإسلام غريبًا، ويلا؟

لا حول ولا قوة إلا بالله، ربنا يهدينا ويهديكم

" إنسان "

لأ عملت الصح وعين العقل، وفي أدب في سؤالك، وذلك فضل الله يؤتيه من يشاء.

ارضي الوالدة بطرق تانية، ومتدخليش في صدام خالص معاها، حتى لو لقيت منها تعليقات مش كويسة فعادي خالص زي ما قال أخونا تميم: بعض المعارك في خسرانها شرف، فمترديش عليها، وبريها قدر الإمكان، والزمي الدعاء.

ربنا يبارك فيك، ويرضيك، ويرضي عنك، ويصلح حالك، وييسرلك أمورك كلها يا رب العالمين.

" إنسان "

باعتة حالًا وعايزة الإجابة؟ الناس اللي باعتين من أول يوم العيد هيعرفوك غلطك -بنهزر طبعًا- :")

طب حضرتك واخدة بالك إنك لما قلتيلها لأ البسي الخمار أنت كدا ضليتيها؟ فايه رأيك تعتذريلها وتقوليلها معلش أنا مش أهل للسؤال وتعملي كدا مع أي حد يسألك؟ :')

" إنسان "

فبماذا يكون أمير؟

لأ طبعًا، الكفاءة مهمة في أمور الزواج.

" إنسان "

وضحنا إننا بنهزر بالمناسبة :V

" إنسان "

ما هو لو تاخد بالك أنا تقريبًا مقلتش رأيي أصلًا في النقاب، أنا كل دا صوتي بيتنبح إني أنبهكم ترجعوا خطوة ورا كدا قبل ما تتكلموا في الدين حتى لو نقلًا وتعرفوا مكانتكم وحجمكم، وإنكم تتعلموا آداب التعلم قبل الشروع في طلب العلم نفسه، وأن هذا العلم دين، فانظروا عمن تأخذون دينكم.

مش عايز منكم حاجة تاني :')

" إنسان "

بالنسبة للسؤال الأول فضابط الفتنة مرتبط بكثرة الفساد وانتشاره، وضعف الوازع الديني، والجمال الفائق للبنت، وانعدام الردع السلطاني؛ بأن لا تأمن المرأة على نفسها الخروج من البيت وهي مرتدية زي شرعي كامل، وأنا هنا أحب قول النبي -صلى الله عليه وسلم- لسيدنا وابصة بن معبد الأسدي: "يا وابصة، استفت قلبك؛ البر ما اطأنت إليه النفس واطمأن إليه القلب، والإثم ما حاك في القلب وتردد في الصدر، وإن أفتاك الناس وأفتوك".

أما فكرة الاقتناع من عدمه، فالأحكام لا تكون بهكذا طريقة، فاستفتي شيخًا ثقة تثقين بفتواه.

_

حاشية ضرورية للعقلاء: وابصة كان له قلب يفقه به :'D

" إنسان "

وأنا مالي إن حجمك قليل؟

دا اللي على راسه باطحة صحيح :'D

" إنسان "

لأ طبعًا، وهنا موقف سيدنا عمر -رضي الله عنه- لما سمع رجلًا يثني على آخر، فسأله: صحبته في السفر؟ فقال لا، فأتمنته على شيء؟ فقال لا، فقال سيدنا عمر: ويحك! لعلك رأيته يخفض ويرفع في المسجد.

بنقعد معاه ونعرف تفكيره وآراءه ونقيسهم على دوافعنا وأهدافنا وقيمنا، وبعدين نختبر كلامه بمواقف حقيقية في الخطوبة؛ وعلشان كدا بنقول خطوبة متقلش عن ٦ شهور.

ولا ننسى الاستخارة في كل خطوة وكل قرار

" إنسان "

لو شاب بيسألني هقوله لأ، وإن الأفضل يكون هو أعلى، يعني زي ما بيقول بشمهندس أيمن كدا لو هي مستواها ٢ لازم هو يكون ٤ مثلًا؛ علشان متتعبهوش، مش لما يقولها حاجة تقوله الإمام كذا بيقول كذا وما إلى ذلك.

لكن لو بنت فهقولها بقى إن لو الأمور تمام وهو كويس فعلًا في باقي الأشياء وواقفي على النقطة دي، فالشباب الكويسين قليلين، فمتضيعيش من ايديك فرصة كويسة، وعلى فكرة تأدية الفرائض دي مش حاجة عادية، دا ما تقرب العبد بشيء أحب إلى الله -سبحانه وتعالى- مما افترضه عليه كما في حديث سيدنا أبو هريرة -رضي الله عنه-، كما أن العلوم الشرعية مش شرط أساسي في العلاقة، أنتم مش هتتناقشوا في اختلاف المالكية والشافعية مثلًا، وزي ما بنقول دايمًا إحنا نهدف لإقامة زواج صحيح لا رائع.

وبالنسبة لحفظ القرآن فهسيبك كلامي هنا تقرأيه

https://t.me/Answer_Q/285

____
وطبعًا يعني المفروض لما تكون البنت متعلمة شرعي حسب كلامها فمش هتتعب زوجها، وعلشان كدا في اختلاف آراء حسب السائل.

" إنسان "

ومين قال بس إني روش وما إلى ذلك؟
أنا إنسان مسلم عادي خالص، كل ما في الموضوع إن أحيانًا لازم نقلع الفيونكة ونصدمكم شوية :'D

وبالله عليك أخوك في أمس الحاجة لهذا الدعاء، فكن صادقًا فيه :')

" إنسان "

أنا عن نفسي بسأل عن رأيه في الإختلاط، وشغل المرأة وعمل الأفراح، ومين الشيوخ اللي بيسمعلهم

أسئلة مفتوحة بتبينلي كل شيء محتاج أعرفه في النقطة دي
_
ومحدش يسألني عن رأيي كفاية قلت أسراري في كشف الناس😆

" إنسان "

والله أنت إنسان جميل، ويعني مش من عادتي إني أبرر، ولكن عيوننا للناس الجميلة الطيبة أمثالك، ربنا يبارك فيك، ويرضيك ويرضي عنك، ويرزقك خيري الدنيا والآخرة.

ولكن يا حبيب والله -نظرة الدين الكيوت- دي لا هي موجودة، ولا مستحبة، ولا كانت من هدي النبي -صلى الله عليه وسلم- ولا صحابته ولا تابعيهم، خد عندك مثلًا موقف سيدنا أبو مسلم الخولاني (وهو تابعي) مع سيدنا معاوية (وهو صحابي وهو الخليفة)، وهو بيقوله: إن هذا المال ليس بمالك ولا بمال أبيك ولا بمال أمك، خد عندك غضب النبي من أصحابه عند السؤال، يعني حرفيًا المواقف أحصى من أن تعد.

فلما حد يزعل إني بقوله اعرف حجمك في العلم، فلأ دا مينفعش أطبطب عليه

" إنسان "

علشان الدعوة الحلوة دي كلامنا ينزل المرة دي 😆

ببساطة شديدة الأمر مباح بضوابط: زي الإلتزام باللباس الشرعي، والإلتزام بضوابط الإختلاط، وإذن الزوج إن كانت متزوجة.

بل في أماكن أنا أرى إن لازم يكون للنساء وجود قوي فيها زي الطب مثلًا، بسأل دايمًا سؤال يعني ايه لما أسأل عن طبيبة نساء وتوليد شاطرة في المنطقة بتاعي (وهي كبيرة، وفيها أطباء لا حصر لهم) يتقالي مفيش ولا دكتورة شاطرة! فإحنا محتاجين طبيبات لعفة بنات المسلمين.

__
ولو بسأل السؤال دا لبنت، بتبعه دايمًا بماذا إن احتاجك بيتك وأولادك؟ وهنا بنشوف تفكير البنت برضو.


" إنسان "

طيب أنا هحسن الظن المرة دي وهجاوب وهفترض إنك مش بتجادل ولعل وعسى فعلًا الأمر يكون مش واضح فنستفاد كلنا، ولكن مش هرد تاني على سؤال في الموضوع دا من باب حديث أبو أمامة أن رسول الله قال: "أنا زعيم بيت في ربض الجنة لمن ترك المراء ولو كان محقًا".

فلأ كلام حضرتك مش مظبوط خالص، وكان يغضب النبي -صلى الله عليه وسلم- على أصحابه غضب محمود لتربيتهم في مواقف عدة، هبدأ فيها بما ذكرت أنت (محتاج يتعلم)، وهو ذم النبي للسؤال كما في حديث أبو هريرة "ذروني وما تركتكم، فإنما هلك الذين من قبلكم بمثرة مسائلهم واختلافهم على أنبيائهم، ما نهيتكم عنه فاجتنبوه، وما أمرتكم به فافعلوا٦د منه ما استطعتم"، وقال الله: "يا أيها الذين ءامنوا لا تسألوا عن أشياء إن تبد لكم تسؤكم".

وغضب النبي -صلى الله عليه وسلم- على سيدنا عمر في خلافه مع سيدنا أبو بكر وكان الصديق الأظلم، وغضب النبي من خباب لما سأله ألا تستنصر لنا، وغضب النبي من أسامة في حديث المرأة المخزومية، وغضب النبي من عائشة وقت الصور، وغضب النبي ممن يطيل الصلاة (حديث فيكم منفرين"، ومن الثلاثة الذين شقوا على أنفسهم

ولو دخلتلك على مواقف الصحابة والتابعين مش هنهتهي

فمعلش هذا ديننا

"إنسان"

سبحان الله والله لسه بقول فوق، ولكن كنت بقول لعل وعسى حد يستفاد فعلًا ويقتنع، وإلا والله فأنا مرديتش على الناس اللي شتمت، وأنا مسامحهم من كل قلبي (زي أولادي برضو)، ولكن خلاص كدا نهينا الموضوع، وأي سؤال زيادة هعتبره جدال فعلًا.

" إنسان "