والله الإنسان ممتن لكل هذه الدعوات الطيبة، ربنا يجازيك أضعاف مضعفة يا رب، ولا تحرمونا من صالح الدعاء دايمًا :')

___
من أصول التربية العلمية أن يربى الطالب على ملكة اكتشاف الأخطاء والرد عليها، فالمشكلة دائمًا ليست في وجود الخطأ، وإنما في طبيعة التعامل معه، وصدق من قال: فالطالب الذي لا يُدرّب نفسه على اكتشاف الخطأ وتمييز الصواب يعيش هشاشة علمية، ويتأثر بكل كا يقرأ دون تمحيص، ولهذا كان من مقاصد الطلب الشرعي أن يتربى الطالب على:
١-معرفة مواطن الزلل في الكتب.
٢-عرضها على منهاج أهل السنة والجماعة.
٣-امتلاك القدرة على اكتشاف الأخطاء والرد عليها بطريقة صحيحة.

" إنسان "

غالبًا السؤال من الدفعة التاسعة، لأنهم حاليًا في الكتاب التاني، لكن عمومًا الإجابة موجهة لكل الدفعات

تقليل المقرر للأسف مش متاح، لأن المقرر متقسم بالفعل بناءً على جدول يساعدنا نلتزم بمدة المساق، اللي هي تقريبًا سنة ونصف، بحيث كل مرحلة تاخد بإذن الله حوالي نصف سنة.

لكن لو حد مش متعود على القراءة، أو بيستثقلها، أو بسبب الانشغال، فأيًا كان السبب، نقدر نيسر على نفسنا بالطريقة دي:
نقسم المقرر على الأيام المحددة، ونستغل يوم الجمعة، فبدل ما تبقى مهمة واحدة كبيرة، تتحول لمهام صغيرة أسهل في التنفيذ.

كمان ممكن نخصص وقت ثابت للقراءة، ومع الوقت هيبقى عادة، وهتكون أسهل بإذن الله مع التدريج.

ومن الحاجات المهمة جدًا: استحضار الثمرة،
يعني حتى لو في مشقة، نفكر نفسنا إننا في الآخر بنخرج من الجلسة دي بفائدة. والتدوين هنا بيساعد جدًا، لأنه بيخلينا نشوف ثمرة المجهود قدامنا، وده بيكون دافع قوي للاستمرار.

وممكن كمان نكافئ نفسنا لما نلتزم، ونهيّئ الجو قبل ما نبدأ، زي إن يكون عندنا ركن مخصص للقراءة، حتى لو بسيط، يساعدنا نقبل أكتر عليها.

ده غير إن القراءة فعلًا ممتعة في حد ذاتها :')

وإحنا لازم نعمل كدا لأن إحنا بنهدف لكدا فعلًا، وبنعتمد إن المفروض أنت بعد فترة يتكون عندك العادة، وعلى الأساس دا فالكم بيكبر تدريجي، وكل مرحلة الكم بيزيد فيها بناءً على إنك المفروض اتكونت عندك العادة، والمفروض الوضع بقى أسهل وأيسر معاك

هي الناس لو تبطل تاخد الدين بقلبها، وتلبسه فيونكة

الأمور هتتحسن أوي😁

" إنسان "

محتاجين نتعلم تعليم منهجي طويل، نرسخ العلم والمعرفة؛ يعني مش مجرد نقول رأينا في موقف معين، لأ أنت المواقف بتحصل قدامك وترديها لشيء ثابت عندك، فتعرفي الصح من الغلط.

وعلى فكرة دا بيجي بمصاحبة فكر أهل العلم، يعني هحكيلك مثال بسيط: أنا في إمتحان عقيدة ٣ ثانوي أزهر، كان طالب رأي المعتزلة في شيء معين، وأنا خلاص خلصت الإمتحان ومش فاكر خالص المعتزلة قالوا ايه في النقطة دي (وأنا في الوقت دا كان عندي مشاكل ضخمة، وكنت بدخل الإمتحانات مش فاتح الكتاب حرفيًا)، وقتها قفلت الورقة بتاع الإمتحان، وقلت لنفسي أنت بقالك ٦ سنين بتسمع آراء المعتزلة، فلو أنت منهم هتقول ايه في الموقف دا؟

والله بفضل الله ربنا فتح عليا إني فكرت وجاوبت، ولما خرجت ببص في الكتاب لقيت المعتزلة قالوا نفس اللي أنا فكرت فيه بالظبط.
ونفس الفكر كان لما حد يقول الإمام الشافعي كذا، كنت أقوله طبقًا لنهج للإمام الشافعي اللي أنا أعرفه، فلأ ميقولش كدا، لكن أنا معرفش صحة الكلام، فمعلش اتأكد تاني، وكان يتأكد ويرجع يقولي كان عندك حق.

وعلى فكرة أنا حد بسيط خالص يعني بكلمك في منهج دراسي بس، لكن مكنتش بحفظ وواخده إمتحان وهيعدي، لأ كنت بحاول أشوف العقلية نفسها

"إنسان"

البناء المنهجي رائع جدًا، ولكن ذاكر كويس، واهتم بكل كلمة بتتقال فيه، مش تشوف المقرر ليلة الإمتحان، لأ حاول ترسخ المعرفة عندك، ومن بعده البناء الفكري.

وأنا برشح البناء لأنه سهل وبسيط جدًا، يعني في كلية تانية اسمها كلية العلوم الشرعية والعربية ورائعة جدًا، ولكنها دسمة جدًا ومحتاجة مجهود أكبر.

" إنسان "

مبدئيًا متسمعيش كلام معلمتك دي تاني، جماعة هو ايه حوار معلمتكم دي؟ يعني امتى ظهر المصطلح دا؟ والعلاقة بينكم بتقرب كدا ازاي إن أنتم تاخدوا رأيهم؟

طبعًا ارضي أهلك؛ النقاب بين الاستحباب والوجوب، وبر الأهل واجب ومقدم على النقاب، وديننا واسع جدًا؛ فلو عايزة تلبسي النقاب كعبادة فعلًا والنية خالصة لوجه لله، فهتاخدي ثواب العبادة (لبس النقاب) وإن لم تفعليها؛ لحديث سيدنا عمر "إنما الأعمال بالنيات".

ومن وقت للتاني انكشيهم بكل لطف وحب، ولا تزعليهم أبدًا، والمفروض لو أنت بتعمليه عبادة فمتزعليش برضو؛ لأنك هتكوني بتاخدي الثواب كدا كدا، فلو في زعل فإحنا محتاجين نراجع النية.

واتعلموا تختار الشخص اللي تسألوه الله يرضي عنكم، واختاروا مَن تأخذون عنه دينكم.


" إنسان "

مين صوّر للناس أن الدين يدعو للتصادم بين الناس؟

لا حول ولا قوة إلا بالله، زعلت والله من السؤال.

" إنسان "

السؤال دا من أكتر الأشياء المستفزة وبتعصب، ولو تعرف كم الزعل والعصبية اللي عمال أرد بيها وأحذف وأقول دول غلابة وضحايا فبراحة عليهم معلش، هتشفق عليا.

فأنا همتنع عن الرد عن أي سؤال شبيه، وبالمناسبة لو شوفت أي سؤال شبهه في المساق هخرج صاحبه :')

" إنسان "

علشان في خطوة قبل كل دا اسمها آداب التعلم حضرتك محتاج ترجعلها الأول :')

" إنسان "

فَأَوْجَسَ فِي نَفْسِهِ خِيفَةً مُّوسَى(٦٧) طه
سيدنا موسى عليه السلام لما السحرة رموا العُصيّ بتاعتهم وهو شافها اتحولت لثعابين ، فحس بخوف جواه
ولكن ألم يقل الله له إني معكما أسمع وأرى !!
فأتاه الرد من السماء فوراً
جاءه التثبيت من قيوم السماوات والأرض من الجبار سبحانه بأن لا تخف إنك أنت الاعلى
لا تخف يا موسى انت على الحق وهم على الباطل والحق ظاهر دائما
مينفعش تخاف أنت معاك الله انت معاك العليّ القادر سبحانه
ربنا مش هيتركك طول م انت بتبلغ عنه وبتنشر دينه
مهما الباطل اشتد ، طول م انت ماشي ع الطريق الصح
خلي ف بالك دايما قول الله لسيدنا موسى لا تخف إنك انت الاعلى
لما تلاقي الناس كلها شايفينك غلط ومستغربين ، اوقف بثبات وقولهم انا بتبع ربنا انتوا بقا بتتبعوا مين !!
خليك واثق دايما ان الله سينصرك
سيدنا موسى لما اتاه الرد تثبت واتشجع
وَأَلْقِ مَا فِي يَمِينِكَ تَلْقَفْ مَا صَنَعُوا إِنَّمَا صَنَعُوا كَيْدُ سَاحِرٍ وَلَا يُفْلِحُ السَّاحِرُ حَيْثُ أَتَى(٦٩)طه
إنما صنعوا كيد ساحر ولا يفلح الساحر حيث اتى
عمر م الباطل هيفلح ، عمر م المتبرجات هينتصروا على النقاب والحجاب
عمر م العلمانيين والكفار هيقدروا يوقفوا دين الله
مهما عملوا ومهما حطوا ف قوانين منع النقاب ومنع الحجاب ومحاربة المسلمين بدعوى الارهاب
ف الاخر ...
ولا يفلح الساحر حيث أتى
وإنك انت الاعلى
دين الله اعلى منهم ، فلن يمسوه
انت اعلى منهم انت معاك الله فتخاف ليه ، توكل على الله وأمضي هتلاقي ربنا معاك وهتلتقي ف الاخر ..
فألقي لسحرة سجداً قالوا آمنا برب هارون وموسى
سيدنا موسى لما يشوف المشهد دا قدامه
كان لازم ساعة م جنود فرعون حاصروه عند البحر يقف بكل يقين وينادي كلا إن معي ربي سيهدين..


لا تخش الباطل .. إنك أنت الاعلى

⚙️

حضرتك ليه بتسألينا لما أنت بالفعل واخدة القرار؟

من عموم البلوى انتشار الفتاوي بين العوام

رحم الله ابن عوف لما أوقف الفاروق عن الخطبة وسط العوام قائلًا: "يا أمير المؤمنين، إن الموسم يجمع رعاع الناس وغوغاءهم، وإنهم هم الذين يغلبون على قربك حين تقوم في الناس، وأنا أخشى أن تقوم فتقول مقالة يطير بها هؤلاء عنك كل مطير، وأن لا يعوها، وأن لا يضعوها على مواضعها، فأمهل حتى تقدم المدينة، فإنها دار الهجرة والسنة، فتخلص بأهل الفقه وأشراف الناس، فتقول ما قلت متمكنًا، فيعي أهل العلم مقالتك، ويضعونها على مواضعها.

عامةً، حضرتك تعرفي ايه هو ضابط الفتن الموجبة للنقاب؟ ولا أنت شايفة الدنيا بايظة، فقلت الزمن زمان فتن، وبدأ الإسلام غريبًا، ويلا؟

لا حول ولا قوة إلا بالله، ربنا يهدينا ويهديكم

" إنسان "

لأ عملت الصح وعين العقل، وفي أدب في سؤالك، وذلك فضل الله يؤتيه من يشاء.

ارضي الوالدة بطرق تانية، ومتدخليش في صدام خالص معاها، حتى لو لقيت منها تعليقات مش كويسة فعادي خالص زي ما قال أخونا تميم: بعض المعارك في خسرانها شرف، فمترديش عليها، وبريها قدر الإمكان، والزمي الدعاء.

ربنا يبارك فيك، ويرضيك، ويرضي عنك، ويصلح حالك، وييسرلك أمورك كلها يا رب العالمين.

" إنسان "

باعتة حالًا وعايزة الإجابة؟ الناس اللي باعتين من أول يوم العيد هيعرفوك غلطك -بنهزر طبعًا- :")

طب حضرتك واخدة بالك إنك لما قلتيلها لأ البسي الخمار أنت كدا ضليتيها؟ فايه رأيك تعتذريلها وتقوليلها معلش أنا مش أهل للسؤال وتعملي كدا مع أي حد يسألك؟ :')

" إنسان "

فبماذا يكون أمير؟

لأ طبعًا، الكفاءة مهمة في أمور الزواج.

" إنسان "

وضحنا إننا بنهزر بالمناسبة :V

" إنسان "

ما هو لو تاخد بالك أنا تقريبًا مقلتش رأيي أصلًا في النقاب، أنا كل دا صوتي بيتنبح إني أنبهكم ترجعوا خطوة ورا كدا قبل ما تتكلموا في الدين حتى لو نقلًا وتعرفوا مكانتكم وحجمكم، وإنكم تتعلموا آداب التعلم قبل الشروع في طلب العلم نفسه، وأن هذا العلم دين، فانظروا عمن تأخذون دينكم.

مش عايز منكم حاجة تاني :')

" إنسان "

بالنسبة للسؤال الأول فضابط الفتنة مرتبط بكثرة الفساد وانتشاره، وضعف الوازع الديني، والجمال الفائق للبنت، وانعدام الردع السلطاني؛ بأن لا تأمن المرأة على نفسها الخروج من البيت وهي مرتدية زي شرعي كامل، وأنا هنا أحب قول النبي -صلى الله عليه وسلم- لسيدنا وابصة بن معبد الأسدي: "يا وابصة، استفت قلبك؛ البر ما اطأنت إليه النفس واطمأن إليه القلب، والإثم ما حاك في القلب وتردد في الصدر، وإن أفتاك الناس وأفتوك".

أما فكرة الاقتناع من عدمه، فالأحكام لا تكون بهكذا طريقة، فاستفتي شيخًا ثقة تثقين بفتواه.

_

حاشية ضرورية للعقلاء: وابصة كان له قلب يفقه به :'D

" إنسان "

وأنا مالي إن حجمك قليل؟

دا اللي على راسه باطحة صحيح :'D

" إنسان "

لأ طبعًا، وهنا موقف سيدنا عمر -رضي الله عنه- لما سمع رجلًا يثني على آخر، فسأله: صحبته في السفر؟ فقال لا، فأتمنته على شيء؟ فقال لا، فقال سيدنا عمر: ويحك! لعلك رأيته يخفض ويرفع في المسجد.

بنقعد معاه ونعرف تفكيره وآراءه ونقيسهم على دوافعنا وأهدافنا وقيمنا، وبعدين نختبر كلامه بمواقف حقيقية في الخطوبة؛ وعلشان كدا بنقول خطوبة متقلش عن ٦ شهور.

ولا ننسى الاستخارة في كل خطوة وكل قرار

" إنسان "

لو شاب بيسألني هقوله لأ، وإن الأفضل يكون هو أعلى، يعني زي ما بيقول بشمهندس أيمن كدا لو هي مستواها ٢ لازم هو يكون ٤ مثلًا؛ علشان متتعبهوش، مش لما يقولها حاجة تقوله الإمام كذا بيقول كذا وما إلى ذلك.

لكن لو بنت فهقولها بقى إن لو الأمور تمام وهو كويس فعلًا في باقي الأشياء وواقفي على النقطة دي، فالشباب الكويسين قليلين، فمتضيعيش من ايديك فرصة كويسة، وعلى فكرة تأدية الفرائض دي مش حاجة عادية، دا ما تقرب العبد بشيء أحب إلى الله -سبحانه وتعالى- مما افترضه عليه كما في حديث سيدنا أبو هريرة -رضي الله عنه-، كما أن العلوم الشرعية مش شرط أساسي في العلاقة، أنتم مش هتتناقشوا في اختلاف المالكية والشافعية مثلًا، وزي ما بنقول دايمًا إحنا نهدف لإقامة زواج صحيح لا رائع.

وبالنسبة لحفظ القرآن فهسيبك كلامي هنا تقرأيه

https://t.me/Answer_Q/285

____
وطبعًا يعني المفروض لما تكون البنت متعلمة شرعي حسب كلامها فمش هتتعب زوجها، وعلشان كدا في اختلاف آراء حسب السائل.

" إنسان "