أولًا بنعتذر جدًا على التأخير، وبإذن الله يكون لسه في متسع من الوقت

ثانيًا خلينا نوضح نقطة مهمة لكل الناس، ألا وهي إن أنا بالفعل شوفت السؤال دا أكتر من مرة، ولكن كان بيكون تقيل عليا جدًا إني أرد عليه؛ بسبب إنك عايزانا ناخد قرار عنك، ودا للأسف مينفعش.
لازم لازم نعرف ناخد قرارتنا بأنفسنا يا جماعة، كان لأستاذة هدى النمر محاصرة في هذا الأمر ننصح بسماعها.

ثالثًا خلينا نقول رأينا إجمالًا وهو إن معيار المجتمع بايظ في تحديد فلان كويس ولا مش كويس، يعني تلاقي واحد مش بيصلي والناس تشهد إنه كويس علشان بيعاملهم حلو مثلًا، وقيسي على دا كتير جدًا، فمش معنى إنه كويس بنظرة المجتمع إنه يكون معظم لربنا وشريعته في قلبه، فحطي النقطة دي معاك في المعادلة.

رابعًا أنت ممكن تقعدي معاه مرة تانية وتتكلمي في حوار الأغاني والأفلام وتسمعي رأيه فيهم.

وعلى فكرة هنا مش مجرد ذنب أغاني وأفلام، لأ هنا في كمان مجاهرة بالذنب، فشوفي معادلاتك، واحسبي أمورك كويس، وصلي استخارة.

ربنا يصلح حالك يا رب، وييسرلك الخير حيث كان

" إنسان "

الاتنين طبعًا

-"الرجال قوامون على النساء بما فضل الله بعضهم على بعض وبما أنفقوا من أموالهم"، فهنا تكليف.

-"وللرجال عليهن درجة"، وهنا تشريف

" إنسان "

من ردودنا على شيء شبيه:



مفيش شك أبدًا إن القوامة تكليف ورعاية، ووضح دا ربنا -سبحانه وتعالى- في تكملة الآية، فقال: "الرجال قوامون على النساء بما فضل الله بعضهم على بعض وبما أنفقوا من أموالهم".

ولكن مفيش شك برضو أنها تشريف للزوج، وأن الزوج له مكانة أعلى من الزوجة؛ فقال الله -سبحانه وتعالى-: "ولهن مثل الذي عليهن بالمعروف وللرجال عليهن درجة".

والنبي -صلى الله عليه وسلم- يقول: "لو كنت آمرًا أحدًا أن يسجد لغير الله لأمرت المرأة أن تسجد لزوجها، والذي نفس محمد بيده لا تؤدي المرأة حق ربها حتى تؤدي حق زوجها، ولو سألها نفسها وهي على قتب (رحل يوضع على البعير) لم تمنعه".

وكذلك لما سألت ستنا أسماء بنت يزيد (وافدة النساء) -رضي الله عنها- للرسول -صلى الله عليه وسلم-، في حديث سيدنا جابر بن عبدالله -رضي الله عنه- قال: بينما نحن قعود عند رسول الله -صلى الله عليه وسلم- إذ أتته امرأة، فقالت: يا رسول الله، أنا وافدة النساء إليك، يا رسول الله رب النساء ورب الرجال الله عز وجل، وآدم أبو الرجال وأبو النساء، وحواء أم الرجال وأم النساء، وبعثك عز وجل إلى الرجال والنساء، فالرجال إذا خرجوا في سبيل الله فقتلوا فهم أحياء عند ربهم يرزقون، وإذا خرجوا فلهم من الأجر ما قد علمت، ونحن نخدمهم، ونحبس أنفسنا عليهم، فماذا لنا من الأجر؟ فقال لها رسول الله -صلى الله عليه وسلم-: "اقرئي النساء مني السلام، وقولي لهن: إن طاعة الزوج تعدل ما هنالك، وقليل منكن تفعله".

واخدة بالك إن الرسول -صلى الله عليه وسلم- ربط عظم أجر المرأة بطاعة زوجها؟

فإن كانت فعلًا القوامة تكليف ورعاية، فهنالك تشريف وعلو مكانة للرجل على امرأته.

الإمام ابن كثير عليه رحمة الله، يعلق على الآية هنا ويقول: أي في الفضيلة في الخَلق، والخُلق، والمنزلة، وطاعة الأمر، والإنفاق، والقيام بالمصالح، والفضل في الدنيا والآخرة.

والإمام عبدالرحمن بن ناصر السعدي -رحمه الله- يقول: رفعة ورياسة، وزيادة حق عليها، كما قال تعالى: "الرجال قوامون على النساء بما فضل الله بعضهم على بعض وبما أنفقوا من أموالهم"؛ ومنصب النبوة، والقضاء، والإمامة الصغرى والكبرى، وسائر الولايات [مختصٌّ] بالرجال، وله ضعفا ما لها في كثير من الأمور كالميراث ونحوه.

وفي الحقيقة الآية دي انتهت نهاية رائعة، وهنا أنا شخصيًا بقف معاها بقى "والله عزيز حكيم"، فأنا بحسها تنبيه للرجال وإن كان ليك تشريف وعلو مكانة وما إلى ذلك، فافتكر أن العزة لله وحده، فلا يغرنك هذا التشريف، واتق الله فيه.


والنبي -صلى الله عليه وسلم- لما اتسأل أي مال الرجل خير, قال: "أفضله لسان ذاكر، وقلب شاكر، وزوجة مؤمنة تعينه على إيمانه"، وفي رواية "ليتخذ أحدكم قلبًا شاكرًا، ولسانًا ذاكرًا، وزوجة مرمنة تعينه على أمر الآخرة".

فالأمر ببساطة شديدة جدًا يختصره قول الله -عز وجل- "ذلك فضل الله يؤتيه من يشاء".


ولكن ولكن ولكن دا مش معناه تسلط وتجبر زي ما النسوية تظهره، وعلشان كدا بنوصي إن البنت تختار شخص يتقي الله سبحانه وتعالى، وإنها وقت ما تكتب كتابها تبقى راضية إنها بتسلم نفسها لشخص هي متطمنة معاه، شخص هي راضية تقوله حاضر ومتطمنة إنه مش هيظلمها ولا هيجي عليها، ودا ال بنحاول نعمله عندنا، إننا نعلمكم تختاروا صح على أقل تقدير.

" إنسان "

مجهودنا يؤتي ثماره، الله يبارك فيكم :')

" إنسان "

ربنا يبارك في الوالد، ويوسع رزقه، ويغنيكم من فضله

استفتي شيخًا

" إنسان "

هذه أموركم مع الإشراف :'D

" إنسان "

اتعلمت أشياء مهمة عن الزواج، واتعلمت خطأ من أخطاء الصوفية، واتعلمت تصحيح له، وبذلك يكون التعليم.

فعامة العلوم لا تأخذ بهكذا تفكير، ويضيع العلم بين طيات هذا السؤال.

" إنسان "

إحنا الغرامات بنخرجها في صدقة جارية أو كفالة يتيم أو أعمال وقف خيري، فممكن حضرتك تخرجيها لأي عمل من هؤلاء حواليك.

_

طبعًا دا لأنها خرجت ومش مكملة معانا، إنما الناس الملتزمة معانا، فإحنا بعد فترة بننزل رقم نستقبل عليه الغرامات كلها بإذن الله.

بتقصيركم نبني صرحًا في الخير بإذن الله 😁

" إنسان "

على حسب هتقعدوا فين

يعني لو هتقعدوا في شقة منفصلة عن العائلة فممكن تعطيه فرصة وتشوفي أموره، ولكن لو في بيت العائلة، فالأفضل بلاش.

" إنسان "

والله يا جماعة إحنا عاطين أمر الإختلاط دا أكبر من حجمه خلافًا لمنهاج النبوة، وحقيقي مش عارف ليه وصلنا للمرحلة دي من تعظيم أشياء لم يكن يعظمها النبي -صلى الله عليه وسلم-، ولا صحابته، ولا تابعيهم رضي الله عن الرعيل الأول ممن اتبعوا النبي، واقتفوا أثره.

فببساطة يا إخواننا الإختلاط مش حرام، ولكن له ضوابط، فإن اختلت الضوابط وقعت الحرمانية، وعليه فإن جميع مساجدنا لا تمت لمنهاج النبي -صلى الله عليه وسلم- بصلة ولو من بعيد حتى (وفي الأمر تفصيل ليس له مكان الآن)، والأصل في المساجد حديث سيدنا أبو هريرة أن رسول الله قال:: "خير صفوف الرجال أولها، وشرها آخرها، وخير صفوف النساء آخرها، وشرها أولها"، فالأصل أن يصلي الرجال وخلفهم النساء بدون حاجز، وعليه فموقف الشيخ -ربنا يبارك فيه صحيح- سواء في الدروس أو التحفيظ.


" إنسان "

يعني تخيلوا الإمام أخطأ ولم يجلس في التشهد الأوسط، منين هتعرف النساء وهن في دور مختلف، ولا وراء حجاب؟

هيكون الإمام بيصلي في وادي، والنساء في وادي

رحم الله أبو الدرداء حينما بكى وقال لو بعث فينا رسول الله -صلى الله عليه وسلم- ما عرف منّا إلا قبلتنا، وخاب وخسر كل من بدل وغير نهج النبي صلى الله عليه وسلم.

" إنسان "

لأ أنا مقصدش العزلة في بيت العيلة، كدا كدا لو أي حد هيدخل عيلة فلازم نأكد على فكرة العزلة، ولكن أنا هنا بتكلم على برا البيت بالكلية؛ ودا علشان مينفعش نغامر بالتعامل مع أخوه سواء معاك، أو مع أولادك بعدين بإذن الله.

وكدا كدا مفيش ظلم في أمور الإختيار؛ المسألة إيجاب وقبول، فاحسبي أمورك، وصلي استخارة، وشوفي الأنسب ليك.

" إنسان "

والله الإنسان ممتن لكل هذه الدعوات الطيبة، ربنا يجازيك أضعاف مضعفة يا رب، ولا تحرمونا من صالح الدعاء دايمًا :')

___
من أصول التربية العلمية أن يربى الطالب على ملكة اكتشاف الأخطاء والرد عليها، فالمشكلة دائمًا ليست في وجود الخطأ، وإنما في طبيعة التعامل معه، وصدق من قال: فالطالب الذي لا يُدرّب نفسه على اكتشاف الخطأ وتمييز الصواب يعيش هشاشة علمية، ويتأثر بكل كا يقرأ دون تمحيص، ولهذا كان من مقاصد الطلب الشرعي أن يتربى الطالب على:
١-معرفة مواطن الزلل في الكتب.
٢-عرضها على منهاج أهل السنة والجماعة.
٣-امتلاك القدرة على اكتشاف الأخطاء والرد عليها بطريقة صحيحة.

" إنسان "

غالبًا السؤال من الدفعة التاسعة، لأنهم حاليًا في الكتاب التاني، لكن عمومًا الإجابة موجهة لكل الدفعات

تقليل المقرر للأسف مش متاح، لأن المقرر متقسم بالفعل بناءً على جدول يساعدنا نلتزم بمدة المساق، اللي هي تقريبًا سنة ونصف، بحيث كل مرحلة تاخد بإذن الله حوالي نصف سنة.

لكن لو حد مش متعود على القراءة، أو بيستثقلها، أو بسبب الانشغال، فأيًا كان السبب، نقدر نيسر على نفسنا بالطريقة دي:
نقسم المقرر على الأيام المحددة، ونستغل يوم الجمعة، فبدل ما تبقى مهمة واحدة كبيرة، تتحول لمهام صغيرة أسهل في التنفيذ.

كمان ممكن نخصص وقت ثابت للقراءة، ومع الوقت هيبقى عادة، وهتكون أسهل بإذن الله مع التدريج.

ومن الحاجات المهمة جدًا: استحضار الثمرة،
يعني حتى لو في مشقة، نفكر نفسنا إننا في الآخر بنخرج من الجلسة دي بفائدة. والتدوين هنا بيساعد جدًا، لأنه بيخلينا نشوف ثمرة المجهود قدامنا، وده بيكون دافع قوي للاستمرار.

وممكن كمان نكافئ نفسنا لما نلتزم، ونهيّئ الجو قبل ما نبدأ، زي إن يكون عندنا ركن مخصص للقراءة، حتى لو بسيط، يساعدنا نقبل أكتر عليها.

ده غير إن القراءة فعلًا ممتعة في حد ذاتها :')

وإحنا لازم نعمل كدا لأن إحنا بنهدف لكدا فعلًا، وبنعتمد إن المفروض أنت بعد فترة يتكون عندك العادة، وعلى الأساس دا فالكم بيكبر تدريجي، وكل مرحلة الكم بيزيد فيها بناءً على إنك المفروض اتكونت عندك العادة، والمفروض الوضع بقى أسهل وأيسر معاك

هي الناس لو تبطل تاخد الدين بقلبها، وتلبسه فيونكة

الأمور هتتحسن أوي😁

" إنسان "

محتاجين نتعلم تعليم منهجي طويل، نرسخ العلم والمعرفة؛ يعني مش مجرد نقول رأينا في موقف معين، لأ أنت المواقف بتحصل قدامك وترديها لشيء ثابت عندك، فتعرفي الصح من الغلط.

وعلى فكرة دا بيجي بمصاحبة فكر أهل العلم، يعني هحكيلك مثال بسيط: أنا في إمتحان عقيدة ٣ ثانوي أزهر، كان طالب رأي المعتزلة في شيء معين، وأنا خلاص خلصت الإمتحان ومش فاكر خالص المعتزلة قالوا ايه في النقطة دي (وأنا في الوقت دا كان عندي مشاكل ضخمة، وكنت بدخل الإمتحانات مش فاتح الكتاب حرفيًا)، وقتها قفلت الورقة بتاع الإمتحان، وقلت لنفسي أنت بقالك ٦ سنين بتسمع آراء المعتزلة، فلو أنت منهم هتقول ايه في الموقف دا؟

والله بفضل الله ربنا فتح عليا إني فكرت وجاوبت، ولما خرجت ببص في الكتاب لقيت المعتزلة قالوا نفس اللي أنا فكرت فيه بالظبط.
ونفس الفكر كان لما حد يقول الإمام الشافعي كذا، كنت أقوله طبقًا لنهج للإمام الشافعي اللي أنا أعرفه، فلأ ميقولش كدا، لكن أنا معرفش صحة الكلام، فمعلش اتأكد تاني، وكان يتأكد ويرجع يقولي كان عندك حق.

وعلى فكرة أنا حد بسيط خالص يعني بكلمك في منهج دراسي بس، لكن مكنتش بحفظ وواخده إمتحان وهيعدي، لأ كنت بحاول أشوف العقلية نفسها

"إنسان"

البناء المنهجي رائع جدًا، ولكن ذاكر كويس، واهتم بكل كلمة بتتقال فيه، مش تشوف المقرر ليلة الإمتحان، لأ حاول ترسخ المعرفة عندك، ومن بعده البناء الفكري.

وأنا برشح البناء لأنه سهل وبسيط جدًا، يعني في كلية تانية اسمها كلية العلوم الشرعية والعربية ورائعة جدًا، ولكنها دسمة جدًا ومحتاجة مجهود أكبر.

" إنسان "

مبدئيًا متسمعيش كلام معلمتك دي تاني، جماعة هو ايه حوار معلمتكم دي؟ يعني امتى ظهر المصطلح دا؟ والعلاقة بينكم بتقرب كدا ازاي إن أنتم تاخدوا رأيهم؟

طبعًا ارضي أهلك؛ النقاب بين الاستحباب والوجوب، وبر الأهل واجب ومقدم على النقاب، وديننا واسع جدًا؛ فلو عايزة تلبسي النقاب كعبادة فعلًا والنية خالصة لوجه لله، فهتاخدي ثواب العبادة (لبس النقاب) وإن لم تفعليها؛ لحديث سيدنا عمر "إنما الأعمال بالنيات".

ومن وقت للتاني انكشيهم بكل لطف وحب، ولا تزعليهم أبدًا، والمفروض لو أنت بتعمليه عبادة فمتزعليش برضو؛ لأنك هتكوني بتاخدي الثواب كدا كدا، فلو في زعل فإحنا محتاجين نراجع النية.

واتعلموا تختار الشخص اللي تسألوه الله يرضي عنكم، واختاروا مَن تأخذون عنه دينكم.


" إنسان "

مين صوّر للناس أن الدين يدعو للتصادم بين الناس؟

لا حول ولا قوة إلا بالله، زعلت والله من السؤال.

" إنسان "

السؤال دا من أكتر الأشياء المستفزة وبتعصب، ولو تعرف كم الزعل والعصبية اللي عمال أرد بيها وأحذف وأقول دول غلابة وضحايا فبراحة عليهم معلش، هتشفق عليا.

فأنا همتنع عن الرد عن أي سؤال شبيه، وبالمناسبة لو شوفت أي سؤال شبهه في المساق هخرج صاحبه :')

" إنسان "