بإذن الله اليوم الساعة ١٠ مساءً آخر ميعاد لاستقبال أسئلة، إحنا جاوبنا جزء لا بأس به، ولسه أكتر من ٦٠ سؤال لم يتم الإجابة عنهم، فمتقلقوش هنجاوبهم كلهم قدر الإمكان بإذن الله، ممكن نتأخر شوية بس لكثرة الأسئلة، فاعذرونا بقى.

قلنا نبلغكم علشان لو حد لسه عنده سؤال قبل ما نقفل الفورم :"D

لأ

-أولًا أنت مطالبة دايمًا بحسن الظن بالله -سبحانه وتعالى-؛ لأن سوء الظن به أمر محرم، فدايمًا لازم تحسني الظن بالله.

وكذلك الدعاء -وإن كان من الأمور المستحبة وليست الواجبة- إلا إن في تركه وفواته خير عظيم، دا بإضافة إننا مش بس بندعي ربنا علشان محتاجين حاجة، فبندعيه علشان يلبيها، لأ إحنا بندعي ربنا عبودية في المقام الأول.

فأنت مطالبة بالدعاء وحسن الظن في كل الحالات والأوقات.

-ثانيًا: حوار الفئة القليلة دا أمر نسبي، يعني هنبص عليه منين؟ من جهة عموم المسلمين ولا في دايرة معارفك أنت؟

لو هنبص في عموم المسلمين فأيوا النسبة قليلة، ولكن دي متهمناش أوي (في النطاق دا)؛ لأن أول مراحل السعي الزواج إننا نحط نفسنا في البيئة ال حابين نتجوز منها، ولما تحطي نفسك في البيئة دي فهتلاقيهم كتير على فكرة مش قليلين خالص.

-ثالثًا: وهي ايه تعريف المتدين ال أنت عايزاه دا؟ يعني بيعمل ايه؟
يعني بيصلي ويصوم وبيقرأ قرآن؟ ولا ملتحي؟ ولا طالب علم شرعي؟

كلمة "متدين" مطاطة جدًا، فحددي أنت عايزة ايه بالتحديد، واطلعي من كلمة متدين دي؛ علشان هتلاقي في توقعات وهمية كتيرة في الكلمة دي هنهدمها سوا بإذن الله، بمعنى آخر لا تحجري واسعًا

ممكن تشوفي الإجابة دي كمان لحد ما ندرس النقطة دي

https://t.me/Answer_Q/25

ودا اقتباس من كتاب الداء والدواء لابن القيم على مسألة سوء الظن بالله، وعايزك تقرأي المسألة الخاصة بالدعاء، هتلاقيها في أول جزء من الكتاب بإذن الله.

شتان بين الأمرين

-رفض فكرة الزواج إنك كارهة الموضوع ومش طايقة أي كلام فيه، وبتتخنقي كل ما تتفتح سيرته.

-عدم استعدادك ليه إنك متقبلة الفكرة، لكن شايفة إن ناقصك كام نقطة (محدداهم) ومحتاجة تعرفيهم قبل ما تاخدي الخطوة.

طيب أنت عملت ال اتفقنا عليه؟

مش كنا اتفقنا إنك محتاجة زيارة معالج أو طبيب نفسي، وقلنا إننا نحكي للوالدة؟

بالأشياء ال حكتيها الآن دي، فأنا شايف آثار وسواس، وبأكد تاني إنك محتاجة معالج نفسي، ومينفعش تتجوزي وأنت كدا محتاجة حد مختص وبشدة قبل ما الموضوع يكبر.

خطيبك حد كويس على فكرة وأنت لو فضلت كدا هتظلميه معاك، اتقي الله في نفسك وفيه وخدي خطوة الزيارة.

وأخيرًا مفيش حاجة اسمها متفقين إن ميكونش في كلام بينك وبين خطيبك، أومال يفرق ايه هو عن الغريب؟ ولا مخطوبين المدة دي كلها ليه؟ هتعرفيه ويعرفك ازاي؟ هتتجوزوا بناءً على ايه؟ ومخطوبين ليه بقى في الأصل؟ ما الخطوبة زي عدمها.

لازم يكون في كلام بينكم، ولا يشترط علم ولي الأمر، ودي فتوى الإمام ابن باز.


وعلى فكرة أنا لو حد جه قالي خطيبتي أو أهلها مانعين الكلام بينا، بقوله شوف بيت تاني على طول، النبي -صلى الله عليه وسلم- قال: "من يرد الله به خيرًا يفقهه في الدين"، فاتعلموا الفقه، واتأثروا بيه :"D

مع المقرر دا وجدولنا من سنة ونص لسنة و ٨ شهور، نقلل عن كدا ايه بقى؟ :"D

بنكرر لعاشر مرة إن المقرر مش كبير، ساعة في اليوم كفيلة إنك تخلص المقرر وتدخلي التقييم في ميعاده، فمعلش اعطوا الأمر أهمية أكبر، الموضوع يستحق منكم وقت وجهد أكتر من كدا.

ليه بتتعاملي مع الكلام وكأنه قرآن؟

رمضان لسه مخلصش، ولله عتقاء في كل ليلة، جدي واجتهدي فيما بقى، والحسنات يذهبن السيئات، وقد تتأخر فتسبق الجميع.

الليلة وترية، فاستغليها، وادعولنا معاكم.

القاعدة العامة حديث النبي -صلى الله عليه وسلم-: " لا ضرر ولا ضرار، ومن ضارَّ ضارَّ الله به، ومن شاقَّ شاقَّ الله عليه."

فأنت حر ما لم تضر :"D

كل عام وأنتم طيبين جميعًا، وتنعاد عليكم الأيام بكل خير يا رب العالمين.

"كتب عليكم الصيام ... لعلكم تتقون"، فمن علامات التقوى (ما كنت تجد وتجتهد له طوال شهر رمضان) أن تفرح بالعيد "ذلك ومن يعظم شعائر الله فإنها من تقوى القلوب".

أنا عارف كويس أوي أد ايه الوضع العام مؤلم، وأن الآلام لا تُحصى ولا تُعد، ولكن يومنا يوم عيد، فمهما كانت حالتك افرح، واخرج للصلاة رجلًا كنت أو امرأة وإن كنت حائض (ولكن لا تدخلي المصلى)، وزُر الأقارب والأصحاب، ولاعب الصغار، وأحيي سنة التكبير.

"لتعلم يهود أن في ديننا فسحة، إني أرسلت بحنيفية سمحة".


كل عام وأنتم بخير :")

عادة ببكون الإدمان بكل أنواعه رد فعل على مشاكل أخرى، فبنهرب منها للإدمان، فاولًا اقعدي مع نفسك وشوفي هل فعلًا دا موجود معاك؟ في أشياء ضاغطة عليك فبتهربي منها؟

ثانيًا اعرفي إن دايمًا صعب على النفس الإنسانية إننا نقولها لأ، فدايمًا العبي على نفسك من الناحية التانية، حاولي متخليش نفسك تلجأ للفعل فتقوليلها لأ متعمليهوش لأن حتمًا مش هتقدري، ولكن قللي وحدي من الأشياء ال ممكن تقولي عليها لأ، وفي كتاب اسمه "إراردة الإنسان في شفاء الإدمان" كويس جدًا في النقطة دي.

طيب نعمل دا ازاي؟
غيري نظام حياتك بالكلية، حطي نظام أصلًا لحياتك، ابدأي اظبطي يومك، وبداية ظبط اليوم بتبدأ من ظبط النوم.
شوفي محتاجة تعملي ايه، اعملي جداول خفيفة، ووزعي المهام على مدار اليوم، وأفضل طريقة لإدارة اليوم إنك تظبطيها على مواعيد الصلاة، وإنك تستشعري إن الصلاة إلى الصلاة مكفرات ما بينهن ما اجتنب الكبائر.

ومتكثريش من المهام على نفسك علشان ميتحولش الأمر لضغط عليك، فتهربي منه للإدمان مرة تانية :"D

اقرأي مقال "جسر التعب" في كتاب مسلكيات لإبراهيم السكران، وابدأي يلا :"D

وبعد فترة كدا لما تشدي حيلك ابقي اقرأي كتاب إدارة الوقت بين التراث والمعاصرة

اقرأي القايمة دي، ابدأي بمقال جسر التعب وقومي اقعدي مع نفسك زي ما قلنا، وبعدين اقرأي جدد حياتك، وبعدين الماجريات، وبعدين إرادة الإنسان في علاج الإدمان.

وممكن مع دول بالتوازي تاخدي كتاب إدارة الوقت، طويل شوية، فقسميه على أجزاء صغيرة كل يوم.

أهم شيء تتخلصي من وهم الكمال والمثالية وأنت بتجدولي أمورك.

وليه سعادة مؤقتة؟ وليه أصلًا الأمر مشكلة؟

نماذج الذكاء الاصطناعي زي Chat GPT و deepseek من الأشياء الجميلة جدًا ال ممكن تساعدك في شغلك وتوفر عليك وقت كبير، وكذلك من الأشياء ال ممكن تفكر معاك.

أنا بستعملهم كبديل للمدرسين والدكاترة الجامعين في ظل ضعف مستوى الدكاترة ال بنقابله في الجامعات، بعطيله نص الكتاب وأخليه يشرحلي وأستفسر منه على كل صغيرة وكبيرة.

كمان في نموذج من جوجل رائع جدًا، تعطيله المصادر سواء كتب أو لينك شيء معين، وتسأله في المحتوى ال أنت رافعه ليه دا ويرد عليك، فبيكون الأمر رائع جدًا، هسيبلك اللينك بتاعه.

ولكن علشان تستخدم النماذج دي لازم يكون عندك معرفة مسبقة ولو بسيطة في الأشياء ال بتستفسر منه فيها؛ علشان تعرف توجهه صح وتقدر تستخدمه بالشكل ال يفيدك (بمعنى آخر علشان متلخبطهوش)، آاه علشان أنت ال متلخبطهوش، إنما هو نموذج رائع وابن ناس كمان 😁

ايه المشاكل ال بتواجهنا في الأمور دي؟
هوضحهالك في إجابة أخرى :"D

مشاكل نماذج الذكاء الاصطناعي لما تعتمد عليها اعتماد كلي، وتخليها تفكر وتشتغل مكانك، هنا أنت بتساعد في تذكية النموذج (تجعله أذكى)، وتغبية نفسك (تجعلك أغبى).
وهنا لأن النموذج دا هو عبارة عن
Machine learning model
وطريقة عملها مبنية على
Try and error
المحاولة والخطأ، والتعلم من الخطأ في المرات ال بعد كدا، فأنت لما تعتمد عليه هتكون بتعلمه، وبتضعف نفسك على التفكير مع الوقت، فأنت استخدمه كآداة تساعدك في التعليم وتفكر معاك، مش آداة تستبدل بيها نفسك (ممكن الكلام دا لإخواتنا المهندسين أكتر، لا سيما المبرمجين).

أما بقى مشكلة النماذج دي على المستوى العام إنها بتجمع بيانات عنك؛ علشان أبينلك الأمر أكتر خليني أضربلك مثال بإيلون ماسك.

إيلون ماسك عمل نموذج زي دا اسمه Grok وضمه لشركة X (تويتر سابقًا)، فبقى فين المشكلة؟
بقى النموذج دا بيتغذى على بيانات الناس وتفاعلهم مع بعض على منصة X، وشوف بقى المنصة بيستخدمها كام مليون.

تاخد مثال آخر؟
مارك وشركة Meta، مارك عنده فيسبوك (تفاعل الناس في السوشيال ميديا)، وإنستجرام (تفاعل الناس على الصور والأمور البصرية)، وواتساب (تفاعل الناس بعمق بقى والأسرار ال بنحكيها لبعض)، تخيل بقى نموذج يتغذى على كل دا 😁

فاقرأوا كتاب الماجريات، وقاطعوا كل وسيلة سوشيال ملهاش لازمة، وعلى فكرة الفيس بوك ملهوش أي لازمة، وضرره أكبر من نفعه بمراحل :"D

أما بقى مشكلة إنك لا تعمل ولا تنفذ إلا القليل، فمعلش دي مشكلتك أنت، متلبسهاش للنماذج بنت الناس دي.

اقعد مع نفسك وشوف ايه معطلك، اعرف السبب، فإذا عرف السبب؟ شاطر، بطل العجب :"D

واقرأ مقال "جسر التعب"، أنا برشحه كتير؟ آسف والله، لكن كتب إبراهيم السكران كلها بتتاكل والله مش بتتقرأ.