عايز اضيف على كلام اخونا إنسان

الزواج مش حلو بس دا احلى حاجة في الحياة

اول حاجة السكن النفسي
تخيل ربنا بيقولك " لتسكنوا إليها "
ابن عاشور بيقول في تفسير لتسكنوا اليها دي
والسكون: هنا مستعار للتأنس وفرح النفس لأن في ذلك زوال اضطراب الوحشة والكمد والسكون الذي هو زوال اضطراب الجسم كما قالوا: اطمأن إلى كذا وانقطع إلى كذا.

تخيل مضاد للاضطراب والقلق معاك 24 ساعة


وف نفس الاية " وجعل بينكم مودة ورحمة "

ابن عباس بيقول : المودة حب الرجل امرأته، والرحمة رحمته إياها أن يصيبها بسوء
معاكي حد بيحبك وبيخاف عليكي من اي اذى يصيبك ويحتويكي وقت ضعفك

الانسان محتاج ايه ف الحياة اكتر من انه يبقا معاه حد بيحبه وبيخاف عليه ويحميه ويحتويه ويحسسه بالامان ويشاركه اهتماماته ويهون عليه المصائب

دا النبي ﷺ بيقول " الدنيا متاع وخير متاعها المرأة الصالحة "


تاني حاجة حفظ النفس من الانحراف واشباع الغريزة

قال رسول الله ﷺ ( فإنه أغض للبصر وأحصن للفرج )

ف انت عندك حصن وتخيل معنى كلمة حصن بيحميك من الانحراف


تالت حاجة باب رزق كبير

قال رسول الله ﷺ " ثلاثة حق على الله عونهم: المجاهد في سبيل الله، والمكاتب الذي يريد الأداء، والناكح الذي يريد العفاف "

وقال الله تعالى ( إن يكونوا فقراء يغنهم الله من فضله )

قال ابو بكر الصديق رصي الله عنه : أطيعوا الله فيما أمركم به من النكاح، ينجز لكم ما وعدكم من الغنى.
وقال ابن مسعود رضي الله عنه : التمسوا الغنى في النكاح.

رابع حاجة باب للحسنات

تخيل يا مؤمن ويا مؤمنه عظمة الدين في الزواج
انك تبقى بتستمتع بزوجتك او تستمتعي بزوجك ومع ذلك بتاخدوا حسنات لدرجة ان الصحابة نفسهم استغربوا

قال رسول الله ﷺ " وفي بضع أحدكم صدقة قالوا : يا رسول الله أيأتي أحدنا شهوته ويكون له فيها أجر ؟
قال : أرأيتم لو وضعها في حرام ، أكان عليه وزر ؟ فكذلك إذا وضعها في الحلال كان له أجر "

ودي من اعظم الحاجات اللي ف الزواج سبحان الله


انا لو كملت ممكن اكتب لبكرا 😅

ف اكتفي بهذا القدر
اسأل الله ان يزوجنا واياكم عاجلا غير آجل

⚙️

بالنسبة بقا للسؤال دا اللي خلاني اكتب اللي فوق


نأخذ بالاسباب من القبول والتكافؤ
ويكون الدين هو المرجع الاساسي للاختيار وهو الحكم في الاختلافات

كل ما يكون هناك مرجعية متفق عليها في الاختلافات كل ما التوصل لحلول هيكون اسرع
ومعلوم ان الاختلاف وارد ف كل م يكون الامر بين الزوج والزوجة كل م يتحل اسرع والامور تستقر ان شاء الله
وحفظ اسرار البيوت من اسباب الفلاح والاستمرار

والدعاء بان يصلح الله لنا أزواجنا وزوجاتنا وان يصلحنا لهم

وتحصين النفس بالاذكار والقرآن


كل دي اسباب تجلب البركة والطمأنينة في البيت وتخلي الدنيا سمسم ان شاءالله

⚙️

لا ننصح بهذا، الكفاءة العلمية مهمة جدًا جدًا

" إنسان "

إحنا ليه بنفصل بين الزواج والعبادة؟

في حديث سيدنا أنس بن مالك -رضي الله عنه- أن رسول الله -صلى الله عليه وسلم- قال: "من رزقه الله امرأة صالحة، فقد أعانه على شطر دينه، فليتق الله في الشطر الباقي"، فأنت لما تحطي نفسك في بيئة حفظ القرآن، فين المشكلة لما نطلب معاها الصحبة الصالحة، والبيئة الصالحة، والسعي للزواج من هذه البيئة...إلخ؟ دا حتى تعدد النوايا شيء مستحب، وقد يبلغ المرء بنواياه ما لا يبلغه بعمله.

فاخلقوا لنفسكم البيئة دي يا إخواننا، ووالله لو مش هتيجي بزواج، فعلى الأقل تحري صحبة صالحة؛ ففي حديث سيدنا أبو موسى الأشعري "مثل الجليس الصالح ومثل الجليس السوء، كحامل المسك ونافخ الكير، فحامل المسك إما أن تبتاع منه أو تجد منه ريحًا طيبًا، ونافخ الكير إما أن يحرق ثيابك أو تجد منه ريحًا خبيثة"؛ أنا لا أتخيل الحياة بدون صديق مقرب يحمل نفس أفكاري وهمومي، فإياكم والدعوة إلى العزلة.

وعامةً فالسعي سبب، وإلا فوالله الأمر لا يخرج من مظلة الرزق، واستعينوا على قضاء حوائجكم بالذكر والدعاء.

" إنسان "

الله يبارك فيكم، ويرضيكم ويرضي عنكم، وييسرلكم الأمور كلها يا رب العالمين

عرفتوا ليه بنقول مهم نعرض المشكلة؟

" إنسان "

ربنا يبارك فيكم، ويرضي عنكم، وهذا من فضل الله علينا والله

أيوا طبعًا ممكن، وكل ما في القناة فهو للعامة، حتى في استقبال الأسئلة فهو للجميع بفضل الله.

" إنسان "

عليكم السلام ورحمة الله وبركاته

في عيوب خلقية واجب اخبار بها الخاطب او المخطوبة قبل العقد زي العيوب التي تمنع الوطء
او الامراض اللي ممكن تنتقل للطرف الاخر
او العيوب التي تؤثر على الحياة الزوجية

واما العيوب اللي لا تؤثر على حياتك الزوجية لا يلزم اخباره بيها

وحضرتك بتقولي مش مأثره عليكي ومن المعلوم ان الانسان يستطيع ان يعيش بكلية واحدة
ف ظني انه لا يلزمك اخباره
والافضل اخباره طبعا واتقاء الشبهه

ونصيحتي استفتي شيخا برضو عشان تكوني على بينه

⚙️

نفس الاجابة اللي فوق

ايه المشكلة انه يكون عندك ضرس مخلوع !
مفيهاش حاجة اصلا

⚙️

وعليكم السلام ورحمة الله وبركاته
أنا مقدرة جدًا والله قلقك وتعبك من كتر التفكير في الموضوع وخصوصًا إنه بقاله سنين، الله يجبر قلبك ويلطف بيكِ ويعفو عنك.

وزي ما قلتلك في الرسالة اللي فاتت، اللي حصل ده مش دليل على أي حاجة وحشة تعيبك أو إنك عملتي شيء غلط، فهوّني عليكِ، نقدر نقول دي كانت مجرد حادثة غصب عنك وأنتِ صغيرة ووارد إنها تحصل مع أي حد، ومش معناه أبدًا إنك فقدتي عفتك وما شابه ذلك يعني، وفي بنات كتير بيمروا بحاجات شبه كده، وبيتجوزوا عادي جدًا ومش بيحصل أي مشكلة.

وأنتِ مش مطالبة إنك تقولي لحد أي حاجة عن الموضوع ده، لا لأهلك ولا لزوجك مستقبلًا، لإنك معملتيش شيء غلط، فمتحمليش نفسك عبء إنك لازم تقولي،
وموضوع العملية ده مش حل نفسي ولا عملي ليكِ، لأن أصل المشكلة في الخوف والوسواس الكبير اللي جواكِ، ف ده اللي عايزين نشتغل عليه ونحله بإذن الله.

طيب نتعامل مع الوساوس دي إزاي بقى:-
• أول ما الأفكار تيجي في بالك استعيذي بالله من الشيطان الرجيم، حافظي على أذكارك واقرئي المعوذات، فالوساوس دي أصلها من الشيطان.
• أكثري من الدعاء، وادعي: اللهم لا تكلني إلى نفسي طرفة عين.
• كل لحظة ضعف بتعدي عليكِ، هي فرصة إنك تقربي أكتر من ربنا عز وجل، وربنا أرحم بينا من كل اللي بنقوله لنفسنا في لحظات ضعفنا.
• وأحسني الظن بالله وبلاش تحلّلي وتفكّري في أسوء الاحتمالات اللي ممكن تحصل، واقطعيها فورًا ومتحاوليش توصلي لإجابة نهائية، واشغلي نفسك بحاجة تانية.
• تعرّفي على بعض الأخوات الصالحات، فإن المرء بإخوانه.
• ولو حاسة إن الموضوع مأثر عليكِ وبيتكرر معاكِ بالشكل ده، ممكن تكلمي دكتورة نفسية تساعدك ترتّبي أفكارك وتريحي نفسك.
• ولما ربنا يرزقك بزوج صالح بإذن الله فيما بعد، مهم جدًا تتثقفي أنتِ وزوجك فيما يتعلق بالأمور دي، لأن في جهل منتشر حوالينا كتير، وفهم الموضوع بشكل صحيح هيمنع أي سوء ظن أو قلق ممكن يحصل، فرج الله كربك.
🌱

عليكم السلام ورحمة الله وبركاته

ربنا يصلح حالك مع والدتك دايما وجزاكي الله خيرا على مشاركتك ف النصيحة للسائل

بس عايز اقولك اني سبت اللي ف ايدي مخصوص ورديت ع الرسالة عشان ضحكتني اوي

حضرتك قايلة فوق "مترقبة" و "مفكرة نفسي"

ف انتي بنت 😁
ربنا يرزقك الزوج الصالح عاجلا غير اجل ويرزقك بر والدتك ويرزقك رضاها
انه ولي ذلك والقادر عليه

⚙️

بتتعاملوا مع الموضوع إنه سر قومي ليه؟

شوفوا يا جماعة، فلانة بنت فلان أمها زعقتلها وعيطت😆

" إنسان "

عن حذيفة بن اليمان -رضي الله عنه- أن رسول الله -صلى الله عليه وسلم- قال: "تعرض الفتن على القلوب عرض الحصير عودًا عودًا، فأي قلب أشربها نكتت فيه نكتة سوداء، وأي قلب أنكرها نكتت فيه نكتة بيضاء، حتى يصير قلبه أبيض مثل الصفا، لا تضره فتنة ما دامت السماوات والأرض، والآخر أسود مربدًا كالجوز مجخيًا؛ لا يعرف معروفًا ولا ينكر منكرًا إلا ما أُشرب من هواه".

فوالله لا أرى وصف للريلز إلا كالفتن تعرض على القلوب عرض الحصير عودًا عودًا، وسبحان الله، ما أبدع الوصف النبي؛ صلوات ربي عليه؛ أوتي جوامع الكلم.

" إنسان "

أنا بشوف إن أفضل حل إن حضرتك تقعدي معاها وتتصافوا سوا، وتحكيلها كل ما في قلبك، ويكون دا كله بنية الإصلاح، ربنا يصلح ما بينكم يا رب العالمين.

وهستأذنك تقرأي الإجابة دي كمان

https://t.me/Answer_Q/566

" إنسان "

وفي كمان أبلكيشن رائع اسمه
minimalist phone
بيخلي التطبيقات كلها مكتوبة مش أيقونات، والخلفية سوداء تمامًا، ولو قلتله أنا في أبلكيشن كذا وكذا عايز أقلل تواجدي عليه، هيكون كل ما تفتحه يقولك متأكد إنك عايز تبقى هنا؟ طب هتقعد مدة أد ايه؟ خلصت المدة تلاقيه جايلك تاني وجايبلك إحصاء بعدد ساعات اليوم والأسبوع.

حاجة رائعة أوي أوي يعني، ومجاني تمامًا، ولو عايز تشتريه للأبد فهو ب ١٤٠ جنيه، فأنصح بيه بشدة.

" إنسان "

الهُوية يا بني آدم

والله أنا أساسًا لا قرأت كتاب في الموضوع، ولا في مرة اهتميت بحاجة زي دي خالص والله العظيم -سبحان الله يعني-، لكن أظنها من القراءة الحمد لله رب العالمين؛ حتى أنا بقول دايمًا لو حد متعلم كويس هيطلع لي أخطاء كثيرة.

لكن عامةً في كتاب صغير كدا كنا بنستلمه في أولى إعدادي أزهر، وكان عبارة عن منهج ٣ سنين مع بعض -أنا مفتحتهوش قبل كدا- كان بيهتم بالإملاء وعلامات الترقيم والكتابة الصحيحة، أظنه هيكون محترم ووافي جدًا.

" إنسان "

يا أخي اتق الله، إحنا فاتحين يوم العيد بعد العصر

حقكم علينا والله، ايه رأيكم تتعاملوا مع الإجابات تعامل "ذلك فضل الله يؤتيه من يشاء"؛ لأن والله الأسئلة كثيرة، ونحن نسدد ونقارب.

ووالله بنسعى نضم ناس أكتر للرد على الأسئلة، وحقيقي بنعتذر، وطمعانين تدعولنا بالتيسير والبركة.

" إنسان "

يعني أنا أرى إن مفيش قاعدة ثابتة في الموضوع؛ في مواقف عين العقل فيها أن تسيطر العاطفة، وعامة هم الاتنين مش في نزاع مع بعض يعني، بل من المذموم أن لا تعقل بقلبك، وعلشان نحسم الموضوع خلينا نذكر قول الله -سبحانه وتعالى- "لهم قلوب لا يفقهون بها" في ذم أهل النار، حتى أن النبي -صلى الله عليه وسلم- لما جاء إليه سيدنا وابصة بن معبد الأسدي يسأله عن البر والإثم، قال له رسول الله: "يا وابصة، استفت قلبك؛ البر ما اطمأنت إليه النفس واطمأن إليه القلب، والإثم ما حاك في القلب وتردد في الصدر، وإن أفتاك الناس وأفتوك".

وفي نفس الوقت في حديث سيدنا عبدالله بن مسعود: "حرم على النار كل هين، لين، سهل، قريب من الناس"

فببساطة تأنى في القرارات، واعقل الأمر بقلبك

" إنسان "

وعليكم السلام ورحمة الله وبركاته.
المرأة تعرف الطهر بإحدى علامتين: الجفاف، أو القصة البيضاء، فأيتهما رأت أولاً وجب عليها أن تغتسل، ومن شكت في حصول الطهر، فالأصل بقاء الحيض، فتستصحب هذا الأصل حتى يحصل لها يقين بخلافه.
وللتأكد من الطهر؛ المرأة تمسح بقطنة أو شيء آخر فإذا لم يكن فيه أثر للدم تغتسل - حتى لو ما رأت القصة البيضاء- ، فالقصة البيضاء هي ماء أبيض يظهر عند بعض النساء، وبعض النساء لا تجد هذا، فالعبرة بوجود الجفاف.

وبالنسبة للصلوات الواجب قضاؤها:-
فإذا طهرت المرأة قبل شروق الشمس: تصلي الفجر فقط
وإذا طهرت بعد شروق الشمس: لا شيء عليها ولا تصلي شيء
وإذا طهرت قبل غروب الشمس: تصلي الظهر والعصر
وإذا طهرت بعد صلاة العشاء: تصلي المغرب والعشاء
وإذا طهرت قبل طلوع الفجر: تصلي المغرب والعشاء

فمثلًا، المرأة إذا تيقنت من الطهر قبل الفجر، فبالنسبة للصيام؛ وجب عليها أن تنوي الصيام، فإذا نوَت صح صومها، سواء اغتسلت قبل الفجر أم بعده،
لكن ننبه إلى أمر مهم، وهو أن الغسل يجب عليها لكي تُصلي المغرب والعشاء، لأنها طهرت قبل الفجر (في وقت العشاء)، فلا يجوز لها أن تضيع الصلاة، بل تسارع بالغسل لكي تصلي.
فتوى للشيخ ابن باز -رحمه الله-
🌱