اللي يحددها انتي
المهم انك لو اخترتي تشتغلي تخلي بالك من الاختلاط ومتخليش دا يأثر على بيتك


بالنسبة للنقاب في الرؤية ف هو لازم يشوفك بدون نقاب
اعتبريه كانك بتعتمري ولازم تخلعيه

لكن هو له الحق انه يشوفك ف طبيعي لازم تخلعي النقاب
تقعدي بالنقاب لو هو شافك واقتنع بالشكل تمام خلاص لا حاجة لرفع النقاب وتقدري تكملي الرؤية بيه

⚙️

اهلك لما بيساعدوكي هم مش منتظرين منك تردي ليهم المقابل
دا واجب عليهم
ف انتي عادي ممكن كل شهر تجيبي هدية لمامتك من باب البر وكدا

ولكن كلامك مش غلط عادي طالما هو مالك
ولكن الاحسن انك توازني بين كل الامور لانك بتستقطعي من وقت بيتك عشان شغلك برضو ف بيتك ليه حق

⚙️

اهلك عندهم حق بعيدا عن انهم ميعرفوش هو عمل ايه اصلا فرق السن كبير

ثم انك مينفعش تهتكي ستر الله عليكي
اذنبتي ربنا سترك وتوبتي وتاب الله عن من تاب
خلاص امسحي الماضي دا من حياتك وابدأي حياة جديدة ولا تفسدي حياتك بايدك

ولو اهلك وافقوا على هذا الرجل ارفضي انتي

⚙️

الاهم من تكافؤ الكليات هو تكافؤ العقليات

بلاش احساس ان حد احسن من حد عامة طالما ان التفكير متقارب وانتوا الاتنين متعلمين مش حد جاهل وحد متعلم يعني

انتي لو حستي انه بيتعامل من هذا المنطق اصلا اتركيه
وطبعا الدين بيقوم سلوك الانسان

مش شايف اي مشكلة ان شاء الله

⚙️

اولا ربنا يجازيكي خير على مساعدتك لوالدتك وثانيا جزاكي الله خير على كل هذه الدعوات الطيبة
ربنا يرزقكم بالمثل وزيادة


بالنسبة للمشكلة بتاعة حضرتك ف انا شايف ان الشخصيات اللي والدتك بتيجي بالسياسة
يعني اوقات الروقان واوقات الصفا افتحي معاها موضوع حاجة من الحاجات اللي ملهاش لزمة دي
قوليلها احنا ليه عندنا الحاجة دي وبنعمل بيها ايه وهاتيها ف الكلام واحدة واحدة

بلاش تبقي بتهاجمي حاولي تظهري بمظهر اللي بيسأل وان شاء الله يا تقنعكم يا تقنعوها


⚙️

عليكم السلام ورحمة الله وبركاته
حضرتك عندك حق جدا
جزاكي الله خيرا

⚙️

عليكم السلام ورحمة الله وبركاته

راجعت كلامي بعد السؤال دا كذا مرة فوجدت اني قولت استخدام التعدد بعد النصح مرة واتنين وتلاته

بعدين نصحت بتدخل حد حكيم من الاهل يحل الموضوع

ثم ف الاخر نصحت باستخدام التعدد

وانا اصحح كلامي دلوقتي
انه واجب عليك النصح وتذكريها بحقك عليها وحق بيتها عليها
وان النبي امرها بحسن التبعل

قال النبي ﷺ ( خير النساء التي تسره إذا نظر، وتطيعه إذا أمر، ولا تخالفه فيما يكره في نفسها وماله.)

وابذل جهدك في اصلاحها

وان وجدت انك لا تطيق ذلك وان الامر مؤثر عليك للدرجة ومفيش اي حل من اهلها ولا اهلك وتستطيع ان تتزوج ثانية فافعل
ولكن العدل العدل يا اخي
ربنا يصلح حالكم

جزاكم الله خيرا على التذكير
الله يجعلنا من المتقين

⚙️

وعليكم السلام ورحمة الله وبركاته
ومين فينا مش بيغلط ! ومين فينا معصوم !
كلنا بشر، ولولا ستر الله عز وجل علينا كنا ضعنا،
وهذه وسوسة من الشيطان أنك "منافقة" حتى يبعدك عن هذه العبادة التي اصطفاكِ الله سبحانه وتعالى لها، لكنك لستِ كذلك، فلا تخلعيه بارك الله فيكِ.
ومش المطلوب منك إنك ماتغلطيش أبدًا بعد ما لبستي النقاب؛ بل المطلوب منك إنك تجاهدي نفسك، إنك تبعدي عن المعاصي وأسبابها، وتبعدي عن أى طريق يقربك منها، تختاري صحبة صالحة وتحطي نفسك وسطهم علشان تذكروا بعض بالله عز وجل وتشجعوا بعض، وقبل كل ده وأهم نقطة إنك تستعيني بالله فى كل وقت وتطلبي منه أن يوفقك لكل ما يُحب ويرضى ويعينك على ذكره وشكره وحُسن عبادته.
وبلاش جملة "تعيشي سنك"، وكأن الحجاب بيسلب حياتنا !

واحتسبي أجر عبادة في زمن الغفلة وانتشار الفتن،
كما قال النبيﷺ: "عبادة في الهرج كهجرة إليّ"
يعني لبسك للنقاب في زمن الفتن، له أجر عظيم كالهجرة للنبي ﷺ.
والنقاب على قول العلماء إمّا فرض أو مستحب،
فلو لبستيه وهو فرض، فإنتي بتتقرّبي لربنا بأحبّ شيء إليه: (وما تَقَرَّبَ إليّ عبدي بشيءٍ أحبَّ إليَّ ممّا افترضتُ عليه).
ولو مستحب، فإنتي كده بتطبقي السنة، وداخلة في حديث: (وما يزال عبدي يتقرّب إليّ بالنوافل حتى أحبّه).
فأنتِ في جميع الأحوال مأجورة، نسأل الله سبحانه وتعالى أن يثبتك عليه وأن يرفع به درجاتك.
🌱

واقرأي الرد هنا كمان هيفيدك بإذن الله.

قال الله تعالى:"وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِّمَنْ أَرَادَ أَن يَذَّكَّرَ أَوْ أَرَادَ شُكُورًا"
يعني الله عز وجل جعل الأيام ورا بعض، والليل ييجي بعد النهار، عشان اللي يفوته الطاعة بالنهار يقضيها بالليل والعكس.
فحتى لو ضاع منك موسم الطاعة،
تقدري دلوقتي ترجعي وتستعدي لموسم العشر القادم بإذن الله،

ثبتي الأساسيات والخطوط الحمراء للعبادات؛
لو بتضيعي صلاتك، حافظي عليها في وقتها،
ولو بتعملي معصية، توبي منها حالا
باب الله عز وجل مفتوح في كل وقت وهيقبلك بس أنت ارجعي، "إنَّ اللهَ عزَّ وجلَّ يبسُطُ يدَه باللَّيلِ ليتوبَ مسيءُ النَّهارِ ، ويبسُطُ يدَه بالنَّهارِ ليتوبَ مسيءُ اللَّيلِ"

والانتصار الحقيقي مش في رمضان والشياطين محبوسة، الانتصار هو دلوقتي والمعركة شغالة.
فاستعيني بالله وابدأي من دلوقت، وبلاش يأس، وافتكري دايمًا إنك مهما وقعتِ تقدري ترجعي، وإن رب شوال هو رب رمضان ورب كل الشهور.
🌱

واقرأي الرد هنا كمان.

هون عليك

عن أبي هريرة -رضي الله عنه- أن رجلًا قال: يا رسول الله، إن لي قرابة أصلهم ويقطعونني، وأحسن إليهم ويسيئون إلي، وأحلهم عنهم ويجهلون علي، فقال رسول الله -صلى الله عليه وسلم-: "لئن كان كما تقول، فكأنما تسفهم المل (تطعمهم الرماد الحار)، ولا يزال معك من الله ظهيرًا ما دمت على ذلك".

فهون عليك والله ثوابك عند ربنا -سبحانه وتعالى- عظيم جدًا، ولكن مينفعش ندعي عليها وإن كانت ظالمة؛ لأننا مأمورين بالإحسان والبر، وإن أساءت هي؛ ففي حديث سيدنا عبدالله بن عمرو: "ليس الواصل بالمكافئ، ولكن الواصل الذي إذا قطعت رحمه وصلها".

ولكن البر والإحسان لا يلزم طاعتهم فيما يضرك؛ فإنما جاء الشرع لرفع الضرر، ومنع الأذى؛ ففي حديث سيدنا أبو سعيد الخدري: "لا ضرر ولا ضرار".

فايه أخبار الوالد؟ متاح نروح نقعد معاه؟ أو حد تاني من العيلة كالحد والجدة، والأخوال والأعمام مثلًا؟

" إنسان "

جماعة، في أسئلة بتكون عادي تتعرض أمام العامة، ومحدش هيعرف مين صاحبها، ولا فيها ما يخدش الحياء العام.

سؤال عادي جدًا، ولكن صاحبه يرفض أن يظهره، فمعلش مثل هذه الأسئلة مش هنجاوبها؛ لأننا قبل الاستفادة الشخصية فإحنا عايزين استفادة عامة للجميع، وخاصة مع ضغط الأسئلة، وإن في أسئلة بتكون مكررة، فبالتالي ممكن الشخص ميتردش عليه، ولكنه يستفاد من الإجابة على شخص تاني.

#الإدارة.

خلينا متفقين أن التهديد بالتعدد من سوء العشرة، ولكن مفيش حاجة اسمها التهديد بالتعدد حرام في المطلق، مفيش أصلًا فتوى كدا في المطلق، وقبل أي فتوى لازم نبحث عن كل معطيات الأمر.

فإحنا معانا زوجة مهملة، مش نظيفة، لا تقوم بحق زوجها، كرهت الراجل في عيشته، فهل أنا في الحالة دي لما أقولها -بعد ما حاولت أعالج الأمر بشتى الطرق، وكلمت أهلها وبلا بلا بلا- إني هعدد يبقى حرام؟ ما لكم كيف تحكمون؟

فعامة إحنا لما بنعطيكم مساحة ويساء استخدامها بنحجمها ونمنعها زي ما عملنا في جزء إخفاء الرسالة كدا لما لقينا الناس تسيء استخدامها بدون مبرر، فمتخلوناش نروح للحتة دي كمان في جزء المشاركة منكم.

#الإدارة.

ربنا يبارك فيك يا رب، لا تنسونا من صالح الدعاء

أنا بس اللي مش بكتب رد السلام، ولكن برده والله كامل أول ما بقرأه :'D

" إنسان "

اتفضل

https://t.me/Answer_Q

" إنسان "

والله الأمر راجع لكيفية الاستخدام، يعني في فايدة من استخدامك ليها؟ ولا الضرر أكبر من النفع؟ فهي حسبة احسبها لنفسك "بل الإنسان على نفسه بصيرة".

ولكن طبعًا لا ننصح بالإبتعاد بالكلية وإن كان في الأمر فتن عظيمة، وإلا فتزداد الفتن انتشارًا، فدايمًا لازم إثبات وجود لأهل الصلاح والدعوة على منصات التواصل المختلفة.

فأنت سدد وقارب، وأنصحك بماجريات إبراهيم السكران، هيساعدك بإذن الله في النقطة دي.

__
لكن لو نفسيتك مش كويسة فلأ طبعًا أنت في الحالة دي محتاج تاخد عزلة كدا تراجع فيها أمورك، والسوشيال ميديا من مفاسد العزلة.

ربنا يصلح حالك، ويلطف بيك، ويرضيك ويرضي عنك يا رب
____

حاجة نسيت أقولها: على فكرة استخدام السوشيال ميديا واقعة تحت حكم التجارة مع الكافر المحارب، فأنت مهم تراجع حساباتك، وسبب وجودك عليها؛ علشان تشوف محلك ايه من الإعراب.

" إنسان "

يا أخي عالم أعوذ بالله، لكن هنعمل ايه؟

بندعيلهم والله بالهداية وصلاح الحال، ادعيلهم أنت كمان واكسب فيهم ثواب.

" إنسان "

ابسط أول واحد يقع أهوو، الباقي في الطريق بإذن الله 😆

" إنسان "

تم الامتناع من الرد عليهم؛ لأنك ذكرت اسماء الشخصيات اللي مزعلينك، وشتمتيهم، وفي حديث سيدنا عبدالله بن مسعود، أن رسول الله قال: "سباب المسلم فسوق، وقتاله كفر"، وفي الأمر غيبة، ويقول الله: "ولا يغتب بعضكم بعضًا أيحب أحدكم أن يأكل لحم أخيه ميتًا فكرهتموه واتقوا الله".

مع العلم إن مفيش أي مشكلة بتكون تافهة، ربنا يصلح حالنا جميعًا يا رب.

" إنسان "