الزواج بيكون عن طريقين حلال

اولهما ان شخص يكون يعرف بنت معينه لاي ظروف سواء شافها او اتعامل معاها ف كلية او شغل او غيره
ف شاف انها مناسبه ليه فقرر يسأل عنها ويتقدملها

التاني هو ان شخص مشافش بنات كويسة ف الكلية وف الشغل مش قدامه بنات مناسبه او مش معاه بنات اصلا
ف بيكلم اهله انهم يرشحوله حد ف بالتالي الاهل بيسألوا معارفهم ف بيبدأ حد يقول انا اعرف بنت فلان هم عيلة محترمة وذات دين والبنت محترمة وفيها من الصفات الطيبة ما يرضى ابنكم
ف بالتالي بيروح يتقدم للبنت ويقعد معاها ويعرف هل هي فعلا مناسبه معاه ولا لا وهي كذلك

هل هي ليها حق الرفض بعد م تقعد معاه ؟
طبعا
هل هو ليه حق الرفض بعد م يقعد معاها؟
طبعا

هل حضرتك لما ترفضي من برا عشان بس انه جاي عن طريق ترشح يبقا عندك حق ؟
لا طبعا غلط ومش مبرر نهائي

هل حضرتك لما ترفضي من برا عشان قالولك شخص مواصفاته كذا عايز يتقدملك موافقه تقعدي معاه ولا لا ولقيتيها مواصفات غير مناسبه يبقا عندك حق ؟
طبعا

الخلاصة حضرتك بتضيعي على نفسك فرص ممكن تكون كويسة جدا جدا

⚙️

عليكم السلام ورحمة الله وبركاته

الرؤية معمولة عشان الاساسيات
انا رايح اشوفها اصلا لو مشوفتهاش
ورايح اسأل عن الاساسيات
الحاجات اللي يا ابيض يا اسود مفيهاش بالنسبالي تهاون ودي مختلفة بين كل شخص والتاني هو حاطط الاولويات بالنسباله ايه

هو ممكن عنده المعلومة اصلا بكل اساسياته اللي محتاج يعرفها
ف سايبلك الفرصة انتي انك تعرفي كل اللي عايزاه عنه
لان الراجل عنده الفرصه انه يكوّن معلومات عن البنت قبل م يروحلها عكس البنت هي بتتعرف عليه ف الرؤية

وانتي تقدري تعرفي هل هو هيكون راجل متفهم ويقدرك نفسيا وعاطفيا ولا لا اولا ومبدئيا من خلال اجاباته على اسئلتك هو بيكشف تفكيره ليكي ورأيه ايه ف المواضيع اللي بتسأليه فيها
وثانيا بقا بيجي بالتفصيل وتتعرفي عليه اكتر من خلال المواقف خلال مدة الخطوبة
بيحصل موقف ف بتشوفي ردة فعله وتصرفه ازاي

لان مستحيل تحكمي على كل حاجة من قعدة ساعة او اتنين

لو الاساسيات عندك تمام معاه توكلي على الله واستخيري ومعاكوا فترة الخطوبة للتعارف وتكتشفوا بعض اكتر

⚙️

عليكم السلام ورحمة الله وبركاته

هذكر حديث ف الاول قبل م اجاوب واعذروني على الاطالة
الاجابة هتكون على اكتر من رسالة

عن حنظلة الأسيدي قال: لقيني أبو بكر فقال كيف أنت يا حنظلة؟ قال: قلت: نافق حنظلة! قال: سبحان الله، ما تقول؟ قال: قلت: نكون عند رسول الله صلى عليه وسلم يذكرنا بالنار والجنة حتى كأنا رأي عين، فإذا خرجنا من عند رسول الله صلى الله عليه وسلم عافسنا الأزواج والأولاد والضيعات فنسينا كثيراً. قال أبو بكر: فوالله إنا لنلقى مثل هذا، فانطلقت أنا وأبو بكر حتى دخلنا على رسول الله صلى الله عليه وسلم، قلت: نافق حنظلة يا رسول الله، فقال رسول الله صلى الله عليه وسلم : "وما ذاك؟." قلت: يا رسول الله نكون عندك تذكرنا بالنار والجنة، حتى كأنا رأي عين، فإذا خرجنا من عندك عافسنا الأزواج والأولاد والضيعات نسينا كثيراً، فقال رسول الله صلى الله عليه وسلم: " والذي نفسي بيده؛ إن لو تدومون على ما تكونون عندي وفي الذكر لصافحتكم الملائكة على فرشكم، وفي طرقكم، ولكن يا حنظلة ساعة وساعة ثلاث مرات."

هون عليك
الانسان مش هيقدر يستحوذ على كل شيء
قال رسول الله ﷺ سددوا وقاربوا

وعن عبد الله بن عمرو بن العاص رضي الله عنهما قال : قال لي رسول الله صلى الله عليه وسلم يا عبد الله ألم أخبر أنك تصوم النهار وتقوم الليل فقلت بلى يا رسول الله قال فلا تفعل صم وأفطر وقم ونم فإن لجسدك عليك حقا وإن لعينك عليك حقا وإن لزوجك عليك حقا وإن لزورك عليك حقا وإن بحسبك أن تصوم كل شهر ثلاثة أيام فإن لك بكل حسنة عشر أمثالها فإن ذلك صيام الدهر كله فشددت فشدد علي قلت يا رسول الله إني أجد قوة قال فصم صيام نبي الله داود عليه السلام ولا تزد عليه قلت وما كان صيام نبي الله داود عليه السلام قال نصف الدهر فكان عبد الله يقول بعد ما كبر يا ليتني قبلت رخصة النبي صلى الله عليه وسلم

النتيجة اللي انت بتوصلها دي نتيجة حتمية لان للانسان طاقة وانت بتستهلك كل طاقتك بدون اي ترفيه عن النفس
دا ربنا جعل لينا عيد بعد الصيام عشان ننبسط بعد تعب الصيام طول الشهر

ف ادي لنفسك حقها في الترفيه طالما مباح ، وانت اصلا ممكن تبسط نفسك وتاخد حسنات اكتر بنيتك

قال رسول الله لسعد بن أبي وقاص رضي الله عنه : إنك لن تنفق نفقة تبتغي بها وجه الله إلا أجرت عليها حتى ما تجعل في فم امرأتك

ف انت ممكن تعمل الشيء المباح عشان تفصل دماغك وتريح نفسك بحيث انك تقدر تشحن طاقتك عشان ترجع تستكمل الشيء اللي كنت بتعمله بهمه

وزي لما تنام بنية انك تستقوي على العبادة

والامثلة لا تعد ولا تحصى حقيقةً يعني

ف اجعلها نية انك تشحن طاقتك لعبادة جديدة واديك هتاخد اجر كمان :)

⚙️

لأ الأمر مجهول تمامًا، فخدوا راحتكم :'D

كل عام وأنتم طيبين جميعًا، عساكم من عوادة في صحة وعافية يا رب العالمين

ممكن أيوا بفضل الله

عليكم السلام ورحمة الله وبركاته

اللي هو عمله تصرف طبيعي اوي لواحدة باين انها من محافظة غير المحافظة بتاعته ف الراجل اشتغل بالمتاح وطلب الرقم دوغري
انتي صح ف كلامك انك تعرضي الكلام على والدك الاول وهو لو معندوش مشاكل مبدئية من المعلومتين اللي انتي عارفاهم دلوقتي انه من محافظة تانية مثلا وانه سنه كذا
خلاص اديله الرقم وهو هيكلمه ساعتها يشرحله كل التفاصيل الضرورية وياخد ميعاد بعد م والدك يرد عليه بالموافقة

الامور طبيعية جدا مفيهاش اي شيء غلط

خلصي امتحاناتك على خير وبعدين خلي والدتك تفتح الكلام مع والدك وتحكيله الموضوع زي م حكيتيه هنا كدا وهو ليه القرار
لو وافق توكلي على الله اديله الرقم وساعتها مش مسموح انه يكلمك تاني او يفتح معاكي اي حوار غير لما يجي بقا البيت

⚙️

ايعت جزء من السؤال ف الاول نظهره بحيث تقدر تعرف ان السوال دا بتاعك وقول نشطب من اول هنا ساعتها هنشطب باقي السؤال

⚙️

اللي بيتقدم لحد بيسأل عليه كويس اوي وطالما هي حاجة زي كدا ممكن تتعرف ف سيبي الامور لمجراها

لكن انتي متقوليش حاجة زي كدا انت كدا بتوقفي حالك بنفسك

⚙️

لو ان حياته مستقلة ف مفيش مشكلة ودي نقطة مهمة اوي اوي

خصوصا لو ابوه وامه مش وحشين كمان

طالما هو كويس ومحترم وبيحبك ويقدرك خلاص مفيش مشاكل ان شاء الله

⚙️

حبيبي الغالي ربنا يرزقك الزوجة الصالحة يارب
خلي دا ظنك دايما بربنا انه هيرزقك باللي شبهك
وخليك دايما محافظ على نفسك

اترك وساوس الشيطان دي لان ليس لك من الامر شيء
انت دور كويس واتقي الله واسأل على العيلة والبنت
ومتشتغلش بالك ب هل كان ليها علاقات ولا لا لانك هتتعب ومش هتوصل لنتيجة مرضية عشان مهما كانت البنت فعلا محترمة انت هيجيلك نفس الهاجس برضو
ف دي حلقة مفرغه
انت ليك البنت دلوقتي محترمة ملتزمة وليك منها الظاهر وتحاسبها من بعد م عرفتها

واوعى تفكر تسأل السؤال اللي انت قولته دا ابدا

ربنا يزوجنا واياك يا حبيبي

⚙️

مش عارف مستواكي ايه ف الانجليزي، عامة لو من B1 وطالع ف انتي محتاجه ممارسة اكتر
وانا شخصيا حاجة فادتني كتير اوي وهي الميتينجز اللي بالانجليزي
ف انتي ممكن تدور على وسائل ممارسة للغة زي كدا لو متاح ف شغلك انك تتواصلي مع حد بالانجليزي
او ممكن تستغليchatGPTف انك تعملي كول معاه وتتكلمي معاه ف اي حاجة وبعد م بتخلصي بتلاقيه تلقائي عملت الكول دي محادثة مكتوبة

ثانيا وانتي بتقلبي ف السوشيال ميديا حاولي تدخلي التايم لاين الاجنبي وتشوفي بوست والكومنتات بتاعته بعدين لو معرفتيش تفسريه او تفهمي هم بيتكلموا عن ايه بالظبط لان في حاجات بتبقى مرتبطة بالثقافة بتاعتهم زي الايفيهات المصري كدا يعني

خدي سكرين من الكلام دا لchatGPTبرضو وخليه يشرحهولك ويقولك هم قاصدين ايه فعلا وبعدين يعملك ملخص للكلمات الصعبة والاختصارات والتعبيرات وكمان يقولك ليه بيستخدموا الاختصارات دي ف السياق دا واقعدي خليه يشرحلك واحدة واحدة ويشعبولي الكلام معاكي

ثالثا اكتبي بالانجليزي بوستات او
موضوع معين
انا بحب الشعر ف كنت بقعد اترجم القصايد اللي بحبها وفاهمها وفاهم المعنى اللي قاصده الشاعر ف لما بترجمها بعبر عن المعنى المقصود فعليا

هكمل ف رسالة تاني

⚙️

وبرضو السيرة
جميلة اوي اوي لما تكتبي السيرة بالانجليزي هتستمتعي بيها اوي والله عن تجربة

الموضوع صعب كدا كدا بس مسلي ومنها بستفيد دينيا وكمان لغويا

وهسيبلكم سلسة شرح للسيرة بالانجليزي يعتبر احسن حاجة سمعتها بالانجليزي عن السيرة
https://youtube.com/playlist?list=PLAEA99D24CA2F9A8F&si=Y5Q6-nrh-eC6NU1r

الاسلوب بسيط وسهل والكلام واضح واللهجة سلسة


وبرضو حاولي تقرأي ترجمة القرآن
بالانجليزي
هتزود عندك المصطلحات وهتخليكي تفهمي القران برضو لان الترجمة عبارة عن تفسير مع ترجمة لانه بيترجم تفسير الاية حرفيا
ودا اسهل لان احنا في كلمات بالعربي مش بنكون فاهمين معناها اصلا

وفي طرق تاني كتير لكل مهارة بس دا مثال عن اللي ممكن تعمليه للاربع مهارات

الاستماع من خلال السيرة دي والكول مع chatGPT

والمحادثة من خلال الكول معChatGPT

والكتابة من خلال البوستات او الترجمة

والقراءة من خلال ترجمة القرآن

لو حد عنده اقتراحات ممكن يزودها بالمناسبة :)
في ديموقراطية ف الموضوع

⚙️

هي دي الحنكة والمهارة بقى 😁

" إنسان "

إحنا بفضل الله عدد لا بأس به، كل دفعة ليها مشرفين، حتى في الرد على الأسئلة ليه مشرفينه

وإحنا مكان واحد بسياسة واحدة، فطبيعي تحس بتقارب الأسلوب.

دعواتكم لينا بقى بالبركة وأن يحفظ الله هذا المكان

" إنسان "

انصحك انك تعرفي ان مفيش حد كامل
ف انتي حطي المواصفات اللي عايزاها وخليكي منطقية فيها
بعدين رتبي اولوياتك
بحيث انك تقدري تستغني عن سفح الهرم لو حد جه فيه كل الصفات اللي ف قمة هرم اولوياتك

وانصحك تحطي ف بالك برضو ان البنت ليها برايم ف جوازها ف طبيعي كل م بتضيعني فرصك ف وقت البرايم بتاعك
فرصك هتقل وممكن ساعتها تضطري تستغني عن حاجات اكتر مجبره عشان مش هتلاقي غير كدا

الخلاصة خليكوا واقعيين

⚙️

بصراحه انا كـ ⚙️ شايف ان جواز الارياف فيه مشاكل كتير عن تجارب واقعية
وخاصة لو ف بيت عيلة
ف دا بشوفه من قمة هرم الاولويات مش السفح ف مش هعرف اكون منصف وهميل لاني اقولك ان رأيك صح

⚙️

عليكم السلام ورحمة الله وبركاته
خليني اعلق كام تعليق ف الاول
اول حاجة انا ضد ان الشاب يخطب وهو ف الكلية
تاني حاجة مفيش حاجة اسمها جاي يحجز دي
تالت حاجة انا ضد ان الخطوبة تطول للدرجة دي 3 سنين كتيير اوي

نبدأ بقا الرد

كلامه اللي قاله ف الاخر دا دليل على انه شخص غير ناضج بالمرة
انا متفهم ان الشاب فعلا محتاج يحس ان البنت راغباه زي م هو راغبها

ومتفهم كمان ان الشيطان بيدخل للانسان من مداخل كتير ف فترة الخطوبة بس انا ابقا عارف ان دا غلط اصلا ومينفعش
بس كلامه ف الاخر دا دليل على انه مقتنع بكدا ف دا الغلط بقا

تعليق تاني معلش😅

حاجة مفيش حاجة اسمها اصل باباه هيصرف علينا
انتي مش متجوزه باباه
ارجوكم ي شباب متاخدش خطوة الا وانت قدها انا عارف ان مفيش شاب يقدر يجوز نفسه ف طبيعي الاهل هيساعدوا ف الفرح وتجهيزاته
بس مينفعش اهلك يساعدوك فيما بعد الفرح
لازم تبقا قادر تدير بيتك لوحدك
مينفعش تبقا مستني مصروفك من باباك بجد
لو مش عارف ان الجواز مسئولية كبيرة وفي اطفال ممكن يجوا بعد اول سنة كمان ف انت مسئولياتك هتتضاعف يبقا ارجوك متتجوزش

وارجوكم يا بنات متاخدوش شاب صغير لسة ابوه هيصرف عليه

هكمل ف رسالة تاني
⚙️

نصيحتي بقا
شايف الصح ي حبيبي انت لسة شاب قدامك حياتك وانتي لسة صغيره
كل واحد يروح لحاله وان شاء الله لما تخلص وتكون قادر تفتح بيتك وعقليتك مستوعبه المسئولية اللي
داخل عليها مش مجرد خطوبة نشيع بيها فراغنا العاطفي ونقول كلمتين حلوين لبعض اخر الليل
اتقدم تاني
ولو انتي لسة متخطبتيش او متجوزتيش بقا ساعتها ابقي فكري ف الموضوع تاني واديله فرصه

كنتي اتجوزتي ولا اتخطبتي يبقا كل شيء قسمة ونصيب وربنا يعوضه
بالاحسن

اتمنى اكون جاوبت بالقدر اللي فيه التفصيل الكافي على قد الاسئلة بتاعتك كلها

⚙️

الرسايل بتوصل اكيد بس الرسايل فعلا كتير اوي

والادمن بيجاوب على السؤال اللي شايف انه يقدر يقدم نصيحة او اجابة مرضية فيه
ف ممكن السؤال يتأخر لحد م يدخل ادمن شايف انه انسب للاجابة على السؤال

ف اعذرونا على الضغط
ودعواتكم بالتيسير

⚙️

الفرق كبير جدا

⚙️