وفي نفس الوقت، على جهة أخرى ابني لنفسك بيئة أقرب لطبيعتك، عن طريق إنك تنضمي للأماكن والأنشطة ال فيها صحبة صالحة شبهك وليهم نفس اهتماماتك؛ يعني مثلًا ممكن انضمي لحلقة قرآن سواء أرض واقع -إن تيسر- أو أونلاين، أو انضمي لأعمال تطوعية وهكذا.

طيب ليه محستيش بالسعادة ال كانوا عاوزينها ليكِ بعد ما وصلتِ؟
لأن هدفك مكنش دخول الكلية نفسها، بقدر ما كان الحصول على التقدير والشعور بالرضا من أهلك، خاصة من والدك،
أما نقطة إنك بقيتِ تراكمي أو مش قادرة تذاكري بنفس الانضباط ال كان عندك، فده غالبًا نتيجة للضغط الطويل وفقدان الدافع أو الهدف من السعي،

فأنتِ محتاجة تحطي هدف ليكِ واضح في حياتك وتسألي نفسك: أنا عايزة ايه؟ وايه هدفي من الحياة ؟
وتعيدي بناء علاقتك بنفسك بعيدًا عن فكرة إن قيمتك مرتبطة بتحقيق الإنجاز بس، لأن الإنسان لما يحصر حياته كلها في الدراسة أو النجاح، أي تعثر فيهم بيخليه يحس إنه خسر كل حاجة، لكن لما يوسع نظرته، ويفهم إن الحياة أكبر من مجرد كلية أو درجات، وأن ينظر بعينين عين للدنيا وعين للآخرة، سيتيقن أنه مهما حصل من نقص في هذه الدنيا فهناك دار لا كدر فيها ولا نصب نسعى لها، وده هيهون عليكِ إخفاقات الدنيا ومراحلها الصعبة، فارفقي بنفسك وهوني عليك.

ومهم جدًا كمان، بما إن عندك بالفعل وهم كمال ومثالية، تكوني مستوعبة إن التعثرات جزء طبيعي من الرحلة، وإن التغيير مش بيحصل من يوم وليلة؛ وإنك إنسان، مفيش أي مشكلة لو أخطأ، الدنيا مش هتتهد عادي، هيصحح غلطه ويتعلم منه،
فابدئي بخطوات صغيرة، وكافئي نفسك عليها، زي مثلًا: إنك قبل النوم تكتبي شيء واحد لطيف عملتيه اليوم لنفسك أو لغيرك، زي إنك استمعتِ لحد بإنصات وساعدتيه يحل مشكلته، أو قاومتِ رغبتك في لوم نفسك.

ومفيش تعارض بين إنك تكوني إنسانة ناجحة وطموحة، وبين إنك تكوني زوجة وأم ناجحة بعدين بإذن الله، الفكرة بس إن الإنسان يفهم إن لكل مرحلة من الحياة أولوياتها ومسؤولياتها؛ ومفيش مشكلة نبدأ من دلوقت التأهيل للزواج، بحيث تبقي مستعدة تبني حياة مستقرة وسوية بإذن الله.

وتذكري قول الله تعالى: "بل الإنسان على نفسه بصيرة"
يعني من صدق الإنسان مع نفسه، إنه أدرى شخص بيها، فبالتالي أنتِ لوحدك كنت عارفة ازاي أنتِ ذاكرتي وعملتي اللي عليك في أوقات أنت مش قادرة تعملي فيها شيء، ولكن كان لازم تسعي وتعملي اللي عليك،
وفي الأوقات دي، لا كان أهلك ولا أصحابك ولا المجتمع شاهدين عليك، فبالتالي من الظلم لنفسك إنك تتجاهليها وتعظمي من رأي الآخر، يعني بالفعل الأهل من حقهم إنهم يفرحوا بينا، ولكن كل شيء بقدر، ومش على حساب نفسنا، وكان دكتور عبدالرحمن ذاكر له ثلاثية كدا: الله أولًا، أنت ثانيًا، الآخر ثالثًا.

فالخلاصة:
تقبلي الاختلاف، أعيدي بناء علاقتك بالله وعلاقتك بنفسك، ابني بيئة دعم جديدة حواليك.
🌱

وعليكم السلام ورحمة الله وبركاته

لأ، مش عادي :')

لكن لو دخلنا التقييم، ثم حصل ظرف اضطررنا بسببه نوقف، وبعدها رجعنا نكمله، فده مفيش فيه مشكلة بإذن الله.

أما فتح التقييم وتأجيله عمدًا لإكماله بعدين، فده مش مسموح.

والسبب إننا غالبًا هننسى، وساعتها هنحتاج نرجع للتدوين علشان نفتكر، مع إننا بالفعل شفنا الأسئلة، وإحنا أكدنا قبل كده إن الرجوع للتدوين أو نقل الإجابات منه أثناء التقييم غير مسموح.

فخلّوا التقييم بالنسبة لكم زي الاختبار، وادخلوه وأنتم مستعدين تكملوه للنهاية بإذن الله.

بنستعد ليها حاليًا، فترقبوها. 🥳
ومرحبًا بالجميع، سواء من داخل مصر أو خارجها، ومنورنا بالفعل مشاركون كُثر من خارج مصر.

وعليكم السلام ورحمة الله وبركاته

ربنا يبارك فيكِ، وينفع بيكِ، ويجعل الأمر في ميزان حسناتكِ يا رب العالمين.

مفيش أي مشكلة، متاح مشاركة كل شيء على القناة، ما عدا التقييمات.

وجميل جدًا لما نتناقش، ونشارك استفادتنا، ونضيف لبعض، ويمكن كمان نلفت نظر بعض لنقاط ماكنّاش منتبهين لها. أما الملخصات، فلا تُشارك، ويكون لكل شخص تلخيصه الخاص لتحقيق الاستفادة بشكل أكبر :)

الزواج رزق فعلًا، وربنا سبحانه وتعالى أمرنا نسعى ونأخذ بالأسباب في كل الأرزاق.

والأخذ بالأسباب في الزواج مش معناه إن البنت تروح أماكن مختلطة أو تتنازل عن ضوابطها الشرعية، لأن ربنا لا يُطلب رزقه بمعصيته.
بالعكس، وجودك هنا في مساق التأهيل، وحرصك على التعلم، ده في حد ذاته نوع من السعي، لأنك بتصلحي نفسك دينيًا وخلقيًا وبتستعدي تكوني زوجة صالحة، وده من أعظم الأسباب.

ومن الأسباب العملية كمان:
- إنك تكوني موجودة في البيئات النسائية الصالحة، زي حلقات القرآن، والدورات، والأعمال التطوعية، لأن دي أماكن الناس فيها بتتعرف على بعض، وممكن حد منهم يرشحك لأخ أو قريب.
- وأن تكثري من الدعاء، وتسألي الله الزوج الصالح، مع تحري أوقات وأسباب إجابة الدعاء.
- وأنصحك بقراءة مقال دليل البنت الشاطرة للمهندس محمد شرف ذكر فيه كيف نسعى إلى الزواج بطرق مختلفة.

وعمومًا مفيش قائمة معينة لو عملناها يبقى الزواج هيحصل بعدها مباشرة، لكن المطلوب مننا نبذل اللي نقدر عليه، ونرضى بقدر الله، ونوقن إن الرزق يأتي في الوقت اللي اختاره الله سبحانه وتعالى.

أسأل الله أن يرضيكِ ويرضى عنك ويرزقك زوجًا صالحًا تقيًا يا رب العالمين.
🌱

وعليكم السلام ورحمة الله وبركاته
رينا يرضيكِ ويرضى عنك ويديم عليكِ الصحة والعافية.

المهندس مكنش يقصد إن كل بنت عندها هالات سودا يبقى معناها إنها مرهقة أو كثيرة الشكوى، لأن ده لا صحيح طبيًا ولا واقعًا.

هو كان بيتكلم عن صورة متكاملة لفتاة ظاهر عليها الإرهاق بشكل دائم، وذكر ضمن الأمثلة الهالات السوداء الدائمة مع الإغماء المتكرر ونحو ذلك، ثم وضح إن ده قد يكون له أسباب طبية، ونصح بمراجعة الطبيب لو دي الحالة المستمرة.

أما حالتك فمختلفة، لأنك بالفعل راجعتي طبيبة، وعرفتي إن عندك جزءًا وراثيًا وجزءًا مكتسبًا، وبدأتي تعالجي اللي يمكن علاجه، وده هو السعي المطلوب منك فعلًا.

وإحنا أصلًا مأمورين إننا نعمل اللي في استطاعتنا، فما دام الإنسان بذل السبب، فما بقي خارج عن إرادته فده ليس مطلوبًا منه.

🌱

وعليكم السلام ورحمة الله وبركاته
في البداية هوني عليكِ، النسيان أمر فطري وطبيعة بشرية، ومفيش حد معصوم من الأخطاء ولا الزلل ولا النسيان، لكن المرء يسدد ويقارب، والنبي ﷺ قال: «تعاهدوا هذا القرآن، فوالذي نفس محمد بيده لهو أشد تفلتًا من الإبل في عقلها»، فإذا كان القرآن نفسه يحتاج إلى تعاهد ومراجعة، فما بالك ببقية العلوم ؟

ومن الأسباب اللي ممكن تكون خلت الاستحضار عندك بقى أصعب:
- إنك مع الوقت قلّ عندك تكرار ومراجعة المعلومات، وأي علم لا يراجعه صاحبه طبيعي يضعف استحضاره مع الأيام.
- أو كثرة الانشغال والمحتويات الكثيرة جدًا اللي بنتعرض لها كل يوم من تطبيقات ومعلومات جديدة، وده بيزود التشتت ويخلي الذهن أقل قدرة على استحضار المعلومات بسرعة.

ومن الحاجات العملية اللي ممكن تساعدك تستحضري العلم بسهولة بإذن الله:
- ارجعي للمقررات اللي درستيها على فترات، ولو حتى مراجعة خفيفة حسب نوع العلم: يعني أحيانًا يكفي قراءة الملخص، وأحيانًا تحتاجي إعادة سماع السلسلة أو قراءة الكتاب مرة تانية، أو مدارسته مع صديقة، أو حتى محاولة شرحه لغيرك، لأن التعليم والمناقشة هتثبت معاكي بشكل كبير بإذن الله وهكذا.

- اكتبي أهم الفوائد أو راجعيها من وقت لآخر، لأن الكتابة والمذاكرة من أسباب حفظ العلم، كما قال ابن عثيمين رحمه الله: "يجب على طالب العلم الحرص على المذاكرة وضبط ما تعلمه إما بحفظه في صدره، أو كتابته، فإن الإنسان عرضة للنسيان، فإذا لم يحرص على المراجعة وتكرير ما تعلمه فإن ذلك يضيع منه وينساه".

- وإذا وقع منك النسيان لشيء فاذكري الله كما قال الله تعالى : (وَاذْكُرْ رَبَّكَ إِذَا نَسِيتَ)؛ لأن النسيان من الشيطان، كما قال تعالى عن فتى موسى: (وَمَآ أَنْسَانِيهُ إِلاَّ الشيطان أَنْ أَذْكُرَهُ).

- ولا تنسي أن العلم توفيق من الله قبل أن يكون قوة ذاكرة؛ فأكثري من الدعاء، واسألي الله أن يفتح عليك، وكان شيخ الإسلام ابن تيمية إذا أشكلت عليه مسألة يقول: "يا معلم إبراهيم علمني" ويكثر الاستغاثة بذلك، وأكثري أيضًا من الحوقلة، وتذكري قول الله: "واتقوا الله ويعلمكم الله"
فأصلحي ما بينك وبين الله = ييسر لك كل شيء من عنده سبحانه وتعالى.

- ولا تجعلي انشغالك بالنسيان يسرق منك لذة العبادة أو يحبطك؛ راجعي، واستذكري، وداومي ولو بالقليل، واستعيني بالله ولا تعجزي.
أسأل الله أن يرزقك علمًا نافعًا ويبارك لك فيه وينفعك به يا رب العالمين

🌱

تفضلي

طبعًا الزواج رزق، وأي رزق لا بُد له من سعي، فها هنا دليل لكل فتاة، كيف تسعى لزواجها..:")

وعليكم السلام ورحمة الله وبركاته
جزانا الله وإياكم يا رب العالمين.

شوفي الكتاب ده، بسيط ومفيد وبإذن الله يرتب أفكارك.
https://t.me/Answer_Q/914

🌱

كونه معجب أو كان ناوي يتقدم أو لا، فإحنا في الحقيقة منقدرش نجزم بده؛ ممكن يكون كان معجب ويفكر في التقدم بعد ما تخلصي دراستك في الكلية، وممكن يكون غير ذلك، فالله أعلم، لكن التصرفات اللي ذكرتيها فيها تجاوز للحدود فعلًا، وحتى لو كانت نيته طيبة، فتصرفاته نفسها غير صحيحة أبدًا.

وأنتِ في المجمل تصرفتِ بشكل كويس لما حطيتي حدود للتواصل، والشخص الجاد والمستعد للزواج فالطريق معروف وواضح؛ يدخل البيت من بابه، ويتواصل مع ولي الأمر، مش من خلال محادثات برايفت أو متابعة على وسائل التواصل فهو لا يرضى بذلك لأخته.

فابعتيله رسالة : بعد إذنك متتواصلش معايا تاني، ثم بلوك مباشرة، من غير انتظار ردة فعل، واقفلي أي طريق يوصله بيك أو يوصلك بيه، لأن استمرار وجوده على وسائل التواصل بيخلي الباب مفتوح للكلام والتفكير والتعلق، والبلوك مش قلة ذوق بما إن الدراسة انتهت بفضل الله ف معدش بينكم أي تعامل يحتاج وسيلة تواصل.

وجزء كبير من تعبك دلوقتي سببه إنك بتحاولي تفسري كل تصرف وكل كلمة، فحاولي متسيبيش التفكير ياخد أكبر من حجمه، واشغلي قلبك بما ينفعك، واستمري في حفظ القرآن وطلب العلم، ولا تربطي قلبك باحتمال لم يحدث، فإن كان فيه خير، فسيأتيك من الباب الذي يرضي الله، والرزق إذا كتبه الله لك سيصل إليك في وقته، ولن يمنعه كونك وضعتي حدود شرعية تحفظ دينك وقلبك.

أسأل الله أن يرزقك زوجًا صالحًا تقيًا يا رب العالمين، وأن يصرف عنك كل ما يشغل قلبك بغير حق.
🌱

فسخ الخطوبة من حقك ولا تأثمين عليه، لكن الذي ننصحك به هو إنك تحاولي تحددي الأول سبب عدم الراحة؛ هل في سبب واضح ؟ ولا مجرد قلق أو رهبة من الخطبة أو الزواج عمومًا ؟

وامسكي ورقة وقلم، واكتبي الحاجات الأساسية اللي محتاجاها في زوجك، وفي مقدمتها الدين والخُلق، وبعدها اكتبي مميزات الخاطب وعيوبه ووازني ما بينهم وبين احتياجاتك، وشوفي: هل العيوب تقدري تتعايشي معاها فعلًا ولا لا؟

ولو فيه سبب منطقي للنفور ويمكن علاجه، حاولي تعطي نفسك فرصة وتشوفي هل ممكن يتحل ولا لأ، أما لو السبب صعب تتقبليه أو التعايش معاه، ففسخ الخطبة في المرحلة دي أفضل من الاستمرار مع عدم القبول.

وخلال الفترة دي حاولي تتعاملي معاه في حدود الخطبة، وتلاحظي طريقة تفكيره وأسلوبه وأخلاقه، عشان تكوّني صورة أوضح عنه.

واعلمي أن مفيش إنسان كامل، وكل خاطب هيكون عنده مميزات وعيوب، زي ما كل حد فينا عنده عيوب، وطبعًا استخيري واستشيري ثم خدي قرارك، وربنا يفتح عليكِ ويكتب لكِ الخير حيث كان ويرضي قلبك به.
🌱

أستأذنك شوفي الرد هنا :
https://t.me/Answer_Q/494

3 مراحل: التأهيل للزواج، صناعة المربي، التربية.

نعم بإذن الله، استعدوا من الآن😁

الله يسدد خطاكم، وييسر لكم أموركم، ويعينكم على إكمال المسير.

🌱 لكل رحلةٍ بداية

أحيانًا لا نكتشف ما نحتاج أن نتعلّمه إلا حين نبدأ الرحلة، لكن بعض المراحل تستحق أن نتعلّم لها قبل أن نصل إليها🌟

💬 وهذه إحدى الرسائل التي وصلتنا من طلابنا بعد خوضهم الرحلة

تُرى... ماذا يمكن أن تكتشف أنت❕️

⏳ بدأ العدّ التنازلي •••
الدفعة العاشرة تقترب

#التأهيل_للزواج

تتقدم إدارة التأهيل بخالص الشكر والتقدير للطالبة المجتهدة، والمشرفة المتميزة آية عصام تقديرًا لإجتهادها ومجهوداتها، سائلين الله أن يبارك فيها ولها، وأن يديم عليها دوام التفوق والإمتياز.