المهم انها متشغلكيش عن العبادات وبرضو متضيعيش وقتك كله فيها لان وقتك دا هتتسألي عنه

ايوه الانسان مطالب منه الترويح عن نفسه طالما شيء لا يغضب الله لكن ساعة وساعة مش كل الوقت

في حديث حنظلة المعروف الطوييل
لما ذهب حنظلة وسيدنا ابو بكر للنبي ﷺ
النبي قالهم ان لو وقتهم كله كان عبادة وذكر ونفس الحالة اللي بيبقوا عليها وهم عنده كانت الملايكة نزلت سلمت عليهم في الطرقات

لكن ساعة وساعة ، ف الشاهد انه لا مانع ابدا يكون عندك وقت تعملي فيه حاجة بتحبيها ومتكونش حرام بس ميكونش دا برضو طول الوقت

وفي قصة سيدنا سليمان مع الخيل اللي انشغل بيها عن صلاة العصر

( إذ عرض عليه بالعشي الصافنات الجياد ، فقال إني أحببت حب الخير عن ذكر ربي حتى توارت بالحجاب ، ردوها علي فطفق مسحا بالسوق والأعناق )

تفسير الاية انه كان عنده عشرين فرس او عشرين الف مش مهم العدد يعني
المهم انها كانت خيل جميلة جدا وليها اجنحه وكان منشغل بالنظر ليها ويقال كان في عرض للخيل دي وهو بيحضره لحد م انتبه ان الشمس غابت فقال اني اتشغلت بحبي للخيل عن الصلاة لحد م الشمس غابت !!
ردوا عليا كل الخيل دي
فأمر بها فعُقرت
وفي قول تاني ف التفسير انه تم ختمها بختم الصدقة وخرجها كلها لله

الشاهد برضو من الايات دي ايه ؟
ان سيدنا سليمان كان بيقضي وقته ف حاجة مش حرام اهو وهو كان بيحب الخيل جدا
بس لما شغلته عن العبادة تخلص منها

وكذلك انتي المفروض تعملي كدا لو شغلتك عن العبادة

واما عن المسلسلات فهي حرام

⚙️

مش شايف اي مشاكل
وبالنسبة لانك صحة وهي نيابة هل قصدك يعني انها هتبقى مستوى اجتماعي اعلى ؟
خالص ، المهم الشطارة انت ممكن تعمل اسم احسن بكتير
وبعدين في بنات بيبقوا نيابة وواخدين ناس مش طب اصلا وعلاقتهم جميلة خالص
هي مبقتش وزيرة يعني

بلاش تخلي حاجات زي كدا حاجز وتقفل نفسك من موضوع قد يكون خير ليك

توكل على الله وربنا يكتبلك الخير

⚙️

المفروض بسم الله الرحمن الرحيم انا رايح لواحدة ف طب وهي ليها نيابة بسألها ناوية على نيابة ايه ؟
مش هقولك اكاديمي ولا كلينيكال
لا دا انا اسأل لو كلينيكال هيبقى ايه اصلا
مهو مش كل الكلينيكال زي بعضه

ف الحاجات دي مهمة اوي اوي مش موضوع عابر يعني

وبعدين خلينا نيجي للحق نادرا لما بتبقى واحدة واخدة نيابة صعبة كدا وتقدر تحافظ على كل الحاجات
لازم هتقصر

يعني لو نيابة جلدية ولا رمد ممكن
لكن باطنة ونسا واطفال والحاجات دي اللب اعرفه ان نبطشياتهم صعبة اوي

ع العموم هو لو زوجك اه ليه الحق ولو خطيبك ليه الحق انه ينفصل عادي لو انتي مصرة على حاجة معينه هو شايف انها هتأثر عليه


⚙️

وعليكم السلام ورحمة الله وبركاته

ما شاء الله، اللهم بارك،
لا، لن يكون هناك عقاب بإذن الله، لكن خلال فترات الإجازة المخصصة للاستدراك نقدر نرجع مرة أخرى للمقرر ونذاكره بالطريقة التي اعتدنا عليها.
نسأل الله لك الثبات والسداد والتوفيق :))

عندنا 3 احتمالات لو مش عارفين إجابة السؤال:

السؤال مش واضح بالنسبة لينا:
في الحالة دي نرجع للإشراف ونستفهم منهم عن المقصود من السؤال.

عندنا المعلومة لكن مش متأكدين منها:
نجاوب حسب فهمنا، والتقييم بيتم مراجعته، ولو في أي خطأ بيتصحح ويتم توضيحه لكم.

معندناش أي خلفية عن السؤال:
ده بيكون مؤشر على وجود قصور في المذاكرة، لأن الأسئلة مبنية على المقرر. في الحالة دي بنسلم التقييم، ونرجع نذاكر المقرر مرة تانية.

ونحب ننبه إن تكرار الأمر ده، زي إن الشخص يجاوب على بعض الأسئلة ويترك البعض، أو يدخل التقييم بدون استعداد كافٍ، ممكن يؤدي لإلغاء التقييم. ومع الاستمرار في ذلك، قد يعرّض الشخص للأسف للاستبعاد.

ولا ننسى أن التقييم وسيلة وليس غاية، فهو أداة بتساعدنا على الاستفادة من المقرر بشكل أفضل، وبتنبهنا لنقاط ممكن تكون فاتتنا أثناء المذاكرة، وبتخلينا نركز أكتر من خلال الأسئلة على النقاط المهمة في المقرر.

والعقاب الهدف منه إننا نلتزم وناخد الأمر بجدية، فبالتالي هو مش بيتقاس بمجرد الدخول للتقييم من عدمه، لكن كمان بطريقة التعامل مع التقييم نفسه.

فحتى لو دخلنا التقييم، لكن ظهر قصور واضح في المذاكرة — زي ترك أسئلة بدون إجابة، أو إجابات مختصرة جدًا أو عامة ومش من المقرر، أو الدخول بمقرر ناقص — فدي كلها أمور تستدعي إلغاء التقييم، لأن الهدف الأساسي منه لم يتحقق ببساطة :')

وعليكم السلام ورحمة الله وبركاته

لا، على العكس تمامًا، الاستفاضة في الإجابة أمر محمود، وده اللي بنشجعكم عليه، وشيء بيسعد المشرفين :))

ابعتيلنا وانضمي للدفعة الثامنة هتبدأ صناعة المربي بعد أسبوع بإذن الله، ولكن بغرامة :')

السؤال ده بيتكرر كتير، فممكن تتواصلوا معانا
والإشراف هيتابع معاكم حسب المرحلة اللي توقفتوا عندها،
ويوجهكم يا تنتظروا الدفعة العاشرة بإذن الله، أو تنضموا لإحدى الدفعات الحالية.

وعليكم السلام ورحمة الله وبركاته

السؤال مش واضح من أي دفعة تحديدًا، فممكن نرجع للجدول المثبّت على القناة، أو نسأل الإشراف وهيفيدونا بإذن الله.

للأسف غير متاح مشاركة الملخصات، وسبق وتم التنبيه على ذلك من قبل :')

طب والحل؟
نستعين بالله ونبدأ من الآن، ومش لازم ننجز كل شيء دفعة واحدة. نستغل الإجازة المتاحة حاليًا في الرجوع للمحاضرات والتدوين قدر المستطاع، ومع الإجازات القادمة بإذن الله نستكمل ما تبقى من المحتوى.

ومش محتاجين نأكد على أهمية التدوين في سلسلة الرباط المقدس، فمن لم ينوِ التدوين، ينوي من الآن بإذن الله، فالسلسلة مهمة جدًا، والأمر يستحق أن نأخذه بجدية.

يسر الله لكم أموركم، ووفقكم وسددكم :")

الهدف من إن الإنسان يفهم نفسه وطبيعته الفطرية، مش إنه يستخدم ده كمبرر أو عذر لكل تصرف بيعمله، ويتمسك بطبيعته فقط وإن ده شيء ثابت غير قابل للتغيير والمفروض اللي قدامي يتفهم ده،

لأ خالص، إحنا بنعرف ونتعلم علشان ناخد بالنا ونصلح من نفسنا ونتعامل مع بعض بتفاهم وبشكل أحسن، ونخفف من الحاجات اللي بتتعب العلاقة بيننا، مش نتمسك بيها عشان طبيعتنا الفطرية كده، لا ده تصرف مش صح.

والنبي ﷺ قال: «إنما العلم بالتعلّم، وإنما الحلم بالتحلّم»
يعني الإنسان يقدر عادي يدرب نفسه ويغير من بعض طباعه وسلوكياته بما يتوافق مع احتياجات الطرف الآخر بالتعود، من أجل استدامة العلاقة بيننا.

يعني مثلًا: كون بعض النساء تميل أكتر للتعبير غير المباشر وتنتظر اهتمام الطرف الآخر، ده بيفسّر سلوكنا تمام، لكنه لا يبرر إننا نتوقع من الطرف الآخر قراءة أفكارنا طول الوقت،
وفي المقابل برضو احنا اتعلمنا إن الرجل كمان طبيعته تميل للمباشرة والوضوح، ف زي ما أنتِ حابة الاهتمام، هو كمان من حقه يرتاح للوضوح والصراحة.

فالمطلوب إن المرأة تحاول تكون أوضح في التعبير عن زعلها بدل التلميحات اللي ممكن تتفهم غلط وتتنازل شوية، ومفيش مشكلة لو في مرة قولتيله أنتِ زعلانة من ايه من أول مرة عادي :')
والرجل برضو يحاول يحتوي ويفهم إن أحيانًا كلمة “مفيش” بيكون وراها زعل أو احتياج للاهتمام.

وبالنسبة لموضوع التعميم والكلام اللي يمسح كل الخير اللي قبله ده، زي ما النبي ﷺ ذكر وحذر في حديث: «يكفرن العشير»، فمينفعش يحصل موقف واحد فنقول: “أنت عمرك ما صدقتني”، لأن ده بيظلم الطرف التاني وبيكبر المشكلة أكتر، - فحتى لو طبيعتنا الفطرية كده - لازم أتعود إني أمسك نفسي وأسيطر على اعصابي شوية ومناخدش قرارات أبدًا وقت الغضب، نهدى الأول بعد كده نتكلم مع بعض بالراحة.

وأنتوا حاليا في فترة خطوبة، والخطوبة معمولة علشان تفهموا طريقة تفكير بعض، وأسلوب التعامل وقت الخلاف، وهل بتعرفوا تتفاهموا ولا لا،
فأنا مش بقولك تغافلي عن الحاجات اللي فعلًا مضايقاكِ أو تاعباكِ خصوصًا لو بتتكرر، لكن في نفس الوقت مش كل موقف صغير يتحول لخناقة أو طول الوقت اختبار للطرف الآخر أو إننا ندقق في كل كلمة وتصرف وهكذا.

ومهم تستغلوا الفترة دي في التأهيل للزواج بشكل كويس، وأنصحك بسماع الحلقة رقم ٦ في البيت المسلم، المهندس أيمن -فك الله كربه- كان ذكر حل لمشكلتك، واسمعوا باقي حلقات المهندس في السلسلة دي بالمرة بقا.

الله يصلح حالكم ويتمم لكم الأمور على خير يا رب العالمين
🌱

قال الله تعالى ( وَإِذَا قِیلَ لَهُ ٱتَّقِ ٱللَّهَ أَخَذَتۡهُ ٱلۡعِزَّةُ بِٱلۡإِثۡمِۚ فَحَسۡبُهُۥ جَهَنَّمُۖ وَلَبِئۡسَ ٱلۡمِهَادُ ) البقرة 206

الاية دي بتقولك انك اياك تستكبر على النصيحة ، اوعى تكون شايف نفسك الشخص اللي عمره ما بيغلط او عمره ما بيعمل حاجة حرام

الانسان اللي شايف انه اعلى من ان حد يجي يقوله قال الله وقال الرسول
ف لما تيجي تقوله يبني اتق الله اللي بتعمله دا حرام
يا بنتي اتقي ربنا الحجاب فرض عليكي
يا استاذ اتق الله مش عايز تخلص المصلحة غير لما تاخد رشوة
يا فلان اتق الله اللي انت بتقوله دا حرام
ف يكون الرد : خليك ف نفسك ، او ملكش دعوة ، او انت هتقولي ايه الصح وايه الغلط !! ، الخ …

هو مستكبر انك تقوله اللي بتعمله غلط ، مش هاين عليه يعترف انه غلطان

قال عبد الله بن مسعود رضي الله عنه : كفى بالمرء إثما أن يقول له أخوه: اتق الله، فيقول: عليك بنفسك، مثلك يوصيني !

وابن عاشور بيقول ف تفسيرها : إي وإذا وعظه واعظ بما يقتضي تذكيره بتقوى الله تعالى غضب لذلك.

شوف بقا ربنا بيقولك دا عذابه ايه !!

اصل دا جمع بين ذنبين ، الذنب اللي هو عمله وذنب انه تكبر على النصيحة

قال الشيخ السعدي : فيجمع بين العمل بالمعاصي والكبر على الناصحين.

لحد م يجي ف مرة والكِبر ياكل كل الخير اللي جواه فيبقى لا يأمر بمعروف ولا ينكر منكرا
عارف بقا الانسان اللي قلبه مات خلاص من كتر المعصية !!
خلاص قلبه بقا مُغلف بالسواد فهو مش شايف اصلا ان اللي بيعمله غلط

وإذا قيل لهم لا تفسدوا في الارض قالوا انما نحن مصلحون !!

ف اتحولت من مجرد انها مستكبره ان صاحبتها تقولها حرام عليكي تبقي بشعرك لانها بقت ترد عليها وتقولها دا هو دا الصح اصلا ، وهو لو ربنا عايز الست تغطي شعرها كان خلقها بيه ليه !!

لما صاحبتها كانت بتنصحها تبطل تلبس بنطلون ف تقولها خليكي ف نفسك ،لانها بقت تقولها انتي اصلا مش عارفه حاجة دا البنطلون هو اللي بيستر اكتر من الجيبة او العباية

ف احذر انك توصل للمرحلة دي.

قال رجل لسيدنا عمر رضي الله عنه : اتق الله. فأنكر المغيرة بن شعبة على قائله، فقال عمر: إنكم لا تزالون بخير ما قالوا ذلك لنا، وقبلنا منهم.


⚙️

بالالتزام والاستفادة، وده بيظهر لينا من خلال التقييمات.

وازاي نكون منهم؟
بالالتزام بحضور التقييمات والمتابعة، وبإننا نذاكر بإتقان، بحيث نقدر نخرج من المقرر بأقصى قدر ممكن من الاستفادة.

ونظن إن السؤال من الدفعة التاسعة، فنحب نقول إنكم فعلًا دفعة مميزة، إحنا فخورين بيكم وبمستواكم، ونسأل الله لكم دوام التفوق والتميز :))

وكان في سؤال تاني عن فكرة إن العدد بيقل مع الوقت، يعني في البداية بيكون العدد كبير، ثم يقل تدريجيًا، فكان السؤال عن السبب؟

إحنا من البداية موضحين إن شرط الانضمام هو الالتزام والجدية، ومذكور في القوانين إن أي حد يتكرر غيابه بنضطر للأسف نستبعده.

فبالتالي ال بيستمر للنهاية هم الأشخاص الأكثر التزامًا، وده سبب إن العدد يقل مع الوقت.

وفي النهاية إحنا فخورين جدًا بكل حد ما زال مستمر ومكمل معانا إلى الآن في جميع الدفعات، ونسأل الله لكم جميعًا التوفيق والسداد والانتفاع بما تتعلمونه :"))

قال الله " ودخل معه السجن فتيان "
طيب مين اللي دخل الاول يوسف ولا الفتيان ؟!
طيب مين هم الفتيان دول ؟
مش مهم نعرف ، مش دي العبرة من الاية
العبرة ان كان معاه فتيان في السجن

كذلك لازم يكون دا منهجنا في الحياة ، القرآن بيعلمنا ازاي نتعامل في المواقف المختلفة ، متمسكش ف الحاجات اللي ملهاش لازمه ، نشوف ايه المهم ونركز فيه.
شخص بيحكي قصه وليها هدف معين ، تيجي انت تسيب كل حاجه وتمسك ف نقطه معينه مش هي محور الموضوع ، وتترك المغزى منها.

يعني مثلا واحد بيقول شاب امبارح راكب موتوسيكل وكان بيتكلم ف الموبايل وعمل حادثه ، تيجي انت تقول لأ انا عارف الشاب دا ، دا كان راكب عربية مش موتوسيكل
وتبدأ الجدال ف امور بعيده تماماً عن مغزي القصه.
دا بينقص منك كانسان عاقل بالغ ، الاطفال هم اللي ممكن يتشبثوا بالتفاهات ، لكن الله يريد ان يربينا من خلال القرآن ، ازاي تكون انسان عاقل رزين وواعي.
كذلك ي شباب مينفعش نشغل بالنا بشيء لم يذكره الله ، لانه لو كان الخير في ذكره لما أخفاه الله ، والا فإنه لن يفيد معرفته بشيء
يعني مثلا عدد اصحاب الكهف ، لم يذكره الله في القرآن
فقال الله " سَيَقُولُونَ ثَلَاثَةٌ رَّابِعُهُمْ كَلْبُهُمْ وَيَقُولُونَ خَمْسَةٌ سَادِسُهُمْ كَلْبُهُمْ رَجْمًا بِالْغَيْبِ وَيَقُولُونَ سَبْعَةٌ وَثَامِنُهُمْ كَلْبُهُمْ قُل رَّبِّي أَعْلَمُ بِعِدَّتِهِم مَّا يَعْلَمُهُمْ إِلَّا قَلِيلٌ فَلَا تُمَارِ فِيهِمْ إِلَّا مِرَاءً ظَاهِرًا وَلَا تَسْتَفْتِ فِيهِم مِّنْهُمْ أَحَدًا(٢٢) " الكهف

ربنا بيقول محدش يعلم عددهم الا قليل ، فلا تمار فيهم إلا مراءً ظاهراً ولا تستفت فيهم منهم احدا
ربنا بيقول للنبي صلى الله عليه وسلم ان محدش من بني إسرائيل يعرف عددهم غير بعضهم ، والباقي ميعرفوش ، فمتجادلهمش في معرفة عددهم لانهم لا يعلمون

اللي عايزين نطلع بيه من الآيه هو اننا لازم نركز فقط في المغزي والمراد من الموضوع او الكلام اللي بيتقال ومنجادلش في التفاهات اللي معرفتها او عدم معرفتها مش
هتفيد بشيء.


⚙️

قال الله تعالي " إنا نراك من المحسنين "

ايه اللي جذب الفتيان ليوسف ؟!
جماله ؟! ، منصبه ؟! دا هو حتي معندوش منصب ، دا مسجون.
أمال ايه ؟!
اخلاقه
روي أن الضحاك بن مزاحم سئل عن تفسير الاية ، ما كان إحسانه؟ قال: كان إذا مرض إنسان في السجن عاده وقام عليه، وإذا ضاق عليه المجلس وسع له، وإذا احتاج جمع له شيئا

كذلك انت باخلاقك هتجذب الناس ليك باحترامك وادبك معاهم

إنما تملك الناس بحسن خلقك ، وحسن الخلق شيء هين ، وجه طليق ، وكلام لين.
لا خير في شخص سيء الخُلق

إنما الامم الاخلاق ما بقيت
فإن هم ذهبت أخلاقهم ذهبوا

ربنا بيفهمنا هنا انك تقدر تنشر الدين عن طريق أخلاقك

⚙️