انت حاضر :-

بيا مكان انت يامهدي بياعزيه
من يجي شهر المحرم والرزيه
ياهي اعظم عندك ابين المصايب
سبي زينب لو ذبح راعي الحرايب

•••••{}{}{}•••••{}{}{}•••••

شحال كلبك من شفت هل الهلال
دموع تنزل منك بثكل الجبال
وفاطمه تنحب لربات الحجال
وثوب جدك مدمي برماح ونبال

بياذنب جدك ترضه الاعوجيه
ويبقى نايم عله التراب بهالمسيه
بيا ارض تتلكه عاشور النوايب
ياهي اعظم عندك ابين المصايب

{}{}{}{}{}{}••••••••••{}{}{}{}{}{}

بلايه شك عندي يامولاي انت حاضر
تبچي وتنوح لمصابه بدم محاجر
وبالمجالس تكعد كبال المنابر
تكابل الزهره ودمعكم بالنواظر

نسمعك ونشوف دمعاتك جريه
للسبط مذبوح بارض الغاضريه
تساعد امك لو نعت كل الاطايب
ياهي اعظم عندك ابين المصايب

{}{}{}{}{}{}••••••••••{}{}{}{}{}{}

آه يامهدي وحنينك يوم عاشر
وانت تسمع جدك تدوسه الحوافر
ومن تشوف الرمح شايل بس مناحر
وتدري عكب حسين مسبيه الحراير

تلطم الراس وتذبها عمامتك
وبالمجالس ياعظمها شهكتك
يمته تاخذ ثارك وتطلع ياغايب
ياهي اعظم عندك ابين المصايب

{}{}{}{}{}••••••••••{}{}{}{}{}

شلون حالك سيدي ويوم اهدعش
وانت جدك مات ضامي من العطش
وجسمه ياويلي من الارماح انفرش
و ظل ثلاثه بلايه تغسيل ونعش

اشعث اغبرك تلتقط دم الذبيح
وي محمد جدك وزينب تصيح
خد ابو اليمه طريح عله الترايب
ياهي اعظم عندك ابين المصايب

{}{}{}{}{}{}••••••••••{}{}{}{}{}{}

تحضر لطف نينوى وشايل الرايه
من محرم تبقى وليوم السبايه
تنتظر رجعة سبيه بلا حمايه
وكل بقايه مجزره طف البلايه

موكب من الشام تتقدمه السبيه
مانشاهد راجعه وياهم رقيه
نسمع اصوات الملايك بالنحايب
ياهي اعظم عندك ابين المصايب

{}{}{}{}{}{}••••••••••{}{}{}{}{}{}

الخادم احمداللعيبي
ونســـألــكـم الـــدعـــ‏اء
https://t.me/Altef1

بِسْمِ الله الرَّحْمَنِ الرَّحِيمِ
اللَّهُمَّ كُنْ لِوَلِيِّكَ الحُجَّة بْنِ الحَسَنِ صَلَواتُكَ عَلَيْهِ وَعَلى آبائِه فِي هذِهِ السّاعَةِ وَفِي كُلِّ ساعةٍ وَلِيّاً وَحافِظاً وَقائِداً وَناصِراً وَدَلِيلاً وَعَيْناً حَتّى تُسْكِنَهُ أَرْضَكَ طَوْعاً وَتُمَتِّعَهُ فِيْها طَوِيلاً.

بين العقيلة وباب الحوائج

انه بيسر رحت وحزن
وانت بسجن يبن النبي
واثنينه شفنه المحن
كيد وحبل هم وسبي

•••••<><><><>•••••

نفس المأسي شاهدت مثلك ياعمه باليسر
سجنك ظلام بلا ضوه وسجني خرابه چالكبر
ومكيده فوك الهزل جن كيدك بايد وظهر
تدعي يخلصك بارئك وادعي اموتن بالسفر
نفس المصايب والالم
حرمه انه ما بين الزلم
وانت رفعت چف الدعا
حقق الهي مطلبي

••••<><>••••<><>••••

كل الجرى فوك الهزل لاچن ابد ما همني
الوله جمر كلبي الشمر بسوط النذل يلچمني
شما شفت ياعمه من اذى اتذكر الدوهني
راس الحسين على الرمح وبنيته تاهت مني
وتحملت لوعة والم
وترضرضت مني الجدم
چن ساكك البيها ثكل
بسجن اللعين الناصبي

••••<><>••••<><>••••

النه القتل عاده وسرت والسم بعد هم حاله
واتذكر مصاب السبط بطف كربلا وعياله
وبسمار باب ام الخدر وقنفذ وسوط هلاله
بعيون امك فاطمه وجتافها الهماله
ولاتنسى محنه حيدره
يشوف الجليله الطاهره
ضلعينها تنزف دمه
ومكيدين الطالبي

••••<><>••••<><>••••

ياعمه انت من متت جسمك بالعباية انستر
جدك بقى بطف كربلا مسلوب محزوز النحر
وعماتك بنص الغرب والشمر فرهدهن خدر
بايدهن يسترن وجه لو طلعت شموس الظهر
نادو على ذاك الجسر
هذا الامام بكل فخر
ونادو خوارج والنسا
ينظر عليها الاجنبي

••••<><>••••<><>••••

مغسل يبن سيدالرسل مدفون بتراب اللحد
وحسين غسله من الدمه وكت الدفن وبلايه خد
واحنه سبايا بهالفلا ولاناصر ويانه يجد
بس روس اهلنه مذبحه ونبتهل للواحد احد
شيعوك وانسد الفضا
ويمك حضر ذاك الرضا
وبلا غسل جدك يظل
وعليلنا يحبي حبي

••••<><>••••<><>•••••

لاشك حضر ذاك المسا يمك ابونه حيدره
وياه ابوالقاسم اجه وامي الزجيه الطاهره
كلهم مشو بجنازتك والمهدي يبچي المفخره
وحسين چثه بكربلا ودمومه سالت عالثرى
تمنينه يحضرنه علي
وياه عمامي وكل هلي
وتحضرني امي فاطمه
وتجيب اليه معصبي

••••<><>••••<><>••••

✍🏻 الخادم احمداللعيبي
ونســـألــكـم الـــدعــــاء
‏https://t.me/Altef1

ادري معطلك وذنوبي كثرانه
بس لساني يلهج بيك مولانه
وحق امك الزهره والضلع والباب
يوميه اناطر شوفتك انه
دعيت الباري ليلة مولدك مولاي
عجل بالظهور الروح خلصانه
لا تبطي بعد گلبي يون وينوح
وروحي عليك يبن الحسن ولهانه
نريد نروح لارض الشام والمسموم
وناخذ ثارهم بس انت ويانه
وما ننسى بعد ثار الذبيح حسين
والعباس ذاك البطل واخوانه

الخادم احمداللعيبي
13/ شعبان المعظم/1446 هـ

اجت ايامك
بكلبنه خيامك
بچينه ايتامك
يسلطان الكلب

•••••<><>•••••

الما فهم سرك يبو الاكبر صدك
الف واربعميه عنوان العشك
ساعه لو ماكو هواكم نختنك
واحنه وياكم ابد ما نفترك
نعوف المجلس
ابد منعوفه
ونردد چلمه
نحب حروفه
حسيني الغالي .. يظل اغلا محب

<><>•••••<><>

ابد مااترك عزاه لاخر نفس
وكون لطمي بصدري چن حافر فرس
ويلي للمذبوح وبحر الشمس
جنونك براسي مثل نخله انغرس
جنوني وعشكي
وجميع سنيني
دموعي وعمري
وقف لحسيني
الكلب دكاته .. لابواليمه كتب

<><>•••••<><>

شلون ماابچي اظل طول العمر
حسين ظهري وهو مكسور الظهر
بعيني تبقى خيام زينب والخدر
وكون موتي يصير بالعاشر قهر

حياتي وروحي
نذر لعيالك
واذا ماابچي
اموت ابالك
وانه اليكفيني .. يسموني محب

<><>•••••<><>

ابچي لمصابك ودمعي ما يچن
دموعي غيمه سيدي من الحزن
نغترب نبتعد تبقى انت الوطن
والذنوب العندي طاحن بالصحن

انه وتقصيري
عبد عد بابك
الك كل عمري
نذر لعتابك
اريد بجاهك .. يمسحون الذنب

<><>•••••<><>

انت صرختنه الچبيره ياحسين
عكب صوتك احنه صحنه طايعين
ننشر الرايه ونلطخ هالجبين
لجل عشكك سيدي والطاهرين

تظل صرختنه
عناوين الدرس
نموت بحبك
لحد اخر نفس
هويتي بزغري .. ينورلي الدرب

<><>•••••<><>

الخادم احمداللعيبي
1447 هـ
نسالكم الدعاء

ياام الوفه ياام عباس :-

امنياتي
كون مثل الحره اركبها الهزيله
امنياتي
خادمه لموكب حريمك يبو العيله
امنياتي
ولا اظلن بالمدينه بعد ليله

_______________

امنيات هوايه عندي لريتك اصبح هوى
ولايصل كصتك حجرهم يبني في طف نينوى
امنياتي درع اصبح من يكع راعي اللوى
وبعد هم امنيه عندي لعيلتك اصبح ضوى
بطفك انه
اكنس الخيمه بعباتي
وهاي وحده من امنياتي
وبالعطش تنشف لهاتي
امنياتي
———————-

امنياتي يمه چانت بالطفوف اخدم ترى
بيدي اوزع الماي الكم والاجر بالاخره
واوكف كبالك حراسه تصلي وانه اصبح ضرى
وعيني تحرس كل بناتك مثل سبع الگنطره
وگلبي يمه
سامع وطايع لامرك
يمن رحمة الله سرك
نبضي لكسرك يجبرك
امنياتي
——————-

امنياتي العطش يمه ما يمس خدر الحرم
ولا رضيعك يبقى ضامي ولايمس نحره السهم
وزفة القاسم تصير بلايه دم ولا الم
وعلي الاكبر بيده يرفع حنته لابن الكرم
لجل عينك
حنته تلكاها بيده
وعمه الكافل يريده
وباسمك تكون القصيده
امنياتي
———————

ما يمر بيكم ييمه سبي ونوح ولا ذبح
يبني كلبي وياك اخذه عكب عينك منذبح
ما لي مهجه بلا هواكم اسود يصير الصبح
وحين اسمع حره منكم بالسبي وراس برمح
عيني تبچي
للعقيله ام الخدر
وسكنه مسلوبه ستر
منين اجيبن هالصبر
امنياتي

_______

اخر امنيات عندي كون مااسمع خبر
حسين عاري بلا محامي وزينب بلوعة وقهر
ولا تربع فوك صدرك شمر ولراسك طبر
ولا تسلب خدر حره ولا وكع چف الكمر
بيت الاحزان
يصير بيتي بغيبتك
وابقى اناطر جيتك
الگوم سلبو يمنتك
امنياتي

______

اختصر كل امنياتي تعود زينب للديار
ما يمرها الهظم ساعه وعينها بيها انكسار
ولا متنها ازرك اشوفه ومنسلب منها الخمار
معززه محميه ترجع بالخدر واهل الجلال
لدار ابوها
راجعه ويحرسها كافل
وكلها تتلكه المحامل
وترجع لذيج المحافل
امنياتي

——————-

الخادم احمداللعيبي
1447 هـ
نسألكم الدعاء