آه ياعباس ياحزام الظهر :-

شلون ارد لخيمتي وبنيني
وماي ماعندي ولا چفيني

••••<><><><>••••

شلون اردن والسهم صاب النظر
وماي ماعندي وصواويني بخطر
وكمت احس بحسين مكسور الظهر
وزينب تحشمني ياضي عيني

••<><>••<><>••

محني ظهري وراسي مصيوب بعمد
الجربه تنحب يمي چن فكدت ولد
الماي ابنها الراح ما ظنه يرد
وضاعت بطيحتنه كل سنيني

••<><>••<><>••

اه يازينب وكع مني العلم
جفوفي طاحت يختي ما بين الزلم
بعيني سهم النايبه ودم والم
وحشمي باسمي بكل وكت تلكيني

••<><>••<><>••

فكري مشغول بخدر ام العلا
وصوت عدواني ملكنه كربلا
هجمو يلا بخيلكم ظل بالفلا
وانه اصيحن ياجدم عينيني

••<><>••<><>••

كل شهيد اليرتقي يم فاطمه
ماي من كوثرها يروي من الضمه
كالت اشرب لچن روحي مألمه
كلت مااشرب وضامي حسيني

••<><>••<><>••

آه يبن المرتضى وسيد الورى
مني ليك اخر تحيه ومعذره
مات اخوك وراح سبع الكنطره
وحين تلفيني برفق تچيني

••<><>••<><>••

يبن ابوي اعذرني طايح منهدم
شلون اشوفك والنظر غطاها دم
سهام جسمي ثكلت مني الجدم
عليك امك عله الترب خليني

••<><>••<><>••

بعد ساعه وجسمك يظل بالترب
وراسك عله السمهري يطوف الدرب
بعد عينك خويه لا يهنه الشرب
السبي عكب الطف جمر يچويني

••<><>••<><>••

الخادم احمداللعيبي
٢ / ذوالحجه / ١٤٤٤ هـ
ونسألكم الدعاء
https://t.me/Altef1

راح الاخو :-

رد بكسر يشهگ ألم
عالشاطي ظل راعي العلم ..
راح الاخو وضاع السند
بعيونه بركان
من فقد الاخوان .. راح الاخو ضاع السند

()()()()••••()()()()

اول علامه للسبط محني الظهر والكامه
تنزف دمه عيونه جمر مهبط ياويلي الهامه
يعثر ويوكف منتچي عالخاصره وحزامه
ويصيح ضعنا بها لفلا راح السعد وايامه

ظهري انكشف بان الكسر
منهو البعد يحمي الخدر
وصوته اعتلا ونفسه خمد .. راح الاخو ضاع السند

•••••()()()•••••

ثاني علامات الحزن محنيه شفت ضلوعه
ذب العمامه وبالردن يمسح مسيل دموعه
هالدمعة قوة عاطفة موعن نفس جزوعه
بس وسفه صاح وسمعته زينب وهي مرُوعه

بعيونه جمره من الحزن
يازينب ينادي المحن
براس الكفل نابت عمد .. راح الاخو ضاع السند

•••••()()()•••••

ماشايفه دموع الولي تنزل جمر مفجوعه
يچون بكاع الطف جوي ويتفجرن برجوعه
لاچن عظيمه مصيبته كلها عليه مجموعه
ومن صاح ياراعي العلم ضاكت الدنيا بلوعه

وجهه احترك شيبه طلع
فوك الهظم خصمه فزع
بيمن سعد كلبي بعد .. راح الاخو ضاع السند

•••••()()()•••••

چنه علي حين انضرب وعمامته بدم راسه
لاچن علي حيدر وكع ما بين اهله وناسه
وهذا بفيافي كربله لا درعه لا ظل طاسه
والاشد طاحت جربته والعلم دنك باسه

وبصدره طعنات الرجس
وجسمه بكه بحر الشمس
وروحه بعطش ظلت وعد .. راح الاخو ضاع السند

•••••()()()•••••

چني شفت حال الولي من شاف أخوه بالمصرع
دنك على چفوفه وبجه وناداه وظنته يسمع
وبعينه من شاف السهم دنك عليه هم يشلع
تحسر وهد حيله وبجه واختلط دمه ومدمع

چنه يكلي منهدم
ما بيه حيل انكل جدم
عكب الكفيل المبتعد .. راح الاخو ضاع السند

•••••()()()•••••

رد والجدم چنها هوى ويتعثر بخطواته
چالقوس صاير منظره ومتلعثمه چلماته
عمري فلا صدك جبل يتثلم بطيحاته
لاچن جرى هذا واشد من شاهدت صيحاته

صاح واحس كلبه انلچم
عكبك منو يباري الحرم
عين العدو بفكدك رغد .. راح الاخو ضاع السند

•••••()()()•••••

تلكيته لاچني شفت غايبه افكاره وحاير
چنه يكلي بيا وضع مكطع موذر صاير
حاولت اجمع چثته كل جزء منه بحافر
وسمعت منه اخر حچي اعتذر يبن الطاهر

يختي الكمر غاب وافل
عكبه بيسر وانه بقتل
الخيمه وكعت راح الوتد .. راح الاخو ضاع السند

•••••()()()•••••

الخادم احمداللعيبي
١٨ / ذوالحجه / ١٤٤٤ هـ
https://t.me/Altef1
ونسألكم الدعاء


القصيده على غرار طور قصيده ملا عمار الكناني
((يافاتن عيون الحجر ))