شجاعة علي الاكبر :-

نـــزلـــه

نزل زلزال الغضب
بكربله حل الرعب
هذا الاكبر لو محمد لو وصيه
•••••••••••<><>••••••••••••

نزل سجيل الغضب ويريدها
بيده يفني جيوشهم ويبيدها
من برز ليث الصفوف وحيدها
كام يشطرهم شطر ويعيدها
صاح والكل اضطرب
كال حضرولي الركب
وانا ابابيل السما بالغاضريه

•••••••••••

صاح بيهم صوت قارعة الحشر
الا اجيب بچفي لحسين النصر
رجفت الهامات ماظن تستقر
من هجم بالواقعه انطاهم امر
كال ماذون بحرب
اليوم اراويكم عجب
چفوفه تقره الزلزله وتذبح اميه

•••••••••••••

قره عليهم بالطفوف ايه قتال
دخن وضهضب عليهم بالنزال
ماكو مهرب ليكم وهذا محال
بالحرايب ينعرف فعل الرجال
الا اخليكم حطب
من الاول للذنب
وانه ابن قران ناطق للبريه

•••••••••••

كلب كل الجيش يمنه وميسره
وخاض بيهم والوكف ما يعبره
الزلم وكفت حايره چنها صخره
انه ابن ليث الحرايب حيدره
سيفه من دمهم شرب
ياهو يبرز ينشطب
وكلهم انه الموت وبسيفي المنيه

••••••••••••••

منين يندارون يلكونه حضر
يصيح بيدي اليوم اوديكم سقر
اليوم اعلمكم شنو معنى الخطر
وعمي ياهو يفر يذبحه عله النهر
فرو ومامش هرب
يطلعلهم بالدرب
يضرب الهامات ضربه حيدريه

•••••••••••••••••

صال بيهم جال وهو بمفرده
عيونهم تجادح وخوف افئده
ضاكت الدنيا عليهم بالسده
سيفه يبتر والعطش بيه اضهده
جبده محتاج الشرب
رد للحسين الرحب
بويه شربه لچبدي ياراعي الحميه

•••••••••••••

بويه هاك لساني وتحس بالالم
وجفن عيني مفطر لذيچ حرم
بعد ساعه النار تاكل بالخيم
تهيم يابويه الفواطم بالهيم
هذا يابويه صعب
من بناتي تنرعب
واليتامى بلا وعي فوك الوطيه

•••••••••••••

عاد وحسين الابي يدعي الاله
شلون حال اليدعي عطشانه لهاه
يكله ربي هذا للهادي شباه
احفظ الاكبر يارب وامنع اذاه
حفظه من غدر الغرب
جيبه سالم لي يرب
رجعه ياربي الي وللفاطميه

••••••••••

انخطف كلب حسين حين الجاسه
مطبر ويسمع ونين انفاسه
بويه جدي هل سقاني بكاسه
شربة من كوثر عزيزة ناسه
وكلي ياوليدي التعب
زال لاچن انتحب
لعمتي زينب والنسا التمشي سبيه

•••••••••••

✍🏻 الخادم احمداللعيبي
ونســـألــكـم الـــدعــــاء
‏https://t.me/Altef1

آ ياضيمي :-

عطشان يدفن عطشان
بدموع ويلي وحزنان
ويشوف جسمه العريان
آ ياضيمي ... آ ياضيمي

••••••{}{}{}••••••

مصيوب گلبي ومحتام
وشلون عاينت ايتام
چلمات عدواني اسهام ... آ ياضيمي

مكيود يابوية مشيت
مسلوب عفتك ونعيت
رديت ليكم رديت ... آ ياضيمي

موذر وجسمك تمثيل
طشرته يابويه الخيل
بالدفن حاضر جبريل ... آ ضيمي

لملمت جسمك حصران
عطشان يدفن عطشان

<><><><>•••<><><><>

زينب تعاينها الناس
وظلت تنادي العباس
موقف ابد ماينقاس ...آ ياضيمي

شفنه اللي ما مر عالبال
طبينه مجلس انذال
تمنينه بويه الآجال ... آ ياضيمي

بعيوني الدنيا سواد
يحسين عكبك رماد
دم دموعي والاصفاد .. آ ياضيمي

وانعاك كل الازمان
عطشان يدفن عطشان

<><><><>•••<><><><>

جيتك وتفكيري احتار
چم منظر بمنظر صار
جسمك المليان حجار .. آ ياضيمي

وعمي الكافل مطروح
والجربه تنعاه وتنوح
والشاطي عليه مذبوح .. آ ياضيمي

لميت ابنك الاكبر
وانصارك آ يمشكر
وعبدالله ناره التسعر.. آ ياضيمي

ونحرك نبل بيه و زان
عطشان يدفن عطشان

<><><><>•••<><><><>

بضلوعك اهواي احساس
واتنفسك بالانفاس
عطر امك ويانوماس .. آ ياضيمي

وعرش الله ينوح بصوب
وحيدر گبالك منكوب
وجدك ينادي المحجوب .. آ ياضيمي

نورك بلحدك من لاح
ناداني نحرك وصاح
عبدالله آ ياسبّاح .. آ ياضيمي

وبصدرك نامت رضعان
عطشان يدفن عطشان

<><><><>•••<><><><>

واريت كبرك اشلاء
وبصبعي خطيت اسماء
مرضوض وسط الهيجاء .. آ ياضيمي

طولي لفكدك مكسور
شميت تربك منحور
ناحت عليك ارض الطور .. آ ياضيمي

تميت وكليبي الذاب
رديت انحب الاحباب
منك خذت چف تراب .. آ ياضيمي

شمته كل النسوان
عطشان يدفن عطشان

<><><><>•••<><><><>

الخادم احمداللعيبي
ونســـألــكـم الـــدعـــ‏اء
https://t.me/Altef1
١٢ / محرم الحرام/ ١٤٤١ هـ

المهدي يسقبلكم يازوار :-

زواري مكطوع راسي من الجسد
زواري والراس مصيوب بعمد
زواري معزبكم المهدي السند
زواري

••••<>••••<>••••<>••••

ياهله بزوار جدي الكصدته من كل قطر
تمشي وتوزع دمعها للغريبه ام الخدر
وتفرش الدرب بجفنها لكل وفد طول العمر
تنادي حي على المسير من البحر حد النحر
مهديكم يهلي بضيوف السبط
مهديكم يحيي كل زاير هبط
مهديكم يرحب باهل المجد
زواري

#••••••<><>••••••#

مرحبا واهلا وسهلاً يل مشيتو لكربله
كاصدين حسين جدي وانا انادي ياهله
بالبصيره تشاهدوني وايدي تحرس قافله
وكل محب جاني يعزي يم حبيب نسجله
مشايه اخدمكم بنور البصر
مشايه سمعو دعاء المنتظر
مشايه كلمن اله حاجه يجد
زواري

#••••••<><>••••••#

كل دمعكم انه احسبه واوزنه بماي الذهب
نداوي كل جرح بجسمكم وماتحسون بتعب
الكاصد يواسي الزچيه لايخاف من الغضب
يأمن بيوم القيامه يشوف بالجنه العجب
احبابي انقذكم بيوم الحشر
احبابي بالجنه سنكم يبتشر
احبابي لاما يمر بيكم مسد
زواري

#••••••<><>••••••#

خطوه خطوه وياكم امشي يل تعبكم مايضيع
يل رفتضو العيش بالذل انتم انصار الشفيع
وبالحرب شفنه المراجل كتبت انذل الوضيع
اعلامكم الله اكبر نصره للطفل الرضيع
انصاري بكل زمن تفديلي عين
انصاري تنادي يارب الحسين
انصاري من كربلا حد الحشد
زواري

#••••••<><>••••••#

امنياتك كلها عندي اطلب وامر امر
كلها هالليله مجابه بجاه فاطم والكمر
وبنحر ضامي الطفوف وزينب العفه وستر
تكضي كل الالام عمرك من تصل صوب النهر
طلباتي ابقى امشي بهالدرب
طلباتي خاتمه عمري يرب
طلباتي انصر المهدي عهد
زواري

#••••••<><>••••••#

✍🏻 الخادم احمداللعيبي
ونســـألــكـم الـــدعــــاء
‏https://t.me/Altef1
٥/ صفرالخير/١٤٤٢ هـ

المهدي ويانه يشيل الرايه
باربعينك من نجي مشايه

{}{}{}{}{}•••{}{}{}{}{}

باربعينك نعتني كلنه ونصيح
حسين ياروح الضماير ياذبيح
الزارك يزور الله وبعرشه الصريح
وهالخبر وارد وبيه حچايه

••••••<><><>••••••

نعتنيلك سيدي ونطوي السفر
ويه مهدينه الامام المنتظر
نبچي للحره العقيله ام الخدر
ونبقى وياكم عهد وفايه

••••••<><><>••••••

المهدي ويانه يعزي ام الخدر
الجايه من الشام لحسين الفخر
جايه وجابت الراس لهالحفر
كلنه دكينه المواكب ثايه

••••••<><><>••••••

شلون نترك سيرتك يبن الحسن
وانت كل عام اليجي وي الضعن
تحفظ ايتام العقيله بكل حزن
وتبقى انته للاهل حمايه

••••••<><><>••••••

الخادم احمداللعيبي
ونســـألــكـم الـــدعـــ‏اء
https://t.me/Altef1
٥/ صفرالخير/١٤٤٢ هـ

تربينه على صوتك اكثر من امي
وعشنه سنين ننعى وياك من تنعي
صوتك ظل يغذي الروح كل عاشور
من تصيح خويه حسين يبن امي

بشراكِ ياام البنين بمولد
شق الظلام بنوره الوضاء
غارت نجوم الكون ليلة مولد
العباس قرة عينها الحوراء
ورث العلا من حيدرٍ ووصية
ذاك الزكي وبضعة الزهراء

بقلم احمداللعيبي
https://t.me/Altef1
مباركين بولادة القمر من ال علي ..

‏هبت رياح الجنان ودنت عطايا الرحمن
‏وقوافل العتقاء أوشكت على الرحيل
‏أسأل الله العلي القدير أن لا يغادرنا شهر رمضان إلا وإسمي وأسماؤكم في صحيفة العتقاء من النار ووالدينا ومن له حقً علينا والمسلمين أجمعين
‏وأن يسعدكم ويوفقكم ويحقق أمانيكم..

الخادم احمداللعيبي ...

يالوعه محرم :-
يامحرم ابچي بمحاجر من دمه
يامحرم انحب واساعد فاطمه
هلالك ياشهر الحزن
موت وعذاب ومحن

••••••••<><><>••••••••

ياهلال شجم مصيبه من يهل هذا الشهر
شهرك البيه دم عزيز الزهره بالوادي انتشر
جفني ما هاني بسعاده وزينب بذل اليسر
وروحي ياهلال المحرم يشهك ويزفر جمر

بكل محرم // الطم عيوني وجبيني
بكل محرم // لا ما يبطل ونيني
والدمعه لا ما تچن
موت وعذاب ومحن

••••<><><>•••••<><><>•••••

يامحرم كلبي نازف حين شفتك بالسمه
وفاطمه نشرت قميص حسين يشكي من الضمه
الدنيا كالدهان صارت حمره من كد الدمه
واسمعت ونه محمد وينتحب حامي الحمه

والملايك // واصلها دخان الخيم
والملايك // شهكتها تشبه حمم
وتواسي ام الحسن
موت وعذاب ومحن

••••<><><>••••<><><>••••

دمعي ياهلال المصايب فايض لوادى طوى
ارد اواسي دموع زينب من وكع حامي اللوى
وملوحت بيه رموشي لطفله مسلوبة هوى
نار وبكلبي جواتي من اسمعت طفل انچوى
والمعاره // فايضه نحور وزلم
والمعاره // رادت لجسمه تلم
وحارت بعين وجفن
موت وعذاب ومحن

••••<><><>••••<><><>•••••

من يجي شهر المحرم يصرخ المهدي بالم
يكول جدي مات ضامي ونسبت ذيج الحرم
وعمي العباس مدمي وعينه مصيوبه بسهم
وطفله من ايتام جدي تصيح ياراعي الشيم

واليتامي // تحت الحوافر والنبل
واليتامي // تشكي الشماته والحبل
سلبو تراجي الاذن
موت وعذاب ومحن

••••<><><>••••<><><>••••

انه حاير آه يازينب شلون حالت مهجتج
من سمعتي حسين نادى ردي خويه لخيمتج
لا تجين تشاهدين الشمر يذبح بخوتج
ولا تشوف عيون طاغي خويه ظل عبايتج

لاتجيني // ردي لعيالي بعجل
لاتجيني // صوبني خويه الاجل
ودمومي نطقن حچن
موت وعذاب ومحن

••••<><><>••••<><><>•••••

عمري كله بس محرم مو شهر اعلن حداد
وعمري جبته بلا سعاده ولابس عليك السواد
ما نسيتك حتى اذكرك وصدرك ترضه الجياد
انه لو مره نسيتك كون بعيوني الرماد

امنياتي // خدمتك يبن النبي
امنياتي //حقق الهي مطلبي
واندب لغربة ضعن
موت وعذاب ومحن

••••<><><>••••<><><>••••

✍🏻 بقلم احمداللعيبي
ونســـألــكـم الـــدعــــاء
‏https://t.me/Altef1

القصيده على غرار لحن لطميه الملا باسم الكربلائي (( تدري لو ماتدري ))

لهفي لك ياحسين :-

ويل حالي حسين ما بيه كل نفس
يجرد البتار ينطيهم درس
كاع شلوه وبالجرح كامت تحس
وعينه تربي عله النهر وخيامه

===•••===•••===

شلونه حاله وحال جرحه المنلچم
من تراب الطف ياويلي ومنهشم
من العطش ماعنده مهجه ومنثلم
ينادي زينب لو علي من الآمه

===•••===•••===

لون ما طايح على الشاطي الخليل
چان اجاني اليوم عباس الكفيل
چا دفع عني السهم واروى الغليل
وما جسر ظالم عليه بأثامه

===•••===•••===

بالونين اسمع ينادي فاطمه
يمه سلبوني وفتك بيه الظمه
حاضره تشوفين ابن حامي الحمه
ضامي مطروح وكضت ايامه

===•••===•••===

ظل يون على الارض ساعه وفتر
صوت ماعنده وعليه ظالم جسر
يرفسه من صفاحه ويلوع النحر
وفوك صدره تربع عله سهامه
===•••===•••===

الخادم احمداللعيبي
‏https://t.me/Altef1
ونسألكم الدعاء
ليلةالاول من المحرم /١٤٤٣ هـ

لابي الفضل :-

كمر لو ماي .. تحير هاي
الفكر محتار ...ويتيه الراي

//////()()()()()()//////

نورك من ضوه جبينك محد يكدر يشوفه
كاتب عالنهر موقوف الا بلمسة چفوفه
ملكت الشاطي بروحك حكمته بمايه وجروفه
تكدر كل نهر جاري توكفه وهايه معروفه

يظل بيك الكلب هايم
كلت مااشرب وصايم
واخوي حسين بالخيمه
يناطر جيتي وعيناي

———————

جربتك ياابو الغيره متروسه عطف واحساس
تنكط غيره للوادم عطرها يترس الانفاس
من ايدك خذت شمره وكرامه ياابو النوماس
تحارب مثلك وي حسين هذه جربة العباس

الجربه تلونت لونين
ماي وكمر لجل حسين
ارتعدت ساعه العسره
مثل عباس اظل وفاي

———————

صفاتك كلها من حسين وراية طفك الايه
اية خوه ياعباس وشجاعه وبيها الحچايه
بنفسي من حچاها حسين اركب تشرح الغايه
فداك الكون يبن الحيد عكبك مالي تچايه

عمد بيتي ياتاج الراس
ماكو بالبشر عباس
انخلق من نور قدس الله
اخوي وعسكري ولواي

———————

چفك من وكع عالگاع راسم اية الخوه
وچفك الاخر من يطيح تطوفه الناس كالمروه
وسهم عينك اجه خطار ضيفته بهله ونخوه
ومن كصتك خجل تنزف لان زينب متتروه

اعتذرت لاختك الحره
بدمع من عينك الحمره
اجاني الموت يازينب
تنعه راكب ومشاي

———————

تاريخ الزلم نقطه كبالك يازعيم الجود
من بعد الحسن وحسين وحيدر والنبي المحمود
شجاع وكافل الحره واخو بكل الشدد موجود
مثلك بيه رفعه راس بيك المرجله والزود

مفاخر تترس الخزنه
ماي لاخته ولسكنه
شهم مهيوب بالميدان
وبالجنه يظل سقاي
______

الخادم احمداللعيبي
https://t.me/Altef1
٤/ محرم الحرام /١٤٤٣ هـ
ونسألكم الدعاء

علي الاكبر :-

بچفوفه شحلات السيف بچفوفه
شباب ثمنطعش بالمعركة نشوفه

======••======

مدلل سيفه بيده وطلع من زمجر
چن حيدر وسط ميدانهم واكثر
حارو بيه حيدر لو علي الاكبر
كل واحد تقدم رجع لصفوفه

====••••••====

شايل راية واسمه يرعب العسكر
ابن حسين هذا يقاتل اهل الشر
اشجعم ثبتله موذر مطشر
خله رجالهم بالچفن ملفوفه

====••••••====

شما يبرز جمع ما يوكف كباله
يحصدهم حصد رجفت الخياله
صاحو منهو يبرزله وتدناله
ابن غانم برزله وعاجل زحوفه

====••••••====

من حيدر اخذ صولاته والشمره
ومن حسين ابوه اوارث البذره
هو بميمنه وعباس من يسره
اليشرد منه يم العلكمي حتوفه

====••••••====

شاب وكل حياته وقف لاجل الدين
مثل حسين ابوه ونعم من حسين
سيف ورمح بيده وحاوط الصوبين
ما يلحك يفر العدو من چفوفه

====••••••====

چنه الحوم اكبل والعدى فرت
ما تلحك تضم الروس لن خرت
اشجعهم شرد وعمامته انحلت
يلحكهم يكول اليوم ماعوفه

====••••••====

صال وجندل الصنديد وتعنه
لصوب حسين بويه بماي اتهنه
كله حسين بويه الماي بالجنه
يم المصطفى والكوثر حروفه

====••••••====

رد لحومة الميدان چن طاير
وابوه حسين من عنده الكلب حاير
خايف والدموع اعبار تتطاير
وكلب امه عليه بولهه ملهوفه

====••••••====

طاح وصاح بويه حسين اعذرني
حد عمري وصل والموت داهمني
جدي هنا سقاني وصاح آ ياابني
ويلي على الذبيح سيوف وتطوفه

====••••••====

الخادم احمداللعيبي
https://t.me/Altef1
٥/ محرم الحرام/١٤٤٣ هـ
ونسألكم الدعاء

لعريس الطف :-

عمري مااصدك خريطه
انت عندي اربع جهات
منين مااندار اشوفك
حسين ياسر الحياة

••••••{}{}{}{}••••••

انت ياعمي اتجاهي منين مااندار اشوف
صرت كعبه لكل مقاتل وعلم ما بين الصفوف
ياربيع الكلب انت حسين ياشيخ الطفوف
بدون روحك تجف روحي وتختلف عندي الضروف

يحل خريفي وانكسر
انت رية كل بشر
عكبك يحل القهر
الدنيا من دونك ممات
حسين ياسر الحياة

____•••••____

عمي ارخصني ارد اقاتل بين ايدك وانقتل
وابد لاتحرمني منها بجاه زينب والكفل
الشهاده وسام فخري والف هنياله الحصل
على لمسه من چفوفك والدمع منه هطل

انت ياباچي عضيدي
من الحسن انت وحيدي
عليك يبني يطك وريدي
الفاركك ما ظن يبات
حسين ياسر الحياه

____••••••____

رخص دموعه الشفيه وانحنى يودعه بحزن
الملتقى يبني بجنانه هناك يم ام الحسن
هناك زفه والملايك تنشد اطوار ولحن
جسام ياضنوتي تنقره عليك بشجن

ينتهي هنانه العمر
بعد ساعات الصبر
والورد عكبك كسر
يبن حيدر والصفات
حسين ياسر الحياة

____••••••____

برز ليهم شاب چنه الكمر لو خط الضلام
درع ما لابس بصدره وطوله چن طول الحسام
ما ركع للظلم ساعه ولا قبل يخذل امام
هذا من بيت الشجاعه والبخل عدهم حرام

الجود عدهم بالنفس
تعلموه اول درس
وبذل روحه والعرس
وخجل من عنده الفرات
حسين ياسر الحياة

____••••••____

ما ثبتله جندي واحد من دخل بيهم هتف
اليوم اخلي السيف يذبح كل نذل صال وحلف
تعبت الفرسان منه وانتهى منها الزحف
عاينوه يشد نعاله وصار ليهم كالهدف

والغدر عدهم سمه
ابتدا بضربة فاطمه
وهسه نيران وظمه
وابد ماعدهم ثبات
حسين ياسر الحياة

____••••••____

الخادم احمداللعيبي
https://t.me/Altef1
٦/ محرم الحرام /١٤٤٣ هـ
ونسألكم الدعاء

معاناة السيده زينب عليها السلام

عمري .. ينزف بطول الدهر.. عمري
خلص بس هم وقهر.. عمري
من الزغر كلبي انفطر .... عمري
#######•••••••######

عمري شمعه وذابت باول مصاب
بكسر ضلع الزهرا راعية الحجاب
من شفتها طايحة بعتبة الباب
وانا اناديها ولا اسمع جواب
ظليت.. انظر لكسر الظلع
ظليت.. اهمل دموم الدمع
ظليت.. انزف المدمع جمر . عمري
•••••••••#####•••••••••

عمري خلص ياخلك بس بالهظيمه
ياحريمه وياحريمه وياحريمه
من بعد عودي الولي اصبح يتيمه
وراح اشاهد بالطفوف اعظم جريمه
ناديت.. وين اخوتي الحاطمه
ناديت.. على الكفلني بصارمه
ناديت.. ماشفت يفزع بشر ،، عمري
••••••••########••••••

شفت اخوتي مذبحه بالغاضريه
وما شفت راحم يحن كلبه عليه
وانا بت حيدر علي واصبح سبيه
ومن بعد عزي اصيرن خارجيه
والله.. شفت نجمات السما
والله.. نزلن بحامي الحمى
والله.. انا بكليبي كسر ، عمري
•••••••#######••••••••

عمري عين بلا جفن ذوبها دمعي
من المصاب اللي جرى بس ابچي وانعي
صيحة رددها الشمر شايلها سمعي
ياحزينه بلغي الكافل او ودعي
كلبي.. ظل على اخواني بوجع
كلبي.. ابد ماساعه هجع
كلبي.. شايل هموم السفر ، عمري
•••••••######••••••••••

عمري شجره وماتت بفركة اخوتي
ميسرة على الناكة وتمنيت موتي
صحت ياعباس خويه بعالي صوتي
افزع انا بحاجتك وانت سلوتي
وينك.. ياشبل حامي الحمى
وينك .. ذاب كلبي من الضما
وينك ، اختك بلايه خدر ، عمري
••••••••######••••••••

من بعد خدري مشيت بلا غوالي
وسفه ياخويه انكشف مني خيالي
وبخرابه بتت ايام وليالي
وراسك كبالي وتشوف اللي جرالي
راسك.. شفته ايدير النظر
راسك.. على بناتك والكمر
راسك.. يكلي يازينب قدر ، عمري
•••••••######•••••••••

خلص عمري اهات وبغربه دفنتي
بلايه كافل محملي ويحضر غربتي
متت من الهظم ياويلي وحسرتي
وغابت عيون الاهل وانه بحفرتي
السجاد .. لوحده وبلايه احد
السجاد .. نزلاني للـ لحد
السجاد .. مودعه يااخت الكمر ، عمري
••••••••#######••••••••

✍🏻 الخادم احمداللعيبي
ونســـألــكـم الـــدعــــاء
‏https://t.me/Altef1


اللطميه على غرار لحن لطميه الملا باسم الكربلائي (( يمه .. لحظه وداع وسفر))

النفس المطمئنه :-

عزاء حسين يبقى بكل سنه دايم
لحد طلعه الحجه المهدي القائم

<><><><>••<><><><>

بسم الله مجراها ومرساها
مجالسنه البتوله حاضره وياها
بدايتها بعزاء المصطفى طه
واعلنها المأتم وابقى الك خادم

<><>••••••<><>

كاف وهاء ياء وعين ثم الصاد
رحمة الله مذبوحه بشتم وعناد
ضلوع مرضرضه والنسوة لابن زياد
والحادي تحضر للسبي عازم

<><>••••••<><>

الف ولام ميم والم بيه يجول
يا ذاك الكتاب اتهدم ومقتول
انه بلا ريب عندي الهدى وسط خيول
وخنصر منكطع وتسلب الخاتم

<><>••••••<><>

كل الأنبياء محزونه لجل حسين
شلون تريد ماالطم وادمي العين
على حسين وبنينه واخوته الطيبين
عمري بالمأتم ماضي وقادم

<><>••••••<><>

النفس المطمئنه بنينوى تُقضى
عجيبه شلون ربك ما خسف ارضه
ارجعي يارحمتي لجنتي ارضه
مرضيه لجنان الباري الحاكم

<><>••••••<><>

كل قران ربك اوضح اللوعه
من اول الم للناس مجموعه
ضد حسين آه يحسين وضلوعه
ونساء مسلبات بوليه الظالم

<><>••••••<><>

ختم ربك المصحف بالفلق والناس
وزينب ودعت اجساد وبلا راس
هوت من على الناكه تصيح ياعباس
وأشد من القتل شامت باثر شاتم

<><>••••••<><>

الخادم احمداللعيبي
https://t.me/Altef1
٢٠/ ذوالقعده/١٤٤٣ هـ
ونسألكم الدعاء