آه ياحزني :-

انت كلشي
شلون تمشي
يبني يالاكبر ياريحانة حياتي

••••<><><>••••<><><>••••

انت لا مو جزء مني كلي يبني انت صرت
شيبت رموشي برباتك وانتظر يوم كبرت
بگلبي صاير نبض تسري وابد مالحظه غبت
لچن راحت مني روحي يوم من ايدي رحت

انت ريتي ... وعمد بيتي
صحت عالدنيا العفا وغصه بلهاتي

••••••<><><>••••••

روحي چن ورگه بخريف غابت انسلت الروح
ياشبيه الغالي جدي بشوفتك انسى الجروح
شما ردت انهض واشيلك والله ايدي ماتلوح
طاح حيلي انهدم ركني چن دمع من كثر نوح

آه ياحزني ... شيلو ابني
وياه راح العمر كله وامنياتي

••••••<><><>••••••

طولي محني عليك يبني وجدمي يوكع مره يعثر
شما ندهني ونادى واحد وينك انت يابو الاكبر
نوبه اعاين سهم نحرك نوبه اشوف اللحم نثر
حسرتي وجمره لهيبي ابد ما يوم اتخثر

شفته واكع ... جسمي راكع
بطيحتك يالغالي لاحتلي وفاتي

••••••<><><>••••••

محدبه الدنيا وحزينه وغاب من بعدك ظهوري
ايدي تصفك ايدي الاخرى ذابل وغايب الجوري
بشوفتك لو حزن مرني ينجلي بيك وسروري
تالي مو اكبر لكيتك موذر ويادنيا غوري

ليلى تنشد ... ابني ما رد
عمتك عالباب تنحب وي بناتي

••••••<><><>••••••

اليفكد ابنه يحس هظيمه ينرسم حزنه بجفونه
وانا فاكد بدر يضوي مطبر ومختلف لونه
والاشد ضامي ومحمد والبتول يشربونه
هاي ماانساها والله شفته من غمض عيونه

آ يدهري ،، تالي عمري
بلا ولد ظليت وانا بـ نايباتي

••••••<><><>••••••

صبري يخلص ساعه ساعه ينتهي كطره بكطره
وانت بيك جروح كثره نبله فوگاها الف طبره
عمت عيني والمناظر غدت كلها بعيني حمره
يچمل مصابي عضيدي لو وكع منكسر ظهره

نحري يبقى .. برمحه يرقى
رحتو مني وغبتو يااجمل صفاتي

••••••<><><>••••••

الخادم احمداللعيبي
ونســـألــكـم الـــدعـــ‏اء
‏https://t.me/Altef1
٢٣/ ذ- ق/ ١٤٤١ هـ

القصيده على غرار لحن قصيدة الملا عمار الكناني شال رايه

يالــوعَـة مُصــابـي :-

من حَمّل عيالَه ... دم عيني هَمّالَه
آنه العَليلَه بلا ضَعَن يادهري خلّوني
ناديتَه يالغَالي ... ما حَسّبِت تالِي
تتركْنِي وَحدِي بدِيرِتي والدَمعَه بِعيونِي

••••<><><><><><>••••

تودِعُونِي وانه بويه الهَم ذِبَحنِي
ليش مِن دون الخَلَك وَحدِي عِفِتني
ماني بِنتَك مو عَزيزة آه ياحِزنِي
حتى لو ماكوا ضَعَن بالجِربَة خَلنِي

يالوعَة مُصابي .. مَحّد يدك بابي
وحدِي بقيت بحَسِرتِي وبجَمرَه تِركوني

••<><>••<><>••<><>••

بويه صَدّك عِلّتي ماهي ثِچِيله
خذني خَدّامه لهَلَك ياأبُو العَيله
بهَدوَةِ الليل لرَضيعك أَنتِخِيله
بكُل صَلاة وكُل قنوت آنه اندِعيله

واخدِم خِدِر عَمتِي... واحرِس خِيام اختي
وافرش إلك سَجّادِتَك بِرمُوشي وجفونِي

••<><>••<><>••<><>••

شِفنَه يابويه اليِسافِر يِدِز مَكتُوب
حتى لو حَرفين مِنَّه تِهدَى الكلوب
رِحتُو عَنّي وصار حِزنِي شِبِه يَعگوب
لاقميصك لاجَه عَمّي وكلبي مَرعُوب

نار الگلب تِسعَر ... فراكِ الأُبو يِقهَر
عيني اصبَحَت بيضَه بغِيَابَك وانخِطَف لونِي

••<><>••<><>••<><>••

تِدري كُمْت أحسِب ثَواني وأعِد نَجمَات
هَم يرِدلِي حسين ثاني ردُود هيهات
البيت مُوحِش مِن عُكُبكُم زاد حَسرات
كُمِت مِن أندَه يِرِدلِي الصوت آهات

أَبچي وصدى صوتِي .. ماتَو هَلِچ مُوتي
الدنيا اختفى بيها الكُمَر والنجِم شَيعوني

••<><>••<><>••<><>••

شِفِت غُصّة بأثر غُصّه والكلُب ذاب
لَن وِحيدَه وهَم عَلِيله والبدر غاب
والله يِلچمني الهوى لو مـر عَلَه الباب
لني اكومن زَحِف أحسِب جَتني الاحباب

هالحاله يوميه ... أزحَف عله ايديه
كُل ساعه احس بكِل كِتِر أهلي يِنادوني

••<><>••<><>••<><>••

قِصّتِي خِلصَت يبويه بدمعه وونين
اختنكت انفاسي وادير الوجه لاوين
بدنيتي ماظن بعد نتلاكة يحسين
هناك بالجنه أشوفك ياضوه العين

ياگلبي واشواكة ... لخواني مِشتاكة
أهناكَ عند امي الزچيه الكل يلاكوني

••<><>••<><>••<><>••

الخادم احمداللعيبي
ونســـألــكـم الـــدعـــ‏اء
https://t.me/Altef1
٢٤/ ذ- ق/ ١٤٤١ هـ

القصيده على غرار لحن قصيده الملا عمار الكناني ( ياراهب الدمعه)..

عالم ذو بصيره وراي :-

ترسانه وطن عباس
مو دوره النهر والماي
نوره من السما للگاع
چفه لكل خيمنه فياي

••••<><><><>••••

من ياطين من يانور
صاغك ربك المعبود
بتكوينك عطر فواح
ولأم البنين يعود
روح من الوصي الكرار
وفوكاها محمد زود
بلا شك وانت بالاصلاب
مكلف بالخدر والجود

#يا سر الله وانواره
من الذر شاعت اخباره
كافل زينب الحره
مولود بصفة وفاي

••••<><><><>••••

يامسك الجنه والافلاك
يبن الطور والقران
يابوصلة طف حسين
بيك الكرم والاحسان
ياخو زينب لقب معروف
فارس من بني عدنان
انت الماي وانت الروح
ماصدك متت عطشان

#جنت بلسم للمخيم
وكل معلول ومتيم
چفوفك جزء اوصافك
مقبلها علي مولاي

••••<><><><>••••

شكثر اضداد مجموعه
بشخصيتك ياابو النوماس
جهنم بيك من تغتاض
لهلك عاطفه واحساس
يوميه الخلك كلها
تذكرك بالصلاة الناس
من تقره بتشهدها
عبد صالح ترى العباس

#بمصاف الانبياء موجود
وياهم صرت معدود
وهذه منقبه من الله
عالم ذو بصيره وراي

••••<><><><>••••

بفضايل خصك الباري
كمر ربك اخذ رسمك
وحسين الاخو يفداك
لمن ينتخي باسمك
وثالثها الوفه والطيب
من الزاكيه امك
وشجاعه من الوصي الكرار
بعينك زينب تشمك

#ومن حيدر خذت شمره
طايع للاخو بامره
وزينب ربتك لليوم
وتسميك لب حشاي

••••<><><><>••••

ياايه ومصحف منزل
عله صدر الخيمه ياجيدوم
ترتلك زينب وسكنه
ورمله وليلى وام كلثوم
بايات الحرب صمصام
وبايات الصبر معلوم
يبن النبأ والفرقان
بيكم كل امر محسوم

#بيك الزلم ما تنقاس
غيمة ورايه يانبراس
لاچن عله العدو ضاري
بصولاتك شهدلك هاي

••••<><><><>••••

وارث كل صفات حسين
ترفض شمرة اخوالك
شمرة حيدر من يصول
غيرة ومرجله افعالك
كاشف چم الف عالماي
بسيف وبيرق لحالك
بيوم المحشر ينادون
ساقي وهي تحلالك

#وفاطم تنشر الچفين
تطالب بيهن وبحسين
وسبي النسوان عالهزل
وركضهن عالرمل حفاي

••••<><><><>••••

الخادم احمداللعيبي
ونســـألــكـم الـــدعـــ‏اء
https://t.me/Altef1
٢٨/ ذ- ق/ ١٤٤١ هـ

عفت العرس :-

بدمي ارتفع عذر اليجي بعدي
جاهدت وانه وصيتي بزندي
طبقت دين المصطفى جدي

••••••••<><>••••••••

الفروض الخمسه كلهن طبقتهن
وكل حرام الشرع يادنيا عفتهن
حتى مكروهات ربي تجنبتهن
ذني من عمي وابوي اتعلمتهن

مكطوع شسع النعل واصلحته
مكروه هذا الامر وسمعته
ماهبت كل جيوشهم وحدي

••••{}{}{}••••{}{}{}••••

جاهدت والجاهدتهم عن قناعه
ويه ابن المرتضى تكمل الطاعه
لايردك عن نصرته اي اشاعه
وبسفينه حبه تحصلك شفاعه

يارحمة الله حسين ياعمي
موصيني بيك الوالد وامي
كبلك يطيح عله الترب خدي

••••{}{}{}••••{}{}{}••••

مااطاوع روحي لو رادت ترافه
انه منذور لابن راعي الكلافه
هذا طبع اللي ربى بدار الضيافه
يفدي روحه لاجل امامه بلا حسافه

معزب يعمي بروحي كدامك
شديت همتي بهمة حزامك
يحسين لا تمنعني من وعدي

••••{}{}{}••••{}{}{}••••

ما يمنعك عن جهاد الله ونبيه
صغر سن لو زهوة الدنيا الدنيه
اخذ عبرة من شباب الغاضريه
بكبر عمري واصغر نضحي سويه

ست اشهر حسين انذبح ابنه
ونصراني وي تركي دفع عنه
عفت العرس وتطوعت جندي

••••{}{}{}••••{}{}{}••••

يل تحب حسين ابواليمه وجهاده
كون صادق بالتعامل والعباده
لاتدور مركز وقيمه وقياده
تموت في حبه كمن نال الشهاده

خط الشهاده بحبه مختومه
ألتزم شرع حسين وعلومه
بالجنه اكيد تحصل الشهدِ

••••{}{}{}••••{}{}{}••••

الشهاده بحب ابواليمه سعاده
ماينولك غير حب الله اوداده
من تطيح على التراب بلا وساده
يحضرك حسين الابي راعي السياده

لمن حضرني وچتل چتالي
وعله الصدر ناداني ياغالي
عذري لخوي الزكي من عندي

••••{}{}{}••••{}{}{}••••

الخادم احمداللعيبي
ونســـألــكـم الـــدعـــ‏اء
https://t.me/Altef1
الاول من ذي الحجه/ ١٤٤١ هـ

القصيده على غرار لحن قصيده ملا باسم الكربلائي ( اخر رساله)

آ يشهر الموت :-

من اشوف الدنيا امست مظلمه
چن قميص حسين نشرت فاطمه

###{}{}{}###{}{}{}###

تنشر الزهره قميصه وينهمر
دمع كل شيعي لجل هذا الامر
وتشتعل ماتنطفي لوعة جمر
من تشوف الحزن غَيّم بالسمه

••••••<><>••••••

آ يشهر الموت يومك لا گرب
بيك ابن سيد الرسل مات بغرب
طفله بچفوفه يموت وماشرب
عذب ماي وبس لسانه يترجمه

••••••<><>••••••

ما يمر بالناس مثل مصيبتك
يــاذبيح ويــاسليبه چثتك
ما سمعنه ولا قرينه بقصتك
ابن ساجي الكوثر يموت بضمه

••••••<><>••••••

منهو سامع نهر مكسور الظهر
ياهو شاهد طفل مات من القهر
طفل جمره برجله ويدور نهر
ونسوه مصبوغات كلهن بالدمه

••••••<><>••••••

جفني ما يرتاح ينزف چالمطر
لخيمة اختك ياابن فارس مضر
من عكب عينك سبيه بهالسفر
چنها سبي الروم وهي العالمه

••••••<><>••••••

شنسه شذكر ياجرح من كربله
من الحرگ فرت نساكم بالفله
بسوط زجر وشتم تمشي العايله
وراسك يعاين يبن حامي الحمه

••••••<><>••••••

شلون انسى چفوف عباس الكمر
ورايته وراسه التهشم وانطبر
وجاسم العريس حنته من النحر
وطيحه الاكبر بيدين الاثمه

••••••<><>••••••

تبقى نار بكلبي ماتخمد ترى
شما اعاين طفل يمشي بظل مره
ومن اشوفن خيمه نار مسعره
روحي تطلع تبكه بيكم هايمه

••••••<><>•••••

الخادم احمداللعيبي
ونســـألــكـم الـــدعـــ‏اء
https://t.me/Altef1
الاول من ذي الحجه/ ١٤٤١ هـ

لسان حال العليله روحي فداها :-

شال ضعن الاهل وانه بحسرتي
وضوه يرچب ضوه وتهمل دمعتي

<><><>••••••<><><>

كوكب اليامر كمر شيلو الضعن
وستر عرش الله عليه يتقدمن
نجمه تتبع نجمه وياه ركبن
ومحد من اهلي يهدي لوعتي

~~~~••~~~~

ليوث هاشم كلمن بهودج كفل
وطفى نور الدنيا لاجل اهله وحمل
وزينب وي حسين نادته بخجل
منهو حارس خدري ياضي دنيتي

~~~~••~~~~

كلها ياام عون الزلم لاجلج خدم
منهو تردينه تخيري من الشيم
كالت العباس شيال العلم
كافلي العباس هو وصيتي

~~~~••~~~~

شال چفه وغطى كل نور السمه
انا خادم خدر ضنوة فاطمه
حارس المحمل يبت حامي الحمه
ركبي وانتي بشاربي وبعهدتي

~~~~••~~~~

حسرتي تسابك نفس ريتي وترد
وگلبي طك وكل خواتي بس تصد
ليه ساعه ومره لحسين العمد
وانا اقره بعين اهلي غربتي

~~~~••~~~~

روحي من الدمع ثكلت ما تجن
گلبي يعصرني ونفس شفتي يِون
استحي من الوالد اركب للضعن
وما سمعته يكول كومي بهمتي

~~~~••~~~~

سدرو والليل غطاكم ظلام
والمنام بدونهم اصبح حرام
كمت اناجي الباري رجعلي الامام
ارتاح من همي واشوفن اخوتي

~~~~••~~~~

الخادم احمداللعيبي
ونســـألــكـم الـــدعـــ‏اء
https://t.me/Altef1
الثاني من ذي الحجه/ ١٤٤١ هـ

مسلم وكفى به سفيرا :-

حي ابوطاهر اجه وشايل علم
وصل للكوفه سفير اهل الشيم

####••••••####

دخل مسلم والحشود تلكته
بايعته على العهد من كالته
صلى بيهم بيّن الهم خطبته
وكال دين الله عطش رايدله دم

••••##••••##••••

بدر شع بيناتهم چنه الكمر
استانسوا لمن وصل هذا الخبر
حسين دز مرسول ابن سيد البشر
نبايعه لاجل المبادئ والقيم

••••##••••##••••

لچن وسفه صار يومك چالامس
بسرعة البرق اختلف هذا النفس
چنه عمه المرتضى خانوه همس
وكلمن لداره شرد واصبح صنم

••••##••••##••••

ظل ابو طاهر وحيد بمحنته
شابة المجتبى يوم الطعنته
زمرة من الكاتبوه وبيعته
صاح ياهلناس ما عدكم ذمم

••••##••••##••••

انسدت الكوفه عليه من كل كتر
بكه حاير چنه چف ومنبتر
وحيد لاناصر اله وبيه ينتصر
نادى يارب بيك اشدنها الهمم

••••##••••##••••

مسلم من العطش ذابت چبدته
شاف حرمة اباب وهي شافته
طلب منها اميه يروي مهجته
تكله اشرب لكن ابعد هالجدم

••••##••••##••••

نادته عكب الشرب جدمك ثكيل
عيب توكف وانه حرمة بلا چفيل
محلفتك بالوصي حامي الدخيل
روح عني بجاه فاطم والحرم

••••##••••##••••

من سمع بالزاچيه وعمه علي
كلها ياحره غريب ولا الي
ناصر بهالبلد ماهم كل هلي
يحچي وياها اوسط گلبه الم

••••##••••##••••

صاحت اه يافشلتي وياخجلتي
انت مسلم كال حيرة حيرتي
تفضل عله الرحب واقبل خدمتي
واجري يامولاي من رب النعم

••••##••••##••••

ضيفته بيوم عرفته السفير
حضرتله الاكل مدتله السرير
كلها مثل حسين اظل عله الحصير
ومثل دمه يسيل دم كل الزلم

••••##••••##••••

الخادم احمداللعيبي
ونســـألــكـم الـــدعـــ‏اء
https://t.me/Altef1
الثالث من ذي الحجه/ ١٤٤١ هـ

نعي في شجاعة السفير :-
على وزن البحر الطويل .....

مسلم فرع من جده ابوطالب الحامى الدين
ذاك بالشِعِب دافع عن المصطفى بسنين
وهذا الرخص دمومه ويلي ودفع عن حسين
كفو منك يبو طاهر وحيّد ابينهم ترهب

•••~~~•••~~~•••~~~~•••

حارب كل جموع عداه ما رفتله طرفة عين
يحصدهم حصد سيفه چن نيران چن سجين
ذكرهم بصولاته بفارس خبير وصفين
حاطوه بنبل وسيوف وكلبه من العطش يلهب

•••~~~•••~~~•••~~~•••

حاوطهم وچن صياد ذب شبچته عله طيوره
ما ينهزم منهم حِيّد الا ولاحته حروره
من سيفك وطوعه تصيح چنك عمك بصوره
من يطبر تصير اثنين چثه الكابلتها تذب

•••~~~•••~~~•••~~~•••

منو يدنى سفير حسين وماخذ شمرة من عباس
واجتمعت عليه صوبين بحجار وحديد الناس
ما واحد گرب منه يعرفونه شديد الباس
غير بحفره لمن طاح چتفوه ويلي المهيب

•••~~~•••~~~•••~~~•••

من طاح وغدو كثره بصوت يصيح ياطوعه
سلامي للاهل كلها وحميده عكبي بلوعه
لو شفتي سبي نسوان وبيهن بنت مربوعه
كولي مسلمج من طاح كلبه عليج يتلهب

•••~~~•••~~~•••~~~•••


الخادم احمداللعيبي
ونســـألــكـم الـــدعـــ‏اء
https://t.me/Altef1
٥/ ذوالحجه/ ١٤٤١ هـ

بروحنه نفدي العقيده :-

الصداقه ماهي فتره
كون تسال الف مَره
منهو للموقف يحافظ
يقبل بحِلْوَكْ ومُرّه

••••••••

الصحبه مو عشره ياسامع لاهي طول ولا زمن
بيها كثره شروط لازم وافتهمهن تطمئن
هذا امامك هل يوضح جوهر الصحبه الحسن
كون صادق كون مخلص ماكو اوهام وحزن

وأحذر تصاحب جماعه
بلا تجارب لا قناعه
واخذ من الدنيا عِبره

••[][][][][]••[][][][][]••

تمثلت كل الصداقه بكربله وشوف الجرى
واحد ينافس الاخر عله الموت ومعبره
الشيخ والعريس قاتل كالاضاحي مجزره
ومن بعدهم ال هاشم ضربو اعظم مفخره

لجل دين الله ونبيه
سور وكفو للثنيه
وكربله سووها حمره

••[][][][][]••[][][][][]••

ذوله ما يحصل مثلهم بكل زمان وموقعه
الله خالقهم مخصص للحسين ومصرعه
ابواليمه شهد ليهم والاوصال موزعه
صحبتي كالنجم ذوله كتاب ليهم وقعه

وزينب تكله التفت
كلبي كارصني وخفت
وهو جاوبها وجوابه فسره

••[][][][][]••[][][][][]••

الله من طينة موده خالق الصحب الكرام
اوفه زارع بالضماير حتى تنصان الخيام
تعاهدو بالذر عليه حسين قائدنا الامام
ترخص نفوس البرايا ولا يمس خدرك لئام

وريس الانصار نادى
يله حي عله الشهاده
تكطعو ميت الف وذره

••[][][][][]••[][][][][]••

اظن ربك من خلقهم خله بيهم غيمه
تمطر على حسين وابنه وسط ذيج الهيمه
شعارهم يوم الطفوف نموت لاجل الخيمه
ولايصل خدر العقيله بيوم عاشر ضيمه

بروحنه نفدي العقيده
يبن فاطم والتريده
وبالنفس ماتظل حسره

••[][][][][]••[][][][][]••

بلهفه كلهم للمعاره تهافتوا مثل الشمع
ذايبين عله الشهاده الك كل طاعه وسمع
تركو الدنيا وعذرهم لابو اليمه بالدمع
نخجل نخليك وحدك أبين كل هذا الجمع

وما نتركك لا محال
مفرد ابين الرحال
موسد ومكطوع نحره

••[][][][][]••[][][][][]••

لون عدنه ارواح ميه نفدي لجلك كل نفس
ولاتظل عله التراب مترب بحر الشمس
ولا لعين يحز ركبتك فوك صدرك من جلس
ولا تجرت خيل عشره تطحن بجسمك رفس

رد عليهم منحره
نلتقي بالاخره
وتفتخر بيكم الثوره

••[][][][][]••[][][][][]••

الخادم احمداللعيبي
ونســـألــكـم الـــدعـــ‏اء
https://t.me/Altef1
٨/ ذوالحجه/ ١٤٤١ هـ

يرب زنجيلي حاضر :-

يارب ارزقني حافر
يدوس بصدري ويجول
اواسي ام الحسين
بابنها الداسته خيول

••<><><>••<><><>••

اماني عندي هواي عفتهن لجل الحسين
اريدن رزقي دموع لحد ما تنعمي العين
ياربي بحرمة الال وامهم وام البنين
تخلي اللطم سلواي بإدي ذني الاثنين

يرب وفقني بهاي
اموت بحسره الماي
واروي شفتي هناك
بـ معين وابد مايزول

======••======

يرب وفقني للنوح وانوحن طول عمري
وندبتي لابوالسجاد لحد طلعة الفجرِ
جروحي بيهن ايتام وخيم بالنار تسري
ودمعي لمن يطيح مثل نيران جمري

بجاه الوصي الكرار
اريد اخدم الاطهار
واريد دموعي للموت
عليك يصيرن سيول

======••======

وبعد عندي اماني بعد ذيج البدايه
ازورن كربله بيوم ترد بيه السبايه
واشيلن راية حسين واردد هاي الايه
الموده للقرابة واجر ها هالهدايه

وليالِ العشره والطور
واقبل ذيج الگبور
واطوفن بالحضرتين
واحصل اذن الدخول

======••======

ياربي بجاه عباس اريدن فزعته وياي
فلا تحرمني حاضر مجالس هالسنه هاي
اريد العطش يچوي مهجتي ولبة حشاي
واحس شلون الحسين ضامي وما شرب ماي

يرب زنجيلي حاضر
ادك على الخواصر
والبس ثوب حزني
بمأتم ابن الفحول

======••======

يربي وانت مولاي عله كلشي انت قادر
تأجل موتي ساعات لمن يخلص العاشر
وبركضة طويريج اظل احيي الشعاير
واموت وانه اسعى وسط ذيج المناير

يرب حقق مرادي
يظل هايم فؤادي
على حسين وعترته
الكضو شبان وكهول

======••======

الخادم احمداللعيبي
ونســـألــكـم الـــدعـــ‏اء
https://t.me/Altef1
١٣/ ذو الحجه/ ١٤٤١ هـ

أرسم طولك :-

ارسم طولك صوره ابالي واوكف يمك واحچي
وبس ارفع راسي عله عيونك ماتحمل وابچي
چا يمته احجي عن اجروحي
سهم عيونك طلع روحي

<><><><><><><>

كل ماارسم طولك خويه يخجل من طولي ويتعثر
يالون عيوني الما شفته عگب الشاطي وذاك المنحر
ليش محدب طولك يمي واجدامك ماهي وتكصر
ادري بذرعانك مبتوره وعيونك لامسها الاسمر
صديت لطولك حزنانه
ماهي اجدامك كصرانه
انهدمت عكبك كل صروحي
سهم عيونك طلع روحي

<><><><><><><>

ياعباس احتارت روحي من شفت شفافك كدامي
عيني من تصد على عيونك تتراولي ذيج ايامي
بالطيف يمر دوم الغايب والنوم محاربته احلامي
كلت ابالي ارسم طولك واحچيلك قصة الامي
ياروح الوالد وحسيني
يانوري ودلالي وعيني
وكبالك ما بطل نوحي
سهم عيونك طلع روحي

<><><><><><><>

محتاره شلون اشرح حالي وكل ماصد تخنكني العبره
وعيونك مطفيه بنبله والدم يابس فوگ الاخره
تتلجلج روحي وتسبكني بدموعك ياروح الحره
ومن انظر جسمك الموذر كل الدنيا تصبح حمره
ياشوگي لچلمه من لسانك
تصبرني وتلويلني عنانك
ارجع واتذكر مذبوحي
سهم عيونك طلع روحي

<><><><><><><>

أزدحمت بالروح جروحي راح ابدي من حرگ اجدامي
تتحمل تسمع آهاتي وشلون اتسلب احرامي
جرح گليبي ينزف غربة وثكالى ونيران خيامي
اسكت حين تصد عيونك وجمره كلبك تطفح دامي
اشكيلك من هضم العادي
كل ساعه ويضربني الحادي
ششرحلك وتطول شروحي
سهم عيونك طلع روحي

<><><><><><><>

بكل صفنه عيونك كدامي وكل نظره چفوفك تبرالي
تحامي لاختك يابعد اختك من حچي الشامت يالغالي
راسك من ينزل من رمحه يظل گبالي يراعي احوالي
ومن صاحو زينب جبناها مسبيه اتمرد دلالي
شفت الرايه انترست غيره
والراس تغيير تفسيره
وراد الشامت هدم سفوحي
سهم عيونك طلع روحي

<><><><><><><>

نزف عيوني چنه عيونك بس ما بيهن خويه سهام
بيهن سوط ونار خيامي ودخان وصيحات ايتام
نتشابة يالكافل خويه مسبيه وراسك كدام
روحي وروحك وحده وربك خلاهن بثنين اجسام
مهيوبه بظلك تدريني
ماحسبت يزيد ونيني
وسفه لديرة غربة تروحي
سهم عيونك طلع روحي

<><><><><><><>

الخادم احمداللعيبي
ونســـألــكـم الـــدعـــ‏اء
https://t.me/Altef1
٢٤/ ذوالحجه/ ١٤٤١ هـ

#المستهل وصلني من احد خدام الحسين وطلب قصيده على المستهل
فكتبنا ما افاض علينا قلبنا وساعدتنا يراعنا على ذلك ..
اعتقد ان القصيده تتناسب مع قصيدة ملاعمار الكناني (( اول موكب )) ...

لسان حال العاشق للمجالس :-
مجاريد

ادور وين ماكو قرايه موجوعه
واتعنه عله كلمن ينحب بلوعه
عله حسين الذبيح الروح مفجوعه
من اسمعه يكول آه يحسين ومصابه

•••••••<><>•••••••

اظلن من سنه لداير سنه انتظره
هلال الحزن وانه ايامي مختصره
على الونه وعله الاهات والزفره
واتنطر محرم احسب حسابه

•••••••<><>•••••••

حزني بكل دقيقه عليك يتجدد
راح انزع الاسود والبس الاسود
دمعي ما بطل والحسره تتوقد
لو هل المحرم واجه عله عتابة

•••••••<><>•••••••

اريدن كل محرم دهري وسنيني
واريدن للقيامه النوح لحسيني
لجلك ناذر انه الروح وبنيني
يبو السجاد عيني عليك سچابه

••••••<><>•••••••

مو بس عَبره لازم تاخذ الچلمات
ولو بعض الكلام يفزز الخيمات
ومن اسمع بغربة ونار ويتيمات
ومرمي حسين ظل وجمله اصحابه

•••••••<><>•••••••

آه يحسين آه يبن الوصي الكرار
روحي عليك ما تصبر بليل نهار
چن مخنوگ وانت النفس للاحرار
وانت الريه وانت الهوى لاحبابه

••••••<><>••••••

الخادم احمداللعيبي
ونســـألــكـم الـــدعـــ‏اء
https://t.me/Altef1
٢٩/ ذوالحجه/ ١٤٤١ هـ

السيده زينب ( روحي فداها )تندب اباها اميرالمؤمنين ( عليه السلام ) تقول :

ردت ابوي اليوم ينظر حالي
وايده جانت على الشمس تبرالي
يخاف من ظلها يمس خيالي
وصورة خيالي تصير على التراب

••<><><><><><>••

ردت ابوي بيوم حركو خيمتي
واكلت النيران طرف عبايتي
مشيت مذعوره واحشم بأخوتي
ما بكت عندي خيام ولا حجاب

••<><><><><><>••

ردت ابوي بيوم على الناكة صعدت
لا ابن عندي ولا اخوه شفت
بين شبل حسين وبناته حرت
واخوتي ماشفت من عدهم جواب

••<><><><><><>••

ردت ابوي بيوم اظلم كوني
والعدى بسياطهم اذوني
وانا ادفع للسياط متوني
وبيهن احمي عن رقيه وعن رباب

••<><><><><><>••

ردت ابوي بيوم للشام انسبيت
وصاحو عليّ خارجيه انا وبچيت
ولو تعاين ياعلي بيمن مسيت
اوكفونه ياعلي بعتبة الباب

••<><><><><><>••

الخادم احمداللعيبي
ونســـألــكـم الـــدعـــ‏اء
https://t.me/Altef1
٣٠/ ذوالحجه/ ١٤٤١ هـ

شجاعة علي الاكبر :-

نـــزلـــه

نزل زلزال الغضب
بكربله حل الرعب
هذا الاكبر لو محمد لو وصيه
•••••••••••<><>••••••••••••

نزل سجيل الغضب ويريدها
بيده يفني جيوشهم ويبيدها
من برز ليث الصفوف وحيدها
كام يشطرهم شطر ويعيدها
صاح والكل اضطرب
كال حضرولي الركب
وانا ابابيل السما بالغاضريه

•••••••••••

صاح بيهم صوت قارعة الحشر
الا اجيب بچفي لحسين النصر
رجفت الهامات ماظن تستقر
من هجم بالواقعه انطاهم امر
كال ماذون بحرب
اليوم اراويكم عجب
چفوفه تقره الزلزله وتذبح اميه

•••••••••••••

قره عليهم بالطفوف ايه قتال
دخن وضهضب عليهم بالنزال
ماكو مهرب ليكم وهذا محال
بالحرايب ينعرف فعل الرجال
الا اخليكم حطب
من الاول للذنب
وانه ابن قران ناطق للبريه

•••••••••••

كلب كل الجيش يمنه وميسره
وخاض بيهم والوكف ما يعبره
الزلم وكفت حايره چنها صخره
انه ابن ليث الحرايب حيدره
سيفه من دمهم شرب
ياهو يبرز ينشطب
وكلهم انه الموت وبسيفي المنيه

••••••••••••••

منين يندارون يلكونه حضر
يصيح بيدي اليوم اوديكم سقر
اليوم اعلمكم شنو معنى الخطر
وعمي ياهو يفر يذبحه عله النهر
فرو ومامش هرب
يطلعلهم بالدرب
يضرب الهامات ضربه حيدريه

•••••••••••••••••

صال بيهم جال وهو بمفرده
عيونهم تجادح وخوف افئده
ضاكت الدنيا عليهم بالسده
سيفه يبتر والعطش بيه اضهده
جبده محتاج الشرب
رد للحسين الرحب
بويه شربه لچبدي ياراعي الحميه

•••••••••••••

بويه هاك لساني وتحس بالالم
وجفن عيني مفطر لذيچ حرم
بعد ساعه النار تاكل بالخيم
تهيم يابويه الفواطم بالهيم
هذا يابويه صعب
من بناتي تنرعب
واليتامى بلا وعي فوك الوطيه

•••••••••••••

عاد وحسين الابي يدعي الاله
شلون حال اليدعي عطشانه لهاه
يكله ربي هذا للهادي شباه
احفظ الاكبر يارب وامنع اذاه
حفظه من غدر الغرب
جيبه سالم لي يرب
رجعه ياربي الي وللفاطميه

••••••••••

انخطف كلب حسين حين الجاسه
مطبر ويسمع ونين انفاسه
بويه جدي هل سقاني بكاسه
شربة من كوثر عزيزة ناسه
وكلي ياوليدي التعب
زال لاچن انتحب
لعمتي زينب والنسا التمشي سبيه

•••••••••••

✍🏻 الخادم احمداللعيبي
ونســـألــكـم الـــدعــــاء
‏https://t.me/Altef1

آ ياضيمي :-

عطشان يدفن عطشان
بدموع ويلي وحزنان
ويشوف جسمه العريان
آ ياضيمي ... آ ياضيمي

••••••{}{}{}••••••

مصيوب گلبي ومحتام
وشلون عاينت ايتام
چلمات عدواني اسهام ... آ ياضيمي

مكيود يابوية مشيت
مسلوب عفتك ونعيت
رديت ليكم رديت ... آ ياضيمي

موذر وجسمك تمثيل
طشرته يابويه الخيل
بالدفن حاضر جبريل ... آ ضيمي

لملمت جسمك حصران
عطشان يدفن عطشان

<><><><>•••<><><><>

زينب تعاينها الناس
وظلت تنادي العباس
موقف ابد ماينقاس ...آ ياضيمي

شفنه اللي ما مر عالبال
طبينه مجلس انذال
تمنينه بويه الآجال ... آ ياضيمي

بعيوني الدنيا سواد
يحسين عكبك رماد
دم دموعي والاصفاد .. آ ياضيمي

وانعاك كل الازمان
عطشان يدفن عطشان

<><><><>•••<><><><>

جيتك وتفكيري احتار
چم منظر بمنظر صار
جسمك المليان حجار .. آ ياضيمي

وعمي الكافل مطروح
والجربه تنعاه وتنوح
والشاطي عليه مذبوح .. آ ياضيمي

لميت ابنك الاكبر
وانصارك آ يمشكر
وعبدالله ناره التسعر.. آ ياضيمي

ونحرك نبل بيه و زان
عطشان يدفن عطشان

<><><><>•••<><><><>

بضلوعك اهواي احساس
واتنفسك بالانفاس
عطر امك ويانوماس .. آ ياضيمي

وعرش الله ينوح بصوب
وحيدر گبالك منكوب
وجدك ينادي المحجوب .. آ ياضيمي

نورك بلحدك من لاح
ناداني نحرك وصاح
عبدالله آ ياسبّاح .. آ ياضيمي

وبصدرك نامت رضعان
عطشان يدفن عطشان

<><><><>•••<><><><>

واريت كبرك اشلاء
وبصبعي خطيت اسماء
مرضوض وسط الهيجاء .. آ ياضيمي

طولي لفكدك مكسور
شميت تربك منحور
ناحت عليك ارض الطور .. آ ياضيمي

تميت وكليبي الذاب
رديت انحب الاحباب
منك خذت چف تراب .. آ ياضيمي

شمته كل النسوان
عطشان يدفن عطشان

<><><><>•••<><><><>

الخادم احمداللعيبي
ونســـألــكـم الـــدعـــ‏اء
https://t.me/Altef1
١٢ / محرم الحرام/ ١٤٤١ هـ