‏﴿ وَأَلْحِقْنِي بِالصَّالِحِينَ﴾❤️‍🩹

بالمناسبه : أنا كملت تلات سنين وأنا مختمرة 💗.

أسأل الله الثبات والصلاح يا رب 💗.

من فترة شاغله بالي فكرة ان الوقت اللي بتكون علاقتي بربنا كويسة او بحاول اني أصلحها بيكون عندي شوية تبلد في المشاعر ناحية كل البشر، مبكرهش حد، مبحبش حد، مش فارقلي مين قال ايه ومين شايفني ازاي، بيصغر في عيني جدًا الناس ومشاكلهم

ولما استحضرت قول النبي ﷺ: “إن لم يكن بك عليّ غضبٌ فلا أبالي” فهمت ساعتها المعنى الحقيقي… إن طالما ربنا راضي عني، يبقى أنا في أمان، ومش فارق معايا الدنيا ولا الناس ولا أي حاجة فيها

بقيت مقتنعه تمامًا إن دي الفطرة السليمة اللي المفروض يعيش بيها كل مسلم وهي مركزية علاقته بالمولى عز وجل وحده
وقتها هتقل في عينه قيمة صـراعات البشر اليومية ومشاكلهم الكتير.

وعليكم السلام ورحمه الله وبركاته ، الحمدلله كويسه .

بصي حطي اول حاجه رضا ربنا قدامك ، بعد كدا شوفي بس انتي محتاجه ايه واعمليه ، اهتمي ب نفسك اهتمي بالحاجه اللي بتخليكي احسن ، فكك خالص م اللي بيتكلم ، و تتعلمي كل واحد يقف عند حده ، حتى لو هيزعلوا ، أنا بالنسبالي تكوني وحيده بس مرتاحه نفسياً ، احسن من حواليك لمه مؤذية ، الحياة ابسط م العبث اللي ناس بقيت بتقدسه .

ساعة كدا ولا حاجه ، وهاجي أصيح ، لسه مخلصه محاضره للشيخ أمجد سمير ( أني عبدك)
تغير مسار حياتك حرفياً 🤍.

المحاضرة بتحكي عن زوال الهم ، وأنه ازاي تغير طريقة تفكيرك ، وأنا حقيقي بعد ما سمعتها أرتحت جداً ، لأني اديلي فترة بمر بظروف مش كويسه .

قال رسول الله : ما أصاب أحدًا قط هم ولا حزن فقال: اللهم إني عبدك ابن عبدك ابن أمتك ناصيتي بيدك ماض في حكمك، عدل في قضاؤك أسألك بكل اسم هو لك سميت به نفسك، أو علمته أحدًا من خلقك، أو أنزلته في كتابك، أو استأثرت به في علم الغيب عندك أن تجعل القرآن ربيع قلبي ونور صدري وجلاء حزني وذهاب همي؛ إلا أذهب الله همه وحزنه، وأبدله مكانه فرحًا، قال: فقيل: يا رسول الله، ألا

نتعلمها ؟ فقال: بلى، ينبغي لمن سمعها أن يتعلمها.

الحديث و الدعاء دا عظيم جداً.
تعالوا نتكلم فيه بالعاميه كدا ، واللي فهمته .

أنتوا عارفين يعني ايه ناصية ؟

الناصية دي ، وصلوا علماء الطب ، أنه الناصيه دي الجزء الأمامي من المخ اللي هو عند الجبهه ، ف انت لما بتسجد الجبهة كلها بتبقى ع المصليه ، ف انت بتكون قريب من ربنا جداً ف الوضعيه دي ، ف سبحان الله، كثير السجود هتلاقي ربنا مديه فكر كويس وحسن تصرف .

ف انت مثلاً لما متكونش بتصلي وبعيد عن ربنا ، ف انت تكون ناصية كاذبة خاطئة ، مثل ما أتت ف سورة العلق ، هتلاقي بعد الآية دي بأيتين كدا ، ربنا عز وجل بيقول كلا لا تطعه وأسجد وأقترب ، يعني أقترب من الله وصلي وأسجد وادعي عشان تكون ناصيتك صالحه.

ف أحنا كلنا ناصيتنا بيد الله ، وماض ف حكمه ، يعني ايه ؟

يعني نفترض أنه حد ظلمك ، أو قاضي ظالم ، ف حكم عليك بالظلم ، انت مفكر أنه دا حكم القاضي ؟

لأ دا حكم الله الأول والاخير .
طب ازاي ؟
القاضي الحكم اللي حكمه دا ، بالظلم هو كدا كدا هيتحاسب عليه دنيا وآخرة.

بس الحكم اللي حكمه هو الله اللي كاتبه ، عشان مثلاً تكفير ليك وأجر ليك .
فاهميني ؟

معنى كلامي أنه لما ترتب حياتك ، ع قاعدة أنه كل أمورك بيد الله هتستريح .

أنت مش تحت أيد حد ، ولا حد ف الدنيا دي كلها يعرف يأذيك بحاجه إلا وربنا كان كاتبها فعلاً تحصل، ف مينفعش تخاف من مخلوق أبدا ، لأن كل أمورك ف يد الخالق!

جزء من وصية النبي ﷺ لابن عباس: «...وَاعْلَمْ أَنَّ الأُمَّةَ لَوْ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ، وَلَوْ اجْتَمَعُوا عَلَى أَنْ يَضُرُّوكَ بِشَيْءٍ لَمْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ، رُفِعَتْ الأَقْلَامُ وَجَفَّتْ الصُّحُفُ».

أنت لو تدبرت الحديث دا وفهمته كويس جداً ، وطبقته هترتاح جداً.

أنت امورك كلها متعلقه بيد الله ، مهما حاولوا ينفعوك وربنا مش مقدر دا يبقى مش هينفعكوا ، وكذلك مهما يحاولوا يضروك وربنا مش مقدر دا ، مش هيعرفوا أبدا.

ف متقولش أنا ليه مأخدتش دا ، أو أنا ليه حصل كدا ؟
دا الأفضل دا الاعظم ، لو علمت ما ف الغيب لأخترتم الواقع ، انت متعرفش لو أخدت الحاجه دي كان ممكن يحصل ايه ؟
أنت متعرفش أصلا هي خير ليك ولا لأ .

سلم أمورك كلها لله ، بجد هتزعل ليه ف دار فناء ؟
هتزعل ليه وانت ناصيتك بيد الله ، ربنا عز وجل أحن عليك من امك ،ف استحاله تحصلك حاجه تأذيك ، ربنا رحيم ومحب لعباده .

(يعني روق كدا وأشرب كركديه ساقع).

خلاص تركت أموري كلها لله ، هل يعقل أفضل أعيط و أحزن و أنا عندي رب رحيم كريم ؟

هل يعقل أخاف ، وأنا ناصيتي بيده وماض ف حكمه ، وعدل ف قضاءه !