نزله

والنعم ... والنعم ... من ابو فاضل

...1...
أسوايته ما واحد السواهه
جيوش اميه اويه الارض ساواهه

ما واحد الراسه رفع
كدامه خيرهم ركع
ساترهم بزوده هدم
بقبضت يمينه الكل وكع

حاداهم ... مثل الغنم ... حاداهم
بجاهم .. ما جن زلم ... بجاهم

والنعم ... من ابو فاضل


.....2.....
من دخل للحومه ذل ارجالهه
بكيفه يستنكي ابركاب ابطالهه

يم سيفه ما واحد وكف
كاع الحرب بيهم خسف
المنه شرد زلمه انحسب
خطَّاف الارواح انعرف

جن حيدر ... بالمعركه ... جن حيدر
باد الشر ... عالمشرعه ... باد الشر

والنعم من ابو فاضل




....3...

فارس ابطبته الحرب يكضيهه
اتموت كلهه بصولته اليبديهه

عباس ابو الغيره الشهم
تاريخه حافل بالحسم
يا ويله كلمن كابله
من عنده يبقى بس اسم

خزراته ... كبله تهد ... خزراته
صولاته ... عده وعدد ... صولاته

والنعم .... مو ابو فاضل



...4...

صار ملك الموت كافل زينب
منة ما صح لا يصح كل مهرب

موت احمر اتعرفه العده
سبعين فارس وحده
كابلهم ابكل مفخره
والشاهد اعليه ساعده

بركابهم ... سيفه انطبع ... بركابهم
ماهابهم... صيته ارتفع ... ماهابهم


والنعم .... من ابو فاضل


...5...

هيبته هيبة علي وأفعاله
كربله شهدتله والخياله

ما خله روس اعله الركب
امن الدنيه أسماميهم شطب
راوهم انجوم الظهر
لا مو عجب وين العجب

منَّ أسمه ... اتخاف الكفر .. من أسمه
من عزمه ... فنه اليفر ... من عزمه

والنعم ... من ابو فاضل
......

تمت


كلمات
موسى الخادم

نزله


عباس ... عباس

...1...

الف السلام اعليه ... الضحى الاخوه جفيه
محد وصل طاريه ... بدر الهواشم

ما مثله بين الناس ... اجاب الحجر عالماس
واحد فقط عباس ... وجه الله راسم

من دورت اعيونه الكمر غار
من يوسف احله سيد الأقمار

عباس .... عباس



...2...
حامل لواء حسين ... غيرة وشجاعة ودين
عزب لاخيه العين ... وانطاهه فدوه
وكفه اله عالماي ... بينت معاني هواي ...
عن كلمة الوفاي ... الوافه الاخوَّه

شابع عطش والشاطي يمناه
ما شرب كطره ظل على اضماه
عباس ... عباس
...3....
اسمه انكتب صنديد ... عنده الحرب كالعيد
وحده السراية ايبيد ... شاهد فقاره
صولاته كلهه اثكال .... مو كلمة التنكال
منه تفر الابطال .... توجع يساره

تاريخه حافل بالبطولات
قائد فلا خاسر نزلات
عباس ... عباس
.......4......
من معجزات الكون ... ما نلكه بالمي لون
بس غيرهاه شلون ... كافل خواته
بالعاشر احمر صار ... هذا الجره والصار
بي كلشي ضل محتار ... غير صفاته

بالدم صبغ عباس الاجروف
هذا التسولف بيه الاطفوف
عباس ... عباس
...5...
بي كربله للدوم ... تتباهه مو بس يوم ...
ابشباجه كل ملزوم .... تتشافه علته
باب الحوائج غير ... يمه الكصد ميحير
يشهدله حتى الطير ... ما منة بخته

شافي العلل ومهيَّد الاوجاع
بصحنه الحوائج تنقضي ابساع
عباس ... عباس
.......

كلمات
موسى الخادم

شور


ابو فاضل .... ابو فاضل
......1.....
باب الحوائج عدنه عباس
كعبة الناس
راعي الاحساس
كلمن اتعنه الضريحه بحاجه معروف
يجلي كل همه ويرده رافع الراس

عباس ... حلو الرسوم
عباس ... يجلي الهموم
عباس ... كافل الناس
عباس ... باقي للدوم

يشهدله كلشي ابفخر
لحسينه جان الظهر
ما مثله بين البشر
عباس

صار اسمه مضرب مثل
المات بحضرته عدل
يسمع كلامه الاجل
عباس
.......2.......
عباس قبله االكل الاحرار
غيره معروف
ضحه الجفوف
سيفه كطاع الركب كطاع الانفاس
بي يلوذ الخايف الطايح بالاخطار

عباس ... زين الارجال
عباس ... يعرف الحال
عباس ... ناصر حسين
عباس ... كل شرف نال

كبه ومناير ذهب
وبصحنه صار العجب
ذكر اسمه يجلي التعب
عباس

كافل خواته بعزم
ما مثله بين الزلم
لايك عليه هالاسم
عباس
......3.....
فاتح مضيفه المايرد ضيف
سفرته الخير
شبعت الطير
بالكرم مثل الحسن مثل ام الحسين
غيمته ياناس تمطر كل شته وصيف

عباس ... عزَّب الروح
عباس ... شافي الجروح
عباس ... لليجي ضيف
عباس ... بابه مفتوح

تشهد ألة كربله
ميرجع اليسأله
يستقبله بيا هله
عباس

تاريخه حافل وفه
عطره امتزج عاطفه
اسمه العلي امشرفه
عباس
........4......
بشباجه نشتم عطر الحسين
بوم عاشور
حسين اله يزور
بس نحر يكصد عضيده الراس مكطوع
ويمكن بشباجه يكعد يوم يومين

عباس .... عشك الحسين
عباس .... شوفت العين
عباس .... سيد الماي
عباس ... ضحه جفين

اهل السماء حيَّته
واتباهت بصورته
وافه الشهم لخوته
عباس

نجمه ارتفع بالسمه
بي تفتخر فاطمه
قائد رسم ملحمه
عباس
.......
كلمات
موسى الخادم

الليله الثامنه / ليلة القاسم ع

طفو الشمع .... جاسم رحل يزينب
طفو الشمع ... بدم هامته تخضب
حنته صارت من دمه المنحر
ودعته مثل اوداعي للاكبر

......1......
هذا جاسم بين اديه ... جبته الج ياعمته
كوه واكف على حيلي .. ألماني بطيحته
عظم الله اجرج يزينب ... خوية طفو شمعته
حنته اسيوف المنية ... والسهام الزفته

راح وترك .... وسط الكلب حسرتي
راح وترك .... صورة ذبحته يختي
راح وتركني ابحالة المضطر




....2....
خوية يا زينب تعالي ... مسحي عن وجه الدمه
وصيحي رمله خل تشوفه... شوفه اخيره مؤلمه
بالصبر خل ندعي الهه ... أبجاه امنه فاطمه
المثل جاسم ابن عدهه .... بموته تنصاب بعمه

جرح الابن .... ما يشفه للمنيه
جرح الابن .... من ساعه عايش بية
من جبت جاسم  وانه اتعثر
...3...
بخيمته خليني اوسده ... تعب من كثر الزحف
بهيده لنفزز جروحه ... وترجع الاول نزف
شمحله دورت وجه خوية... من محمد بي عرف
وسفه صارلته الترابه ... اوساده ابو خد الترف

وسفه انذبح ... صاحب اعيون الحلوه
وسفه انذبح ....  بعده العمر ما يسوه
من هل الزمان اشانتظر اكثر
.....4.....
مثل الاكبر ودعيته ... بدمعت اعيوني التصب
طولي مديتها اويه طوله...وعفت حيلي اعله الترب
اه يا فكده يخيتي ... مو سهل كلش صعب
بالحسن ذكرني موته .... واشتعل نار الكلب

كلش صعب ... فكده صعب يزينب
كلش صعب ... من هسه خلاني انحب
واكف اكباله مثل المحير
....5....
اشلون طاوع للمنيه  ... السيف يكطعله النحر
ما نظرله ازغير عمره ... طلع لدورب الخطر
توه خطتله الشوارب ... وابتدا يحجي بفخر
باجر اكفل عمتي زينب ... مثل عباس الكمر

باخر نفس .... سامحني ناده  عمي
باخر نفس .... كالالي كرب يمي
ايروح الك فدوه راسي والمنحر
.......
كلمات
موسى الخادم

الليله التاسعه / ليلة الاكبر ع

يبني ياعلي ... يازين الشباب
ترجع للخيم ... انطيني الجواب
بالموت لا تحجيلي ... ادعيلك وتدعيلي

...1...
يالعازم اتريد الحرب ... عينك ييمه اعله الدرب
لاتفجع الروح بخبر ... موتك يالاكبر شي صعب

خوفي عليك امن الاجل... ادعيلك اتردلي بعجل
يالعندي اغله امن النفس ...انطيني كلمه بيها امل

يا حلو الوجه ... يلتشبه حُسين
لطّول البُعد .... بعدك امشي وين
يا نجمه وتضويلي
ادعيلك وتدعيلي

....2....
يالوجهك احله امن الكمر... عاين علي دير النظر
راسك ارفعه يا علي .... خليني اشمك بالنحر

يالشوفتك عندي دوره .. بعدك حياتي ابلا ضوه
بالك ييمه امن الغدر ...اعليك انه اخاف امن هوه

لو تحصل بدَّي ... ماعوفك تروح
جا ويه النفس .. ضميتك يروح
بعدك اساهر ليلي ... ادعيلك وتدعيلي

...3...

اجل وداعك ياعلي ... ساعة زمن ظل يبني الي
وياك اريد اكعد اون .... يا اغله كل ناسي وهلي

راح ادعي لك دعوة نبي ... سالم ترد يبني الابي
اوداعك يعيشني الغرب ... وينقل حياتي للسبي

بوداعك احس ... كلشي البية مات
بعدك ياعلي .... ادموعي جاريات
يمي انت وانهد حيلي ... ادعيلك وتدعيلي

...4...

يالعمرك بعمر الورد ٠٠ كل خوفي تمشي وما ترد
يالتحمل اوصاف النبي...اعليك اشكثر جنت انحسد

لاجمني كلبي امن الصبح ..شو جني اشوفك منذبح
من مصرعك جتني صور.. مو جرح بيك اجم جرح

جاي انظر الك .... مو نفسك هذاك
مهشوم الصدر .... واسهام بكفاك
ياجرح اشد يا ويلي ... ادعيلك وتدعيلي

...5...

يا طلعتك من الخيم ... تترك وراها شكد ألم
كل خطوه تخطيها برمح .. يرميني هجرك مو سهم

اعليك المنية امحزمه ... وامك عليك امعلمه
ما ادري اعوفك مدري اضل .. بيدك ورجلك لازمه

يبني لا تروح ... يمي ابقى ارتجيك
كلشي ابداخلي .... ظل يبجي عليك
بعدك منو ايتجيلي .... ادعيلك وتدعيلي
.........
تمت

كلمات
موسى الخادم

.....

نزله

علي الاكبر علي .... علي الاكبر علي
..1..

شبيه الهادي جده ... برز ما جنه وحده
يلوَّح بيده ما هم بالمنيه
تعجب كلشي شافه ... اسد يمشي بترافه
شجاعه وغيره بن حامي الحمية

رعب خصمه ... نطق اسمه ... انه بن الطالبي
علي الاكبر ... شبل حيدر ... سبي اسبيكم سبي
منو ايلاوي ... كمر ضاوي ... على اجداده ابي

وكف ... وكف .. وكف ... جبل شامخ وكف
رجف ... رجف ... رجف ... كلب خصمه رجف

علي الاكبر علي ... علي الاكبر علي

....2....

نزل شايل فقاره .... شبل ليث المعاره
عبر كل ساتر اكباله وتبسم
عليه محد تكرب .... عددهم بيده شطَّب
مثل موت احمر بزوده تقدم

على العسكر ... علي سيطر ... ولي نعم الولي
اخذ حيفه ... مطر صيفه ... على الكل معتلي
عصف بيهم ... يلاويهم ... علي صاحو علي

رجع ... رجع ... رجع ... علي حيدر رجع
ركع ... ركع ... ركع ... امامه الكل ركع

علي الاكبر علي .... علي الاكبر علي



...3...

مثل بدر الهواشم .... رسم أروع ملاحم
علي الاكبر حصد روس القياده
بطل من عنده فرو ... ركض من سيفه ركضو
عليهم اعلن بزوده جهاده

على الساتر ... ظهر عاشر ... علن يوم الحشر
على الظالم ... صبح راسم ... علامات النصر
امامه الكل ... بقى يختل ... يدورون الستر

نفس ... نفس ... نفس ... فلا جرو نفس
خرس ... خرس ... خرس ... قيادتهم خرس


علي الاكبر علي .... علي الاكبر علي

...4...

رفع بيمينه رايه ... وتقدم عالسرايه
كلبهه الميمنه اعله الميسره أورد
فلا واحد تكلم ...امامه الكل تلعثم
بالف فارس علي الاكبر مينعد

الحرب فنه ... نعم منه ... مثيله ما حصل
يعرفونه ... يهابونه .... مثل يوم الاجل
نزالاته .. بطولاته ... عظيمه ما تمل

هجم .. هجم ...هجم ... عليهم من هجم
هزم ... هزم ....هزم ... شكو ظالم هزم

علي الاكبر علي .... علي الاكبر

...5...

مثل سيل اعتناهم .... لكو كلشي وراهم
جرفهم ما ترك كلشي عليهم
خيمهم ضيعوهه .... اساميهم نسوهه
علي الاكبر زلم ما خله بيهم

علي الاكبر ... صبح مصدر ... رعب جيش العده
أقام الحد ... على المرتد ... شهدله ساعده
تولاهم ... تحداهم .... ولا جن وحده

نزل ... نزل ... نزل ... مثل موت ونزل
قتل ... قتل ... قتل ... رؤس الشر قتل

علي الاكبر علي ... علي الاكبر علي
.......
تمت


كلمات
موسى الخادم

الليلة العاشره / ليلة الوداع

ليلة الوداع .... حسين جمَّع عيلته بخيمة سهر
ليلة الوداع .... وكعَّد اكباله بناته وحسره جر
وزينب اتعاين عليه
كاعد ويفرك بديه
....1....

اول ما بدا يسولف ... شراح ايصير اله باجر
ركضتله رقيه بشوك ... ودمعهه تكسر الخاطر
كالتله يبويه اشلون .... وليش ايدوسك الحافر
ضماهه اعله صدره وصاح .... مكتوبتلي بالعاشر

نشفَّي الدموع ... غاليه ادموعج علية غاليه
نشفًّي الدموع ... يالحبيبه يم سوالف دافية
تبتعد عنه وتجيه
كاعد ويفرك بديه

...2...
كل ساعه ويدير العين ... صوب ام الخدر زينب
مثل الضايعه اسينه ... يدورهه وعليه تنحب
يكلهه اشلونج اختي ام عون ... باجر حالتج اصعب
ضمي حيلج الباجر .. جدمج بالركض تتعب

ابحركة الخيام ...حيلج ايروح ويضل بيج الضمه
ابحركة الخيام ... ايتعبج كثر الركض بت فاطمه
الشوك جدمج تعتنيه
...3...
والصورة الاشد تذبح ... من عبدالله جابوله
شمه بركبته وكلهم ... باجر ما تلولوله
ينصاب ابسهم والدم ... يتناثر على طوله
يرد ليكم بلا روحه ... بقت ساعات احسبوله

بالعطش يموت ... ما يروّنه العذب يروه بسهم
بالعطش يموت ... والكماط يصير كله قطعه دم
وينكطع صوته وبجيه
....4....
والكافل بديه رايه ... ولازم باب المخيم
كلما يحجي كلمه حسين .. صار اشوية يتقدم
ومن كال ابرو ذمتي اهنا... الكفيل ابغيرته اتحزم
وحشم وي دمع عيناه ... اشما عنده عزم حشم

ناده يالكفيل .... انت كبلي اتموت يم المشرعه
ناده يالكفيل.... اوصلك والكه الجفوف مكطعه
سهم عينك ارتجيه
....5....
اوصيكم بعد موتي ... على ايتامي اوصيكم
اني ادريهه يحبابي ... وصيتي الموت تاذيكم
علي انه الذبح مكتوب ... اومكتوب السبي اعليكم
يهل بيتي طريق الشام ... راح اهوايه يسبيكم

عالرمح واشوف ... ياهي بيكم تعطش وياهي اتعثر
عالرمح واشوف ... اسياطهم فوك المتن تترك حفر
والعليل الوجع بيه
........
كلمات
موسى الخادم

عبدالله حيل اذاني .... سهم بركبته اجاني
جلمة دللو يبني .... ماتت وظليت اني

...1...
العطش أذى ابني يا ناس وخذيته
العمته زينب بلكت اتهود بجيته
يابسه اشفافه يويلي ودعيته
كلبي حس ما يرجع ايروح المنيته

فتح اعيونه اكبالي .... ناغالي بس مو عالي
مبحوح صوت اوليدي ... حاله اشد من حالي






.....2.....
بي مشت زينب لخوهه تشتكيله
خوية عطشان الطفل برد دليله
اخذه بلكت ماي يروه ويرد حيله
من العطش عبدالله ساهر كضّه ليله

ذبلان أبنك شوفه ... كوه يحرك اجفوفه
كوه يجر بنفاسه ... يحسين لا تعوفه
....3....
راح فوك اجتاف ابو يطلبله ميه
رجع متروي بغدر سهم المنية
مني راح ابساع ابني شلون بيه
وانه جنت احسب ازفه ابهاي اديه

حسبَته اشوفنه اكبر ...كد قاسم ابكد الاكبر
ماحسبت موته اهنا ... بعمر الاشهور امطبر

...4...
الله لا يحرم كَلب ام من ضناهه
المات ابنهه اتموت من ونهه وبجاهه
وثوب الاحزان ابد ميفارك ضواهه
ليل وانهار وصبح يركض وراهه

ما ينتهي حزنهه ... الدفنت بديهه ابنهه
تكضي العمر مفجوعه ... حد ما تطب جفنهه
...5...
كربله من عندي باكت احله عِشره
طفل مثل الوردة ست أشهور عمره
صابته بسهم المنيه الكطع نحره
ولية عافت مهد خالي البيه عطره

واكماط بالدم غارك ... امفارك حبيبه امفارك
هذا الشفت بعيوني ... غير الحرك والساحك

.......

كلمات
موسى الخادم

يوم العاشر

يا جداه ... حسين فوك الكاع جسمه امطشرينه
يا جداه ... بالرماح وبالسيوف امكطعينه
حيلي راح اوراح حيله
اوياي ما واحد يشيله
......1......
يا جد بحماك ... هالساعه انخاك
تحضر للطف بهمه
حسينك ذبحوه .... حسينك سلبوه
عالتربان ايصب دمه

ياجدي عطشان انذبح والنهر جاري بصفه
بجفه السده اعلية يجد وحسين وحده بجفه
امن الخيمه اعاينله يجر كوه النفس محبوبي
يا ويلي من كثر العطش مابي يحرك جفه

عالتربان .... امدد اعله الكاع ويعاين علينه
عالتربان .... اشما يريد ايكوم حيله ما يعينه
طيحته كلش ثجيله
......2 .....

داسو بالخيل ... وبرمح اطويل
طعنو كلبه وعاينته
لخيامه ايدير ... لرقية ايشير
هذا المنظر شاهدته

ما همه حافرهم كسر ظهره وكسرله اظلوعه
كل همه جان ابنيته ارقيه العلي مفجوعه
حاول يجيهه بس وكف ما بينهه وما بينه
جم ظالم المابي رحم مثل الشمر موضوعه

اه واه ....حاول اشكد يوصل الشبكت رقيه
اه واه .... بس عليه دارت خيول الاعوجيه
والرمح صوب دليله



.....3.....

متعوب اهواي ... الرايح والجاي
صار ايضربه اعله جبينه
لا وين اندار ... يرمونه احجار
حسين الدم صار بعينه

من كثر ما صابو حجر اتغيرت حيل ارسومه
من كثر ما دمه نزف اتروت ابدمه الحومه
ياجدي لو شفت الجره ماتبقى عندك دمعه
حسينك رمية اعله الترب سلبو حتى اهدومه

ريت اتشوف..حسينك بحر الشمس ظل جسمه عاري
ريت اتشوف ... دم نحر محبوبي حد الخيمه جاري
اشما اسولفلك قليله




...4...

ياجد حسين ... طفوله العين
وبدم المنحر سابح
مرمي اعله الكاع ... والخنصر ضاع
بين البايك والذابح

راسه بكتر جسمه بكتر فوك الترب اذاني
من كثر ما بي مثلو حسَّبته واحد ثاني
يا ويلي من كثر الرفس لحمه اختلط وي عظمه
بالحافر ابن امي انسحك والحبل سبي امتاني


ما ينشاف ... من كثر ما سحكت اعليه الحو افر
ما ينشاف ...انطبك صدره اعله ظهره بيوم عاشر
المن امشي واشتكيله


....5....

بخيامي النار ... اركض واندار
كل الخوف اعله ايتامي
خفت الجمرات ... تجوي ابنيات
حسين الذبحو كدامي

خفت العبايه تحترك والغرب تنظر حالي
ماهمني بالنار احترك الستر كلش غالي
راية كفيلي عالنهر ياجدي جيب الراية
خل بيهه اطفي المحترك واجمع بقايه اعيالي

درب الشام ... باجر امشيله وحيده ابلايه اخوتي
درب الشام ... بي شماته هواي فرحانه البلوتي
عندي ما ظلت وسيله
......
تمت
كلمات موسى الخادم

ليلة الحادي عشر

محد فزع زينب الــج ... ليش
فرهد زمانج كل هلج ... ليش
ليلة الحادي مساهره ...
يازينب المظلومه
....1....
يا ذنب بله الجنيتي .... بالحبال اتكيديتي
واخوتج مو يم خيامج
لحضه الي اتيسريتي

ياكبر صبرج يزينب ... شفتي ابو اليمه تسلب
وللخيول الاعوجية .... صار اخيج جسمه ملعب

يمه وصلتي ابيا تعب ... ليل
عالكاع طحتي مو عجب ... ليل
كل هذا شفتي وصابره ...

.....2.....
حرمه بين ازلام كثره ... شابجه العشره اعله عشره
عجب ايدج ما رفعتي ... يالدعائج الله يقره

ركضتج موسهله صعبه ... عثرتج معناهه ضربه
انتي ستر الله يزينب ... وسفه صرتي ابين غربه

ما لايك اعليج الحبل ... دوم
لا لايكه اعليج الهزل .... دوم
خدر الله انتي الطاهره
....3....
يل عليج الخيمه حركو ... ومتنج ابلا رحمه طكو
هذا كله اتحمليتي... الصعبه جانت صدره سحكو

غالي جان اهوايه عندج... ابن امج خال ولدج
حسين ابو سكينه ورقية .... ابطيحته خلاج وحدج

يا حيرتج بعد الذبح ... موت
ما ردتي يطلعلج صبح ... موت
يفجع دليلج منظره
....4....
صعدت التل ماهي هينه .. بس سمعتي حسين ونه
كلشي مامر اعله بالج .. غير كلمة يا اهلنه

من شمر كرب ينحره ... صحت حضريلي يزهره
حسين راح ايروح مني... الشمر جاثي اعله صدره

عالتل وكفتج تنحسب ... عام
كل لحضه بيهه تنكتب ... عام
شيبج كطعت منحره
...5...
من خلص عاشر محرم ... البيه كل امصاب ملتم
المصرعه ابيا حاله رحتي .. شفتي طوله السابح ابدم

رمح البكلبه سحبتي .... يالعقيله لو تركتي
وسهم المثلث يزينب ... جبده طشر ما عرفتي

لملمتي جبده والظلع ... اه
رويتي شفته بالدمع .... اه
ايعينج الباري عالجره

...6...
لوعت الحادي اشكبرهه .. مو سهل يصعب امرهه
جم مصيبه وكسره شفتي.. بيها ما يصعب جبرهه

حالج الله ايعينه حالج ... امجمعه اكبالج اعيالج
وكلهه صوت اتنادي عمه ... انريد ابونه ما اجالج

جان الجواب بصفنتج ... نار
تشبه الحركت خيمتج ... نار
وسط العيون مجمره

.......

تمت

كلمات
موسى الخادم

كاعده واحسب جروحك
روحي طلعت ويه روحك
امن السهام اشلون الوحك
يابن امي ... يابن امي

...1...
من خلص عاشر الدم وجلجل الليل
اطلعت ادور اعليك ما بين المجاتيل
اوصلتك وعاينتك امطشرتك الخيل
ردت الم طولك لكيتك منمرد حيل

يا كتر منك اشيله
يوكع الثاني واجيله
لملمت لحمك بشيله
يابن امي ... يابن امي

....2...

جيت ادور اعليك يبن امي أجيتك
ليك جابتني الحوافر تيهتك
سابح بدم منحرك خوية لكيتك
ابلايه راس ابلا عمامه شاهديتك

عالترب طايح رمية
بعيد عن خيمة رقية
اشد موقف مر عليه
يابن امي ... يابن امي

...3...

جيت الم جسمك يخوية شرد الم بيك
كلشي بيك امكطعينه وحيل ماذيك
تيهت نحرك امنين امنين رجليك
حرت من ياصوب اجيك اشلون الاكيك

وين صدرك وين ظهرك
ماكو راسك ظال نحرك
عندي ما ظل راي اخبرك
يابن امي ... يابن امي

...4...

جروحك هواي وصعب ياخوية عدهه
وموش مالت وصله يبن امي تشدهه
مسلبيك اعداك والمن هذا ادهه
مفتحات اجروح كلبك بيش اسدهه

كاعد الرمح اعله كلبك
خاف اسحبنه ويعذبك
ياكتر ت رتاح اكلبك
يابن امي ... يابن امي

...5...

كلشي منك ما بقى سالم حسافه
شاهدت جسمك على طول المسافه
ساعد الله كلب جدك حين شافه
عالترب نايم ومتغيره اوصافه

حركت الخيمات سهله
الصعبه جسمك بيش اغسله
الماي كلي اشلون احصله
يابن امي ... يابن امي

...6..
يالجنت من الشموس اتفي عليه
وينه طولك ذاك رد اجواب الية
كاصر اهوايه اشوفك يبو ارقية
اشويه منك باقي جا وين البقية

ودعيتك طولك اكثر
هسه اشوفك حيل اكصر
مكطعينك يبو الاكبر
يابن امي ... يابن امي

...7...

خوية شنهو اليوجعك حاجيني فدوه
سهم جبدك لو سهم فكد الاخوه
واكفه اكبالك تراني تشوف كوه
حيلي راح اوياك يا راعي المروه

بس جسد كدامي اشوفك
منسحك والدم يطوفك
الحافر امخلع أجتوفك
يابن امي ... يابن امي
.........
تمت

كلمات
موسى الخادم

يوم دفن الاجساد

الــــف وتسعمية جــرح
فوك السحك فوك الذبح
بحسين ابوي الغالي

...1...
بالحصيره لملمت جسمه واجيتج عمه
امطشر اعله الكاع شفته وحرت بيش انلمه
كل جرح بجروحه شابك جرح ثاني امدمه
اه لو شفتي الجراله موتج ايحل يمه

اعظامه كلها امكسره
التراب دافن منحره
ياعمه شيب حالي

.....2....
حسين اذاني يعمه حسين حيل اذاني
كل جزء من جسمه اشيله ايطيح يم الثاني
حاولت أرفع أضلوعه الرمح ما خلاني
وحافر الخيل اعله صدره من دمه بجاني

من كثر ما جسمه انفرس
ابصدرة انكسر حافر فرس
هذا النظرته اكبالي
.....3.....
عمه كلشي منه ما ظل سالم اتحبينه
بالرماح وبل سيوف الوالد امكطعينه
حتى ثوبه املسلبينه وخنصره البيمنه
دوريت اشكد عليه ابكربله امضيعينه

والمنظر الاكثر صعب
عمامة ابوي اعله الترب
لساهه تتراولي
...4...
احفرت حفره جبيره حتى اوسده ابراحه
لان عبدالله اعله صدره وخفت ازيد اجراحه
منحره لساعه نازف مي عذب ما لاحه
الله لا ينطي ال اميه ولا نطه ذباحه

ذابح نحر شابع عطش
كدامه نهر الله انفرش
وعطشان مات الوالي
......5.....
ما اسولف بعد اكثر خاف ازيد ألامج
كافي الهموم الي بيج ومتنج وايتامج
كلشي بالطف ما تغير فقد نار اخيامج
منهه ظل ارماد عمه وذكريات ايامج

الجربه والجف والعلم
ومهد الرضيع الكله دم
وصيوانج الظل خالي
.......
كلمات
موسى الخادم

 قال تعالى
{إِنَّا نَحْنُ نَزَّلْنَا الذِّكْرَ وَإِنَّا لَهُ لَحافِظُونَ}
.........
نعم نعم للقرآن ...
يجب أن تكون لنا وقفه مشرفه
.........
نزله

(( أكتاب النبي .... الله حافظ هيبته ))
(( صوت الحسين .... رتلاهه ايته ))
.....

القام بفعل .... حركة المصحف نذل
عابد عجل... سامري كول وفعل
مختل عقل .... واليأيده ابلا عقل
يدفع ثمن ... اسوايته ميت عدل

باجر يجي ... وينسئل عن فعلته
صوت الحسين .... رتلاهه ايته
.......

نقسم قسم ... بسم حماي الحمه
انجيب الحرك ... لو يضم روحه بسمه
شيعة علي .... احنه اهل الموزمه
حسبت وقت .... انطينه كلمه الفاطمه

خل يستعد .... كربتله ساعته
صوت الحسين .... رتلاهه ايته
......
نور الشمس ... ما تحجبه شائبه
اشحال الذكر ... والجليل الكاتبه
اسود وجه .... الحاركه والحاربه
اعليه اللعن ... يالروافض واجبه

حرك الخيم ..... اكداهه بحركته
صوت الحسين .... رتلاهه ايته
.......
كلمن سكت .... عن فعلته مو شهم
يعني قبل .... بت محمد تنشتم
والعايله ... تنسبي بيد الزلم
ويوكع كمر .... راسه بالطف منجسم

مثل الشمر ... سودة تصبح صورته
صوت الحسين .... رتلاهه ايته
......
يهل العزه .... يله ارفعوهه الصحف
موقف يضل ... خالد ابكل العرف
ثورة عشك .... للكتاب ابلا وصف
ناطق يضل .... من الياء حد الالف

دستوره حق .... ما نعوف اقرايته
صوت الحسين .... رتلاهه اَيته
........

كلمات
موسى الخادم

يا الله القصيدة الثالثة لنصرة القرآن الكريم
#نصرة_القرآن
#اللهم_لاتحرمنا_من_نصرة_القرآن
أداء الخادم : يوسف الصبيحاوي
كلمات موسى الخادم
إخراج : عبد الله القطراني
مجلس عزاء الاسكندرية : هيئة الصديقة الطاهرة
رابط القصيدة كاملة 👇
https://youtu.be/rdkm-2rWzvo
ونسأل الله القبول ونسألكم الدعاء 🤲
#نعم_نعم_للقرآن
#يوسف_الصبيحاوي