بوكت حرك الباب .. اللهب صار احجاب .. العرش بيها انصاب .. جرح
       . . . . . . . . . . . . . . . . .
الباقيات الصالحات .. من كرب منها الممات
حسن وحسين اجوا ناموا يم رجلها
ابجنة الام داخلين ..( بسلامٍ آمنين )
وزينب ابفتحت جفن امها املها
حلم صار .. عين ام الحسن تفتح
حلم صار .. عكب الام بعد نفرح
حلم صار .. يشفه الكلب المجرّح

جرح كلب ازغار .. وحظن امهم غار .. الجرح جن بي صار .. ملح
      . . . . . . . . . . . . . . . . .
منظر امشيب السماء .. هالجزء من كربلاء
النار نفس النار بالباب وخيمها
والظلع نفسه ابدليل .. هنانه باب اهناكه خيل
ومحسن وعبد الله نفس الجف فطمها
تره السوط .. التف ابمعصم الزهره
تره السوط .. نفسه وما خفه شره
تره السوط .. لوّع زينب الكبرى

زراك وآثار .. واشوف البسمار .. نعم بالطف صار .. رمح
        . . . . . . . . . . . . . . .
كلشي واكف يستمع .. صوت من كسر الظلع
الصوت كسر الظلع مذهوله المجرّه
على امصاب ام الحسن .. وكف ما يمشي الزمن
لو لا امر الله انكلب هالكون باسره
امر جان .. الزهره تكتم الحسره
امر جان .. تحس بالسطره والعصره
امر جان .. علي يتحزم ابصبره

يسولف عبرات .. اويه بير الآهات .. صبح للحسرات .. صرح
      . . . . . . . . . . . . . . . . . . . .
الروح صعدت للسماء .. استقبلتها الأنبياء
والعرش ناداها كربي يالزجيه
مسكنج يا فاطمه .. يفترش كلب السمه
انتي بالفردوس جن نجم الثريه
بالدموع .. غسل فاطمه حيدر
بالدموع .. شيع سورة الكوثر
بالدموع .. لمن عالكبر كبّر

كبرها اخفاه .. بدليله اشجم آه .. محمد وافاه .. شيصح
        . . . . . . . . . . . . . . . .
الها مجروح العرش .. سوه من ساكه نعش
وتحت ظله حافر الليله لحدها
و وسعه لا تنلجم .. من ظلعها المنهشم
ومنفجع من شاهد اللطمه اعله خدها
سماوات .. كلشي بيها يترقب
سماوات .. كلها الفاطمه تنحب
سماوات .. محسن شافته امخضب

بجناحه جبريل .. نوه الطفل ايشيل .. الدمع كام ايسيل .. سفح
       . . . . . . . . . . . . . . . . .
خادم أهل البيت عليهم السلام
عمار العيساوي الكربلائي

#سقوط المحسن ع
لسان حال الحسين ع

يالمحسن بادل روحي بروحك
اني اتحملهن هاي اجروحك
هذا آنه حسين .. يا ماي العين
      . . . . . . . . . . . . . . . . .
جرح بسمار يالمحسن ماريدك تون منه
آنه اتحمله وماريد فاطم تسمع الونه
الونتك خويه اشعر ايذوب الدليل
حسين أنه وردتك ساعة الوكتي يميل
حركت فؤادي نار المصيبه
حيلي المصابك يالمحسن اصبح نحيل

الله يساعد كلب امي الليله
مكسوره اشلون الطفل اتشيله
انكسرت ظلعين .. ياماي العين
     . . . . . . . . . . . . . . . . . .
يتحسن آنه بارض الطف جسمي امجرح ومدمي
شيفرق لو بعد جرحك يخويه يصبح ابجسمي
خويه والبسمار نبله بارض الطف يصير
بعين ابو فاضل ونحر عبد الله الزغير
ومره بكليبي النبله يرموها
هناك يالمحسن منين اطلعها احير

من بين اظلوعي الظهري ادفعها
يالمحسن من كلبي ابمطلعها
تاخذ ثلثين .. ياماي العين
      . . . . . . . . . . . . . .
بأخير انفاسك اعله الكاع اشوفك خويه يالمحسن
واصد مكسورة الاضلاع الك تزحف عليك تحن
من بني الزهره اصبحت اول شهيد
وجنت اتمنه ويايه تكبر يالعضيد
بدمع اعيوني خل يغسلونك
وياك أنه وباجر ابكه بارض الطف وحيد

لا تنسه احضرني بيوم العاشر
ولم جسمي اليتطشر بالحافر
والخنصر وين .. ياماي العين
      . . . . . . . . . . . . . . .
باب الدار حركوها والنيران الك تدني
وجن ابنظرة اعيونك تكلي خويه ابعدي
خويه نفس النار بالخيم تصبح لهيب
وتحرك اطفالي واسمع اصراخ ونحيب
واستمع زينب من يشتموها
انهض واوكع امهشم امكطع تريب

جنت اتمنه بيوم الطف تحضر
اتلم اطفالي التتراكض بالبر
خاف امتيهين .. ياماي العين
      . . . . . . . . . . . . . . .
يخويه اتمنى اموت وياك لو تبقى انته ويايه
لو ما انظر الشاطي لو انته التكض مايه
بطيحة الكافل خويه يم شاطي الفرات
ينكسر ظهري وتظلم بعيني الحياة
جفوفه يالمحسن من يكطعوها
تنفجع زينب وتستعد للنايبات

ياخويه من انظر سيفه وجوده
ماهدهن الا بكطع ازنوده
ضحه الجفين .. ياماي العين
     . . . . . . . . . . . . . .
يالمحسن عليك اتنوح زينب وآنه اسليها
باجر بالطفوف هناك كلي من يواسيها
من يجتفوها وتصعد ابظهر الهزيل
من يباريها ساعة الناكه تميل
عالرمح راسي وينحب اعليها
وراس ابو الغيره ويانه بالدرب الطويل

طير الجنه انته ورف بجناحك
وخليني آنه اتحملها اجراحك
شتفرق جرحين .. ياماي العين
      . . . . . . . . . . . . . . .
خادم أهل البيت عليهم السلام
عمار العيساوي الكربلائي

يا جوهر القدسيه .. نجم الثريه
بجيتج العالم ازهر .. وبغيبتج يتكدر
حوريّه وانسيه .. انتي الزجيه
   . . . . . . . . . . . . . . . .

يا فاطمه من المبتده .. بعالم الذر تعيينج .. نور الجلاله
وبمبعث الهادي ابتده .. ابظل العرش تكوينج .. بقدرة كماله
وانزلتي درّه اموگده .. نور الشمس بجبينج .. شمس الرساله

والكفار معميه .. شمسج زهيه
وجهج شمس وبنوره ..اشرق على المعموره
ضوّه الكون طاريه .. انتي الزجيه
   . . . . . . . . . . . . . . . .

حاقد وحقده ما خِفه .. عالنبي من كال ابتر .. يحجي بغروره
ايدتي طه المصطفى .. سماج ربنا الكوثر .. وخصّتج سوره
مشعل الظلّام انطفه .. مشعلج انتي الازهر .. للساعه نوره

والاصنام تتكسر .. والحقد يكثر
صب الحقد يم بابج .. ويتشفه ظل بمصابج
والدمعات ثوريه .. انتي الزجيه
   . . . . . . . . . . . . . . . .

الدارج يفاطم من هجم .. يدري الشرف يم بابج .. نوّخ رچابه
يا فاطمه ولمن ظرم .. نار الحقد باعتابج .. ويّه الصحابه
بالعصره محسن ما سلم .. البسمار لمن صابج .. للطفل صابه

قنفذ جاچ بالسطره .. والوجنه حمره
وعينج غدة تهمل دم .. ومن ظربته تتألم
اعليج الناس مسبيه .. انتي الزجيه
   . . . . . . . . . . . . . . . .

يافاطمه اظلوعج لمن .. يتكسرن بالعصره .. يبگن علامه
البارينه باجر يشتكن .. كل كسر يشرح كسره .. يبين الظلامه
والشاهد حسين وحسن .. والباري يصدر امره .. وتبدي القيامه

اول نار تتوجر .. للمبتدي الشر
واهل السقيفه البدعه .. لجهنم ابلا رجعه
الكوثر بيج صافيه .. انتي الزجيه
   . . . . . . . . . . . . . . . .

شافوج لكن ما وفوا .. احنه على فطرتنه .. الكم نوالي
عرفوج بس اتخلفوا .. واحنه ابد ما خنّه .. ابسود الليالي
اوصيه انتي لكن حرّفوا .. بس صافيه وصلتنه .. اوصية المعالي

حبيناج عالفطره .. فاطمه الزهره
وبمعتقد فطرتنه .. ال النبي قدوتنه
كلنه وياج عالنيه .. انتي الزجيه
   . . . . . . . . . . . . . . . .

خادم أهل البيت عليهم السلام
عمار العيساوي الكربلائي

بفاطمه الكوثر وضح معناتها
وبتها زينب آية من آياتها
   . . . . . . . . . . . . .
الآيه يم السورة تترتل خشوع
وابتده تأويلها ابجري الدموع
اتفسرت زينب ابتكسير الظلوع
والوحي ايدون شرح عبراتها
     . . . . . . . . . . . . .
فاطمه من آياتها الخد الحَمَر
وعلى السطره تنتحب كل السور
اشحالها السمعت ظلع امها انكسر
طفله وتحس فرفحت دمعاتها
    . . . . . . . . . . . . . .
شاغت اعله امها وخفت صوت النياح
طويره جنها ومنكسر منها الجناح
مستحي منها طلع صوت الصياح
امبركعه ما تنسمع صرخاتها
    . . . . . . . . . . . . . . .
وصة ابنيتها بدموع الحزن
ام اريدج يمه لحسين وحسن
للحسن انتي السند وكت المحن
الفتنه يمج خل يبث حسراتها
. . . . . . . . . . . . . . . .
اتشاركي ويه حسين مكتوب السماء
وجدمي مهر المنيه ابكربلاء
ولليتامه ابليلهم صيري خِباء
اطفال يمج تغمض اعويناتها
    . . . . . . . . . . . . . .
نفذت هاي الوصيه بكل حنين
واصبحت ام للحسن وام للحسين
ايعينها الباري على الكلب الحزين
احزانها ويّه الأم ابداياتها
   . . . . . . . . . . . .
غمضت عين الزجيه فاطمه
تصير رغم اظلوعها المتهشمه
جالمناره ابين ابراج السمه
وبقت ذكرى الزينب احجاياتها
   . . . . . . . . . . . . .
خادم أهل البيت عليهم السلام
عمار العيساوي الكربلائي

#گعدة

الباب الحيدريه .. بثار الخيبريه
كبل جان النبي ايدكها
اليوم الطاغي يحركها .. وهاي اول رزيه
    . . . . . . . . . . . . . . .   
  
باب جان النبي ايدكها رايد ايبين قدرها
باب واتخيل وراها فاطمه اتداري خدرها
ظالم اتكسر عليها ومن حقد ناره شجرها
لاذت وراها ام الحسن
كالوله كال الهم ( وإن )
اشر القنفذ عالوجن ...والعبد جفه سطرها

ايعرفوها ام ابوها .. بالباب اعصروها
بيد اترجع الدفعه
وايد اتغطي عالصفعه
ومحتاره الزجيه .. وهاي اول رزيه
    . . . . . . . . . . . . . . .     

باب ابو الحملات حيدر رحمه للأيتام كلها
ومن وراها شكم اسيراً فاطمه توزع اكلها
اليوم خلف الباب فاطم يا وسف يسكط حملها
ابّسمار محسنها انظرب
والباب مستعره بحطب
تبت يد الظالم وتب ...فعلته محد فعلها

كل فعله ابضغينه .. لوصية نبينه
شلون ابحيدره وصه
عدهم بالكلب غصه
من حامي الحميه .. وهاي اول رزيه
    . . . . . . . . . . . . . . .     

أسلموا مو عن درايه بخوف من سيف ابو الحمله
الخندق وخيبر دلاله عد علي الصعبات سهله
افتهموا بحيدر اموصه والعهد لا ما يخذله
ما وصل حيدر عسكري
عالزهره غار السامري
الطالب ابثاره الخيبري ... ابلا شرف معروف اصله

بالباب الدفعها .. يتكسر ظلعها
تأذت فاطمه منها
ولبست بالدمع ونها
وتحملت اذيه .. وهاي اول رزيه
    . . . . . . . . . . . . . . .     

فاطمه بكل يوم دمعه بكل وكت جرح واذيه
عكب طه فتره عاشت وكربت منها المنيه
ظلت الوصي ابو الحمله وبالدمع اخر وصيه
زينب ابعينك ياعلي
شتريد كلها اتدللي
من تنهظم وتحن الي ...للكبر وصلها اليه

يم كبري العقيله .. والمدمع تسيله
امد ايدي ابردها
وعن مدمعها اهودها
وهاي اخر وصيه .. وهاي اول رزيه
    . . . . . . . . . . . . . . .     

غمضت عين الزجيه وللسمه صعدت بالمها
ودخلت الجنه بهظمها والحسن وحسين همها
اسيا ومريم اجنها واجت كل الحور يمها
وامها خديجه هم اجت
شبكتها والونها بجت
و وي فاطمه هم اشتكت ... لله عالباغي الظلمها

ظوع الكسّروها .. الباب الوجروها
ومنها الفدك سلبوها
وثارات العده اخذوها
اصحاب الرديه .. وهاي اول رزيه
    . . . . . . . . . . . . . . .     

خادم أهل البيت عليهم السلام
عمار العيساوي الكربلائي

بدفعة الباب .. دمعي سجاب
وزينب وتعاين عليه .. حاولت كتم الاذيه
دمعي سجاب .. بدفعة الباب
     . . . . . . . . . . . . . . . . . . .

هجم عالدار وسمعني لذت بالباب ودفعني
ادفع الباب ويردها وانكسر ظلعين مني
كبالي شفت ابنيتي زينب وانفجر بركان حزني
كابرت عالالم لكن ما احس لن سال جفني

والدمع ساح .. والكلب صاح
وصرختي صارت خفيه .. حاولت كتم الاذيه
دمعي سجاب .. بدفعة الباب
     . . . . . . . . . . . . . . . . . . .

من شفتها.. ارتخت ايدي خفت لا تنفجع بنتي
بهالاثناء ابكل شراسه اتعمد ايزيّد محنتي
حيل عالحايط عصرني والعبد يصفع وجنتي
صارت امن الالم بين الباب والحايط وكعتي

نايبه وخوف .. وزينب اتشوف
وابتدت تركض عليه .. حاولت كتم الاذيه
دمعي سجاب .. بدفعة الباب
     . . . . . . . . . . . . . . . . . . .

ركضت و وصلتني زينب وشافت الدم اللي سايح
وشافت المحسن اخوها امن الحشه اعله الكاع طايح
وصاحت وبالعفّه يطلع صايح ايغطيه صايح
وارفعَت راسي ابحجرها والحجي اتسبكه النوايح

تشوف الصواب .. بغدر الاصحاب
عرفت اصحاب الرديه .. حاولت كتم الاذيه
دمعي سجاب .. بدفعة الباب
     . . . . . . . . . . . . . . . . . . .

وكابُرت عالالم روحي وانهضت رغم الاذيه
واحظنتها بذاك حالي اذكرت حال الغاضريه
تبجي لمصابي وانه ابجي اليوم طلعتها سبيه
السبي من ديره اعله ديره يلقّبوها الخارجيه

يوم الاحزان .. بذبح الاخوان
وماكو مثل الطف رزيه .. حاولت كتم الاذيه
دمعي سجاب .. بدفعة الباب
     . . . . . . . . . . . . . . . . . . .

البيت الاحزان امشي وحدي باقي ايامي العشتها
وزينب اوصيتي الاخيره لعد حيدر ودعتها
يادهر شلّك علينه من الزغر مني احرمتها
وبين صفحات النوايب والمصايب ضيعتها

كلبي مجروح .. حسره بالروح
ابينّه حالت منيه .. حاولت كتم الاذيه
دمعي سجاب .. بدفعة الباب
     . . . . . . . . . . . . . . . . . . .

خادم أهل البيت عليهم السلام
عمار العيساوي الكربلائي

ظلموني ظلموني .. عن اهلي بعدوني .. وعن ديرتي ابعيد
آنه الغريب الهادي .. حالي مثل اجدادي .. عن ديرتي ابعيد
      . . . . . . . . . . . . . . . . . . . . .
بكل ديره كل واحد صفه . عكب النبي عادونه .. ويحاربونه
من هجمت الدار ابتدوا . سم الحقد يسكونه .. ويلوعونه
من السقيفه اتأسست . وتقرر ايظلمونه .. ويهجرونه
احنه الفرع لاشرف اصل . نور الله ما يطفونه .. شماعاندونه
نور الله بالزهره .. وانتقل بالعتره .. نور ابظهر نور
وانه اكتمل مشواري .. سر امن اصل أسراري .. عن ديرتي ابعيد
      . . . . . . . . . . . . . . . . . . . .
بسامره اصبح مدفني . وآنه الحزن جلبابي .. من سر مصابي
ماهمني غدروني العده  . همي ولهيب اصوابي .. وكل انتحابي
ابديها من كسر الظلع . باب الزجيه البابي .. يبدأ عتابي
واتخيل ابابي اللهب . والمحسن اعله اعتابي .. بفعل الصحابي
صفعوها صفعوها .. بالدفعه عصروها .. وبدفعته ايزيد
فت الحزن دلّالي .. وحال الزجيه وحالي .. عن ديرتي ابعيد
      . . . . . . . . . . . . . . . . . . . .
بذيج المصيبه الراتبه . الطبرة علي ابمحرابه .. والدم خضابه
تلوّع دليلي ونطبر . سيف المرادي الصابه .. سبّب اصوابه
وتكرروا ويه الحسن . نفس الحزب واصحابه .. نفس العصابه
من سم دليلي استشعرت . جبد الحسن سم ذابه .. وكليبي ذابه
ذوبوها ذوبوها .. جبدتنه ذوبوها .. بغدر السقيفه
وشما علت آهاتي .. يكتب اثر دمعاتي .. عن ديرتي ابعيد
      . . . . . . . . . . . . . . . . . . . .
كل ما يمر بيه الضمه . مو من عطش اتلوع .. بحسيني حاير
من ناده ( هل من شربةٍ) . ولاجن بشرهم تسمع .. ميته الضماير
الف وتسع مية جرح . غير الجبد المكطّع .. بالنبله صاير
غير الحر وغير والعطش . مسلوب ظل بالمصرع .. بين البواتر
والعيله روعوها .. وخيامه حركوها .. وصار الحقد نار
ومهشمات اظلوعه .. وكل يوم اعيش اللوعه .. عن ديرتي ابعيد
      . . . . . . . . . . . . . . . . . . . .
بالغربه عايش لوعتي . لاجن الأثر بيه .. حال السبيه
وياها يسرح خاطري . وانظر جثث مدميه .. بالغاضريه
دورنا خنصر منقطع.  والكينه جف مرميه.. وخنصر سويه
بطبع الحوافر شفت اثر . دم جثته القدسيه .. شبل الزجيه
وشفت الصدر متناثر .. كد ما سحك بي حافر .. يالمني حاله
ريت التهشم صدري .. وبالطف تكطّع نحري .. .. عن ديرتي ابعيد
      . . . . . . . . . . . . . . . . . . . .
اصل الشجاعه ابمنبعي . لكن ورثت الحكمه .. بكل فعل حكمه
و ورثت من اهلي الكرم . احنه العدونه انكرمه ..منبعنه عصمه
من اشربت سم الغدر . والسم الدليلي ايألمه .. وشفافي تضمه
سلمت أمري وحالتي . للمتصف بالرحمه .. ما مثله رحمه
وبآخر انفاسي .. كل كلبي واحساسي .. بارض المدينه
ولساعة الدفنوني .. ظل الدمع بعيوني .. عن ديرتي ابعيد
      . . . . . . . . . . . . . . . . . . . .
خادم أهل البيت عليهم السلام
عمار العيساوي الكربلائي

هالرساله السابع أولادي .. منّ الحسين العلي الهادي
بعيد .. عن اديارك عن ناسك
بعيد .. لكن اشعر باحساسك
    . . . . . . . . . . . . . . . . . . .
اما بعد . رساله ابديت اخط بيها
من طف كربله السامره اوديها
عرفت ابجبدتك شلّي سده اعليها
ونويت ابجبدتي يوليدي اواسيها
حالك مو مثل حالي .. ولدي امذبحه اكبالي
اذكر جبديّ الضامي .. لمن تقره مرسالي
يبني ابعثلك مواساتي .. من ونيني ومن جراحاتي
بعيد .. واسمع شهكة انفاسك
بعيد .. لكن اشعر باحساسك
    . . . . . . . . . . . . . . . . . . .
انته بغربتك بس اسمع اونيني
واسولف عالحجر من صوب اجبيني
بيمن امسح الدم الترس عيني
وآنه اعله النهر مكطوعه جفيني
آنه المنكسر ظهري .. ودمي اعله الترب يجري
انته بغربتك وحدك .. احس ابحالك وادري
بغربه يبني وسمموا جبدك .. كله بغضا من علي جدك
بعيد .. والحقد ابجبدك جاسك
بعيد .. لكن اشعر باحساسك
    . . . . . . . . . . . . . . . . . . .
ادري الديرتك كل ساعه يبني اتحن
ولاحبابك مثل طير الحمام اتون
وأنه كلما يحن كلبي احسّن چن
خيل وبالحوافر عالصدر تطحن
يبني اظلوع البصدري .. احس طبكن على ظهري
وكلبي من الضمه امفطر .. ضامي ومنكطع نحري
ادري تذكرني بلذيذ الماي .. من ضماي امفطرات اشفاي
بعيد .. والعطش ابكلبك باسك
بعيد .. لكن اشعر باحساسك
    . . . . . . . . . . . . . . . . . . .
انشدك يولدي من تغمض اعيونك
وأصحابك واهل بيتك يحيطونك
وصي للحسن للطف يحملونك
يمروك ابضريحي وبي يزورونك
مر وانته بكلب ضامي .. وشاهد حركة اخيامي
آنه الظربوا اعيالي .. وراحت للسبي ايتامي
آنه ظل جسمي بهجير الحر .. امسلبيني ومنكطع منحر
بعيد .. ماصار الرمح ابراسك
بعيد .. لكن اشعر باحساسك
    . . . . . . . . . . . . . . . . . . .
أنه الكلشي شفت كلشي سده اعليه
أنه الجثته ثلثتيام مرميه
خذوا كل عيلتي للشام مسبيه
آنه الفوك راسي ماتت ارقيه
آنه الخصمي متشافي .. ابجتلي ونوري ماطافي
حطوا بالطشت راسي .. وضربوا بالعصه اشفافي
منفجع كلبي على امصابك .. بيه جن سم العده الصابك
بعيد .. وظنهم يخفت نبراسك
بعيد .. لكن اشعر باحساسك
    . . . . . . . . . . . . . . . . . . .
نسيت الآمي كلها ابساعة اصوابك
وكعدت اكتب مصابي مواسي لمصابك
اليوم آخر مسيه اتودع احبابك
باجر نلتقي من تنزل اترابك
لمن تنزل ابكبرك .. وروحي يولدي اتحضرك
راسي منكطع يبني .. احط نحري على نحرك
هذا واختم بالسلام اعليك .. راح اظل يم كبرك امتانيك
بعيد .. ونوماسي بعز نوماسك
بعيد .. لكن اشعر باحساسك
    . . . . . . . . . . . . . . . . . . .
خادم اهل البيت عليهم السلام
عمار العيساوي الكربلائي

منّ السماوات  كلهم تعنوها
مسبية الشام  حضروا يشيعوها
آل النبي كلهم .. طه ايتقدمهم
حضروا يشيعوها
     . . . . . . . . . . . . . .

امن الجنه حضر طه الزينب وهوه يتألم
وحيدر تچّه للزهره وطبرة راسه تنزف دم
واخوها الحسن متعني رغم جبده اللي فته السم
وابو الاكبر تعناها بدم نحره اجه امخذم

كل واحد ابنار من تنزل ادموعه
وكلهم بالاهات والحسره واللوعه
حضروا الزينبهم .. طه ايتقدمهم
حضروا يشيعوها
     . . . . . . . . . . . . . .

الزهره اتدنت الزينب تغسلها بدموع العين
تعالت عبرة الزهره وكامت تلطم الظلعين
تصيح بصوت يبنيتي اويلي اعليج شتحملين
وتنادي يا علي حيدر تعال وعاين المتنين

حيدر عله الصوت عاينها باحساسه
والزينب اليوم ينزف جرح راسه
موقف يألمهم .. طه ايتقدمهم
حضروا يشيعوها
     . . . . . . . . . . . . . .

الحسن جهز كفن زينب ومن همه نزف جبده
مثل ما بالطشت ينزف يوم السمته جعده
و وكف يمها اخوها حسين ابلا راس الاخو بعده
راسه اعله الرمح ينحب دمعته تحرك ابخده

ويه اليحملون نعش الأخت يحضر
ما يحضر شلون بيا عذر يتعذر
وبهذي جيتهم .. طه ايتقدمهم
حضروا يشيعوها
     . . . . . . . . . . . . . .

النعش انووا يشيلونه وحاضر كافل العيله
بلايه اجفوف ابو الغيره النعش جا بيمن ايشيله
سمع من المتن ونّه بهاي الونّه تشكيله
عن السبي وعن الشام وعن السوط تحجيله

من يبجي بس عين تجري عله اخدوده
والأخرى للحين نبلتها موجوده
حاضر ابجمعتهم .. طه ايتقدمهم
حضروا يشيعوها
     . . . . . . . . . . . . . .

وصوت امن البقيع يصيح يا زينب الج روحي
ظلي وياي يازينب شريكه الحزني وجروحي
اذا مامش امل اخذي عمري ومن بعد روحي
آنه ام البنين الما عله حسين انكطع نوحي

اتفجعيني هاليوم وحدي تخليني
وآنه اللي للحين انحب عله حسيني
هي بمكان امهم .. طه ايتقدمهم
حضروا يشيعوها
     . . . . . . . . . . . . . .

نزلت باللحد هاليوم وغضت عين عبرتها
وصعدت للاله اتريد تشكيله مصيبتها
تريد ايجبّر المكسور يبرد نار حركتها
حتّى تلتقي ابلا آه زينب ويه اخوتها

للزهره تشتاك والجدها والوالد
تشبكهم تريد واحد باثر واحد
محتاجه شوفتهم .. طه ايتقدمهم
حضروا يشيعوها
     . . . . . . . . . . . . . .


خادم أهل البيت عليهم السلام
عمار العيساوي الكربلائي

استشهاد الإمام الكاظم ع
لا يوم كيومك يا ابا عبدالله




بهذا اليوم .. بروحي اسافر عن عالم دنيا الأجساد
بهذا اليوم .. للطف اتعنّه بأحزاني من بغداد
كبل الموت استأذن ساعه
كبر حسين اوصل لوداعه ... بهذا اليوم
. . . . . . . . . . . . . . . . . . . .

مگيديني وسم سگوني وبالسجن مطروح
سافِرت روحي بخيالي وكصدت المذبوح
مشاية روحي تعتني
لحسين وهوّ موطني
ياريت ابصحنه مدفني ... وبلحده انام
روحي المتعلعله ابسجن
لمصاب حسيني بس تون
لزيارة مرقده تحن ... وتبعثله سلام

آه وآه .. بين جروح البيه اللي سببها الكيد
آه وآه .. وبين السم المارد جبدي ودربي بعيد
وكلبي وياي اجروحه امتاعه
كبر حسين اوصل لوداعه ... بهذا اليوم
. . . . . . . . . . . . . . . . . . . .

لمن اوصل يم ابو اليمه ابدمع سجاب
صحنه جنة روحي .. كبره للكلب محراب
من تشتم عطره ريّتي
انسه السم وانسه جبدتي
على تربة كبره سجدتي ... يا ازكى سجود
من موقع مصرع الجسد
للمذبح ازحف وبعد
ابحث عن خنصر انفكد ... وللمذبح أعود

ابجي هناك .. وتزحف روحي ابهمها ابين اجروح حسين
ابجي هناك .. واتمنى بهالموقع لو يلفيني البين
وتأمن روحي المرتاعه
كبر حسين اوصل لوداعه ... بهذا اليوم
. . . . . . . . . . . . . . . . . . . .

آنه من سجن السجن ظليت اعاني سنين
انسه كلشي امن اذكر الطف والجره اعلى حسين
منو مثله اتحمل الالم
وبكلبه النبله بيها سم
عطشان ويشعر انجسم ... جبده النصين
أولاده اكباله تنذبح
عالشاطي عضيده منطرح
شيتحمل كلي يا جرح .. دلّال حسين

والأطفال .. بين النار ايصد اعليهم محتارين
والأطفال .. ابنار اخيمهم كلهم فروا مجويين
من نار الخيمه اللذاعه
كبر حسين اوصل لوداعه ... بهذا اليوم
. . . . . . . . . . . . . . . . . . . .

ابظلمة الزنزانة ذاب انهاري وي ليلي
نحّل اعظامي واحس هدّم ركن حيلي
محروم وما شفت شمس
بس رغم امصيبتي احس
بالحافر تطلع النفس ... من المظلوم
كبالي من اتخيل الجسم
اموذر وظلوعه تنهشم
بعيوني ما شفت زلم ... من ذيج الكوم

موش ازلام .. عدوانه ولا بيهم نخوه تهز وجدان
موش ازلام .. اتولوه ومن بعده افترّوا عالنسوان
ولا جن مفروضين الطاعه
كبر حسين اوصل لوداعه ... بهذا اليوم
. . . . . . . . . . . . . . . . . . . .

اهلي لمصابي انصبوا مأتم على امصابي
ومأتم حسين انصبت عمتي ابدمع جاري
مأتم عالناكه بالسبي
اسود متوشحه العبي
لو صاحت يركض اجنبي ... يظربها ابسوط
زينب دمعتها ساكبه
لكن عن خدها تحجبه
راحت بالعزّه والابه ... تلبس جم نوط

بالديوان .. دِخلت زينب دَخلت حيدر بالميدان
بالديوان .. جان السجاد ايظللها بكل امجان
والسجاد الدين اشراعه
كبر حسين اوصل لوداعه ... بهذا اليوم
. . . . . . . . . . . . . . . . . . . .

سلمت روحي المنيتي وحان اليه الدور
وأربعة حراس شالوا نعشي بيه اتدور
والجمعه بموعد العصر
جسمي ايظل مرمي عالجسر
بهارون اتكرر الشمر ... نفس الظلّام
من سمهم كلبي انمرد
ميت ومسلسَل الجسد
الباطل للحك اذا حقد ... تجور الايام

اهل البيت .. ابمشكاة الزهره اتفرعنه شكم مصباح
اهل البيت  .. نبقى النور اليهدي العالم للاصلاح
ومذهبنه اليشفع لاتباعه
كبر حسين اوصل لوداعه ... بهذا اليوم
. . . . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

#استشهاد_الإمام_علي ع
لسان حال السيدة زينب ع



انتظر عالباب وانظر اظلم المحراب
شاغت الروح وطحت يا بويه خلف الباب
والوحي صاح ... حيدرة راح .. ودعوا داحي الباب
      . . . . . . . . . . . . . . . . .

روحي
الك متصوبه روحي
يبويه وتنزف اجروحي ... على اللي صار
نفسه
جرح كسر الظلع نفسه
نزف لك يا علي هسه ... نزيفه شرار
جرحي الما مثله اي جرح
يشفه ويتواكد ابملح
يداويّ بس وجهك السمح .. واليوم تغيب
وجهك نور الله عالارض
يالحبك واجب و فرض
اسمك لجروحي ينعرض .. وبساع تطيب

لو غبت منهو اليطيّب جرحي بغيابك
من احن ما يمي بس عطرك على اثيابك
اليشفي الجراح ... حيدرة راح .. ودعوا داحي الباب
      . . . . . . . . . . . . . . . . .

انطر
على الباب اوكفت انطر
شفت دم راسك اليگطر ... واجيت اشيول
وحدك
متكدر تمشي من وحدك
يشيلونك شفت ولدك ...ونزلوني تكول
خايف لا زينبك تصد
تشوفك ما تمشي من ترد
شينفع وأنه كلبي منمرد .. امن اول تكبير
كبّر وحي الله بالسمه
وصاحت بالجنه فاطمه
يا شيبه اتخضبت دمه .. شنهو اللي يصير

فاطمه بكسرة ظلعها اسمعها كام تصيح
دمك اليگطر يحيدر عالارض تسبيح
بصوت الصياح ... حيدرة راح .. ودعوا داحي الباب
      . . . . . . . . . . . . . . . . .

راسك
يبويه منطبر راسك
وأنه ادري بخاطر احساسك ... عليه اتخاف
تدري
حساسة كلب تدري
ولكن اختبر صبري ... يويلي اشّاف
بمصابك استعر جمر
بغيابك يرخص العمر
وتكلي اتحلي بالصبر .. والأصعب جاي
ترويلي امصيبة الحسن
وشيحمل عصره من فتن
يابويه اتحمل المحن .. لو انته وياي

هذا وتكلي الاشد من الحسن بعده
من يظل حسين اخوج بكربله وحده
بين الرماح ... حيدرة راح .. ودعوا داحي الباب
      . . . . . . . . . . . . . . . . .

لونك
تغير ليش احس لونك
يبويه وغارت اعيونك ... طبيبك اجاك
شافك
و احسه انهار من شافك
يبويه مغيره اوصافك ... لاخوتي نِعاك
دكتورك شخّص الأمر
لاخواني قدم العذر
سم طبرة راسه ينتشر .. وي كل ادماه
بالأب يتمثل الوطن
لأولاده شما قسه الزمن
اتحضروا التوديع ابا الحسن .. انا لله

يا علي يمك اجيت ودمعتك بالعين
بهذا حالك يا علي وتنعه المصاب حسين
والحزن لاح ... حيدرة راح .. ودعوا داحي الباب
      . . . . . . . . . . . . . . . . .

تروي
الي عن كربلا تروي
وتكلي حسين ما يروي ... دليله الماي
ضامي
اخيّج ينذبح ضامي
وأنه تخيلته كدامي ... بلهيب اضماي
تخيلته اكبالي منذبح
وبالحومه جسمه منطرح
والحافر يرفس الجرح .. ويكسر اظلوع
ارجع انظرلك وشفت
امرك للباري سلمت
مأتم لحسينك انصبت .. اسسته دموع

عميه عين الما بجت لمصاب ابو الاكبر
الدمعه ميزان النجاة ابساحة المحشر
والدمع ساح ... حيدرة راح .. ودعوا داحي الباب
      . . . . . . . . . . . . . . . . .

عينك
اشو ما تنفتح عينك
يبويه وسكّن اونينك ... ولاكو جواب
صوتك
بعد ما ينسمع صوتك
يبويه وصار تابوتك ... كلب الاحباب
بمحرابك صايم اسجدت
وبشهر المغفره انصبت
للزهره بويه لو رحت .. وصل الها سلام
بالجنه وياها تنجمع
راويها الطبرة واستمع
تشرحلك حالة الظلع .. وسوط الظلّام

بينك وبين الزجيه يا علي وكلها
زينب تروح ابسبي وبلايه كافلها
عالنهر طاح ... حيدرة راح .. ودعوا داحي الباب
      . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

#استشهاد_الإمام_علي ع
لسان حال الامام الحسن ع



ليلة وداعك يا علي ودلالي ذايب
بلحظة رحيلك تبتدي حرب المصايب
يا والدي آنه الحسن .. بين المصايب والفتن
                    دلالي ذايب
        . . . . . . . . . . . . . . . . . . .

لحظة رحيلك يا علي غصه اعله غصه
واهل الفتن يا والدي شافوها فرصه
شرّعوا قانون الحقد وابتده نصه
سيرة علي ما تنذكر للناس قصه

بين حقدهم والغدر واضح طريقه
طاحت مقانع وانكشف وجه الحقيقه
وجوه الحقيقه اتكشفن .. بين المصايب والفتن
                    دلالي ذايب
        . . . . . . . . . . . . . . . . . . .

باجر يذبحون الفجر بي راسك انصاب
وقصة سجودك تنحضر يا داحي الباب
تصدر فتاوى الزيف ويدونولها كتاب
وناس التحبك يا علي ايسمونها ارهاب

حبك فريضه يا علي ويدرون بيها
لكن ضمايرهم حقد صار ايعميها
تدري ضمايرهم عمن .. بين المصايب والفتن
                    دلالي ذايب
        . . . . . . . . . . . . . . . . . . .

سيف الغدر يا ابا الحسن قاطَع صلاتك
بس يبقى صوتك يعتلي من بسملاتك
يترس نواعير العدل مجرى صفاتك
اعدل عداله اعله الارض فترة حياتك

اصحاب الأقلام الاجيره يفرهدونك
حرفوها الالقاب اللي بيها ايلقبونك
القابك امن اتزورن .. بين المصايب والفتن
                    دلالي ذايب
        . . . . . . . . . . . . . . . . . . .

الفاروق الاكبر يا علي يا سيف الإسلام
جف الله انته اعله الكفر يمهدم الاصنام
مَن غيرك ايسويها بفراش النبي اينام
كلب الأسد كلبك ترف من تلتقي ايتام

انته اقلعت باب الحصن والرايه بيدك
كل الملوك الها شرف تصبح عبيدك
يالعشت عمرك بالمحن .. بين المصايب والفتن
                    دلالي ذايب
        . . . . . . . . . . . . . . . . . . .

لحظة رحيلك يا علي من تبتدي ابهم
انظر حبيبت كلبك اتهل الدمع دم
حساسه وانته ياعلي بأحوالها اعلم
الها جنت فوك الشفايف انته مبسم

رحت ورحل عنه الفرح يا حيدر ابعيد
المن بعد يا والدي نستقبل العيد
والعيد شمعاته طفن .. بين المصايب والفتن
                    دلالي ذايب
        . . . . . . . . . . . . . . . . . . .

راحل يبويه ومن تلاكي امي الزجيه
كلها يسبّح بسمج الصبح ومسيه
كللها تحضرني اذا جتني المنيه
وخل تحضر حسين التهشمه الاعوجيه

وانته يحيدر كونك اويه الزهره حاضر
تخفي الطشت عن زينب وتخفي الحوافر
تباري السبايا لو مشن .. بين المصايب والفتن
                    دلالي ذايب
        . . . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

#استشهاد_الإمام_علي ع
لسان حال ام البنين ع


جيت اتوادع ويّاك الليله
بعدك يا حيدر منهو اشكيله
آنه ام عباس اكعد حاجيني .. من بعدك ظلمه الدنيه بعيني
         . . . . . . . . . . . . . . . . . .

ليل الناس حل وحان وكت النوم
وظلت بس بنينك يمك بهاليوم
استأذنت الحسن كتله بدليلي هموم
صدك سيف اللي صوّب والدك مسموم

يمه اترجاك اخليلي امجانه
وخل نتباصر بس حيدر وآنه
مابينك راح احجي ومابيني .. من بعدك ظلمه الدنيه بعيني
         . . . . . . . . . . . . . . . . . .

واجيت وياك اسولف يا علي آهاتي
الي يومين احسّن غصه بلهاتي
لاجلك كل وكت تتجاره دمعاتي
وتجف دمعاتي بس ابنار حسراتي

يابو الحسنين شلون اخلافك
من افكد احسانك والطافك
يالمنهاجك بي يفخر ديني .. من بعدك ظلمه الدنيه بعيني
         . . . . . . . . . . . . . . . . . .

عشرتنه مثل عين ونظرها انته
والكلبي صرت يابا الحسن دكته
شرف اسمك على اسمي لمن اكتبته
لو ينفع ابيعنلك عمر بعته

جان اشريت اسنينك بسنيني
شينفع عمري ومتشوفك عيني
اعطش وانظر وجهك يرويني .. من بعدك ظلمه الدنيه بعيني
         . . . . . . . . . . . . . . . . . .

احب ايدك واحبّن يا علي راسك
إدعي تخمد انفاسي وي انفاسك
بكلشي كمت احسّن عايش احساسك
يمن كلبي اعله جرحك يا علي باسك

انظر جرحك ويفز دلالي
وافهم عني راحل يالغالي
ياريتك عالموت اتدليني .. من بعدك ظلمه الدنيه بعيني
         . . . . . . . . . . . . . . . . . .

يحيدر يا كشختي وهيبتي وقدري
اسولفلك مصابي بدمعتي التجري
احس انهار الك يابا الحسن صبري
برحيلك لو اموت وينكصف عمري

ليل اسنيني وبدرك ضاويها
روحي اخلافك كلشي ايبجيها
كل جلمه التهظمني اتبجيني .. من بعدك ظلمه الدنيه بعيني
         . . . . . . . . . . . . . . . . . .

كل دعوة صلا من بعدك ادعيها
اخذ روحي يرب والعلي وديها
اخر جلمه عندك يا علي احجيها
فصوص اعيوني يمك رايده ابجيها

شجره وذبلت اغصاني ابفكدك
وياكل من روحي الهم من بعدك
فكرة عمري ابدونك تاذيني .. من بعدك ظلمه الدنيه بعيني
         . . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

#استشهاد_الإمام_علي ع
محاورة بين رأس الحسين ع ورأس الامام علي ع



راس الوصي الراس السبط يتناشد ابمصابه
مابين طبرة وحز نحر ياهو الاشد عذابه
كل واحد اشيشوف .. من غدرت السيوف .. بالامامه
            . . . . . . . . . . . . . . . . .

صوت من نحر الحسين .. الراس امير المؤمنين
يعينك الله اعله المصاب .. من يحمل مصابك
سيف مسموم اللي صاب .. راسك وزاد العذاب
وسم حقدهم اقسه جان .. من شدة اصوابك
تجاوب الطبره بونين .. امصابك اعظم يا حسين
بالحجر من يظربوك .. وتمسحها ابثيابك

آنه انصبت وانت اوكفت لي واخوتك تعينك
ولمن يظربوك ابحجر لا اخوه لا بنينك
وحدك وسط الوف .. من غدرت السيوف .. بالامامه
            . . . . . . . . . . . . . . . . .

طبرتك وكت السجود .. امصيبه وتخذم الجبود
راسك الشايل هموم .. اثكل امن الطبره
تعاين الزينب تنوح .. وعندك تزيد الجروح
الدللتها يعز عليك .. من تهل العبره
الطبرة من تنزف تكول .. انته المصابك مهول
عالرمح راسك يصير .. المخيم تنظره

وتشوفه بالنار احترك واتجوّة اليتامه
اتنخي الجسد بس الجسد خيل اطحنت عظامه
تصد لليتامه خوف .. من غدرت السيوف .. بالامامه
            . . . . . . . . . . . . . . . . .

يكله يا راس الأمير .. يا ملاذ الكل فقير
انظر الأيتام اجوك .. مجتمعه اعله بابك
حين سمعوا بالطبيب .. بالدوه كاتب حليب
عصروا العوز واجوك .. ايتامك احبابك
كوم واتلكه الزغار .. عيونهم بيها اعتذار
كلها تصرخ وين ابوي .. ما تحمل غيابك

عاين يرأس المرتضى بان الحزن عليهم
يم بابك التموا هظم بجّه الصخر بجيهم
تسعي والك تطوف .. من غدرت السيوف .. بالامامه
            . . . . . . . . . . . . . . . . .

براس ابو الحمله جواب .. يكله وانته اعله التراب
من كبل حز الوريد .. تنظر هالقيامه
بين نيران الخيام .. بالحوافر بالسهام
بالسياط وبالحبال .. مجتوفه اليتامه
والشمر تنظر اجاك .. يريد ذبحك من كفاك
اثنعش طبره اعله الوريد .. بغضا بالامامه

آنه ابجرح وانته ابذبح ومسلب العمامه
ونحرك البي ثغر النبي باسه وترك علامه
شكد تعجز الحروف .. من غدرت السيوف .. بالامامه
            . . . . . . . . . . . . . . . . .

امصيبه التبجي السماء .. امصيبتك في كربلاء
عالرمح عينك تشوف .. جاسم يم الاكبر
اموذرين اعله التراب .. وحسره تجذب عالشباب
وتنظر انصارك تشوف .. جم جسم التوذر
والف حسره اعله الفرات .. والجفوف امكطعات
حزام ظهرك من يطيح .. اله ظهرك تكسر

وراسك على رأس الرمح ويعاين السبايا
وتقره الكهف الهن حفظ من نظرة البرايا
واكثر بعد تشوف .. من غدرت السيوف .. بالامامه
            . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

بين صفحات النوايب تنكتب
صفحة النار العلى الصادق تشب
كبله نار الباب والخد انسطر
ونار الخيام بأثر كطع النحر .... ياهو اصعب
         . . . . . . . . . . . .      

ينطرح هذا السؤال امن الظمير .. لصاحب العصر المؤمل
بين باب ودار وخيام شيصير .. كل كلب محروك يسأل
نبتدي بكسر الظلوع  ..  سيدي شتذرف دموع
ياهو اكثر يخليك  ..  عالصدر تلطم اجموع

حال ابو الكاظم وداره المحترك
لو ابنار الباب والظلع اليطك
لو جبين الصوّبه ذاك الحجر
ونار الخيام بأثر كطع النحر .... ياهو اصعب
         . . . . . . . . . . . .      

بالثلث نيران ياهو اصعب يكون .. وهنّ كل وحده مصيبه
وبدعاء الندبه اسبلت العيون .. اصبيها بالمدمع تذيبه
تندبه انهارك وليل  ..  الخنصره اتهدم الحيل
موذره بكثر الجروح  ..  بصدره تترادس الخيل

تنعه للصادق وتنحب للحسين
عالنهر شاف العضيد ابلايه ادين
(دقت الساعةُ)من طاح الكمر
ونار الخيام بأثر كطع النحر .... ياهو اصعب
         . . . . . . . . . . . .      

على الصادق جمر كلبك مايهيد .. سيدي وكل لحظه يلهب
اعرف الياذيك اكثر . من يزيد .. تشمت ابعمّتك زينب
واكفه وتهمل العين  ..  وبالطشت راس الحسين
بالعصه يظرب اشفاه  ..  من بدر ثاره وحنين

بجعفر الصادق توسّع هالجرح
صار جرحك نار وسموم وذبح
المذهب الجعفري دلّاله انفطر
ونار الخيام بأثر كطع النحر .... ياهو اصعب
         . . . . . . . . . . . .      

بالامام الصادق اجروح المصاب .. من سكوا سم الظغينه
كل كلب شيعي كتب صفحة عتاب .. مُرسله لارض المدينه
مُرسله والكلب نار  ..  بالبقيع الكبر صار
لا قبب لا منارات  ..  موحش ابلايه زوار

يمته تظهر تبني للصادق كبر
ونعتني زوار مشاية نذر
  جزع من عدنا الصبر يالمنتظر
ونار الخيام بأثر كطع النحر .... ياهو اصعب
         . . . . . . . . . . . .      

جعفر الصادق مثل شمس الصباح .. واضح ابلون الحقيقه
و وجه الحسين البزغ فوك الرماح .. الصادق مكمل طريقه
حسين من ما شرب ماي  ..  ثِبَت حرية الراي
وجعفر ابنهج العلوم  ..  تحققت رؤيته هاي

من علوم اجدادة دينه الجوهري
اسسه وأصبح المذهب جعفري
الهالسبب مولانا بالسم انغدر
ونار الخيام بأثر كطع النحر .... ياهو اصعب
         . . . . . . . . . . . .      


خادم أهل البيت عليهم السلام
عمار العيساوي الكربلائي

اخوتي خدمت الامام الحسين (عليه السلام)
لمن يرغب بالمشاركه ارسل الابوذيه مع اسم
الشاعر مع ذكر المحافظه(ومن الله التوفيق)
@moatmed2

#برنامج_محرم_الحرام_١٤٤٣


محرم . آه يا شهر الجرح . والذبح . والهظم والألم
محرم . آه يا شهر الحزن . والمتن . والحرگ والخيم
بهظمك مهجنه ذايبه .. احا يشهر النايبه
                         محرم
         . . . . . . . . . . . . . . . . . . . .
يا شهر الحجبت اعله التراب ابدور
يالخليتنه نعيش العمر عاشور
النه وياك جفين وصدر مكسور
ولوعتنا اختمتها بخنصر المبتور
محرم . جيتنه ابلوعة امس . والشمس . تلهب اعله الجسد
محرم . جيتنه بشوغة شمع . والدمع . عالطفل والمهد
ابنار الرباب اللايبه .. احا يشهر النايبه
                         محرم
         . . . . . . . . . . . . . . . . . . . .
يا شهر الحرام وكل حرامك راح
بيك اطهر نحر صار اعله راس ارماح
اعله زينب بيك ظل يتبختر الذباح
وصدر حسين ما بين الحوافر طاح
محرم . يا صدر بيك انهشم . وما سلم . كلشي من عيلته
محرم . ثيابه سلبوها الخصم . والهظم . سلبوا اعمامته
لهاي المصيبه الراتبه .. احا يشهر النايبه
                         محرم
         . . . . . . . . . . . . . . . . . . . .
يا شهر الخذت من زينب اخوتها
يمن عالشاطي كاطع ايد رايتها
يشهر النايبه يا نار خيمتها
يالماخذ شباب وطافي شمعتها
محرم . گلي عالشاطي اشعفت . وشخذت . يا شهر يا كمر 
محرم . جود مظروب ابسهم . والعلم . ملتوي اعله النهر 
وبدر العقيله امغيبه .. احا يشهر النايبه
                         محرم
         . . . . . . . . . . . . . . . . . . . .
يا شهر الخيم بالنار محتركات
وعيله ابهيمه لا والي ولا خيمات
چل ليل الرعب وتوالت الحسبات
الاميره رقيه ليش اعله التراب اتبات
محرم . ليل وسياط وزجر . والصبر . يتنه جيّت الصبح
محرم . من يطر ليهم فجر . لليسر . نيتك تتضح
فجرك يطر بمصايبه .. احا يشهر النايبه
                         محرم
         . . . . . . . . . . . . . . . . . . . .
يا شهر اليتامه ابيا ذنب تنگاد
كل خمسه ابحبل رابطهم الجلاد
وبالكوفه الحرم وياهن السجاد
هظيمه يا شهر يشتمهم ابن ازياد
محرم . ينشتم حامي الحمه . وفاطمه . هم بعد تنشتم
محرم . ولا فزع ليهم فرد . واعتقد . ما نعدهم زلم
والغيره منهم غايبه  .. احا يشهر النايبه
                         محرم
         . . . . . . . . . . . . . . . . . . . .
زينب ياشهر من عندك اشافت
لحد الموت ما من جرحك اتعافت
اعله جسم حسين من حر الشمس خافت
تظلل له ابجسمها وعالنحر طافت
محرم . ياشهر بي ننصدع . وننفجع . عالحسين اشجره
محرم . زينب اشّافت هظم . وتنظلم . الجانت مخدره
ابهظمك مهجنه ذايبه .. احا يشهر النايبه
                         محرم
         . . . . . . . . . . . . . . . . . . . .
خادم أهل البيت عليهم السلام
عمار العيساوي الكربلائي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه

________________
لمن يجد صعوبة بالحن اطلبه من
@moatmed2

برنامج محرم ١٤٤٣
نسأل من الله التوفيق