ادبیات سئونلر

مهسا عبدالعلی زاده

آخ!
ایچیمده بیر قیز رقص ائدیر
تنهالیغین سون دوراغی‌دیر بوراسی
اوره‌ییم اویناییر
گووده‌م دینله‌نیر
گوزوم چیرپینیر

ندن اویناییر بوقیز گوره‌سن
اللری باغلی‌دیرمی؟
کدر جوما جوما دولوب اوره‌یینه می؟
حوزونلو موسیقیلر صداسی‌یلا ندن قوللارینی هاوایا اوجالدیر؟
نده غریب‌دیر بو قیز!
هاوانین رنگین بوزاردیر حزین رقصیله
آخ آخ
ایچیمده بیر قیز رقص ائدیر.....
"نغمه" دوستووووم سنی ایسته‌ییر عوصیانجیل اوره‌ییم
گه‌ل خیاوین گوی گویرتیسینه گوتور منی
"خاطیره‌م" گه‌ل شعر دونیاسیندا ایته‌ک "مهسانی" خاطیرلایاق آغلایاق قارا گئدیشینه.
مهسانین شعرینی بیرلیکده بیرسسده اوخویاق
هونکور هونکور باغیراق بو شعرینی
بیر گونلر
""پایسیز" اویغارلیغیم
ساچلاریندان آسلاناجاق
هادیر اول....
...و سن
"یالقیز"لیغین عفونت باغلامیش
لحظه لرینده
منی خاطیرلا یالنیز!
قیزیم...
آی ایچیمده کی یالانچی نوطفه!
یازیغیم گلیر
دوغولماغینا
سیغیندیر اؤزونو
سللوللاریم قارانلیغینا
چیرپینما
ترپندیکجه
قوسدوروجو زامانین
قوخوسوندان
ایضطیراب قوسورام
بوی آتدیقجا ایچیمده سن
قورخو دامارلاریم
جوشا گلیر
سورویور منی
بوزارمیش ایسترسلر یوکو
قیزیم...
آیسان
ائشیدیرسن می؟ "

گه‌ل "خاطیره" گه‌ل
گلین کوچک "نغمه‌"نین سون دوراغینا
شعرله دولاق هاوالاناغ دوستوموزون شعرلرین‌ده
گه‌ل دوستوم گه‌ل "سحرین" شعرین زومزومه ائده‌ک
باهارلاناق "گه‌ل باهار"شعرینده
"بهروزون" دویغولاریندا یاشایاق
اویرنه‌ک دویغوساللیغی
یالقیز آغاج دوستلوغوندا سئیر ائده‌ک دونیانی"
"گئديشى نين آدديم ايزين
ديزين _ديزين
ايزله ييرم
ايتگين دوشموش، سوتول آرزوم
هئى يولونو گؤزله ييرم...

هانسى يوللار آزميشى سان؟
هانسى يوللار؟!

يول اوستونده
خزان ووُرموش
يالقيز آغاج
دوْستلوغوندا
دورموشام من

قورخو دوغان
بو يوللارا
بويلانيرام

و كؤلگه مده
قويلانيرام"

"خاطیره" گه‌ل
"مریمین" یاشیل یاشیل یاشامیندا بیرگه گزه‌ک
آینالاردان کئجه‌ک گئده‌ک دوستوموزون دونیاسینا

"آینالارین یادینا دوشه‌ک وسویله‌یک
دانیرایزله‌رینی
گوروشه اوتانان یولچو
گئدیش‌له گلیر آیاقلاری
سورگون دولانیر خنجرلی ساعاتلاردا
گیزلین پانچ اویونوندا
اودوزور قومار باز اللرین
سوسورام آدینی اوتغونورام....."
دوستوم گه‌ل مریمی ده گوتوره‌ک حوزونلو دونیامیزا
تانریا شیکایت ائده‌ک وسویله‌یک
ندن توخاندین اوره‌ییمیزه
و بیلیرم ایتگیلردیر رقص ائدیرلر کووره‌ک لیگیمیزده.

https://t.me/Adabiyyatsevanlar