Yalnızlığın Ezgisi

Ferhat Göčer


https://t.me/Adabiyyatsevanla

سیگارئت ساتان اوغلان
✍نجیب محفوظ

"چئویرن:سحرخیاوی"

همشه قطارلار "زگزیگ" دوراقینا یئتیشه نه یاخین،سیگار ساتان "جحشه"‌
جماعته ساری قاچان ایلک آدامیدی.تجروبه اونا ثابت ائتمیشدی قطار دوراقی،ان قازانجلی بازاردیر اونا.ماراقلا سکی(سکو)اوزونو قدمله ییب تجروبه لی گوزلریله موشتری آختاریردی.بیر کس اوندان ایشی باره ده سوروشسایدی میریلدانیب اونو یامانلاییردی.چونکو اودا چوخلو کوتله کیمی بدبختلیگ و سیخینتیلی یاشامیندان یورولموشدو.بلکه ایش سئچیمی اوءز الینده اولسایدی پوللو بیر آدامین شوفری اولاردی.آغایانی پالتار گئییب،بویوکلر کیمی یئیه ردی.یایی-قیشی دا اربابلا گوزل یئرلره سفر ائدردی.او ماراقی چکن شئیلری ایسته ییردی امما بیر تیکه چورک دن اوتورو جان وئریردی.
جحشه نین شوفرلیگی سئومک اوچون اوزل عیللت لری واریدی.بو هوس "آلقور" بویوک باشلارین بیرینین شوفرین گورنده اوندا یاراندی.آلقور،"نبویه"شهربانی رئسینین کنیزی قاباغیندا دورموشدو.راحات و قورخوسوز اونلا میرت ووروردی.حتا جحشه ائشیتدی آلقور سئوینجک اللرین بیر-بیرینه سورتوب دئدی:"تئزلیکده نیشان حلقه سیله گله جم".جحشه گوردو قیز سئوگی ایله القورا گولومسه دی.چرقدین جورلاماق بهانه سینه قیراغا ووردو.حقیقت ده ایسته ییردی قارا ساچلارینین شلاله سین نمایشه قویسون.جحشه بو منظره نی گوءرن اوره گی توتولدو.
پاخیللیق دردلی شکیلده ایچینی چئینه ییردی.قیزین قارا گوزلری اونو عذاب وئریردی.او ماجرادان سونرا هردن قیزین دالینا دوشوردو یوخسا خیاواندان کئچنده یولوندا دوروردو.بیر دفعه ده کوچه ده اونو تک گیره سالدی.آلقورون سوزون نیشان حلقه سی گتیرمک باره ده اونا دئدی.امما قیز قاش-قاباقلا اوندان اوز چئویردی.توهینله جاوابلادی:"بو سوءزلر یئرینه بیراز باش-گوزونه یئتیش".
جحشه یئکه آیاقلارینا باخدی.اوزون دیرناقلارلا دَوه آیاقینا اوخشاییردی.چیرکلی تَر کوینگی و توز باسمیش بورکونه باخدی،اوزویله دئدی:"یئرسیز دئییل من بو قدر بدبختم،بخت اولدوزوم باتیب".
آلقورون شوفرلیک ایشینه یئنه پاخیللاندی و اونو آرزولادی.امما یئنه ایشله مکدن اومودسوز اولمادی.او رویالاریندا آرزولارینا یئتیشیردی.
او گون ناهاردان سونرا سیگارت کارتونیلا دوراقا گئتدی.قطارین گلمه سین گوزله ییردی.گوردو قطار اوزاقلاردان بیر توم توستولو بولود کیمی گلیر.آن با آن یاخینلاشیردی تا بوتون گوروندو.
و لاپدان دوراقدا دایاندی.جحشه عجله لی مسافیر دولو واگن لارا ساری قاچدی.امما تعجوبله گوردو قطارین قاپیلارینین قاباغیندا باریش گودوکچی لری دوروبلار.واگن لارین پنجره سیندن یابانجی اوزلر مات و توتقون ائشیگه باخیرلار.سوروشاندان سونرا بیلیندی اونلار ایتالیالی جنگ اسیرلری دیرلر حالدا اسیرلرین دوشَرگه سی (اردوگاهینا) آپاریلیرلار.
جحشه او توزاناقلی اوزلره مات باخیردی.حالی داها پوزغونلاشدی.چونکو او رنگی قاچقین آداملارین اوز گوزلریندن اومودسوزلیق و یوخسوللوق یاغیردی اوندان سیگار آلا بیلمَزدیلر.
اونلارین گوزلری تاماهلا سیگار کارتونون گَوَه له ییردی و آجیقلا سیگارلارا باخیردیلار.جحشه قایتماق ایسته دی.بو حالدا ائشیتدی اونلارین بیری عربجه امما اروپا لهجه سیله چیغیردی:"سیگار ساتان"! جحشه اینانماز کیشی یه باخدی.نیشانه و باش بارماقلارین پول علامتینه بیربیرینه سورتدو.سرباز منظورون باشا دوشدو.موافقلیک علامتینه باشین ترپتدی.جحشه احتیاطلی قاباغا گلدی.اوندان فاصیله لی دوردو.سرباز ژاکتین اینیندن چیخاردیب ایشاره یله دئدی:"منیم وار یوخوم بودو".
جحشه تعجوب و ماراقلا کول رنگلی و ساری دوگمه لی ژاکته باخدی.اوره گی چیرپیندی.امما دویغوسون گیزلتدی.آرام بیر پاکات سیگارت وئریب ژاکتی آلماق ایسته دی.سرباز قاش قاباقلا چیغیردی:"بیر ژاکته ائله بیر پاکات"؟!
جحشه قورخوب دالی-دالی چکیلدی.شوقو سونوکدو.ایسته دی قاییتسین.همن سرباز چیغیردی:"اینصافلی اول.دوققوز دانا یوخسا سکگیز".جحشه باشیلا یوخ دئدی. سرباز دئدی:"یئددی".جحشه یوخ دئدی. سرباز دئدی:"آلتی، بئش ده قبول".
جحشه اعتناسیز بیر سیگار آلیشدیریب خیالسیز توستوله دی.سرباز آجیقدان دلی اولموشدو.سانکی دیریلیگی سیگاردایدی.خواهیشین اوچ و ایکی یه اندیردی.جحشه چارپایانین اوستوندن ترپنمه دی.ایچریسی آلاولیدی.ژاکتین شوقوندا یانیردی.امما اوزون اعتناسیز گورسه دیردی.سرباز ایکی سیگارلا راضیلاشاندا جحشه اراده سیز ترپندی.سرباز ژاکت الینده دئدی:"گَل قوتار دای".
جحشه دوروب قطارا ساری یولا دوشدو.ژاکتی آلیب ایکی پاکات سیگارانی سربازا وئردی.سئوینجک ژاکتین باش-آیاقین سوزدو.فتح گولوشو دوداقلاریندا اوتوردو.سیگارا جعبه سین چارپایانین اوستونه قویوب ژاکتی گئیدی.دوگمه لرین باغلادی.اینینه گئن گلدی.امما اونملی دئییلدی.گووونج و خوشلوق حیس ائدیردی.
سیگارا جعبه سین گوتوروب غرورلا سکویا طرف گئتدی.فیکرینده نبویه نی گوروردو شالینا بورونموش.اوزویله دئدی:"کئشگه ایندی بو حالیمی گوره یدی.حتمن منه توهین ائله مزدی.

منی آلچاتمازدی.داها آلقور اوزون من دن اوستون توتا بیلمز".یادینا دوشدو آلقور بیر دست آبیرلی پالتار گئییر.نه اینکی بیر دانا ژاکت!!
نئجه بیر شالوار الده ائده بیلر؟
بیر آن فیکیرلشدی..معنالی اسیرلرین پنجره دن چیخان باشلارینا باخدی.هیجانلی قطارا ساری یولا دوشدو.جیر سسله چیغیردی:"سیگار،آهای سیگار!بیر پاکات سیگار،بیر شالوار".ایکینجی و اوچونجو دفعه ده سوزون تیکرارلادی.قورخوردو سربازلار منظورون بیلمیه لر.باشلادی ژاکته و سیگارا ایشاره ائتمه گه.بو حرکت تاثیرین قویدو.سربازلارین بیری ژاکتین اینیندن چیخارتدی.جحشه اونا ساری قاچدی.ایشاره یله شالوارین گورستدی.دئدی منظوروم شالواردی ژاکت دئییل.
سرباز چیگینین اویناتدی.یانی فرق ائتمیر.شالوارین چیخارتدی.معامله اولدو.جحشه شالواری آلیب شادلیق حیسینه بوروندو.چارپایاسی نین یانینا قاییدیب شالواری گئیدی.بیر دقیقه ایچینده بوتون بیر ایتالیالی سرباز اولدو...
ایندی بیر پوتونو کسیریدی.بیر پوتوندا تاپسایدی آلقورلا برابر اولاردی.
یئنه سیگارا جعبه سین گوتوردو.قطارا طرف قاچیب چیغیردی:"سیگار،سیگار.بیر پاکات سیگار،بیر جوت پوتون".
قارانلیق یاواش-یاواش دوراقی بورویوردو.گئجه قوشلاری اوچوشوردیلار.جحشه سینیق اوره ک و آجیقلی-غملی باخیشیلا اوردا دوردو.قطار حرکت ائدنده قاباق واگونون گودوکچولرینین بیری اونو سوزدو.آجیقلی اونا باخیب انگلیسجه سونرادا ایتالیا دیلیجه باشینا چیغیردی:"فوری قطارا مین!هوووی سنله نم اسیر"!
جحشه اونون نمنه دئدیگین بیلمه دی.اوءز گویلونده اونو یامسیلاماغا و اله سالماغا باشلادی.ائله بیلیردی گودوکچودن اوزاقدادی،اونو توتا بیلمز.قطار اوزاقلاشدیقجا گودوکچو چیغیریردی:"قطارا مین! اخطار وئریرم قطارا مین!" جحشه اونو مسخره ائدیب آغیزین ایدی.قطاردان اوز چئویریب یولا دوشدو.گودوکچو اونو هده له ییب دویونلنمیش یومروغون گورستدی.
سونرا بئینی بوش گنجی نیشانه توتوب.ماشانی چکدی.کار ائدیجی گولله سسی گونبولده دی.آردیجا دردلی بیر چیغیرتی فضانی بورودو.جحشه نین جیسمی دوردوغو یئرده صلیبه چکیلدی.سیگارا جعبه سی الیندن دوشدو.سیگارا پاکاتلاری و کیبریتلر سکی نین اطرافیندا پرم-پرم اولدولار.جحشه نین جانسیز نعشی اوزو اوسته یئره یاخیلدی.


https://t.me/Adabiyyatsevanla

آنامین اینامی
یازار "ائلیار پولاد "
- آی آنا! یالان دانیشیر. او فیرلداقچی دیر. کاغیذین نه فرقی، هامیسی یانار. سؤزدور دانیشیر ده، سن نییه اینانیرسان.
ملاباجی کندین قادین ملاسی ایدی. بوش واختلاریندا قادینلاری باشینا ییغیب، احکام درسی دئیَر و تعزیه اوخویاردی. بو گونکو احکام صحبتینده دئییب کی، قرآن معجزه‌دیر. اود-اوجاق اونو یاندیرماز!
آنام -بیسواد، ساده و آلله آدامی دیر. منله اوتورب صحبتله‌شنده، آرادا بیلدیی و ائشیتدیی احکام و شریعت مسئله‌لریندن ده دانیشاردی. منده آز-چوخ اعتراضیمی بیلدیرنده دئییردی:
- آی بالا هئچ بیلمیرم سنین تیکه‌نی کیم وئریب؟ بابی‌سان‌کی بابی!
*

14-15 یاشیم اولارکن، بؤیوک قارداشیم شهرده یاشادیغی اوچون اونلارلا قالیردیم. قونشولوغوموزا تزه بیر عایله گلدی. یئنی حیات قورموش عادل و خانیمی طلعت. اوتوردوغوموز ائولره شرکته عاید ایدی. شرکت ایشچیلرینی ائوله تامین ائدیردی.
باخمایاراق کی آرامیزدا 5-6 یاش فرقیمیز واردی، من اونا عادل عمی دئیه مراجعت ائدیردیم. او اوجا بویلو ایدی. آچیق قهوه‌ای بال رنگینده تاثیر باغیشلایان قونور گؤزو و سلیقه ایله بورولوب دوداقلارینی اؤرتن لوپا بوغو، اونا بؤیوک هئیبت باغیشلایاراق، هرکسین ماراغینی جلب ائدیردی.
اونونلا تانیشلیغیم، آخشام اوستو بیر یاز گونوندن باشلانیب و دوستلوغا چئوریلدی. او چوخ سلیقه‌لی و قایغیکش انسان ایدی. ائوین دؤرد دؤوره‌سینی آغاجلا حاصارلاییب، تویوغ، خوروز، اؤردک و قاز ساخلایاردی. اونون حیوانلارا سئوگیسی هامینی ماراقلاندیریردی.
همین گون کوچه‌ده، آغاج کؤلگه‌سینده اوتوروب، درسیمی حاضیرلاییردیم. بیردن عادل عمی آت بئلینده اوزاقدا کوچه‌نین گیره‌جه‌یینده گؤروندو. حیرتله یئریمدن سیچراییب آیاغا دوردوم. بو محتشم گؤرونتو منی اؤزومدن آپاردی: آغ رنگینده آت. یال توکلری، قویروغو و آیاقلاری آچیق قهوه‌ای، پار-پار پاریلداییردی. آسفالت اؤزرینده، ناللارین تماسیندان و آتین یئریشیندن بیر خوش موسیقی سسی کوچه‌نی بورویوردو. اؤزومده آنلامادان عادل عمی‌نین قاپیسیندا مات-مبهوت دایانمیشدیم.
او آتدان دوشوب، جیلوو منه وئرنده اختیارسیز: «نه گؤزل آتدیر، عادل عمی» -دئییب، جیلوو آلدیم. او قاپینی آچاراق: «هه! گؤزلدیر!.. ایسته‌سن آت مینمه‌یی ده سنه اؤیره‌درم» - دئدی.
آتی، قاپی دان ایچری سالیب، حیطین کونجونده اولان تؤوله‌یه ساری آرپادیم. تؤوله آغاج شاخیندان حاصارلانیب، دامی قامیشلا اؤرتولموشدو. او تؤوله ده حاضرلیق آپارارکن، منده الیمی آتین یالیندا، بئلی و ساغریسیندا گزدیریردیم. بو تماسدان خوش بیر حس‌لر ایچینده ایدیم. بوتون هوشوم آتین یاندا ایدی. عادل عمی نه سوروشوردوسا، هه-یوخ دئییب بو حظی الدن وئرمک ایسته‌میردیم.
او تؤوله‌نین حاصار قاپیسینی آچیب، آتی ایچری سالاندا من باشا دوشدوم کی، اجازه آلمادان اونلارین حیطینه گیرمیشم. پؤرتدویومدن و دیلیمین دولاشماسیندان عادل عمی هر شئیی آنلاییب: - اوتانما!.. سن ده منیم کیچیک قارداشیم. طلعت همیشه سنی تعریفله‌ییر. نئچه‌نجی سینیف ده اوخویورسان؟
من اوتانقاج باشیمی آشاغا سالیب، الیمده اولان کتابی اونا اوزاتدیم.
او کتابی الیمدن آلیب، واراقلاییب: - نئجه اوخویورسان؟ یوخلایاق؟ -دئدی.
منده باشی آشاغی «هه» -دئییب راضیلیغیمی بیلدیردیم.
اوچ-دؤرد سوال سوروشدو، منده بیلدییم قدر جاوابلادیم. کتابی منه قایتاریب: - احسن! یاخشی اوخوموسان. –دئدی.
بئله‌لیکله بیز تانیش اولدوق. هرگون ده اولماسا هفته‌ده اوچ-دؤرد دفعه گؤروشوب حال-احوال توتاردیق.
امتحانلار قورتاریب، یای تعطیلی باشلامیشدی. یئنه بیر گؤروشده حال-احوالدان سونرا، نه ایشله مشغول اولدوغومو و یای تعطیلی حاقدا فیکیرلریمی سوروشدو. منده: - استراحت ائده‌جم –دئییب جاوابلادیم.
او بیردن: - بوردا دور ایندی گلیرم. –دئییب، ائوه گئتدی.
ائودن چیخاندا، الینده دؤرد کتاب منه طرف گلدی:
- آل! بونلاری اوخو-قایتار. درسلر باشلانینجا گؤروم نئچه کتاب اوخویاجاقسان؟..
بو کتاب آل-وئری پاییزا دک داوام ائله‌دی و بو مدتده من قدرینجه کتابلار اوخودوم. بئله‌لیکله منده کتابا هوس او ایلدن اویاندی. ایللر سونرا منیم ده ائوده سامباللی و چئشیدلی کتاب رفیم اولدو. گونده‌لیک خرجلییمدن آرتیریب، آی دا ایکی-اوچ کتاب آلیب اوخویوردوم.
*

داییم دیندار، ساده و فاناتیک آدام ایدی. هر دفعه بیزه گلنده، آرامیزدا گرگین مباحثه گئدردی. بعضاً آناما حیرصله‌نیب: - بو نه اوغولدور بویودموسن؟ -دئییردی. آنام دا زارافاتا سالیب: - قوچ ایگید دایی‌سینا چکر. –دئییب اونو سانجاردی.
بیر گون داییم الینده بیر باغلاما ایچری گیردی. باغلامانی منه اوزادیب: - آل! بوتون سواللاری‌نین جاوابی بو کتابلاردادیر!
باغلامانی آلیب و آچدیم: قران و نهج‌البلاغه کتابلاری، اصلی متن و فارسجا ترجمه‌سی ایله

ایدی

. اؤز قابیغلاری نفیس و قیزیلی یازیلارلا بزه‌دیلمیش. یارلی-یاراشیقلی. کتاب رفیمین گؤز یئرینده بو کتابلار یئر آلدی.
***

قانلی-قادالی، عذاب-اذیتلی گونلر ایدی. منده توتوقلاندیم. او واخت کتاب جرم ساییلیردی. جرمیم آز اولسون دئیه، باجیم تلسکن بوتون کتابلاریمی او ایکی کتاب دا اونلارین ایچینده، یانار تندیره تؤکوب، یاندیریر.
آنام اولمازین عذاب-اذیتینه قاتلاشیر. یورغان-دؤشه‌یه دوشور. من آزادلیغا بوراخیلاندان سونرا اونون دا حالی-احوالی یاخشیلاشدی. حیات اؤز آخاریندا داوام ائتدی.
بیر گون یئنه اوتوروب آناملا صحبتله‌شیردیک. سؤز کتابلارین یاندیریلان چاغیندان دوشدو. آنام مایوس و ناراحات حالدا دئدی:
- بالا... هئچ واخت اؤزومو باغیشلایامایاجام.
- نییه؟ آی آنا.
- او ایکی کتاب تندیرده یاندی.
من الیمی آنامین بوینونا سالاراق، اونو باغریما باسیب، قوجاقلادیم. بیاض ساچلارینی سیغاللایاراق:
- نگران قالما! آی آنا... او کتابلار یانمادی، گؤیرچین اولوب اوچدولار...
آنامین گؤزلرینده‌کی تبسّوم اوره‌ییمه سرینلیک و راحاتلیق عطرینی یاییردی...

https://t.me/Adabiyyatsevanla

Mümkün Degil

Selami Şahin

https://t.me/Adabiyyatsevanla

يازار: بابي پروْبشتاين

چئويرن: کاوه فضلي خلف

آتام من‌له دانيشديغيندا، هر زامان سؤزونو، «بوگونه قدر، سني نئجه دليجه‌سينه سئوديييمي سنه سؤيله‌ديم مي؟» دئيه باشلاردي. بو سئوگي ايفاده‌سي قارشيليق بولوردو بلکه... اوْنون سوْنراکي ايللرينده، اوْنون عؤمرو گؤزلريميزين اؤنونده توکه‌نيرکن، بونون يانيندا بيزلر بؤيويورکن... آه، بو مومکون اوْلسايدي...

82 ياشيندا اوْ اؤلمک اوچون حاضيردي، چکدييي دردلرين بيتمه‌سي اوچون، من ده اوْنون گئتمه‌سينه ايذين وئرمه‌يه حاضيرديم. بيزلر گولدوک، آغلاديق، بيربيريميزين اللريني توتدوق، بيربيريميزه سئوگيميزدن دئديک، آنلاشديق کي آرتيق زاماني گلميش‌دير. دئديم، «آتا، سن گئتديکدن سوْنرا، من سندن، ياخشي اوْلدوغونو گوستره‌جک بير نيشانه ايسته‌ييرم». اوْ بو سؤزون معناسيزليغينا گولدو؛ آتام روحون باشقا بير شکيلده ياشاياجاغينا اينانميردي. منيم ده هئچ بير قطعي دليليم يوْخ ايدي، آمما منيم بير چوْخ تجروبه‌لريم وار ايدي کي مني، «اوْ بيري طرفدن» بعضي سيگناللار آلا بيله‌جه‌ييمه اينانديريردي.

من- آتام اوْ قدر دريندن بيربيريميزه باغلي ايديک کي، اوْ اؤلدويو آن، من اوْنون قلبينه گلن ضربه‌ني کؤکسومده حيس ائتديم. سوْنرالار من ياس توتدوم کي نييه خسته‌خانا، اوْ اؤلدويو آندا قوْيمادي کي من اوْنون اللريني توتام.

گونلرجه اوْندان بير نيشانه گؤرمک اوچون دوعا ائتديم، آمما هئچ بير شئي اوْلمادي. گئجه‌لرجه يوخويا دالمادان اؤنجه بير رؤيا آختارديم. اوپ اوزون بير دؤرد آي کئچدي، من نه بير شئي دويدوم، نه ده بير شئي گؤردوم، اوْنو الدن وئرمه‌نين آجيسيندان باشقا.

آنام بئش ايل اؤنجه آلزايمئر خسته‌ليييندن اؤلموشدو، من اؤز قيزلاريمي بؤيوتدويوم حالدا، اؤزومو ايتميش بير اوشاق کيمي حيس ائديرديم.

بير گون کي سس‌سيز- قارانليق بير اوْتاقدا، ماساژ ميزي‌نين اوستونده ياتميشديم، گؤروشمه‌مي گؤزله‌ييرديم، آتامين سسيني ائشيتديم، نه قدر ده سسيني اؤزله‌ميشديم، اوْ سس مني اؤزويله آليب گؤتوردو. من هيجان‌لانماغا باشلاديم، بلکه بو همن آتامين نيشانه‌سي‌دير، اوغروندا چوْخ چتين‌ليکلر چکديييم، آختارديغيم نيشانه. آنلاديم کي بئينيم چوْخ يوکسک گوجلو بير وضعييتده‌دير. من تانيش اوْلمايان بير شففافليغي تجروبه ائديرديم، ائله کي چوْخ بؤيوک ميقداردا شکيللري باشيمدا يئرلشديره بيليرديم. ديققت ائتديم امين اوْلام کي من اوْياغام و رؤيا دا گؤرمورم، بيلديم کي اينسانين ان چوْخ اوْياق اوْلدوغو قدر اوْياغام. منده اوْلان فيکيرلر، دورغون بير گؤله دوشن بير سو داملاسينين، ساکين‌لييي پوْزدوغو کيمي ايدي، بئينيمده‌کي هر شئي بيربيرينه قاريشميشدي، من کئچن هر ثانييه‌ده اوْلان راحاتليق- ساکين‌ليييه حئيران قالميش‌ديم. سوْنرا دوشوندوم کي، «من اوْ بيري طرفدن گلن ايشاره‌لري کوْنتروْل ائتمه‌يه چاليشيرام؛ ايندي اوْنو دوردوراجاغام.»

بيردن، آنامين اوزو گؤروندو، آنامين اوزو! هم ده آلزايمئر خسته‌لييي‌نين اثرلري اوْنون بئينيني اوْندان آلمادان قاباقکي وضعييتينده اوْلدوغو کيمي. پارلاق گوموش ساچلاري، دادلي اوزونه بير تاج کيمي اوْتورموشدو. آنام، اوْ قدر گئرچک- اوْ قدر ياخين ايدي کي حيس ائتديم اليمي اوزاديب اوْنا توْخونا بيله‌رم. اوْ چوْخ ايللر بوندان قاباقکي کيمي باخيردي، عؤمرونون محو اوْلماسي باشلامادان اؤنجه‌کي کيمي باخيردي. حتتا ژوْي عطري‌نين قوْخوسونو حيس ائتديم، اوْنون ان چوْخ سئودييي عطير. ائله بيل کي بير شئي گؤزله‌ييردي، دانيشميردي. حئيرت ائتديم کي آخي نئجه اوْلا بيلر، من آتاما فيکيرلشيرديم آمما آنامي گؤردوم. اؤزومو گوناهکار حيس ائديرديم، چونکو اوْنا فيکيرلشمه‌ميشديم، اوْنو لاييقينجه درک ائتمه‌ميشديم.

دئديم کي، «آنا، مني باغيشلا، چونکو سن اوْ قوْرخونج خسته‌لييين عذابيني چکمک زوْروندا قالدين.»

عذابلارينين باره‌سينده دئديکلريمي قبول ائتديييني گؤسترمک اوچون باشيني ياواش بير طرفه اه‌يدي. سوْنرا گولومسه‌دي، چوْخ گؤزل بير گولومسه‌مه، چوْخ آچيقجا دئدي، «آمما منيم بوتون خاطيرلاديغيم، يالنيزجا سئوگي‌دير.» سوْنرا يوْخ اوْلدو.

تيتره‌مه‌يه باشلاديم، اوْتاق بيردن بيره سوْيوماغا باشلادي. من چوْخ دريندن آنلاديم کي اؤنملي اوْلان تک شئي، خاطيرلانان تک شئي، بيزلرين وئردييي- آلديغي سئوگي‌دير. دردلر يوْخ اوْلوب گئدر، گئري‌يه آنجاق سئوگي قالار.

آنامين دئدييي کلمه‌لر، منيم ائشيتديييم ان اؤنملي سؤزلر ايدي، اوْ آن، سوْنسوزا قدر قلبيمده حک اوْلوندو.من هله ده آتامدان بير شئي ائشيتمه‌ميشم، هئچ بير شئي ده گؤرمه‌ميشم، آنجاق هئچ بير شککيم يوْخدور کي بير گون، اوْنو ان آز گؤزله‌ديييم آندا، آتام گله‌جک- دئيه‌جک کي، «بو گونه قدر، سني سئوديييمي سؤيله‌ديم مي؟».


https://t.me/Adabiyyatsevanla

حئکایه
سنی بوش یئره سئومه‌میشدیم
"اسماعیل خرمی"

یاغیش سیسقین – سیسقین یاغماغا باشلامیشدی. قوروموش یارپاق‌لار، آیاق‌لار آلتیندا، بیر – بیرینه نه‌سه پیچیلداییردی. بیر – ایکی سئرچه، لوت بوداق‌لارین اوستونده اویناشیردی. یئنی‌جه چیخان گونش، گوجسوز بیر دورومدا، قول - قانادینی ساللایاراق، چالیشیردی زیروه‌لره یوکسه‌له. نه داریسقال کوچه وار ایدی نه ده یاریمچیق تیکیلمیش دام – داش. من یاریمچیق ساندیغیم دام – داش یئرینده ایکی مرتبه‌لی ائوین آلتیندا، بیر چایخانا قورولموشدو. اونون قارشی‌سیندا دوروب گؤزله‌مه‌لی ایدیم. "سونا" ایله بوردا گؤروشه‌جه ایدیک. بیر آز اویان – بویانا یئریدیم. بیر – ایکی سیگارئت چکدیم. گاه یئره باخیردیم گاه گؤیه. گاه‌دا کوچه‌نی، دام – داشلاری گؤزدن کئچیریردیم. اونوتقانلیق توتان آدام کیمی، بورالارین هامیسی منه یاد گلیردی. سانکی ایل‌لر بویو من بوردا یاشامامیشام. بوردا منیم اوشاق‌لیغیم، گنج‌لییم کئچمه‌میشدی. سونا ایله بوردا گؤروشوب اؤپوشمه‌میشدیک. سانکی بوردا منیم شیرین و آجی گون‌لریم اولمامیشدی. درس اوخویا – اوخویا بو دام – داش‌لارین چوخوندا کرپیج آتیب بتون داشیدیغیم، فهله‌لیک گونلریم، گؤزومون اؤنونده ایدی. ائله بو کوچه‌ده سونانی گؤروب سئومیشدیم. ائله بو کوچه‌ده اونونلا گیزلیجه ال – اله یاپیشیب گؤزلرینین ایچینه بوتون گوجوم‌له باخمیشدیم. آمما بو دام – داش‌لاردا اؤزگه ایدیلر، یاد ایدی‌لار منه.
بیر گون درسدن قاییدیب، بو دام‌لارین بیرینده فهله‌لیک ائتدییم آندا، سونا منی گؤردو. دوزو چوخ اوتاندیم. منی بئله دورومدا گؤرمه‌یینی ایسته‌مزدیم. آمما بیر گؤروش گونو، منیم ایشله‌مه‌ییمدن چوخ – چوخ سئویندی. منه اوره‌ک – دیره‌ک وئره‌رک دئدی:
- سنون یاخشی درس اوخوماغون منه بللی‌دیر. اونون یانیندا ایشله‌مه‌یون داها گؤزل و دوزگوندور. سونرا آرتیردی:
- کاسیبلیق مان دئییل، الوندن بیر ایش گلیرسه ایشله‌مه‌ییب کاسیب قالسان ماندیر.
سونانین سؤزو اوره‌ییمه ائله یاتدی کی اونو اوره‌کدن باغریما باسیب نئچه کره اؤپدوم. چوخ واخت‌لار سونا گلیب ایشله‌دییم یئرده، منیمله گیزلیجه گؤروشردی. اوستوم – باشیم تمیز اولماسادا، بوندان هئچ اوتانمازدی. دئییب – دانیشیب گوله – گوله آیریلاردیق.
یونیوئرسئتدن قبول اولدوغوم ایل‌لر چوخلو کتاب اوخویوردوم. رمان، حئکایه، فلسفه، تاریخ و . . .. بو کتاب‌لارین بعضی‌لرین اوندان – بوندان گیزلیجه آلیب اوخویاردیم. اوخودوق‌لاریم‌دان سونایا دا وئره‌ردیم. بعضن‌ده اوتوروب اوخودوق‌لاریمیز باره‌سینده دانیشاردیق. کیتاب‌لارین بیرینده بئله بیر سورقویا توش گلمیشدیک: "اؤزل حیات اؤنملی‌دیر یوخسا ائل قایغی‌سینا قالماق؟" سونا اؤزل حیاتا اؤنم وئریردی. من ایسه ائل دردینی چکمه‌یه. چوخلو دانیشیقدان سونرا قراره گلدیک کیتابی بیر داها سونونا قدر اوخویاق.
بیر نئچه گوندن سونرا یئنه اورتاق آنلاییشمایا چاتمادیق. سونا بیزیم عشقیمیزی هر نه‌دن قوتسال توتاراق، اؤزل حیاتیمیزی اؤنمسه‌یه‌رک دئدی:
- سنون بیر توکونو مین‌لر آخماق آدام‌لارین بوتون حیاتی ایله دئییشمه‌رم.
یوخ، سونا دئدییینین اوستونده سرت‌جه‌سینه دایانمیشدی. بیر – بیر آداملاری آدلاریلا سایدیلاییب دئدی:
- قویمارام، قانماز حاجی صفر، پینتی حاجی قنبر، مالین یئمز سید حسین، ساتقین قارا جعفر، امنیه فیروز و . . . کیملره گؤره سنون باشوندان بیر توک اسگیک اولا. ائل اولاردیرسا قایغی‌لارین بالالاری چکسین.
سونا، دانیشماقدان دایانمیردی، یورولموردو. چالیشیردی سون گوجو ایله منی باشا سالسین کی بیزیم حیاتیمیز هر نه‌دن و هر کسدن اؤنملی‌دیر. اؤزموزو یاخشی باشا دوشمه‌سک باشقاسینی باشا دوشه بیلمه‌زیک دییه آرتیردی:
- باخ منیم جانیم، منیم گؤزل عشقیم، اولار بیزیم قایدیمیزا قالیرلار مگر؟ بیزده اولارین قایدینا قالاق؟ یوخ منیم جئیرانیم. اؤزموزو دوشون. گله‌جه‌ییمیزی دوشون. سن کی باجاریقلی درس اوخویوب چالیشقان آدامسان، منده سنه یاردیمجی اولاراق چالیشیب اؤزموزه گؤزل حیات قوراریق.
سونایا دئمک ایسته‌ییردیم من ائلین قایغی‌سینا اؤنم وئرمکده، عشقیمیزی، سئوگیمیزی، اؤزل حیاتیمیزی دانمیرام. آنجاق ائلین ده قایغی‌سین چکمک لازیمدیر.

چایخانا گئت – گئده شولوغلاشیردی. یاغیش دا برکیمیشدی. دالبادالا دوشن یاغیش دامجی‌لاری، الیمده یاندیردیغیم سیگارئتی، مندن قاباق سؤندوروردو. تپه‌دن - دیرناغا ایسلانمیشدیم. ایسلانسامدا بیر یئره گئتمک ایسته‌میردیم. گلیب – گئدنین اوزونه باخیردیم. بلکه سونادا گلیب بورالاردان کئچدی دییه، قادین‌لارا داها چوخ دقت ائدیردیم. یاغیشدان قورونماق چون، اوز - گؤزونو اؤرتن قادین‌لاری سلام وئره‌رک دانیشدیریردیم بلکه سونانین سسین ائشیدم. چوخ‌لاری گلدی گئتدی. آنجاق سونا گلمه‌دی. گؤزوم یئره دوشن یاغیش‌لارین آراسینی آراییردی. نئچه مرتبه‌لی ائولرده، ترله‌میش باجالاری سیلن ال‌لرین آرخاسیندا اولان آدام‌لاری سئیر ائدیردیم. بالکون‌ل

اردان، یاغیش ایسلادماسین دییه، تله‌سه – تله‌سه سریلمیش پالتارلاری ییغیشدیران قادین‌لارا باخیردیم، هئچ بیری سونایا اوخشامیردی. چال باشیم و آغووش ساققالیم یاغیش دامجی‌لاری ایچینده بوغولموشدو. کیپریک‌لریمی دؤین یاغیش گؤز یاشی کیمی یاناق‌لاریمدان آخیب تؤکولوردو. بو دورومدا اؤزومه باخیب آغلاماغیم گلدی. ایسته‌دیم کوچه‌ده ائله هؤنکور – هؤنکور آغلاییم کی سسیم بوتون ائولره چاتسین. باجالاردان، بالکون‌لاردان سوخولوب اوتاق‌لارا گیرسین. آمما چایخانا قاباغیندا اولدوغوم یادیما دوشدوکده، اؤزومو اله آلدیم. هامی واریدی، سونا یوخ ایدی.
چایخانانین قاپیسی آچیلدی، بیر نفر منی سسله‌دی: « آی آغا جومجولوق سو اولوبسان، ایکی ساعاتدیر یاغیشین قاباغیندا دلی آدام کیمی نه‌یه دوروبسان؟ گل ایچری بیر آز قیزیش. یوخسا ناخوشلویارسان.
الی – آیاغی یئردن – گؤیدن اوزولموش آدام کیمی، چاره‌سیز قالاراق سؤزونه باخیب ایچه‌ری کئشدیم. منی ایچه‌ری چاغیران آدام اؤز یانیندا اوتورتدو. چایچی قاباغیما بیر چای قویدو. یانیمداکی چالیشدی منه دئسین ایسلانمیشام چایی ایستی – ایستی ایچیم بلکه جانیم قیزیشا. اونسوزدا ایچری کئشجک، جانیم قیزیشمیشدی. آخی بورانی یاخجی تانیییردیم. سماوارلارین اولدوغو دالدا یئر منه چوخ دوغما گلیردی. بو دالدا یئرده من نئچه کره اولموشام. یادیمدان چیخارمی هئچ؟ بوردا منیم ان شیرین گونلریم کئچیب. عؤمرومون گول‌لو – چیچک‌لی آن‌لارینین ایزی وار بوردا. سونا ایله خیسین – خیسین دانیشدیغیمیز سؤزلرین سس‌لری قاناد آچیب اوچور بورالاردا. اؤپوش‌لرین قیشغیرتیسی قولاغیما گلیر. قوجاق‌لاریمیز پیچیلداییر. اونون گؤز‌لرینین ایشیغی ایچیمده نور دوغورور. سون گؤروشوموز، سماوارلار اولدوغو یئرده گؤزومون اؤنونده پوققلداییر، جوشوب داشیر. جوشوب ایچیمه تؤکولور. ایچیمی ایندی یاندیریب یاخیر. گؤزومو کور ائدرجه‌سینه قدر، سماواردان آخان قاینار سو کیمی قاینار آغلاماق ایسته‌ییرم.
ایچیمه دالمیشدیم. هئچ بیلمیردیم چایخانادا کیملر وار. گؤزومو آچاندا، حاجی صفری، پینتی حاج قنبری، مالین یئمز سید حسینی، ساتقین قارا جعفری، امنیه فیروزو و یاشقالارین گؤردوم. زلی قانی سوموران کیمی، لذت‌له قلیان‌لارین سوموروردولار. منی ایچه‌ری چاغیریب یانیندا اوتوردان کیشی ده، منیم یونیوئرسئت یولداشیم، ائلیارین آتاسی، آقابالا کیشی ایدی. آقابالانین فیکری – ذیکری اوشاقلارین اوخودوب بیر یئره چاتدیرماق ایدی. ائلیار یونیوئرسئتی قازاناندا تکجه داناسین‌دا اونا قوربان کسیب پایلامیشدی. آقابالا کیشی چایین ایچه – ایچه مندن سوروشدو:
- آی بالا کیملردن‌سن؟ بورالاردا نه گزیرسن؟
آقابالانین منی تانیماماغی بللی ایدی. تانیسایدی بئله دانیشمازدی. آقابالا تانیماسا هئچ کیم تانییا بیلمزدی. بونلارلا چوخ یاخین ایدیک. اوغلو ایله‌ده یاخین دوست ایدیم. نئچه کره ائولرینه گئتمیشدیم. ایلک کره دوشوندوم، اؤزومو تانیتدیرمایام. آمما بعضی سورولاریما جواب تاپماغا گؤره مجبور ایدیم. اونا یاخینلاشاراق دئدیم: « آقا بالا عمی منی تانیمادون؟» آقابالا گؤزلریمین ایچینه دقتله باخاراق، دئدی: « آی بالا تانیش گلیرسن آنجاق یاخشی آوارمادیم.» اوندان ایسته‌دیم تانییاندان سونرا کیمسه‌یه دئمه‌سین. سونرا آچیقلادیم کی من ائلیارین دوستو "آیدینام". اوزومه درین – درین باخیب آز قالدی گؤزلیندن یاش سوزه‌لنسین. آنجاق اؤزونو ساخلاییب، قولونو بوینوما سالیب ایسلاق آغووش ساققالیمدان اؤپدو.
- آی بالا سنون باشووا دؤنوم. نه پیس گونه قالیبسان؟ بو یاشدا ساچون ساققالون دوم آغ اولوب. والله هئچ تانیماق اولمور. الله مردم آزارین ائوین ییخسین. سنی اونلار بو پیس گونه قویدولار. مین دفعه سنه، ائلیارا دئمیشدیم، بو آخماق آدام‌لارلا آغیز – آغیزا وئرمهیین، سیزی گودازا وئره‌رلر. گئتدینیز درس اوخوماغا اوردادا دیلینیزی یئره قویمادوز. دؤلت‌له، دؤلت‌لیک ائله‌مک اولماز.
- جانون ساغ اولسون عمی. کئچن کئچیب، اولان اولوب. من ایندی باشقا بیر ایش ایچون بورا گلمیشم.
آقابالا کیشی سؤزلریمه قولاق آسمایان کیمی آرتیردی:

- داش‌لارین سینوزه دؤیدویونوز آدام‌لار، سیزی ساتدیلار. ده‌یردی بئبئله زندان چکیب پیس گونه قالماق؟ قانماز حاجی صفرین اوغلو هارا، آییلماق هارا؟ مین دنه ده اونا کیتاب وئریب اوخودساندا دده‌سی کیمی قانمازدیر کی قانمازدیر. آی بالا قانمازلیق بونلارین قانیندا وار.
- واختی گلر اونلاردا باشا دوشرلر. هئچ کیم ننه‌سین قارنیندا پیس و یا یاخشی اولمور. بیزلر اونلاری یاخشی و پیس بارا گتیریریک. گؤرونور کی بیزیم ایشلریمیزده خطا وارمیش. بیرده هامی قانان اولمایاجاق کی.
آقابالا کیشی یئنه‌ده دییه‌سن منیم سؤزلریمه قولاق آسمیردی. باشلادی هاچان زنداندان چیخمیشام، کیمی گؤروب گؤرمه‌میشم. و هارا گئتمه‌ییمدن سوردو. بیر – بیر جواب وئرندن سونرا، سونانی آختاردیغیمی دئدیم. او دا منه دئدی کی، «سونرالار بیلدیم کی سیز نه قده‌ر بیر بیرینیزی س

ئویرمیش‌سیز.» نئچه کره آقابالا کیشی‌یه دئدیم کی من سونانی دله‌جه‌سینه سئویردیم. سونانین خاطره‌لری و اونا قووشماغی زنداندا منی بوتون چتینلییه دؤزدوروردو. یاراسی دئشیلن آدام کیمی و قولاق یولداشی تاپان دیل کیمی باشلادیم اونا سون گؤروشوموزدن دانیشماغا:
- بیر گون یاغیش سیسقین – سیسقین یاغماغا باشلامیشدی. قوروموش یارپاق‌لار، آیاق‌لار آلتیندا، بیر – بیرینه نه‌سه پیچیلداییردی. بیر – ایکی سئرچه لوت بوداق‌لارین اوستونده اویناشیردی. یئنی‌جه چیخان گونش، گوجسوز بیر دورومدا، قول - قانادینی ساللایاراق، چالیشیردی زیروه‌لره یوکسه‌له. آددیم‌لاریمی سرت آتاراق، داریسقال بیر کوچه‌ده یاریمچیق تیکیلمیش دام - داشا یاخینلاشدیم. دامین آرخاسیندا دؤرد دووارین بوجاغیندا "سونا"نی گؤردوم. منی گؤرجک، سس‌سیزجه الی ایله ایشاره ائتدی. کیمسه گؤرمه‌دن گیزلی‌جه یانینا سوزولدوم. ال گؤروشوب اوزوندن اؤپدوم. منی برک – برک قوجاقلاییب، «نه چوخ یوباندون؟» دئدی. آمما من یوبانمامیشدیم. او گون بالاجا باجی‌سی چیچه‌یه دوز بو واختی دئمیشدیم. گؤروشوموز چوخ آز چکدی.گلن آدینا آخشامی اونلارا ائلچی گؤندره‌جه‌ییمی سؤیله‌دیم و آیریلدیق.
آقابالا کیشی، گؤزلرینی منه تیکیب باشینی بیر – ایکی کره اویان – بویانا دؤنده‌ریب دئدی:
- آی بالا او ایللردن دوز اون ایل کئچیب. آخی سنه نه دئییم؟ . . . نئینک سونانی اگر یئنه چوخ سئویرسن‌سه من اونون یئرینی بیلیرم. او سنی یئنه‌ده گؤزله‌ییر. قورخما سندن باشقاسینی سئومه‌دی. سنی هئچ کیمسه‌ایله دئییشمه‌دی. بیر آژانس چاغیریم گئده‌ک.
آیاغا دوروب آقابالا کیشینین اوز گؤزوندن اؤپدوم. اوچماغا قول قانادیم یوخیدی. اوره‌ییم دوز اون ایل بوندان قاباق کی کیمی چیرپینماغا باشلادی. آز قالیردی کؤکسومو یاریب اووجوما دوشه. اون ایل زندان توک قده‌ر وئجیمه دئییلدی. چایخانانین ایچینده ایسته‌ییردیم قیشغیریب دونیانیا سس سالام. بو آن منیم کیمی، دونیادا هئچ کیم خوشبخت اولا بیلمزدی. سونایا او قده‌ر دانیشماغا سؤزوم وار، عؤمروموزون سونونادک دییم بیتمز. «آه منیم سونام آه. سنی بوش یئره سئومه‌میشدیم کی؟ منی اونوتمایاجاغینی بیلیردیم. منیم یاشیل باشلی سونام. سؤز وئریرم، سنه گؤزلریمین گیله‌سین یئدیرده‌جم. الیمده، اووجومدا، جییاریمین دوز باشیندا ساخلایاجام. سنی بیرداها ترک ائتسم اوره‌ییم پارچا – پارچا اولسون. بئلیم قیریلسین. باشیم کسیلیب اؤنونده قاناسین. داها سنی اؤزومه زندان ائده‌جم. سن منیم زندان‌بانیم اولاجاقسان. هر ایشکنجه‌نه دوزه‌جم. بوتون آغریلارینی اؤزوم چکه‌جم. سندن بیر گون بئله آیریلمایاجام. آه سونام آه. بو گونو هر گون آرزولامیشام هر گون ایسته‌میشم. بو آنلارا گؤره یاشامیشام»
اؤزومه ائله دالمیشدیم کی هاچان تاکسی‌یا مینیب هارا گئتدییمی، آقابالا کیشینین تاکسی‌ده نه دانیشدیغینی، تاکسی‌دن دوشمه‌ییمیزی بیلمه‌دیم. سونادان باشقا گؤره‌ر گؤزوم ائشیدن قولاغیم یوخ ایدی. موتلولوقدان اؤزومه سیغمیردیم. بیلسه ایدیم بو تئزلیک‌ده سونانی تاپاجام، اؤزومه یئتیشردیم. ساچیمی ساققالیمی ووردوراردیم. آمما سونانی یاخشی تانییردیم. فهله‌لیک واختیمدا اوست – باشیمین کیرلی اولماغیندان هئچ چکینمزدی. نئچه کره بئله‌سینه قوجاقلاشیب اؤپوشموشدوک. قوی هله گؤروشک. تمیزلییه واختیمیز چوووووخ اولاجاق. بئله – بئله دوشونوردوم، آقابالا کیشی بیر قبیرین اوستونده دایانیب دئدی: دوز دوققوز ایل بوندان قاباق، آتاسی زورلا باشقاسینا وئرمک ایسته‌ینده، بیر پاییز آخشامی قیزجیغاز اؤزونه قییدی.


https://t.me/Adabiyyatsevanla

اوشا ق ادبیاتی نا دایر یازی لارینیزی ، شکیل لرینیزی ، فیلم لرینیزی ، رسم لرینیزی ...بیزه گوندرین .

https://t.me/Adabiyyatsevanlar

اوشاق ادبیاتی 98/3/2

سئوينج نوروقيزى
آگوستين ٢٢سينده،١٩٦٤اونجو ايلده
باكى شهرينده آنادان اولوب

نئچه اوشاق شعرى سئوينج نوروقيزيندان

آي ايلبيز،ايلبيز،ايلبيز
يولو اوسته زرلى ايز.

ائويندن چيخ گل بيزه
بيز چاى سوزك ايلبيزه

آى ايلبيز، ايلبيز، ايلبيز
سنى گؤزله ييرديك بيز
ايلبيز دئدى:_ سيز گلين
اؤز ده بير آز تئز گلين.

باخمايين داردير يئريم
دوستلارا واردير يئريم

دَمده دير چايدا،آشدا
بيشيريليب لاواشدا.
ايلبيزين ائوى بورما
گز بو ائوى اوتورما

__آى ايلبيز، ايلبيز،ايلبيز
يئمك وئر چوخ آجيق بيز

#سئوينج_نوروقيزى


"كئچى گلير قاچا _قاچا"

کئچى گلير قاچا_قاجا

بوينوزلارى قوشا هاچا
كيم ايچمه سه شورباسينى
كيم اينجيتسه باباسينى
كيم حيطه زيبيل آتسا
كيم گئج دوروب،كيم گئج ياتسا

کئچى اونا كلّه آتار
ها_ها _ها ،ها _ها _ها
بوينوزو كؤتويه باتار
ها_ها _ها ،ها _ها _ها

سن تئز ايچر سن شوربانى
سن اينجيتمزسن بابانى
سن حيَطى سوپورورسن
سن زيبيلى گؤتوررسن

سن هاميدان تئز دورارسان
سن گئجه مورگو ووورارسان.

كئچى نين بوينوزو هاچا
كؤتوك توتوب قويمور قاچا

آى،كؤتويو ياران گلسين
كئچى نى قورتاران گلسين.



https://t.me/Adabiyyatsevanlar

اوشاق ادبیاتی
حئکایه : ویدا حشمتی

کیچیک " یاسمن "ین بؤیوک سئوینجی

سحر آچیلمیشدی.گونش هر گونکو کیمی ساری ساچلارینی یئراوزونه سرمیشدی .هر طرف ایشقلانیب، گؤزل بیر اسینتی آغاجلارین یارپاقلارین اوینادیردی . قارغا لار آغاجین باشیندا قاریلداییردیلار.چیچکلرین عطری هرطرفی بوروموشدو .
یاسمن آتا-آناسینین بیری-بیر دنه قیزی دیر .او چوخ ادبلی بیر اوشاقدیر .قوهوم -قونشو ایچینده هرزامان سایغیلی اولوب ،هرکس اونو سئویردی . همیشه یولداشلاریلا مئهریبان ایدی. بؤیوکلره سالام وئریب ،حؤرمت ائدردی .

یاسمن یوخودان دوروب ، آناسینا گون آیدین دئیه ندن سونرا ال -اوزونو یویوب اونو اؤپدو .آناسی اونا کیچیک بلله لرله ،شیرین چای حاضیر لامیشدی.یئییب ،ایچندن سونرا آناسیندان تشککور ائله دی .

آتاسی ایشه گئتمیشدی . هر گون تئز یوخودان دوروب ، آتاسینی یولا سالماق ایستردی آمما یوخویا قالیب اونو گؤره بیلمزدی .

یاسمن بو ایل اوخولا گئده جک
و سئوینجله اوخوللارین آچیلماسینی گؤزله ییر. بو ایل یازیب اوخماغی اؤیره نیب ،سئودییینی یازاجاق. هله اوخول دا یئنی یولداشلار تاپیب، اونلارلا اویناییب شادلیق ائله یه جک . آناسی اونا بیر گؤزل اوخول پالتاری تیکیب . یاسمن تئز-تئز ایشقابین قاپیسینی آچیب ، پالتارلارینا باخیر .
یاسمن له آناسی بوگون بازارا گئدیب، دفتر، میداد ،سیلگی و بیرده اوخولا لازیم اولان هرنه یی آلاجاقلار .
آناسی یاسمن دن ایسته ییب ،آلدیقلاریندان موغایات اولسون .
آتاسی اونلارا تاپیشیریب، بیر-نئچه دنه دفتر میداد دا آلیب ، یوخسول اوشاقلارا توحفه وئرسینلر.
یاسمن سئوینجک حاضیرلانیب آناسینین الیندن توتوب ،یولا دوشدولر .
یاسمن کوچه -خییاواندا آناسی نین الینی بوراخماز .
آنجاق بیزیم گؤزل یاسمن پیشیکدن قورخار . هرنه قدر کی آتا-آناسی تاپیشیرسا دا ، یاسمن گئنه ده قورخور . بو گون ائشییه چیخاندا ،هرزامانکی کیمی کوچه لرینده آغ-قارا پیشییی گؤردو . آناسینین الین سیخیب کنارا چکیلدی . بیردن ماشینین آلتیندان بیر بالا پیشیک چیخدی .خیرداجا گؤزلری ایله یاسمنه باخدی. سسی چیخار-چیخماز مییو-مییو ائله دی . یاسمن بالا پیشیگی گؤرونجه آناسینا دئدی :نه قدر بالاجا،نه قدر گؤزلدیر ایستیرم اونا ال وورام . آناسی سئوینیب ، دئدی :چوخ گؤزل ایش گؤرورسن . گرک حئیوانلارلا مئهریبان اولاسان . اونلار دا تانرینین گؤزل یاراتدیقلاریدیرلار. هله بو کیچیک پیشیک ده دونیا گؤزلی بیر بالادیر . یاسمن یاواشجا الینی اونا ساری آپاردی . بالا پیشیک نازلانا -نازلانا اؤزون یاسمنه سورتدو . یاسمن ایسته دی آیاغین چکه .آمما بو کیچیک پیشیک اوقدر گؤزل ایدی کی دایانا بیلمه ییب، اونو قوجاغینا آلماق ایسته دی .آناسی دئدی: اونو قوجاغینا آلا بیلرسن ، آمما ائوه قاییدان زامان گرک اللرینی یوواسان. یاسمن بالا پیشیگی قوجاغینا آلدی .اونون اورک دویونتوسونو اللرینده حیس ائدیردی . یاواشجا باشینی اوخشاییب، یئره بوراخدی . بالا پیشیک اینجه سسیله مییو-مییو ائله ییب ،آغ-قارا پیشییین بؤورونه سیغیندی .
ایندی یاسمن پیشییین قورخمالی اولمالدیغینی آنلامیشدی . آرتیق قرار وئرمیشدی . اوخولدا کی یولداشلارینی سئودییی کیمی ،حئیوانلاری دا سئویب،اونلارلا مئهریبان اولاجاق .

https://t.me/Adabiyyatsevanlar

اوشاق ادبیاتی

نازلامالار / یاغیش تیرینگه لری/هریس
توپلایان: مقصود تقی زاده هریس (نیسگیل)

آنالار کؤرپه لرینی قیچلارینین اوستونده یاتیردیب سیلکه یه رک اوخوردولار:
(1)
چالخام – چالخام یاغ اولسون
یاغلیجا قویماق اولسون
بالام یئسین ساغ اولسون
(2)
گؤزل قیزیم مس مسه
قوشلار وئرر سس سسه
داییلاری گلمه سه
خالالاری گلمه سه
بو قیزی وئرمم هئچ کسه
(3)
گؤزل قیزیم بی قطره
گئده چشمه دن سو گتیره
گتیره تؤکک آشیمیزا
پایلایاق قاپی – قونشوموزا
قاپی – قونشوموز ایچمه سه
هامیسین چکک باشیمیزا

(یاغیش تیرینگه سی)
(1)
یاغدی یاغیش لار
باننادی قوشلار
حیوان بیزیم په یه ده کی جامیشلار
(2)
یاغیش یاغار یاغا – یاغا
بیری دوشر بیزیم باغا
گلین گئدک اویناماغا
اویناماغین واختی دئییل
قیزیل گولون تاختی دئییل

https://t.me/Adabiyyatsevanlar

اوشاق ادبیاتی
آیهان بالامیز گوزل تبریز شهریندن کئچن هفته نین سوالینا جواب وئریب اوزوده دوز جواب.
ساغ اول آیهان جان .
گوزل بالالارسیزده سوالارین جوابین بیزه گوندرین .بوهفته ده سوالیمیز اولاجاق .

https://t.me/Adabiyyatsevanlar

آیهانین فلسفه سورغوسونا جوابلاری 👆👆👆

اوشاق ادبیاتی

قیسا فیلیم

🔸کارگردان: لِئُو بورنت
🔹محصول نروژ

https://t.me/Adabiyyatsevanlar

اوشاق ادبیاتی
اوشاقلار اوچون فلسفه
دونیادا هئچ نه آرادان گئتمیری ...

https://t.me/Adabiyyatsevanlar

اوشاق ادبیاتی
شعر : حبیب فرشباف

 «باهار»
 
 باشيم‌ اوسته‌ گونشين‌
ساچاق‌ - ساچاق‌ تئل‌لري‌،
 نفسيمدن‌ گئده‌ جك‌
قارين‌، بوزون‌ اثري‌.
 آياغيم‌ آلتدا چيمن‌
 اَتگيمده‌ گول‌ - چيچك‌،
 قارانقوشلار قاييدير
ائل‌لر اولور سئوينجك‌.
 ياغيش‌ ياغير، گون‌ چيخير
تاغ‌ قورور گؤي‌ قورشاغي‌،
 سئل‌لر، سولار شاريلدير
دره‌لردن‌ آشاغي‌.
 كاروان‌ - كاروان‌ آغ‌ بولوت‌
ماوي‌ گؤيده‌ دوزولور،
 ديمديگيندن‌ قوشلارين‌
بال‌ نغمه‌لر سوزولور.
 چيچكلرين‌ عطريندن‌
 فرحله‌ نيب‌ بير آندا،
 تازا پالتار گئييرلر
طبيعت‌ ده‌، انسان‌ دا.
 فروردين‌، ارديبهشت‌،
 خرداد منيم‌ اوچ‌ آييم‌.
 باهارام‌ من‌، باهارام‌،
 گوزه‌ل‌ ليكده‌ يوخ‌ تاييم‌.

https://t.me/Adabiyyatsevanlar