ادبیات سئونلر

اوشاق ادبیاتی
گوزل خوروزون ناغیلی

https://t.me/Adabiyyatsevanlar

359 viewsedited 03:25

اوشاق ادبیاتی
سحر خیاوی

یاشارین بایرام خاطیره سی

دوستلاریم گولمه سه لر؛ بیزیم بایرامدا لاپ اوزاق سفریمیز ائله بیر تالا باغیمیزا اولار.بو باغ رحمتلیک بویوک بابامدان ایرث قالیب بیزه.بایرام گونلری خصوصیله طبیعت گونو کوهنه پیکانیمیزا مینیب باغیمیزا گئدریک.آنام اوردا بیز اوچون اوجاقدا دوغا آشی بیشیرر.منله بالاجا باجیم چوپوغون باشین اوجاقدا یاندیریب اوزوموزه مشعل دوزلده ریک.الیمیزده مشعل اوجاقین دوره سینده سئوینجک ماهنی اوخویوب اوینایاریق.آتا آنام گوزلرین توستو گوینَدرکن بیزه باخیب فرحلنرلر.هم آغلاییب هم ده گولرلر.
آشی ایچندن سونرا بیرازدا کاباب یئیه ریک.اوجاقین کوءزونه ده یئرآلما باسدیراریق.یئمگین سونوندا قاپ-قارا چول چایدانیمیزدا اوجاق چایی قویاریق.آی نه ایچمه لی اولار.
ناهاردان سونرا آتام بیراز استراحت ائله ییب باغ ایشلرینه باخار.باجیملا من ده اوزاناریق.منله باجیم آغاجلارین آراسیندان ماوی گوءیه باخماقی سئوه ریک.فیکیریمیزده بولودلاردان دوزه لن شکیل لری بیربیریمیزه گوستَره ریک.هم ده یارپاقلارین گولگه سی اوزوموزده اویناغلاماسینا گوله ریک.گورورسوز بیزیم نه ساده و ال چاتمالی دیلخوشلوقلاریمیز وارمی؟بیلیرسیز می آتام کونوللو اولسادا بیزی سفره آپارا بیلمیر.هله دولو،شاختا،کولک،قارغا قویسا،آغاجدا قالان میوه نی کومکی اولمادیغینا ائله آغاج اوستونده ساتار.منفعتی چوخلوق دلال و بازاردا کیلار آپارار.آتاما ائله بیر شئی قالماز.آتام چوخ ایشله سه ده جیبی هئچ واخت چوخ پوللو اولماز.او سببه بیزی سفره آپارا بیلمز.زیرنگ اولسا قارنیمیزی دویورار.بیرازدا بیزه تزه پالتار آلار.
بیراز دینجَلندن سونرا منیله بالاجا باجیم قلمه لردن کوف آساریق.بیرازدا نایلون توپومیزلا چالیشاریق.
هله دئییم کی بیزیم باغدا ایکی باغا دا واردیر.بیری بویوک بیری بالا.اونلارلادا اویناریق.ایلبیزلره ده ماراقلی باخاریق.قاریشقالارین صف چکمه سینه داستان جورلاریق.هله باغدا بیردنه ده حنا رنگی دوشانیمیز وار.ایسته ریک اونلادا اوینایاق امما او بیزه توتوق وئرمَز.ائله باشیمیزی گورَن اوتلارین آراسیندان قاچار.
آغاجلاریمیز باهاردا الوان چیچکلر آچار.آغ،چوهرایی،قیرمیزی.بیز اونلاری درمه ریک.آتام دئییر: اونلار تاملی میوه لر اولاجاقلار.
بونلاردان سونرا باجیملا باغیمیزین کناریندان کئچن آرخین قیراغینا گئدریک.یئکه گیردکان آغاجیمیزین اوستونده قوشلارین سسیله،سویون سسی بیربیرینه قاریشیب ماراقلی بیر موسیقی یارادار.بیزیم بالاجا اوره گیمیزی اوخشایار.آیاقلاریمیزی سرین سویا قویوب،قیدیقلانیب، کئف ائله ریک.سونرا آرخدان چئشیدلی شومار داشلار تاپاریق.بو داشلارلا هم یئددی داش اوینایا بیله ریک هم ده اونلاری اوست-اوسته یوخسا بیربیرینین یانینا دوزمکله چئشیدلی شئیلر دوزلده بیله ریک.مثلن ائو،ماشین،آغاج، گول،آدام و....هر نمنه.بیرازدا قونشو چوبانین قوزولاریلا اوینایاریق.اونلارا الیمیزده تَر اوت یئدیرده ریک.
آخشام چاغی شافاق بالا-بالا قارالاندا وساییل لری پیکانیمیزا ییغیب ائویمیزه قاییداریق.چولون و گزمگین شیرین یورغونلوغو جانیمیزدا شیرین-شیرین اویاریق.بویودو منیم انشاءم نوروز تعطیلاتی باره ده.
اویرتمن دیقتیله یاشارین انشاسین دینله ییردی. انشاسین قورتاران اویرتمنین ایشاره سیله اویرنجیلر اونو آلقیشلادیلار.یاشارین اوزونده درین بیر گولومسه اوتورموشدو.اویرتمن گل ایره لی دئدی.دفترینی آلدی.بیر گویچک ییرمی نومره سی یاشارین انشا دفترین بزه دی.ییرمی نین دوره سینه ده قیزیل رنگلی قلمله یئددی دنه اولدوز چکدی.دفتری یاشارا قایتارارکن تئللرینی تومارلاییب یاشارا آفرین اوغلوم دئییب.قیزیل رنگلی قلمی ده اونا اودول وئردی.بونلا گوزل سوءزلر یاز،دئدی.
یاشار بالاجا اوره ک دویونتوسویله یوکسک گله جَگه فیکیرلَشیردی.
سونرا اویرتمن اوز توتوب اوشاقلارا دئدی:
"اوشاقلار یاشارین انشاءسی ائشیتدیگیم ان گوزل بایرام خاطیره لرین بیری ایدی. سفر ائله تکجه شَهَردن شهره گئتمک دئییل.ان گوزل سفرلر اوءز ایچیمیزده یارانا بیلر.بیر شرطیله کی،یاشار کیمی گوءز قولاغیمیزی یاخشی آچیب،اطرافیمیزی دیققتله ائشیده ک.اوندا یاخشی یازا بیله ریک.طبیعت آچیق کیتاب دیر.اونو درین دینله مک،اوخوماق و یازماق گره کیر".

https://t.me/Adabiyyatsevanlar