ادبیات سئونلر

220 viewsKamran Azari Kamran Azari, edited 04:50

اوشاق ادبیاتی
آغ کپنک

يازار : حسين فتاحي
چئويرن : ارسطو مجرد

7 دن 12 ياشا قه در اوشاقلار اوچون .

  بو ناغيلي  5 دن 7 ياشا قه در اوشاقلاراوچون اوجادان اوخوماق اولار .

بیر زامان بؤيوك بير چؤلده آغ بیركپه نك ياشاييردي . كپه نك لرين قانادلاري چوخ رنگلي اولور آنجاق بيزيم كپه نه يين قانادي يالنيز بير رنگ ده ايدي : آغ آپباق

آغ كپه نك چوخ اوزگون ايدي .هر كيمه چاتيردي دئييردي : : " سن منيم قانادلاريمي رنگلي ائده بيلرسنمي ؟ من چوخ ايسته ييرم بوتون كپه نك لر كيمي منيم ده قانادلاريم الوان اولسون " آنجاق كيمسه اونا دوزگون جاواب وئرميردي . اصلينده كيمسه بيلميردي  بير كپه نه يين قانادلاريني نئجه رنگله مك اولار  .

بير گون ، آغ كپه نك بير قيزيل گولون بوداغي اوستونده غملي غملي اوتورموشدو. بيردن بيره  بير ياشيل چريتكه توللانيب اونون يانيندا اوتوردو . ياشيل چريتكه  ميشارا اوخشار آياغيني بوداغا چكيب دئدي : " سالام كپه نك . "

كپه نك غملي سسيله  چريتكه نين جاوابيني وئردي . چريتكه دئدي : " دييه سن ناراحاتسان؟ دوغرو دئييرم ؟ ده گؤروم نه اولوب ؟"

آغ كپه نك  بالاجا بوينوزلاريني دبرديب  دئدي : " دوزدور ناراحاتام "

چريتكه دئدي  : آخي نه ايچون ؟ بو گؤزلليكده كپه نك بو ياشيل چؤلده ،اؤزوده بو چيچك بوداغي اوستونده ،  نييه توتقون اولماليدير ؟"

كپه نك دئدي : " قانادلاريما بير باخ . گؤرورسن تكجه بير رنگ ده ! آغ آپباق . آنجاق باشقا كپه نك لرين قانادي مين رنگ ده دير . يئنه دئييرسن ناراحات اولماييم ؟ منيم ده اوره ييم ايسته يير رنگلي قانادلاريم اولسون ، آنجاق بيلميرم نئجه ؟ "

ياشيل چريتكه ، يئنه آياغيني بوداغين اوزه رينه سورتوب دئدي : " ناراحات اولما . من دوشونورم كي  سنين ايشيني حل ائده بيلرم . "

كپه نك سئوينجله سوروشدو : " دوغرو دئييرسنمي ؟ بونو نئجه  ائده جكسن ؟ "

ياشيل چريتكه دئدي  : " من يئددي رنگلي  بير چتير چيچه يي تانييرام سن اونون شيره سيندن بير نئچه گون ايه ر ايچه سن ، قانادلارين رنگلي اولاجاق . "

كپه نك چوخ چوخ سئوينه رك سؤيله دي : " ياخشي ايندي او گؤزل چتير چيچه يي هارادادير ؟ ائوي هاياندادير ؟ ائوينين يولونو منه گؤستره بيلرسنمي ؟ "

ياشيل چريتكه بيرآز توللانيب  بوبيري بوداق دان او بيري بوداغين اوستونده اوتوردو ، ياشيل و اوزون بوينوزونو چؤلون بوجاغينا دوغرو دؤندريب دئدي : "  بو يانا ساري اوچسان گئديب چتير چيچه يينه چاتاجاقسان ."

آغ كپه نك دوشوندو كي داها آرزوسينا چاتماق ايسته يير ، او دئدي : " منيمله گليب اونو منه گؤستره بيلرسنمي ؟ "

چريتكه دئدي : " يوخ ! منيم چوخ ايشيم واردير . " سونراايسه توللانيب اورادان گئتدي .

كپه نك ، آغ قانادلارين آچدي . آتيليب گؤيرتي لرين اوستونده اوچماغا باشلادي .

بوتون  چيچك لره و گؤيرتي لره ديققت له باخيردي .  هر بير گؤيچك گوله چاتاراق اونون اوستونده اوتوروردو ، ديققتله اونا باخيب شيره سيندن بير آز ايچيب سونرا قاناد چايليب  گئديب باشقا بير چيچه يه چاتيردي .

كپه نك چوخلو گزيب دولانيب چوخلو رنگلي چيچكلر گؤردو ، اونلارين شيره سيني ايچدي و سوندا ياشيل چؤللويون او بيري يانينا چاتدي . چؤلون او بوجاغيندا ، گؤزو بير گؤزل چيچه يه دوشدو .  گولون يارپاقلاري ائشييه تؤكولركن گؤزل بير چتيره  بنزه ييردي .  اونون بوياسي دا گؤي قورشاغي كيمي يئددي  بويادايدي . آغ كپه نك، سئوينجله دئدي  : " تاپديم ، اينانيرام بودور. "

آغ كپه نك ، چتير چيچه يي نين بوداغي اوزه رينده  اوتوردو . بيرينجي اونا باخدي  . سونرا  اونو اييله ييب اؤزو ايله دانيشدي : " نئجه ده  قوخوسو خوشدور !"  ايندي اونون شيره سيني ايچمه يين واختي دي  . كپه نك گولون شيره سيندن ايچدي . اونون گؤزونده بو شيره بوتون باشقا گول لرين شيره سيندن مزه ليدي . آغ كپه نك  ائله اورادا قالدي . ايسته يير دي  قانادلاري رنگلي اولانا قه در ايچسين . نئچه دقيقه دن بير او گولون شيره سيندن بيرآز ايچيردي ؛ سونرا اوچور ، گزير و يئنه چيچه يين يانيندا اوتوروردو . بير يول  كپه نك چتير چيچه يي نين بوداغيندا اوتوراركن بير اينه ساتان دا گليب   چتير چيچه يي نين بوداغيندا اوتوردو . كپه نك نيگاران اولدو . قورخوردو اينه ساتان ، چتير چيچه ييني يئسين . اونا گؤره قاناد چاليب اينه ساتانين يانيندان كئچدي . اينه ساتان دا كپه نه يين اوچوماسيندان فرحله نيب  قاناد چاليب اورادان اوزاقلاشدي .

كپه نك قاييديب يئني دن گولون بوداغيندا اوتوردو . ايندي تام گؤزله ييردي كيمسه چتير چيچه يينه ياخينلاشماسين  . بير آز كئچدي . ميلچه يي قووالايان بير سئرچه گول بوداغينين يانيندا  اوتوردو . كپه نك قيشقيردي : " گؤزله ! "

سئرچه جوككولده ييب  گوله رك  اورادان گئتدي .

او گونو گئجه يه دك ، كپه نك چتير چيچه يي نين يانيندان اوزاقلاشمادي  و دفعه لرله اونون شيره سيندن ايچدي . گونش باتديقدان سونرا ، كپه نه يين قورخوسو چوخالدي

277 viewsKamran Azari Kamran Azari, 04:55