ادبیات سئونلر

؟ وئر اوْنو منه. من اونون نیشانلارینی بیلیرم.
قیز:
- یوخ، - دئدی. - آلتون اوزویون چوخ نیشانی وار. اوْنو آنجاق باغیشلایان بیلر، سن بیلمزسن.
بئیرک یئنه قوْپوزون چالدی، آوازلا دئدی:
آلا صاباح بوْز آیقیرین بئلینه مینمه‌دیم‌می؟ سنین ائوینین یانینا جئیرانلاری قوْومادیم‌می؟ سن منی یانینا چاغیرمادین‌می؟ سنینله مئیدان‌دا آت چاپیب، اوْخ آتیب، گولشمه‌دیک‌می؟ اوچ اؤپوب، بیر دیشله‌ییب، آلتون اوزویو بارماغینا کئچیرمه‌دیم‌می؟ سئویشدییین بامسی‌بئیرک من دئییلم‌می؟
بانی‌چیچک دوواغینی قالدیردی، اونون بنیزی قاچمیشدی، دوداقلاری تیترم-تیترم تیتره‌ییردی، هَیٓجانلا، تلاشلا، قوْرخویلا بئیره‌یین قوجالمیش صیفتینه، باتیق گؤزلرینه، آغارمیش ساچ-ساققالینا باخدی، افسونلانمیش کیمی اونا طرف ایکی آددیم آتدی. بئیرک الینی اوْنا طرف اوزاتدی، یومروغونو آچدی، اوْوجونون ایچینده تورپاق‌قاریشیق یوْوشان واردی. یوْوشان اییی بانی‌چیچه‌یین بورنونا دَیدی، بانی‌چیچک پیچیلتی‌یلا:
- یووشان اییی، - دئدی، بئیره‌یه طرف آتیلدی، سونرا بیردن دایاندی، جَلد چادیردان باییرا سیچرادی، آتلاردان بیرینه طرف قاچدی.
بانی‌چیچک آتلاندی، آتینا قامچی چکیب قاچدی، توْیا گلمیش قوناقلارین آراسیندان، اوْخ آتما مئیدانیندا توْپلانمیش ایگیدلرین ایچیندن، تعجّوبله اونا باخان قازانین، تورالین، قارا بوداغین یانیندان، سرخوش اوْلوب بیر طرفده سره‌لنمیش، دَلی قوْچه‌رین اوستوندن، اؤزونو ایتیریب چاشیب قالمیش یالینجیغین بؤیروندن چاپیب گئتدی، چؤل‌لردن-چمن‌لردن کئچیب بایات اوْباسینا چاتدی.
گؤزلری کوْر اوْلموش بَی‌بورا و آروادی آینا‌مَلک همیشه‌کی یئرلرینده، اوْبا کنارینداکی داشین اوزه‌رینده اوْتورموشدولار. بانی‌چیچک چاپاراق اونلارا یئتدی، آتی‌نین یویه‌نینی دارتدی. آت شاهه قالخدی، بانی‌چیچک اوجا سسله دئدی.
- هئی، قایین‌آتا. قایین‌آنا. قارا داغین ییخیلمیشدی، اوجالدی آخی! سولارین قوروموشدو، چاغلادی آخی! نئچه ایلین حسرتی اوغلون بئیرک گلدی آخی!
قایین‌آتا، قایین‌آنا موشتولوق منه نه وئررسینیز؟
بَی‌بورا یئریندن سیچراییب دئدی:
- دیلین اوچون اؤلوم گلین‌جیییم، یولونا قوربان اوْلوم گلین‌جیییم. یالان‌سا بو سؤزلرین گئرچک اولا، گلین‌جیییم.
بو محلده ایگیدلر و بئیرک چاپاراق گلیب یئتدی‌لر.
قازان:
موشتولوق بَی‌بورا، - دئدی. - اوغلون گلدی.
بَی‌بورا دئدی:
- اوغلوم اولدوغون اوندان بیله‌رم کی، چئچه‌له بارماغینی قاناتسین قانینی گؤزومه سورتسون. آچیلاجاق اوْلورسا اوغلوم بئیرک‌دیر.
بئیرک جلد چئچه‌له بارماغینی چرتیب قانینی آتاسی‌نین گؤزلرینه چکدی، بٓی‌بورانین گؤزلری آچیلدی.
بَی‌بورا:
- اوغول، - دئدی، - گؤرور گؤزومون آیدینی اوغول، توتار الیمین قووٰتی اوغول، ائویمین دیره‌یی اوغو‌ل.
آینا‌ملک:
- قیزیمین، گلینیمین چیچه‌یی اوغول، - دئدی.
آتا، آناسی، باجیلاری بئیره‌یی قوجاقلادیلار، آغلادیلار، گولدولر، گولدولر، آغلادیلار. قازان بانی‌چیچه‌یه، بئیره‌یه باخیب:
- یاخشی، دئدی، - هله بیر ایشیم وار. اوْنو ائتمه‌یینجه مورادا یئتمه‌رم. هانی یالینجیق؟ بئیرک آتینی گئری دؤندردی. ایگیدلر ده اونون آردینجا چاپدیلار...

https://t.me/Adabiyyatsevanlar