ادبیات سئونلر

قازانجیم

اسماعیل خرمی

بئش آلتی سیگارئت چکندن سونرا چالیشدیم بیر آز باشیمی یئره قویوب، گؤزومو یوموم. آنجاق سیگارئت چک‌مک هوه‌سی بیر آندا، منی یاتماغا قویمادی. نه قدر چالیشدیم، هئچ بیر چیخیش یولو تاپا بیلمه‌دیم. سیگارئت‌یمله، گئجه‌نین باغرینی یارسامدا بیتمه‌یینی ایسته‌میردیم. داها دوغروسو مندن سونرا، هامی، سحرین آچیلماسینی، گونش‌ین چیخماسینی گؤزله‌ییردیلر. من ایسه، ایسته‌ییردیم گئجه‌یه یاردیمچی اولاراق، بیر داغین باشینا چیخیب پوسو قوروب، کوچه‌ لاتلاری کیمی گونشین قاباغینی کسیب ساچلاریندان توتوب، دره آغزی آشاغی فریلادیم. سحرین گؤزونه کیرلی و اسگی پارچالاردان جیریب برک - برک باغلاییم. عؤمرومده ایلک کره اولاراق سحری کؤر گؤرمک ایسته‌ییردیم. بوگون، اؤنوموزه چیخان گونش و آچیلماغا تله‌سن سحر موطلق منیم دئییل‌دی. سویوقدان تیر - تیر اسسمده، گونش منیم جانیمی قیزدیرماغا گلمه‌یه‌جکدیر. سحرین منه گؤره، اوره‌یی دؤیونمه‌یه‌جک، سحری مندن بیرآز اوطرفه گودنلر، چوخدور. گونش‌ین چیخماقیندان، چوخلاری، شاعیر اولوب شعر‌ده یازاجاق‌لار، نغمه‌ده قوشاجاق‌لار رسمینی‌ده چکه‌جکلر. دئمک بو گونکو سحره‌، آداخلی گونشین‌ده ییه‌سی من دئییلم. منه دوشمن کسیلمیش چوخلاری کیمی، گونش، سحرله سئویشمه‌یه داوام ائدیب منی آشیب کئچه‌جک. پلمه‌لری ال‌لریله آراییب، اوستومه کیشنه‌یه‌جکدیر.
قاپی سسی گلدی. دئمک گونشله سحرین سئویشمه‌سی، باشلانمیشدی. ایکی کیشی ایچه‌ری گیردی. بیری، منه یازیقلیغی گلدیینی، سؤیله‌دی. باشقاسی، واختدیر دئیه اونو، تلسدیرمه‌یه چالیشدی. یئریمدن دورماق ایسته‌میردیم. چاره سیز ایدیم. ائله چاره سیز کی؛ الیم یئردن - گؤیدن اوزولوب، باشی اوسته یئره دوشموشدوم. روحو بدندن چیخان اؤلو کیمی، تاختا سوموک و یوموشاق اتدن و خیریم - خیردا خاطیره‌لریمدن باشقا هئچ نه‌ییم قالمامیشدی. گؤزومو یوموب، ذهنیمده، آراخامدا بوراخدیق‌لاریمین رسمینی چکیردیم. بوتون سئودیک‌لریم سانکی باشیما ییغیشمیشدیلار. هامیسی اللرینده، یاشادیغیم خاطیره‌لری گتیرمیشدیلر. خاطیره‌لر، اوچوردولار، آیاق توتوب یئرییردیلر. بیر - بیریله دانیشیردیلار، گولوردولر، آغلاییردیلار. منده اونلارا قوشولوب گولوب آغلاماق ایسته‌ییردیم. آنجاق گولوشلریمی چوخدان اونودوب، گؤز یاشیمی بیتیرمیشدیم. آیاغیمین آلتینا بیر- ایکی داش کرپیچ قویوب او اللره دیرماشیب چیخماق ایسته‌ییردیم. هئچ اولماسا، گؤزلریمی قالخیزیب اورا قویا بیلسه ایدیم! او اللری! او اللری بیر داها توتا بیلسه ایدیم. آجی - شیرین دادی وئرن بارماقلارین، ایچینه دوشوب چیلپاق‌جاسینا اوزمه‌یی دوشونردیم. باشیمی بیرینین قوجاغیندا کؤرپه‌بیر اوشاق کیمی، گیزلتمک و ایچینده ایتمک ایستردیم.
قول‌لاریمی بیر تیکه چؤره‌یه ساتمیشدیم، ندنسه آیاقلاریمدا منیم دئییلدی. دیزلریمین گوجونو، آنلاییب دوشوندویوم، آغیر یوللار، مندن چالمیش‌دیلار. ایزیمه دوشنلردن قورخموردوم. منی ایزله‌ییب منیم گونومه قالماق‌لاریندان قورخوردوم. گئتدییم یوللارین، دؤنوشو اولمادیغینی دوشونه‌رک، ایزلرینی، ایچیمده، گیزله‌دیب ساخلامیشدیم. اؤزگه بیر شهرین غوربت‌چیلیینده مأمورلاردان گیزلی ساخلانیب، ایتنلر کیمی، او ایزلری ایتیرمک ایسته‌میشدیم.
منه یازیقلیغی گلن آدام تپه‌دن – دیرناغا، منی سوزه‌رک یانینداکینا دئدی: «منجه اللرینی و گؤزلرینی باغلاماغا احتیاج یوخدور. بو بدبخت یئریندن‌ده ترپنه بیلمیر. اؤزونو بتر اودوزوب.» باشقاسی، قانون‌دور دئیه؛ اونا قارشی گلرک گؤزلریمی قارا و توزلو بیرپارچا ایله و اللریمی دمیر کلبچه ایله باغلادی. بیر- بیرینین یاردیمی‌لا آیاغا قالخیزدیلار. قاپی آچیلدی سالونا چیخدیق‌دا، سئودییم قادینی گؤردوم. اووجوندا سو گتیرمیشدی. یادیمدادی بیرگون، سو ایچمه‌یه قابیمیز یوخ ایدی. ایکی اووجومو آچیب دؤنه‌لرجه، اونا سو ایچیرتدمیشیم. سونرالار، بونو یادا سالیب گولردیک. من اونا قوزوم دییه‌ردیم، اودا منه چوبانیم. بیر - ایکی آددیم آتمیشدیم بیر سس ائشیتدیم: «هئی چوبانییییم، چوبانیم باخ سنه اووجومدا سو گتیرمیشم. ایسته‌ییرم؛ من سنه چوبان، سن منه، قوزو اولاسان، بیلیرم اللرین باغلیدی. اؤز باشینا سو ایچه بیلمزسن.» بو حالدا الیمدن یاپیشان عسگر، بیر آز منی بئلیمدن ایته‌له‌دی: «یئری قاپیدا هامی بیزی گؤزله‌ییر.» دئدی. آرخایا دؤنوب باخاندا داها اونو گؤرمه‌دیم.

ایکینجی قاپییا چاتمیشدیق. چیچک قوخولو قیزیم الینده، "او" ایسته‌ییب، من آلا بیلمه‌دییم اویونجاغی، گتیرمیشدی. منی گؤرجک اویونجاغی گؤسته‌ره‌رک دئدی: «ساغ اول آتا جان! یاخشی کی سونوندا، منیم ایسته‌دییم اویونجاغی آلدین. اؤپورم سنی.» گؤزومو یوموب کئشدیم. ایسته‌میردیم داها آرتیق ائشیدم. اوچونجو قاپی‌یا چاتماغی، گؤزومده دوغولان بیر دسته بولود کوچوک‌لری قویمادیلار گؤرم. سونونجو قاپی‌دا آتامین یالنیز قابارلی اللری واریدی. باشیمی اونلارا ساری توتوب اوره‌ییم ایسته‌دیی قدر اییله‌

216 viewsKamran Azari Kamran Azari, 12:56