ادبیات سئونلر

کیتاب تانیتیمی

چیرکین اؤردک بالاسی
کیتابدا گلن ناغیل لار

https://t.me/Adabiyyatsevanlar

251 viewsMarjan.m, 09:58

" اؤلوم له یاشام حیکایه سی "

سحر آچیلمیشدی
بیر مئشه نین آغاجلارینین اورتاسیندان گونش ایشقیلارین یئره ساچیردی یئر اؤزو یام یاشیل ایدی قوشلار او طرف -بو طرفه اوچوب نغمه لر اخویوردولار
حئیوانلار گئجه یوخوسوندان اویانیب بو گؤزل مئشه یی گزمه یه باشلادیلار .
اؤلوم قارا گئییمی یله اوزونه ماسکه تاخیب ، هر طرفه اوچوردو ,او هرنه یه ال ووروردو ,حیاتین باشا چاتدیریردی .
قوجا بیر قوش چیمنلیکده یئره دوشموشدو ,یورغون گؤزلرین یئره تیکیب حایاتدان کؤچمه سینی بکله ییردی .
اؤلوم اونا ساری اوچوب ,الیله قوشا توخوندو ,قوش گؤزلرین یوموب ،بوینونو چیینینه قویوب،حیاتا وداع ائتدی .

اؤلوم اوچوب ,هر طرفه گؤزدولاندیریردی .کیمه توخوناجاغینی آختاریردی
خسته بیر تولکونو گؤروب اونا ساری گئتدی .تولکو گؤزونو اؤلومه تیکدی ,اؤلوم سویوق الیله تولکویه توخوندو ,تولکو باشینی یئره قویوب گؤزلرین یومدو .
اؤلوم یئنه اوچماغا باشلادی ,گلیب بیر یئرده دایاندی .نئچه جئیران , چیمنلر اوسته اوتاریردیلار . بیر آن گنج بیر جئیرانلا گؤز -گؤزه گلدی .گنج جئیران اؤلومله قارشی -قارشییا قالیب ، اونون گؤزلرینه باخدی .اؤلوم ایلک باخیشدا وورولموشدو . اونا یاخین گئدیب سئودیگیندن ,توخونماق ایسته دی ,الینی جئیرانا ساری اوزالتدی جئیران اؤلومه یاخینلاشدی ،آمما اؤلوم بیر آن اؤزونه گلیب الین چکدی .
جئیران آتیلیب چایدان کئچدی .اؤلوم ده اونون آرخاسیجا.

اؤلوم اوگونون اوزونون اوزاقدان گنج جئیرانی سئیر ائتمکله کئچیرتدی .هاوا قارانلیقلامیشدی .آی مئشه نی گیزلی بیر ایشقلا بوروموشدو .جئیران یئره چؤکوب باشینی اللری اوسته قویوب درین بیر یوخویا دالدی .اؤلوم اونا یاخینلاشیب سئوگی دولو گؤزلرین جئیرانا تیکدی توخونمادان اونون یانیندا یوخلادی .
گونش هر گونکو کیمی داغلارین آرخاسیندان چیخیب ساری تئللرین چیچکلرین اوستونه سرمیشدی .آغاج باشینداکی قوشلارین اوخوماغی ,آخار چایین سسینه قاریشیب ,بیر گؤزل موسیقی اولوشدورموشدو .
جئیران یوخودان دوروب سئوینجک اؤلومه باخدی ,قاچماغا باشلادی . شنلیکله مئشه نی , دولانماغا باشلادی .اؤلوم ده اونون آرخاسیجا گئدیردی.جئیران یئمک یئینده اوتوروب اونو سئوگیله سئیر ائدیردی .جئیران دا اونا سئوگیله باخیردی .
یاغیش یاغان زامان اؤلوم بیر چتیر کیمی جئیرانین باشی اوستونده دوروب ,اونو یاغیشدان قورویوردو .
آرتیق بیر -بیریندن هئچ آیریلماییردیلار گئجه لر بیرلیکده اؤتوروب آیین گؤزللییینه باخیب یوخویا دالیردیلار .گوندوزلر ده بیرلیکده گزیب دولانیردیلار .
گونلر ,آیلار کئچیردی اؤلوم ,جئیرانی یالنیز بوراخماییب اونو هر جوره بلادان ,قاردان -سویوقدان قوروریوردو .
قیش کئچیب گئتدی ,قارلار ارییب سو اولدو .باهار یئنی یاشیللیقلار لا اوزه چیخدی .
بیر گون جئیران یولداشلارینی گؤروب،اونلارلا گئتمک ایسته دی .اؤلوم دایانیب اوزاقدان گنج جئیرانا باخیردی .اوره یین کدر توتموشدو .اوندان آیریلماق چوخ چتین گلیردی .
گنج جئیران اؤلومه یاخینلاشیب اونونلا وداع ائتمک ایسته دی ,آمما اؤلوم اوزاقلاشدی .جئیران یئنه اوزونو اؤلومون الینه یاخینلاتدی .اؤلوم الین چکمه دی .جئیرانین اوزو اؤلومون الینه توخوندوقدا جئیران یئره دوشوب جان وئردی .
اؤلوم گونلر -گئجه لر جئیرانین اؤلوسونون باشیندا اوتوروب ,یاس توتدو .سونرادا غم -کدر ایچینده اولان اوره یین جئیرانین یانیندا بوراخیب اوچوب ,اوزاقلاشدی .

ویدا

بو یازی بیر انیمئیشئن اوزه ریندن یازیلیب

https://t.me/Adabiyyatsevanlar